Inuup kialuunniit ajunngitsortai isiginiarnerusakkit

„Ajunngitsorsiortup nuannarisaq piniararaa.“ — USSATIT 11:27, 1961.

1. Jehova tamanut qanoq ajunngitsuliortarpa?

ULLORPASSUIT sila tujorminarlunilu qulisimareersoq seqinnileraangat silap allanngornera nuannertaqisoq. Isumagissaalerlutalu ilorrisimaalertarpugut. Aappaatigulli seqinniinnavillunilu siallinngisimaariarluni siallileraangat, imaluunniit sialussuaraangat, inuummarissinarlunilu iluartaqaaq. Pinngortitsisitta asannittup, Jehovap, nunarsuup silaannartaa pinngortissimavaa silap qanoq issusia assigiinngiiaarsinnaanngorlugu. Jiisusip Guutip tukkussusia malugeqquaa ima oqarami: „Akeqqasi asasigit, ilissinnillu qinuginnittut qinnussigit Ataatassinnut qilanniittumut qitornaaqqullusi; taassumammi seqerni ajortunut ajunngitsunullu nueqqusarpaa siallersitsisarlunilu iluartunut iluaatsunullu.“ (Matthæusi 5:43-45) Aap, Jehova tamanut ajunngitsuliortarpoq. Kiffaasa ilaartariaqarpaat allat pissusii ajunngitsut isiginiarnerullugit.

2. (a) Suna tunngavigalugu Jehova ajunngitsuliortarpa? (b) Ajunngissutsiminut qanoq periarnersugut Jehovap malugisarpaa?

² Suna tunngavigalugu Jehova ajunngitsuliortarpa? Adamip ajortuliorneraniilli Jehovap inuit pissusii ajunngitsut isiginiarnerujuaannarpai. (Tussiaat 130:3, 4) Inunnut naalattunut paratiisip pilerseqqinnissaa siunertaraa. (Efesosimiut 1:9, 10) Ajunngissusianit pisassarinngisaraluatsinnit kinguaassaq neriorsuutigisaq aqqutigalugu ajortimit naammalluinnanngissutsimillu aniguisinneqarnissamik periarfissinneqarpugut. (1 Mosesi 3:15; Romamiut 5:12, 15) Utertitsissummik  ilassinnittut naammalluinnartunngorsinnaalissapput. Jehovap maanna tamatta ataasiakkaarluta alaatsinaattarpaatigut, ilaatigut paasiniarlugu tukkussutsiminut qanoq periarnersugut. (1 Johannesi 3:16) Ajunngissutsiminik pingaartitsilluta iliuutsivut tamaasa malugisarpai. „Guutimmi iluaatsuunnginnami puiorsimanngilai suliasi asanninnersilu aqqanut takutissimasarsi,“ apustili Paulusi allappoq. — Hebræerit 6:10.

3. Apeqqut suna eqqarsaatigeqqissaartariaqarparput?

³ Allat pissusiisa ajunngitsut isiginiarnerunissaat eqqarsaatigalugu Jehova qanoq ilaarsinnaavarput? Apeqqut tamanna akiniarlugu inuunermi ajunngitsuliorfiusinnaasut sisamat misissoriartigik: (1) kristumiutut oqaluussinermi, (2) ilaqutariinni, (3) ilagiinni aamma (4) allanut attaveqarnitsinni.

Oqaluussinermi ajoqersuganngortitsinermilu

4. Kristumiutut oqaluussineq allat pissusiinik ajunngitsunik isiginninniarnerusarnitsinnut qanoq ersiutaava?

⁴ Naatsiiassanik naasupilunnillu assersuusiaq qanoq paasisariaqarnersoq ajoqersukkat aperimmata akillugit Jiisusi ima oqarpoq: „Narsaat tassa silarsuaq.“ Ullumikkut Kristusimut ajoqersukkatut silarsuaq tamakkerlugu oqaluussinitsigut upperisarput nassuerutigaarput. (Matthæusi 13:36-38; 28:19, 20) Jehovap Nalunaajaasuisa illumiit-illumut aqqusinernilu oqaluussisarnertik ilisimaneqaatigaat, tamannalu Guutip naalagaaffianik tusarliussamut qinngaqqunnanngitsunik tamanik eqiasuilluta ujaasinitsinnut ersiutaavoq. Tassami, Jiisusi ima peqqusivoq: „Sumut illoqarfimmut nunaqarfimmulluunniit pigaangassi, tassani qinngaqqunnanngitsut tassanimiut ujassavasi.“ — Matthæusi 10:11; Apustilit Suliaat 17:17; 20:20.

5, 6. Sooq inuit angerlarsimaffiannut pulaaqqeqattaartarpavut?

⁵ Qaaqquneqarnata inuit pulaaraangatsigik tusarliussarput qanoq isumaqarfigineraat maluginiartarparput. Ilaannikkut ilaqutariinni ataatsip tusarnaarusuttarpaatigut, allali taqqamannga suaarpallattarpoq: „Soqutiginninngilagut,“ pulaarnerlu tassunga killeqartarpoq. Aliasuutigisarparput aappaata akerliunera soqutiginninnginneraluunniit aappaanut sunniuteqartarmat! Inuup kialuunniit ajunngitsortai isiginiarnerujuassagutsigik  qanoq iliorsinnaavugut?

⁶ Kingorna tamaani angalaaqqikkutta ilaqutariinnullu taakkununnga kasuttoqqilluta immaqa soqutiginninngitsup oqaloqatiginisaanut periarfissarsissaagut. Kingullermik qanoq pisoqarsimanera eqqarsaatigigutsigu piareersarsinnaavugut qanoq oqassanerluta. Soqutiginninngitsoq taamatut iliorami immaqa ajunnginnerpaamik pissuteqarsorigaluarpoq misigisimasinnaallunilu soqutiginnittup uagutsinnut tusarnaarnissaa akornusertariaqarlugu. Immaqa pulaarnitta siunertaa pillugu eqqunngitsumik paasissutissinneqarsimanera taamatut isumaqarneranut pissutaaqataasinnaavoq. Taamaakkaluartorli ilaqutariit taakku Naalagaaffimmik nutaarsiassamik nuannersumik oqaluussiffiginaveersaartariaqanngilavut, periaaserillutali paasinerluinnerit naqqinniarsariuartariaqarpavut. Inuit tamaasa Guuti pillugu eqqorluartumik ilisimasaqalernissaannut ikiorusuppavut. Taava immaqa Jehovap inuk taanna imminut kajungilersissavaa. — Johannesi 6:44; 1 Timotheusi 2:4.

7. Inunnut saaffiginnittarnitsinni suna isumalluartuunissatsinnut iluaqutigisinnaavarput?

⁷ Jiisusip ajoqersukkani paasitippai ilaquttaminnit akerlilersorneqarsinnaasut, ima oqarluni: „Tikiuppunga akerleriilersinniarlugit angut ataataalu, panik anaanaalu, ukuaq sakialu arnaq.“ Nangillunilu: „Angutillu inoqutini akerarilissavai.“ (Matthæusi 10:35, 36) Inuilli atugaat isumaallu allanngorsinnaapput. Tassanngaannaq napparsimalerneq, eqqarlimmik toqusoorneq, ajunaarnersuit, misigissutsikkut ajornartorsiutit pissutsillu allarpassuit inuit oqaluussinitsinnut periaasiannut sunniuteqarsinnaapput. Oqaluussiffigisatsinnut isumalluanngitsumik isiginnittaaseqarutta isumaqaruttalu soqutiginninngittuaannassasut taakkua pissusii ajunngitsut ilumut isiginiarneruavut? Soormi tullianik pulaalerukkit isumalluaruit? Immaqa allatut periaaseqassapput. Ilaannikkut oqaaserisavuinnaanngitsoq aammattaarli oqaatiginiakkatsinnik qanoq oqaatiginninnerput pulaakkatta isummaminik allannguissutigisarpaa. Oqaluussilinnginnitsinni qamannga pisumik Jehovamut qinusarutta isumalluartuunissatsinnut Naalagaaffimmillu tusarliussamik tamanut kajumissinartumik saqqummiussinissatsinnut iluaqutigissavarput. — Kolossemiut 4:6; 1 Thessalonikamiut 5:17.

8. Kristumiut eqqarlimik uppinngitsut pissusii ajunngitsut isiginiarnerusarpatigik qanoq kinguneqarsinnaava?

⁸ Ilagiit ilaanni eqqarleriinnit ataatsineersut amerlasuut Jehovamut kiffartorput. Taakkua ilaat sallusuissummik soqutiginnilerput eqqarlimik utoqqaap maligassiuilluarnera alutoralugulu ataqqigamikku. Taassuma aapparminut ilaquttaminullu allanut attaveqarluarnera eqqarliisa inuusunnerusut isummaminnik allannguinerannut pissutaaqataavoq. Aammattaaq nuliaasut kristumiut amerlasuut apustili Petrusip siunnersuutaa maleruarsimavaat ’uitik oqaluffiginngikkaluarlugit ilanngussinnaaqqullugit’. — 1 Petrusi 3:1, 2.

Ilaqutariinni

9, 10. Jaakup Josefillu ilaquttamik pissusii ajunngitsut qanoq ilillutik isiginiarnerusarpaat?

⁹ Ilaquttatta qaniginerpaasatta pissusii ajunngitsut isiginiarnerusarutsigik Jaakup ernerminut pinneriaasia ilaassavarput. Mosesimik allakkat siulliit, kapitali 37, versi 3-mi 4-milu allassimavoq Jaakup Josefi asanerugaa. Josefip qatanngutai ima sinngatigilerput qatanngutertik toqunnialersaalerlugu. Malugiulli Jaakup Josefillu inuunerminni kingusinnerusukkut qanoq  isiginnittaaseqarnerat. Tamarmik ilaquttamik pissusii ajunngitsut isiginiarnerusarpaat.

¹⁰ Josefip Egyptenimi kaannersuaqarfiusumi inuussutissanik nakkutilliisuutilluni qatanngutini ilassilluarpai. Ingerlaannaq kinaanini qulaanngikkaluarlugu iluamik pineqarnissaat ataataannullu utoqqalisumut nerisassanik nassartinneqarnissaat isumagaa. Aap, naak taakkunannga uumissorneqarsimagaluarluni Josefip asannittumik pivai. (1 Mosesi 41:53–42:8; 45:23) Aammattaaq Jaakup toqulerami ernini tamaasa pilluaqquai pilluaqqussutini siulittuutinngorlugit. Eqqunngitsuliorsimanitik pissutigalugit immikkut pisinnaatitaaffissaraluatik annaavaat, tamarmilli Israelimi nunaammik kingornuttaqattaagassamik pissarsipput. (1 Mosesi 49:3-28) Jaakup taakkununnga ataavartumik asanninneranut ersiutaalluarpoq!

11, 12. (a) Ilaquttatta pissusiinik ajunngitsunik isiginninniarnerusarnissap pingaaruteqassusia assersuusiami siulittuutaasumi sorlermi erseqqissarneqarpa? (b) Jiisusip ernermik tammaraluartumik assersuusiaani ataataasup maligassiaa qanoq ilinniarfigisinnaavarput?

¹¹ Jehovap Israelikkunnut ilumuunngitsunut kamaginninnera aamma innuttami pissusiinik ajunngitsunik isiginninniarnerusarneranik ersersitsivoq. Jehovap innuttaminut ataavartumik asanninnini pruffiitip Hoseap ilaqutaani pissutsinut assersuuppaa. Hoseap nulia Gomeri arlaleriarluni allasiorpoq. Taamaattorli Jehovap Hosea peqquaa: „Arnaq angutip allap arnaatigisaa allasiortorlu orniguk, asajullu. Taamatut [Jehovap] Israelikkut asavai, naak taakku guutinut allanut saattaraluartut seqquluttunillu tiggussimasunik mamarisaqartut.“ (Hosea 3:1) Sooq Jehovap Hosea taama peqquaa? Tassami Jehovap nalunngilaa inuiaqatigiit aqqutigeqqusaminik maleruaajunnaartut ilaat kamagittarnerminut ajunngitsumik periassasut. Hosea oqarpoq: „Kingorna Israelikkut saakkumaarput [Jehovalu] Guutertik Daavilu kunngertik ujarlugit. Kiisalu uulillutik [Jehova] tunissutaalu ajunngitsut ornissavaat.“ (Hosea 3:5) Ilaqutariittut ajornartorsiorutta maligassiaq tamanna eqqarsaatigissallugu iluaqutaassaaq. Ilaquttatta pissusii ajunngitsut isiginiarnerujuarutsigik naammagittarnitsigut maligassiuilluassaagut qanorluunniit pisoqassagaluarpat.

¹² Aamma Jiisusip ernermik tammaraluartumik assersuusiaa ilaquttatta pissusiisa ajunngitsut isiginiarnerusarnissaannut iluaqutigisinnaavarput. Inuunerlukutsooreerluni ernini nukarleq angerlarmat ataataata naakkinnittuliorfigaa.  Angajulleq ilaquttaminik qimatsisimanngisaannartoq naammagittaalliormat ataataasoq qanoq iliorpa? Ima oqarfigaa: „Ernera uumaa, illit uanniittuaannartuuvutit pigisakkalu tamaasa pigalugit.“ Ataataasup sukannerluni itigartinngilaa, taassumunngali asanninnini uppernarsaannarpaa. „Maannali nalliuttorsiortariaqarpugut nuannaarlutalu,“ nangippoq, „nukkat toqugaluarluni uummarmat tammaraluarlunilu nanisaammat.“ Uaguttaaq allat pissusii ajunngitsut isiginiarnerujuarsinnaavavut. — Lukasi 15:11-32.

Ilagiinni kristumiuni

13, 14. Asanninnermik „inatsit akimasoq“ ilagiinni kristumiuni qanoq maleruarsinnaavarput?

¹³ Asanninnermik „inatsit akimasoq“ kristumiutut maleruarniarparput. (Jaaku 2:1-9) Immaqa qatanngutit aningaasatigut uagutsinnit allaanerusumik tunuliaqutallit inussiarnisaarfigisarpavut. Taamaakkaluartorli naggueqatigiissutsikkut, kulturikkut upperisarsiornikkulluunniit tunuliaqutaat tunngavigalugit ilaat immikkoortittarnerpavut? Taamaappat qanoq Jaakup siunnersuutaa maleruarsinnaavarput?

¹⁴ Kristumiut ataatsimiinnerinut najuuttunik tamanik inoroorsaarfiginninnitsigut. Naalagaaffilersaarfimmut isertut nutaat oqaloqatigilerutsigik annilaanganerigaluartik nalorninerigaluartillu qaangipallannerusinnaavaat. Ilaat kristumiut ataatsimiinnerannut siullerpaamik najuutereerlutik ima oqarput: „Tamarmik inussiarnersorujussuupput. Soorlulusooq nalunngereeraannga. Sungiussipallappunga.“

15. Ilagiinni inuusuttut utoqqarnik soqutiginnilersinniarlugit qanoq ikiorneqarsinnaappat?

¹⁵ Ilagiit ilaanni ataatsimiittoqareeraangat inuusuttut ilaat naalagaaffilersaarfimmi imaluunniit silataani katersuuttarput imminnillu utoqqaanerusut ilaginissaat immaqa tunuarsimaarfigisarlugu. Taamaaqqajaaneq ilorrap tungaanut saatsinniarlugu qanoq iliuuseqartoqarsinnaava? Soorunami angajoqqaat angerlarsimaffimminni meeqqatik ilinniartittariaqarpaat ataatsimiigiarnissamullu piareersartillugit. (Ussatit 22:6) Assersuutigalugu atuagassianik assigiinngitsunik katersuitissinnaavaat ataatsimiinnermi atugassatik tamarmik nassarsinnaaniassammatigik. Angajoqqaat aamma qitornatik ikiorluarsinnaaneruaat naalagaaffilersaarfimmi utoqqarnik sanngiitsunillu oqaloqatiginnilaarnissaannik. Meeqqat qatanngutinut taakkununnga qiimmaallannartumik oqaasissaqaraangamik nuannaalertarput.

16, 17. Meeqqat inuusuttullu ilagiinniittut pissusii ajunngitsut inersimasut qanoq isiginiarnerusinnaavaat?

¹⁶ Soorunami aamma qatanngutit utoqqaat meeqqat inuusuttullu ilagiinniittut soqutigisariaqarpaat. (Filippimiut 2:4) Siulliullutik taakku qiimmassaataasumik oqaloqatigilersinnaavaat. Amerlanertigut ataatsimiinnermi soqutiginartunik saqqummiussisoqartarpoq. Assersuutigalugu inuusuttut aperineqarsinnaapput ataatsimiinneq nuannarineraat, sammineqartullu ilaannik immikkut pingaartitaqarnersut atorsinnaasaminnik. Inuusuttut ilagiinnut ilaapput, nersualaartariaqarpavullu malinnaammata aamma akigaangata saqqummiussaqaraangatalu. Inuusuttut ilagiinni inersimasunik peqateqartarnerannit angerlarsimaffimminnilu suliassaminnik naammassinneriaasiannit takuneqarsinnaavoq kingusinnerusukkut annerusumik akisussaaffilerneqarsinnaassanersut. — Lukasi 16:10.

 ¹⁷ Inuusuttut ilaat akisussaaffimmik tigusisut pingaarnerusunik suliassinneqarnissamut pisariaqartunik anersaakkut ittunik pissuseqalerserlutik siumukartuaannassapput. Suliassaqarnertik kingusinnerusukkut peqqissimissutissaminnik iliuuseqarnaveersaarnissaminnut aamma iluaqutigisinnaavaat. (2 Timotheusi 2:22) Taamatut suliaqarlutik qatanngutit angutit ilagiinni kiffartortunngorusuttut ’misilinneqartarput’. (1 Timotheusi 3:10) Qatanngutit taakkua ataatsimiinnerni kajumillutik peqataanermikkut, oqaluussinermi aallussilluarnermikkut ilagiinniittunillu tamanik soqutiginninnermikkut utoqqaanertat naliliisinnaanngortissavaat akisussaaffeqarnerulernissaminnut piareeqqanerlutik.

Inuup kialuunniit ajunngitsortai isiginiarnerusakkit

18. Utoqqaanertat qanoq iliornaveersaartariaqarpat, aamma sooq?

¹⁸ „Iluanngitsuliorneruvoq eqqartuussisup nakerisarsiortarnera,“ Ussatit 24:23-mi allassimavoq. Ilisimassutsimi Guutimeersumi piumasaqaatigineqarpoq utoqqaanertat ilagiinniittunik eqqartuussigaangamik kinaassusersiortuussanngitsut. Jaaku ima allappoq: „Ilisimassuseq pavannga pisoq pingaarnerpaamik minguitsuuvoq, tamatumalu saniatigut eqqissinermik nuannarisaqartuuvoq, saamasuulluni, ilakkuminartuullunilu, nallittuingaartuulluni, ajunngitsunik inerititaqarluni, kinaassusersiortuunani unneqqarissuullunilu.“ (Jaaku 3:17) Soorunami utoqqaanertat allat pissusii ajunngitsut isiginiarnerusarpaat, qulakkeertariaqarpaalli siuneqassutsimik allanut attaveqarnerminnit misigissutsiminnillu sunnerneqannginnissaa. Tussiaasiortoq Asafi allappoq: „Guuti sassarpoq guutini [imaluunniit „guutisut ittuni“, inuit eqqartuussisut pineqarmata] katersuussimasuni, eqqartuussilerpoq guutit akornanni: Qanoq sivisutigisumik eqqartuussissavisi peqquserlullusi, iluaatsullu illersorlugit?“ (Tussiaat 82:1, 2) Utoqqaanertat kristumiut ikinngutiminnik eqqarlimminnilluunniit eqqartuussigaangamik kinaassusersiornaveersaarluinnartarput. Taamaalillutik ilagiit ataasiussuseqartiinnartarpaat, Jehovallu anersaava sunniuteqarluarsinnaanngortarpoq. — 1 Thessalonikamiut 5:23.

19. Allat pissusii ajunngitsut qanoq isiginiarnerusinnaavavut?

¹⁹ Qatanngutitta pissusii ajunngitsut isiginiarnerusarutsigik Paulusip ilagiit Thessalonikamiittut allaffigigamigit isiginnittaasiatut isumaqassaagut. Imami allappoq: „Naalakkami tatigaassi peqqussutivut naalakkisi siunissamilu naalakkumaarlugit.“ (2 Thessalonikamiut 3:4) Allat pissusii ajunngitsut isiginiarnerusarutsigik kukkussutaat isiginngitsuusaaruminarnerutittassavavut. Aamma qatanngutivut sukkut nersualaarsinnaanerlugit periarfissarsiortassaagut isornartorsiornaveersaassallugillu. Paulusi allappoq: „Pilittat piumaffigineqartarput ilumuussasut.“ (1 Korinthimiut 4:2, 1961) Ilagiinni ’pilittaasutut’ kiffartortut, aap, qatanngutivut kristumiut tamaasa, asavavut aalajaatsuummata. Qaninnerulertarpavut, kristumiutullu ikinngutigiinnerput nakussatsinneqartarpoq. Paulusip itsaq qatanngutinut isiginninneratut qatanngutivut isigaavut, tassa ’Guutip naalagaaffia pillugu suleqataasutut’ uagutsinnullu ’tuppalliutaasutut’. (Kolossemiut 4:11) Taamaalilluta Jehovap isiginnittaasiatut isiginnittaaseqarpugut.

20. Allat pissusiinik ajunngitsunik isiginninniarnerusartut suut pilluaqqussutisiarissavaat?

²⁰ Nuannaarutigaarput Jehovap inuit pissusii ajunngitsut isiginiarnerusarmagit. (1 Kunngit 14:13) Allanut attaveqarnitsinni ilaarniartigu. Taamaaliorutta utertitsissut iluaqutigisinnaassavarput silarsuarmilu nutaassami maanna qanilleqisumi naassaanngitsumik inuusinnaalissaagut. — Tussiaat 130:3-8. (wE 6/15 03)

Uteqqiinermi apeqqutit

• Suna tunngavigalugu Jehova tamanut ajunngitsuliortarpa?

• Allat pissusii ajunngitsut qanoq isiginiarnerusinnaavavut

• oqaluussinermi?

• ilaqutariinni?

• ilagiinni?

• attaveqarfiginninnitsinni tamani?

[Atuaqqissaarnermi apeqqutit]

[Qupp. 26-mi assiliartaq]

Josefip qatanngutimi pissusii ajunngitsut isiginiarneruai siornatigut uumissorsimagaluaraanni

[Qupp. 27-mi assiliartaq]

Akerlilersorneqarneq tamanik ikiuiniarnitsinnut akornutiginngilarput

[Qupp. 28-mi assiliartaq]

Jaakup erneri tamarmik pilluaqquneqarput siornatigut iliuuserisimasaat soqutiginagit

[Qupp. 29-mi assiliartaq]

Kristumiut ataatsimiinnerini kikkut tamaasa tikilluaqqusakkit