Saamassuseq — pissuseq kristumiunut pisariaqartoq
Saamassuseq — pissuseq kristumiunut pisariaqartoq
’Atiniarsiuk . . . qanilaarneq.’ — KOLOSSEMIUT 3:12.
1. Suna pissutigalugu saamassuseq pissusiua maluginiarnartoq?
INUK saamasoq ilakkuminartuuvoq. Soqutiginarpoq kunngi silatooq Salomo oqarmat ’oqqap qanilaartup saarngit napisinnaagai’. (Ussatit 25:15) Tassa saamassuseq pissusiuvoq maluginiarnartoq, inummi saamasoq qajassuussisuullunilu nukittuujuvoq.
2, 3. Saamassuseq aamma anersaaq illernartoq imminnut qanoq attuumassuteqarpat, allaaserisamilu matumani suna misissussavarput?
2 Ny Verden-Oversættelsen naapertorlugu Galatiamiunut allakkani 5:22, 23-mi Paulusip ’anersaap inerititaanik’ allaaserinninnerani pissuseq saamaneq ilaavoq. Grækerit oqaasiat versi 23-mi ’saamanermik’ nutserneqartoq Biibilini allani ’qanilaarnermik’ nutserneqartarpoq. Allassimaqqaarneranili grækerit oqaasiat atorneqartoq oqaatsini amerlanerni eqqoqqissaartumik oqaasertassaqartikkuminaappoq, oqaatsimi pineqanngimmat qallikkut inussiarnersuuneq ilassinnissinnaanerluunniit, pineqarlunili ilorlikkut saamasuuneq qajassuussisuunerlu pissusilersornikkuunngitsoq, uummatikkulli isummakkullu.
3 Pissuseq saamassuseq qanoq isumaqarnersoq qanorlu pingaaruteqartiginersoq paasinerujumallugu maligassat Biibilimeersut sisamat misissornerussavavut. (Romamiut 15:4) Saamassuseq suunersoq ilikkaannassanngilarput, aammattaarli ilikkassavarput pissuseq taanna qanoq ineriartortissinnaaneripput qanorlu iliornitsinni tamani ersersissinnaaneripput.
’Guutip isaani erlinnaqisoq’
4. Jehovap saamassuseq pingaartingaaraa qanoq nalunngilarput?
4 Saamassuseq Guutip anersaavata inerititaata ilagimmagu paasinarpoq pissuseq Guutip kinaassusianut asseqanngitsumut attuumassuteqarluinnartoq. Apustili Petrusi allappoq ’anersaaq piuaatsoq qanilaartorlu Guutip isaani erlinnaqisoq’. (1 Petrusi 3:4) Saamassuseq aamma Jehovap pissusiisa ilagaat, pissusiuvorlu pingaartingaagaa. Tamannalu pissutigalugu Guutip kiffaasa saamassuseq ineriartortittariaqarpaat. Silarsuarmili oqartussaasut qullersaata, Guutip ajugaqanngitsup, saamasuunini qanoq ersersippaa?
5. Jehova saamasuummat qanoq periarfissaqalerpugut?
5 Inuit aappariit siulliit, Adamip Evallu, orpik ajunngitsumik ajortumillu ilisimalersitsisoq neriffigigamikku, Guutip peqqussutaanut erseqqissumut piaaralutik naalanngipput. (1 Mosesi 2:16, 17) Taamatut piaaralutik naalannginnerat taakkununnga kinguaavinullu ajortimik, toqumik Guutimullu takornartanngornermik kinguneqarpoq. (Romamiut 5:12) Jehovap inuiaat iluarsivissaqanngilluinnartutut annaanneqarsinnaanngilluinnartutullu sukannerluni isumakkiinngilai, taamatut eqqartuussinissaminut pisussaalluinnaraluarluni. (Tussiaat 130:3) Jehovap saamasuunera erserpoq ingasattumik piumasaqannginneratigut sukannersuunnginneratigullu. Imali saaffigiuminartigigami inuit ajortiliusut imminut palligussinnaanissaannut iluarisaalersinnaanissaannullu pisariaqartumik isumaginnippoq. Aap, Jiisusi Kristusip utertitsissutitut pilliutaata tunissutaanera atorlugu Jehovap issiavissaarsuarminut qutsissumiittumut siooranata palligussinnaatippaatigut. — Romamiut 6:23; Hebræerit 4:14-16; 1 Johannesi 4:9, 10, 18.
6. Guutip saamassusia Kainimut qanoq erserpa?
6 Jiisusip nunaliarnissaa sioqquterujussuarlugu Jehovap Adamip ernerisa Kainip Abelillu pilliiffigimmanni saamasaarfigai. Uummatimikkut pissusiat Jehovap takusinnaavaa, taamaattumillu Kainip pilliutaa akueriumanngilaa Abelili pilliutaalu ’iluaralugit’. Tamanna Kainip akeqqersimaartunnguutigaa. „Ajuallappoq nakangallunilu angalalerluni,“ Biibilimi allassimavoq. Jehova qanoq qisuariarpa? Kainip ajortumik isiginnittaaseqarnera ajuallaatigaa? Naagga. Saamalluni Kaini aperaa sooq taama kamatsiginersoq. Allaat qanoq kamakkunnaarsinnaanersoq oqaluttuuppaa. (1 Mosesi 4:3-7) Erseqqippoq Jehova saamalluinnartuusoq. — 2 Mosesi 34:6.
Saamasut nuannarinarput allallu nakussatsittarlugit
7, 8. (a) Jehovap saamassusia qanoq ilinniarsinnaavarput? (b) Matthæusi 11:27-29-mi oqaatsit Jehova Jiisusilu pillugit sumik takutitsippat?
7 Jehovap pissusiinik asseqanngitsunik ilinniarfigilluarsinnaanerpaasatta ilaat tassaavoq Jiisusip inuuneranik kiffartorneranillu misissuineq. (Johannesi 1:18; 14:6-9) Jiisusi oqaluussinermi ukiuisa aappaanni Galilæamiitilluni Korazinimi, Betsajdami, Kapernaumimi eqqaannilu tupinnartuliarpassuaqarpoq. Inuilli amerlanerit makitasuujupput soqutiginninnatillu upperiumanagulu. Jiisusi qanoq qisuariarpa? Uppinngitsuunertik qanoq kinguneqartissagaat erseqqissaavigai, inuilli nalinginnaasut, ‛am ha’aʹræts, inuit nuimasuujunngitsut, anersaakkut atugarliortut nalligingaarpai. — Matthæusi 9:35, 36; 11:20-24.
8 Jiisusip iliuusiisa takutippaat ’Ataataq ilisarisimalluinnaraa’ ilaaraalu. Inuinnaat asannittumik ima qaaqquai: „Ornissinga tamassi suleruluttusi nanertugaasusilu, nukissaqalerseqqissavassi. Nammaatara ilissinnut pisissiuk, ilinniarfigisingalu saamagama uummatikkullu makitajuikkama; tarnissigullu nukissaqalissaasi.“ Oqaatsit taakku qunusiarisaasunut naqisimaneqartunullu tuppallernaqaat nakussatsinnaqalutillu. Ullumikkut uagutsinnut aamma taamaappoq. Ilumoorluta ’qanilaarneq atiniarsarigutsigu’, Jiisusip neriorsorpaatigut Ataatamik ’saqqummiiffigiumalluta’. — Matthæusi 11:27-29, NV.
9. Pissuseq suna saamassusermut atava, tamatumanilu Jiisusi qanoq maligassiuilluarpa?
9 Saamassuseq maniguunnermut, ’uummatikkut makitajuinnermut’, attuumassuteqarluinnarpoq. Makitasoorli pingaarniartunngortitsisarpoq allallu sukannerfigigajussinnaallugit misigittaaffigigajussinnaallugillu. (Ussatit 16:18, 19) Jiisusi nunami kiffartornini naallugu maniguuttuuvoq. Allaat toqunissi ullunik arfinilinnik sioqqullugu siutituumik qimusserluni Jerusalemimukarami juutillu kunngiattut unnersiutigineqarami, silarsuarmi naalakkersuisut pissusiannit allaanerulluinnartumik pissuseqarpoq. Missiarsi pillugu Zakariap siulittuutaa eqquutitippaa: „Takuat, kunngivit ornippaatit qanilaarluni siutituup qaani qimusserluni, nersutip nammattartup piaraata qaani.“ (Matthæusi 21:5; Zakaria 9:9) Pruffiiti Danielip aalajaatsup takorruuisitaalluni takuaa Jehovap erni kunngiussusermik tunigaa, siusinnerusukkulli siulittuutineqartumi Jiisusi ’inuit nikanarnersaattut’ allaatigineqarpoq. Aamma oqarsinnaavugut ’maniguunnersaasoq’, grækerit oqaasiat aamma taamatut nutserneqarsinnaammat. Aap, maniguunneq saamassuserlu imminnut atalluinnarput. — Danieli 4:14; 7:13, 14.
10. Sooq kristumiutut saamasuuneq sanngitsuunerunngila?
10 Saamassuseq Jehovap Jiisusillu ersersitaat nuannerinarpoq, taakkununngalu palligunnissatsinnut iluaqutigaarput. (Jaaku 4:8) Soorunami saamassuseq sanngiinnerunngilluinnarpoq. Jehova, Guuti ajugaqanngitsoq, pissaaneqangaarpoq piginnaaneqangaarlunilu naapertuilluanngitsuliornerillu pillugit kamangaarluni. (Esaja 30:27; 40:26) Jiisusi Saatani Diaavulumit saassunneqarami aalajangiusimalluinnarpaa eqqortup akerlianik iliorumanani. Aamma upperisarsiornikkut pisortaasut inatsisinik unioqqutitsillutik niuerneri isiginngitsuusaanngilai. (Matthæusi 4:1-11; 21:12, 13; Johannesi 2:13-17) Ajoqersukkanili kukkugaangata, saamaffigisarpai sanngiissutaallu naammagittarluni kamagittarfigisarlugit. (Matthæusi 20:20-28) Biibilimik misissueqqissaartartup saamassuseq eqqorluartumik ima allaatigaa: „Sallaannerup tunuaniippoq sisaap qajannaannera.“ Saamassuseqarnitsigut Jiisusi ilaartigu.
Mosesi saamasuujuvoq
11, 12. Mosesip, peroriartornera eqqarsaatigalugu, saamasuunera sooq maluginiarnartuua?
11 Maligassat pingajuat misissugassarput tassaavoq Mosesi. Biibilimi ima allaatigineqarpoq: „Inunnit nunarsuarmiittunit tamanit anneruniajuinnerpaasoq [imaluunniit: saamanerpaajusoq].“ (4 Mosesi 12:3) Taamatut allaatiginninneq Guutimit isumassarsiarititaavoq, Mosesilu qaqutigoortumik saamasuugami Jehovap siulersuinera malippaa.
12 Mosesip peroriartornera nalinginnaasuunngilaq. Piffissami killuussiffiusumi toqutsisoqarfiusumilu Jehovap angajoqqaat hebræeriusut uppertut ernerat taanna inuuginnartippaa. Mosesi mikisuunermini anaanaminit asannittumik isumagineqarpoq, arnaatalu Guuti ilumoortoq, Jehova, pillugu sorpassuarnik ilinniartippaa. Kingusinnerusukkut Mosesi angajoqqaaminiikkunnaarpoq, allaaneroqqiffissaqanngitsunik avatangiiseqalerluni. „Mosesi Egyptenimiut ilisimassusiannik tamanik ajoqersorneqarpoq pissaaneqarlunilu oqaatsimigut suliamigullu,“ Stefanusi, ukiuni hundredelinni siullerni martyrinngortoq, oqarpoq. (Apustilit Suliaat 7:22) Faraop inussianik paarsisui qatanngutiminik naapertuilluanngitsuliorfiginnittut takoreerlugit, tapersersorniarlugit uppernikkut aalajangerpoq. Egyptenimiu hebræerimik unataasoq takusani toqoreerlugu Egyptenimiit Midjanimut qimaasariaqarpoq. — 2 Mosesi 1:15, 16; 2:1-15; Hebræerit 11:24, 25.
13. Ukiuni 40-ni Midjanimiinnera Mosesimut qanoq sunniuteqarpa?
13 Mosesi 40-nik ukioqarluni inoqajuitsumi imminut napatittariaqarpoq. Midjanimi Re’uelip panii arfineq-marluk naapippai ataatamillu nersutaaterpassuinik imertitsisut ikiorlugit. Arnat inuusuttut angerlaramik nuannaarlutik angutertik oqaluttuuppaat nersutaatinik paarsisunit uumisaarisunit Egyptenimiup aniguisikkaatsik. Re’uelip imminni ineqaqqummani Mosesi akuersivoq. Mosesip atugarliuutigisani akeqqersimaartunnguutiginngilai pissutsinullu nutaanut naleqqussarnissaminut akornutiginagit. Guutimut kiffartorumalluni aalajangernermini nalornilinngisaannarpoq. Ukiut 40-rsuit ingerlasussaapput, piffissamilu tassani Re’uelip savaataanik paarsisuuvoq. Sippora aapparilerpaa qitornanilu perorsarlugit, inuttullu pissuserinnerulernissani sulissutigiuarpaa pissuserlu ilisarnaatigilikkani ineriartortittuarlugu. Aap, Mosesip atugarliorfiusuni naammagittarnermigut saamasuuneq ilikkarpaa. — 2 Mosesi 2:16-22; Apustilit Suliaat 7:29, 30.
14. Mosesip Israelikkunnut siulersuisunngoreerluni saamasuuginnarneranik ersersitsisumik pisimasumik oqaluttuarit.
14 Aammattaaq Mosesi Jehovamit Israelikkunnut siulersuisussatut toqqarneqarnermi kingorna saamasuuvoq. Ilaanni angutip inuusuttup arpaannaq oqaluttuukkiartorpaa Eldadi Medadilu pruffiitisut qamuuna tiguartittut. Taakkuli najuussimanngillat Jehovap anersaani utoqqaanertanut 70-inut Mosesip ikiortissaanut kuimmagu, taamaattumik Josva ima pilerpoq: „Mosesi, naalagaq, nangartarniakkit!“ Mosesip saamalluni ima akivaa: „Uangaana sinnerlunga taama ilungersortigisutit? Pitsaaqqajaraluaqaaq [Jehovap] innuttai tamarmik pruffiitiusinnaagaluarpata, [Jehovallu] anersaaminik tunisinnaagaluarpagit!“ (4 Mosesi 11:26-29) Saamassuseq pissutsinik najummassimanarpallaarunnaarsitsivoq.
15. Mosesi naammalluinnanngitsuugaluarluni sooq maligassaalluarpa?
15 Ilaannili Mosesip saamassuseq ersersinngitsoorpaa, tassa Meribami, Kadeship eqqaani, tupinnartuliaq Jehovamut ataqqinaataatinngitsooramiuk. (4 Mosesi 20:1, 9-13) Mosesi naammalluinnanngitsuugaluarluni inuunini naallugu uppernikkut aalajaannini napassutigaa, saamasuuneralu qaqutigoortoq nuannarinartuuvoq, allaat ullumikkut uagutsinnut. — Hebræerit 11:23-28.
Saamassuseq sukannersuunermut ajugaavoq
16, 17. Nabalimik Abigajilimillu oqaluttuaq uagutsinnut qanoq mianersoqqussutaava?
16 Daavip nalaani Guutip pruffiitiata Samuelip toqunerata kinguninngua ullumikkut uagutsinnut mianersoqqussutaasinnaasutut ittumik pisoqarpoq. Nabali nulialu, Abigajili, assigiinngilluinnartuupput. Abigajili ’silassorissuusoq’, uia „peqqarniitsuuvoq inupiluullunilu“. Nabalip soqqusaalluni Daavip angutitai taqusserusunngilai naak Nabalip nersutaaterpassui ujajaasunut illersoraluaraat. Taamaattumik tupinnanngilaq Daavi kamammat angutitanilu ilaliullugit panalisarlutik Nabali saassukkiartorlugu aallarmata. — 1 Samueli 25:2-13.
17 Qanoq pisoqartoq Abigajilip tusaramiuk tuaviinnaq timiusat, viinni, neqit, seqquluttut tiggussimasut figenillu tiggussimasut nassarlugit Daavi naapigiarpaa. „Uanga pisuutitassaavunga, naalagaq,“ kimigiiserfigaa. „Ilinnut oqaasissakka tusariakkit, naalagaq!“ Abigajilip saamalluni qinnutaata Daavip uummataa killippaa, nassuiaataalu tusarnaareerlugu ima oqarpoq: ‘Qujanarsili [Jehova] Israelip Guutia, ullumi uannukartikkamisit! Qujanarlu silatusaallaqqissuugavit; illimmi qujanarsigit ullumi aammut pisuunissaraluara . . . ingalatsikkakku.’ (1 Samueli 25:18, 24, 32, 33) Naggataatigut Nabalip peqqarniitsuliornera toquneranik kinguneqarpoq, Abigajililli pissuserissaartuunini pissutigalugu Daavimut nulianngornini nuannaarutigaa. Saamasuugami ullumikkut Jehovamut kiffartortunut tamanut maligassaalluarpoq. — 1 Samueli 25:36-42.
Saamassuseq noqqaassutigiuk
18, 19. (a) Saamassuseq ’atiniaraangatsigu’ allanngornerit suut erseqqissisarpat? (b) Ilumoorluta imminut misissornissatsinnut suna iluaqutigisinnaavarput?
18 Tassa saamassuseq pissusiuvoq pisariaqartoq nuannersorlu, inussiarnisaarnerinnaanngitsoq. Saamasup ilagisani nakussatsittarpai inuummarissisittarlugillu. Immaqa siornatigut sukkannersumik oqaluttarpugut inussiarniitsumillu pissuseqartarluta. Sallusuissulli Biibilimeersoq ilikkaratsigu allanngorpugut ilakkuminarnerulerlutalu. Allanngorneq taamaattorpiaq Paulusip eqqaavaa uppeqatini ima kajumissaaramigit: „Atiniarsigit nallittuingaarneq, ajunngissuseq, nikanartinneq, qanilaarneq naammagittassuserlu.“ (Kolossemiut 3:12) Allanngorneq taamaattoq Biibilimi assersuunneqarpoq uumasut kiisortut — amaqqut, milaqulaat, løvit, nannut pulateriaarsuillu — uumasuutitut nujuitsutut — savaaqqatut, savaasaaqqatut, nersuteeqqatut ussittullu — ilinerannut. (Esaja 11:6-9; 65:25) Inuttut pissusinik allannguinerit taamaattut ima malunnartigisinnaapput takunnittunit tupaallaatigineqalutik. Allanngorneq taamaattoq Guutip anersaavata sunniutaatut oqaatigisarparput, saamassusermi anersaap tamatuma inerititaata maluginiartup ilagaa.
19 Allannguutigisariaqakkat allannguutigereerutsigik Jehovamullu tunniulluinnareerutta imaappa saamasuunissaq sulissutigisariaarukkipput? Naagga. Nutaanik atisarsigaanni ipiitsuujuassappata takujuminartuujuassappatalu paarineqartariaqarput. Guutip oqaasia isumaliutigeqqissaartarutsigu pisimasullu eqqartorneqartut eqqarsaatigisarutsigik imminut piviusorsiortumik allatullu isiginissatsinnut iluaqutigissavarput. Guutip oqaasia isumassarsiarititaasumut tarrarsoraangavit suna takusarpiuk? — Jaaku 1:23-25.
20. Saamassusermik ersersitsinissatsinnut suna iluaqutigisinnaavarput?
20 Inunnguuseralugu assigiinngitsunik periaaseqarpugut. Guutimut kiffaasut ilaasa saamasuunissartik kiffaasunit allanit ajornannginnerutittarpaat. Taamaattoq kristumiut tamarmik Guutip anersaavata inerititaanik, aamma saamassusermik, ineriartortitsisariaqarput. Paulusip Timotheusi asannittumik ima kajumissaarpaa: ’Noqqaassutigikkit iluarneq, Guutimik mianerinninneq, upperneq, asanninneq, nikallujuinneq qanilaarnerlu.’ (1 Timotheusi 6:11) Oqaatsip ’noqqaassutigikkit’-ip takutippaa iliuuseqartoqartariaqartoq. Biibilimik nutsikkami ataatsimi oqaaseq ’sulissutiginiakkit’-mik nutserneqarsimavoq. (New Testament in Modern English, by J. B. Phillips) Pisariaqartumik iliuuseqaruit eqqarsaatigilluarukkillu maligassat Guutip oqaasiani allassimasut ilinnut ’ikkussimasutut’ ilissapput, puiuikkiutissavatillu. Inuttut qanoq pissuseqarnissat ilusilersussavaat ulluinnarnilu inuunerni sunniuteqassallutik. — Jaaku 1:21.
21. (a) Sooq saamassuseq ’noqqaassutigiuartariaqarparput’? (b) Allaaserisami tullermi suna sammineqarpa?
21 Saamassuseq qanoq ineriartortissimatigineripput allanut periaaseqarnitta ersersittarpaa. „Kina arlarsi ilisimasuullunilu sianisuujua?“ ajoqersugaq Jaaku aperivoq. „Taamaattoqaruni suliamigut takutilligit, torersumik inuulluni ilisimasutullu piuaalluni [saamalluni, NV].“ (Jaaku 3:13) Pissuseq taanna qanoq ersersissinnaavarput ilaqutariinni, kristumiutut oqaluussinermi ilagiinnilu? Tamatumunnga atatillugu allaaserisami tullermi siunnersuutitsialaqarpoq.
Uteqqiinermi apeqqutit
• Saamassuseq pillugu suna ilikkarpiuk maligassat ukua misissorneranni:
• Jehova?
• Jiisusi?
• Mosesi?
• Abigajili?
• Sooq saamassuseq noqqaassutigisariaqarparput?
[Atuaqqissaarnermi apeqqutit]
[Qupp. 12-mi assiliartaq]
Sooq Jehovap Abelip pilliutaa iluaraa?
[Qupp. 13-mi assiliartaq]
Jiisusip takutippaa saamassuseq maniguunnerlu imminnut atalluinnartut
[Qupp. 14-mi assiliartaq]
Saamasuunerup tungaatigut Mosesi maligassaalluarpoq