Atuartartut apeqqutaat

Inuup eqqarsaatai Saatani Diaavulup atuarsinnaavai?

Saatanip anersaapiluisaluunniit eqqarsaatigut atuarsinnaanngikkaat paasinarpoq, naak tamanna nalorninaatsumik oqaatigineqarsinnaanngikkaluartoq.

Taamatut inernilerparput atit nassuiaasut Saatanimut atorneqartut tunngavigalugit. Saatanimik taaneqarpoq („akerlilersuisoq“), Diaavulu („mamarliisoq“), Pulateriaarsuk (isumaqartoq „salloqittaasoq“), Ussiisoq Sallutoorlu. (Jobi 1:6; Matthæusi 4:3; Johannesi 8:44; 2 Korinthimiut 11:3; Saqqummersitat 12:9) Atit taakku arlaataluunniit ersersinngilaa Saatanip inuup eqqarsaatai atuarsinnaagai.

Tamatuma akerlianik Jehova Guuti allaatigineqarpoq taannaasoq ’uummatinik misiliisartoq’. (Ussatit 17:3; 1 Samueli 16:7; 1 Nalunaarsuutit 29:17) „Pinngortitamik sumilluunniit [Jehovamut] ersinngitsoqanngilaq,“ Hebræerit 4:13-imi allassimavoq, „suut tamarmik isaanut uleersimallutillu saqqumipput. Taannaavorlu iliornivut pillugit akisussaaffigisassarput.“ Tupinnanngitsumik Jehovap ernini Jiisusi Kristusi uummatinik misissuinissamut piginnaassusilersimavaa. Jiisusi makissimasoq oqarpoq: ’Tassaavunga tartunik uummatinillu misissuisoq, tamassilu immikkut tuniumaarpassi suliasi naapertorlugit.’ — Saqqummersitat 2:23.

Biibilimi oqaatigineqanngilaq Saatanip inuit uummatai misissorsinnaanerai. Kisianni apustili Paulusip qularunnaarsippaatigut kristumiut ’nalunngikkaat Saatani qanoq ittunik pilersaaruteqartoq’. (2 Korinthimiut 2:11) Taamaattumik ersissutigisariaqanngilarput Saatanip arlaannik nalusatsinnik immikkut ittumik piginnaassuseqarsinnaanera.

Imaanngilarli Assortortitta sanngiissutsivut ikilertiaffigisavut takusinnaanngikkai. Saatanip inuit pissusiisa misissornissaannut ukiut hundredellit piffissarisimavai. Eqqarsaativut atuarsinnaasariaqanngilai pissusilersornerput takuniarlugu, aliikkutarerusunnerusavut maluginiarlugit, oqaluuserisavulluunniit tusaaniarlugit ilaalu ilanngullugit. Kiinnatta isikkuatigut pissusitsigullu qanoq eqqarsarnersugut misiginersugullu tikkuussisinnaavoq.

Kisianni amerlanertigut Saatanip Edenip naatsiiviani peqqusersusaarluni pissaanermik atuinermisut iliortarpoq — sallu, peqquserlunneq eqqunngitsunillu paasissutissiineq atorlugit. (1 Mosesi 3:1-5) Kisianni naak Saatanip eqqarsaatitsinnik atuarsinnaanissaa ersigisariaqanngikkaluarlugu, pissutissaqarluarpugut aarleqqutigissallugu Saatanip sunik eqqarsaatississinnaaneraatigut. Kissaatigaa ’silatusaallaqqissuujunnaassasugut’ aamma ’sallusuissummik pigisaarutissasugut’. (1 Timotheusi 6:5) Taamaattumik tupinnanngilaq Saatanip silarsuaa paasissutissarpassuarnik aliikkutassanillu ajortunik pisiassaqartitsimmat. Ajortumik sunniineq taanna akiorniarlugu kristumiut isumartik illersorniarlugu ’niaqorornaveeqqusertariaqarput annassummik’. (Efesosimiut 6:17) Taamaaliussapput Biibilimi sallusuissutsinik isumartik immerlugu Saatanillu silarsuaa akaarnaatsoq sunniineralu ajortoq pisariaqanngitsumik attaviginaveersaarlugu.

Saatani akeravissuuvoq. Kisianni taanna anersaapiluiluunniit siooragisariaqanngilavut. Jaaku 4:7-imi neriorsoqqissaarneqarpugut: „Diaavulu akerartorsiuk, taava ilissinnit qimaassaaq.“ Siunnersuut taanna malikkutsigu Jiisusitut oqarsinnaassaagut Saatanip susinnaanngikkaatigut. — Johannesi 14:30.  (wE 6/15 03)