’Sapiitsuugitsi nakuullusilu!’
’Sapiitsuugitsi nakuullusilu!’
„Nikalloqinasili, silarsuarmut ajugaareerpunga.“ — JOHANNESI 16:33.
1. Israelikkut akeqqatik Kana’anip nunaaniittut tikikkunikkit suna pisariaqartissavaat, taamaattumillu qanoq kajumissaarneqarpat?
ISRAELIKKUT Jordanip kuussuatigut ikaarlutik nunamut neriorsuutaasumut isernialermata, Mosesip ima oqarfigai: „Sapiitsuugitsi nakuullusilu! Siooraqinasi, annilaarutigeqinasigillu. [Jehovammi] Guutissi nammineq ingerlaqatigiumaarpaasi.“ Taava Mosesip Josva Israelikkunnik Kana’animut eqqussisussaq qaaqqoriarlugu oqaatsini uteqqippai. (5 Mosesi 31:6, 7) Kingusinnerusukkut Jehova nammineq Josvamut oqarpoq: „Tuppallerit pissatsillutillu! . . .Tuppallerit pissatsillutillu.“ (Josva 1:6, 7, 9) Kajumissaarineq taamaattoq pissusissamisoorpoq, Israelikkummi akeqqatik Jordanip illua’tungaani najugallit pissarsuit tikikkunikkit sapiitsuusariaqarput.
2. Ullutsinni qanoq atugaqarpugut, sunalu pisariaqartipparput?
2 Ullumikkut uagut kristumiutut silarsuarmut nutaamut neriorsuutaasumut isingajalernitsinni Josvatut sapiissuseqarnissarput pisariaqartipparput. (2 Petrusi 3:13; Saqqummersitat 7:14) Uagulli atukkavut Josvap atugarisimasaanit allaanerupput. Taassuma panaq qalugiusarlu atortariaqarsimavai. Uagut akiuuppugut anersaakkut sakkutuussutinik atisilluta. (Esaja 2:2-4; Efesosimiut 6:11-17) Aammattaaq nunamut neriorsuutaasumut isereernermi kingorna Josva sorsuttariaqartarsimaqaaq. Uagulli maannakkut sorsugassavut annerpaat atorpavut – silarsuarmut nutaamut isernissarput sioqqullugu. Sapiissuseqarfigisariaqakkatta ilaat misissoriartigit.
Sooq akiugassaqartugut
3. Biibili naapertorlugu kina akeqqatta pingaarnersaraat?
3 Apustili Johannesi allappoq: „Ilisimavarput Guutimit pisuulluta silarsuarlu tamarmi Ajortumut naalatsigitittoq.“ (1 Johannesi 5:19) Tassa taanna uagut kristumiutut akiugassaqarnitsinnut pissuterpiaasoq — uppernerput annaajumanagu akiuunneq. Kristumiu taamatut akiuukkaangat assuarnaattuaraangallu Saatani Diaavulu ajorsartarpoq. Taanna „løvitut uiannisaartutut angalasarpoq“, kristumiut aalajaatsut assersuutaasumik ersilersinniarlugit iiniarlugillu. (1 Petrusi 5:8) Aap, kristumiut tanitat suleqataallu sorsuffigai. (Saqqummersitat 12:17) Sorsunnermi tassani inuit atortarpai, taakkualu — nalullugu nalunaguluunniit — kiffartuuttarpaat. Saatani sakkorisaalu taakku assortortuassagaanni sapiitsuunissaq pisariaqarpoq.
4. Jiisusi qanoq mianersoqqusiva, pissuserlu suna kristumiut ilumoortut pissuserivaat?
4 Jiisusip nalunngilaa Saatanip inuillu sakkorisaasa nutaarsiassap nuannersup siammarterneqarnera sakkortunerpaamik akerlilersussagaat. Taamaattumik ajoqersukkani ima mianersoqquai: „Taava naalliutsikkumaarpaasi toqukkumaarlusilu, ateralu pillugu inuiannit tamanit uumissorneqassaasi.“ (Matthæusi 24:9) Oqaatsit taakku ullumikkut ukiuni hundredelinni siullernitulli eqquupput. Ullutsinni Jehovap Nalunaajaasuisa malersugaaneri oqaluttuarsiarisartakkavut qangatulli peqqarniitsigaat. Kristumiulli ilumoortut taamatut atugaqaraangamik sapiissuseqartaqaat. Ussat una eqqarsaatigisarpaat: „Inunnik qunugisaqarneq napiaaniutinngortarpoq,“ napiaaniutinillu pisarineqarnissartik kissaatiginngilaat. — Ussatit 29:25.
5, 6. (a) Pissutsini allani suni sapiitsuunissaq pisariaqarpa? (b) Sapiitsuunissartik misilinneqaraangat kristumiut aalajaatsut qanoq pisarpat?
5 Malersugaanngikkaluaraanniluunniit aamma allatigut sapiitsuunissaq pisariaqartarpoq. Nutaarsiassaq nuannersoq Biibilimeersoq pillugu allanik oqaloqatiginninnissaannarluunniit oqaluussisartut ilaannut unamminiarnartuuvoq. Atuartut nunaminnut erfalasumulluunniit ilumoorfiginninnermik uppernarsaaqquneqaraangamik uppernerminnik misiliivigineqartarput. Ilumoorfiginninnermik uppernarsaaneq taamaattoq upperisarsiornikkut iliuutsinut ilaammat atuartut kristumiut sapiillutik Guutip iluarisaanik iliornissartik aalajangiuttarpaat, tamannalu taamatullu takutitsilluarnerat allanut kajumissaataasaqaaq.
6 Tusagassiuutit akeqqatsinnit sunnerneqarlutik tusaamanerlugaalersitsigaangata imaluunniit oqaluussinerput „inatsisit tunngavigisuusaarlugit“ akornusersorneqaraangat sapiissuseqarnissarputtaaq pisariaqartittarparput. (Tussiaat 94:20, Testamentitoqaq 1990-imeersoq) Qanoq misigisarpugut aviisitigut, radiokkut imaluunniit tv-kkut tusagassiani eqqortoq equtinneqaraangat imaluunniit eqqunngivissumik tusagassiisoqaraangat? Uissuummissutigisarparput? Naamik. Taamaattoqarnissaa naatsorsuutigisariaqarparput. (Tussiaat 109:2) Aamma uissuummissutigissanngilarput ilaasa equtitsinerit eqqunngitsunillu oqalunnerit upperigaangatigit, tassami „misilittagaqanngitsup tatigisarpai oqaaserineqartut suut tamaasa“. (Ussatit 14:15) Kristumiulli ilumoortut qatanngutitik pillugit oqaaserineqartut suulluunniit upperisanngilaat. Aamma tusagassiuutit tusarliussaannit ajortunit sunnertillutik ataatsimiigiartarunnaarneq ajorput, oqaluussisarunnaassanatik imaluunniit uppernerminni qulalissanatik. Akerlianik „tamatigut Guutimit kiffarineqartutut takutinniartarput: . . . ataqqineqarnermi narrugineqarnermilu, mitaatigineqarnermi nersorneqarnermilu, tammartitsisuusutut uffali ilumoortuusutut.“ — 2 Korinthimiut 6:4, 8.
7. Uatsinnut killisiorluta qanoq aperisinnaavugut?
7 Paulusi Timotheusimut allappoq: „Guutimmi tuninngilaatigut anersaamik qunutuumik, kisianni . . . anersaamik nakuussuseqartumik. Taamaattumik Naalakkatsinnik nalunaajaat kanngusuutigissanngilat.“ (2 Timotheusi 1:7, 8; Markusi 8:38) Oqaatsit taakku atuareerlugit imminut ima aperisinnaavugut: ’Upperisara kanngusuutigaara imaluunniit sapiitsuuvunga? Suleqatikka (imaluunniit atuaqatikka) paasitittarpakka Jehovap Nalunaajaasuinut ilaallunga, imaluunniit tamanna isertorniartarpara? Allaanerunera kanngusuutigaara imaluunniit Jehovap Nalunaajaasuinut ilaanera usorsisimaarutigaara?’ Nutaarsiassap nuannersup oqaluussissutiginissaa nangaassutigigaanni imaluunniit nuannarineqanngitsumik isummersimaneq kanngusuutigigaanni, Jehovap Josvamut oqaasii eqqarsaatigineqartariaqarput: „Sapiitsuugit pissatsillutillu.“ Eqqaamajuk suleqatitta atuaqatittaluunniit qanoq isumaqarnerat apeqqutaanngimmat, apeqqutaallunili Jehovap Jiisusi Kristusillu uagut pilluta qanoq isumaqarnerat. — Galatiamiut 1:10.
Qanoq sapiissuseqarnerulersinnaavugut?
8, 9. (a) Kristumiut sapiissusiat ilaanni qanoq misilinneqarpa? (b) Petrusi Johannesilu sioorasaarneqaramik qanoq iliorpat, sunalu qatanngutitillu paasivaat?
8 Ulluni atukkatsinni ajornakusoortuni makkunani assuarnaassuserput attakkumallugu qanoq sapiissuseqalerniarsinnaavugut? Kristumiut siulliit qanoq sapiissuseqalertarsimappat? Malugeriaruk Jerusalemimi palasiunerit utoqqaanertallu Petrusi Johannesilu Jiisusip aqqani oqaluussiunnaaqqullugit naalakkermatigit qanoq pisoqartoq. Ajoqersukkat oqaluussiunnaarumanngimmata sioorasaarneqarput, kingornalu iperarneqaramik qatanngutiminnukarlutik qinoqatigiipput: „[Jehova], sioorasaarutaat arajutsinaveersaakkit, kiffatillu pisinnaatikkit oqaatsit siooranngivillutik oqaatigeqqullugu.“ (Apustilit Suliaat 4:13-29) Jehovap qinnut taanna akivaa, anersaaminik pissatsillugit, kingornalu juutit siuttuisa uppernarsaanerattut ajoqersukkat Jerusalemi ajoqersuutiminnik ’tamakkerpaat.’ — Apustilit Suliaat 5:28.
9 Pisimasumi susoqarsimanersoq paasiniaqqissaariartigu. Ajoqersukkat juutit siuttuinit sioorasaarneqaramik nakkaannarnissartik eqqarsaatiginngilaat. Naamik, oqaluussiuaannarnissaminnut sapiissuseqalernissartik qinnutigaat. Taava qinnutigisartik naapertorlugu iliuuseqarmata Jehovap anersaaminik pissatsippai. Jehovap kristumiut malersugaasut tamaasa taamatut iliorfigissagai Paulusimit uppernarsarneqarpoq, taanna pissutsit allaanerulaartut atortillugit ukiorpaaluit qaangiuttut ima allakkami: „Tamaasa pissatsitsisikkut atussallugit sapinngilakka.“ — Filippimiut 4:13.
10. Inunnguuseralugu annilaangatooq Jeremiap maligassiaanik qanoq iluaquteqarsinnaava?
10 Atagu oqariarta kristumiu inunnguuseralugu annilaangatuujusoq. Taamaakkaluartoq akerlilersorneqartilluni nakimanani Jehovamut kiffartorsinnaava? Aap, ilumut! Jehovap pruffiitinngortimmani Jeremiap periarnera eqqaamajuk. Jeremia inuusuttoq imminut ajukkuttoq oqarpoq: „Inuusuttuuvunga.“ Jehovalli ima oqarluni kajumissaarpaa: „Ima oqaqinak: Inuusuttuuvunga! Kisianni aallassaatit sumulluunniit uanga orneqqusannut, oqaasereqqusakkalu tamaasa oqaaserissavatit. Ersigissanngilatit uanga najorakkit annaatissallutillu.“ (Jeremia 1:6-10) Jeremiap Jehova tatigaa, ikiormanilu nangaanini qaangerpaa. Maluginiarnartumik sapiissuseqarpoq, Israelimilu Jehovamut nalunaajaasunngorpoq nuimasoq.
11. Jeremiap maligassiaanik malinninnissamut ullumikkut kristumiut suna kajumississutigissavaat?
11 Tanitat Jeremiatut Jehovap siunertaanik oqaluussinissaminnik ullumikkut suliakkerneqarsimapput. „Savanit allanit“, ’amerlangaartunit’ ikiorneqarlutik suliassaq taanna aalluttuarpaat, naak soqutiginninnginneqaraluartoq, mitalliineqaraluartoq malersuineqartaraluartorlu. (Saqqummersitat 7:9; Johannesi 10:16) Jehovap Jeremiamut oqaasii pissatsissutigisarpaat: „Erseqinak.“ Guutimit suliassinneqarsimanertik oqariartuutaanillu oqaluussissutiginninnertik eqqaamajuarpaat. — 2 Korinthimiut 2:17.
Maligassiuilluarsimasut allat
12. Jiisusi sapiissusermik qanoq takutitsiva, ajoqersukkanilu qanoq oqarfigai?
12 Sapiissuseqarnerulerniarnitsinni iluaqutigissavarput allat Jeremiatut sapiitsuliorsimasut qimerluussallugit. (Tussiaat 77:12) Assersuutigalugu Jiisusip kiffartornera qiviarutsigu, Saatanimit usserneqarami kingusinnerusukkullu upperisarsiortut siuttuinit sakkortuumik akerlilersorneqarami qunusuinnera maluginiarnarpoq. (Lukasi 4:1-13; 20:19-47) Jehovamit pissatsinneqarluni Jiisusi aalajaalluinnarpoq, taamaattumillu toqunngitsiarluni ajoqersukkani ima oqarfigisinnaasimavai: „Silarsuarmi naalliuuteqarpusi; nikalloqinasili, silarsuarmut ajugaareerpunga.“ (Johannesi 16:33; 17:16) Maligassiaa ajoqersukkat malikkunikku ajugaasinnaassapputtaaq. (1 Johannesi 2:6; Saqqummersitat 2:7, 11, 17, 26) Sapiitsuunissarli pisariaqarpoq!
13. Paulusip Filippimiut qanoq qiimmassarpai?
13 Jiisusip toquneraniit ukiorpaaluit qaangiuttut Paulusi Silasilu Filippimi parnaarussaapput. Paulusi kingusinnerusukkut illoqarfimmi tassani kristumiunut allappoq qiimmassaalluni, ’anersaaq ataaseq aalajangiussimallugu tarnimi ataatsimi assorooqatigiillutik iivangkiiliumut upperneq pillugu akerartortiminnit annilaartinneqanngiveqqullugit’. Suli sapiissuseqarnerulersinniarlugit allappoq: „Tamanna taakkua [malersuisut] tammarnissaannut ilissili annaanneqarnissassinnut nalunaaqutaassaaq, allaat tassaalluni Guutimit pisoq. Ilissimi Kristusi pissutigalugu tunineqarpusi saammaannermik Kristusimik upperfiginnittussatut piinnarnasi, kisianni aammattaaq taanna pillugu naalliuttussaasutut.“ — Filippimiut 1:27-29.
14. Paulusip Romami parnaarussivimmi nakimanani oqaluussinera qanoq kinguneqarpa?
14 Paulusi Filippimi ilagiinnut allakkami Romami parnaarussaaqqavoq. Taamaakkaluartoq nakimanani allat oqaluussiffigisarpai. Tamanna qanoq kinguneqarpa? Allappoq: „Pallittaalisamiittunut tamanut allanullu tamanut erseqqissumik paasinarsimmat Kristusi pillugu qilersugaasunga. Naalagarlu tatigalugu qatanngutit amerlanersaat uanga qilersugaanikkut annerusumik sapiillisinneqarsimapput ersiornatik Guutip oqaasia oqaluussissutigisinnaanngorlugu.“ — Filippimiut 1:13, 14.
15. Maligassiat uppernitsinnik sapiitsuunissatsinnillu aalajangiussisimanitsinnik nukittorsaasinnaasut sumi nanisinnaavavut?
15 Paulusip maligassiaa uatsinnut aamma sunniuppoq. Ullumikkuttaaq nunani kisermaassilluni naalakkersuisulinni imaluunniit palasit pissaaneqarfigisaanni malersugaatillutik kristumiutut nikallujuissuseqartut sunnerpaatigut. Oqaluttuat arlallit taamaattut Napasuliaq Alapernaarsuiffik-mi, Iteritsi!-mi aamma Jehovas Vidners Årbog-imi saqqummersinneqartarput. Atuaraangatsigit eqqaamassavarput inuit oqaluttuarineqartut uatsitulli ittuusut; naalliunnartunilli nalaataqaraangata Jehovap pissaanermik asseqanngitsumik tunisarpai, aalajaattuarsinnaappullu. Qularinngissinnaavarput pisariaqarpat uaguttaaq taamaaliorfigiumaaraatigut.
Sapiilluta aalajangiussinerput Jehovap iluaraa ataqqinaatigalugulu
16, 17. Maannakkut qanoq sapiissuseqarnerulersinnaavugut?
16 Sallusuissut naapertuilluarnerlu aalajangerfigigaanni sapiitsuliorneruvoq. Qamuuna ersigaluarluni taamaalioraanni sapiitsuliorneq suli annerussaaq. Ilumut kristumiut tamarmik sapiitsuusinnaapput Guutip piumasaanik iliornissartik kissaatigigunikku, aalajaatsuujuarnissartik aalajangiusimagunikku, Guuti tatigigunikku, eqqarsaatigigunikkulu imminermittut malersugaasut Jehovap siusinnerusukkut pissatsittarsimagai. Aammattaaq paasigutsigu sapiilluta isummernerput Jehovap iluarigaa ataqqinaatigigaalu, nakkaannannginnissarput suli aalajangiusimanerussavarput. Taanna asagutsigu mitagaaneq tassanngaluunniit ajornerusoq sapissanngilarput. — 1 Johannesi 2:5; 4:18.
17 Puigunngisaannartigu upperneq pissutigalugu naalliuuteqarnerput ajortumik iliuuseqarsimanermik pissuteqartinneqarsinnaanngimmat. (1 Petrusi 3:17) Jehova kisimi Oqartussaasoq tapersersoratsigu, ajunngitsulioratta silarsuarmullu ilaannginnatta naalliuppugut. Tamanna pillugu apustili Petrusi oqarpoq: „Ajunngitsuliornissinnili erloqisitaatillusi naammagittarussi tamanna Guutimut qujassutissaavoq.“ Oqarportaaq: „Taamaattumik Guutip piumasaa malillugu naalliuttariaqartut ajunngitsumik iliortuassapput tarnitillu pinngortitsisumut unneqqarissumut peqqussallugit.“ (1 Petrusi 2:20; 4:19) Aap, uppernerput Guutitta asannittup Jehovap iluaraa, tassungalu ataqqinaataavoq. Tamanna ilumut sapiitsuunissamut pissutissaalluarpoq!
Pisortanut sassartitaagaanni
18, 19. Nunami maani eqqartuussisumut sapiissuseqarluta sassaraangatta oqariartuut suna oqariartuutigisarparput?
18 Jiisusip ajoqersukkani malersugaajumaarnerannik ilisimatikkamigit aamma oqarpoq: „[Inuit] eqqartuussassanngortissavaasi synagogiminnilu iperartorlusi. Uanga pillunga naalagaatitanut kunnginullu sassartinneqarumaarpusi, taakkununnga Guutimillu nalusunut uppernarsaataallusi.“ (Matthæusi 10:17, 18) Eqqunngitsumik unnerluutigineqarluni eqqartuussisumut allamulluunniit oqartussaasumut sassartitaassagaanni sapiissuseqartariaqarpoq. Nakimaallutali nalunaajaanissamut periarfissaq taamaattoq atorluarutsigu pissutsit ajunngitsumik iliuuseqarnissamut periarfissanngortillugit allanngortissavavut. Jehovap oqaasii Tussiaat 2:10, 11-miittut eqqartuussisorisatsinnut apuutissavavut: „Ilissi kunngit silatusaaleritsi, siunnersuutit akuersaartarniarsigit nunarsuarmi eqqartuussisut ilissi: [Jehova] kiffartorfigisiuk mianeralugu!“ Jehovap Nalunaajaasui eqqunngitsumik unnerluutigisaallutik eqqartuussivimmut sassartitaagaangata eqqartuussisut naqisimaneqarani upperisarsiorsinnaatitaanermik inatsit malikkajuttarpaat, tamannalu qujamasuutigaarput. Eqqartuussisulli ilaat akeqqatsinnit sunnerneqartarput. Allassimaffimmi taakku ima oqarfigineqarput: „Siunnersuutit akuersaartarniarsigit [perorsartinniaritsi, NV].”
19 Eqqartuussisut paasisariaqarpaat Jehovap inatsisaa tamanit qutsinnerusoq. Eqqaamasariaqarpaat inuit tamarmik, aamma eqqartuussisut, Jehova Guuti Jiisusi Kristusilu naatsorsuiffigisussaammatigit. (Romamiut 14:10) Nunami maani eqqartuussisup naapertuilluartumik eqqartuukkaluarpatigut eqqartuutinngikkaluarpatigulluunniit Jehovap tapersersussammatigut sapiitsuusariaqarpugut. Biibilimi ima oqaatigineqarpoq: „Pilluarpoq kinaluunniit taassumani qimarnguffissarsiortoq.“ — Tussiaat 2:12.
20. Malersugaagaluarluta mamarlerneqaraluarlutalu sooq pilluarsinnaavugut?
20 Jiisusi qaqqami oqaluutsimini oqarpoq: „Pilluarpusi ilissi uanga pillunga mitaatigippasi qinugalusilu tamanillu ajortunik oqaatigippasi sallullutik. Tipaatsugitsi nuannaarlusilu akissarsiassarsi qilanniittoq angeqimmat; taamatuttaarmi pruffiitit qinugisarpaat ilissi siunissigut.“ (Matthæusi 5:11, 12) Soorunami malersugaaneq nuanninngilaq; malersugaagaluarlutali aalajaakkutta — aamma tusagassiuutitigut mamarlerneqarnermi — nuannaassalluta pissutissaqarpugut. Jehovammi iluarisaanik iliussaagut, sapiillutalu isummernerput pillugu akilerneqassaagut. Taamaaliorneq uppernitta piviusuuneranik takutitsivoq, Guutimillu akuerisaanermik kinguneqassaaq. Aap, Jehova tatigilluinnaripput isummernitsinnit erserpoq. Tatiginninneq taamaattoq kristumiup pisariaqartilluinnarpaa, taamaanneralu allaaserisami tulliuttumi takutinneqassaaq.
Suna ilikkarparput?
• Qanoq ittutigut ullumikkut sapiitsuunissarput pisariaqartipparput?
• Qanoq sapiinnerulersinnaavugut?
• Kikkut sapiitsuunermikkut maligassiuisimappat?
• Sooq sapiitsoorusuppugut?
[Atuaqqissaarnermi apeqqutit]
[Qupp. 9-mi assiliartaq]
Simone Arnold (maanna Liebster) Tysklandimi, Widdas Madona Malawimi aamma Lydija, Oleksijilu Kurdasi Ukrainemi sapiitsuliorsimapput, Jehovalu ikiortigalugu ajortoq nakkaannarfigisimanngilaat
[Qupp. 10-mi assiliartat]
Nutaarsiassaq nuannersoq kanngusuutiginngilarput
[Qupp. 11-mi assiliartaq]
Paulusip parnaarussaatilluni sapiillisaarneratigut nutaarsiassap nuannersup oqaluussissutigineqarnera angusaqarfioqaaq
[Qupp. 12-mi assiliartaq]
Eqqartuussisup isummernitsinnik Biibilimeersumik sapiilluta nassuiaanneratigut pingaarutilimmik oqariartorfigissavarput