Kristusip ilagiit oqaluffigai
Kristusip ilagiit oqaluffigai
„Ima oqarpoq taanna ullorissanik arfineq-marlunnik talerpimminik tigumiartoq.“ — SAQQUMMERSITAT 2:1.
1, 2. Sooq Jiisusip Asiaaqqami ilagiinnut arfineq-marlunnut oqaasii soqutigisariaqarpavut?
JEHOVAP ernitua Jiisusi Kristusi ilagiit kristumiut niaqoraat. Ilagiit ajoqersukkani tanitat ’ippinnaateqanngittuaqqullugit simernitannguaqanngittuaqqullugillu’ Kristusip niaquulluni siulersortarpai nersualaarlugit oqaaqqissaarlugillu. (Efesosimiut 5:21-27) Taamaaliorneranut assersuutissaqarpoq Saqqummersitat kapitali 2-mi 3-milu, taakkunani Jiisusip ilagiinnut arfineq-marlunnut Asiaaqqamiittunut tusarliussai kimittuut asannittullu allanneqarsimammata.
2 Jiisusip ilagiinnut arfineq-marlunnut oqaasii suli tusarnagit apustili Johannesi ’Naalakkap ullua’ pillugu takorruuisinneqarpoq. (Saqqummersitat 1:10) ’Ulloq’ taanna aallartippoq 1914-imi naalagaaffik Missiarsikkoortoq pilersinneqarmat. Taamaattumik Jiisusip ilagiinnut taakkununnga oqaasii ulluni kingullerni makkunani pingaaruteqarluinnarput. Qiimmassaanera siunnersuineralu ulluni ernumanartorsiorfiusuni inuuffigisatsinni qanoq iliortariaqarnitta paasinissaanut iluaqutigaavut. — 2 Timotheusi 3:1-5.
3. „Ullorissat“, „inngilit“ aamma „qullilerfiit arfineq-marluk kuultiusut“ apustili Johannesip takorruugai sunut assersuutaappat?
3 Johannesip Jiisusi Kristusi naalannarsisitaasoq, „ullorissanik arfineq-marlunnik talerpimminik tigumiartoq“ „qullilerfiillu arfineq-marluk kuultiusut [tassa ilagiit arfineq-marluk] akornanni angalaartoq“, takuaa. „Ullorissat“ taakku tassaapput „ilagiissoqatigiit arfineq-marluk inngilii“. (Saqqummersitat 1:20; 2:1) Ullorissat ilaannikkut inngilinut piviusunut assersuutitut atorneqartarput, Kristusilli pinngortitanut anersaajusunut tusarliussassanik inuk allatsinnavianngilaa. Taamaattumik „ullorissat“ nakkutilliisuusimassapput utoqqaanertaqatigiiusimassallutilluunniit tanitat. ’Inngilinik’ taaneqarput aallartitaagamik. Jehovap Nalunaajaasui amerliartuinnarmata ’pilittaasoq ilumoortoq’ aamma ’savanut allanut’ ilaasunik angutinik piukkunnaatilinnik nakkutilliisussanik toqqaavoq. — Lukasi 12:42-44; Johannesi 10:16.
4. Kristusip ilagiinnut oqaasiinik eqqumaffiginninnertik utoqqaanertat qanoq iluaqutigaat?
4 Jiisusip „ullorissat“ talerpimminik tigumiarai tassa imaappoq pissaaneqarfigalugillu oqartussaaffigigai aamma taassuma iluarinninnera illersuineralu iluaqutigilluaraat. Taamaattumik taakku taassumunnga akisussaapput. Ilagiinnut arfineq-marlunnut tusarliussat takutippaat ullumikkut utoqqaanertat pissutsit assingugaangata qanoq iliortariaqarnersut. Kristumiulli tamarmik soorunami tusarnaartariaqarput Guutip ernera oqalukkaangat. (Markusi 9:7) Qanormi ilinniarfigisinnaagatsigit Kristusip ilagiinnut oqaasii?
Efesosimi inngilimut
5. Illoqarfik Efesosi qanoq ittuua?
5 Jiisusip Efesosimi ilagiit nersualaarlugillu oqaaqqissaarpai. (Saqqummersitat 2:1-7 atuaruk.) Illoqarfik taanna Asiaaqqap kitaata sineriaaniittoq niuerfiuvoq pisoorsuaq upperisarsiornikkullu qitiulluni guutimut arnamut Artemisimut naalaffissualik. Illoqarfik taanna kanngunartuliortunik, eqqunngitsumik upperisarsiortunik siulittuiniartartunillu ulikkaarpoq, Guutilli apustili Paulusip kristumiullu allat tassani kiffartornerat pilluaqquaa. — Apustilit Suliaat, kapitali 19.
6. Ullumikkut kristumiut ilumoortut qanoq Efesosimi ilagiittut ippat?
6 Kristusip Efesosimi ilagiit nersualaarpai ima oqarluni: „Ilisimavakka suliatit assoroornerillu nikallujuissutsillu nalunagulu ajortut akaarinngilluinnaritit misilissimagitillu imminnik apustiliunerartut taamaattuunatilli, paasisimallugulu salluliortut.“ Ullumikkuttaaq ilagiit Jiisusip ajoqersugaasa ilumoortut ajunngitsuliornerit, suleruloorneq nikallujuissuserlu tusaamassaassutigaat. Qatanngutaaqqusersut apustilisut isigineqarusuttut akuerinngilaat. (2 Korinthimiut 11:13, 26) Efesosimiutut kristumiut ilumoortut ullumikkut ’ajortut akaarinngilluinnarpaat’. Taamaattumik Jehovamik pallorfiginninneq minguitsuutittuarniarlugu ilagiillu illersorniarlugit tunussisut peqqissiminngitsut saannianngitsullu nigorsimaniartarpaat. — Galatiamiut 2:4, 5; 2 Johannesi 8-11.
7, 8. Efesosimi ilagiit sumik ilungersunartumik ajornartorsiuteqarpat, tamatumunngalu assingusumik uagut qanoq ajornartorsiuteqalersinnaavugut, qanorlu ajugaaffigisinnaavarput?
7 Efesosimili kristumiut ilungersunartumik ajornartorsiuteqarput. „Kisianni assuaraakkit asannissutsit siulleq soraarukkakku,“ Jiisusi oqarpoq. Jehovamut asanninnermissut siullertut asannileqqittariaqarput. (Markusi 12:28-30; Efesosimiut 2:4; 5:1, 2) Uaguttaaq mianersortariaqarpugut Guutimut asannissuserput siulleq annaajumanagu. (3 Johannesi 3) Inuunitsinnili nunap piisigut pisuujorusunneq nuannaarniutillu aliikkusersornerillu pingaaruteqarnerujartuinnalissappata qanoq iliussaagut? (1 Timotheusi 4:8; 6:9, 10) Taamaappat qamannga pisumik Guuti qinnuigisariaqarparput ikioqqulluta kissaatit taamaattut ajugaaffigiumallugit Jehovamullu asanningaarnermik qujamasunnermillu taassuma erneratalu uatsinnut iliuuserisimasai tamaasa pillugit taarserumallugit. — 1 Johannesi 4:10, 16.
8 Jiisusip Efesosimiut ima kajumissaarpai: „Taamaattumik eqqaamaniaruk sumit nakkartutit, allamik isumataarit, suliatillu siulliit suliarikkit.“ Taamaaliunngippata qanoq pisoqassava? „Taamaaliunngikkuit saassutissavakkit,“ Jiisusi oqarpoq, „qullilerfiillu inaanit nuukkumaarpara allamik isumataanngikkuit.“ Savat tamarmik asannissusertik siulleq annaagaluarpassuk ’qullilerfeqarunnaassagaluarpoq’, imaluunniit ilageeqarunnaassagaluarpoq. Taamaattumik kristumiutut aallussilluartutut ilagiit anersaakkut qaamanerannik qaamatitsiuarnissarput qanortoq eqiasuilluta sulissutigisigu! — Matthæusi 5:14-16.
9. Immikkoorniarneq qanoq isigisariaqarparput?
9 Efesosimiut nersualaarneqarput ’Nikolaikkut suliaat uumissoramikkik’. Saqqummersitat-ni allassimasut saniatigut immikkut upperusiortut taakkua aallaaviannik, ajoqersuutaannik suliaannilluunniit ilisimannittoqanngilaq. Jiisusilli inunnik malinninneq assuarimmagu uaguttaaq immikkoorniarneq uumigisariaqarparput, Efesosimi kristumiut iliorsimanerattut. — Matthæusi 23:10.
10. Anersaap oqaaserisaanik eqqumaffiginnittut suna misigiumaarpaat?
10 „Siuteqartup tusarligit Anersaap ilagiinnut oqaaserisai,“ Jiisusi oqarpoq. Nunarsuarmiikkami Guutip anersaavanit sunnerneqarluni oqaluttarpoq. (Esaja 61:1; Lukasi 4:16-21) Taamaattumik Guutip anersaaq illernartoq atorlugu taanna aqqutigalugu maanna oqaasii eqqumaffigisariaqarpavut. Anersaamit tamatumannga siulersorneqarluni Jiisusi ima neriorsuivoq: „Ajugaasoq nerisassikkumaarpara orpimmit inuunartumit Guutip Paratiisianiittumit.“ Tanitanut anersaap oqaaserisaanik eqqumaffiginnittunut tamanna isumaqarpoq ’Guutip Paratiisiani’ qilammiittumi toqujuissuseqarumaartut, Guutip eqqaani. ’Amerlangaartut’, aamma anersaap oqaaserisaanik eqqumaffiginnittut, nunarsuarmi paratiisissami inuuneq nuannaarutigiumaarpaat, tassanilu ’kuussuarmit inuussutaasumik imilimmit’ imerumaarput kuussuullu sinaani ’orpiit inuunartut pilutaat’ katsorsaatigalugit. — Saqqummersitat 7:9; 22:1, 2, NV; Lukasi 23:43.
11. Qanoq Jehovamut asanninneq salliutissinnaavarput?
11 Efesosimiut asannissusertik siulleq annaavaat. Ullumikkut ilagiinni tamatumunnga assingusumik pisoqarpat qanoq iliussaagut? Tamatta immikkut Jehovamut asanninneq salliutissinnaavarput uagutsinnut assigiinngitsorpassuartigut asannittuliortarsimaneri asannittuliortuarnerilu eqqartortarlugit. Assersuutigalugu ernini asasani atorlugu utertitsissummik pilersitsinermigut asanninnerminik ersersitsinera qujamasuutigalugu oqaatigisinnaavarput. (Johannesi 3:16; Romamiut 5:8) Naleqqukkaangat ataatsimiinnerni akinitsinni pisassaqarnitsinnilu Guutip asanninnera eqqaasarsinnaavarput, namminerlu Jehovamut asanninnerput takutissinnaavarput kristumiutut kiffartornitsinni aqqa unnersiutigalugu. (Tussiaat 145:10-13) Aap, oqaatsitsigut suliatsigullu ilagiit asanninnermissut siullertut asannileqqullugit asanninnerallu nakussatsinniarlugu iliuuseqangaarsinnaavugut.
Smyrnami inngilimut
12. Oqaluttuarisaanermit Smyrna tassanilu upperisarsiorneq pillugit suut paasivavut?
12 Smyrnami ilagiit nersualaarneqarput Kristusimit, ’siulliullunilu kingulliusumit, toqusimagaluarluni uummartumit’, makititaasumit. (Saqqummersitat 2:8-11 atuaruk.) Smyrna (maanna Izmir Tyrkiamiittoq) Asiaaqqap kitaata sineriaaniippoq. Grækerinit illoqarfik tunngavilerneqarsimavoq najugaqarfigineqarlunilu, Lydiamiunilli ukiup 580-ip missaani u.n.s. aserorneqarpoq. Alexanderersuup kingoraartaasa illoqarfik sumiiffimmi allami sanaqqippaat. Romamiut pigisaannut Asiamut ilaalerpoq niuerfiullualerlunilu pisortat illuutaannik alutornangaartunik tusaamasaassutilik. Kaasarimut Tiberiusimut naalaffeqarpoq taamaalillunilu kaasarisiornermut qitiulerluni. Tassani pallorfiginnittut tipigissaatilliilaartussaapput oqartussaallutillu: „Kaasari Naalagaavoq“. Kristumiut soorunami taamaaliorsinnaanngillat, tassami taakkununnga ’Jiisusi Naalagaavoq’. Taamaattumik annikilliortitaasarput. — Romamiut 10:9.
13. Sutigut Smyrnami kristumiut pisoorsuuppat naak nunap piisigut piitsuugaluarlutik?
13 Smyrnami kristumiut annikilliornerit saniatigut aamma piitsuuneq atortariaqarpaat, immaqa aningaasatigut atugarliortinneqartaramik kaasarisiornermi peqataajumannginnertik pissutigalugu. Ullumikkut Jehovap kiffai assingusunik annikilliortinneqartarput. (Saqqummersitat 13:16, 17) Naalli taakku — Smyrnami kristumiut pisimanerattut — nunap piisigut piitsuugaluarlutik anersaakkut pisoorsuupput, tamannalu pingaaruteqarnerpaavoq. — Ussatit 10:22; 3 Johannesi 2.
14, 15. Tanitat qanoq Saqqummersitat 2:10 tuppallersaatigisinnaavaat?
14 Smyrnami juutit amerlanerit ’Saatanip ilagiissaanik’ taaneqarput inuit kingornussarsiaat aalajangiukkamikkik, Guutip ernera ajattorlugu ajoqersugaalu anersaakkut ernerineqartut mitallerlugit. (Romamiut 2:28, 29) Tanitalli Jiisusip oqaasii tulliuttut tuppallersaatigingaarsinnaavaat: „Naalliunnissatit sioorageqinagit, Diaavulup ilasi parnaarussivimmut pisikkumaarpai misilinneqaqqullusi, naalliunnartorsiussaasilu ulluni qulini. Toqumut allaat ilumoorit, taava ajugaasumut niaqorusiussassaq inuussutaasoq ilinnut tunniukkumaarpara.“ — Saqqummersitat 2:10.
15 Jiisusip Jehovap kisimi oqartussaaneranik tapersersuilluni toqutaanissani siooraginngilaa. (Filippimiut 2:5-8) Naallu Saatani ullumikkut Kristusip kingornusseqataasa tanitat sinnerinut sorsukkaluartoq, taakkuattaaq eqimattatut naalliutinneqarnissartik — annikilliortinneqarnissartik, parnaarunneqarnissartik toqutaanissartilluunniit — siooraginngilaat. (Saqqummersitat 12:17) Silarsuarmut ajugaajumaarput. Aamma Guutimik nalusut unamminerini ajugaasunut niaqorusiunneqartartumik toquliortartumik niaqorusernagit Kristusip tanitat ajugaasumut niaqorusiussassamik inuussutaasumik neriorsorpai, qilammi anersaatut toqujuitsutut inuunissamut makitinneqarpata. Tunissutisiassap nalissaqanngilluinnassusia!
16. Akerleriissut suna eqqumaffigisariaqarparput ilagiit attavigisavut itsaq Smyrnamiusut ippata?
16 Qilammi nunamiluunniit inuunissamik neriuuteqaraluarutta, manna apeqqutaavoq qanoq iliorsinnaanersugut ilagiit attavigisavut itsaq Smyrnamiusut ippata. Taamaappat uppeqativut Jehovap malersugaanermik akuerinninneranut pissutiviusumik paasitinniarlugit ikiorsinnaavavut — tassa qilammi nunamilu kisimi oqartussaanera pillugu akerleriissummik. Jehovap Nalunaajaasuisa assuarnaassutsiminnik aalajangiussisut tamarmik uppernarsarpaat Saatani sallutuujusoq aamma allaat malersorneqaraluarluni Guutip qilammi nunamilu kisimi oqartussaalluni naalakkersuisussaviuneranik aalajaalluni illersuisoqarsinnaasoq. (Ussatit 27:11) Kristumiut allat kajumissaarniartigik malersorneqarneq naammagalugu atoqqullugu taamaalillutik immikkut pisinnaatitaaffik ’ersiornatik [Jehovamut] kiffartorneq upperluarlutik iluartuullutillu kiinnata saani ullussatik naallugit’ peqataaffigeqqullugu — aap, naassaanngitsumik. — Lukasi 1:68, 69, 74, 75.
Pergamonimi inngilimut
17, 18. Guutipilussiornermut qanoq ittumut Pergamoni qitiua, tamatumunngalu peqataajumanngikkaanni qanoq kinguneqarsinnaava?
17 Pergamonimi ilagiit nersualaarneqarlutillu oqaaqqissaarneqarput. (Saqqummersitat 2:12-17 atuaruk.) Illoqarfik Smyrnamit 80 kilometerit missaanni avannarpasinneruvoq guutimillu nalusut upperisarsiorneranni pingaaruteqarluni. Kaldæamiut angakkuartartui (ullorissat najoqqutaralugit siulittuisartut) Babylonimit tassunga qimaasimassagunarput. Napparsimasorpassuit Asklepiosimut, grækerit nakorsaanermut nakorsaatinullu guutiannut, naalaffigitinneqartumut tusaamasaasumukaasarput. Pergamoni, Romamiut kaasariannik pallorfiginniffiusumik naalaffilik, taaneqarsimavoq ’Romamiut naalagaaffiata aallartinnerani kaasarisiornermut qitiusoq pingaarnerpaaq’. — Encyclopædia Britannica, 1959, atuagaq 17, qupperneq 507.
18 Pergamonimi pilliiveqarpoq guutimut Zeusimut pigitinneqartumik. Illoqarfik aamma inunnik guutinngortitsinermut, ileqqumut Diaavulumit isumassarsiaritinneqartumut, qitiuvoq. Taamaattumik tupinnanngilaq ilagiit ’Saatanip issiavissaarsuata inigisaaniittutut’ oqaatigineqarmat. Kaasari pallorfigiumanngikkaanni Jehovap qilammi nunamilu kisimi oqartussaaneranik tapersersuisumut toqutaanermik kinguneqarsinnaavoq. Ullumikkut silarsuaq Diaavulup suli pissaaneqarfigaa, inuiaassutsimullu ilisarnaatit guutipiluttut ataqqineqartarput. (1 Johannesi 5:19) Ukiut hundredellit siulliit nalaanniilli manna tikillugu kristumiut amerlasuut martyrisut toqutaasimapput, Antipasitut, Jiisusimit ’nalunaajaasiga ilumoortoq najukkassinni toqutaasoq’-mik taaneqartutut. Jehova Guutip Jiisusi Kristusillu kiffat ilumoorfiginnittut taamaattut eqqaamajumaarpaat. — 1 Johannesi 5:21.
19. Bileami qanoq iliorpa, kristumiullu tamarmik suna mianersuutigisariaqarpaat?
19 Jiisusip aamma ’Bileamip ajoqersuutaa’ eqqaavaa. Nunap piisigut iluanaarniarumatuulluni pruffiitioqqusersup Bileamip Israelikkut perloqquniaraluarpai. Guutip perloqqusineq pilluaqqusaaninngortimmagu Bileamip Moabikkut kunngiat Balaki Israelikkunnik amerlasuunik guutipilussiornermut kinguaassiuutitigullu inuunerlunnermut tammartitsisippaa. Utoqqaanertat kristumiut Pinehasitut, Bileamip isumassarsiaanik ajortumik akuliuffiginninnermigut naapertuilluassusermik atortitsisutut, aalajaatsigisariaqarput. (4 Mosesi 22:1–25:15; 2 Petrusi 2:15, 16; Judasi 11) Aap, kristumiut tamarmik mianersortariaqarput guutipilussiorneq kinguaassiuutitigullu inuunerlunneq ilagiinnut eqqunneqaqqunagit. — Judasi 3, 4.
20. Tunussisutut eqqarsaateqartalersoq qanoq iliortariaqarpa?
20 Ilagiit taakku navianartorsiungaarput „Nikolaikkut ajoqersuutaannik aalajangiussisunik“ ilaqaramik. Kristusip ilagiit oqarfigai: „Taamaattumik allamik isumataarit! Taamaaliunngikkuit pakasarlutit saassutissavakkit panalu qanermiora sakkugalugu taakku sorsuffigalugit.“ Immikkut upperusiorlutik ilagiinni avissaartuutsitsisut uppeqatitik anersaakkut ajoqusingaarpaat Guutillu naalagaaffianik kingornusseqataassanatik. (Romamiut 16:17, 18; 1 Korinthimiut 1:10; Galatiamiut 5:19-21) Kristumiu tunussisutut eqqarsaateqartaleruni tamakkulu siaruartilerlugit, Kristusip mianersoqqussutaa maleruartariaqarpaa. Suujunnaarsitaassanngikkuni allamik isumataartariaqarpoq ilagiinnilu utoqqaanertanut ikiortissarsiorluni. (Jaaku 5:13-18) Erniinnaq qanoq iliuuseqartariaqarpoq, Jiisusimi eqqartuussutini naammassiartorlugu piaartumik takkutissaaq.
21, 22. Kikkut ’mannamik isertugaasumik’ nereqqusaappat, tamannalu sumut assersuutaava?
21 Kristumiut tanitat aalajaatsut suleqataasalu ilumoorfiginnittut eqqartuussinissaq siooragisariaqanngilaat. Jiisusip siunnersuutaanik, Guutip anersaavata illernartup siulersuineratigut tunniunneqartunik, eqqumaffiginnittut tamarmik pilluaqquneqangaassapput. Assersuutigalugu tanitat silarsuarmut ajugaasut „mannap isertugaasup ilaanik“ neriartoqquneqassapput aamma „ujaqqamik qaqortumik“ „atermik nutaamik“ kigartuiffigisimasumik tunineqassallutik.
22 Jehovap Israelikkut ukiuni 40-ni inoqajuitsumiinneranni mannamik inuussutigisaannik pilersorpai. ’Timiusat’ tamakkua ilaat qummuattamut kuultiusumut ikillugit angerutsip illerfianiitinneqarput taamaalillutillu tupermi illernarnerpaami, tupinnartuliornikkut Jehovap najuunneranut assersuutaasumik qaamasoqarfiusumi, ’isertugaallutik’. (2 Mosesi 16:14, 15, 23, 26, 33; 26:34; Hebræerit 9:3, 4) Mannamik isertugaasumik taassuminnga kinaluunniit nereqquneqanngilaq. Jiisusilli ajoqersugai tanitat makitinneqarunik toqujuissusermik atisitinneqassapput, ’mannamillu isertugaasumik’ nerinerat tamatumunnga assersuutaavoq. — 1 Korinthimiut 15:53-57.
23. ’Ujaraq qaqortoq’ aamma ’ateq nutaaq’ qanoq isumaqarpat?
23 Romamiut eqqartuussiviini eqqartuussut nalunaarutigineqaraangat, ujarak qernertoq isumaqarpoq unnerluutigineqartoq pisuutinneqartoq, ujarallu qaqortoq isumaqarpoq pinngitsuutinneqartoq. Jiisusip kristumiut tanitat ajugaasut „ujaqqamik qaqortumik“ tunimmagit, isumaqarpoq pisuussuteqanngitsutut, minguitsutut, isigigai. Romamiut aamma ujarannguit pisunut pingaarutilinnut isersinnaanissamut uppernarsaatitut atortarsimavaat, taamaattumillu ujaraq qaqortoq aamma isumaqarsinnaavoq tanitat qilammi Savaaqqap katinnerani inissaqartitaasut. (Saqqummersitat 19:7-9) ’Ateq nutaaq’ ujaqqami allassimasoq isumaqarunarpoq tanitat naalagaaffimmut qilammiittumut Jiisusimut kingornusseqataasutut taanna ataasioqatigileraat. Tamakku tamarmik tanitanut suleqataannullu nunarsuarmi paratiisimi inuunissamik neriugisalinnut qiimmassaataangaarput.
24. Tunussineq eqqarsaatigalugu qanoq iliortariaqarpugut?
24 Eqqaamasariaqarparput Pergamonimi ilagiit tunussisunit navianartorsiortinneqangaartut. Ullumikkut ilagiit anersaakkut peqqissusiat taamatut navianartorsiortinneqarpat, tunussinerit tamaasa itigartinniartigik sallusuissummilu saqiuarluta. (Johannesi 8:32, 44; 3 Johannesi 4) Ajoqersuisooqqusersut tunussisunulluunniit isumaqataasut ilagiit tamaat ajortunngortissinnaammassuk, tunussineq akiorniarlugu aalajangiulluinnartariaqarparput sallusuissummullu naalannginnissatsinnut sumulluunniit akuersiinnarnata. — Galatiamiut 5:7-12; 2 Johannesi 8-11.
25. Tusarliussat suut allaaserisami tullermi sammineqassappat?
25 Maanna Jiisusi Kristusip naalannarsisitaasup Asiaaqqami ilagiit arfineq-marluk ilaannut pingasunut oqaaserisai sammereerpavut. Ilagiit nersualaarneqarlutillu siunnersorneqarput, tamannalu eqqarsariaallannarpoq. Jiisusili — suli anersaamit illernartumit siulersorneqarluni — aamma ilagiinnut allanut sisamanut oqaasissarpassuaqarpoq. Tassa Thyatiramut, Sardesimut, Filadelfiamut Laodikeamullu tusarliussat, tamakkulu allaaserisami tullermi sammineqassapput.
Qanoq akissavit?
• Sooq Jiisusip ilagiinnut oqaasii eqqumaffigisariaqarpavut?
• Ilagiit qanoq ikiorsinnaavavut asanninnermissut siullertut asannileqqullugit?
• Itsaq Smyrnami kristumiut nunap piisigut piitsuugaluarlutik sutigut pisoorsuuppat?
• Pergamonimi ilagiinni kristumiuni pissutsit eqqarsaatigalugit tunussineq qanoq isigisariaqarparput?
[Atuaqqissaarnermi apeqqutit]
[Qupp. 20-mi nunap assinga]
(Allassimasut qanoq inissisimanersut naqitami takuneqarsinnaavoq)
GRÆKERIT NUNAAT
ASIAARAQ
Efesosi
Smyrna
Pergamoni
Thyatira
Sardesi
Filadelfia
Laodikea
[Qupp. 22-mi assiliartaq]
’Amerlangaartut’ nunarsuarmi paratiisimi inuujumaarput
[Qupp. 23-mi assiliartaq]
Kristumiut malersorneqartut silarsuarmut ajugaapput