Atuartartut apeqqutaat

Sooq Biibilimi allassimava arnaq pinngitsaaliniarneqaruni nilliassasoq?

Peqqarniitsumik tupannaqisumillu pinngitsaalineqarluni arneriffigitissimanngikkaanni tamatuma qanoq inuup inuuneranik aseruisinnaatiginera paasivinneqarsinnaanngilaq. Taamatut pinerluttuliorfigineqartup misigisani ajungaarmat inuunermi sinnerani puigorsinnaanavianngilaa. * Arnaq kristumiu inuusuttoq ukiualuit matuma siornatigut pinngitsaalineqarluni arneriffigineqartoq oqaluttuarpoq: „Unnuk taanna annilaarujussuarnera imaluunniit tarnikkut kingunerlutsitsineq taamanili akiortariaqarsimasara oqaatsinit atorlugit nassuiarneqarsinnaanngilaq.“ Amerlasuut taama annilaarnartigisumik misigisaqarnissaqarsinnaaneq eqqarsaatigerusunnerluunniit ajormassuk paasinarpoq. Kisianni silarsuarmi matumani ajortumi saassunneqarsinnaaneq pinngitsaalineqarlunilu arneriffigineqarsinnaaneq ilumut navianartuuvoq.

Biibilimi itsaq arnerilluni pinngitsaaliinerit pinngitsaaleeriarnerillu oqaluttuarineqanngitsuunngillat. (1 Mosesi 19:4-11; 34:1-7; 2 Samueli 13:1-14) Aammali siunnersuuteqarpoq taamatut pisoqartillugu qanoq iliortoqassanersoq. Siunnersuutit taakku Mosesimik allakkat tallimaat 22:23-27-miipput. Tassani pisimasut marluk pineqarput. Siulleq tassaavoq angutip illoqarfimmi arnaq inuusuttoq naapikkaa pinngitsaalillugulu arneriffigigaa. Taamaakkaluartoq arnaq nillianngilaq ikioqqulluniluunniillu nillianani. Arnaq kingusinnerusukkut pisuutitaalluni eqqartuunneqarpoq „illoqarfimmiikkaluarluni nilliasimanngimmat“. Nilliasimasuuppammi inuit qanittumiittut ikiorsimassagaluarpaat. Pisimasup aappaa tassaavoq angutip arnaq inuusuttoq narsaammi naapikkaa, „tigullugulu innaakkaa“. Imminut illersorniarluni ’arnaq nilliavoq, kisianni ikiortissaanik takkuttoqanngilaq’. Taanna pisimasumi taaneqartumi siullermi arnamit allaanerusumik iliorpoq, tassa arnap taassuma taamatut pineqarnini akuerinngimmagu. Imminut illersorluni akersuuppoq nilliallunilu ikioqqulluni, kisiannili ajugaaffigineqarluni. Nillianermigut takutippaa piumassuserinngisaminik taamaaliorneqarluni, taamaammat eqqunngitsumik iliortutut pisuutinneqarsinnaanngilaq.

Naak kristumiut ullumikkut Mosesip inatsisaanik maleruaasussaatitaanngikkaluartut taamaattoq inatsisit taakku siunnersuinermi najoqqutarineqarsinnaasunik imaqarput. Qulaani oqaluttuarineqartup takutippaa akiuunnissaq ikioqqullunilu nillianissaq pingaaruteqartoq. Pinngitsaalineqarnialernermi nillianeq suli illersuutitut kinguneqarluarsinnaasutut isigineqarpoq. Pinerlunnermik pinaveersaartitsinermik immikkut ilisimasalik oqarpoq: „Arnaq saassunneqaruni puai sakkussaasa suli pitsaanersaraat.“ Arnap nillianeratigut ikiuisinnaasut aggersarneqarsinnaapput imaluunniit saassussisoq qimaatinneqarsinnaalluni. Kristumiu arnaq inuusuttoq angummit pinngitsaalineqariaraluarsimasoq oqarpoq: „Nilliarsuataarpunga angutillu iperarpaanga qimagullunilu. Tigoqqinnialermangalu nillialerpunga arpallungalu qimaallunga. Siullermik ima eqqarsarajuppunga: ’Nilliagaanni sumut iluaqutaava angutip pillagunartorsuup tiguppanga ataasiinnarlu eqqarsaatigalugu?’ Maannali paasivara iluaqutaasoq!“

Naak arnaq sapersisitaalluni pinngitsaalineqaraluartoq, iperarneqarumalluni akiuunnera nilliallunilu ikioqqunera asuliinnanngilaq. Tamatuma takutippaa imminut illersorluni sapinngisaminik akiuussimasoq. (5 Mosesi 22:26) Ajorluinnartumik misigisaqarsimagaluarluni ilerasuutissaqanngivippoq. Imminut ataqqinini attatiinnarpaa Guutillu isaani minguitsuunini qularissanagu. Misigisapalaaminit immaqa misigissutsimigut ikilerneqarsimagaluarluni saassunneqarnermini sapinngisaminik iliorsimanerminik ilisimanninnini peqqissiartuaarutigissavaa.

Mosesimik allakkat tallimaat 22:23-mit 27-mut oqaluttuarineqartut nalitsinni pissutsinut nuutinniarutsigit paasisariaqarpoq pisimasut taakku marluk Mosesip inatsisaani taaneqartut imaaliinnarlugit pissutsinut tamanut atorneqarsinnaanngimmata. Soorlu oqaatigineqanngilaq arnaq saassunneqartoq oqajuitsuuguni nilliasinnaananilu, ilisimajunnaarsimaguni imaluunniit ersinermit susinnaajunnaarsimaguni imaluunniit qanini saassussisup assamminik nipputsittakkamilluunniit matusimammagu nilliasinnaanngikkuni qanoq iliussanersoq. Kisianni nilliannginneranut pissutaasoq Jehovap ilisimassavaa, taamalu naapertuilluartumik paasinnittumillu eqqartuussissaaq,  ’innarluitsuugamik aqqutai tamarmik’. (5 Mosesi 32:4) Nalunngilaa qanorpiaq pisoqarsimasoq, ilisimallugulu saassunneqartoq ilungersorluni iliuuseqarsimasoq saassussisoq akiorniarlugu. Arnaq nilliasinnaanngikkuni kisiannili pissutsini atuuttuni iliuuserisinnaasani iliuuseralugit, pisoq Jehovap assaanut tunniussinnaavaa. — Tussiaat 55:23; 1 Petrusi 5:7.

Taamaattorli arnat kristumiut ilaat pinngitsaalineqarnermik kingorna pisuusutut misigisimajuarlutik erloqipput. Kingumut eqqarsaatigigaangamikku misigisarput pisimasoq pitsaaliniarlugu iliuuseqarnerusimasinnaagaluarlutik. Imminnulli ajoriinnaratik Jehova qinnuigisariaqaraluarpaat pisuusutut misiginermik ajugaaffiginissaanut ikioqqullutik — tatiginnillutillu nallittuineranut ilumoorsusianullu. — 2 Mosesi 34:6; Tussiaat 86:5.

Kristumiut arnat pinngitsaalineqarnermik kingorna massakkut eqqarsartaatsikkut misigissutsikkullu ajornartorsiortut tatigisinnaavaat Jehovap paasilluinnaraatik. Guutip oqaasiini neriorsuuteqarpoq: „[Jehovap] qanippai sequmissimasunik uummatillit, annaattarpai aserorsimasunik anersaallit.“ (Tussiaat 34:19) Aammattaaq ajoqusigaasimanerminnik tarnikkut kingunerlutsitsinerminnik qaangiiniarnerminni kristumiut ilagiivini inussiarnisaarfigineqarnikkut, paasinninnikkut tapersersuinikkullu ikiorneqartarput. (Jobi 29:12; 1 Thessalonikamiut 5:14) Aamma ajunngitsunik eqqarsarniarlutik ilungersornitik ’eqqissinermik Guutimit pisumik siuneqassusernit tamanit annerungaartumik’ angusinissaminnut iluaqutigissavaat. — Filippimiut 4:6-9.  (wE 2/1 03)

[Quppernerup ataani ilanngussaq]