Allat Jehovap isiginninneratut isiginiarsarikkit

„Inuit pingaartitaat uanga [Guuti] pingaartitarinngilakka.“ — 1 SAMUELI 16:7.

1, 2. Jehovap Samuelillu Eliabimut isiginninnerat qanoq assigiinngissuteqarpa, uagullu tamanna qanoq ilinniarfigisinnaavarput?

UKIUNI 1000-kkunni ukiunik naatsorsuisarnitta siorna Jehovap pruffiiti Samueli isertortumik suliassaqartillugu aallartippaa. Pruffiiti peqquaa angut Isajimik atilik pulaaqqullugu, ernerisa ilaat Israelikkut kunngissaattut tanikkiartorlugu. Samuelip Isajip angajulliliaa Eliabi takuleramiuk, qularinngivippaa Guutip toqqagaa nanillugu. Jehovali oqarpoq: „Isikkua angissusialuunniit aalajangiisuutissanngilatit uanga taanna narrugigakku; inuit pingaartitaat uanga pingaartitarinngilakka. Inuimmi isiminnut saqqumisuinnaat isigisarpaat, [Jehovalli] inuup uummataa isigisarpaa.“ (1 Samueli 16:6, 7) Samuelip Eliabi Jehovap isiginninneratut isiginngilaa. *

² Inuit imminnut kukkusumik isumaqarfigeqqajaasarput. Immaqa inussiarnerpasissut, ilumoortumilli allat ajoqutigisaannik iliuuseqaraangamik soqutigisaqanngitsut, nuannaraavut. Immaqaluunniit allat ilumoorusuissuugaluit sukannerluta aalajaalluinnarlutalu nalilertarpavut, inuttut pissusii paamigalugit.

3, 4. (a) Kristumiut marluk isumaqatigiinngissuteqalerunik tamarmik qanoq iliorniarlutik aalajangertariaqarpat? (b) Uppeqaterput ilungersunartumik isumaqatigiinngissuteqarfigigutsigu imminut qanoq aperisinnaavugut?

³ Allanik eqqartuussiniapallattarutta ajornartorsiuteqalersinnaavoq, aamma taamaappoq ukiorpassuarni ilisarisimasavut pineqarpata. Immaqa kristumiu qanittumik ikinngutigisimasat ilungersunartumik isumaqatigiinngissuteqarfigivat. Ajunngitsumik attaveqarfigileqqikkusuppiuk? Suna iluaqutigisinnaaviuk?

⁴ Soormi qatanngutit allatut isumalluartumillu isigigukku? Jiisusip oqaasiinut naapertuuttumik isiginiaruk: „Kinaluunniit uannut ornigussinnaanngilaq Ataatap uannik aallartitsisup kajungilersinngippani.“ (Johannesi 6:44) Imminullu aperalutit: ’Sooq Jehovap qatanngut taanna ernerminut kajungilersissimavaa? Taassuma ajunngitsut suut pissuserai? Pissusii taakku maluginngitsoorpakka pingaartinnagilluunniit? Sunaana pissutigalugu taanna nuannaralugulu ikinngutigileriga?’ Aallaqqaammut immaqa taassuma pissusiisa ajunngitsut eqqarsaatiginissaat imaannaassanngilaq, ingammik piffissami sivisuumi misigissutsikkut anniaateqarsimagaanni. Attaveqarfigillualeqqissagutsiguli pingaaruteqarpoq. Paasiniarlugu qanoq iliorsinnaanerluta angutit marluk ilaannikkut pitsaavallaanngitsutut allaatigineqartartut pissusiisa  ajunngitsut ilaat misissoriartigik. Tassa pruffiiti Jonap apustililu Petrusip.

Jonap paqumisunngitsumik isigineqarnera

5. Jona sumik suliassinneqarpa, qanorlu periarpa?

⁵ Joaship ernera Jeroboami II kunngiutillugu Jona naalagaaffimmi avannarlermi Israelimi pruffiitiuvoq. (2 Kunngit 14:23-25) Ullut ilaanni Jehovap Jona Israelimit Nineveliaqquaa, naalagaaffissuup Assyriap illoqarfiisa pingaarnersaannut. Illoqarfiup inuinik mianersoqqusiartoqquneqarpoq illoqarfissuat piuneerunneqartussaammat. (Jona 1:1, 2) Jehovap peqqussutaanik maleruaanissaminut taarsiullugu Jona qimaavoq. Umiarsuarmut Tarshishiliartussamut, Ninevemit ungasissumiittumut, ikivoq. — Jona 1:3.

6. Sooq Jehovap Jona Nineveliartussatut toqqarpaa?

⁶ Pruffiiti Jonap atia tusaraangakku suna eqqarsaatigisarpiuk? Naalanngitsuusoq? Qarsuppittumik eqqarsaatiginninnikkut immaqa taama isummertoqarsinnaavoq. Guutilli Jona pruffiitinngortippaa naalanngitsuummat? Naamik. Jona soorunami ajunngitsunik pissuseqarsimassaaq. Pruffiitiusimanera misissoriartigu.

7. Pissutsini qanoq ittuni Jonap Israelimi Jehova kiffartorfigaa, Jonamullu isiginninnitsinnut qanoq sunniuteqarpa?

⁷ Jonap Israelimi, oqaluussiffigiuminaangaartumi, aalajaalluni Jehova kiffartorfigisimavaa. Pruffiitip Amosip, Jonap inuunerata missaani inuusup, taamanikkut Israelikkut nunap piinik pingaartitsivallaartutut inuulluapilukkumatuutullu allaatigai. * Nunami ajortorpassuarnik pisoqartarpoq Israelikkut sumiginnarluinnagaannik. (Amosi 3:13-15; 4:4; 6:4-6) Taamaattorli Jonap aalajaalluni suliassani suliaraa ullut tamaasa taakku oqaluussiffigisarlugit. Illit nutaarsiassamik nuannersumik oqaluussisartuuguit nalussanngilat inuit imminut naammagisimaartut oqaluuseriniakkannillu soqutigisaqanngivissut  oqaloqatiginissaat qanoq erloqinartigisoq. Taamaattumik nalunngikkaluarlugu Jona sanngiissuteqartoq eqqaamasariaqarparput aalajaalluni qasusuillunilu Israelikkut ilumuunngitsut oqaluussiffigisarai.

8. Pruffiiti Israelikkuusoq Ninevemi sunik unamminiagassaqarpa?

⁸ Nineveliarnissamik suliassinneqarneq suli unamminiarnarnerungaarpoq. Illoqarfimmukarniarluni Jona pisuinnaq 800 kilometerit angalasariaqarpoq — angalaneq ilungersunartoq, qaammatip ataatsip missaanik sivissusilik. Apuukkuni Assyriamiut naakkittaannermikkut tusaamasaasut oqaluussiffigisussaavai. Sorsunnerminni naalliutsitsingaartarput allaallu toqutsiumatuujunertik pingaakujuutigalugu. Tupinnanngilaq Nineve taaneqartarmat „aap illoqarfia“. — Nahumi 3:1, 7.

9. Umiartortut inuunerat anorersuarmit navianartorsiortinneqarmat Jonap qanoq pissuseqarluni takutippaa?

⁹ Jonap Jehovap peqqussutaa naalakkusuppallaanngilaa. Paarlattuanik umiarsuarmut Jehovap suliassiissutaanit ungasilligaluttuinnartitsisumut ikivoq. Jehovalli pruffiitini isumakkiinngilaa allaluunniit suliassinnagu. Paarlattuanik Jona silattuaqitinniarlugu Jehova iliuuseqarpoq. Guutip anorersuaq immamut pitorartippaa, umiarsuarlu Jonap ilaaffigisaa mallit tamanut tamaannga aallaruttaqattaarpaat. Inuit pisuussuteqanngitsut Jona pissutigalugu toqoriaannaapput! (Jona 1:4) Jona qanormita iliussava? Umiartortut umiarsuarmiittut toqunissaannut pisoorusunngilaq, taamaattumillu oqarfigai: „Immamut naloriukkussinga qatsorumaarpoq.“ (Jona 1:12) Umiartortut naggataatigut immamut naloriummani Jona immap malinginit Jehovamit annaanneqarnissani upperissallugu pissutissaqanngilaq. (Jona 1:15) Tassa umiartortut annaanniarlugit Jona annerpaamik akiliiumavoq. Tamatumuuna takuneqarsinnaavoq Jona qunusuitsuusoq, maniguuttuusoq asannittuusorlu, ilaa?

10. Jehovap Jona Ninevemiunut oqaluussinissamik suliasseqqimmagu qanoq pisoqarpa?

¹⁰ Naggataatigut Jehovap Jona annaappaa. Jona iliuuserisimasani pissutigalugit Guutip sinniisuutitaasa ilaattut kiffartorsinnaaleqqinngisaannassava? Naamik, naakkinnilluni asannillunilu Jehovap pruffiiti Ninevemiunut oqaluussinissamik suliasseqqippaa. Jona Ninevemut tikikkami qunusuilluni inui oqaluttuuppai Guutip ajungaarnerat malugisimagaa, taamaattumillu ullut 40-t qaangiuppata illoqarfiat piuneerunneqassasoq. (Jona 1:2; 3:4) Jonalli paatsuugassaanngitsumik tusarliussaa tusaramikku Ninevemiut allamik isumataarput, illoqarfiallu asattuunneqarpoq.

11. Suup takutippaa Jona pingaarutilimmik ilikkagaqartoq?

¹¹ Jonali eqqortumik isiginnittaaseqalinngilaq. Ilinniarfigisinnaasaanik takutillugu Jehovap kamagittarluni Jona paasitippaa Ajugaqanngitsoq qallikkuinnaq isigineq ajortoq. Uummatinik misissuisarpoq. (Jona 4:5-11) Jonap ilinniutissaq pingaarutilik tamanna ilinniutigisimagaa, isertuarani oqaluttuarluni allagaanit paasineqarsinnaavoq. Allaat nammineq kukkunermi immikkuualuttortai peqqusiileqinarnerpaat ilanngullugit kajumilluni eqqartormagit maniguunneranut ersiutaavoq. Kukkunernik nassuerutiginnissagaanni sapiissuseqartariaqarpoq.

12. (a) Qanoq nalunngilarput Jiisusi Jehovap inunnut isiginninneratut isiginnittartoq? (b) Oqaluussiffigisatsinnut qanoq isiginnittaaseqartariaqarpugut? (Ungalusaq qupp. 24-miittoq takuuk.)

¹² Ukiut hundredellit arlallit tamatuma kingorna Jiisusi Kristusi Jonap inuunerani pisimasut ilaat pillugu ajunngitsumik oqaaseqarpoq. Ima oqarpoq: „Soorlu Jona ullut pingasut unnuallu pingasut imarmiorsuup iluaniittoq, taamatuttaaq Inuup Ernera ulluni pingasuni unnuanilu pingasuni nunap iluaniissaaq.“ (Matthæusi 12:40) Jona makitinneqaruni paasitinneqassaaq  Jiisusip nammineq ilivermiinnini assersuukkaa pruffiitip susinnaanngiffianut tamatumunnga. Nuannersorujussuuvoq Guuti kiffani kukkugaangata isumakkeerisanngitsoq kiffartorfigalugu. Tussiaasiortoq allappoq: „Soorlu ataataasup qitornani nallittortarai, taamatut [Jehovap] nallittortarpai mianerinnitsini. Nalunngilaami pinngortitaasugut, eqqaamavaa pujualaasugut.“ (Tussiaat 103:13, 14) Ullumikkuttaaq inuit naammalluinnanngitsut, ’pujualatut’ ittut, Guutip anersaavanit ikiorneqarlutik naammassisaqangaarsinnaapput.

Petrusimut oqimaaqatigiissumik isiginninneq

13. Petrusip pissusiisa ilaat suut immaqa isiginiaqqajaanerusarpavut, Jiisusilli sooq apustilitut toqqarpaa?

¹³ Maanna inuk Biibilimi eqqartorneqartoq alla, apustili Petrusi, sammilaariartigu. Petrusi pillugu oqaaseqaqquneqaruit isumaatsutut, eqqarsarluaqqaarani iliuuseqartartutut allaallu makitasuutut ingerlaannaq oqaatigissaviuk? Ilumoorpoq Petrusi ilaannikkut taamatut pissuseqartartoq. Jiisusilli Petrusi apustilimi aqqaneq-marluusut ilaattut toqqassagaluarnerpaa ilumut isumaatsuusuuppat, eqqarsarluaqqaarani iliuuseqartartuuppat makitasuujuppallu? (Lukasi 6:12-14) Soorunami naamik. Paasinarpoq Jiisusip Petrusip sanngiissutaannai isiginianngikkai, aammali pissusii ajunngitsut isiginiarai.

14. (a) Petrusip nakimanngilluinnarnera qanoq nassuiarneqarsinnaava? (b) Petrusip apeqqutissarpassuaqarnera sooq qujamasuutigisariaqarparput?

¹⁴ Petrusi arlaleriarluni apustilit allat sinnerlugit oqaaseqartitaasarpoq. Ilaat immaqa isumaqarsinnaapput taamaaliornera anneruniajuitsuunnginneranut ersiutaasoq. Taamaattariaqarpali? Ilaat oqarput Petrusi immaqa apustilinit allanit — immaqa aamma Jiisusimit — utoqqaanerusoq. Taamaappat, tamanna nassuiaatissat ilaasinnaavaat sooq Petrusi arlaleriarluni oqaaseqaqqaartarnersoq. (Matthæusi 16:22) Aammali alla eqqaamasariaqarparput. Petrusi inuttut anersaakkut ittunik pingaartitsisuuvoq. Ilisimasaqarnerulerusoqigami aperisarpoq. Uagut tamanna iluaqutigaarput Jiisusi Petrusip apeqqutaanut akissutitut pingaarutilinnik oqaaseqartarmat oqaatsit Biibilimi allanneqarsimasut. Assersuutigalugu Petrusip apeqqutaasa ilaannut akissutitut Jiisusip ’illumi pisortaatitaasoq aalajaatsoq’ eqqartorpaa. (Lukasi 12:41-44, NV) Aamma Petrusip apeqqutaa una eqqarsaatigiuk: „Takuat, uagut suut tamaasa qimallugit malippatsigit; sunami taava pisassaraarput?“ Jiisusip tamanna akillugu uppernikkut nakussatsinnartumik ima neriorsuivoq: „Kinaluunniit illuminik, qatanngutiminik angutinik arnanillu, ataataminik anaanaminillu, qitornaminik narsaamminilluunniit atera pillugu qimatsisimasoq pissarseqqissaaq 100-riaammik inuunerlu naassaanngitsoq kingornutissallugu.“ — Matthæusi 15:15; 18:21, 22; 19:27-29.

15. Sooq oqartoqarsinnaava Petrusi ilumoorfiginnittuusoq?

¹⁵ Petrusi aamma ajunngitsumik allamik pissuseqarpoq. Ilumoorfiginnittuuvoq. Ajoqersukkat ilarpassuisa Jiisusi qimammassuk, ajoqersuutigisaasa ilaat paasinnginnamikku, Petrusi  apustilit aqqaneq-marluk sinnerlugit ima oqarpoq: „Naalagaq, kina ornissagatsigu? Illit oqaatsinik naassaanngitsumik inuussutaasunik pigisaqarputit.“ (Johannesi 6:66-68) Oqaatsit taakku Jiisusimut qiimmassaataangaarsimassapput. Kingusinnerusukkut inupalaat takkummata Naalagaq tigusariniarlugu apustiliisa amerlanersaat qimaapput. Petrusili ungasianit inuppassuit kingornannit malinnaavoq palasiunerup illuata kaajaluisaa tikivillugu. Erseqqippoq qunutuujunani qunusuitsuusoq. Jiisusi killisiorneqartillugu Petrusip juutit ikumatitap qaammaarissup saniani uunnassertut ilaliuffigai. Palasiunerup inussiaataasa ilaata Petrusi ilisaraa Jiisusilu ilagisimanerarlugu. Ilumoorpoq Petrusip Naalakkani miserratigigaa, puigussanngilarpulli Petrusi pisimasumi tassani Jiisusimik ilumoorfiginninnerata isumaginninneratalu taama navianartorsiortimmagu, pisimasoq apustilit allat amerlanersaasa peqataaffigissallugu sapigaat. — Johannesi 18:15-27.

16. Jonap Petrusillu pissusiinik ajunngitsunik uani misissuinerunitsinnut suna pissutaava?

¹⁶ Petrusip pissusii ajunngitsut sanngiissutaanit pingaaruteqarnerungaarput. Aamma Jona eqqarsaatigalugu taamaappoq. Soorlu uani misissuinitsinni Jonamik Petrusimillu pisarnitsinnit immaqa isumalluarnerusumik isiginnittugut, ullumikkut anersaakkut qatanngutitta qanoq ittuunerat nalileraangatsigu isumalluarneruniartariaqarpugut. Taamaaliorutta ajunnginnerusumik attaveqarfigilissavavut. Sooq tamanna taama pingaaruteqartigiva?

Ilikkakkatit atortakkit

17, 18. (a) Sooq kristumiut akornanni aaqqiagiinngittoqalersinnaava? (b) Biibilimi siunnersuutit suut isumaqatigiinngissutit aaqqinnissaannut iluaqutigisinnaavavut?

¹⁷ Ullumikkut angutit, arnat meeqqallu naggueqatigiinnit tamaneersut aningaasarsiornikkut ilinniartitaanikkullu assigiinngilluinnartumik tunuliaqutallit Jehovamik pallorfiginninnerminni ataasiussuseqarput. (Saqqummersitat 7:9, 10) Aamma kristumiuni ilagiinni inuttut assigiinngilluinnartunik pissuseqartoqarpoq. Guutimut kiffartornermi qanittumik suleqatigiikkatta aaqqiagiinngissuteqalernerit ilaannikkut pinngitsoorneqarsinnaasanngillat. — Romamiut 12:10; Filippimiut 2:3.

¹⁸ Qatanngutitta kukkuneri susinnaanngisaallu takusinnaagaluarlugit kisianni pingaarnerutinngilavut. Jehova ilaarniarparput tussiaasiortup ima oqaatigisaa: „Illit [Jehova], ajortuliat naatsorsuutigissagaluarukkit kina atassagaluarpa taava, [Jehova]?“ (Tussiaat 130:3) Taamaattumik inuit pissusii akornatsinni immaqa avissaartuutsitsilersinnaasut sammivallaarnagit „eqqissinartut ineriartorteqatigiinnerlu noqqaassutiginiartigit“. (Romamiut 14:19) Allat Jehovap isiginninneratut isiginiarpavut, kukkuneri pingaarnerutinnagit pissusii ajunngitsut pingaartillugit. Taamaaliorutta ’kamageqatigiittuarnissatsinnut’ iluaqutigissavarput. — Kolossemiut 3:13.

19. Isumaqatigiinngissutit ilungersunartut aaqqinniarlugit kristumiu qanoq iliuuseqarsinnaava?

¹⁹ Taavami paatsuuinerit ilaat puigorsinnaanngivikkutsigit? (Tussiaat 4:5) Taamaappit? Soormi ajornartorsiut eqqissillutit aaqqinniarukku? (1 Mosesi 32:14-16) Siullermik Jehova qinunikkut saaffigiuk siulersoqqullutit. Taava ’ilisimasutut piuaallutit’ isumaqatiginngisat saaffigiuk pissusii ajunngitsut eqqarsaatigalugit. (Jaaku 3:13) Oqarfigiuk eqqisseqatigiumallugu. Eqqaamajuk siunnersuut isumassarsiarititaasoq manna: „Kinaluunniit tusarasuartarli, kisianni oqalukkumaataartuulluni kamajaatsuullunilu.“ (Jaaku 1:19) ’Kamajaatsooqquneqaratta’ isumaqarsinnaavoq alla iliuuseqarsinnaasoq oqaaseqarsinnaasorluunniit kamaatigisinnaasannik. Taama pisoqarpat Jehova qinnuigiuk imminut  naalakkersinnaanissannut ikioqqullutit. (Galatiamiut 5:22, 23) Qatanngutit oqalutsiguk tusarnaaqqissaarlugulu. Naak oqaasiisa ilaat isumaqatiginngikkaluarlugit akornusissanngilat. Immaqa eqqunngitsumik isumaqarpoq, taamaattorli taama isumaqarpoq. Ajornartorsiut taassumatut isiginiariaruk, tamatumalu kingunerisinnaavaa immaqa illit imminut taassumatut isiginiarnissat. — Ussatit 18:17.

20. Isumaqatigiinngissutit aaqqinniaraanni saammaateqatigiissutaasinnaagunartunik allanik qanoq iliuuseqartoqarsinnaava?

²⁰ Oqaaseqartussanngoruit „inussiarnersumik“ oqalugit. (Kolossemiut 4:6) Qatanngutit oqaluttuuguk sooq pingaartillugu. Aamma isumaqatigiinngissuteqalernermut pisooqataasimassagavit utoqqatsissutigiuk. Maniguullutit ilungersornivit saammaateqatigiitsippasi Jehovap qutsaviginissaa eqqaamajuk. Iluatsinngippata Jehova qinnuigiuaruk siulersoqqullutit eqqisseqatiginiarlugu periarfissarsiortuaatigalutit. — Romamiut 12:18.

21. Allaaserisaq una Jehovap isiginninneratut allanik isiginninnissannut qanoq iluaqutigaajuk?

²¹ Jehovap kiffani tamaasa asavai. Naak naammalluinnanngitsuugaluartugut nuannaarutigaa atorluarsinnaagamisigut. Allanut isiginninneranik paasisaqarnerujartortilluta qatanngutitsinnut asanninnerulissaagut. Uppeqatitsinnut kristumiumut asanninnerput nillertunngorsimappat uummarsarneqaqqissinnaavoq. Allat isumalluartumik isiginissaat suliniutigigutsigu, aap, Jehovap isiginninneratut isiginiarutsigik uagutsinnut pilluaqqussutaangaassaaq.

[Quppernerup ataani ilanngussat]

Uteqqiinermi apeqqutit

• Kiffami aalajaatsut sanngiissutaat Jehovap qanoq isigisarpai?

• Jonap Petrusillu pissusiisa ilaat ajunngitsut suut eqqaamasinnaavigit?

• Qatanngutit kristumiut qanoq isumaqarfigiuarniarlugit aalajangerpit?

[Atuaqqissaarnermi apeqqutit]

[Qupp. 24-mi ungalusaq]

Guutip allat qanoq isigisarnerai eqqarsaatigiuk

Biibilimi Jona pillugu oqaluttuaq eqqarsaatigalugu oqaluussiffigisartakkatit allatut isigisariaqarpigit? Immaqa Israelikkutut imminut naammagisimaarpasipput soqutigisaqarpasinnatilluunniit, immaqaluunniit allaat tusarliussaq Guutimeersoq assortorpaat. Jehova Guutilli qanoq isigisarpai? Allaat silarsuarmi nuimasut ilaat siunissami Jehovamut saassinnaapput, soorlu Ninevemi kunngi Jonap oqaluussinera pissutigalugu allamik isumataartoq. — Jona 3:6, 7.

[Qupp. 21-mi assiliartaq]

Allat Jehovap isiginninneratut isigisarpigit?

[Qupp. 22, 23-mi assiliartaq]

Jiisusi Jonap misigisaa pillugu ajunngitsumik oqaaseqarpoq