„Pisariaqartitaviga nassaaraara“

SILARSUARMI Peqqinnissakkut Suliniaqatigiiffissuarmit, WHO-mit, nalunaarusiaq naapertorlugu ilimagineqarpoq ullumikkut inuit 120 millionit missaaniittut isumatsassimangaarnermik naalliuuteqartut. Ukiut tamaasa 1 millionit imminoortarput, 10 millionit 20 millionillu akornanniittut imminooriaraluartarlutik. Isumatsassimangaartunut suna ikiuutissaava? Nakorsaatitornerup anersaakkut anniaatit immaqa oqilisissinnaavai, kisianni aamma pingaaruteqarpoq misigissutsikkut ikiorneqarnissaq. Taamatut atugaqarsimasut ilaasa aamma Jehovap Nalunaajaasuisa atuagassiaataanni Biibililersaartuni siunnersuutit atoriaannaasut iluaqutigisimavaat. Tamanna Frankrigimiit allakkami tulliuttumi takussutissaqarpoq.

„Ullut qanittut tikillugu inuuginnarnissap siunertaa takusinnaasimanngilara. Neriuutigiinnarsimagaluarparami Guutip toqutiinnarumaaraanga. Inuunerami ilorleq toqungasutut issimagaluarpoq. Ilitsersuuteqqullunga Jehovamut tamaviaarlunga qinuvunga. Aalajangerpungattaaq atuagaq Jehovas Vidners Årbog 2002-meersoq (kalaallisuunngortitaanngitsoq) atuarniarlugu, ullunilu pingasuni atuarlugu naavara. Atuagara assut qiimmassaatigaara upperneralu nakussatsinneqarluni.

Napasuliaq Alapernaarsuiffik-ni Iteritsi!-nilu paasissutissanik ujarlerpunga, tupigutsaqaangalu. Atuagassiat taakkua ukiut 15-it sinnerlugit atuartarsimavakka, imaalu qanoq qiimmaallannartiginerat nakussatsinnartiginerallu eqqarsaatigilluanngisaannarsimallugu. Asannissusermik ulikkaarput, ulluni makkunani amigaatigineqaqisumik. Tassa pisariaqartitaviga nassaaraara.“

Biibilimi allassimavoq: „[Jehovap] qanippai sequmissimasumik uummatillit, annaattarpai aserortersimasumik anersaallit.“ (Tussiaat 34:19) Aap, ’sequmissimasumik uummatilinnut’ tamanut, imaluunniit ’aserortersimasumik anersaalinnut’ tamanut, Biibilimit qiimmassarneqarnissaq ajornanngilaq siunissamilu neriugisaqaatigilerlugu. Jehovap Nalunaajaasuisa atuagassiaataat Biibililersaartut saqqummersittagai agguaattagaalu kikkut tamarmik iluaqutigisinnaavaat, taakkunanilu tuppallersaat Guutip oqaasiani isumassarsiarititaasumi Biibilimi nassaassaavoq. (wE 3/1 03)