’Inoqatitit tamaasa qanilaartumik pissuseqarfigikkit’

„Oqaluffigisatit eqqaasittassavatit . . . saamasooqqullugit inoqatitillu tamaasa qanilaartumik pissuseqarfigeqqullugit.“ — TITUSI 3:1, 2.

1. Sooq saamasuuneq ajornaatsuujuaannanngila?

„ASSIGINIARSINGA soorlu uanga Kristusi assiginiariga,“ apustili Paulusi allappoq. (1 Korinthimiut 11:1) Ullumikkut Guutip kiffaasa tamarmik kajumissaarut tamanna maleruarniarsaraat. Nassuerutigisariaqarporli imaannaanngitsuusoq, siuaasatsinnimmi siullernit kingornuppavut namminissarsiorajunneq immaqalu periaaseq Jiisusip maligassiaanut naleqqutinngitsoq. (Romamiut 3:23; 7:21-25) Pissuserli saamassuseq tamatta ineriartortissinnaavarput iliuuseqarfigigutsigu. Piumassuseqarluarnerli immini naammanngilaq. Suna aamma pisariaqarpa?

2. Qanoq ’inoqativut tamaasa qanilaartumik pissuseqarfigisinnaavavut’?

² Saamassuseq Guutip anersaavata illernartup inerititaata ilagaa. Guutip anersaavata siulersuineranik maleruaaniarsarinerujartortilluta inerititaanik inerititaqartugut malunnarnerujartussaaq. Aatsaat anersaap inerititaa ineritikkutsigu inuit tamaasa ’qanilaartumik pissuseqarfigisinnaavavut’. (Titusi 3:2) Jiisusip maligassiuinera qanoq ilaarsinnaaneripput attaveqarfigisavullu  qanoq nakussatsissinnaanerivut misissoriartigu. — Matthæusi 11:29; Galatiamiut 5:22, 23.

Ilaqutariinni

3. Ilaqutariinni pissutsit qanoq ittut silarsuup anersaavanik ersersitsippat?

³ Saamasuunissap pingaaruteqarfigisaasa ilaat tassaavoq ilaqutariinni saamasuunissaq. Silarsuarmi Peqqissaanikkut Suliniaqatigiiffimmi nalilerneqarpoq ilaqutariinni nakuuserneq arnap peqqissusianut angallannermi ajoqusernerit malariarnerillu ataatsimoortillugit ajoqusiinerannit ulorianartorsiortitsinerusoq. Assersuutigalugu Londonimi nakuuserluni pinerluttuliornerit nalunaarutigineqartut tamarmik sisamararterutaat angerlarsimaffimmi nakuusernerupput. Politiit naammattoorajuppaat inuit ’nippaallugu oqqallutik oqaasipilullutillu’ misigissutsiminnik aniatitsisut. Sulilu ajorneruvoq aappariit ilaasa attaveqatigiinnerminni ’narrutsassimaartuusarnerat’. Tamakku tamarmik ’silarsuup anersaavanik’ ersersitsinerupput alianartut, ilaqutariinnilu kristumiuni naleqqunatik. — Efesosimiut 4:31, Seidelin; 1 Korinthimiut 2:12.

4. Ilaqutariinni saamasuuneq qanoq sunniuteqarsinnaava?

⁴ Silarsuarmi avatangiisitsinni pissusiunerusartut akiorniarlugit Guutip anersaava pisariaqartipparput. „[Jehovap] Anersaavata najuuffigisaaniippoq kiffaanngissuseq.“ (2 Korinthimiut 3:17) Asanninneq, inussiarnersuuneq, imminut naalakkersinnaaneq kamajasuunnginnerlu aappariit naammalluinnanngitsut ataqatigiinnerat nakussatsittarpaa. (Efesosimiut 5:33) Saamasuuneq angerlarsimaffimmik nuannernerulersitsisarpoq oqqannernillu isumaqatigiinnernillu ilaqutariippassuit  inuunerannik aseruisunit allaanerulluinnarluni. Inuup oqaasii pingaaruteqarput, qanorli oqaatiginninnera ilorlikkut pissusiinik ersersitsivoq. Isumakuluutinik saamasumik oqaatiginninneq pissutsinik najummassimanarpallaarunnaarsitsisinnaavoq. Kunngi silatooq Salomo ima allappoq: „Akissut sallaatsoq kamannaveersaartitsisarpoq, oqaatsilli ajuallannartut uumitsatsitsisarput.“ — Ussatit 15:1.

5. Ilaqutariinni assigiimmik upperisaqarfiunngitsuni saamasuuneq sumik kinguneqarsinnaava?

⁵ Saamasuuneq ingammik ilaqutariinni assigiimmik upperisaqarfiunngitsumi pingaaruteqarluinnarpoq. Ajunngitsuliornerit saamassuserlu ataatsimoortikkaanni tusaarusuppallaanngitsut ilanngunnerannut pissutaaqataasinnaapput, Jehovamut uppertunngortillugit. Petrusip arnat kristumiut uillit ima kajumissaarpai: „Ilissi nuliaasusi uissinnut naalatsigitissaasi, uiusut ilaat oqaatsimut naalasseriikkaluartut oqaluffigineqanngikkaluarlutik nuliamilli inuusaasiatigut ilanngussinnaaqqullugit Guutimik mianerinnillusi inuunersi minguitsoq takulerunikku. Pinnissusersi qallikkut ersiuteqartissanngilarsi, soorlu perlaajassinnik, pinnersaatinik kuultiusunik atisanilluunniit pinnersunik, ersiuteqartissavarsili uummammi, inummi isertugaasumi, anersaap piuaatsup qanilaartullu kusanassusiani aserortussaanngitsumi, Guutip isaani erlinnaqisumi.“ — 1 Petrusi 3:1-4.

6. Saamassuseq angajoqqaat meeqqallu ataqatigiinnerannik qanoq nakussatsitsisinnaava?

⁶ Angajoqqaat meeqqallu akornanni pissutsit najummassimanarsisinnaapput, ingammik ilaqutariinniittut ilaannaat Jehovamut asannippata. Ilaqutariinnili kristumiuni tamani saamasuunissaq pisariaqartinneqarpoq. Paulusi ataataasunut ima siunnersuivoq: „Qitornasi narrutsatseqinasigik, perorsartuarlugilli Jehovap ileqqoreqqusai oqaaqqissaarutaalu malillugit.“ (Efesosimiut 6:4, NV) Ilaqutariinniittut saamassuseqaraangata angajoqqaat meeqqallu ataqatigiinnerat nakussatsinneqartarpoq. Dean sisamanik qatanngutilik ima oqaluttuarpoq: „Ataata saamasuuvoq. Eqqaamasaqanngilanga oqqassimanitsinnik — inuusuttuaraatillungaluunniit. Saamassuseqangaartuaannarpoq, aamma kamakkaluaraangami. Ilaannikkut ininnukartittarpaanga killilertarlungalu, oqqatinngisaannarpugulli. Ataatagiinnanngilarput. Aammattaaq ikinngutigaarput, pakatsisikkusunngilarpullu.“ Saamassuseq angajoqqaat meeqqallu ataqatigiinnerannik nakussatsitseqataalluinnarpoq.

Oqaluussinermi

7, 8. Oqaluussigaangatta saamasuunissaq sooq taama pingaaruteqartigaa?

⁷ Saamasuunissap pingaaruteqarfigisaasa ilaat alla tassaavoq oqaluussinermi saamasuunissaq. Naalagaaffik pillugu nutaarsiassaq nuannersoq allanut oqaluttuarigaangatsigu inuit assigiinngitsunik isumallit naapittarpavut. Ilaasa neriuummik tusarliussarput nuannaralugu tusarnaartarpaat. Allat assigiinngitsunik pissuteqarlutik nuanninngitsumik qisuariartarput. Taamaattoqartillugu pissuseq saamassuseq kiffartornitta naammassinissaanut „nunarsuullu isua tikillugu“ nalunaajaaqqusinerup naalannissaanut iluaqutigissavarput. — Apustilit Suliaat 1:8; 2 Timotheusi 4:5.

⁸ Apustili Petrusi ima allappoq: „Naalagaq Kristusi uummatissinni illernartissiuk, piareersimajuaritsilu neriuutigisaq ilissinniittoq pillugu isumarsi illersorsinnaaqqullugu nassuiaaqqusisumut kimulluunniit, [kisianni saamallusi ataqqinnilluinnarlusilu, NV].“ (1 Petrusi 3:15) Kristusi maligassarigatsigu ilaarnissaalu qamuuna kissaatigigatsigu oqaluussiffigisavut kamakkaangata saamasuuniartarpugut ataqqinnittuuniartarlutalu. Kinguneqarluarajuppoq, soorlu pisimasut ataani allassimasut ersersikkaat.

9, 10. Pisimasup suup takutippaa oqaluussinermi saamasuuneq pingaaruteqartoq?

⁹ Ilaanni Keithikkunnut kasuttortoqarmat nuliata matu ammarpaa, Keith tunuarsimaartoq. Nuliata paasigamiuk takornartaq Jehovap Nalunaajaasuisa ilagigaat, kamalluni Jehovap Nalunaajaasui meeqqanut naakkittaatsuunerarpai. Nalunaajaasoq eqqissisimaannarpoq saamasumillu ima akilluni: „Ajussusia taama isumaqartutit. Jehovap Nalunaajaasuisa suna upperineraat takutissinnaavara?“ Keith tusarnaareerluni  oqaloqatigiikkunnaarsinniarlugit anillappoq.

¹⁰ Kingusinnerusukkut aappariit takornartamut inussiarniinnertik ilerasuutigilerpaat. Saamassuseqarnera killissutigaat. Tupaallaatigisaannik sapaatip-akunnerata tulliani nalunaajaasoq takkuteqqippoq, Keithillu nuliatalu Biibili atorlugu upperisaminik nassuiaanissaa akueraat. „Ukiuni tulliuttuni marlunni Jehovap Nalunaajaasui allat tusagaqarfigingaatsiarpavut,“ kingusinnerusukkut oqaluttuarput. Biibilimik atuaqqissaaqatigineqarnissamut akuersipput, piffissallu ingerlanerani marluullutik Jehovamut tunniulluinnarput kuisillutillu. Ukiut arlallit qaangiuttut nalunaajaasup pulaaqqaartup naapippai, nuannaarutigingaakkaminillu paasivaa maanna anersaakkut qatanngutigalugit. Aap, saamassuseq kinguneqarluartarpoq.

11. Saamassuseq kristumiut tusarliussaannik inuit ilaannut qanoq ilassiuminarnerulersitsisinnaava?

¹¹ Haroldip sakkutuujutilluni misigisani akeqqersimaartunnguutigai Guutillu piuneranik qulalissutigalugit. Sulilu ajornartorsiornerulerpoq aalakoorluni biilertumit aportikkami ajoqutigiualikkaminillu ajoquserami. Jehovap Nalunaajaasui matuminut kasuttormata pulaaqqeqqunngilai. Ullulli ilaanni oqaluussisartoq Billimik atilik eqqaamiuanut soqutiginnittumukarpoq. Kukkulluni Harold kasuttorfigaa. Illuttut ajaappiarluni anillammat, ingerlaannaq Bill utoqqatserpoq kukkunerarlunilu. Harold qanoq qisuariarpa? TV-aviisimi takusimavaa Jehovap Nalunaajaasuisa suleqatigiillutik sivikitsuararsuarmik nutaamik naalagaaffilersaarfiliornerat pillugu ilanngutassiaq. Inuppassuit ataasiussuseqarlutik suleqatigiittut takullugit tupigusuutigingaaramiuk Jehovap Nalunaajaasui pillugit isummaminik allannguivoq. Aammattaaq Billip inussiarnersumik utoqqatsernera saamassusialu killissutigingaaramigit Harold aalajangerpoq Jehovap Nalunaajaasuisa pulaartarsinnaagaanni. Biibili atuaqqissaartalerpaa siumukarlunilu, Jehovamullu kiffanngorpoq kuisimasoq.

Ilagiinni

12. Silarsuarmi ileqquusut suut ilagiinni kristumiuniittut ileqqorinaveersaartariaqarpaat?

¹² Saamasuunissap pingaaruteqarfigisaasa ilaat suli alla tassaavoq ilagiinni kristumiuni saamasuunissaq. Ullutsinni inuiaqatigiinni akerleriinnerit nalinginnaangaarput. Oqallinnerit, oqqannerit oqalorujunnerillu silarsuarmi eqqarsariaatsimit sunnerneqarsimasut ileqqoraat. Ilaannikkooriarluni ileqqut silamiorpaluttut taamaattut ilagiinni kristumiuni maluginagu ileqqorineqalersinnaapput oqallinnernik oqaatsillu pillugit isumaqatigiinnginnernik kinguneqartumik. Qatanngutit angutit akisussaasut nuanniigivaat pissutsinik taamaattunik iliuuseqarfiginnittariaqarnertik. Jehovamulli qatanngutiminnullu asannikkamik kukkussuteqartut ikiorniarlugit sapinngisartik tamaat iliuuseqartarput. — Galatiamiut 5:25, 26.

13, 14. ’Assortortit saamasumik periaaseqarluni avoqqaarigaanni’ qanoq kinguneqarsinnaava?

 ¹³ Ukiuni hundredelinni siullerni Paulusip suleqataatalu Timotheusip ilagiinni ajornartorsiuteqarneq misigaat. Paulusip Timotheusi mianersoqquaa qatanngutinut puuguttanut ’[siunertamut ataqqinanngitsumut, NV] atugassanut’ assersuunneqarsinnaasunut. „Naalakkamut kiffaasoq saqitsaassisussaanngilaq,“ Paulusi eqqarsalersitsiniarpoq. „Taanna tamanut inussiarnersuussaaq, ajoqersuilluartuulluni naammaginnillunilu atukkamini ajortumi. Assortortini avoqqaarisassavai saamasumik periaaseqarluni.“ Kamannarisaqaraluarlutaluunniit saamasuuginnarutta isornartorsiuisut amerlanertigut eqqarsaatiginneqqittarput. Akillugit immaqa Jehovap, Paulusip nangilluni allanneratut, „taakku allamik isumataartikkumaarpai sallusuissummik ilisarsilersillugit“. (2 Timotheusi 2:20, 21, 24, 25) Malugiuk Paulusip saamassuseq atukkanut ajortunut naammaginninnermut atassuseraa.

¹⁴ Paulusi allanut kajumissaarinermisut iliortarpoq. Korinthimi ilagiinni ’apustilissaarsuit’ pillugit qatanngutinut ima oqarpoq: ’Uangali Paulusiusunga Kristusip qanilaarsusiagut piuaassusiagullu oqaaqqissaarpassi, uanga najorlusi nikanartunga, alisimallungali ilissinnut sapiisersunga.’ (2 Korintumiut 10:1; 2 Korinthimiut 11:5) Ilumut Paulusip Kristusi ilaarpaa. Malugiuk qatanngutit taakku ’Kristusip qanilaarsusiagut’ saaffigimmagit. Pingaarniartuunngilaq naalagaaniartuunanilu. Oqaasii ilagiinniittut killitsiasumik uummatillit kajumississutigisimassagunarpaat. Paulusi pissutsinik najummassimanarpallaarunnaarsitsivoq taamaalillunilu ilagiinni eqqissineq ataasiussuseqarnerlu tunngavilerlugit. Periaasiunngila tamatta malinniartariaqagarput? Ingammik utoqqaanertat Kristusi Paulusilu ilaartariaqarpaat.

15. Sooq oqaaqqissaarinermi saamassuseq pingaaruteqarpa?

¹⁵ Aatsaalli ilagiinni eqqissisimaneq ataasiussuseqarnerlu navianartorsiortinneqaraangata allanik ikiuinissarput akisussaaffiginngilarput. Pissutsinik najummassimanartoqarsinnaanera sioqquterujussuarlugu asannittumik ikiuisoqartariaqarpoq. ’Qatanngutikka, inuk misiginngitsoorluni pinerlukkaluarpat taava ilissi anersaamut atasusi iluarsisinniarsiuk,’ Paulusi allappoq. Qanorli? ’Anersaamik qanilaartumik, misissorlutilli illittaaq usserneqaqqunatit.’ (Galâsiamiut 6:1) ’Qanilaartumik anersaaqarnissaq’ ajornaatsuinnaajuaannanngilaq, kristumiummi tamarmik, aamma ilagiinni angutit akisussaasut, naammalluinnanngitsuupput kukkusarlutillu. Kukkussuteqarsimasunulli ajornannginnerussaaq ’iluarsisinniarlugu’ saamasumik oqaaqqissaaraanni.

16, 17. Biibilimi siunnersuutinik maleruaajuminaatsitsisut suna iluaqutigisinnaavaat?

¹⁶ Grækerit oqaasiat, aallaqqaammut atorneqartoq ’iluarsisinniarsiuk’-mik nutserneqartoq,  aamma isumaqarsinnaavoq naggussamik pillussimasumik saanermilluunniit napisimasumik inissiineq — passunneqarneq annernartoq. Nakorsap saanermik naffakumik passussisup napparsimasoq eqqissisarlugu qularunnaarsittarpaa passunneqarnini iluaqutigiumaaraa. Nakorsap eqqissisimasuunera iluaallannarpoq. Suliaritinnagu oqaasimininnguit nuanniilliorpallaarunnaarsitseqataasarput. Aammattaaq anersaakkut ingerlallualeqqinneq annernarsinnaavoq. Saamasumilli oqaaqqissaarneqarneq akueriuminarnerusarpoq ataqatigiillualeqqinnissamut ajortuliorsimasullu allannguinissaanut aqqutissiuisarluni. Oqaaqqissaarneqartoq oqaaqqissaarneqarnini aallaqqaammut akueriuminaatsikkaluarlugu oqaaqqissaarisoq saamasuummat Biibilimi siunnersuutinik ajunngitsunik maleruaarusulersinnaavoq. — Ussatit 25:15.

¹⁷ Allat ingerlalluaqqilersinniarlugit ikioraanni, isornartorsiuinertut isumaqarfigineqariaannaavoq. Atuagassiortup ima allaatigaa: „Allat oqaaqqissaaraanni naleqqutinngitsumik pingaarniarnissaq ilimanarnerpaasarpoq. Taamaattumik sallaatsumik taamaaliornissaq pisariaqangaarpoq.“ Kristumiut allanik siunnersuisut pingaarniartuunaveersaarsinnaapput saamassuseq maniguunnermik aallaavilik ineriartortillugu.

’Inoqatitsinnut tamanut’

18, 19. (a) Sooq nunagisami oqartussaasut kristumiut saamaffigiuminaatsissinnaavaat? (b) Oqartussaasunut tamanut saamasuunissaminnut kristumiut suna iluaqutigissavaat, qanorlu kinguneqarluassava?

¹⁸ Inuppassuit saamaffigiuminaatsitaasa ilaagaat nunaminni oqartussaasut. Nassuerutigisariaqarpoq oqartussaasut ilaasa pissusilersornerisa qulaaraat sukannersumik misigittaatsumillu isiginnittaaseqarnerat. (Oqaluussisartup oqaasii 4:1; 8:9) Jehovamulli asannikkatta oqartussaanerpaajunera akuerissavarput, naalakkersuisunullu killilimmik naalassaagut, taamaattariaqarnitsitut. (Romamiut 13:1, 4; 1 Timotheusi 2:1, 2) Allaat atorfikkaajusut tamanut oqaluussinermi Jehovamik pallorfiginninnerput akornusersorniaraangassuk qasusuilluta qujaniutinik pilliuteqarnissamut periarfissarsiortuarpugut. — Hebræerit 13:15.

¹⁹ Saqitsaassiumatuulerneq ajorpugut, akeqqersimaatuulernataluunniit. Ingasaassiniartuunnginniarsarivugut, najoqqutassialli naapertuilluartut akerlianik iliornata. Taamaalillutik qatanngutivut nunarsuaq tamakkerlugu nunani 234-ni oqaluussisinnaapput. ’Qullersaasunut pisortaasunullu naalatsigiteqqulluta, taakkununnga maleruuteqqulluta ajunngitsuliornernullu sunulluunniit piareersimaqqulluta, inoqatitsinnut mitallersooqqunata saqitsaassiumatooqqunatalu, saamasooqqullutali inoqativullu tamaasa qanilaartumik pissuseqarfigeqqullugit’ Paulusip oqaaqqissaarutaa malipparput. — Titusi 3:1, 2.

20. Saamasut suna akissarsiarissavaat?

²⁰ Saamasut akissarsingaassapput. „Pilluarput qanilaartut,“ Jiisusi oqarpoq, „taakkuami nunarsuaq kingornutissavaat.“ (Matthæusi 5:5) Kristusip qatanngutai tanitat saamasuujuarunik qulakkiissavaat pilluarnissartik Guutillu naalagaaffiani nunarsuarmut naalakkersuinissap immikkut pisinnaatitaaffiginissaa. Aamma ’savat allat’ ’amerlangaartut’ saamasuujuaannarunik nunami maani Paratiisimi inuunissaq qilanaarisinnaavaat. (Saqqummersitat 7:9; Johannesi 10:16; Tussiaat 37:11) Siunissamut neriuutip nuannissusia! Taamaattumik puiunngisaannartigu Paulusip Efesosimi kristumiunut siunnersuutaa: „Uanga Naalagaq pissutigalugu parnaarussaasunga oqaaqqissaarpassi qaaqqusaanissinnut naapertuuttumik inooqqullusi, tamatigut qanilaartuullusi saamasuullusilu.“ — Efesosimiut 4:1, 2.  (wE 4/1 03)

Uteqqiinermi apeqqutit

• Saamasuuneq ukunani qanoq iluaqutaasinnaava:

• ilaqutariinni?

• oqaluussinermi?

• ilagiinni?

• Saamasut qanoq siunissaqarpat?

[Atuaqqissaarnermi apeqqutit]

[Qupp. 17-mi assiliartaq]

Saamassuseq ingammik pingaaruteqarpoq angerlarsimaffimmi assigiimmik upperisaqarfiunngitsumi

[Qupp. 17-mi assiliartaq]

Saamassuseq ilaqutariit ataqatigiinnerannik nakussatsitsisarpoq

[Qupp. 19-mi assiliartaq]

Ataqqinningaarlutit saamallutillu imminut illersorit

[Qupp. 20-mi assiliartaq]

Saamasumik oqaaqqissaarisoqaraangat ajortuliorsimasup ingerlalluaqqilernissaanut iluaqutaasinnaavoq