Guutimut suna apeqqutigerusuppiuk?

AMERLANERIT inuuneq pillugu tunngaviusunik apeqqutissaqarput. Aamma illit taamaappit? Inuppassuit palasimut aperiartortarput, naammaginartunilli akissutisineq ajorput. Ilaasa apeqqutit namminneq eqqarsaatigiuartarpaat. Ilaat Guutimut akeqqullutik qinusarput. Guutimulli apeqqutit akitinneqarsinnaappat? Apeqqutit tulliuttut inuit Guutimut apeqqutigerusuttagaasa ilagaat.

Kinaavinuna, Guuti?

Inuit Guuti pillugu isumaat kulturiannit angajoqqaavisalu upperisaannit sunnertissimasarput, immaqalu namminneq isumaannut naleqqussagaallutik. Ilaasa Guuti ateqartittarpaat; allat Guutimik taaguinnartarpaat. Tamanna apeqqutaava? Ataatsimik — ataasiinnarmillu — Guuteqarpa, uatsinnut kinaassutsiminik atiminillu ilisarititsisumik?

Silarsuarmi sooq taama naalliuttoqartigaa?

Imminut noqissinnaanani imaluunniit inuunerlukkajulluni inuusimalluni peqqikkunnaarsimagaanni imaluunniit aningaasaqarniarnikkut ajornartorsiuteqalersimagaanni, immaqa naammagittaallioqqajaanartarpoq — nalunarnerli ajorpoq sooq naalliulluni.

Inuppassuilli namminneq pisuussutiginngisaminnik naalliupput. Ilaat katsorsavinneqarsinnaanngitsumik nappaateqarput; allat ilaquttatik ineqartinniarlugit naammattunillu nerisassaqartinniarlugit ilungersulussinnarput. Millionillit pinerlunnermit, sorsunnermit, nakuusernernit, ajunaarnersuarnit naqisimaneqarnermilluunniit eqqugaasarput.

Paasinarpoq inuppassuit ima aperisarmata: ’Sooq tamakkorpassuit akueriinnarneqarpat? Sooq naalliunneq taama annertutigisoq Guutip akueraa?’

 Inuunerup suna siunertaraa?

Inuppassuit taama aperisarput inuuneq imaqanngitsoq qatsukkaangamikku. Aamma inuit uppertut millionillit isumaqartarput inuit ataasiakkaat inuunerat annerusumik minnerusumilluunniit Guutimit aalajangersarneqartartoq. Tamanna ilumoorpa? Guutip ilumut tamatta immikkut siunertaqarfigippatigut, iluassagaluaqaaq siunertaa nalunngikkaanni, ilaa?

Nunarsuarmi atuagarpassuit akornanni atuagaq ataaseq nassuitsumik Guutimit isumassarsiaasutut imminut saqqummiuppoq. Atuagaq taanna atuakkanit allanit oqaatsinut amerlanerujussuarnut naqiterneqarsimavoq. Aammami atuakkap Guutip inunnut tamanut oqariartuutaanik imallip taamaannissaa ilimagineqarsinnaavoq, ilaa? Atuagaq taanna tassaavoq Biibili. Tassani Guutip qilammik nunamillu Pinngortitsisup nammineerluni kinaanini qanorlu ateqarnini saqqummersippaa. Aqqa nalunngiliuk? Pissusii Biibilimi qanoq oqaatigineqarnersut nalunngiliuk? Guuti immikkut tamatsinnit qanoq ilimasunnersoq pillugu Biibilimi oqaatigineqartut nalunngiligit?

[Suminngaanneernerat]

COVER: Chad Ehlers/Index Stock Photography

Qaqqaq: Chad Ehlers/Index Stock Photography