Jehova Guuti ilisarisimaneqartariaqartoq

TAKORLOORSINNAAVIUK inuuninni pingaarutilerujussuarmik misigisaqanngitsoorlutit? Taama pisoqarsinnaavoq Guuti immannguaannaq nalunngisaqarfigigukku. Sooq? Guuti Biibilimi eqqartorneqartoq ilisarisimalluassallugu pingaaruteqartorujussuugami. Inuit millionillit tamanna misigisimavaat. Guutimik ilisarsinerit maannakkut siunissamilu ungasissumi allaat iluaqutigissavat.

Jehova Guutip, Biibilip atuakkiortuata, kissaatigaa ilisimassagitsinni ilisarisimalerlugulu. Tussiaasiortoq allappoq: „Paasitserlugu illit kisivit, aqqit tassaasoq [Jehova], qutsinnerussaartuusutit nunarsuarmi tamarmi.“ Nalunngilaa taassuminnga ilisarisimanninnerput uagutsinnut iluaqutaaginnassasoq. „Uanga tassa [Jehova], Guutit, iluaqutaasunik ilinnik ajoqersuisoq.“ Qutsinnerussaartoq Guuti, Jehova, ilisarisimallugu qanoq uagutsinnut iluaqutaasinnaagami? — Tussiaat 83:19; Esaja 48:17.

Ilaatigut ulluinnarni ajornartorsiutinut akiuunissatsinnut ikiorneqassaagut, patajaatsumik siunissaqalerluta tarnikkullu eqqissilluta. Aammattaaq ullumikkut kikkunnit tamanit apeqqutigineqartartunut, apeqqutinut tunngaviusunut, allaanerusumik isumaqarfiginnilissaagut. Apeqqutit suut eqqarsaatigineqarpat?

Inuunerit siunertaqarpa?

Naak teknologitigut tupinnaannartumik siuariarneqaraluartoq apeqqutit tunngaviusut suli inuit apeqqutigisarpaat: ’Sooq maaniippugut? Sumununa ingerlasugut? Inuunerup suna siunertaraa?’ Apeqqutinut taakkununnga naammaginartumik akissutissaqanngippat inuuneq siunertaqavissimassanngikkaluarpoq. Inuppassuit inuuneq siunertalik amigaatigaat? 1990-kkut naalerneranni Tysklandimi misissuinerup takutippaa aperineqartut affaasa akulikitsumik ilaannikkulluunniit inuunertik siunertaqanngitsutut misigisaraat. Immaqa illit aamma taama misigisimavutit?

Inuuneq siunertaqanngippat inuk inuunerminik ineriartortitsinissaminik toqqammavissaqanngilaq. Amerlasuut tamanna matussuserniartarpaat atorfimminnik qaffassarlutik imaluunniit ikinngitsunik aningaasarsiorlutik. Sulili amigaateqartuartarput. Ima ingasatsigilersinnaavoq, allaat inuunermik siunertaqannginneraasut inoorusussuseeruttarlutik. International Herald Tribune-mi atuarneqarsinnaavoq arnaq inuusuttoq pinnersoq taama misigisimasoq. „Amigaateqarnani inuuvoq, pisuujulluni pigissaartuullunilu“. Taamaakkaluartorli kiserliorpoq inuunerlu siunertaqanngitsutut isigalugu. Sininnartunik iisartagartorpoq, toqungasorlu nassaarineqarluni. Immaqa illit aamma nalunngisaqarputit assingusumik atugaqarsimasumik alianangaartumik inuunerminik kipititsiinnarsimasumik.

Immaqa tusagaqarsimassaatit oqartumik ilisimatusaatitigut inuuneq pillugu tamanik paasitinneqarsinnaasugut. Tyskit atuagassiaataani sapaatip-akunneranut saqqummersartumi Die Woche-mi atuarneqarsinnaavoq: „Ilisimatusaatitigut paasisat annertugaluartut upperisaqarnikkut ilisimasat amigaqaat. Pinngoriartuaarsimaneraaneq ullutsinnut naleqqukkunnarsimavoq,  allaat pinngortitap pissusiini (kvantefysikken) aalajangersimasumik oqaatigineqarsinnaanngitsorpassuit toqqissisimajunnaarutaaginnartarput.“ Ilisimatusaatitigut paasisat tunngavigalugit inuuneq assigiinngitsorpassuartigut nassuiarneqarsinnaalersimavoq, inuunerullu ingerlaasia uumassusillillu atajuarnissaat nassuiarlugit. Taamaakkaluartorli ilisimatuut oqaluttuussinnaanngilaatigut sooq, aammalu suna siunertaralugu maaniinnersugut. Ilisimatuut upperiinnarniarutsigik inuunerup siunertaanik apeqqutivut akineqanngisaannassapput. Tamatuma kinguneraa, soorlu Süddeutsche Zeitung allattoq, „siunnersorneqartariaqarneq ilitsersorneqartariaqarnerlu pisariaqartinneqartorujussuanngorput“.

Kia allap pinngortitsisoq sinnerlugu tamatuminnga siunnersorsinnaanerussavaatigut? Taannaavoq inunnik nunamut inissiisoq, taamaattumik nalunnginneruaa sooq maaniinnersugut. Biibilimi nassuiarneqarpoq Jehovap inuit pinngortikkai nunarsuarmi najugaqartussatut, sissuerlugu paaralugulu. Suliamikkut Jehovap pissusii assiginiartussaavaat, soorlu naapertuilluarneq, ilisimassuseq asanninnerlu. Nalunngikkutsigu sooq Jehovap inuit pinngortikkai, nalussanngilarput sooq maaniinnerluta. — 1 Mosesi 1:26-28.

Qanoq iliorsinnaavit?

Qularnanngilaq apeqqutit uku siornatigut naammaginartumik akissutissarsisimanavianngikkitit: ’Sooq maaniippunga? Sumut ingerlavunga? Aamma inuunerup suna siunertaraa?’ Biibilimi kajumissaarneqarpugut Jehova ilisarisimallualissagipput. Jiisusi oqarpoq: „Inuunerlu naassaanngitsoq tassaavoq ilinnik, ilumut kisimi Guutiusumik aallartitannillu Jiisusi Kristusimik, ilisimanninneq.“ Aamma pissutsit Jehovap ilisarnaatai, ingammik asanninneq, ineriartortissagitit kajumissaarneqarputit, aammalu Guutip naalagaaffiata ataani inuunissaq anguniagarissagit. Taava inuunerit siunertaqalissaaq, aammalu patajaatsumik siunissamilu nuannersumik neriuuteqalissallutit. Apeqqutit tunngaviusut siornatigut eqqarsaatigisarsimasatit qularutissaanngitsumik akineqassapput. — Johannesi 17:3; Oqaluussisartup oqaasii 12:13.

Suna allaassutigigamiuk? Tamanna Heinzip misigisimavaa. * Ukiualunnguit qaangiuttut Guuti erseqqarinngitsumik takorluuginnarsimavaa, upperneralu inuuneranut sunniuteqarsimanani. Heinzi ikiaroortarpoq, tamalikattuulluni, inupiluaraalluni motorcykelinullu silaqarani. „Inuunerli siunertaqanngilaq naammaginartuunanilu,“ nassuerpoq. 25-t missaani ukioqarluni aalajangerpoq Guuti kinaanersoq paasiniarlugu Biibili atuarniarlugu. Jehova ilisarisimaneruleramiuk inuunerullu siunertaa paasilerlugu inuunini allanngortippaa, Jehovallu Nalunaajaasuisa ilaattut kuisilluni. Maannakkut ukiuni qulini piffissaq tamaat atorlugu oqaluussisartooreerpoq. Ilumoorluni oqarpoq: „Jehovamut kiffartorneq inooriaasiuvoq pitsaanerpaaq. Sunaluunniit tassunga naleqqiunneqarsinnaanngilaq. Jehova ilisarilerneratigut inuuneq siunertalik nassaaraara.“

Apeqqut inuunerup siunertaa pillugu kisiat paasissallugu amerlasuut naammaginngilaat. Silarsuaq ajorsigaluttuinnartillugu amerlanerujartuinnartut apeqqut alla eqqarsaatigigaluttuinnarpaat.

Sooq taama pisoqarpa?

Alianartumik unamminiarnartumillu pisoqartillugu apeqqut eqqarsaatigineqakkajuttartoq tassaavoq: Sooq taama pisoqarpa? Taamatut atugaqarneq anigorsinnaajumallugu akissut eqqortoq pisariaqarnerpaavoq. Naammaginartumik akissuteqanngippat misigisimasaq nanertuutaajuassaaq, tamannalu nikallorsaataaginnassalluni. Tamanna Brunip misigisimavaa:

„Ukiualuit matuma siornatigut paninnguara toqukkut annaavara,“ oqaluttuarpoq. ”Guuti upperaara, taamaattumik naatsorsuutigaara  palasip tuppallersarsinnaassagaanga. Oqaluttuuppaanga Guutip Susanne qilammi imminut pisissimagaa, maannalu tassani inngiliulluni. Susannep toqunerani inuunera isamiinnanngilaq, maannali aamma Guuti kamaattorujussuanngorpara paninnguannik arsaarmanga.“ Bruni naalliuuteqartuarpoq annaasaqarsimaninilu ukiorpassuarni aliasuutigalugu. „Taava Jehovap Nalunaajaasuisa ilaata Biibilimiit takutippaanga Guuti kamaatissallugu tunngavissaqanngitsoq. Susanne imminut pisissimanngilaa inngiliunanilu. Napparsimaneranut naammalluinnanngissuseq kingornunneqartartoq pissutaavoq. Susanne toqumi sinippoq Jehovamillu makitinneqarnissani utaqqillugu. Aamma ilikkarpara Guutip inuit nunami paratiisiusumi naassaanngitsumik inuusussanngorlugit pinngortissimagai, tamannalu ungasinngitsukkut piviusunngorumaartoq. Jehova qanoq ittuusoq paasiartulerakku tassunga qanimut attaveqalerpunga, aliasunneralu annikilliartulerpoq.“ — Tussiaat 37:29; Apustilit Suliaat 24:15; Romamiut 5:12.

Inuit millionillit arlaatigut unamminiarnartunik eqqorneqartarput. Inuttut atukkatigut, sorsunnermi, kaannersuarmik pinngortitalluunniit piliaanik eqqugaasoqarsinnaavoq. Brunip Biibilimiit paasigamiuk Jehova alianartunut ajunaarnernullu pisuunngitsoq, inuit naalliunnissaat siunertarisimanngisaannaraa, ungasinngitsukkullu ajortut tamaasa suujunnaarsikkumaarai aliasunneranut katsorsaataavoq. Ajortut ingasatsikkaluttuinnarnerat takussutissaavoq, aaqqissuusaanermi matumani „ullussani kingullerni“ inuusugut. Pitsaanerusunut allanngoriarnissarujussuaq qanillivoq. — 2 Timotheusi 3:1-5; Matthæusi 24:7, 8.

Guuti qanoq ilinniarneqarsinnaasoq

Heinzi Brunilu siornatigut Guuti pillugu erseqqarinngitsumik ilisimasaqarsimapput. Ilisimasaqarfigivallaarnagulu upperaat. Piffissaqarfigilluarlugu ilinnialeramikku ilungersornerat akilerneqarpoq. Ullutsinni apeqqummut pingaaruteqarnerpaamut naammaginartumik akissutissarsipput. Tarnikkut eqqississutigaat siunissamillu patajaatsumik neriuutissaqalerlutik. Angutit arnallu amerlasuut maanna Jehovamut kiffartortut assingusunik misigisaqarsimapput.

Jehova ilisariniaraanni Biibili, Jehova pillugu qanorlu piumasaqarneranik imalik, misissorneqaqqaartariaqarpoq. Ukiuni hundredelinni siullerni aamma taamaaliortoqartarpoq. Nakorsap oqaluttuarisaanermilu ilisimasallip, Lukasip, allaatigaa Berøami ilagiit juutiusut ’oqaaseq [Paulusimiit Silasimiillu] kajumeqalutik ilassigaat, ullullu tamaasa Allakkat misissuiffigisarpaat paasiniarlugu ilumut taamaannersut’. — Apustilit Suliaat 17:10, 11.

Ukiuni hundredelinni siullerni kristumiut aamma ilagiinni katersuuttarput. (Apustilit Suliaat 2:41, 42, 46; 1 Korinthimiut 1:1, 2; Galatiamiut 1:1, 2; 2 Thessalonikamiut 1:1) Ullumikkuttaaq taamaattoqartarpoq. Jehovap Nalunaajaasui ataatsimiinnernut katersuuttarput, pingaartumik ataasiakkaat Jehovamut qanittumik attaveqalernissaannik ikiorniarlugit, tassungalu nuannaarlutik kiffartorsinnaaqqullugit. Tamanna iluaqutaasumik allatut sunniuteqartarpoq. Guuti kiffartorfigisarput assigilersinnaavarput, aamma — naak killeqaraluarluta — pissusiisa assinganik pissuseqalersinnaavugut. Pissutsinik taamaattunik ineriartortitsiniartut ilagisarlugit Jehova ilikkarneqarnerusinnaavoq. — Hebræerit 10:24, 25.

Ataasiinnaap ilisarisimalerniarnera ilungersunarpasippa? Soorunami ilungersornissaq pisariaqarpoq. Kisiannimi inuunermi angorusutarpassuatsinnut tamaviaartannginnerpugut? Eqqarsaatigilaariakkit timersullammaat sungiusarniarlutik tamaviaartarneri. Sisorarnermi silarsuarmi timersorlutik unammisaqattaarneranni kuultinnassimasoq, Jean-Claud Killy, timersornerup silarsuaani angusaqarluarniarluni qanoq iliortoqartariaqarneranik oqaluttuarpoq: „Ukiuni qulini sioqqullugu anguniagaq pilersaarutigisariaqarpoq ullullu tamaasa eqqarsaatigalugu . . . eqqarsartaatsitsigut timikkullu ullut tamaasa  sulinissaq pisariaqarpoq, ukiup ullui 365-usut tamaasa.“ Piffissaq ilungersornerlu taama annertutigisut atortariaqarput, unamminermi immaqa minutsinik quliinnarnik sivisussusilimmut. Jehova ilinniarlugu annertunerungaartumik ataavartumillu iluanaarnarnerungaarpoq!

Guutimut qaninnerulersitsisoq

Inuunermi pingaaruteqarluinnartoq kia annaarusuppaa? Arlaannattaluunniit naamik. Misigiguit inuunerit ilumoortumik siunertaqanngitsoq, imaluunniit sooq alianartunik unamminiarnartunillu nalaataqartarnitsinnik akissutissarserusukkuit, taava Guuti Biibilimi eqqartorneqartoq, Jehova, ilinniarusullugu aalajangerit. Imaassinnaavoq inuunerit naassaanngitsumik pitsaanerusumut allanngortissinnaagaa.

Jehova ilisarisimalluinnalersinnaavarput? Ukiorpassuarni Jehovamut kiffartortut suli ullumimut taanna pillugu ilikkakkatik tupigusuutigisarpaat, sulilu ilikkagaqarfigisarlugu. Tamakkua inuuneq siunertaqalersittarpaat Jehovamullu qaninnerulersitsisarlutik. Qanortoq apustili Paulusitut oqarsinnaagisa: „Ilami Guutip pisuussusiata ilisimassusiatalu siuneqassusiatalu itissusiat! Ilami eqqartuussinerisa paasiniarneq ajornassusii aqqutaasalu siunersissaanngissusii! Kiammi [Jehovap] eqqarsaatai ilisimavai, kinalu siunnersortigisinnaavaa?“ — Romamiut 11:33, 34.  (wE 2/15 03)

[Quppernerup ataani ilanngussaq]

[Qupp. 5-mi issuagaq]

Inuit ullumikkut suli apeqqutit tunngaviusut apeqqutigiuartarpaat: ’Sooq maaniippugut? Sumut ingerlavugut? Inuunerup suna siunertaraa?’

[Qupp. 6-mi issuagaq]

„Jehova qanoq ittuusoq paasiartulerakku, tassunga qanimut attaveqalerpunga“

[Qupp. 7-mi issuagaq]

„Jehovamik kiffartorneq inooriaasiuvoq tamanik pitsaanerpaaq. Sunaluunniit tassunga naleqqiunneqarsinnaanngilaq“