Inuusuttut — Jehovap suliasi puigussanngilai!

„Guutip iluaatsuunnginnami puiorsimanngilai suliasi asanninnersilu aqqanut takutissimasarsi illernartunik kiffartuussisimanissigut kiffartuussiuarnissigullu.“ — HEBRÆERIT 6:10.

1. Hebræerinut allakkani Malakillu allagaani qanoq takutinneqarpa Jehovamut kiffartorninni suliatit qujamasuutigigai?

IKINNGUTIT ikiornikuuiuk qutsavigineqarnalli? Allat iliuuserineqartut taamaattussaannartut isigippatigik, ajornerusumilluunniit puigorluinnarpatigik, ajuallannangaarsinnaavoq. Jehovamut uummatikkut iluunngarluta kiffartornerput eqqarsaatigalugu taamaanngisaannassaaq. Biibilimimi allassimavoq: „Guutip iluaatsuunnginnami puiorsimanngilai suliasi asanninnersilu aqqanut takutissimasarsi illernartunik kiffartuussisimanissigut kiffartuussiuarnissigullu.“ (Hebræerit 6:10) Tamanna qanoq paasisariaqarpa? Taassumunnga kiffartorninni suliarisimasatit suliariuakkatillu Jehovap puigussagaluarunigit naapertuilluanngitsuliornertut, aap, ajortuliornertut, isigissavaa. Jehova Guutiuvoq qujamasungaartoq. — Malaki 3:10.

2. Sooq Jehovamut kiffartorneq immikkut illuinnartuua?

² Guuti suliannik pingaartitsisoq kiffartorfigisinnaallugulu  pallorfigisinnaagakku immikkut illuinnartuuvoq. Ikittuinnaat taama pisinnaatitaaffeqarput. Nunarsuummi inuinut 6 milliardinut naleqqiullugit Jehovap Nalunaajaasui 6 millionit missaannaanniipput. Biibilimi allassimasut tusarnaarlugillu maleruartarakkit, erseqqippoq Jehovap illit inuttut soqutigigaatit, aap, ’kajungilersikkaatit’. Tassami, Jiisusi oqarpoq: „Kinaluunniit uannut ornigussinnaanngilaq Ataatap uannik aallartitsisup kajungilersinngippani.“ (Johannesi 6:44) Jehova inunnik ataasiakkaanik ikiuisarpoq Kristusip pilliutaanik iluaqutiginnileqqullugit.

Pisinnaatitaaffiit angingaartoq qujamasuutigiuk

3. Korap ernerisa qujamasunnertik qanoq oqaatigaat?

³ Soorlu allaaserisami siuliani eqqaaneqartoq Jehovap uummataata nuannaartinnissaanut immikkut periarfissaqartutit. (Ussatit 27:11) Tamanna taamaattussaannartut isiginngisaannaruk. Allakkani isumassarsiarititaasuni tussiaatit ilaanni Korap ernerisa Jehovamut kiffartornerminnik qujamasuutiginninnertik oqaatigaat. Ima atuarpugut: „Illit silarliutinni ulloq ataaseq ajunnginneruvoq tuusintinit uanga nammineq qinersimasannit. Guutima illuata alloriusaani nalassaguma iluarnerutippara iluaatsut toqqini ineqarnermit.“ — Tussiaat 84:11.

4. (a) Sooq ilaat misigisinnaappat Jehovamik pallorfiginninneq kiffaanngissutsiminnik killiliisoq? (b) Jehovap imminut kiffartortut akilersinnaajumallugit qanoq iliortarpa?

⁴ Illittaaq Ataatannik qilammiusumik kiffartorfiginninnerit pisinnaatitaaffittut isigaajuk? Miserratigineqassanngilaq Jehovamik pallorfiginninneq ilaannikkut kiffaanngissutsitsinnik killileerpasittutut issinnaasoq. Aamma ilumoorpoq Biibilimik maleruaanermi imminut pilliutiginissaq pisariaqartoq. Jehovalli sumilluunniit qinnuigigaluarpatit tamatigut ilinnut iluaqutaassaaq. (Tussiaat 1:1-3) Aamma Jehovap suliniutitit arajutsisimanngilai, aalajaallutillu kiffartorfigigaangakku qujamasuttarpoq. Aap, Paulusi allassimavoq Jehovap „ujarlersini akissarsisissagai“. (Hebræerit 11:6) Jehova illit akilerniarlutit periarfissarsiorpoq. Israelitoqqami pruffiitit ilaat oqarpoq: „[Jehovap] nunarsuarmiittut tamaasa takusinnaavai uummatimikkut iluunngarlutik imminik tunaarinnittut pissaanermigut ikiorsinnaallugit.“ — 2 Nalunaarsuutit 16:9.

5. (a) Jehova uummatikkut iluunngarlutit tunaarigit qanoq takutissinnaaviuk? (b) Upperisat pillugu allanik oqaloqateqarnissaq sooq sapernarpasissinnaava?

⁵ Jehova uummatikkut iluunngarlutit tunaarigit takutissagukku, iliuusissavit pitsaanerpaat ilagaat allanik taanna pillugu oqaluttuussineq. Atuaqativit ilaat upperisat pillugu oqaloqatigisinnaanikuuigit? Aallaqqaammut eqqarsaat tamanna immaqa ilinnut annilaarnarpoq. ’Illaatigippanngami?’ immaqa eqqarsarputit. ’Imaluunniit isumaqarpata upperisara eqqumiitsuusoq?’ Jiisusip nalunngilaa Naalagaaffik pillugu tusarliussaq tamakkeratik tusaarusussagaat. (Johannesi 15:20) Tamannali isumaqanngilaq  mitallerneqartuassasutit itigartinneqartuassasutillu. Akerlianik Jehovap Nalunaajaasorpassuisa inuusuttut paasisimavaat kammalaatimik ilaat upperisaminnik paasinnerusuttut. Allaat kammalaatiminnit ataqqineqarnerusarput upperisamik illersornissaanut sapiissuseqaramik.

„Jehovap ikiussavaatit“

6, 7. (a) Niviarsiaq 17-inik ukiulik atuaqatiminik upperissani pillugu oqaluttuussinissaminut qanoq periarfissarsiva? (b) Jenniferip misigisaa qanoq ilinniarfigaajuk?

⁶ Upperisalli pillugu oqaluttuussinissannut qanoq sapiillisinnaavit? Soormi aalajangeruit upperisat pillugu aperineqaraangavit ammasumik ilumoorlutillu akisarniarlutit? Eqqarsaatigiuk Jenniferip 17-inik ukiullip misigisaa: „Anitsiarfimmi nerilluta niviarsissat issiaqatima upperisarsiornerit oqallisigaat, ilaatalu aperaanga upperisarsiortunut sorlernut ilaanersunga.“ Jenniferip taakkuninnga oqaluttuussinissani annilaangagaa? „Aap,“ miserratiginngilaa, „nalugakku qanoq qisuariassanersut.“ Qanoq iliorpa? „Oqaluttuuppakka Jehovap Nalunaajaasuisa ilagigaannga. Tupaallaqqaarput isumaqarunaramik Jehovap Nalunaajaasui eqqumiitsuusut. Taamaattumik apersulerpaannga, isumaallu eqqunngitsut naqqissinnaavakka. Tamatuma kingorna ilaannikkut ilaasa apereqqittarpaannga.“

⁷ Jenniferip upperisani pillugu oqaluttuarnissaminut periarfissaq atorluaramiuk peqqissimiva? Naamerluinnaq. „Anitsiareeratta iluaallaqaanga,“ oqarpoq. „Maanna niviarsissat Jehovap Nalunaajaasuisa upperisaat paasineruaat.“ Taamaattumik Jennifer ima siunnersuivoq: „Atuaqativit ilinniartitsisuilluunniit upperisannik oqaluttuunnissaat sapernartikkukku qinupallagit. Jehovap ikiussavaatit. Nuannaassaatillu oqaluussinissannut periarfissaq atorluarakku.“ — 1 Petrusi 3:15.

8. (a) Ilimaginngisamik pisoqalermat Nehemiap qinunini qanoq iluaqutigaa? (b) Atuarfimmi pissutsini qanoq ittuni Jehovamut nipaqanngitsumik qinupallanneq iluaqutaassava?

⁸ Maluginiaruk Jenniferip siunnersuutigigaa upperisat pillugu oqaluttuarnissamut periarfissaqaleraangavit Jehovamut qinupallartarnissat. Nehemia, Persiamiut kunngiannut Artaxerxesimut immitsisuusoq, taamatorluinnaq iliorpoq ilimaginngisamik pisoqalermat. Takuneqarsinnaavoq Nehemia aliasuttoq. Tusarsimavaami juutit qanoq ingerlanerat aamma Jerusalemip qarmarsua isaaffiilu aserorluinnarsimasut. Kunngip malugaa Nehemia ernumassuteqartoq, aperaalu sunersoq. Nehemia akinnginnermini Guuti siulersuinissaanik qinnuigaa. Taavalu nakimaalluni Artaxerxes qinnuigaa Jerusalemimukarnissaminut akuereqqulluni illoqarfiup aserugaasimasup sanaqqinneqarnissaani peqataajumalluni, akuerineqarporlu. (Nehemia 2:1-8) Oqaluttuaq tamanna qanoq ilinniarfigisinnaavarput? Upperisat pillugu oqaluttuarnissannut periarfissaqaleraangat annilaangalertaruit nipaqanngitsumik qinunissat puigoqinagu. „Isumakuluutisi tamaasa [Jehovamut] pisissigit,“ Petrusi allappoq, „isumassormasi.“ — 1 Petrusi 5:7; Tussiaat 55:23.

Piareersimajuarit illersuinissannut

9. Leah 13-inik ukiulik ’Unge spørger’-inik 23-nik qanoq tunniussiva?

⁹ Misigisaq alla takoriartigu. Leahp 13-inik ukiullip anitsiarfimmi atuagaq Unge spørger — Svar der duer * atuarpaa. Oqaluttuarpoq: „Ilaasa malugaat, erniinnarlu arlallit tununnut pillutik atuaqataalerput. Aperaannga atuakkami suna pineqarnersoq.“ Ullup ingerlanerani niviarsiaqqat sisamat Leah atuakkamik pisinnaanerlutik aperaat. Niviarsiaqqat ingerlaannaq atuagaq allanut takutippaat, taakkua aamma perusuppaat. Sapaatip-akunnerisa tulliuttut ingerlaneranni Leahp atuaqatiminut taakkualu ikinngutaannut atuakkat 23-t tunniuppai. Atuakkani pillugu kammalaatimi aperimmanni upperisaminik oqaluttuunnissaat sapernaatsippaa? Naamik, ima oqarpoq: „Siullermik annilaangavunga, taavali qinuvunga. Nalunngilara Jehovap najoraanga.“

10, 11. Niviarsiaqqap Israelikkuusup qanoq Aramæerit sakkutuuisa naalagaanertaat Jehova pillugu ilinniarnissaanut ikiorpaa, tamatumalu kingorna qanoq allannguiva?

¹⁰ Leahp misigisaata niviarsiaqqap Israelikkuusup  tigusatut Aramimukaanneqareerluni misigisaanik immaqa eqqaasippaatit. Aramæerit sakkutuuisa naalagaanertaata pupissup nulianut kiffaavoq. Arnap taassuma oqaloqatigiinneq niviarsiaqqap upperisaminik oqaluttualissutigisaa aallartissimassagunarpaa. „Naalagara pruffiitimut Samariami najugaqartumukassagaluarami!“ niviarsiaraq oqarpoq. „Taava pruffiitip pupinneranit ajorunnaarsissagaluarpaa!“ — 2 Kunngit 5:1-3.

¹¹ Niviarsiaqqap nakimaassusiata kingunerisaanik Na’amanip kingusinnerusukkut paasilerpaa „nunarsuarmi tamarmi Israelip Guutia kiserluinnarmi Guutiusoq“. Allaat aalajangerpoq ’maannamiit Jehovamuinnaq ikikkagassanik toqutassanilluunniit pilliisalerniarluni guutinut allanut pinnani’. (2 Kunngit 5:15, 17) Niviarsiaqqap sapiissusia Jehovap ilumut pilluaqqusimavaa. Ullumikkut meeqqanut inuusuttunullu aamma taamaaliorsinnaavoq taamaaliorumaarlunilu. Leahp tamanna misigaa. Kingusinnerusukkut atuaqataasa ilaat saaffiginnipput oqarlutik atuagaq ’Unge spørger’ iluaqutigingaarlugu. „Tamanna nuannaarutigaara,“ Leah oqaluttuarpoq, „nalunnginnakku maanna allat Jehova pillugu ilinniarnerunissaannut allanngornissaannullu ikiorlugit.“

12. Upperisavit illersornissaanut suup sapiillisissinnaavaatit?

 ¹² Immaqa Jenniferitut Leahtullu misigisaqarsinnaavutit. Petrusip kristumiut allaffigigamigit siunnersuutaa maleruaruk: „Piareersimajuaritsi neriuutigisaq ilissinniittoq pillugu isumarsi illersorsinnaaqqullugu nassuiaaqqusisumut kimulluunniit.“ (1 Petrusi 3:15) Qanoq taamaaliorsinnaavit? Kristumiutut ukiuni hundredelinni siullerni inuusutut Jehova qinnuigisinnaavat ikioqqullutit ’siooranngivillutit’ oqaluussinissannut. (Apustilit Suliaat 4:29) Taavalu sapiillutit allat upperisannik oqaluttuutikkit. Immaqa kinguneri tupigusuutigissavatit. Qanorluunniit pisoqassagaluarpat Jehovap uummataa nuannaartissavat.

Videofilmit atuarfimmilu suliassat

13. Inuusuttut ilaasa periarfissat suut atorsimavaat upperisartik pillugu oqaluttuarumallutik? (Ungalusat quppernerni 30 31-milu takukkit.)

¹³ Inuusuttut amerlasuut videofilmit atorlugit atuaqatitik ilinniartitsisutillu upperisartik pillugu oqaluttuussimavaat. Allat ilaannikkut atuarfimmi suliassatik atorlugit suna upperinerlugu nassuiaasinnaasarsimapput. Oqaluttuarisaaneq pillugu atuarnerminni nukappiaqqat marluk 15-inik ukiullit, tamarmik Jehovap Nalunaajaasuinut ilaasut, upperisarsiornerit ilaat pillugu allaaserisaqaqquneqarput. Aalajangerput Jehovap Nalunaajaasui pillugit allaaserisaqassallutik, atuagarlu Jehovas Vidner — forkyndere af Guds rige paasissutissarsiorfittut atorpaat. * Aamma atuaqatitik 5 minutsini oqalugiarfigisussaavaat. Tamatuma kingorna ilinniartitsisoq atuartullu apeqqutissaqangaarmata nukappiaqqat 20 minutsini apeqqutaat akisariaqarpaat. Sapaatip-akunneri arlallit tamatuma kingorna atuaqataat Jehovap Nalunaajaasui pillugit apersortuarput.

14, 15. (a) Sooq inunnut qununeq napiaaniutaava? (b) Sooq upperisavit allanut oqaluttuarinissaa annilaangagisariaqanngiliuk?

¹⁴ Siuliani misigisat takutippaat Jehovap Nalunaajaasuisa sumik upperisaqarnerat pillugu  oqaluttuaraanni nuannersunik misigisarpassuaqartoqarsinnaasoq. Inunnut qununeq akornutaateqinagu allat Jehova pillugu ilisarisimannilernissaannut ikiussagukkit. Biibilimi allassimavoq: „Inunnik qunugisaqarneq napiaaniutinngortarpoq, [Jehovamilli] tatiginnittoq aarlerissutissaqanngilaq.“ — Ussatit 29:25.

¹⁵ Eqqaamajuk kristumiutut inuusuttutut kammalaativit pisariaqartilluinnagaannik pigisaqarlutit — maannakkut pitsaanerpaamik inooriaaseqarlutit siunissamilu inuunermik naassaanngitsumik neriuuteqarlutit. (1 Timotheusi 4:8) Isumaqartoqartaraluartoq Amerikamiut amerlanerit pigisalerituujusut upperisarsiornermilluunniit soqutigisaqanngitsut, soqutiginarpoq USA-mi misissuinerup takutimmagu minnerpaamik inuusuttut affaat upperisarsiornermik ilumoorussilluinnartuusut. Pingajorarterutaat oqarput upperisarsiorneq inuunerminni ’sunniuteqarnerpaasoq’. * Qularnanngitsumik nunani allarpassuarni aamma taamaappoq. Taamaattumik imaalluarsinnaavoq atuaqativit Biibili pillugu oqaasissatit tusarnaarusussagaat.

Inuusuttuuninniilli Jehova qanittumik attaveqarfigileruk

16. Allanik Jehova pillugu oqaluttuussinerpit saniatigut aamma suna taassuminnga nuannaartitseqataasarpa?

¹⁶ Jehovap uummataanik nuannaartitsinissamut soorunami taanna pillugu oqalunnerinnaq naammanngilaq. Oqaasii aamma maleruartariaqarpatit, apustilimi Johannesi allappoq: „Guutimut asanninneq tassaavoq inassutai maleruaratsigit, inassutaalu artornartuunngillat.“ (1 Johannesi 5:3) Jehovamut qanittumik attaveqarneq ineriartortikkukku paasissavat Johannesi ilumoortoq. Qanoq Jehovamut qanittumik attaveqalersinnaavit?

17. Qanoq Jehovamut qanittumik attaveqalersinnaavit?

¹⁷ Biibilimi atuagassianilu Biibililersaarutini atuarnissamut piffissaqartarit. Jehova pillugu ilinniarnerujartortillutit naalakkuminarnerutissavat allallu taassuminnga oqaluttuunissaat ajornannginnerutissallugu. Jiisusi oqarpoq: „Inuup ajunngitsup uummatimi toqqorsivianit ajunngitsumit ajunngitsut saqqummertarpai. . . . Uummatimmi ulikkaarutaanik qaneq oqaluttaraaq.“ (Lukasi 6:45) Taamaattumik uummatit ajunngitsunik immertaruk. Soormi tamatumunnga atatillugu imminut anguniagassikkuit? Immaqa sapaatip-akunnera tulleq ilagiit ataatsimiinnerinut immikkut piareersarluarsinnaavutit. Tulliullugu anguniagarisinnaavat ataatsimiinnerni uummammit pisumik naatsunnguamik akisarnissat. Soorunami aamma pingaaruteqarpoq ilinniakkatit naapertorlugit inuunissat. — Filippimiut 4:9.

18. Assortorneqassagaluaruit suna qularissanngiliuk?

¹⁸ Jehovamut kiffartorneq ataavartumik, aap, naassaanngitsumik, iluaqutissartaqarpoq. Qularnanngitsumik ilaannikkut assortorneqartassaatit mitallerneqartassallutillu Jehovap Nalunaajaasuisa ilagimmatsit. Taamaattoqaraangat Mosesip maligassiaa eqqaamasaruk. Biibilimi allassimavoq ’akissarsiassap tunniunneqarnissaa qilanaaralugu utaqqiuaraa’. (Hebræerit 11:24-26, NV) Illittaaq qularissanngilat Jehovap akilerumaaraatit ilisarisimalerniarlugu allallu taanna pillugu oqaluttuunniarlugit iliuuserisatit tamaasa pillugit. ’Puiussanngilai suliatit asanninnerillu aqqanut takutissimasat’. — Hebræerit 6:10.  (wE 4/15 03)

[Quppernerup ataani ilanngussat]

Uteqqiinermi apeqqutit

• Sooq qularissanngiliuk Jehovamut kiffartornini iliuuserisatit pingaartikkai?

• Ilaat qanoq atuarfimmi upperisartik pillugu kinguneqarluartumik oqaluussisimappat?

• Qanoq atuaqatinnut oqaluussinissannut sapiillisinnaavit?

• Qanoq Jehovamut qanittumik attaveqalersinnaavit?

[Atuaqqissaarnermi apeqqutit]

[Qupp. 30-mi ungalusaq/​assiliartat]

Allaat meeqqat Jehova unnersiutigisinnaavaat!

Allaat meeqqat suli inuusuttuaranngornatik atuarfimmi upperisaminnik oqaluttuarsinnaapput. Misigisat tulliuttut tamanna takutippaat.

Amberip qulinik ukiullip sorsunnersuup aappaata nalaani nazistit juutinik malersuinerat pillugu atuagaq atuarfimmi atuartussaavaa. Taamaattumik Amber aalajangerpoq videofilmi De lilla trekanter ilinniartitsisuminut nassarniarlugu. Ilinniartitsisup tupaallaatigaa paasigamiuk Jehovap Nalunaajaasui aamma nazistit naalakkersuineranni malersorneqarsimasut. Ilinniartitsisup videofilmi atuartunut tamanut takutippaa.

Alexap arfineq-pingasunik ukioqarami atuaqatini allaffigai nassuiaallugit juullisioraangata sooq peqataasannginnerminik. Ilinniartitsisuata ima tupigusuutigitigaa Alexa klassimi aamma klassini allani marlunni allagaanik atuffassitillugu! „Perorsagaavunga allamik upperisallinnik ataqqinnittussatut,“ naggasiutigalugu atuarpoq, „qutsaviginiarpassilu juullisiorniarnanga aalajangernera ataqqigassiuk.“

Ericip atualeqqammerluni Biibilimik oqaluttuaatikka atuarfimmut nassarpaa atuaqatiminullu takutikkumallugu qinnuteqarluni. „Ajunnginnerusumik isumassarsiaqarpunga,“ ilinniartitsisoq oqarpoq. „Soormi klassimut oqaluttuaq ataaseq atuffassissutigigukku?“ Eric taamaaliorpoq, kingornalu atuakkamik perusuttut tamaasa nappaaqquai. 18-it, ilaatigut ilinniartitsisoq, nappaapput! Eric maanna misigivoq nammineq immikkut oqaluussiffigisartagaqalerluni.

Whitneyp qulingiluanik ukiullip atuagassiaaraq Jehovas Vidner — skole og undervisning * nuannaraa. „Ukiut tamaasa anaanama ilinniartitsisukka atuagassiaaqqamik tunisarpai,“ oqaluttuarpoq, „ukiorli manna nammineq taamaaliorpunga. Atuagassiaaraq pissutigalugu ilinniartitsisuma ’sapaatip-akunnerata atuartua’-tut toqqarpaanga.“

[Quppernerup ataani ilanngussaq]

[Qupp. 31-mi ungalusaq/​assiliartat]

Ilaasa upperisaminnik oqaluttuarnissaminnut periarfissat atortagaat

Atuarfimmi suliassinneqartut rapportiliortussalluunniit ilaat qulequttamik toqqaasarsimapput qanoq upperisaqarnerlutik oqaluttuarnissaminnut periarfissiisumik

Inuusuttut arlallit ilinniartitsisortik ilinniartitsinermi qulequttamut sammineqartumut tunngasumik videofilmimik atuagassiamilluunniit tunisarpaat

Inuusuttut ilaat anitsiarfimmi Biibilimik atuagassianilluunniit Biibililersaarutinik atuartut kammalaatiminnit orninneqarlutik aperineqartarsimapput

[Qupp. 28-mi assiliartaq]

Misilittagaqarnerusut inuusuttut ikiorsinnaavaat Jehovamut kiffartornermik ilinniartillugit