Uninngaannaritsi takusiullu Jehovap annaakkaasi!
Uninngaannaritsi takusiullu Jehovap annaakkaasi!
„Inississimallusi uninngaannarumaarpusi, taava takussavarsi [Jehovap] annaakkaasi.“ — 2 NALUNAARSUUTIT 20:17.
1, 2. Sooq Gogip saassussinissaa silarsuarmi peqqarniisaartoqariaannaaneranit kingunipiloqarnerungaassava?
ILAASA peqqarniisaarneq silarsuarmioqatigiinnut, aap, silarsuarmut atugartuussuseqartumut saassussinertut oqaatigisimavaat. Paasinarpoq taamatut aarleqquteqarneq ilumooruttariaqartoq. Saassussisoqassaarli inuiannut kingunipiloqarnerungaartussamik, saassussinissaq tamanna silarsuarmioqatigiit eqqumaffigivallaanngilaat. Saassussinissaq suna?
2 Saassussinissaq tamanna ’Gogimit Magogimeersumit’ aqunneqassaaq, Biibilimilu Ezekielip allagaani kapitali 38-mi eqqartorneqarluni. Ingasattajaarinerussava oqaraanni silarsuarmi tamarmi peqqarniisaartoqariataartoqarsinnaaneranit kingunipiloqarnerussasoq? Naagga, Gogip saassussinissaa inuit naalakkersuisuinut saassussinermit sunniuteqarnerussaaq. Guutip qilammi naalakkersuisuinut saassussinerussaaq! Inuilli aaqqissuussinerminnut saassussitsaaliiniarnerminni iluatsitsivallaannginnerata akerlianik, Pinngortitsisup Gogip saassussinissaa annertunerungaartoq akiorluinnarsinnaavaa.
Guutip naalakkersuisuinut saassussinissaq
3. Silarsuarmi aqutsisut 1914-imiilli qanoq kajumissaarneqarpat, qanorlu qisuariarpat?
3 1914-imi Guutip naalagaaffia qilammi pilersinneqarmalli Guutip kunnginngortitaata Saatanillu silarsuarmi aaqqissuussinerata ajortup akornanni aaqqiagiinngitsoqarpoq. Taamanikkut silarsuarmi aqutsisut Guutip kunngitut toqqagaanut naalatsigiteqqullugit kajumissaarneqarput. Siulittuutigineqartutulli piumanngillat: „Nunarsuup kunngii saassussinialerput, naalagaanerit iligiilerput [Jehovamut] taassumalu tanitaanut akerartorlutik: ’Qartorartigit kalunniliussaat allunaasarsuarnit qilersuutaannit aniguilluta.’“ (Tussiaat 2:1-3) Naalagaaffimmut akerliuneq Gogip Magogimeersup saassussinissaata nalaani sakkortunerpaajumaartoq erseqqippoq.
4, 5. Inuit Guutip qilammi naalakkersuisuinut takussaanngitsunut qanoq sorsussinnaappat?
4 Immaqa eqqarsaatigaarput inuit qanoq ilillutik qilammi naalakkersuisut takussaanngitsut akiorsinnaagaat. Biibili naapertorlugu naalakkersuisut taakku tassaapput „inuit 144.000-it akiliunneqarlutik nunamiikkunnaarsitat“ aamma „Savaaraq“, Jiisusi Kristusi. (Saqqummersitat 14:1, 3; Johannesi 1:29) Naalakkersuisut taakku qilammi naalakkersuisuummata „qilak nutaaq“-tut taaneqarput, taamaattumillu paasinarpoq innuttaat nunarsuarmiittut „nuna nutaaq“-mik taaneqarmata. (Esaja 65:17; 2 Petrusi 3:13) Kristusip kunngeqatissaasa 144.000-it amerlanersaat aalajaattuarlutik nunami inuujunnaareerput. Taamaalillutik takutippaat qilammi suliassaminnut nutaamut qinngaqqunnarnatik.
5 144.000-itilli nunami suli sinneqalaarput. 2002-mi eqqaaniaalluni nalliuttorsiornermi najuuttunit 15.000.000-init amerlanerusunit qilammi naalakkersueqataasussatut toqqarneqartutut neriuuteqartut 8760-innaat ersersitsipput. Naalakkersueqataasussanik taakkuninnga sapiiserluni saassussisoq kinaluunniit Guutip naalagaaffianut sorsuppoq. — Saqqummersitat 12:17.
Kunngi ajugaalluinnassaaq
6. Jehovap Kristusillu Guutip innuttaanut akerlilersuineq qanoq isigaat?
6 Jehovap naalagaaffimminut pilersitaminut akerlilersuisunut qisuariarnera ima siulittuutigineqarpoq: „Qilammi issiavissaarsuarmi issiasoq illarpoq, [Jehovap] mitaatigai. Taavalu kamalluni oqarfigai uumitsannermini annilaartingaarlugit: ’Uanga kunngioqqusara ivertereerpara Zionimi, qaqqanni illernartumi!’“ (Tussiaat 2:4-6) Maanna Kristusip, Jehovap siulersuinerata ataani, ’ajugaalluinnarnissaanut’ piffissanngulerpoq. (Saqqummersitat 6:2, NV) Taamanikkussamut Jehovap innuttami akerlilersorneqarnissaat qanoq isiginnittaaseqarfigissavaa? Imminut Kunngitullu naalakkersuititaminut saassussinertut isigissavaa. „Ilissinnik attuisut isima tappiutaat attorpaat,“ Jehova oqarpoq. (Zakaria 2:12) Jiisusillu erseqqissarpaa qatanngutiminut tanitanut iliorfiginninnerit iliorfiginninnginnerillu, imminut iliorfiginninnertut iliorfiginninnginnertullu isigalugit. — Matthæusi 25:40, 45.
7. Sooq ’amerlangaartut’, Saqqummersitat 7:9-mi eqqaaneqartut, Gogip kamannera aamma malugissavaat?
7 Tanitanik sinneruttunik tapersersuillutik iliuuseqartut soorunami Gogip kamannera aamma malugissavaat. „Nuna nutaaq“ tassaassaaq ’inuppassuit amerlangaartut . . . inuiaqatigiinnit naggueqatigiinnillu inuiannillu immikkullu oqaasilinnit tamanit pisut’. (Saqqummersitat 7:9) Allassimavoq ’Savaaqqap saavani qeqartut qaqortunik atisaqarlutik’. Imaappoq Guutimut Jiisusi Kristusimullu iluarisaasumik attaveqarput. „Palmit avalequtaannik tigumiaqarlutik“ Jehova nunami qilammilu eqqortumik kisimi Oqartussaasutut nersorpaat. Jehova kunnginngortitani, Jiisusi Kristusi, aamma ’Guutip savaaraanik’ taaneqartartoq, aqqutigalugu naalakkersuivoq. — Johannesi 1:29, 36.
8. Gogip saassussinissaata Jiisusi qanoq iliuuseqartissavaa, qanorlu kinguneqartumik?
8 Gogip saassussinissaata Guutip kunnginngortitaa Harmagedonimi sorsunnermik aallarniitissavaa. (Saqqummersitat 16:14, 16) Jehovap kisimi oqartussaaneranik akuersiumanngitsut suujunnaarsinneqassapput. Guutilli naalagaaffianut ilumoorfiginninnertik pissutigalugu atugarliorsimasut iluaallatsitsissapput. Tamatumunnga atatillugu apustili Paulusi ima allappoq: „Tamanna ilimasaarutaavoq Guutip eqqartuussutaanut naapertuilluartumut, Guutip naalagaaffianut maannakkut erloqinartorsiuutissinnut isernissamut qinngaqqunnanngitsuutitaassagassi. Guutimmi naapertuilluarnertut isigaa ilissinnik annikilliortitsisut annikilliortitaanermik akilissallugit ilissilu annikilliortitaasusi uagutsinnut ilagitillusi akilissallusi atoruminarsisitsinermik Naalagaq Jiisusi inngilini pissaasut ilagalugit qilammit saqqummersitaappat innermi ikualasorsuarmi, aggiullugu pillaatissaq Guutimik ilisimasaqanngitsunut Naalakkamillu Jiisusimik iivangkiiliumut naalakkumanngitsunut.“ — 2 Thessalonikamiut 1:5-8.
9, 10. (a) Jehovap akerarujussuarmut Juda qanoq ajugaatippaa? (b) Ullumikkut kristumiut qanoq iliortuartariaqarpat?
9 Annikilliortitaangaarfiusussami, Harmagedonimi sakkortunerpaasussami, Kristusi ajussutsimut tamarmut sorsussaaq. Ajoqersugaali sorsuttariaqassanngillat. Pissutsimmi ukiut tusindillit arlallit matuma siorna naggueqatigiit marluk naalagaaffianni Judami pisunut assingussapput. Tassani inuit aamma sorsuttariaqarsimanngillat, Jehovami sorsuttussaavoq, ajugaatitsivorlu. Oqaluttuaq imaappoq: „[Jehovap] Ammonikkut Moabikkullu Se’irillu qaqqaaneersut Judakkunnut saassussisut terlinganeertillugit saassutitippai ajugaaffigitillugillu. Taava Ammonikkut Moabikkullu sakkutuuisa Se’irip qaqqaaneersut saassuppaat nungutilluinnarlugit, taakkulu suujunnaarsereeramikkit imminnut nungutinnialerput. Judakkut inoqajuitsup tungaanut nasittarfimmut pigamik tassanngaanniillu akeqqat sakkutuuisa sumiinnerat paasiniarlugu, taava takulerpaat sakkutuut toqorarsimallutik narsartami tamani tamaaniittut; aniguisoqarsimanngillallu.“ — 2 Nalunaarsuutit 20:22-24.
10 Jehovap siulittuineratorluinnaq pisoqarpoq: „Ilissi sorsuttussaassanngilasi.“ (2 Nalunaarsuutit 20:17) Kristumiut ilumoortut taamatut pissuseqassapput Jiisusi Kristusi ’ajugaalluinnassalluni’ akuliuppat. Taamaalinnginnerani ajussutsimik akiuiniartuassapput, sakkuinnik sakkulersornatik, anersaakkulli sakkut atorlugit, ’ajortup ajugaaffigineratigut ajunngitsoq atorlugu’. — Romamiut 6:13; 12:17-21; 13:12; 2 Korinthimiut 10:3-5.
Gogip kikkut saassussitissavai?
11. (a) Gogi saassussiniarluni kikkut atussavai? (b) Anersaakkut eqqumaneq qanoq paasisariaqarpa?
11 Gogi Magogimeersoq Saatani Diaavulumut 1914-imiilli nikanarsisitaaqqanerani taaguutaavoq. Pinngortitaagami anersaajusoq nammineq saassussisinnaanngilaq. Taamaattumik nunami pissaanillit atussavai. Kikkut? Kikkuunerannik sukumiisumik Biibilimi allassimasoqanngilaq, tikkuuppaatigulli. Biibilimi siulittuutit pisunit eqquutitinneqariartortillugit paasinerujartussavarput Gogip kikkut atussanerai. Jehovap innuttaasa tamanna isumaliutersuutiginaveersaarpaat, anersaakkulli eqqumaniartuupput, politikkimullu upperisarsiornermullu tunngasutigut pisut malinnaaffigeqqissaarlugit paasiniarlugu Biibilimi siulittuutit qanoq eqquunnersut.
12, 13. Guutip innuttaasa naggammik saassunneqarnissaat pruffiiti Danielip qanoq siulittuutigaa?
12 Pruffiiti Danielip paasissutisseqqippaatigut naggataarutaasumik Guutip innuttaasa saassunneqarnissaat pillugu ima oqarluni: „[Avannarliup kunngia] uumitsalluni aallassaaq inuppassuit toqorarlugit nungutillugit. Tupissaarsuanilu immap qaqqallu alianaatsup, qaqqap illernartup, akornanni nappartissavai.“ — Danieli 11:44, 45.
13 Biibilip nalaani ’imaq’ tassaavoq Imarsuaq, Imaq Akullersuaq, aamma ’qaqqaq illernartoq’ tassaavoq Qaqqaq Zioni, taanna pillugu Jehova ima oqarpoq: „Uanga kunngioqqusara ivertereerpara Zionimi, qaqqanni illernartumi!“ (Tussiaat 2:6; Josva 1:4) Nuna ’immap qaqqallu alianaatsup’ akornanniittoq kristumiut tanitat anersaakkut susassaqarfiannut anersaakkut ittumik assersuutaavoq. ’Imaq’, inuit Guutimut takornartaasut, ataasiussuseqarfigiunnaarpaat, naalaagaaffimmilu qilammiittumi Jiisusi Kristusimik naalakkersueqateqarnissartik qilanaaraat. Guutip kiffai tanitat suleqataallu ilumoorfiginnittut, amerlangaartut, Avannarliup kunngianit peqqarniitsumik saassunneqassapput, Danielip siulittuutaani allassimasutut. — Esaja 57:20; Hebræerit 12:22; Saqqummersitat 14:1.
Guutip kiffai qanoq periartussaappat?
14. Guutip innuttai saassunneqarunik qanoq pingasunik periuseqassappat?
14 Guutip kiffai saassunneqarunik qanoq iliortussaappat? Joshafatip nalaani Guutip innuttaasut periartussaapput. Malugiuk innuttaasut peqquneqartut pingasunik imaattunik: (1) inississapput, (2) uninngaannassapput, aamma (3) takussavaat Jehovap annaassinera. Ullumikkut Guutip innuttaasa oqaatsit taakku qanoq naalassavaat? — 2 Nalunaarsuutit 20:17.
15. Jehovap innuttaanut ’inissinnissaq’ qanoq paasisariaqarpa?
15 Inissigitsi: Uulinnatik Guutip innuttai ’inississapput’ tassa kristumiutut kalluunnaveersaartuunertik attattuarlugu Guutilllu naalagaaffianik tapersersuillutik suliniuteqaannarlutik. Jehovamut ilumoorfiginnillutik kiffartornerminni ’aalajaalluinnassapput’ Jehovalu ilumoorfiginnilluni tunniusimanera pissutigalugu tamanut unnersiutigiuarlugu. (1 Korinthimiut 15:58; Tussiaat 118:28, 29) Maanna siunissamiluunniit tatisinerup qanoq ittulluunniit inissisimaffiannit nikitsissinnaanngilai.
16. Jehovap kiffai ’uninngaannassasut’ qanoq paasisariaqarpa?
16 Uninngaannaritsi: Jehovap kiffai imminnut annaanniassanngillat, Jehovamulli tatiginnilluinnassapput. Jehova silarsuup ularussineranit annaassisinnaasutuaavoq, taamaaliorumallunilu neriorsuivoq. (Esaja 43:10, 11; 54:15; Upputit 3:26) Jehova tatigigaanni, aqqut takussaasoq nalunanngitsumik ukiorpassuarni siunertaanik suliniuteqarsimasoq aamma tatigisariaqarpoq. Taamanikkussamut kristumiunut aatsaat taama pisariaqartigilissaaq Jehovap kunngitullu naalakkersuisitaata ilagiinnut kristumiunut siuttuutitaannut tatiginninnissaq. Angutit aalajaatsut taakkua Guutip innuttai siulersussavaat. Siulersuinerannik soqutiginninnginneq ajunaarutaasinnaavoq. — Matthæusi 24:45-47; Hebræerit 13:7, 17.
17. Sooq Guutip kiffaasa aalajaatsut Jehovap annaassinera takussavaat?
17 Jehovap annaassinera takuuk: Kristumiutut assuarnaatsuujuaannartut Jehovallu aniguisitsinissaanik tatiginnittut tamarmik annaanneqarneq akissarsiarissavaat. Nalunaaquttap-akunnerata kingulliup tungaanut — sapinngisartillu naapertorlugu — ullup Jehovap eqqartuussivissaata tikiunnissaa oqaluussissutigissavaat. Pinngortitat tamarmik ilisimalissavaat Jehova tassaasoq Guuti ilumoortoq nunamilu kiffaqartoq aalajaatsunik. Jehovap eqqortumik kisimi oqartussaanera sivisuumik akerleriissutaaqqinngisaannassaaq. — Ezekieli 33:33; 36:23.
18, 19. (a) Mosesip allagaasa aappaanni kapitali 15-imi ajugaanersiorluni erinarsuut Gogip saassussinissaanit aniguisussat misigissusiinik qanoq ersersitsiva? (b) Guutip innuttai qanoq iliortariaqarpat?
18 Guutip innuttai nukissaqaqqilerlutik silarsuarmut nutaamut isissapput, Israelikkut Imaq Aappalaartukkut aniguisitaanermik kingorna iliornerattut ajugaanersiummik erinarsorusungaarlutik. Jehova kiffaminik, inuiattut inuttullu ataasiakkaatut isigalugit, illersuisimammat naassaanngitsumut qujamasuffigissavaat, taamaattumillu taamanikkut erinarsuutaasa taallartaat ilaarsinnaassavaat: „[Jehova] tussiarfigissavara qutsissingaartitaammat. . . . [Jehova] sorsuttartuuvoq, aqqa tassa Jahve. . . . [Jehova], talerpiit naalannarsivoq pissaallunilu, [Jehova], akeqqat sequmisippatit talerpinnik. Pissaallutit akeqqatit toqorarpatit, uumitsannerit pitorartikkakku akeqqat nunguppai karriiarnikutut. . . . Inuiaqatigiit aniguisitatit tasiorpatit unneqqarissutsikkut, ininnut illernartumut ingerlappatit pissaanikkut. . . . Nunassaannut apuutitippatit ikkussorlugillu qaqqami illit pigisanni, najukkami illit inigisassattut piareersakkanni, illernartuummi illit assavit tunngaviligaani, [Jehova]. [Jehova] kunngiuvoq naassaanngitsumik.“ — 2 Mosesi 15:1-19.
19 Maanna naassaanngitsumik inuusinnaaneq aatsaat taama neriulluarnartoqartigimmat pingaaruteqangaarpoq Guutip kiffaasa Jehovamut asanninnerminnik ersersitsinissaat. Piffissanngorpoq naassaanngilluinnartumik Kunngiusup kiffartorfiginissaanut aalajangeqqinnissamut. — 1 Nalunaarsuutit 29:11-13. (wE 6/15 03)
Uteqqiinermi apeqqutit
• Sooq Gogip tanitat savallu allat saassutissavai?
• Guutip innuttai ’inississasut’ qanoq paasisariaqarpa?
• ’Uninngaannarneq’ qanoq isumaqarpa?
• Guutip innuttaasa Jehovap annaassinera qanoq takussavaat?
[Atuaqqissaarnermi apeqqutit]
[Qupp. 15-mi assiliartaq]
Jehovap Joshafati innuttaalu, sorsuttariaqartinnagit, ajugaatippai
[Qupp. 17-mi assiliartaq]
Tanitat savallu allat Jehovap kisimi oqartussaaneranik illersueqataapput
[Qupp. 19-mi assiliartaq]
Itsaq Israelikkutut Guutip innuttai ungasinngitsukkut ajugaanersiorlutik erinarsussapput