’Salomoluunniit alutornangaarsutsimini taakkua ilaattut atisitinneqanngilaq’

NUNAMI naasut uani takuneqarsinnaasut assingi Afrikap kujataani nunaannaap aqqusernisa sinaanni nalinginnaasumik takussaapput. Latinerisut ateqarput Bidens formosa, aallaqqaammullu Amerikap kiattortaa naaffigisarpaat. Naasut taamaattut kusanartut takullugit Jiisusip uagutsinnut ilinniartitsissutaasa ilaat immaqa eqqarsaatigineqalertarput. Tusarnaartai amerlasuut piitsuupput pisariaqarnerpaalluunniit, soorlu nerisassat atisassallu pissarsiarineq sapingajattarlugit.

„Soormi atisassat pillugit isumakuluuteqarpisi?“ Jiisusi aperivoq. „Malugeriarsigit narsaatip naasui liljat qanoq naajartortartut; sulisanngillat qissisarnatilluunniit. Oqarfigaassili: Salomoluunniit alutornangaarsutsimini taakkua ilaattut atisitinneqanngilaq.“ — Matthæusi 6:28, 29.

Jiisusip naasoq sorleq eqqarsaatigineraa assigiinngitsunik isumaqarfigineqarpoq. Kisianni eqqarsaatigisimassavai naasut eqqaminni nalinginnaasut, nangillunimi oqarpoq: „Guutip narsaatip ivigai ullumi atasut aqagulu kissarsuummut qissiussassat taama atisitikkamigit ilissi annerungaartumik pissannginnerpaasi, uppernikitsusi!“ — Matthæusi 6:30.

Naak Bidens formosa Israelimeersuunngikkaluartoq Jiisusip oqaasiinut erseqqissaaqataavoq. Naasut taakkua ungasianit isiginnaaraluaraanni qanillillugilluunniit takullugit ingasalluinnartumik kusanarput aamma assiliisunik kusanartuliortartunillu assilinissaat nuannarineqartaqaluni. Jiisusi ingasaassinngilaq oqarami: „Salomoluunniit alutornangaarsutsimini taakkua ilaattut atisitinneqanngilaq.“

Qanoq ilinniarfigisinnaavarput? Guutip kiffaasa qularissanngikkaat pissutsit ajornartorsiornaraluarpataluunniit atorfissaqartitamik pissarsiarinissaannut ikiussagaatik. Jiisusi oqarpoq: „Kisianni [Guutip] naalagaaffia noqqaassutiginiarsiuk, taava tamakku ilanngullugit [soorlu nerisassat atisassallu] ilissinnut tunniunneqarumaarput.“ (Lukasi 12:31) Aap, Guutip naalagaaffia siulliullugu noqqaassutigigutsigu iluaqutigissavarput. Kisianni Guutip naalagaaffia sunaasoq inunnullu qanoq iliussanersoq nalunngiliuk? Jehovap Nalunaajaasuisa apeqqutit Biibilimit akinissaannut ikiornissat nuannaarutigissavaat. (wE 6/1 03)