Sumi piviusumik tuppallersaatissarsisoqarsinnaava?
Sumi piviusumik tuppallersaatissarsisoqarsinnaava?
’Guuti Naalakkatta Jiisusi-Kristusip Ataataa . . . annikilliuuteqarnitsinni tamani uatsinnik tuppallersaasarpoq.’ — 2 KORINTHIMIUT 1:3, 4.
1. Pissutsini qanoq ittuni inuppassuit tuppallersarneqarnissartik pisariaqartingaartarpaat?
ILUNGERSUNARTUMIK nappaateqarneq inummut neriuutaarutsitsisinnaavoq. Nunap sajunnerata, anorersuarujussuartarnerata kaannersuaqarneratalu inuit suutaarutsissinnaavaat. Sorsunnerni ilaqutaasut toqutaasinnaapput, inuillu angerlarsimaffeerussinnaapput qimaasariaqalerlutilluunniit. Naapertuilluanngitsuliornerit inuppassuarnik ikiortissarsiorfissaaruttutut misigititsisarput. Alianartunik taamaattunik nalaataqartut tuppallersarneqarnissaq pisariaqartingaarpaat. Sumili tuppallersaatissaqarpa?
2. Sooq Jehovap tuppallersaanera immikkorluinnaq ittuua?
2 Inuppassuit peqatigiiffippassuillu sapinngisartik tamaat ikiuiniartarput tuppallersaaniartarlutillu. Soorunami inussiarnersuuneq pingaartinneqangaarpoq, timikkullu ikiuiniarneq maannakkorpiaq pisariaqartitanik matussuseeqataasarpoq. Jehovali, Guuti ilumoortutuaq, kisimi ajoqusiinernik tamanik aaqqiilluinnarsinnaavoq ajunaartoqaqqinngisaannarnissaalu isumagisinnaallugu. Taanna pillugu Biibilimi ima allassimavoq: „Unnersiutigineqarli Guuti Naalakkatta Jiisusi-Kristusip Ataataa, Ataataq nallittuisoq Guutilu tuppallersaajuartoq, annikilliuuteqarnitsinni tamani uatsinnik tuppallersaasartoq annikilliuuteqartut tamaasa uatsinnut tuppallersarsinnaaqqullugit Guutip uatsinnut tuppallersaatigisaanik.“ (2 Korinthimiut 1:3, 4) Jehovap qanoq tuppallersartarpaatigut?
Ajussutsip sorlaa peerneqassaaq
3. Sooq Guutip tuppallersaanera inuit tuppallersaanerannit ajunnginnerua?
3 Adamip ajortuliornera pissutigalugu naammalluinnanngissuseq inunnut tamanut kingornutsitaavoq. Tamatuma kingunerisaanik ajornartorsiuterpassuaqarpoq naggataatigut toqussutaasussanik. (Romamiut 5:12) Pissutsillu suli ajornerulerput Saatani Diaavulu ’silarsuup matuma naalagarimmagu’. (Johannesi 12:31; 1 Johannesi 5:19) Qujanartumik Jehovap inuit alianartunik atugaqarnerannik aliasuutiginninnini ersersiinnanngilaa. Aniguisinniarluta ernituani aallartippaa utertitsissutissatut, ilisimatippaatigullu Jiisusi upperigutsigu Adamip ajortuliaata sunniutaanit aniguisitaasinnaasugut. (Johannesi 3:16; 1 Johannesi 4:10) Aammattaaq Guutip siumut nalunaarutigaa Jiisusi Kristusip, qilammi nunamilu tamanut oqartussaatitaasup, Saatani pissutsinillu aaqqissuussinera ajortoq tamaat piuneerutissagai. — Matthæusi 28:18; 1 Johannesi 3:8; Saqqummersitat 6:2; 20:10.
4. (a) Aniguisitaanissaq pillugu neriorsuutiminik tatiginninnerulersinniarluta Jehova qanoq iliorpa? (b) Aniguisitaaneq qaqugu pissanersoq paaseqqullugu Jehovap qanoq ikiorpaatigut?
4 Guutip neriorsuutaanik tatiginnissinnaaqqulluta siulittuutimi tamarmik eqquuttarnerannik uppernarsaatinik naammattunik pilersitsivoq. (Josva 23:14) Kiffaminik inuit isaanni neriuutissaqanngilluinnartutut ittunik atugaqartunik qanoq aniguisitsisarnini pillugu oqaluttuanik Biibilimi allatsitsivoq. (2 Mosesi 14:4-31; 2 Kunngit 18:13–19:37) Jiisusi Kristusilu aqqutigalugu Guutip takutippaa aamma siunertarigini inuit ’anniaatinit tamanit’ ajorunnaarsinnissaat allaallu toqusut makitinnissaat. (Matthæusi 9:35; 11:3-6) Tamakku tamarmik qaqugu pissappat? Tamanna akissutissarsisinnaavarput pissutsit aaqqissuussaanerata ajortup, Guutip qilaata nutaap nunaatalu nutaap atulivinnissaat tikillugu atasussap, naggatissaa pillugu Jiisusip oqaasiini. Oqaatsit taakku piffissamut uagut inuuffigisatsinnut naleqqulluinnartuupput. — Matthæusi 24:3-14; 2 Timotheusi 3:1-5.
Jehovap innuttani tuppallersartarpai
5. Jehovap Israelikkut tuppallersarniarlugit suut malugeqquai?
5 Jehova itsaq Israelikkunnut qanoq iliortartoq misissoraangatsigu annikilliortunik qanoq tuppallersaasartoq paasisarparput. Israelikkut eqqaasippai Guutitut qanoq ittuunerluni, tamannalu neriorsuutaanik tatiginninnerulissutigaat. Jehovap pruffiitini takorlooruminartunik allatsippai nammineq, Guutitut ilumoortutut uumasutullu, guutipiluillu imminnut pallorfiginnitsiminnillu ikiuisinnaanngitsut assigiinngissutaannik. (Esaja 41:10; 46:1; Jeremia 10:2-15) Jehova Esaja aqqutigalugu ima oqarpoq: „Tuppallersarsigit innuttakka, tuppallersarsigit!“ Tuppallersaatissatut pruffiiti assersuusiortippaa oqaluttuartillugulu pinngortitarsuaq Guutitut ilumoortutuatut angingaassutsiminik ersersitsisoq pillugu. — Esaja 40:1-31.
6. Israelikkut atugarlioraangata ilaannikkut Jehovap siumut qanoq oqaluttuuttarpai?
6 Arlaleriarluni Jehovap kiffani tuppallersarpai nakussatsillugillu oqaluttuullugit qaqugu atugarliuutiminnit aniguisitaassasut, sivikitsumik sivisuumilluunniit utaqqissanersut. Israelikkut naqisimaneqartut Egyptenimit aniguisitaalermata Guutip ima oqarfigai: „Suli perluk ataaseq Faraomut Egyptenimiunullu nalliutitissavara, tamatumalu kingorna tamaannga aallarnissarsi akueriumaarpaa.“ (2 Mosesi 11:1) Kunngi Joshafatip nalaani inuiaat perullulioqatigiinniat pingasut Judamut isaammata, Jehovap Judakkut oqarfigai iluaqutissaannik „aqagu“ akuliunniarluni. (2 Nalunaarsuutit 20:1-4, 14-17) Israelikkut Babylonimit aniguisitaanerat allaat sioqquterujussuarlugu siulittuutigineqarpoq. Ukiut 200-ngajaat sioqqullugu Jehovap Esajamut siulittuutigitippaa; aniguisitaanerlu ukiunik 100-ngajannik sioqqullugu Jeremiap annikitsualuit allat ilannguppai. Siulittuutit tamakku Guutip kiffaasa aniguisitaanissartik qanilliartortillugu qiimmassaatigingaarpaat. — Esaja 44:26–45:3; Jeremia 25:11-14.
7. Aniguisitaanissaq pillugu neriorsuutinut suut ilaagajuppat, tamannalu Israelimi inunnut uppertunut qanoq sunniuteqarpa?
7 Maluginiarnartuuvoq neriorsuutit Guutip innuttaasa tuppalliutigisartagaat Missiarsi pillugu paasissutissartaqarajummata. (Esaja 53:1-12) Tamanna kinguaariikkuutaani inuit uppertut aalajaatsullu misilinneqaraangamik neriuutissarsiffigisarpaat. Lukasi 2:25-mi ima allassimavoq: „Jerusalemimi anguteqarpoq Simmiuumik atilimmik; taanna iluartuuvoq upperluartuulluni, Israelimullu tuppalliutissamik pisoqarnissaa [tassa: Missiarsip tikiunnissaa] utaqqisaraa. Anersaamit Illernartumit ilumiulerneqarsimavoq.“ Simmiuup Missiarsi pillugu neriuut Allakkani allassimasoq nalunngilaa, eqquunnissaanillu qilanaarinninnera inuuneranut tamarmut aalajangiisuuvoq. Suut tamarmik qanoq piviusunngussasut naluaa, inuutillugulu annaanneqarnissamik neriorsuutit piviusunngunngillat, nuannaarutigaali takullugu Guutip ’annaassissutissaa’. — Lukasi 2:30.
Kristusi aqqutigalugu tuppallersaat
8. Jiisusip ikiuinera qanoq ittuua, inuppassuit pisariaqartissorisaannut sanilliullugu?
8 Jiisusi Kristusi nunami kiffartortilluni ikiuigaangami inuit namminneq pisariaqartissorisaattut tamatigut iliortanngilaq. Ilaasa Missiarsiusussaq Romamiut qunutitsinerannit uumigisaminnit aniguisitsisussaq erinigaat. Jiisusili pikitsitsinissamik illersuisuunngilaq; inuit ilinniartippai ’kaasari tunisassagaat kaasarip piinik’. (Matthæusi 22:21) Guutip siunertaa politikkikkut aqutsinermit naqisimannittumit aniguisitaanerinnaaqqajanngilaq. Inuit Jiisusi kunnginngortinniarpaat, oqarporli tikiulluni „inuunini akissatut tunniutissallugu amerlasuut utertinneqaatissaattut“. (Matthæusi 20:28; Johannesi 6:15) Kunngiunissaanut suli piffissanngunngilaq, aammattaarlu naalakkersuisutut oqartussaassusiliisussaq tassaavoq Jehova, tassaanatik inuppassuit naammagittaatsut.
9. (a) Tusarliussaq tuppallernartoq suna Jiisusip oqaluussissutigaa? (b) Jiisusip qanoq takutippaa tusarliussaq pissutsinut inuit atugaannut attuumassuteqartoq? (c) Jiisusip suna tunngavilerpaa?
9 Jiisusip tuppallersaatigisaa ’Guutip naalagaaffianik iivangkiiliumut’ attuumassuteqarluinnarpoq, nutaarsiassarlu tamannarpiaq sumiikkaluaraangamiluunniit oqaluussissutigisarpaa. (Lukasi 4:43) Ersersittarpaa tusarliussaq taanna inuit inuunerannut qanoq attuumassuteqarnersoq naalagaaffimmi Missiarsikkoortumi kunngiuleruni inuiannut qanoq iliornissaminik qilanaartuuserlugit. Napparsimasut inoorusussuseqalersittarpai isigisinnaalerseqqillugit oqalussinnaalerseqqillugillu (Matthæusi 12:22; Markusi 10:51, 52), nukillaarsimanerannik ajorunnaarsillugit (Markusi 2:3-12), nappaataannillu maajunnartunit minguiarlugit (Lukasi 5:12, 13) naalliuutinillu allanit ilungersunartunit aniguisillugit. (Markusi 5:25-29) Ilaqutariit aliasuttut tuppallersingaartarpai qitornaat toqusunit makitillugit. (Lukasi 7:11-15; 8:49-56) Takutippaattaaq pinngortitami nukerujussuit aqussinnaallugit inuppassuillu nerisassaqartissinnaallugit. (Markusi 4:37-41; 8:2-9) Aamma Jiisusip inuit inuunerminni najoqqutassaannik tunivai ajornartorsiutiminnik aaqqiilluarnerusinnaaqqullugit, Missiarsillu ataani naapertuilluartumik aqutsinissaq pillugu uummatit neriuuteqangaalersillugit. Taamaalilluni Jiisusi kiffartornermini upperlutik tusarnaartunuinnaanngitsoq tuppallersaavoq, aammattaaq ukiuni tusindilikkuutaani tulliuttuni inuusussat tuppallersarneqarnissaat nakussatsinneqarnissaallu tunngavilerpaa.
10. Jiisusip pilliuteqarneratigut suut ajornarunnaarpat?
10 Jiisusip inuunerminik pilliutiginnereerneraniit qilammullu makititaareerneraniit ukiut 60-it sinnerlugit qaangiuttut apustili Johannesi isumassarsisitaalluni ima allappoq: „Qitornakka, tamakkuninnga allaffigaassi ajortulioqqunasi. Ajortuliortoqassappalli illersortissaqarpugut Ataatami, tassa Jiisusi-Kristusimik iluartuusumik; taannalu pilliutaavoq saammaannartitsissut uaguinnaanngitsut silarsuulli ajortai tamaasa pillugit.“ (1 Johannesi 2:1, 2) Jiisusip pilliutaata naammalluinnartup uagutsinnut ajunngitsorsiassaqartitsinera eqqarsaatigalugu tuppalliutigingaarparput. Nalunngilarput ajortuliatsinnik isumakkeerfigineqarsinnaalluta, ilerasuutaarussinnaalluta, Guutimut iluarisaasumik attaveqalersinnaalluta inuunerlu naassaanngitsoq neriuutigilersinnaallugu. — Johannesi 14:6; Romamiut 6:23; Hebræerit 9:24-28; 1 Petrusi 3:21.
Anersaaq illernartoq tuppallersaasutut
11. Tuppallersaat alla suna Jiisusip apustiliminut neriorsuutigaa?
11 Jiisusip aqagumut toqusussaalluni apustilini ilagigamigit oqaluttuuppai Ataatami qilammiusup allatut aamma tuppallersarumaarai. Ima oqarpoq: „Ataataq qinnuigiumaarpara, tuniumaarpaasilu illersuisussamik [tuppallersaasussamik; grækerisut: paraʹkletos] allamik naassaanngitsumik ilissinniittussamik. Taanna tassaassaaq sallusuissutsip anersaava.“ Jiisusillu ima neriorsoqqissaarpai: „Illersuisup, Anersaap Illernartup, Ataatap uanga atinni aallartitassaata tamanik ajoqersussavaasi ilissinnullu oqaaserisannik tamanik eqqaasikkumaarlusi.“ (Johannesi 14:16, 17, 26) Anersaaq illernartoq apustilinut qanoq ’tuppallersaasuua’?
12. Anersaaq illernartoq piugallartillugu inuppassuit qanoq tuppallersarneqarpat?
12 Apustilit Jiisusimit ilinniartitaalluarput. Soorunami misigisartik taanna puiunngisaannassavaat, Jiisusili qanorpiaq oqarnersoq eqqaamasinnaassavaat? Imaluunniit siunnersuut pingaarutilik naammalluinnanngitsumik eqqaamannissinnaanerat pissutigalugu annaariataarneqarsinnaassava? Jiisusip apustilit neriorsoqqissaarpai anersaaq illernartup ’oqaaserisaminik tamanik eqqaasikkumaarai’. Taamaattumik Jiisusip toquneranit ukiut arfineq-pingasut missaat qaangiuttut Matthæusip allassinnaavaa iivangkiiliu siulleq. Iivangkiiliumilu tassaniipput Jiisusip qaqqami oqaluusaa nuannersoq, Naalagaaffimmik assersuusiarpassui najuunnissaanullu nalunaaqutaasussat sukumiisut. Ukiullu 50-it sinnerlugit qaangiutereersut apustili Johannesip allassinnaasimavai Jiisusip nunami inuunerani ullualuit kingulliit pillugit oqaluttuat tatigineqarsinnaasut sukumiisullu. Oqaluttuat taakku isumassarsiarititaasut nalerput tikivillugu qiimmaallannangaarsimapput!
13. Kristumiunut siullernut anersaaq illernartoq qanoq ilinniartitsisuua?
13 Anersaaq illernartup ajoqersukkat Jiisusip oqaasiinik eqqaamatiinnanngilai, aammattaarli ilinniartippai Guutillu siunertaanik paasinninnerulersillugit. Jiisusip ajoqersukkani suli najortillugit oqaluttuuppai taamanikkut paasilluanngisaannik. Kingusinnerusukkulli Johannesi, Petrusi, Jaaku, Judasi Paulusilu anersaaq illernartumit siulersorneqarlutik allakkaminni nassuiarpaat Guutip siunertaa qanoq piviusunngoriartornersoq. Taamaalilluni anersaaq illernartoq ilinniartitsisuuvoq ajoqersukkat Guutimit siulersorneqarnerannik qularunnaarsitsisoq.
14. Anersaaq illernartup Jehovap innuttai sutigut ikiortarpai?
14 Tupinnartuliornikkut anersaap tunissutai aamma uppernarsaataapput maanna Guutimit iluarisaalersut tassaasut ilagiit kristumiut, tassaajunnaarlutik uinikkut Israeli. (Hebræerit 2:4) Inuit ataasiakkaat anersaap tamatuma inerititaanik inerititaqarnerat aamma uppernarsaataavoq pingaarutilik taakku Jiisusip ajoqersugarigai ilumoortut. (Johannesi 13:35; Galatiamiut 5:22-24) Anersaap aamma ilagiinniittut nakussatsittarpai nakimaallutik siooranatillu nalunaajaanissaannut. — Apustilit Suliaat 4:31.
Ingasaassisumik tatineqangaarnermi ikiorneqarneq
15. (a) Kristumiut qanga ullumikkullu qanoq tatineqartarsimappat? (b) Sooq allanik qiimmassaasuttaaq ilaatigut tuppallersarneqartariaqartarpat?
15 Jehovamut tunniulluinnarsimasut, tassungalu ilumoorfiginnittut, tamarmik arlaatigut akerlilersorneqartarput. (2 Timotheusi 3:12) Kristumiorpassuilli ingasaassisumik tatineqangaarsimapput. Ilaat nalitsinni asseqanngilluinnartumik naalliutsinneqarlutik inupalaanit malersorneqarput tigusanullu inissarsuarniitinneqarlutik, parnaarunneqarlutik pinngitsaaliissummilluunniit sulisitsivinniitinneqarlutik. Naalakkersuisut malersueqataasimapput, inatsisaatsuliortullu pillarnagit piumasaannik iliorsinnaatippaat. Aammattaaq kristumiut ilaat ilungersunartumik nappaateqarput ilaqutariinniluunniit ajornartorsiungaarlutik. Allat tatineqangaartutut misigisinnaasut tassaapput kristumiut inersimalluartut uppeqaterpassuarminnik ajornartorsiutilinnik ikiuiartartut. Pissutsini taamaattuni tuppallersaasoq nammineq tuppallersarneqarnissamik pisariaqartitsilersinnaavoq.
16. Daavi qanga tatineqangaarpa, qanorlu ikiorneqarpa?
16 Daavi kunngi Saulimit toqunniarneqarami Guutimut ikioqquvoq. „Tusaaniaruk qinnutiga, Guuti,“ kimigiiserpoq. „Suluit alanngigaanni qimarnguffissarsiorpunga.“ (Tussiaat 54:4, 6; 57:2) Daavi ikiorneqarpa? Aap, ikiorneqarpoq. Tamatuma nalaani Jehovap pruffiiti Gadi palasilu Ebjatari Daavimut siunnersuisuutippai, Saulillu ernera Jonatani aqqutigalugu angut inuusuttoq taanna Jehovap nakussatsippaa. (1 Samueli 22:1, 5; 23:9-13, 16-18) Aammattaaq Jehovap akueraa filisterit saassusseriataarnerat Sauli Daavimik malersuinerminik unitsitsisariaqalersillugu. — 1 Samueli 23:27, 28.
17. Jiisusi tatineqangaarfimmini sumut ikiortissarsiorpa?
17 Aammattaaq Jiisusi Kristusi nunami inuunini naangajalersoq nammineq tatineqangaarpoq. Nalunngilluinnarpaa iliornini Ataatami qilammiusup aqqanut qanoq sunniuteqarsinnaasoq, nalunngilaalu inuiaat siunissaannut qanoq kinguneqarsinnaasoq. Qamannga pisumik qinuvoq allaallu ’toqumut annilaangaarnermut pilluni’. Guutilli isumagaa Jiisusip ajornartorsiorfimmi tamatumani pisariaqartitaatut annertoqqusernissaa. — Lúkarse 22:41-44.
18. Kristumiut siulliit malersorneqangaartut Guutip qanoq tuppallersarpai?
18 Ukiuni hundredelinni siullerni ilagiit kristumiut pilersinneqarnerisa kingorna malersuisoqangaalerpoq. Kristumiut tamarmik apustilit kisimik pinnatik Jerusalemimit siammatitaapput. Arnat angutillu pinngitsaalillugit angerlarsimaffiannit peersinneqarput. Guutip qanoq tuppallersarpai? Oqaatsimini uppernarsaavigai ’ajunnginnerusumik aserortussaanngitsumillu pisuussuteqartut’, tassa qilanni kingornussassaq qularnaatsoq Kristusi kingornusseqatigalugu kingornutassaat. (Hebræerit 10:34; Efesosimiut 1:18-20) Oqaluussinertik ingerlattuartillugu Guutip anersaavata najoraatik uppernarsivaat, misigisaasalu nuannaarnissamut pissutissaqarnerulersippaat. — Matthæusi 5:11, 12; Apustilit Suliaat 8:1-40.
19. Paulusi qanoq atugarlioraluarluni Guutimit tuppallersarneqartutut misigiva?
19 Saulusi (Paulusi), malersuisuusimasoq nakuusertartoq, kristumiunngornini pissutigalugu piffissap ingerlanerani nammineq malersorneqartalerpoq. Paulusi kiffartorunnaarsinniarlugu qeqertami Cypernimi angakkuartartoq salluliorpoq peqquserlullunilu. Galatiamilu ujaqqanik milloorneqarpoq toqusorineqarnissami tungaanut. (Apustilit Suliaat 13:8-10; 14:19) Makedoniami anaatamik unatarneqarpoq. (Apustilit Suliaat 16:22, 23) Efesosimi inupalaanit saassunneqareerluni ima allappoq: „Nanertugaanerput sualungaarmat saperluinnaleraluarpugut, inuuginnarnissarput nikalluukkaluarlugu allaat. Imminummi isumaqarfigisimagaluarpugut toqutassanngortitaareersutut.“ (2 Korinthimiut 1:8, 9) Paulusilli allakkamini taakkunani aamma allappai oqaatsit tuppallernartut allaaserisami matumani immikkoortoq 2-mi issuarneqartut. — 2 Korinthimiut 1:3, 4.
20. Allaaserisami tullermi suna sammissavarput?
20 Tuppallersarneqarnissamik pisariaqartitsineq qanoq matussuseeqataaffigisinnaaviuk? Ullumikkut inuppassuit alianangaartunik nalaataqartut, inunnik tusindilippassuarnik eqqugaaffiusumi ajunaarnersuarmi eqqugaagaluarunik inuttulluunniit alianartumik nalaataqaraluarunik, tuppallersarneqartariaqarput. Taamaattoqartillugu qanoq tuppallersaasoqarsinnaanersoq allaaserisami tullermi sammissavarput.
Eqqaamavigit?
• Sooq Guutip tuppallersaanera naleqarnerpaava?
• Kristusi aqqutigalugu qanoq tuppallersarneqarpugut?
• Anersaaq illernartoq qanoq tuppallersaasuua?
• Guutip kiffani tatineqangaaraangata tuppallersaasarneranik taasaqarit.
[Atuaqqissaarnermi apeqqutit]
[Qupp. 9-mi assiliartat]
Biibilimi erserpoq Jehovap innuttani aniguisillugit tuppallersartarai
[Qupp. 10-mi assiliartat]
Jiisusip inuit ilinniartillugit, ajorunnaarsillugit toqusunillu makititsilluni tuppallersartarpai
[Qupp. 12-mi assiliartaq]
Jiisusi Guutimit ikiorneqarpoq