Anersaap oqaaserisai tusaariartigik!
Anersaap oqaaserisai tusaariartigik!
„Siuteqartup tusarligit Anersaap ilagiinnut oqaaserisai.“ — SAQQUMMERSITAT 3:22.
1, 2. Jiisusip ilagiinnut arfineq-marlunnut Saqqummersitat-ni eqqaaneqartunut tusarliussaani kajumissaarut suna uteqattaarneqarpa?
JIISUSI Kristusip anersaamit siulersorneqarluni ilagiinnut arfineq-marlunnut Biibilimi Saqqummersitat-ni eqqaaneqartunut oqaaserisai Jehovap kiffaasa eqqumaffigisariaqarpaat. Aap, tusarliussani tamani ima kajumissaaruteqarpoq: „Siuteqartup tusarligit Anersaap ilagiinnut oqaaserisai!“ — Saqqummersitat 2:7, 11, 17, 29; 3:6, 13, 22.
2 Jiisusip Efesosimi, Smyrnami aamma Pergamonimi inngilinut, tassa nakkutilliisunut, tusarliussai misissoreerpavut. Ilagiinnut allanut sisamanut anersaamit illernartumit siulersorneqarluni oqaaserisai qanoq iluaqutigisinnaavavut?
Thyatirami inngilimut
3. Thyatira sumiippa, illoqarfiullu ingammik suut tusaamasaassutigai?
3 Thyatirami ilagiit ’Guutip ernerata’ nersorlugillu oqaaqqissaarpai. (Saqqummersitat 2:18-29 atuaruk.) Illoqarfik Thyatira, ullumikkut Akhisar, Asiaaqqap kitaani kuussuup Gedizip (itsaq Hermosimik taaneqartup) kuuttaasa ilaata sinaaniippoq. Illoqarfiup assassukkanik suliarpassuaatini tusaamasaassutigai. Misuttaasartut naasoq kraprodi atorlugu misuttaatissialiortarput aappallarissumik tusaamasaasumik. Lydia Paulusip Grækenlandimi Filippimiinnerani kristumiunngortoq ’annoraassiassanik aappallarissunik nioqqutiliuvoq’ illoqarfimmit Thyatirameersoq. — Apustilit Suliaat 16:12-15.
4. Thyatirami ilagiit suna pillugu nersualaarneqarpat?
4 Thyatirami ilagiit ajunngitsuliaat, asannissusiat, uppersusiat, nikallujuissusiat kristumiutullu kiffartornerat pissutigalugit Jiisusip nersualaarpai. Aap, ’suliaasa kingulliit siulliit akimorpaat’. Ajunngitsuliorsimasutulli ilisimaneqaraluarluta ileqqorissaarnissarput eqqarsaatigalugu maleruutialinngisaannartariaqarpugut.
5-7. (a) „Arnaq Jezabeli“ kinaava, sunniineralu eqqarsaatigalugu qanoq iliortoqartariaqarpa? (b) Kristusip Thyatirami ilagiinnut tusarliussaa arnat Guutimik mianerinnittut qanoq iliornissaminnut iluaqutigissavaat?
5 Thyatirami ilagiit guutipilussiorneq, ajoqersuutit eqqunngitsut aamma kinguaassiuutitigut inuunerlunneq akueraat. Akornanniippoq „arnaq Jezabeli“ — imaassinnaavoq arnat arlallit Israelip naggueqatigiissortaani qulini dronningi Jezabelip ajortup pissusianut eqqaanartunik pissuseqartut. Biibilimik nassuiaasartut ilaat isumaqarput Thyatirami arnat ’pruffiitiunerartut’ kristumiut sunnerniarsarigaat sulisartoqatigiit sernissortigalugit guutigisaat pallorfigeqqullugit guutipiluillu taakkua ataqqinaatissaannut festernernut nereqatigiinnernullu peqataaqqullugit. Ullumikkut ilagiinni kristumiuni imminut pruffiitinngortittoqarnaveerli allanik nakutitsiniarsarisunik!
6 Jiisusip arnaq Jezabeli napparsimalersissavaa taassuminngalu allasiorfiginnittartut annikilliungaalersissallugit, taassuma iliuusii ajortut tunullugit allamik isumataanngippata. Nakkutilliisut eqqunngitsumik ajoqersuutinut sunniutinullu ajortunut nakkaannartariaqanngillat, kristumiulu kinaluunniit ’Saatanip itissusii’ ilumut ajorluinnartuusut paasiniarlugit anersaakkut allasiortariaqanngilaq kinguaassiuutitigulluunniit inuunerluttariaqarnani guutipilussiornermiluunniit peqataasariaqarnani. Jiisusip mianersoqqussutaa eqqumaffigigutsigu ’pigisarput aalajangiunniassavarput’, ajortillu pissaaneqarfigissanngilaatigut. Tanitat iliuutsit, kissaatit anguniakkallu guutiitsorpalaartut akueriumannginnamikkik makitinneqareerunik ’inuiaqatigiinnut naalagaassuseqartitaassapput’ Kristusilu ilagalugu taakku „immersakkatut marraasutut sequmisissallugit“. Maannakkut ilagiinni assersuutaasunik ’ulloriaqarpoq’, tanitalli qilammi makitinneqareerunik tunineqassapput ’ullorissamik qaasiummik qaammarissumik’, uissamik, tassa Jiisusi Kristusi. — Saqqummersitat 22:16.
7 Thyatirami ilagiit arnat tunussisut ajortumik sunniinerannut mianersoqquneqarput. Ullumikkut arnat Guutimik mianerinnittut Jiisusip anersaamit siulersorneqarluni ilagiinnut tusarliussaa iluaqutigissavaat Guutip inissisimaffigititaata sumiginnannginnissanut. Angutinut oqartussaassuseqarniarsarinngillat, qatanngutinilluunniit angutinik anersaakkut allasiortitsiniarsarinngillat kinguaassiuutitigulluunniit inuunerlutsitsiniarsarinatik. (1 Timotheusi 2:12) Ajunngitsuliorlutilli oqaluussinermilu Guutimik unnersiutiginnillutik maligassiuipput. (Tussiaat 68:12; 1 Petrusi 3:1-6) Ilagiit pigisatik — ajoqersuutit ileqqullu minguitsut kiffartornerlu pingaartinneqangaartoq — aalajangiunniarunikkik, Kristusimit akilerneqangaassapput eqqartuunneqassanatillu.
Sardesimi inngilimut
8. (a) Sardesi sumiissimava, sunillu ilisarnaateqarpa? (b) Sooq Sardesimi ilagiit ikiorneqartariaqarpat?
8 Sardesimi ilagiit erniinnaq ikiorneqartariaqarput, anersaakkut toqungagamik. (Saqqummersitat 3:1-6 atuaruk.) Sardesi illoqarfiuvoq ingerlalluartoq Thyatiramit 50 kilometerit missiliorlugit kujasinnerusumiittoq. Niuerneq aningaasatigullu ingerlalluarneq, meqqulualinnik atisaliorneq tæppiliornerlu aamma nunap naggorissusia Sardesip, piffissap ilaatigut 50.000-t missiliorlugit inoqarsimasup, illoqarfittut pigissaarfiuneranut pissutaaqataapput. Oqaluttuarisaanermik allattoq Josefusi naapertorlugu ukiuni hundredelinni siullerni ukiunik naatsorsuisarnitta siorna juuterpassuit illoqarfimmi tassani najugaqarput. Illoqarfiup illukuisa akornanni synagogikoq Efesosimiullu guutiannut arnamut Artemisimut naalaffikoq nassaassaapput.
9. Qarsupittumiinnaq kiffartortarutta qanoq iliortariaqarpugut?
9 Jiisusip Sardesimi ilagiit inngiliat oqarfigaa: „Suliatit ilisimavakka. Oqaatigineqartarputit uumassuseqartutit, uffali toqungasutit.“ Uagummi eqqumasutut oqaatigineqartarutta, immikkulli pisinnaatitaaffivut eqqarsaatigalugit sinikkutta, qarsupittumiinnaq kiffartortarutta anersaakkullu ’toqoqqajaalerutta’? Taamaappat Guutip naalagaaffianik tusarliussamut tunngatillugu ’eqqaamasariaqarparput qanoq ililluta piginnilersimasugut tusarsimasugullu’. Kiffartornermi illernartumi ilungersoqqilertariaqarpugut kristumiullu ataatsimiinnerini uummatikkut iluunngarluta peqataaqqittalerluta. (Hebræerit 10:24, 25) Jiisusip Sardesimi ilagiit ima mianersoqquai: „Eqqumanngikkuit tillinniatut tikiukkumaarpunga, naluallu qanoq ilisukkut saassukkumaarikkit.“ Uagummi ullumikkut inuusugut? Qanittukkut nassuertussaavugut.
10. Allaat Sardesimi pissutsinut assingusuni kristumiut ikittunnguit qanoq ittuusinnaappat?
10 Allaat Sardesimi pissutsinut assingusuni imaassinnaavoq ikittunnguit ’atisaminnik mingutsitsisimanngitsut’, taakkualu ’Jiisusi ilagisinnaavaat qaqortunik atisaqarlutik taamaattunik atisaqarnissamut qinngaqqunnannginnamik’. Kristumiutut ilisarnaatiminnik attassiinnarput ileqqussatigut upperisarsiornikkullu silarsuarmit mingutsinneqarsimannginnamik. (Jaaku 1:27) Taamaattumik Jiisusip taakkua ’atii inuunerup mappersagaanit piianngisaannassavai nassuerutigiumaarlugilli ataataminut inngiliinullu’. Katersat Kristusip nuliassai tanitat taassuma ilagisaatut qinngaqqunnanngitsutut akuerineqareerunik ’atisassinneqassapput ilupaassianik qaallorissunik minguitsunik’, illernartut suliaannut naapertuilluartunut assersuutaasunik. (Saqqummersitat 19:8) Qilammi immikkut pisinnaatitaaffinnik alutornangaartunik qilanaarisaqarnertik silarsuup matuma ajugaaffiginissaanut kajumississutigissavaat. Nunarsuarmi inuunermik naassaanngitsumik neriugisallit aamma pilluaqquneqangaassapput, taakkualu atii aamma inuunerup mappersagaani allassimapput.
11. Anersaakkut sinileqqajaalerutta qanoq iliortariaqarpugut?
11 Arlaannarpulluunniit Sardesimi ilagiit anersaakkut pissusiattut alianartigisumik pissuseqalerusunngilaq. Paasilerutsigumi anersaakkut sinileqqajaalerluta? Taamaappat nammineq iluaqutissatsinnik erniinnaq iliuuseqartariaqarpugut. Immaqa guutiitsut iliuuserisartagaat iliuusereqqajaalerpavut oqaluusserpiassaarlutaluunniit imaluunniit ataatsimiigiarpiassaarluta. Taamaakkutta qamannga pisumik Jehova ikioqqulluta qinnuigisariaqarparput. (Filippimiut 4:6, 7, 13) Ullut tamaasa Biibilimik Biibililersaarutinillu ’pilittaasup ilumoortup silatuullu’ pilersitaanik atuartarneq atuaqqissaartarnerlu iluaqutigalugit anersaakkut eqqumajuarsinnaavugut. (Lukasi 12:42-44) Taamaaliorutta Sardesimi kristumiusut Jiisusi Kristusimit akuerisaasutut issaagut, uppeqatitsinnullu iluaqutaallutalu qiimmassaataassaagut.
Filadelfiami inngilimut
12. Itsaq Filadelfiami upperisarsiornikkut pissutsit qanoq ippat?
12 Jiisusip Filadelfiami ilagiit nersualaarpai. (Saqqummersitat 3:7-13 atuaruk.) Illoqarfik Filadelfia (maannakkut Alasehir) pigissaarfiulluarpoq Asiaaqqap kitaani viinnequteqarfiup naggorissup qeqqaniittoq. Taamaattumik guutiat pingaarnerpaaq tassaavoq viinnip guutia Dionysosi. Imaannguatsiarpoq juutit Filadelfiamiittut ilaasa juutinut kristumiunut illoqarfimmiittunut Mosesip inatsisaanut tunngatillugu ileqqut ilaat maleruaannaqqugaluaraat uterfigeqqeqqugaluarlugilluunniit, iluatsinnatilli.
13. Kristusip qanoq ’Daavip matuersaataa’ atorpaa?
13 Kristusip ’Daavip matuersaataa’ pigaa taamaalillunilu Guutip naalagaaffiata soqutigisai tamaasa uppertullu siulersornissaat akisussaaffigalugit. (Esaja 22:22; Lukasi 1:32) Matuersaat tamanna atorpaa kristumiut Filadelfiamiittut allamiittullu periarfissanut immikkullu pisinnaatitaaffinnut ammaallugit. 1919-imiilli „pilittaasoq ilumoorlunilu silatooq“ ’matumik’, assortuisut kikkulluunniit unitsissinnaanngisaannik, ammaappaa Guutip naalagaaffianik sullissilersillugu. (1 Korinthimiut 16:9; Kolossemiut 4:2-4) Soorunami Guutip naalagaaffianut atatillugu immikkut pisinnaatitaaffiit ’Saatanip ilagiissaanut’ matoqqapput, taakku anersaakkut Israelikkuunngimmata.
14. (a) Filadelfiami ilagiit Jiisusip sumik neriorsorpai? (b) ’Ulluni misilinneqarfiusuni’ qanoq ililluta nakkaannarnaveersaarsinnaavugut?
14 Filadelfiami kristumiut Jiisusip ima neriorsorpai: „Nikallujuissuseq pillugu oqaatsikka paarigakkit uangattaaq paariumaarpakkit ullussani misilinneqarfiusuni nunarsuarmut tamarmut nalliuttussani nunarsuarmi najugaqartut misilinneqarfissaanni.“ Oqaluussinermi Jiisusip nikallujuissimaneratut nikallujuittariaqarpugut. Taanna akeqqanut nakkaannarsimanngisaannarpoq Ataatamili piumasaatut iliortuaannarluni. Taamaattumik qilammi toqujuitsutut makitinneqarpoq. Jehova pallorfiginiarlugu aalajangernerput aalajangiusimajuarutsigu Guutillu naalagaaffia tapersersortuarutsigu nutaarsiassaq nuannersoq oqaluussissutigalugu, ’ulluni misilinneqarfiusuni’ maannakkut inuuffigisatsinni nakkaannassanngilagut. Pigisavut Kristusimit tunniunneqartut aalajangiusimajuarniarpavut Guutip naalagaaffiata soqutigisaanik siuarsaaniartuarnitsigut. Tamanna kinguneqassaaq tanitanut qilammi erlinnartumik niaqoruserneqarnermik suleqataannullu ilumoorfiginnittunut nunarsuarmi inuunermik naassaanngitsumik.
15. ’Guutip naalaffiani sukarsuanngortussat’ sumik piumaffigineqarpat?
15 Jiisusi nangippoq: „Ajugaasoq Guutip naalaffiani sukarsuanngortikkumaarpara, . . . tassungalu allakkumaarpakka Guutima aqqa, Guutima illoqarfiata Jerusalemip nutaap qilammit uanga Guutinnit aqqarumaartup aqqa, uangalu atera nutaaq.“ Nakkutilliisut tanitat pallorfiginninneq ilumoortoq tapersersortariaqarpaat. ’Jerusalemimi nutaami’ innuttanngorsinnaanerminnik attasiinnartariaqarput Guutip naalagaaffianik oqaluussinermikkut anersaakkullu minguitsuujuarnermikkut. Naalaffimmi qilammiittumi naalannartumi sukarsuanngorumagunik, Guutillu illoqarfiata aqqanik taagorneqarsinnaassagunik innuttaasutut qilammiusutut, Kristusillu aqqanik taagorneqarsinnaassagunik taassuma nuliassaatut tamanna pisariaqarpoq. Soorunami aamma ’siuteqartariaqarput anersaap ilagiinnut oqaaserisaanik tusartunik’.
Laodikeami inngilimut
16. Illoqarfik Laodikea qanoq oqaatigineqarsinnaava?
16 Laodikeami ilagiit imminnut naammagisimaartut Jiisusip naveerpai. (Saqqummersitat 3:14-22 atuaruk.) Illoqarfik kuussuup Lykosip qooruani naggorissumiippoq, Efesosimit 150 kilometerit missiliorlugit kangisinnerusumi. Niuerfiullunilu suliffissuaqarfiullunilu pigissaartuuvoq aningaaseriveqarfiullunilu ulapaarfiusoq. Savat qernertut tamatuma eqqaaneersut meqquinit atisaliat ilisimaneqarluarput. Illoqarfimmi aamma nakorsanngornianut ilinniarfeqarpoq tusaamasaasumik, tamaanilu Frygiamiut sequtsigaannik taaneqartartunik isinut nakorsaasiortoqartarunarpoq. Nakorsaanermut guuti Asklepiosi tassaavoq illoqarfiup guutiisa pingaarnersaasa ilaat. Illoqarfimmi juuterpassuaqarunarpoq, ilaallu pisorsuugunarput.
17. Sooq Laodikeamiut naveerneqarpat?
17 Laodikeami ilagiit ’inngiliat’ aqqutigalugu Jiisusip ’nalunaajaasutut ilumoortutut sallusuitsutullu Guutip pinngortitaasa pilerfiattut’ oqartussaassuseqarluni oqaluppoq. (Kolossemiut 1:13-16) Ilagiit naveerneqarput anersaakkut ’nilleratillu kissannginnamik’. Akunnattuupput, taamaattumillu Jiisusip qanerminit oriarumaarpai. Assersuut taanna Laodikeamiut paasiuminaatsittussaanngilaat. Laodikeamut ungasinngitsumi Hierapolisimi kissartunik puilasoqarpoq, Kolossemilu imeq nillertuuvoq. Laodikeami puilasoqanngimmat imermut aqqusiortoqartariaqarpoq, aqqutaalu ungasiarmat imeq anngukkaangami akunnassisimasassagunarpoq. Ilaatigut imeq imermut aqqutiliatigoortarpoq, Laodikeamulli qaninnerusumi ujaqqat issoqqaarisut katitigaasut qeqqisigut qillerlugit putusat imermut aqqusiarneqartarput.
18, 19. Ullumikkut kristumiut Laodikeamiut ikiorneqarnerattut qanoq ikiorneqarsinnaappat?
18 Ullumikkut Laodikeamiusut ittut imertut kissartutut kajumissinartuunatilluunniit imertut nillertutut inuummarissinartuunngillat. Imertut akunnattutut oriarneqarput. Jiisusip taakku oqaaseqartitarerusunngilai, ’Kristusi sinnerlugu oqariartortitatut’ tanitatut. (2 Korinthimiut 5:20) Allamik isumataanngikkunik Naalagaaffimmik oqaluussisartutut immikkut pisinnaatitaaffitsik annaasussaavaat. Laodikeamiut nunap piisigut pisuunngorusuttuupput, ’naluaallu tassaallutik inukuluit, nallinnartut, piitsut, tappiitsut tamaqanngitsullu’. Ullumikkut taakkutut ittut tamarmik anersaakkut piitsuujunnaarniarlutik, tappiitsuujunnaarniarlutik tamaqanngitsuujunnaarniarlutillu Kristusimit ’pisiarisariaqarpaat’ upperneq misiligaasoq ’kuultitut innermik akuiakkatut’ ittoq, naapertuilluassuseq ’atisatut qaqortutut’ ittoq aammalu ’isinut tarnutissaq’ anersaakkut takunnissinnaanerulersitsisoq. Nakkutilliisut kristumiut nuannaarlutik taakku ikiorusussavaat anersaakkut pisariaqartitaqarnerminnik miserratiginnikkunnaarnissaannik ’uppernikkut pisuunngorsinnaaniassammata’. (Jaaku 2:5; Matthæusi 5:3) Nakkutilliisut aamma taakku ikiortariaqarpaat anersaakkut ’isinut tarnummik’ atuinissaannik — Jiisusip ajoqersuutaanik, siunnersuutaanik maligassiaanillu ilassinninnissaannik maleruaanissannillu, Jiisusitullu isiginnittaaseqalernissaannik. Tamanna ’uinngup pilerigisaanut, isit pilerigisaannut nunallu piinik usorsisimaaruteqarnermut’ nakorsaataavoq. — 1 Johannesi 2:15-17.
19 Jiisusip asasani tamaasa oqaaqqissaartarlugillu perorsartarpai. Nakkutilliisut taassumannga oqaasissaqarfigineqartut aamma taamatut iliorfigisariaqarpaat qajassuussillutilli. (Apustilit Suliaat 20:28, 29) Laodikeamiut ’ilungersortariaqarput allamillu isumataartariaqarlutik’; eqqarsariaasertik inooriaasertillu allanngortittariaqarpaat. Ilaqarpugut Guutimut illernartumik kiffartornerminnik inuunerminni pingaartitsivallaarunnaarlutik inooriaasiliutiinnarlugu sungiussisimasunik? Taamaappat ’Jiisusimit isinut tarnummik’ pisiniarlit Guutip naalagaaffiata salliutinneqarnissaata pingaaruteqarneranik takunnissinnaajumallutik. — Matthæusi 6:33.
20, 21. Ullumikkut kikkut Jiisusimit kasuttorfigineqaraangamik isertittarpaat, sunalu qilanaarisinnaavaat?
20 „Takuat,“ Jiisusi oqarpoq, „matup killingani qeqarpunga kasuttorlungalu, nipinnik tusartoqarpat mappiussisoqarlunilu taanna iserfigiumaarpara, taava uanga taannalu nereqatigiikkumaarpugut.“ Arlaleriaqaluni Jiisusi qaaqqusaagaangami nerinerminni ajoqersuisarpoq. (Lukasi 5:29-39; 7:36-50; 14:1-24) Maanna ilagiinnut Laodikeamiittutut ittunut kasuttorpoq. Ilagiinnut ilaasortaasut mappiutissanerpaat, taassumunnga asannileqqissanerlutik, iseqqussanerlugu ajoqersuitissanerlugulu? Taamaaliorpata Jiisusip nerersuaqatigissavai, taakkununnga anersaakkut iluaqutaangaartumik.
21 ’Savat allat’ ullumikkut Jiisusi assersuutaasumik iseqquaat, tamannalu inuunermik naassaanngitsumik kinguneqassaaq. (Johannesi 10:16; Matthæusi 25:34-40, 46) Tanitat ajugaasut tamaasa Jiisusip issiavissaarsuarmini ’issiavissikkumaarpai, soorlu nammineq ajugaasimasoq Ataataminilu issiavissilluni issiavissaarsuani’. Aap, Jiisusip tanitat ajugaasut nuanningaartumik akilerumaarlugit neriorsorpai, qilammi Ataatap talerpiata tungaani issiavissaarsuarni issiaqatigissagaanni. Aamma ’savat allat’ ajugaasut naalagaaffiata naalakkersuinerani nunarsuarmi inuunissamik akilerneqarnissartik qilanaarisinnaavaat.
Tamatsinnut ilinniutissat
22, 23. (a) Kristumiut tamarmik Jiisusip ilagiinnut arfineq-marlunnut oqaasii qanoq iluaqutigisinnaavaat? (b) Suna aalajangiusimasariaqarparput?
22 Qularutissaanngilaq kristumiut tamarmik Jiisusip ilagiinnut arfineq-marlunnut Asiaaqqamiittunut oqaasiinik eqqumaffiginninnertik iluaqutigingaassagaat. Utoqqaanertat kristumiut asannittut assersuutigalugu Jiisusip nersualaarilluni oqaasii malugisinnaavaat inunnillu ataasiakkaanik ilagiinnillu anersaakkut ingerlalluartunik nersualaarinissaminnut kajumissisinneqarlutik. Sanngiitsoqaraangat taakkua Biibilimi maleruagassanik maleruaanissaannik ikiorsinnaavaat. Tamatta Jiisusip ilagiinnut arfineq-marlunnut siunnersuutaasa ilaat iluaqutigisinnaavavut, soorunalimi qinunikkut kinguartitserinata taamaaliortariaqarpugut. *
23 Ulluni kingullerni makkunani imminut naammagisimaarnermut, nunap piinik pingaartitsivallaarnermut allanulluunniit uagutsinnik Guutimut assersuutaannaasumik kiffartulersitsisinnaasunut piffissaanngilaq. Taamaattumik ilagiit tamarmik qaamatitsiuarlit qullilerfittut inigisaminnit peerneqartussaanngitsutut. Qanortoq kristumiutut aalajaatsutut Kristusi oqalukkaangat tusarnaarnissarput anersaallu oqaasiinik eqqumaffiginninnissarput aalajangiusimajuartigu. Taamaaliorutta Guutip ataqqinaatissaanik qaammaqqusersuisutut nuannaartuarsinnaassaagut. (wE 5/15 03)
[Quppernerup ataani ilanngussaq]
^ imm. 22 Saqqummersitat 2:1–3:22 aamma atuakkami Åbenbaringen — Det store klimaks er nær!-imi kapitali 7-13-imi, Jehovap Nalunaajaasuinit saqqummersinneqartumi, nassuiarneqarpoq.
Qanoq akissavit?
• „Arnaq Jezabeli“ kinaava, sunalu pillugu arnat Guutimik mianerinnittut ilaarusunngilaat?
• Sardesimi pissutsit qanoq ittuuppat, qanorlu iliorsinnaavugut kristumiut tassaniittut ilarpassuisut ikkumanata?
• Jiisusip Filadelfiami ilagiit sunik neriorsorpai, neriorsuutaalu ullumikkut qanoq atuuppat?
• Sooq Laodikeamiut naveerneqarpat, kristumiullu ilungersortut suna qilanaarisinnaavaat?
[Atuaqqissaarnermi apeqqutit]
[Qupp. 26-mi assiliartaq]
’Arnap Jezabelip’ iliuusii ajortut ingalassimaneqartariaqarput
[Qupp. 28-mi assiliartat]
Jiisusip ajoqersukkani ’matumik’ ammaappai Guutip naalagaaffianik sullissilersillugit
[Qupp. 30-mi assiliartaq]
Jiisusi isertittarpiuk tusarnaartarlugulu?