Naleqarluartunik — qanoq nassaartoqarsinnaava?

„UPPERISAT ilaquttannit qangarsuarli upperisarineqarsimanera pissutigiinnarlugu upperisarigukku soormi ukiut 2000-it matuma siornatigut siulivit upperisarisimasaat kelterit upperisaat qininngiliuk?“ Rodolphe quiasaamisaarluni aperivoq. Eqqarsaat taanna tusarnaartaata inuusuttup qungujuutigaa.

„Guutimut attaveqarnera uannut pingaaruteqarluinnarpoq,“ Rodolphe oqarpoq. „Upperisaq ilaquttama ukiuni qulikkaani imaluunniit hundredelikkaani nalaatsornikkut upperisarisimammassuk uannut pinngitsaaliissutaanissaanik eqqarsaat akerlerilluinnarpara.“ Rodolphep tamanna eqqarsaatigeqqissaarpaa; pingaaruteqaqimmat kingornussassaannarmisut isigerusunngilaa.

Naak upperisamik aalajangiussineq taamaattussaannartut isigineqarluni ullutsinni kingornunneqartanngikkaluartoq taamaattoq inuit amerlanerit ilaquttamik upperisaannut atassuteqaannartarput. Angajoqqaalli upperisaat atuinnassallugu tamatigut eqqortuliornerua? Tamanna Biibilimi qanoq oqaatigineqarpa?

Israelikkut ukiuni 40-ni inoqajuitsumi angalaareersut Mosesip kingoraartaata Josvap ima qinigassippai: „Guutisiorfigiumanngikkussiulli taava ullumi aalajangerniaritsi sorliit guutisiorfigiumagisi siuaasassi kuup ungataani guutisiorfigisaat imaluunniit guutit Amorikkut ilissi maanna nunagisassinni najugaqarsimagaluartut guutisiorfigisimasaat. Aamma uanga inoqutimalu [Jehova] kiffartuukkumavarput.“ — Josva 24:15.

’Siuaasat’ Josvap innersuussutigisaasa ilaat tassaavoq Aaperaap angutaa Tara, illoqarfimmi kuussuup Eufratip kitaaniittumi Urimi najugalik. Allanik guutisiornermi saniatigut Tara Biibilimi eqqaaneqarpianngilaq. (Josva 24:2) Tarap ernerata Aaperaap Guutip siunertaa tamakkiisumik ilisimanngikkaluarlugu Jehovamit peqquneqarluni illoqarfimmi qimannissaa piareersimaffigaa. Aap, upperisaq angummi upperisaanit allaanerusoq Aaperaap qinerpaa. Tamanna pissutigalugu Aaperaat Guutimit neriorsorneqarsimanermisut pilluaqquneqarpoq, upperisarsiortorpassuarnillu ’uppertunut tamanut ataataasutut’ isigineqartarpoq. — Romamiut 4:11.

Aamma Jiisusi Kristusip siuaasaa Ruthi ajunngitsumik oqaluttuarineqarpoq. Arnaq Moabikkuusoq taanna Ruthi Israelikkuusumik uilik uillarninngorami qinersisariaqalerpoq: Nunaminiiginnassava imaluunniit sakini Israelimut ilagissavaa? Ruthip paasivaa Jehovamik pallorfiginninneq siuaasami guutipilussiornerannit qutsinnerujussuusoq, taamaattumillu sakini oqarfigaa: „Inuiaqatitit uangattaaq inuiaqatigissavakka, illillu Guutit uangattaaq Guutigissavara.“ — Ruthi 1:16, 17.

Oqaluttuap tamatuma Biibilimut ilaaneranut tunngavilersuutitut Dictionnaire de la Bible-mi nassuiarneqarpoq oqaluttuami takutinneqartoq „arnaq takornartaq, inuiaqatigiinni guutipilussiortuni Israelikkunnut  akeqqersimaartuni Israelimillu uumissorneqartuni inuusimasoq, . . . Jehovap innuttaanut taassumanngalu pallorfiginninnermut asanninnini pissutigalugu qanoq Guutimit siulersorneqarlunilusooq kunngi Daavimut illernartumut siuaasanngorsimasoq“. Upperisaq angajoqqaami upperisaannit allaanerusoq qinissallugu Ruthip nangaassutiginngilaa, taamatullu aalajangernini pissutigalugu Guutimit pilluaqquneqarpoq.

Kristumiussutsip aallartinneranik oqaluttuami suli erseqqinnerusumik takutinneqarpoq sooq Jiisusip ajoqersugaasa siuaasamik upperisaat qimassimagaat. Oqalugiaammini qularunnaarnartumi Petrusip tusarnaartini kajumissaarpai allamik isumataarnermikkut Jiisusi Kristusillu aqqanut kuisinnermikkut ’eqqarleriinnit killormoortunit ukunannga annaanneqarteqqullugit’. (Apustilit Suliaat 2:37-41) Assersuutit maluginiarnarnerpaat ilagaat juuteq kristumiunik malersuisoq, Saulusi. Damaskusimut ingerlatilluni Jiisusi Kristusimit takorluuinikkut saqqummerfigineqarami kristumiunngorpoq, kingornalu apustili Paulusitut ilisimaneqalerpoq. — Apustilit Suliaat 9:1-9.

Ukiunili hundredelinni siullerni kristumiut amerlanersaat taama qaqutigoortigisumik misigisaqanngillat. Taamaakkaluartoq tamarmik juutiussuseq qimappaat imaluunniit guutipiluit assigiinngitsut guutisiorfigiunnaarlugit. Piviusut paasilluarlugit kristumiussuseq ilassivaat, Jiisusip Missiarsiunera qassiitigut sivisuumik oqaloqatigiissutigisareerlugu. (Apustilit Suliaat 8:26-40; 13:16-43; 17:22-34) Kristumiut siulliit taakku paasilluinnarpaat inuunerminnik allanngortitsisariaqarlutik. Tamarmik qaaqquneqarput, juutit juutiunngitsullu, oqariartuullu ataasiuvoq. Guutimut ajunngitsumik attaveqalissagunik kristumiunngornermikkut nutaamik pallorfiginnittaaseqalertariaqarput.

Qinigassaq

Ilaqutariit upperisarsiornikkut ileqqutoqaat — tassa juutiussuseq, kaasarimik pingaartitsineq, guutimik nalusut guutiinik pallorfiginninneq — qimallugit soqutigisaqaqatigiinnut juutinit Romamiunillu mitagaasunut ilanngutissagaanni taamani ukiuni hundredelinni siullerni sapiissuseqarnissaq ilumut pisariaqarsimassaaq. Taamatut qinersineq malersugaarujussuarnermik kinguneqartarpoq. Clermont-Ferrandimi katuullit biskoppiata Hippolyte Simonip atuakkiamini Vers une France païenne?-mi (Frankrig guutimik nalusunngulerpa?) nassuiaaneratut aamma „nalitsinni sammivik ataasiinnarsiortoq akuliuffigiumanngissagaanni“ sapiissuseqartariaqarpoq. Jehovap Nalunaajaasui upperisarsiornerup tungaatigut ikinnerussutillit ilaannikkut isornartorsiugaasartut ilannguffiginiaraanni sapiissuseqartariaqarpoq.

Angut inuusuttoq Korsikami Bastiameersoq Paul katuullini peroriartorsimavoq qaqutigullu ilagiit suliniutaannut peqataasarsimalluni, soorlu katuullit ikiuiniaqatigiiffiisa ilaannut aningaasannanniarnermi kaaginik tuniniaasarluni. Biibilimik paasinninnerorusukkami Biibili pillugu akuttunngitsumik Jehovap Nalunaajaasuinik oqaloqateqartarniarluni akuersivoq. Piffissap ingerlanerani paasilerpaa ilinniakkani qaqugorsuarmut iluaqutigisinnaallugit. Tamatuma kinguneranik Biibili taassumunnga pingaaruteqartorujussuanngorpoq Jehovamullu Nalunaajaasunngorpoq. Qinersinera angajoqqaavisa ataqqivaat, imminnullu attaveqaqatigiilluarnerannut ajoqutaanngilaq.

Amélie Frankrigip kujataani najugalik ilaqutaalu kinguaariinni sisamani Jehovamut Nalunaajaasuusimapput. Sooq angajoqqaami upperisarsiornikkut naleqartitaat qinerpai? Amélie oqarpoq: „Angajoqqaat aatakkulluunniit Jehovamut Nalunaajaasuunerat taamaattuusimaneralluunniit pissutigalugu Jehovamut Nalunaajaasunngortoqartanngilaq. Ullulli ilaanni imminut ima oqarfigisariaqalersarpugut: ’Qularinngilluinnarakku taamatut upperisaqarpunga.’“ Jehovap Nalunaajaasui inuusuttut  allat assigalugit Amélie isumaqarpoq upperisarsiornikkut isummamigut aalajangiussani inuunerminik siunertaqalersitsisimasoq, tamannalu pilluarnermik ataavartumik kinguneqarsinnaasoq.

Sooq Biibilimi ileqqussatigut najoqqutassiat akuerissavavut?

Guutimut ajunngitsumik attaveqarusuttut Ussatit kapitali 6, versi 20-mi kajumissaarneqarput: „Ernera, ataatavit inassutai maleruarniakkit anaanavillu ajoqersuussutaa sumiginnarnagu.“ Misissueqqaarani naalaannarnissaq ilitsersuummi tassani kajumissaarutigineqanngilaq, inuusuttunulli kajumissaarutaavoq upperisaminnik itinerusumik paasiniaanermikkut Guutip najoqqutassiai akuereqqullugit, namminnerlu Guuti aalajangerfigeqqullugu. Apustilip Paulusip kristumioqatini kajumissaarpai suut ’tamaasa misilittaqqullugit’, tassa ilinniakkatik Guutip oqaasianut piumasaanullu naapertuunnersut misissortaqqullugit, paasisatillu naapertorlugit iliuuseqartaqqullugit. — 1 Thessalonikamiut 5:21.

Jehovap Nalunaajaasui 6 millioninit amerlanerusut inuusuttut utoqqaallu taamatut aalajangersimapput, ilaqutariinni kristumiuni kristumiuunngitsuniluunniit peroriartorsimagaluarunik. Biibilimik sukumiisumik misissuinermikkut inuunerup siunertaa pillugu apeqqutitik akissutissarsisimavaat, Guutillu inuit pillugit siunertaa erseqqissumik paasisimallugu. Ilisimassummik taamaattumik pigisaqalernermik kingorna Guutip najoqqutassiai pigiliukkiartorpaat, Guutillu piumasaanik iliornissartik ilungersuutigaat.

Atuagassiamik uuminnga akuttunngitsumik qaqutiguinnarluunniit atuartaruit taava illernartuutit nalilippassuit Biibilimiittut paasinissaannut Jehovap Nalunaajaasuisa ikiuiniarnerat ilassiuk. Taamaalillutit ’ussissavat takussavallu [Jehova] ajunngitsuusoq’, ilisimassuserlu iliuuseqarnermik malitseqaraangami inuunermik naassaanngitsumik kinguneqarsinnaasoq pigilissavat. — Tussiaat 34:9; Johannesi 17:3.  (wE 4/15 03)

[Qupp. 5-mi assiliartaq]

Ilaqutariinni franskiusuni ukunani kinguaariit sisamat Jehovamut Nalunaajaasuusimapput

[Qupp. 7-mi assiliartaq]

Siuaasami guutiinit pingaartinnerullugu Jehovap kiffartorfiginissaa Ruthip qinerpaa