Naalakkap unnukkorsiortitsinera ilinnut qanoq pingaaruteqarpa?

„Taamaattumik qinngaqqunnarluni timiusamik tamatuminnga nerisoq Naalakkalluunniit ermusianit imertoq Naalakkap timaanut aavanullu ajortuliorpoq.“ — 1 KORINTHIMIUT 11:27.

1. 2003-mi pisussaq pingaarnerpaaq pilersaarutigineqartoq sunaava, qangalu qanorlu nalliuttorsiorneq tamanna pilersinneqarsimava?

UKIUMI 2003-mi pisussaq pingaarnerpaaq pilersaarutigineqartoq apriilip ulluisa 16-ianni seqernup tarrinnerata kingorna pissaaq. Tamatuma nalaani Jehovap Nalunaajaasui ataatsimiissapput Jiisusi Kristusip toqunera pillugu eqqaaniaaneq nalliuttorsiutigalugu. Soorlu allaaserisami siulianiittumi eqqaaneqartoq, Jiisusip nalliuttorsiortarnissaq tamanna, aamma Naalakkap unnukkorsiortitsineranik taaneqartartoq, pilersippaa ukiumi 33-mi nisanip 14-iani apustilinilu juutit poorskiat nalliuttorsiutigereeramikku. Timiusaq seernarsaateqanngitsoq viinnilu aappalaartoq eqqaaniaalluni nalliuttorsiornermi atorneqartartut, Jiisusip timaanut ajorteqanngitsumut aavanullu kuisamut — pilliummut inuiaat ajortimit toqumillu kingornussaminnit utertinneqaatigisinnaasatuaannut — assersuutaapput. — Romamiut 5:12; 6:23.

2. Korinthimiunut allakkat siulliit 11:27-mi qanoq mianersoqqussuteqarpa?

² Assersuutinik ilangiisut qinngaqqunnarlutik taamaaliortariaqanngillat. Apustili Paulusip tamanna erseqqissarpaa kristumiut Korinthitoqqamiittut allaffigigamigit, tassani Naalakkap unnukkorsiortitsinera eqqortumik nalliuttorsiutigineqanngimmat. (1 Korinthimiut 11:20-22) Paulusi ima allappoq: „Qinngaqqunnarluni timiusamik tamatuminnga nerisoq Naalakkalluunniit ermusianit imertoq Naalakkap timaanut aavanullu ajortuliorpoq.“ (1 Korinthimiut 11:27) Tamanna qanoq paasisariaqarpa?

Eqqaaniaasut ilaat qinngaqqunnarlutik nalliuttorsiortut

3. Korinthimi kristumiorpassuit Naalakkap unnukkorsiortitsineranik nalliuttorsiutiginninnermi qanoq pissusilersortarpat?

³ Korinthimi kristumiorpassuit qinngaqqunnarlutik eqqaaniaallutik nalliuttorsiorput. Akornanni avissaartuuttoqarpoq, sivisungaatsiartumillu ilaasa nerisassatik nassartarpaat, ataatsimiinnerlu sioqqullugu ataatsimiinnermiluunniit killeqanngitsumik nerisarlutillu imertarput. Eqqarsaatimikkut anersaakkullu eqqumasuunngillat, tamannalu pissutigalugu ’Naalakkap timaanut aavanullu ajortuliorput’. Aammattaaq nerisimanngitsut kaattarput  eqqarsaataallu allamut sangutinneqartarlutik. Tamatuma kingunerisaanik amerlasuut assersuutinik ilangiipput eqqortumik ataqqinninnatik nalliuttorsiornerullu pingaaruteqassusia paasinagu. Tupinnanngilaq imminnut eqqartuunneqaatissimmata! — 1 Korinthimiut 11:27-34.

4, 5. Eqqaaniaalluni nalliuttorsiornermi assersuutinik ilangeeqataasartut imminut misissornissaat sooq pingaaruteqarpa?

⁴ Ukiut tamaasa eqqaaniaalluni nalliuttorsiornissaq qanilliartortillugu, assersuutinik ilangeeqataasartut tamarmik imminut misissornissaat pingaaruteqarpoq. Nereqatigiinnermut tamatumunnga eqqortumik peqataassagunik, anersaakkut peqqissuusariaqarput. Jiisusip pilliutaanik ataqqinninngitsoq, allaalluunniit immaqa narruginnittoq, ’Guutip innuttaanit persitaanissaminut’ navianartorsiorpoq, Israelikkutut mingussimatillutik nereqatigiissutissatut pilliutigisamik nereqataasutut. — 3 Mosesi 7:20; Hebræerit 10:28-31.

⁵ Paulusip eqqaaniaalluni nalliuttorsiorneq Israelitoqqami nereqatigiinnermut assersuuppaa. Eqqaaniaalluni unnukkorsiornermi ilangiisut Missiarsimik peqatiginnittutut oqaatigai, nangillunilu oqarpoq: „[Jehovap] ermusia anersaapiluillu ermusiat tamaasa imerfigisarsinnaanngilasi. [Jehovap] nerliutaa anersaapiluillu nerliutaat tamaasa ilangiiffigisarsinnaanngilasi.“ (1 Korinthimiut 10:16-21) Eqqaaniaalluni nalliuttorsiornermi assersuutinik ilangeeqataasartoq ingasattumik ajortulioruni, Jehovamut nassuerutigisariaqarpaa, aammattaaq ilagiinni utoqqaanertanut anersaakkut ikiortissarsiortariaqarpoq. (Ussatit 28:13; Jaaku 5:13-16) Peqqissimiguni, allamillu isumataarnerminut naapertuuttumik inerititaqaleruni, assersuutit qinngaqqunnarluni ilangiiffigissanngilai. — Lukasi 3:8.

Eqqaaniaalluni nalliuttorsiornermi ataqqinnillutik isiginnaartut

6. Kikkuinnaat Guutip immikkut pisinnaatitaaffilerpai Naalakkap unnukkorsiortitsinerani assersuutinik ilangiisinnaatillugit?

⁶ Ullumikkut Kristusip qatanngutaasa 144.000-it sinnerinut ajunngitsuliortartut Naalakkap unnukkorsiortitsinerani timiusamik nerisariaqarpat viinnimillu imertariaqarlutik? (Matthæusi 25:31-40; Saqqummersitat 14:1) Naamik. Immikkut pisinnaatitaaffik tamanna Guutip anersaaq illernartumik ’Kristusip kingornusseqatissaasut’ tanitaannarminut tunniuppaa. (Romamiut 8:14-18; 1 Johannesi 2:20) Guutip naalagaaffiata aqutsinerani nunarsuarmi paratiisimi naassaanngitsumik inuunissamik neriugisallit qanoq iliortariaqarpat? (Lukasi 23:43; Saqqummersitat 21:3, 4) Kristusimut kingornusseqataasussaannginnamik, qilammilu inuunissamik neriugisaqaratik, eqqaaniaalluni nalliuttorsiorneq ataqqinnillutik isiginnaartutut najuuffigisarpaat. — Romamiut 6:3-5.

7. Ukiuni hundredelinni siullerni kristumiut eqqaaniaalluni nereqatigiinnermi ilangiisussaanertik qanoruna ilillutik nalunngikkaat?

⁷ Ukiuni hundredelinni siullerni kristumiut ilumoortut anersaaq illernartumik taninneqarput. Ilarpassui ataatsimik arlalinnilluunniit anersaap tunissutanik tupinnartuliortitsisinnaasunik, assersuutigalugu oqaatsinik allanertanik oqalussinnaanermik, tunineqarput. Taamaammat taakkua Guutip anersaavanik taninneqarsimanertik eqqaaniaallunilu nalliuttorsiornermi assersuutinik ilangiisussaanertik paasiuminaatsinngilaat. Ullumikkut kristumiut anersaaq illernartumik taninneqarsimanerlutik oqaatsit isumassarsiarititaasut imaattut tunngavigalugit paasisinnaavaat: „Guutip Anersaavanit ingerlatinneqartut tamaasa Guutip qitornarai. Tunineqarsimanngilasimi anersaamik inussiaatitsisumik kingumut siooralersitsisumik, tunineqarsimavusili anersaamik qitornaassuseqartitsisumik taassumuunalu ima torlulavugut: Abba, Ataataq!“ — Romamiut 8:14, 15.

8. ’Qajuusiassat’ ’naasupiluillu’ Matthæusi kapitali 13-imi eqqaaneqartut kikkuuppat?

⁸ Ukiuni hundredelikkuutaani tanitat ilumoortut ’qajuusiassatut’ narsaammi ’naasupilunnik’, kristumiunik eqqunngitsunik, ulikkaartumi naajartorput. (Matthæusi 13:24-30, 36-43) 1870-ikkunninngaanniit ’qajuusiassat’ erseqqinnerujartuinnarsimapput, ukiualuillu tamatuma kingorna nakkutilliisut kristumiut tanitat ima oqarfigineqarput: „Ilagiinni utoqqaanertat . . . eqqaaniaalluni nalliuttorsiornermi katersuuttut piumasaqaatinik paasitittariaqarpaat: 1) Aammut [Jiisusip aavanut] upperneq aamma 2) Naalakkamut kiffartorneranullu toqu tikillugu tunniulluinnarneq. Taava taama isumallit taamalu tunniulluinnarsimasut tamaasa Naalakkap toquneranik eqqaaniaalluni nereqatigiinnermut peqataaniassammata qaaqqusariaqarpaat.“  — Studier i Skriften, atuagaq VI, Den nye Skabning, qupperneq 526. *

’Savanik allanik’ katersuineq

9. ’Amerlangaartut’ kikkuunersut 1935-mi qanoq erseqqissarneqarpa, eqqaaniaallunilu nalliuttorsiornermi assersuutinik ilangeeqataasartut ilaasa qanoq killinneqaatigaat?

⁹ Ukiut ingerlaneranni Jehovap peqatigiissortaasa Jiisusip ajoqersugaasa tanitat saniatigut aamma allat eqqarsaatigilerpaat. Tamatumunnga atatillugu 1930-kkut qeqqata missaani maluginiarnartumik pisoqarpoq. Tamatuma siorna Guutip innuttaasa ’amerlangaartut’, Saqqummersitat 7:9-mi eqqaaneqartut, katersatut pingaannginnerusutut anersaakkut ittutut isigaat. Taamani isumaqarput katersat taakku qilammi 144.000-t tanitat makitinneqarsimasut ilagissagaat, Kristusip nuliassaata ikinngutaasut niviarsiartaasulluunniit. (Tussiaat 45:15, 16; Saqqummersitat 7:4; 21:2, 9) 1935-mili, maajip 31-ani, Jehovap Nalunaajaasuisa ataatsimeersuarneranni Washington D.C.-mi oqalugiaammi Biibili tunngavigalugu nassuiarneqarpoq ’amerlangaartut’ tassaasut ’savat allat’ naggatissap nalaani inuusut. (Johannesi 10:16) Ataatsimeersuarnerup tamatuma kingorna ilaat eqqaaniaalluni nalliuttorsiornermi assersuutinik ilangiisarunnaarput paasigamikku qilammiunngitsoq nunarsuarmili inuunissamik neriugisaqarlutik.

10. ’Savat allat’ suna neriuutigaat, sunillu akisussaaffeqarpat?

 ¹⁰ 1935-miilli pingaartumik ’savanut allanut’ ilaasussat katersorneqarput. Taakkua utertitsissut upperaat, Guutimut tunniulluinnarsimapput, ’savarpannguillu’ tanitat tapersersortarpaat Guutip naalagaaffianik oqaluusseqataallutik. (Lukasi 12:32) ’Savat allat’ taakkua nunarsuarmi naassaanngitsumik inuunissaq neriuutigaat, allatigulli tamatigut Naalagaaffimmik kingornussisussat sinnerisut ullumikkut suli nunarsuarmiittutut ipput. Israelitoqqami ’takornartaasutut’ Jehovamik pallorfiginnittutut Inatsisinullu naalattutut savat allat ullumikkut kristumiut ilagiivini akisussaaffeqarput, assersuutigalugu anersaakkut Israelikkut peqatigalugit nutaarsiassaq nuannersoq oqaluussissutigisarpaat. (Galatiamiut 6:16) Takornartaq kinaluunniit Israelitoqqami palasinngorsinnaanngilaq kunnginngorsinnaananilu, savallu allat ilaat kinaluunniit naalagaaffimmi qilammiittumi kunnginngorsinnaanngilaq palasinngorsinnaananilu. — 5 Mosesi 17:15.

11. Inuup ataatsip sumik neriuuteqarneranut qanga tunniulluinnarsimanera sooq aalajangiisuusinnaava?

¹¹ 1930-kkunni paasineqariartuaarsimavoq katersat qilammiittussat tamangajammik toqqarneqareersimasut. Ukiuni qulikkuutaani arlalinni ’savat allat’ nunarsuarmi inuunissamik neriugisallit ujarneqarput. Tanitat ilaat ilumuunngitsuussagaluarpat, qularnanngitsumik kristumiu savanut allanut ilaasoq sivisuumik aalajaalluni Guutimut kiffartortoq 144.000-t akornanni inissaq inuttassaaruttoq inuttalerniarlugu qaaqquneqassaaq.

Sooq ilaat eqqunngitsumik ilimagisaqartut

12. Eqqaaniaalluni nalliuttorsiornermi assersuutinik ilangeeqataasimasoq pissutsini qanoq ittuni taamaaliussaartariaqarpa?

¹² Kristumiut tanitat qularinngilluinnarpaat qilammi inuunissamut qaaqqusaasimallutik. Taavami qilammi inuunissamut qaaqqusaasimanngitsut ilaat eqqaaniaalluni nalliuttorsiornermi assersuutinik ilangiisimappata? Maanna paasilerunikku qilammi inuunissamik neriuuteqanngisaannarsimallutik, nalunngeqatiginnissusertik pissutigalugu viinnimik timiusamillu ilangiisarunnaassapput. Guutip iluarissanngilaa qilammi kunnginngornissamut palasinngornissamullu qaaqqusaasuusaartoq nalunngikkaluarlugu taamaanngivissoq. (Romamiut 9:16; Saqqummersitat 20:6) Jehovap Levikkuusoq Kora toqutippaa taanna assuarnartuliorluni Aronikkutut palasinngorniarsarimmat. (2 Mosesi 28:1; 4 Mosesi 16:4-11, 31-35) Kristumiup paasiguniuk eqqaaniaalluni nalliuttorsiornermi assersuutinik ilangiisussaatitaanani ilangiisimalluni, taamaaliussaartariaqarpoq maniguullunilu Jehova isumakkeerfigeqqulluni qinnuigalugu. — Tussiaat 19:14.

13, 14. Sooq ilaat eqqunngitsumik isumaqarsinnaappat qilammi inuunissamut qaaqqusaallutik?

¹³ Sooq ilaat eqqunngitsumik isumaqarsinnaappat qilammi inuunissamut qaaqqusaallutik? Aapparmik toqunera alianartumilluunniit allamik pisoqarnera pissutigalugu nunarsuarmi inuunissartik soqutigiunnaarsinnaavaat. Imaassinnaavortaaq kristumiumik ikinngutinnaamisut tanitaanerartutut siunissamut neriuuteqarusuttoqartoq. Soorunami Guutip inuk kinaluunniit immikkut pisinnaatitaaffimmik tamatuminnga allanut tunniussisinnaatissimanngilaa. Aamma Naalagaaffimmik kingornussisussat taninngilai tusarsinnaasaannik oqarfigalugit taama neriuutissaqartut.

¹⁴ Upperisarsiornikkut isuma eqqunngitsoq, tassa inuit ajunngitsut tamarmik qilaliassasut, pissutigalugu ilaat isumaqarsinnaapput qilammi inuunissamut qaaqqusaallutik. Taamaattumik ajoqersuutinit eqqunngitsunit siornatigut upperisimasatsinnit allanilluunniit sunnerneqartittariaqanngilagut. Assersuutigalugu ilaat imminut aperisinnaapput: ’Nakorsaatitortarpunga misigissutsinnut sunniuteqartunik? Inuuvunga misigissutsinik ulikkaartoq taamaalillungalu misigissutsikka sakkortuut paasinerlussinnaallugit?’

15, 16. Aamma suna pissutigalugu ilaat tunngavissaqaratik isumaqalersinnaappat tanitaallutik?

¹⁵ Aamma imminut aperisoqarsinnaavoq: ’Nuimasoorusuppunga? Pissaaneqarusuppunga, maannakkut imaluunniit Kristusimik kingornusseqataasussatut?’ Ukiuni hundredelinni siullerni Naalagaaffimmik kingornussisussat qaaqquneqaramik, tamarmiunngitsoq ilagiinni akisussaaffeqarput. Qilammi inuunissamut qaaqqusaasut aamma nuimanianngillat tanitaanertillu usorsitsaarutiginagu. ’Kristusip eqqarsaataanik piginnittut’ ilimagisatsitut maniguuttuupput. — 1 Korinthimiut 2:16.

 ¹⁶ Ilaat immaqa isumaqarput qilammi inuunissamut qaaqqusaallutik, Biibilimeersunik ilisimasarpassuaqalersimagamik. Anersaaq illernartumilli taninneqarneq immikkut paasisimasaqalersitsisanngilaq, Paulusimmi nalimini tanitat ilaat ajoqersorlugillu siunersortariaqarsimavai. (1 Korinthimiut 3:1-3; Hebræerit 5:11-14) Guuti aaqqissuussaqarpoq, taannalu aqqutigalugu innuttaminut tamanut anersaakkut inuussutissalersuivoq. (Matthæusi 24:45-47) Taamaattumik kinaluunniit isumaqartariaqanngilaq kristumiut tanitat nunarsuarmi inuunissamik neriugisalinnit ilisimassuseqarnerusut. Anersaamik taninneqarneq Biibilimut tunngasunik apeqqutinik akisinermut oqalugiarnermulluunniit imaluunniit oqaluussinermut immikkut pikkoriffeqarnikkut takuneqarsinnaassanngilaq. Kristumiut nunarsuarmi inuunissamik neriugisallit aamma tamakkua tungaatigut piukkunnaateqarluarput.

17. Kina sunalu kia tanitanut ilaaneranut aalajangiisuuppat?

¹⁷ Uppeqat qilammi inuunissamik neriuuteqarnermut tunngatillugu apeqqutissaqarpat, utoqqaanertap kristumiulluunniit inersimalluartup allap oqaloqatigisinnaavaa. Kinaluunniilli allamik taamatut aalajangiissussisinnaanngilaq. Qilammi inuunissamut ilumoortumik qaaqqusaasup taama neriuuteqarnerluni allat aperisariaqanngilai. Tanitat ’ernioqqissimapput naatsiiassakkut aserujasukkut pinnatik, kisianni aserujuitsukkut, tassa Guutip oqaasiagut uumassusilikkut ataavartukkullu’. (1 Petrusi 1:23) Anersaamigut oqaatsimigullu Guutip ’naatsiiassaq’ inummut ikkuppaa, tassuunalu inuk taanna ’pinngortitanngorpoq nutaaq’ qilammi inuunissamik neriugisalik. (2 Korinthimiut 5:17) Jehovap tamanna aalajangigaraa. Taninneqarnermi ’piumassuseq ilungersornerluunniit apeqqutaanngilaq, Guutili’ apeqqutaavoq. (Romamiut 9:16) Inuup qanoq qulakkeersinnaavaa qilammi inuunissamut qaaqqusaalluni?

Neriuutertik sooq qularinngikkaat

18. Guutip anersaava qanoq tanitat anersaavat peqatigalugu nalunaajaava?

¹⁸ Guutip anersaavata nalunaajaanerata kristumiut tanitat qularunnaarsippai qilammi inuunissamik neriuuteqartut. Paulusi ima allappoq: „Tunineqarsimavusi anersaamik qitornaassuseqartitsisumik taassumuunalu ima torlulavugut: Abba, Ataataq! Anersaaq nammineq uagut anersaarput peqatigalugu nalunaajaavoq Guutip qitornarigaatigut. Qitornaaguttami kingornussisussaavuguttaaq, tassaalluta Guutip kingornussisussaatitai Kristusillu kingornussisussaaqatai; naallioqatigigatsigumi naalannarseqatigissavarputtaaq.“ (Romamiut 8:15-17) Anersaaq illernartup sunniineratigut tanitat anersaavata tanitat paasinnilersissavai Jehovap anersaakkut qitornai pillugit Biibilimi allassimasuni pineqartut. (1 Johannesi 3:2) Guutip anersaavata misigilersippai taassumunnga qitornatut attaveqartut, immikkullu neriuuteqalersippai. (Galatiamiut 4:6, 7) Inuttut naammalluinnartutut  ilaquttanik ikinngutinillu avatangiiseqarluni nunarsuarmi naassaanngitsumik inuunissaq neriuutaavoq nuannerluinnartoq, Guutilli tanitat allamik neriuuteqalersippai. Anersaamigut Guutip qilammi inuunissamik ima sakkortutigisumik neriuuteqalersimmatik, nunarsuarmi atassuteqarnerit tamaasa tassanilu siunissartik taamaateriaannaavaat. — 2 Korinthimiut 5:1-5, 8; 2 Petrusi 1:13, 14.

19. Angerusisaaq kristumiut tanitat inuunerannut qanoq sunniuteqarpa?

¹⁹ Kristumiut tanitat qularinngilaat qilammi inuunissamik neriuuteqarlutik angerusisaamullu peqataallutik. Jiisusip tamanna eqqaavaa eqqaaniaalluni nalliuttorsiornissaq pilersikkamiuk, ima oqarami: „Ermuseq manna tassa angerusisaaq uanga aakkut pillusi kuineqartukkut.“ (Lukasi 22:20) Angerusisaamut peqataasut tassaapput Guuti tanitallu. (Jeremia 31:31-34; Hebræerit 12:22-24) Jiisusi akunnermiliuttuuvoq. Angerusisaaq Jiisusip aava kuisaq tunngavigalugu atulersinneqarpoq, juutiinnaanngillallu, aammali inuit inuiaqatigiinneersut angerutsimut peqataapput Jehovallu aqqanut innuttassarsiarineqarlutik. Angeruseq iluaqutigalugu aamma Aaperaap ’kinguaavinut’ ilaatinneqarput. (Galatiamiut 3:26-29; Apustilit Suliaat 15:14) „Angerutsip soraajuitsup“ tamatuma anersaakkut Israelikkuusut tamarmik qilammi toqujuitsumik inuunissamut makitinneqarnissaat ajornarunnaarsippaa. — Hebræerit 13:20.

20. Tanitat Kristusimik angerutsimut sorlermut peqataatinneqarpat?

²⁰ Kristumiut tanitat qularutiginngivippaat qilammi inuunissamik neriuuteqarlutik. Aamma angerutsimut allamut peqataatinneqarput, tassa Naalagaaffik pillugu angerutsimut. Angerutsimi tamatumani Kristusimik peqateqarnerat pillugu Jiisusi oqarpoq: „Ilissi uanni aalajaatsuuvusi usserneqartillunga; angerfigeqatigaassilu, soorlu Ataatama uanga angerfigeqatigigaanga, naalagaaffik pillugu.“ (Luk 22:28, 29, NV) Kristusip kunngeqataasalu akornanni angeruseq tamanna naassaanngitsumik atortuujuassaaq. — Saqqummersitat 22:5.

Eqqaaniaalluni nalliuttorsiorfiup nalaa — nuannaarfiusoq

21. Eqqaaniaalluni nalliuttorsiorfiup nalaani piffissaq qanoq atorluarsinnaavarput?

²¹ Eqqaaniaalluni nalliuttorsiorfiup nalaani pilluaqqussutissarpassuaqarpoq. Tamatuma nalaani Biibilimik atuagassat pilersaarutigineqartut atuartarutsigit iluaqutigissavavut. Aamma Jiisusip nunami inuunerata toquneratalu eqqarsaatigeqqissaarnissaannut, qinunermut oqaluusseqataanermullu piffissaalluarpoq. (Tussiaat 77:13; Filippimiut 4:6, 7) Nalliuttorsiornermi Jiisusip utertitsissutitut pilliutaanut atatillugu Guutip Kristusillu asanninnerannik eqqaasinneqartarpugut. (Matthæusi 20:28; Johannesi 3:16) Neriuuteqalerpugut tuppallersarneqarlutalu, Kristusilu inuunitsinni malinniarlugu aalajangersimanerput nakussatsinneqartariaqarpoq. (2 Mosesi 34:6; Hebræerit 12:3) Eqqaaniaalluni nalliuttorsiornermi aamma Guutip kiffaatut tunniulluinnarsimanerput eqqortinniarlugu erneranullu ajoqersukkatut ilumoorniarluta aalajangersimanerput nakussatsinneqartariaqarpoq.

22. Guutip inuiannut tunissutaasa pingaarnersaat sunaava, tamatuminngalu qujamasuutiginninnerput qanoq takutissinnaavarput?

²² Jehovap pitsaasorpassuarnik tunivaatigut. (Jaaku 1:17) Oqaasiani siunnersorneqarpugut, anersaavanit ikiorneqarluta inuunermillu naassaanngitsumik neriuuteqarluta. Guutip tunissutaasa pingaarnersaat unaavoq tanitat uppertullu allat tamarmik ajortuliaannik Jiisusip ajortit matoorneqaatissaannik pilliutaa. (1 Johannesi 2:1, 2) Jiisusip toqunera ilinnut qanoq pingaaruteqartigiva? 2003-mi apriilip 16-iani seqernup tarrinnerata kingorna Naalakkap unnukkorsiortitsinera nalliuttorsiutigineqarpat pilliutaa qujamasuutigalugu najuuttut akornanniissavit? (wE 2/15 03)

[Quppernerup ataani ilanngussaq]

Uteqqiinermi apeqqutit

• Eqqaaniaalluni nalliuttorsiornermi kikkut assersuutinik ilangiissappat?

• Sooq ’savat allat’ isiginnaartuinnartut Naalakkap unnukkorsiortitsinera najuuffigisarpaat?

• Kristumiut tanitat Jiisusip toqunera pillugu eqqaaniaalluni nalliuttorsiornermi timiusamik nerisariaqarlutik viinnimillu imertariaqarlutik, qanoruna ilillutik nalunngikkaat?

• Eqqaaniaalluni nalliuttorsiorfiup nalaani qanoq iliornissamut piffissaalluarpa?

[Atuaqqissaarnermi apeqqutit]

[Qupp. 28-mi takussutissaq/assiliartaq]

(Allassimasut qanoq inissisimanersut naqitami takuneqarsinnaavoq)

Eqqaaniaanermi najuuttut

MILLIONILLIT

15,597,746

15

14

13,147,201

13

12

11

10

 9

 8

 7

 6

 5

4,925,643

 4

 3

 2

 1

878,303

63,146

1935 1955 1975 1995 2002

[Qupp. 28-mi assiliartaq]

Ukioq manna Naalakkap unnukkorsiortitsinera najuuffigissaviuk?

[Qupp. 30-mi assiliartaq]

Eqqaaniaalluni nalliuttorsiornerup nalaani Biibilimik atuarnerunerput oqaluussinerunerpullu iluaqutaassaaq