Ilissi inuusuttut — siumukarpisi?

„ATAATSIMIIGIARTARPUNGA, kisianni Jehovap Nalunaajaasuinut ilanngunnissara piviusumik kissaatiginngilara,“ Hideo gymnasiami atuarnermi nalaanit eqqaasaqarluni oqarpoq. „Atuaqatinnit nuannarineqarnissara kisiat kajungeraara takutissinnaasannillu peerartaarnissaq. Aalajangersimasunik anguniagaqanngilanga imaluunniit anersaakkut siumukarnissaq kissaatiginagu.“ Inuusuttut amerlasuut Hideotulli aalajangersimasunik anguniagaqaratik siumukarniaratilluunniit maleruutiinnartarunarput.

Inuusuttuuguit, qularnanngilaq sulinngiffimmi soqutigisanik imaluunniit timersuutinik tiguartiasuusinnaasutit. Anersaakkulli ittut immaqa taamatut nuannaritigineq ajorpatit. Anersaakkut soqutigisaqarneq nuannarineqarsinnaagami? Tussiaasiortup oqaasii malugikkit: „[Jehovap] nalunaajaatai aalajaatsuupput, misilittagakitsunik ilisimasunngortitsisarput. . . . [Jehova] peqqussutai piviusuupput, isinik qaamaneqalersitsisarput.“ (Tussiaat 19:8, 9) Guutip oqaasii „misilittagakitsunik“ ilisimassusilimmik iliuuseqalersitsisarput ’isinillu qaamaneqalersitsisarlutik’. Tassa anersaakkut ittunik sammisaqarneq nuannarineqarsinnaavoq. Kisianni tamanna misiginiaraani suna pisariaqarpa? Qanoq aallartittoqassava?

Guutip kiffartuunnissaanut pissutissaqarit

Siullerpaamik pissutissaqartariaqarputit. Malugiuk Judap kunngia Josia qanoq pisoq. Naalaffimmi atuagaq Jehovap inatsisaanik imalik nassaarineqarmat tassanngaaniillu kunngi atuffanneqarluni, taassumani misigissutsit sakkortuut pilersinneqarput. Taassuma kinguneranik „Josiap guutiliat maajunnartut Israelikkut nunagisaanni ittut tamaasa piiarpai“. (2 Nalunaarsuutit 34:14-21, 33) Tassa Guutip oqaasiata atuarneratigut Josia Jehovap pallorfigineqarnerata iliuuseqarfiginerunissaanut kajumissaarneqarluni misigivoq.

Aamma illit Biibilip atuarneratigut atuakkavillu eqqarsaatigineratigut Jehovap piumasaa malillugu iliornissat annerusumik kissaatigilersinnaavat. Assersuutigalugu Hideo taamaaliorluni kajumissisinneqarpoq. Hideop pioneeri, imaluunniit piffissaq tamaat oqaluussisartoq, utoqqasaaq ikinngutigilerpaa. Qatanngutip pioneerip Biibilip atuaqqissaarnissaa pingaartittorujussuuaa, ilikkakkamilu iliuuserinissaat ilungersuutigisarlugu. Hideomut sunniinera sakkortungaarmat qatanngutip maligassiaa malilerpaa, Guutimik pallorfiginninnissamik allanullu iliuuseqarnissamik kissaatigisaa qajannaallisippaa. Anersaakkut ittut iliuuseqarfigai inuuneralu siunertaqarnerulersillugu.

 Ullut tamaasa Biibilimik atuarneq iliuuseqarnissamut kajumilersitsisarpoq. Takahiro oqaluttuarpoq: „Innareerlunga eqqaagaangakku ulloq taanna Biibili atuarsimanagu makittarpunga atuarlungalu. Taamatut Jehova inuuninni sunniuteqalerpoq. Anersaakkut siumukariartornera ullut tamaasa Biibilimit atuartarninnik pissuteqarluinnarpoq. Piffissap nalunaajaanermut atornerunissaa kajungerilerpara, taamaattumillu gymnasiamiinnerma kingorna pioneeritut aallartillunga. Tamannalu nuannareqaara.“

Tassa Biibilimik atuartarneq isumaavoq pitsaasoq, kisianni Jehovap pallorfiginissaanut kajumilersitsisumik allamik sumik iliortoqarsinnaava? Tomohiro anaanaminit sallusuissutsimik Biibilimeersumik ilinniartinneqarluarsimavoq. Oqarpoq: „Kisianni aatsaat 19-inik ukioqarlunga namminerlu atuagaq Inuuneq ilumut siunertaqarpoq peqqissaarullugu atuarakku Jehovamut asanninneq Jiisusillu pilliutaa pingaartilerpakka. Pingaartitsilernerma Jehova pillugu oqaluuserinerunissaanut kajumilersippaanga.“ (2 Korinthimiut 5:14, 15) Tomohirotulli inuusuttut amerlasuut anersaakkut siumukarnissartik kajumigilissavaat, eqiasuillutik Biibilimut tunngasut misissulerunikkit.

Taavami Jehovap pallorfiginissaa suli itisuumik kissaatigilersimanngikkaanni? Ikiortissarsiorfissaqarpugut? Apustili Paulusi allappoq: „Guutimi tassaavoq ilissinni sunniisoq piumassuseqartittarlusi naammassisaqartittarlusilu.“ (Filippimiut 2:13) Qinunikkut Jehovamut ikioqqullutit saaffiginnikkuit anersaaminik illernartumik tunissavaatit, taassuma ’naammassisaqartiinnassanngilaatit’, aammattaarli ’piumassuseqartikkumaarpaatit’. Tassa imaappoq Guutip anersaavata illernartup pallorfiginissaanut sapinngisannik iliorniarlutit kissaatigisat sakkortusassavaa, anersaakkullu siumukarnissannut ikiussallutit. Taamaattumik Jehovap pissaanera tatigiuk aalajangiullugulu.

Nammineerlutit anguniagaqarit

Jehova ilumoorlutit kiffartuunniarlugu aalajangereeruit iliuuseqarfiginisaanut anguniagaqarnissat pisariaqarpoq. Mana, kristumiu arnaq inuusuttoq oqarpoq: „Anguniagaqarnera assorsuaq uannut iluaqutaavoq. Unittutut innissaraluannut taarsiullugu siumukarnissannut sapiissuseqaannarnissannullu ikiorpaanga. Jehovamut qamannga pisumik qinuvunga anguniakkama angunissaanut ikioqqullunga, siumukarnissannullu ikiorpaanga allamut saasarnanga.“

Anguniakkatit piviusorsiortuusariaqarput anguneqarsinnaallutillu. Anguniagaq naleqquttoq tassaasinnaavoq ullut tamaasa Biibilimi kapitalip ataatsip atuarnissaa. Aamma illit imminut misissueqqissaarnissannut anguniagassaliuussinnaavutit. Jehovap pissusiinik misissueqqissaarnissat periarfissaavoq, Register til Vagttårnets publikationer (Napasuliaq Alapernaarsuiffik-up atuagassiaataanik ujarlerfissiaq) ikiortigalugu. Oqaatsip „Jehova“-p ataani qulequtaaraqarpoq allassimasoq „Liste over egenskaber“, (Pissusiinik allattuiffik). Pissusit 40-t missaaniittut taaneqartut misissornerusinnaavatit, taamatullu ilinniaqqissaarnerup qularnanngitsumik Jehovamut qaninnerulersissavaatit, tassungalu allamik iliuuseqarnissannut kajumissuseqalersillutit. Anguniagassat allat angunissai ajornassagunanngillat, soorlu assersuutigalugu ataatsimiinnerit tamaasa apeqqutit akissutillu pineqartillugit ajornanngippat ataasiarluni akinissaq, ataatsimiinnerit tamaasa ilagiinniittup minnerpaamik ataatsip ilisarisimanerulerniarnissaa ullullu tamaasa Jehovamut qinusarnissaq taannalu pillugu allat oqaloqatigalugit.

Teokratiimik Atuarfimmut suli ilanngussimanngikkuit anguniassallugu ajunngissaqaaq. Nammineerlutit nalunaajaasalerpit? Taamaanngippat kuisimanngitsutut oqaluussisartunngornissat sulissutigisinnaavat. Alloriarneq tulliuttoq  pissusissamisoortoq tassaassaaq pimoorullugu Jehovamut attaveqarnerpit eqqarsaatigeqqissaarnissaa tunniulluinnarlutillu. Inuusuttut amerlasuut eqiasuillutik tunniulluinnarnermik eqquutitinnissaa sulissutigisarpaat piffissaq tamaat oqaluussisartunngornissaq siunertaralugu.

Immaqa misigisimavutit misilittagakillutit, piviusorsiortumillu anguniagaqarneq sapernartillugu. Taava siunnersuut Biibilimiittoq maliguk: „Siutitit manikkit ilisimasut oqaasii tusaaniarlugit.“ (Ussatit 22:17) Angajoqqaatit kristumiullu inersimalluartut ikiortigisakkit. Angajoqqaalli allallu ingasaassiniassanngillat qiimmassaarpaluttariaqarlutilli. Inuusuttut allanit anguniagassinneqarlutik pinngitsaalineqarunik siunertap akerlerluinnaanik kinguneqarsinnaavoq nikallortillugillu. Tamanna Akikop misigisimavaa. Oqarpoq: „Angajoqqaama tulleriiaanik anguniagasseqattaarpaannga, soorlu assersuutigalugu Teokratiimik Atuarfimmut ilanngunnissaq, nalunaajaanermi peqataanissaq, kuisinnissaq pioneerinngornissarlu. Eqquutsinniarlugit qasusuillunga sulivunga. Kisianni anguniakkama anguneri tamaasa anguniagara angugukku, nersualaarnanga nutaamik anguniagassaliinnartarpaannga. Sunniutigaa anguniagaqarnissannut pinngitsaalineqarlunga misigisimajuaannalerama. Qasuvunga misigisimanngisaannarlungalu ajunngitsumik iliorlunga.“ Sunaana ajoqutaasoq? Anguniakkat tamarmik immini ajunngillat, kisianni nammineq anguniagarinngilai. Iluaqutaassappat nammineq anguniagassanik aallartitsinissamut pissutissaqartariaqarpoq.

Jiisusi Kristusi eqqaariaruk. Nunamut pigami nalunngilaa Ataatami Jehovap qanoq ilimasuffigigaani. Jehovap piumasaanik iliorneq Jiisusimut anguniagaannaanngilaq; aallartitaaneruvoq naammassisassaq. Jiisusip suliassani qanoq isigivaa? Oqarpoq: „Uanga nerisassara tassaavoq aallartitsisima piumasaa malillugu iliornissaq suliassarititaatalu naammassinissaa.“ (Johannesi 4:34) Jehovap piumasaa malillugu iliorneq Jiisusip nuannaraa ataatamilu ilimagisaatulli iliorluni. Jiisusimut nerisassatut ippoq — taassumunnga nalerisimaarnarpoq ilimagineqartutut suliap naammassinissaa. (Hebræerit 10:5-10) Aamma nuannaarneq taamaattoq misigisinnaavat eqqortumik pissutissaqarlutit angajoqqaavit ilinnut kajumissaarutaasa iliuuserinissaannut.

Taamaatiinnaqinak

Anguniagaqaruit taava anguniarlugu assoroorlutit suligit. Galatiamiut 6:9-mi allassimasoqarpoq: „Ajunngitsuliorneq qatsuteqinatigu, piffissarmi nalliuppat katersiumaarpugut qasunngikkutta.“ Nammineq pissaanerit pisinnaasatillu kisiisa tatigeqinagit. Ajornartorsiutinik nalaataqanngitsoornavianngilatit, ilaannilu immaqa misigisassaatit iluatsissinnaanak. Biibilimili imatut neriorsorneqarpugut: „[Guuti] eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.“ (Ussatit 3:6) Jehovap tapersersussavaatit anguniakkatit anersaakkut ittut eqiasuillutit sulissutigigukkit.

Aap, Jehovamut kiffaalerusullutit kissaatigisat ilumoorullugu sulissutigigukku anersaakkullu ittut anguniarlugit iliuuseqarlutit, taava ’ineriartornerit tamanit takuneqarsinnaassaaq’. (1 Timotheusi 4:15) Guutip kiffartuunnera nuannaarutigisinnaassavat, inuunerillu siunertaqarnerulissaaq. (wE 4/1 03)

[Qupp. 9-mi assiliartaq]

Biibili atuaraanni eqqarsaatigalugulu Jehovap piumasaanik iliornissaq kajuminnarsisarpoq

[Qupp. 10-mi assiliartaq]

Jiisusi Ataatami ilimasuffiginninneratut iliorpoq