Qilaap timmiai ilinniarfigisigit

„QILAAP timmiai isigeriarsigit; siaruarterinatillu katersuinngillat quinullu qimatulinatik, Ataatassilu qilammiittup nerisittarpai. Ilissili taakkunannga pingaarnerujussuunnginnerpisi?“ (Matthæusi 6:26) Jiisusip Galilæap Tasersuata eqqaani sivinganersami qaqqami oqaluutsimini tusaamasaasumi oqaatsit taakku oqaatigai. Ajoqersugaasali kisimik tusarnaanngilaat. Inuppassuit nunap ilaanit tamaneersut najuupput. Ilaat amerlasuut piitsuupput, napparsimasortatillu Jiisusimukaassimavaat ajorunnaarsinniassammagit. — Matthæusi 4:23–5:2; Lukasi 6:17-20.

Jiisusip napparsimasut ajorunnaarsereeramigit pingaaruteqarnerit eqqartulerpai, tassa anersaakkut pisariaqartitaat. Ilinniartitsissutaasa ilai aallarniutitut taaneqarput.

Qangarsuarli timmiaqalersimavoq. Ilaasa sullernit nerisaraat, allat paarnat naasullu naatsiiassartaat. Guutip timmissat naammalluartumik isumagisimagunigit, soorunami aamma inuit imminut kiffartortut ullormut inuussutissaqartissinnaavai. Immaqa inuussutissarsiorniarlutik suliffissarsinissaannut ikiorsinnaavai. Immaqaluunniit naatitanik katersuilluarnissaannut ikiorpai. Ajunaarnersuaqartillugu Guutip ajorsaateqartut ilaat ikiorsinnaavai, saniliulluartunik ikinngutinillu nerisassaminnik avitseqatiginnikkusuttunik ilaqalersinnerisigut.

Kisianni timmissat pillugit misissueqqissaarnitsigut ilikkagassaqaqaagut. Guutip timmissat tupinnartumik aqutsisumik misigissusilerlugit pinngortissimavai, piaqqatik isumaginiarlugit ulluliorsinnaatillugit. Uani ullut assigiinngitsut marluk takussavavut. Saamerleq tulugarnat qarsungasut ullugaat. Ullut innami imaluunniit illup iigaani sananeqartarpoq. Ullut taakku „qaliaat“ tassaapput innap aniinganersaa, imaluunniit assilissami takutinneqartutut qaliap aniinganersaa. Ullutaa marulluminernik tiggunnikunik katiterlugit niaquusatut ilusilerlugu sanaajuvoq. Angutiviaq arnaviarlu marullumernit tiggussimasut katersorniarlugit assoruullutik sulisarput, ulluliornerallu qaammat ataaseq sinnerlugu sivisussuseqarsinnaasarpoq. Taava ivikkanik meqqunillu ilupaqutsertarpaat. Marluullutik piaqqaminnik nerisitsisarput. Talerpia tungaani takuneqarsinnaapput ullut ikaartiterisumit kujataaneersumit (angutivissamit) sanaat. Timmiaq taanna eqiasuitsoq Afrikameersoq ullulioraangami, ivigamernit naasullu allat ilamerngi atortarpai. Ulloq ataaseq ulluliortarpoq, piffissallu ulluliorfissap ataatsip ingerlanerani immaqa ullut 30-t sinnerlugit sanasarpai.

Qanoq tamanna ilinniarfigisinnaavarput? Guutip timmissat piginnaassutsinik taamaattunik ulluliassanillu naammattorsuarnik tunisinnaagunigit, soorunami aamma inuit imminut kiffartortut inissaannik ikiorsinnaavai. Kisianni Jiisusip takutippaatigut Jehovap timip piisigut pisariaqartitatsinnik ikiussappatigut qanoq iliortariaqarnitsinnik. Oqarpoq: „Guutilli naalagaaffia iluarneralu ujaqqaarsigit, taava tamakku tamarmik ilanngullutik ilissinnut tunniunneqarumaarput.“ (Matthæusi 6:33) ’Guutip naalagaaffiata ujaqqaarnera qanoq paasisariaqarpa?’ immaqa eqqarsarputit. Jehovap Nalunaajaasuisa atuagassiamik uuminnga agguaasut nuannaarlutik apeqqut taanna akerusuppaat. (wE 6/15 03)