„Erseqinasi, sapiissuseeruteqinasilu“

„Erseqinasi, sapiissuseeruteqinasilu [imaluunniit: annilaangarujussuaqinasilu, NV]. . . . [Jehovap] najorumaarpaasi.“ — 2 NALUNAARSUUTIT 20:17.

1. Peqqarniisaarneq inunnut qanoq sunniuteqartarpa, aamma sooq annilaanganerat paasinarpa?

PEQQARNIISAARNEQ! Oqaaseq immini annilaangalersitsisarpoq inuillu toqqissisimajunnaartittarlugit ikiortissaaruttutullu misigitittarlugit. Siooralersitsisinnaavoq, aliasulersitsisinnaalluni kamalersitsisinnaallunilu. Aamma innuttaaqatigiinnik ukiorpassuarni tulliuttuni perlussiortitsisinnaanera inuppassuarnit annilaangassutigineqarpoq. Nunat ilaanni peqqarniisaarniarnermik ukiorpassuarni akiuiniarneq iluatsitsiffiuallaarsimanngitsoq annilaanganerulersitseqqiinnarpoq.

2. Jehovap Nalunaajaasuisa peqqarniisaarnerup ajornartorsiutaanera qanoq qisuariarfigisarpaat, suullu apeqqutaalerpat?

² Taamaattoq siunissamut isumalluarnissamut pissutissaqarluarpoq. Jehovap Nalunaajaasui, nunani nunarsuarmilu sumiiffinni 234-ni oqaluussisartut, maluginiarnartumik isumalluartuupput. Peqqarniisaarnerup ajugaaffigineqanngisaannarnissaa annilaanngatiginagu, upperilluinnarpaat qanittukkut ajugaaffigineqarumaartoq. Isumalluaqatiginissaat piviusorsiornerussava? Kia silarsuaq perlummit tamatumannga qaqugumulluunniit aniguisissinnaassavaa, qanorlu taamaaliortoqarsinnaava? Ilimanarmat tamatta nakuusernermit arlaatigut sunnerneqarsimassasugut, pitsaassaaq  misissussallugu sooq ilaat taama isumalluartigisinnaasut.

3. Suut annilaangatitsisarpat, nalerpullu pillugu qanoq siulittuuteqarpa?

³ Ullumikkut inuit ersissutissarpassuaqarput, aap, immaqa allaat annilaangarujussuarnissaminnut pissutissarpassuaqarlutik. Eqqarsaatigikkit utoqqarsuunertik pissutigalugu nammineersinnaajunnaartorpassuit, katsorsarneqarsinnaanngitsumik nappaateqarnerup kingunerisaanik sanngiilliartuinnartorpassuit, ilaqutariippassuillu inuussutissaqarniarlutik naammattusaariuartariaqartut. Inuuneq immini nalorninartuuvoq. Immaqa misigisoqarpoq sumi tamaani ajunaartoqariaannaasoq ajunaarnersuaqariaannaasorlu toqussutaasunik aseruutaasunillu, aap, pingaartitaminnik tamanik suujunnaarsitsisumik. Annilaanganeq taamaattoq isumakuluutillu taamaattut tamaasa, inuttullu aaqqiagiinnginnerit pakatsinerillu misigisartakkavut, apustili Paulusip eqqoqqissaartumik ima allaatigai: „Ilisimassavat ullussani kingullerni nalliukkumaarmata ullut atugarliungaarfissat. Taamanikkussamimi inuit tassaalerumaarput namminissarsiortut, . . . asanniuitsut, saammartitassaanngitsut, mamarliisut, naammatsiuitsut, qiningasut, ajunngitsunut akeraasut.“ — 2 Timotheusi 3:1-3.

4. Timotheusimut allakkat aappaat 3:1-3-mi allaaserineqartut avaanngunartut suna isumalluarnartortaraat?

⁴ Allassimaffimmi tassani allaaserineqartut avaanngunaraluarput, aammattaarli siunissamut neriuutissippaatigut. Malugiuk ullut atugarliungaarfiusut taakku Saatanip ullumikkut pissutsinik aaqqissuussinerata ajortup ’ullussaanut kingullernut’ ilisarnaataassasut. Tassa imaappoq ikiorneqarnissaq qanillivoq, silarsuarlu ajortoq manna Guutip naalagaaffianik, naalagaaffimmik Jiisusip ajoqersukkaminut qinnutigeqqusaanik, taarserneqangajalerpoq. (Matthæusi 6:9, 10) Naalagaaffik naammalluinnartoq taanna tassaavoq Guutip qilammi naalakkersuisui, ‘qaqugumulluunniit atasussat’. Pruffiiti Danieli naapertorlugu naalagaaffiup taassuma „kunngeqarfiit allat [inuit pilersitaat] tamaasa aserortissavai suujunnaarsillugillu, namminerli soraajuitsumik atassaaq“. — Danieli 2:44.

Peqqarniisaarneq kristumiutullu kalluunnaveersaarneq

5. Peqqarniisaartoqaqqajaanera inuiaat kingullertigut qanoq qisuariarfigaat?

⁵ Ukiuni qulikkuutaani peqqarniisaartoqartarnerani inuit tusindilikkuutaat toqupput. 11. septembari 2001-imi New Yorkip Washingtonillu saassunneqarnerisa kingorna peqqarniisaarnerup ulorianartuunera silarsuarmi tamarmi eqqumaffigineqarneruleriataarpoq. Peqqarniisaarnerup silarsuarmut tamarmut attuinera pissutigalugu nunarsuarmi inuiaat tamatuminnga akiuiniarlutik kattutipallapput. Tusagassiuutini nalunaarutigineqarpoq „Europami, Amerika avannarlermi Asiallu qeqqani nunat 55-it nunanut allanut ministeriisa [4. decembari 2001-imi] tamarmik isumaqatigiissutigigaat pilersaarut“ suliniutinik ataqatigiissitsisussaq. USA-mi naalagaaffimmi atorfikkaap iliuuseqartoqarnera nersualaarpaa oqarlunilu peqqarniisaarnerup akiornera ’nutaanik nukissikkaa’. Tassanngaannaq inuit millionilikkuutaat The New York Times Magazine-mi „sorsunnerup oqaluttuarisaanermi pingaarutillip aallaqqaataanik“ taaneqartumi akuliunneqarput. Suliniuteqarneq qanoq iluatsitsigissanersoq paasinarsiumaarpoq. Peqqarniisaarnerup akiorniarnerata kinguneri inuppassuarnik annilaangatitsipput siooratitsillutillu, Jehovamilli tatiginnittut tamatumannga annilaangatinneqanngillat siooratinneqarnatillu.

6. (a) Jehovap Nalunaajaasuisa kristumiutut kalluunnaveersaartuunerat ilaannikkut sooq paasiuminaatsinneqartarpa? (b) Politikkip tungaatigut Jiisusi ajoqersukkaminut qanoq maligassiuiva?

 ⁶ Ilisimaneqarluarpoq Jehovap Nalunaajaasui politikkikkut kalluunnaveersaartuusut. Tamanna inuit amerlanerit sorsuttoqannginnerani ajorineq ajorpaat, pissutsilli najummassimanarsigaangata inuppassuit akaarinninnginnerulersarput. Sorsuttoqarnerup kingunerisaanik siooraneq nalorninartorsiornerlu inuiaassutsimik pingaartitsisunngortitsigajuppoq. Taamaattumik nalunaajaasuunngitsut paasiuminaatsikkajuppaat inuiaqatigiikkuutaarluni iliuuseqarneq innuttaasunit amerlanernit tapersersorneqartoq sooq inuit ilaannit tapersersorneqarneq ajortoq. Kristumiulli ilumoortut nalunngilaat Jiisusip ‘silarsuarmut ilaannginnissamik’ peqqussutaanut naalannissaq pingaaruteqartoq. (Johannesi 15:19; 17:14-16; 18:36, NV; Jaaku 4:4) Taamaaliussagunik politikkikkut innuttaaqatigiinnullu tunngasunut kalluunnaveersaartuusariaqarput. Jiisusi nammineq maligassiuilluartuuvoq. Naammalluinnartumik ilisimassuseqarnera nalissaqanngitsunillu piginnaaneqarnera eqqarsaatigalugit nalimini innuttaaqatigiinni pitsanngorsaasimasinnaagaluarpoq. Politikkimulli akuliutinngilaq. Kiffartornermi aallaqqaataani Saatanip silarsuarmi naalagaaffinnut naalakkersuisunngornissamik neqeroorutaa nangaanngivilluni itigartippaa. Aammattaaq kingusinnerusukkut politikkikkut atorfinitsinniarneqaraangami itigartitsiuaannarpoq. — Matthæusi 4:8-10; Johannesi 6:14, 15.

7, 8. (a) Jehovap Nalunaajaasuisa politikkikkut kalluunnaveersaartuunerat qanoq paasineqassanngila, aamma sooq? (b) Sooq Romamiunut allakkat 13:1, 2-mi allassimasut eqqarsaatigalugit kristumiut ilumoortut silarsuarmi naalakkersuisunut nakuuserlutik akerliuniartunut peqataasinnaanngillat?

⁷ Jehovap Nalunaajaasuisa kalluunnaveersaartuunerat nakuusernernik tapersersuinerattut isiginninngitsuusaarnerattulluunniit paasineqassanngilaq. Taamaattuugunimmi ‘Guutimut asannittumut eqqissisitsisumullu’ kiffartortuunerarnerannut naapertuutissanngilaq. (2 Korinthimiut 13:11) Jehovap nakuuserneq qanoq misigissuseqarfigigaa ilikkarsimavaat. Tussiaasiortoq ima allappoq: „[Jehovap] iluartoq iluanngitsorlu misissuiffigai, nakuusernermillu nuannarisaqartoq uumigaa.“ (Tussiaat 11:5) Aammattaaq Jiisusip apustili Petrusimut oqaasii eqqumaffigaat: „Panat puuanut manguguk. Panalersortummi tamarmik pannamik toqunneqassapput.“ — Matthæusi 26:52.

⁸ Oqaluttuarisaanermi takuneqarsinnaavoq kristumiut ilumuunngitsut ’panalersorajuttuusut’, Jehovap Nalunaajaasuili taamaattuunngillat. Qanorluunniit ittumik nakuuserneq ajorput. Aammattaaq aalajaallutik Romamiunut allakkat 13:1, 2-mi inassut naalappaat: „Inuit tamarmik naalakkersuisunut qullersarisaminnut [silamiut naalakkersuisuinut] naalatsigitillit, naalakkersuisoqanngimmat Guutimit pilersitaanngitsunik, atuuttuusulli Guutip atulersitarai. Taamaattumik naalakkersuisunut akerlilersuisoq tassaavoq Guutip aaqqissuussineranut assortuisoq, taamaattullu eqqartuunneqaatissarsissapput.“

9. Jehovap Nalunaajaasuisa peqqarniisaarneq sutigut marlutsigut akiorniarpaat?

⁹ Peqqarniisaarnerli taama ajortigimmat, Jehovap Nalunaajaasui akiuiniaqataasariaqannginnerpat? Ilumut, taamaaliortariaqarput, taamaaliorpullu. Siullermik namminneq peqqarniisaarnermut peqataanngisaannassapput. Aappassaanik kristumiunut najoqqutassianik inuit ilinniartittarpaat. * Najoqqutassiat taakku inuit tamarmik malippatigik qanorluunniit ittumik nakuusertoqartarunnaassaaq. Siorna Jehovap Nalunaajaasuisa nalunaaquttap-akunneri 1.202.381.302-t atorlugit kristumiut inooriaasiannik inuit ilinniartippaat. Tamanna asuli piffissaajaataannaanngilaq oqaluussineratami kingunerisaanik inuit 265.469-it Jehovamut nalunaajaasutut kuisipput, taamaalillutillu takutillugu nakuuserneq akueriumanngilluinnarlugu.

10. Silarsuarmi nakuusertuerunnissaa qanoq neriunartigaa?

¹⁰ Aammattaaq Jehovap Nalunaajaasuisa misiutiginngilaat namminneq silarsuaq ajussuseerutsissinnaanagu. Tamanna pissutigalugu taamaaliorsinnaasutuaq,  tassa Jehova Guuti, tatigilluinnarpaat. (Tussiaat 83:19) Inuit ilumoorlutik iliuuseqarnerigaluat nakuusertuerutsitsinngisaannassaaq. Isumassarsisitaalluni Biibilimik allattut ilaata nalerput, ’ullussat kingulliit’, pillugit mianersoqquaatigut ima allalluni: „Inuit ajortut peqquserluttullu ajortumut nakkaakkiartuinnartussaapput, ilaminnik tammartitsillutik imminnullu tammartillutik.“ (2 Timotheusi 3:1, 13) Tamanna eqqarsaatigalugu ilimananngilaq inuit ajussutsimut sorsunnerminni qaqugumulluunniit ajugaanissaat. Akerlianilli tatigisinnaavarput Jehovap qaqugorsuarmut nakuusertuerutsilluinnarnissaa. — Tussiaat 37:1, 2, 9-11; Ussatit 24:19, 20; Esaja 60:18.

Qunusuitsut saassussisoqaqqajaaleraluartoq

11. Nakuusertuerunniarlugu Jehova qanoq iliuuseqareerpa?

¹¹ Eqqissinermut Guutiusup nakuuserneq uumigimmagu paasiuminarpoq sooq nakuusernermut pissutiviusoq, tassa Saatani Diaavulu, peerniarlugu iliuuseqarsimasoq. Aap, inngiliuneq Mikaeli — kunnginngortitani Jiisusi Kristusi — Saatanimut nikanarsaataasumik ajugaatitereerpaa. Biibilimi tamanna ima allaatigineqarpoq: „Qilammi sorsunneqalerpoq. Mikaelip inngiliisalu uumasorujuk saassuppaat, uumasorujullu inngiliilu akiuupput kisianni artorsartitaallutik, qilammilu najugassaarutitaapput. Igitaavoq uumasorujussuaq taanna, pulateriaarsutoqaq Diaavulumik Saatanimillu taaneqartoq silarsuarmik tamarmik tammartitsiniartoq nunamut igitaavoq, inngiliilu taassumunnga ilanngullugit igitaapput.“ — Saqqummersitat 12:7-9.

12, 13. (a) 1914 sooq ukiuua maluginiarnartoq? (b) Guutip naalagaaffianik tapersersuisut pillugit Ezekieli qanoq siulittuiva?

¹² Biibilimi ukiunik naatsorsueriaaseq silarsuarmilu pisut tamarmik takutippaat sorsunneq tamanna 1914-imi pisoq. Taamanikkumiilli silarsuarmi pissutsit ajorsiartuinnarput. Sooq taamaannersoq Saqqummersitat 12:12-imi nassuiarneqarpoq: „Taamaattumik qiimmattaritsi qilaat ilissilu taakkunani ineqartusi! Eqqanarli nuna imarlu Diaavulu ilissinnut aqqarmat kamattorsuulluni, piffissakissutsi nalunnginnamiuk.“

¹³ Diaavulup Guutip kiffai tanitat suleqataallu, ’savat allat’, kamaanneruai. (Johannesi 10:16; Saqqummersitat 12:17) Ungasinngitsukkut akerlilersorneqarnerup tamatuma sakkortunerpaaffissani nallissavaa Saatani Diaavulup, Ezekieli kapitali 38-mi ’Gogi Magogimeersumik’ taaneqartup, naalagaaffimmik Guutip pilersitaanik tapersersuisut tamatuminngalu tatiginnittut tamaasa tamaviaavilluni saassuppagit.

14. Maannamut Jehovap Nalunaajaasui qanoq illersorneqartarpat, taamatullu illersorneqartuassappat?

¹⁴ Saatanip qilammit igitaanerata kingorna Guutip innuttai Saatanimit saassunneqaraangamik naalakkersuisut akuliunneratigut ikiuineratigullu ilaannikkut illersorneqartarput. Tamanna Saqqummersitat 12:15, 16-imi assersuutitigut allaatigineqarpoq. Biibilili naapertorlugu Saatanip naggammik saassuppagit nunami pissaanillit akuliutissanngillat Jehovamillu tatiginnittunik ikiuissanatik. Tamanna kristumiut ersilissutigissavaat annilaangarujussualissutigaluguluunniit? Naamerluinnaq.

15, 16. (a) Joshafatip nalaani Jehovap innuttaminut oqaasii tuppallernartut kristumiut ullumikkut isumalluartuujuarnissaminnut qanoq iluaqutigaat? (b) Joshafati Judakkullu ullumikkut Guutip kiffaanut qanoq maligassiuippat?

¹⁵ Guuti innuttaminik kunngi Joshafatip nalaanisulli  qularnaatsigisumik tapersersuissaaq. Ima allassimavoq: „Naalaaritsi, Judakkut tamassi ilissilu Jerusalemimi najugaqartusi — aamma illit kunngi Joshafati! [Jehova] ilissinnut ima oqarpoq: Erseqinasi, sakkutoorpassuillu taakku annilaarutigeqinasigit ilissi sorsuttussaannginnassi, Guutili sorsuttussaammat. . . . Kisianni tamatumuuna ilissi sorsuttussaassanngilasi. Angutit ilissi Judamit Jerusalemimillu pisut inississimallusi uninngaannarumaarpusi, taava takussavarsi [Jehovap] annaakkaasi, Juda Jerusalemilu. Erseqinasi, sapiissuseeruteqinasilu [imaluunniit: annilaangarujussuaqinasilu, NV]. Aqagu ornikkisigit! [Jehovap] najorumaarpaasi.“ — 2 Nalunaarsuutit 20:15-17.

¹⁶ Judakkut neriorsoqqissaarneqarput akiuuttariaqanngitsut. Guutip kiffai Gogimit Magogimeersumit saassunneqarunik taakkuttaaq imminnut illersorniarlutik sakkulersussanngillat. Aap, ’uninngaannassapput, taava takussavaat [Jehovap] annaakkaatik’. Uninngaannarnissaat soorunami ima isumaqanngilaq iliuuseqanngilluinnassasut. Joshafatip nalaani Guutip innuttai iliuuseqanngilluinnanngillat, imami allassimavoq: „Taava Joshafati nunamut sikippoq, Judakkullu Jerusalemimiullu tamarmik [Jehova] pallorfigaat. . . . Taavalu [Joshafatip] inuit siunersiorpai tussiartartullu [Jehovap] ataqqinangaassusianik illernartumik sorsuttartut siornanni ingerlallutik ima unnersiutiginnittussat inissillugit: ’[Jehova] qutsavigisiuk unneqqarissusia atavoq naassaanngitsumik!’“ (2 Nalunaarsuutit 20:18-21) Aap, allaat akeqqatik siunerminnikkaangata saassunneqariaannaagaangamillu, Jehovamik unnersiutiginnillutik iliuuseqartuarput. Jehovap Nalunaajaasui Gogimit saassunneqarunik taamatut periaaseqartussaapput.

17, 18. (a) Jehovap Nalunaajasui ullumikkut Gogi saassusseqqajaagaluartoq qanoq isumalluartuuppat? (b) Kristumiut inuusuttut qanittukkut sumik eqqaasinneqarpat?

¹⁷ Gogip Guutip innuttaanik saassussinissaata tungaanut, aap, allaat saassussinerata nalaani, Jehovap Nalunaajaasuisa Guutip naalagaaffia tapersersorlugu takutissavaat. Silarsuarmi tamarmi ilagiit 94.600-nit amerlanerusut nukissaminnik aallerfigiuassavaat illersuutissarsiffigiuarlugillu. (Esaja 26:20) Taamaattumik qunusuilluni Jehovamik unnersiutiginninnissamut piffissaavoq! Guutip innuttai Gogip saassussingajalernera ilimagalugu inuugaluarlutik qunulersinneqanngisaannassapput. Akerlianik kajumissaatigaat sapinngisartik naapertorlugu unnersiutiginnissummik pilliuteqarnissaminnut. — Tussiaat 146:2.

¹⁸ Taamatut isumalluartuuneq ilaatigut erserpoq silarsuarmi tamarmi inuusuttut tusindilikkuutaat piffissaq tamaat kiffartorniarlutik  aalajangernerannit. Inooriaaseq taanna pitsaanerungaartoq erseqqissarniarlugu, 2002-mi ataatsimeersuarnerni naqitaaraq Hvad vil du med dit liv?-imik qulequtalik saqqummersinneqarpoq (kalaallisuunngortitaanngilaq). Kristumiut inuusuttut utoqqaallu taamatut piffissaalluartukkut eqqaasinneqarnertik, imaluunniit oqaaqqissaarneqarnertik, qujamasuutigaat. — Tussiaat 119:14, 24, 99, 119, 129, 146.

19, 20. (a) Kristumiut sooq ersisariaqarnatillu annilaangarujussuartariaqanngillat? (b) Allaaserisami tullermi suna sammissavarput?

¹⁹ Silarsuarmi pissutsit pissutigalugit kristumiut ersisariaqarnatillu annilaangarujussuartariaqanngillat. Nalunngilaat ungasinngitsukkut Jehovap naalagaaffia qaqugumulluunniit qanorluunniillu ittumik nakuusertuerutsitsissasoq. Aammattaaq tuppallersaatigaat nalunnginnamikku nakuusernerup kingunerisaanik toqusimasorpassuit makitinneqarumaartut. Ilaannut tamanna isumaqassaaq Jehova pillugu ilinnialernissamut aatsaat periarfissaqalissasut, allanullu isumaqassaaq tunniulluinnarsimasutut kiffartornerminni ingerlaqqissinnaasut. — Apustilit Suliaat 24:15.

²⁰ Kristumiutut ilumoortutut aalajangiusimalluinnarparput kalluunnaveersaartuunissarput. ’Uninngaannarsinnaaneq [Jehovallu] uagutsinnik annaassineranik takunnissinnaaneq’ immikkut pisinnaatitaaffiuvoq nuanningaartoq. Allaaserisami tullermi pisussat eqqartorneqartut eqquuttullu Biibilimi siulittuutinik paasisaqarnerulersitsisut, uppernerulissutigissavavut.

[Quppernerup ataani ilanngussaq]

Uteqqiinermi apeqqutit

• Sooq inuppassuit ullumikkut isumalluartuunngillat?

• Sooq Jehovap Nalunaajaasui siunissamut isumalluartuuppat?

• Nakuusernernut tamanut pisuusoq Jehovap qanoq iliorfigereerpaa?

• Sooq Gogip saassussinissaa annilaangassutigisariaqanngilarput?

[Atuaqqissaarnermi apeqqutit]

[Qupp. 10-mi assiliartaq]

Jiisusi kristumiutut kalluunnaveersaartuunermut atatillugu maligassiuivoq

[Qupp. 13-mi assiliartat]

Jehovap Nalunaajaasui inuusuttut tusindilikkuutaat nuannaarlutik piffissaq tamaat kiffartortunngorput

[Suminngaanneernera]

UN PHOTO 186226/M. Grafman