Jehova tatigiuk uummatikkut iluunngarlutit
Jehova tatigiuk uummatikkut iluunngarlutit
„Atinnik ilisimannittut tatigaatsit.“ — TUSSIAAT 9:11.
1, 2. Inuit tatigisaasa ilaannik iluaqutaanngitsunik taasaqarit.
ULLUMIKKUT inuunerput peqqissuserpullu sorpassuarnit navianartorsiortinneqarmat toqqissisimalersitsisinnaasumik ujarlernissaq pissusissamisuuinnarpoq. Ilaat isumaqarput aningaasat toqqissinartumik siunissaqalersitsisinnaasut. Aningaasalli tatigisarissallugit nalorninartoqaqaat. Biibilimi oqaatigineqarpoq: „Pisuussutiminik toqqammaveqartoq orlusussaavoq.“ (Ussatit 11:28) Ilaasa nunami siulersortitik tatigisarpaat. Siulersuisulli pitsaanerpaagaluilluunniit allaat kukkusarput, naggataatigullu tamarmik toqusarput. Biibilimi isumatuumik allassimasoqarpoq: „Tatigeqinasigit naalagartat, inuit annaassisinnaanngitsut.“ (Tussiaat 146:3) Oqaatsini isumassarsiarititaasuni taakkunani mianersoqquneqarpugut uagut ikiorneqanngivilluta pisinnaasoreqqunata, uagummi ʹinuinnaavugutʹ.
2 Pruffiitip Esajap nalimini Israelip siuttuisa „salluneq qimarnguffigimmassuk“ avoqqaarai. (Esaja 28:15-17) Toqqissiffissarsiornerminni nunat sanilitik politikkikkut kattuteqatigaat. Kattuteqatigiinnerit taakku tatigineqarsinnaanngillat — salluupput. Tamatumunnga assingusumik ullutsinni upperisarsiornikkut siuttut politikkikkut aqutsisunik qanittumik attaveqalersarput kattuteqatigisarlugillu. Kattuteqatigiinnerit taamaattut aamma ”salluusut” paasineqarumaarpoq. (Saqqummersitat 17:16, 17) Ataavartumik toqqissisimalersitsissanngillat.
Josvap Kalebillu maligassiuilluarnerat
3, 4. Josvap Kalebillu nalunaarutaat allat qulit nalunaarutaannit qanoq allaanerua?
3 Isumannaassusermik toqqissisimaffissamillu sumut ujaasissaagut? Josvap Kalebillu Mosesip nalaani ujarlerfigisimasaannut ujaasissaagut. Israelikkut Egyptenimiit aniguisitaanermik kinguninngua nunamut neriorsuutaasumut isernissaminnut piareerput. Angutit aqqaneq-marluk nunamik alapernaarsuiartortinneqarput, ullullu 40-t qaangiummata nalunaariartorlutik uterput. Josvap Kalebillu kisimik israelikkut Kana’animut isernissaat kaammattuutigaat. Ilaasa nunap kajuminnartuunera nassuerutigigaluarlugu oqarput: „Inuit nunami tassani najugaqartut nakuarsuupput. Illoqarfiit pallittaalisaligaapput angeqalutillu; . . . Inuiaat taakku saassussinnaanngilavut uatsinnit pissaaneqarnerujussuummata.“ — 4 Mosesi 13:27, 28, 31.
4 Alapernaarsuiartortitat qulit oqaasii tusaramikkit israelikkut annilaangalerput Mosesilu oqalorujuffigilerlugu. Naggataatigut Josva Kalebilu ilungersuummersimaqalutik oqarput: „Nuna angallavigalugu misissugarput ajunngitsorujussuuvoq. [Jehovap] nunamut tassunga isertikkumaarpaatigut asagunisigut, nunataariniartigumi nuna taanna immummik tungusunnitsuummillu kuuttoq. [Jehova] akerlilersorniaqinasiuk! Inuillu tassani najugaqartut ersigeqinasigit!“ (4 Mosesi 14:6-9) Israelikkulli tusaajumanngillat, taamaattumillu nunamut neriorsuutaasumut taamanikkut isertinneqanngillat.
5. Sooq Josva Kalebilu isumalluartumik nalunaaruteqarpat?
5 Sooq Josva Kalebilu isumalluartumik nalunaaruteqarpat, naak alapernaarsuiartortitat allat qulit isumalluarpalunngitsumik nalunaaruteqaraluartut? Illoqarfiit pissaanilissuit naggueqatigiillu tamaani nunasisimasut alapernaarsuiartortitat aqqaneq-marluk tamarmik takusimavaat. Alapernaarsuiartortitat qulit ilumoorput oqaramik israelikkut nunamik tiguaassallutik naammattumik pissaaneqanngitsut, tamannalumi Josvap Kalebillu miserratiginngilaat. Alapernaarsuiartortitalli qulit inuit isiginnittaasiannik isiginnittaaseqarput. Josvap Kalebillu Jehova tatigineruaat. Jehovap Egyptenimi, Immami Aappalaartumi Sinajillu Qaqqaata ataani suliai angisuut Josvap Kalebillu takusimavaat. Aap, allaat tamatuma kingornatigut ukiorpassuit qaangiuttut Jehovap suliai taakku tusaamaannarlugit Rahabip inuunini Jehovap innuttaanut Jerikomi pilliutigeriaannaasimavaa! (Josva 2:1-24; 6:22-25) Jehovap iliuuserisimasaanut isiginnittuusimasut Josvap Kalebillu qularinngilluinnarpaat innuttani illersortuassagai. Pakatsisinneqanngillallumi. Ukiut 40-t qaangiuttut Israelikkut kinguaariit nutaat, Josva siulersortigalugu, Kana’animut iserput nunalu tiguarlugu.
Sooq Jehova tatigilluinnartariaqaripput
6. Sooq kristumiut ullumikkut misilinneqartarpat, kinalu tatigisinnaavaat?
6 ’Ulluni atugarliungaarfiusuni’ makkunani Israelikkutut uatsinnit pissaanerusunik akeraqarpugut. (2 Timotheusi 3:1) Ileqqussatigut, anersaakkut ilaatigullu timikkut misilinneqartarpugut. Misilinneqarnerit tamakku uagut nammineerluta anigorsinnaanngilavut, inunnimmi piginnaaneqarnerusoq, Saatani Diaavulu, taamaaliortitsisuuvoq. (Efesosimiut 6:12; 1 Johannesi 5:19) Sumimi ikiortissarsiorsinnaavugut? Qanga angut inuusoq aalajaatsoq Guutimut qinulluni ima oqarpoq: „Atinnik ilisimannittut tatigaatsit.“ (Tussiaat 9:11) Jehova ilisarisimalluarutsigu nalunagulu aqqa qanoq isumaqartoq, taava Josvap Kalebilllu tatiginninnerattut tatigissavarput. — Johannesi 17:3.
7, 8. (a) Pinngortitarsuaq qimerloorutsigu suut pissutigalugit Jehova tatigisinnaavarput? (b) Biibilip sunik pissutissaqalersippaatigut Jehovap tatiginissaanut?
7 Sooq Jehova tatigisinnaavarput? Josvap Kalebillu Jehova tatigaat ilaatigut pissaaneqarneranut uppernarsaatinik takusaqarsimanertik pissutigalugu. Uagut aamma takusaqarpugut. Jehovap pinngortitarpassui qimerluuinnariakkit. Soorlu avataarsua milliardilinnik ataatsimoortunik ulloriaqatigiippassualik eqqarsaatigisinnaavarput. Jehovap nalissaqanngitsumik nukeqarnerata takutippaa ilumut Ajugaqanngitsuusoq. Pinngortitarsuarmi tupinnartut qimerloorutsigit Jobip Jehova pillugu oqaasii isumaqatigisariaqassavavut: „Arsaarinninniarpat kia akornusersinnaavaa? Kia oqarfigisinnaavaa: Suleqaat?“ (Jobi 9:12) Jehova iligigutsigu silarsuarmi kinaluunniit siooragisariaqanngilarput. — Romamiut 8:31.
8 Jehovap oqaasia, Biibili, aamma pigaarput. Ilisimassummik Guutimeersumik aallerfiusinnaasoq imaarneqarsinnaanngitsoq taanna pissaanermik imaqarpoq ileqqupilunnik ajugaaffiginninnissutigisinnaasatsinnik Jehovallu piumasaa naapertorlugu inuuneqalissutigisinnaasatsinnik. (Hebræerit 4:12) Jehova aqqalu Biibili aqqutigalugu ilikkarpavut atillu taassuma isumaa paasilerlugu. (2 Mosesi 3:14) Paasisarparput Jehovap siunertani naammassiniarlugit piumasaminik imminut pissuseqalersittartoq — Ataataq asannittoq, Eqqartuussisoq naapertuilluartoq, Sorsuttartoq ajugaagajooq. Aamma oqaasia tamatigut eqquuttartoq takusarparput. Guutip oqaasia atuaqqissaarutsigu tussiaasiortutut oqartariaqassaagut: ’Oqaatsit tatigaara.’ — Tussiaat 119:42; Esaja 40:8.
9. Utertitsissutip Jiisusillu toqusunit makinnerata qanoq Jehovamik tatiginninnerulersippaatigut?
9 Jehovap tatiginissaanut pissutissaq suli alla utertitsissummiippoq. (Matthæusi 20:28) Tuppallernaqaaq Jehovap ernini uagut pilluta toqusinnaaqqullugu nunarsuarmukartissimammagu! Utertitsissut taanna ila kimittoqaaq. Inuit peqqissimisut uummamminnillu ilumoortumik saanniartut tamarmik ajortuliaannut akiliutaavoq. (Johannesi 3:16; Hebræerit 6:10; 1 Johannesi 4:16, 19) Utertitsissutimi nalinga saqqummiunniassagamiuk Jiisusi toqusunit makitinneqartariaqarsimavoq. Tupinnartuliaq taanna, takunnittunit hundredelinnit uppernarsarneqartoq, Jehovap tatiginissaanut suli pissutissiivoq. Neriulussinnannginnissatsinnut qularnaveeqqutaavoq. — Apustilit Suliaat 17:31; Romamiut 5:5; 1 Korinthimiut 15:3-8.
10. Jehovap tatiginissaanut suut uagut nammineq pissutissaraavut?
10 Tamakku Jehovap tatigilluinnartariaqarneranut pissutissat ilaannaraat. Suli allarpassuaqaraluarpoq, ilaat inummut namminermut tunngasut. Soorlu inuunitsinni ilaannikkut ajornartorsiulertarpugut. Ajornartoornerit qaangerniarlugit Jehovap siulersuinera ujartoraangatsigu ilitsersuutai qanoq iluaqutaatigisut takusarparput. (Jaaku 1:5-8) Jehova ulluinnarni inuunitsinni tatiginerujartoraangatsigu, tamannalu qanoq ajunngitsigisumik kinguneqartartoq paasigaangatsigu, tatiginninnerput sakkortunerujartuinnartaraaq.
Daavip Jehova tatigaa
11. Pissutsit suut atoraluarlugit Daavip Jehova tatigaa?
11 Israelip kunngiata Daavip Jehova tatigisimavaa. Soorlu kunngimit Saulimit toqunniarneqarami filisterillu sakkutuuinit pissaaneqaqisunit Israelimik tigusarinninniartunit navianartorsiortinneqarami annappoq, allaammi ajugaavoq. Sooq? Daavi nammineq nassuiaavoq: „Jehova qaammaqqutigigakku annatsitsisigalugulu kina ersigissavara? Jehova inuuninnut sernissortigigakku kina qunugissavara?“ (Tussiaat 27:1) Jehova tatigigutsigu aamma uagut ajugaasinnaavugut.
12, 13. Naak akeqqatta oqqatik sakkutut atoraluaraat Jehova tatigisinnaagipput Daavip qanoq takutippaa?
12 Ilaanni Daavi ima qinusimavoq: „Tusannga kappialagaangama, Guuti, inuunera sernissoruk akeqqannut ersigaangama. Isertunnga ajortut pilersaarnerannut pinerluttunullu nipiliortunut! Taakkua oqqatik panatut silivaat, oqaatsit toqunartullit pisissiminnut qarsuliullugit, eqqorniarlugu pinngitsuusoq isertorfimminnit.“ (Tussiaat 64:2-5) Ilisimaqqissaanngilarput sooq Daavi taamatut allassimasoq. Nalunngilarpulli ullumikkut aamma akerlilersorteqartarluta ’oqqaminnik panatut silisisartunik’, oqaatsiminnillu sakkutut atuisartunik. Taakku oqaatsitigut allakkatigullu salluliuutit ’qarsutut’ atorlugit kristumiut assuarnaatsut ’eqqorniartarpaat’. Jehovali tatigilluinnarutsigu tamanna qanoq kinguneqassava?
13 Daavi oqarpoq: „Guutilli piseriarumaarpai, tassanngaannaq eqqorneqassapput. Namminneq oqqaminnit orlutinneqassapput. . . . Iluartut Jehova tipaatsuutigissavaat taassumanilu qimarnguffissarsiorlutik, peqqusersuitsullu tamarmik usorsisimaassapput.“ (Tussiaat 64:8-11) Aap, naak akeqqatta oqqatik panatut ipissaraluaraat ’oqqaminnit orlutinneqassapput’. Naggataatigut Jehovap pissutsit uatsinnut iluaqutissanngorlugit ilorraap tungaanut saatsissavai, Jehovamillu tatiginnissimasut taassuminnga qiimmattaatiginnissapput.
Hizkijap tatiginninnera akilerneqarpoq
14. (a) Navianartorsiornermi sumi Hizkijap Jehova tatigaa? (b) Assyriamiut salluliuutaat upperinngikkini Hizkijap qanoq takutippaa?
14 Aamma kunngi Hizkija Jehovamut tatiginnilussinnarsimanngilaq. Taassuma naalakkersuinerata nalaani Jerusalemi Assyriamiut sakkutuuinit pissaaneqaqisunit naalagaaffippassuarnik ajugaaffiginnissimasunit siooranartorsiortinneqarpoq. Aamma Judami illoqarfiit tamaasa Jerusalemi kisiat pinnagu tiguarsimavaat, Sankeribilu pingaakujulluni oqarpoq Jerusalemi tiguarniarluguttaaq. Rabsjake oqariartortoralugu nalunaarpoq — ilumoortumik — Egypteni tatigilussinnarneqassasoq. Taavali oqarpoq: „Guutinnit tatigisannit nakutitaaniaqinak ima oqartinneqarlutit: Jerusalemi Assyriap kunngiata assaanut tunniunneqassanngilaq.“ (Esaja 37:10) Hizkijalli nalunngilaa Jehovap kinaluunniit peqqusersusaarfigisanngikkaa. Taamaattumik qinuvoq: „Maannali Assyriap kunngiata assaanit annaatsigut, Jehova Guuterput, nunarsuarmi kunngeqarfinnut tamanut ilisimaleqqullugu illit Jehova kisivit Guutiusutit.“ (Esaja 37:20) Hizkijap qinnutaa Jehovap tusarpaa. Unnuap ataatsip ingerlanerani inngilip Assyriamiut sakkutuui 185.000-it toquppai. Jerusalemi tiguarneqanngilaq, Sankeribillu Judap nunaa qimappaa. Pisimasumik tamatuminnga tusartut tamarmik Jehovap pissarsuunera akuerisariaqarsimavaat.
15. Silarsuarmi maani allanngujaqisumi ajornartoorluinnarfik sunaluunniit anigorniarlugu piareersaatigisinnaasatuarput sunaava?
15 Ullumikkut Hizkijatut sorsuffiusumilusooq inuuvugut, naak sorsunnerput anersaakkut sorsunnerugaluartoq. Taamaakkaluartoq anersaakkut sorsuttartutut akiuunnissatsinnut piukkunnarsartariaqarpugut. Saassunneqarsinnaanerput sillimaffigisariaqarparput, anigorsinnaanissaannullu piareersartariaqarpugut. (Efesosimiut 6:11, 12, 17) Silarsuarmi allanngujaqisumi maani pissutsit allanngoriataarsinnaapput. Inuianni eqqissiviilliortoqaleriasaarsinnaavoq. Nunat upperisarsiornerup tungaatigut akaarinnittutut ilisimaneqartuugaluit akaarinnikkunnaariataarsinnaapput. Aatsaat Hizkijatut Jehovamik tatiginnilluinnarneq ineriartortillugu piareersarutta pissutsit qanoq ikkaluartulluunniit anigornissaat piareersimaffigissavarput.
Jehovamik tatiginninneq qanoq isumaqarpa?
16, 17. Jehova tatigalugu qanoq takutissavarput?
16 Jehovamik tatiginninneq oqaasiinnaanngilaq. Aamma uummat atorneqartariaqarpoq, iliuutsitsinnilu tamanna takuneqarsinnaasariaqarpoq. Jehova tatigigutsigu oqaasia, Biibili, tatigilluinnassavarput. Ullut tamaasa atuassavarput, atuakkavut eqqarsaatigeqqissaartassavavut inuunitsinnilu siulersortigissavarput. (Tussiaat 119:105) Jehovamik tatiginninneq aamma isumaqarpoq anersaaq illernartup pissaanera tatigissagipput. Anersaaq illernartoq ikiortigalugu Jehovap iluarisaanik inerititaqarsinnaavugut, ileqquliutiinnarsimasavullu pigiliutiinnarsimasavut ajortut anigorsinnaavavut. (1 Korinthimiut 6:11; Galatiamiut 5:22-24) Anersaaq illernartup ikiuineratigut inuppassuit pujortarunnaarsinnaasimapput ikiaroornartunillu atuisarunnaarsimallutik. Allat inuunerluttarunnaarsimapput. Aap, Jehova tatigigutsigu taassuma pissaaneratigut, uagut pissaanitsiguunngitsoq, iliuuseqassaagut. — Efesosimiut 3:14-18.
17 Jehovamik tatiginninnerup aamma nassataraa tatigisaanik tatiginninneq. Soorlu Jehovap „kiffaq ilumoortoq silatoorlu pigisaminut tamanut paarsisunngortissimavaa“. (Matthæusi 24:45-47) Uagut nammineerniarsarinngilagut aamma ’kiffaqatigiit’ piginnaaneqartitaanerat sumiginnanngilarput, Jehovammi aaqqissuussinera tatigaarput. Tamatuma saniatigut ilagiinni utoqqaanertaqarpoq Paulusip oqarneratut anersaakkut illernartukkut ivertinneqarsimasunik. (Apustilit Suliaat 20:28) Ilagiinni utoqqaanertanik suleqateqarnitsigut Jehova tatigigipput takutissavarput. — Hebræerit 13:17.
Paulusip maligassiaa maliguk
18. Qanoq kristumiut Paulusip maligassiaa ullumikkut malippaat, sunalu tatigisanngilaat?
18 Kiffartornermini Paulusi akuttunngitsunik ajornartoorfeqartarpoq, soorlu uagut ullumikkut taamaattartugut. Kristumiut taakkualu ajoqersuutaat pillugit pisortanut eqqunngitsumik tusarliisoqartarpoq. Eqqunngitsumik paasinninnerit ilaannikkut aaqqinniartarpai, oqaluussinerlu inatsisitigut illersorniartarpaa. (Apustilit Suliaat 28:19-22; Filippimiut 1:7) Maligassiaa ullumikkut malittarparput. Periarfissaqartilluta suliarput pillugu paasissutissiisarpugut, iluaqutaasinnaasullu tamaasa atortarpavut. Nutaarsiassaq nuannersoq pisinnaasarput tamaat illersorniartarparput inatsisitigullu aalajangersartinniartarlutigu, ilungersuanerilli tamakku kisiisa tatigisanngilavut. Isumaqanngilagut eqqartuussivinni ajugaanivut imaluunniit ajunngitsumik eqqartorneqarnivut suliatta ingerlatiinnarneqarnissaanut apeqqutaasut. Jehova kisiat tatigaarput. Itsaq Israelimut oqarpoq: ‘Eqqissisimaneq tatiginninnerlu nakuussutigaarsi.’ — Esaja 30:15, NV.
19. Qanoq takutinneqarpa qatanngutivut malersugaanermik nalaani Jehovamut tatiginnilussinnarsimanngitsut?
19 Ukiuni kingulliunerusuni sulinerput Europap Kangiani, Europap Kitaani nunat ilaanni, Asiap Afrikallu ilaanni Amerikamilu Kujallermi nunat ilaanni inerteqqutaasimavoq killilersugaasimalluniluunniit. Tamanna isumaqarpa Jehovamik tatiginnilussinnarsimasugut? Naamik. Pissutsit ilisimasaqarfiginngisavut pissutigalugit Jehovap ilaannikkut kristumiut sakkortuumik malersugaanissaat akuerisarpaa, tamannali ilutigalugu malersugaasut asannilluni nukissaannik tunisarpai. Kristumiut malersugaatillutik Guutimut qanoq upperluinnartarnerat tatiginnilluinnartarnerallu pillugu tupinnartunik oqaluttuarpassuaqarpoq.
20. Eqqortup akerlianik sutigut iliortanngilagut, oqaluussinissamut kiffaanngissuseqaraluarlutaluunniit?
20 Oqaluussinerpulli nunani amerlanerni inatsisitigut akuerisaasimavoq, tusagassiuutitigullu ilaannikkut ajunngitsumik eqqaaneqartarpugut. Tamanna soorunami qujamasuutigaarput, aamma paasivarput tamanna Jehovap siunertaanut iluaqutaasoq. Pilluaqqusineratigut kiffaanngissuseqarnerulernerput atorparput Jehova tamakkiisumik kikkunnillu tamanit takuneqarsinnaasumik kiffartuullugu, uagut nammineq anguniakkatta kissaatittalu siuarsarnerannut atornagu. Silarsuarmit iluarineqarnerulerniarluta kalluunnaveersaarnissamik aalajangiussisimanitta akerlianik iliuuseqanngisaannassaagut, oqaluussinerput qasukkartissanagu Jehovamuluunniit kiffartornerput annikillisissanagu. Messiarsip naalagaaffiani inuttaavugut, Jehovallu kisimi naalakkersuisussaanera akuerilluinnarparput. Neriuutivut pissutsit aaqqissuussaanerannut maanna atuuttumut tunnganngillat, silarsuarmulli nutaassamut tunngapput. Silarsuassami nutaami tassani Kristusip qilammi naalagaaffia nunarsuarmi kisimi naalakkersuissaaq. Qaartartunit, missilinit imaluunniit atomit atorlugit saassussinernit naalakkersuisut taakku ajoquserneqarsinnaanngillat uppitinneqarsinnaanatilluunniit. Ajugaaffigineqarsinnaanngillat, Jehovallu siunertai naammassissavaat. — Daniel 2:44; Hebræerit 12:28; Saqqummersitat 6:2.
21. Qanoq iliornissarput aalajangiusimavarput?
21 Paulusi oqarpoq: „Uagulli ilaanngilagut tammassutaasumik nigortunut, ilaavugulli tarnitta annaanneqaatissaannik uppertunut.“ (Hebræerit 10:39) Qanortoq naggatissap tungaanut Jehova aalajaalluta kiffartuukkitigu. Jehovamik tatiginnilluinnarnissatsinnut maannangaaq naassaanngitsumullu pissutissaqarluarpugut. — Tussiaat 37:3; 125:1. (wE 3/1 03)
Suna ilikkarpiuk?
• Sooq Josva Kalebilu isumalluartumik nalunaaruteqarpat?
• Jehovamik tatiginnilluinnartariaqarnitsinnut suut pissutissaraavut?
• Jehovamik tatiginninneq qanoq isumaqarpa?
• Jehova tatigilluinnaratsigu suna aalajangiusimassavarput?
[Atuaqqissaarnermi apeqqutit]
[Qupp. 15-mi assiliartaq]
Sooq Josva Kalebilu isumalluartumik nalunaaruteqarpat?
[Qupp. 16-mi assiliartaq]
Jehovap tatiginissaanut Pinngortitarsuarmit pissutissinneqangaarpugut
[Suminngaanneernera]
Courtesy of Anglo-Australian Observatory, photograph by David Malin
[Qupp. 18-mi assiliartaq]
Jehovamik tatiginninneq aamma taassuma tatigisaanik tatiginninneruvoq