„Guuti tassaavoq asanninneq“
„Guuti tassaavoq asanninneq“
„Asanninngitsup Guuti ilisimanngilaa, Guutimi tassaavoq asanninneq.“ — 1 JOHANNESI 4:8.
1-3. (a) Jehovap asanninnera pillugu Biibilimi qanoq allassimava, tamannalu sooq maluginiarnartuua? (b) Sooq Biibilimi allassimava ’Guuti tassaasoq asanninneq’?
JEHOVAP pissusii tamarmik asseqanngilluinnartuupput naammalluinnartuullutillu. Kajumissinartuupput. Nuannernerpaartaalli tassaavoq asanninneq. Allamik pissuseqanngilaq uagutsinnik Jehovamut taama kajungilersitsitigisumik. Qujanartumik asanninneq pissusiinit allanit aamma malunnarnerpaajuvoq. Tamanna qanoq nalunngilarput?
2 Asanninneq pillugu Biibilimi allassimasoqarpoq Jehovap pissusii pingaarnerit allat pillugit allassimanngitsumik. Allassimanngilaq: ’Guuti tassaavoq pissaaneq’, imaluunniit ’Guuti tassaavoq naapertuilluarneq’, imaluunniit ’Guuti tassaavoq ilisimassuseq’. Taakku pissuserai, taakkulu pingasut tamarmik Guutimit pilerfeqarput. Asanninnerli pilllugu eqqarsaallannartumik Johannesimik allakkat siulliit 4:8-mi ima allassimavoq: „Guuti tassaavoq asanninneq.“ Aap, Jehovap asanninnera sorlanilluarsimavoq. Pissuserilluinnarpaa. Imatut nassuiarneqarsinnaagunarpoq: Jehovap pissaanini iliuuseqarsinnaalissutigaa. Naapertuilluarnini ilisimassutsinilu iliuuseqaraangami siulersortigisarpai. Asanninninili iliuuseqarusulissutigisarpaa. Pissutsinilu allat atoraangamigit asanninnera ersertuaannarpoq.
3 Oqartoqarajuppoq Jehova tassaasoq asanninneq kinaassusiligaq. Taamaattumik asanninneq taanna ilinniarniarutsigu Jehova ilisarisimalertariaqarparput. Taamaattumik misissoriartigik Jehovap asseqanngitsumik asannittuliornerisa ilaat.
Asannittuliorneq annerpaaq
4, 5. (a) Oqaluttuarisaanermi asannittuliornerit suna annerpaartaraat? (b) Sooq oqarsinnaavugut Jehova erneralu attaveqatigiissimasunit tamanit imminnut qaninnerpaamik attaveqatigiissimasut?
4 Jehova assigiinngitsorpassuartigut asannittuliorsimavoq, ataaserli taakkunannga tamanit annerpaajuvoq. Tassaavoq Jehovap ernerminik uagut pilluta naalliuttussanngorlugu toqusussanngorlugulu nunarsuarmut aallartitsinera. Eqqortumik oqarsinnaavugut tamanna oqaluttuarisaanermi asannittuliornerit annerpaartarigaat. Sooq taama oqarsinnaavugut?
5 Jehovap ’pinngortitaani tamani erniusut siullersaannik’ Jiisusi Biibilimi taaneqarpoq. (Kolossemiut 1:15) Tamatuma qanoq isumaqarnera eqqarsaatigiuk. Isumaqarpoq Jehovap ernera silarsuaqanngikkallarmat piusoq. Ataataq Ernerlu qanoq sivisutigisumik najortigiissimappat? Ilisimatuut ilaasa missiliorpaat silarsuaq ukiunik 13 milliardinik pisoqaassuseqartoq. Missiliuineq tamanna ilumooraluarpalluunniit Jehovap ernerata piusimanera suli sivisuneruvoq! Piffissarujussuarmi tamatumani suleriva? Erneq Ataatamini ’suliortuuvoq’. (Ussatit 8:30, NV; Johannesi 1:3) Tassa Jehovap erneratalu suleqatigiillutik allat suut tamaasa pinngortippaat. Piffissaq pissanganartuullunilu pilluarnartuusimassaaq! Piffissarujussuarmi tamatumani qanoq qanitsigisumik attaveqatigiissimasut paasiartulerparput? Jehova Guuti erneralu attaveqatigiissimasunit tamanit imminnut qaninnerpaamik attaveqatigiipput.
6. Jiisusi kuisimmat Jehovap misigissutsini qanoq ersersippai?
6 Taamaattoq Jehovap erni nunarsuarmut aallartippaa inuttut erniusinnaaqqullugu. Tamanna isumaqarpoq Jehovap erni asasani ukiuni qulikkuutaani qilammi najortigiunnaartariaqaraa. Jiisusi qanoq alliartortoq angutinngortorlu naammalluinnartoq soqutiginningaarluni qilammit isiginnaarpaa. Jiisusi 30-t missaannik ukioqarluni kuisippoq. Taamani Ataataq nammineerluni qilammit ima oqarpoq: „Tassa ernera asasara, nuannarisara.“ (Matthæusi 3:17) Jehova nuannaangaarsimassaaq nalerisimaangaarsimassallunilu takullugu Jiisusip imminut siulittuutigineqartut tamaasa, imminut piumasarineqartut tamaasa, aalajaalluni iliuuserigai! — Johannesi 5:36; 17:4.
7, 8. (a) Ukiumi 33-mi nisanip 14-ianni Jiisusi qanoq naalliuuteqartariaqarpa, Ataataatalu qilammiusup qanoq attorneqaatigaa? (b) Sooq Jehovap ernermi naalliunnissaa toqunissaalu akuerai?
7 Ukiumili 33-mi nisanip 14-ianni Jehova qanoq misigiva Jiisusi killuutigineqarmat kingornalu angutinit sakkulisartunit tigusarineqarmat? Jiisusi mitaatigineqarmat, qitserarneqarmat tilluarneqarmallu? Iperartorneqarmat tunumigut kilertiterneqarluni? Assammigut isikkamigullu qisummut kikiattorneqarmat tassanilu nivingatilluni inunnit mitaatigineqarmat? Ataataq qanoq misigiva ernermi asasami annikilliorluni torlulaffigimmani? Qanoq misigiva Jiisusi anerningermat pinngortitsinerullu aallartinneraniilli aatsaavissuaq ernini asasani piujunnaarmat? — Matthæusi 26:14-16, 46, 47, 56, 59, 67; 27:26, 38-44, 46; Johannesi 19:1.
8 Jehovap ernini toqummat anniarnera oqaatigisinnaanngilarput. Oqaatigisinnaasarput nassuiarsinnaasarpullu tassaavoq taama pisoqarnera sooq Jehovap akuerigaa, aamma sooq imminut taama anniaatissittoq. Jehovap sallusuissut nuanningaartoq Johannesi 3:16-imi uagutsinnut saqqummersippaa — allassimaffillu taanna ima pingaaruteqartigaaq „Biibiliaqqamik“ taaneqartarluni. Ima allassimavoq: „Guutip silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.“ Tassa Guutip pissutigisaa tassaavoq asanninneq. Allamik taama asannittuliortigisoqarsimanngisaannarpoq.
Jehovap asanninnerminik qanoq uppernarsaavigigaatigut
9. Saatanip qanoq isumaqalersinniarpaatigut, Jehovalli qanoq uppernarsaavigaatigut?
9 Pingaaruteqartorli apeqqutaalerpoq: Jehovap inuttut ataasiakkaatut asavaatigut? Immaqa ilaasa akueraat Guuti inuiannik tamanik asannittuusoq, Johannesi 3:16-imi allassimaneratut. Immaqali ima eqqarsarput: ’Guutip uanga asalersinnaanngisaannarpaanga.’ Saatanip isumaqalersinniarpaatigut Guutip asanatalu naleqartutut isiginngikkaatigut. Jehovalli uppernarsaavigaatigut kiffani aalajaatsut tamarluinnaasa erlinnartutut isigigini, qanorluunniit qinngaqqunnartutut qanorlu naleqanngitsigisutut misigitigigaluarpata.
10, 11. Jehovap isaani naleqangaartugut Jiisusip qupaloraarsunnik assersuusiaata qanoq takutippaa?
10 Assersuutigalugu Jiisusip oqaasii Matthæusi 10:29-31-mi allassimasut eqqarsaatigikkit. Jiisusip assersuusiorluni ajoqersukkani qanoq naleqartigisut oqaatigaa. Ima oqarpoq: „Qupaloraarsuit marluk skillingimik akilersillugit tunineqartannginnerpat? Taakkua ilaat ataaserluunniit nunamut nakkarnavianngilaq Ataatarsi najortiginagu. Ilissimi nutsasiluunniit tamarmik kisissimapput. Taamaattumik erseqinasi, ilissi qupaloraarsuppassuarnit pingaarneruvusi.“ Oqaatsit taakku ukiuni hundredelinni siullerni Jiisusip tusarnaartaanut qanoq isumaqarnersut misissortigu.
11 Jiisusip nalaani qupaloraarsuk timmissat nerineqartartut akikinnersaraat. Malugiuk qupaloraarsuit marluk aningaasamininnguamik pisiarineqarsinnaasut. Kingusinnerusukkulli Jiisusi, Lukasi 12:6, 7 naapertorlugu, oqarpoq qupaloraarsuit sisamaanngitsut, tallimalli, aningaasamininnguanik marlunnik pisiarineqarsinnaasut. Tassa timmiaq ilanngullugu tunniunneqartoq naleqanngilaq! Pinngortitannguit taakku immaqa inuit isaanni naleqanngillat, Pinngortitsisulli qanoq isigai? Jiisusi oqarpoq „taakkua ilaat ataaserluunniit“, aamma ilanngullugu tunniunneqartoq, ’Guutimit puiorneqanngitsoq’. Immaqa maanna paasilerparput Jiisusip suna pigaa. Qupaloraarsuk ataaseq Jehovap naleqangaartutut isigippagu, inuk ataaseq naleqarnerungaassaaq! Jiisusip nassuiaaneratut sumininnguit tamaasa ilanngullugit Jehovap ilisarisimavaatigut. Allaat nutsavut qassiunersut nalunngilaa!
12. Jiisusi oqarmat nutsavut kisinneqarsimasut sooq qularinngissinnaavarput ingasaassinngitsoq?
12 Immaqa isumaqartoqarpoq Jiisusi uani ingasaassisoq. Toqusunilli makinnissamik neriuut eqqarsaatigiuk. Jehovap pinngorteqqissagunisigut ilisarisimalluinnartariaqarpaatigut. Taassuma isaani ima naleqartigigatta eqqaamavai suut tamaasa, timikkut kingornussavut DNA-mik taaneqartartut, eqqaamasinnaasavut misilittakkavullu tamaasa ilanngullugit. Tamatumunnga naleqqiullugu nutsatta — agguaqatigiissillugu 100.000-tiusartut — kisinnissaat ajornanngitsuararsuuvoq. Jiisusip oqaasii uppernarsaatitsialaapput Jehovap inuttut ataasiakkaatut uagutsinnik isumaginninneranut.
13. Kunngi Joshafatip nalaataata qanoq takutippaa naammalluinnanngitsuugaluartugut Jehovap pissutsivut ajunngitsut maluginiartarai?
13 Aammattaaq Jehovap uagutsinnik asanninneranut uppernarsaataasumik allamik Biibilimi saqqummersitaqarpoq. Jehovap pissutsivut ajunngitsut maluginiartarpai pingaartillugillu. Assersuutigeriartigu kunngi ajunngitsoq Joshafati. Kunngi sianiilliormat Jehovap pruffiitiata ima oqarfigaa: „Taamaattumik [Jehovap] kamannerata tuffigissavaatit.“ Oqaatsit eqqissisimananngingaaramik! Jehovalli tusarliussani tamaannga naanngilaa. Pruffiiti ima nangippoq: „Ilinnili aamma ajunngitsumik nassaassaqarpoq.“ (2 Nalunaarsuutit 19:1-3) Jehova naapertuilluartumik kamakkaluarluni Joshafatip pissusii ajunngitsut arajutsinngilai. Naammalluinnanngitsuugaluartugut Guutip pissutsivut ajunngitsut maluginiartarai nalunagu tuppallernaqaaq!
Guuti ’isumakkeerfiginnikkumasartuusoq’
14. Ajortulioraangatta eqqarsaatit suut nanertuutigisinnaavavut, Jehovalli isumakkeerfiginninnera qanoq iluaqutigisinnaavarput?
14 Ajortulioraangatta pakatsinitta, kanngusunnitta pisuusutullu misiginitta eqqarsalersissinnaavaatigut Jehovamut kiffartornissatsinnut qinngaqqunnartuujuaannassasugut. Eqqaamajulli Jehova ’isumakkeerfiginnikkumasartuusoq’. (Tussiaat 86:5) Aap, ajortuliavut peqqissimissutigigutsigik taamaalioqqinnginnissarpullu ilungersuutigigutsigu Jehovap isumakkeerfiginninnera iluaqutigisinnaavarput. Jehovap asanninnerminik ersersitsisarnera maluginiarnartoq taanna Biibilimi qanoq allaatigineqarnersoq malugiuk!
15. Jehovap ajortuliavut uagutsinnit qanoq ungasitsigilersittarpai?
15 Tussiaasiortup Daavip Jehovap isumakkeerfiginnittarnera takorlooruminartumik ima allaatigaa: „Soorlu kangia kitaanit ungasissoq, taamatut unioqqutitsinivut ungasillisippai uatsinnit.“ (Uagut allanneri uingasunngortippavut; Tussiaat 103:12) Kangia kitaaniit qanoq ungasitsigaa? Oqartoqarsinnaavoq kangia kitaanit ungasinneroqqissinnaanngitsoq; taakku marluk naapissinnaanngisaannarput. Biibilimik misissueqqissaartartoq oqarpoq oqariartaaseq isumaqartoq „sapinngisamik ungasinnerpaajusut; ungasinneroqqissinnaanngitsut“. Daavip oqaasiisa isumassarsiarititaasut oqaluttuuppaatigut Jehovap isumakkeerfigigaangamisigut, ajortuliavut uagutsinnit ungasinneroqqissinnaajunnaartillugit peertarai.
16. Jehovap ajortuliavut isumakkeerfigigaangamigit minguitsutut isigisaraatigut sooq qularutiginngissinnaavarput?
16 Annoraamineq qaamasoq simerniiariarnikuuiuk? Immaqa simerneq peerniarlugu ilungersoraluartutit piinngilaq. Malugiuk Jehovap isumakkeerfiginnissinnaanini qanoq oqaatigigaa: „Ajortuliasi aappallarissakkatut aappalutsigigaluarunik aputitut qaqortigilissapput; ilami purpurisut aappalutsigigaluarunilluunniit taamaattoq savat meqquisut ilissapput.“ (Esaja 1:18) ’Aappallarissaat purpurilu’ qalipaataapput aappallarilluinnartut. * Taakku annoraaminernik misutsissutigineqartartut qalipaatigissaarnerpaat ilagaat. Ajortip simertitaa nammineerluta peersinnaanngisaannassavarput. Jehovalli simernerit aappallarissakkatut purpurisullu aappalutsigisut peersinnaavai, aputitullu savalluunniit meqquisut qaqortigilersillugit. Jehovap ajortuliatsinnik isumakkeerfigigaangatigut, inuunitta sinnerani simerneqartutut misigisimasariaqanngilagut.
17. Jehovap ajortuliavut tunuminut naloriukkai qanoq paasisariaqarpa?
17 Hizkija nappaammit toqussutaasartumit ajorunnaarsinneqarami, Jehova qutsavigaa killinnartumik ilaatigut ima taallartalimmik erinarsorluni: „Ajortuliakka tamarsuisa illit tununnut nallorsuullugit piiarpatit.“ (Esaja 38:8-17) Uani assersuutigineqarpoq Jehovap peqqissimisup ajortuliai tigoriarlugit tunumut naloriukkai, takusinnaanngisaminut malugisinnaanngisaminulluunniit. Qinerlerfissiaq ataaseq naapertorlugu isumaa unaavoq: Guutip ’Hizkijap ajortuliai ajortuliarineqarsimanngisaannartutut isigai’. Eqqarsaat tuppallernangaarami, ilaa!
18. Pruffiitip Mikap qanoq oqaatigaa Jehovap isumakkeerfigigaangamisigut ajortuliavut peerluinnartarai?
18 Pilersitseqqinnissamik siulittuummi pruffiiti Mikap Jehovap innuttaminik peqqissisimisunik isumakkeerfiginninnissaanik qularutiginninnginnini ima oqaatigaa: „Guuti kina ilittut innerpa . . . asattuussisarluni pigisavit amiakkuisa ajortaannik? . . . Ajortuliavut tamaasa immap itineranut igissavatit!“ (Mika 7:18, 19) Oqaatsit taakku Biibilip nalaani inuusunut qanoq isumaqarnersut takorlooriaruk. Taamanikkut „immap itineranut“ igitat tiguneqaqqissinnaappat? Oqaatsit taakkua takutippaat Jehova isumakkeerfiginnikkaangami ajortuliavut peerluinnartarai.
„Guutitta nallittuingaarnera“
19, 20. (a) Hebræerit oqaluutaat ’nallittuinermik’ aamma ‘naakkinninnermik’ nutserneqartartoq qanoq isumaqarpa? (b) Anaanaasup naalungiarsuutiminut misigissuseqarnera Jehovap qanoq misiginneqataatigineranut assersuutitut Biibilimi qanoq atorneqarpa?
19 Jehovap asannittuliornerisa ilaat alla tassaavoq misiginneqataaneq. Misiginneqataanerli suua? Misiginneqataaneq nallittuinerlu Biibilimi imminnut attuumassuteqartinneqarluinnarput. Oqaatsit hebræerisuut grækerisuullu arlallit isumaasa ilagaat misiginneqataaneq. Assersuutigalugu hebræerit oqaluutaat rachamʹ nutserneqartarpoq ’nallittuinermik’ aamma ’naakkinninnermik’. Hebræerit oqaluutaat taanna, Jehovap imminut atugaa, oqaatsimut ’illissamut’ assinguvoq, oqaatigineqarsinnaallunilu ’anaanap misigissusiatut’.
20 Anaanap qitornaminut mikisumut misigissuseqarnera Jehovap qanoq sakkortutigisumik misiginneqataaneranut Biibilimi assersuutigineqarpoq. Biibili 1961-imi naqitaq naapertorlugu Esaja 49:15-imi ima allassimavoq: ’Arnap naalungianngui puiortarnerpaa, timimi iluata erniaa nallittussanagu [„misiginneqatiginagu“ (rachamʹ), The Amplified Bible]? Puioraluarpalluunniit, taamaattoq uanga puiussanngilakkit.’ Takorlooruminaappoq anaanaasup qitornami milutsinnissaa paarinissaaluunniit puiorsinnaagaa. Naalungiarsummi susinnaanngilluinnarpoq anaanamilu asannittumik isumassuinera ulloq unnuarlu naallugit pisariaqartillugu. Ajoraluartumik tusartarparput anaanaasunik paarsinerluttoqartartoq, ingammik ’ulluni atugarliungaarfiusuni’ makkunani. (2 Timotheusi 3:1, 3) Jehovali oqarpoq: ’Uanga puiussanngilakkit.’ Jehovap kiffaminut misiginneqataangaarnera pakatsisitsisanngilaq. Inunnguuseralugu misigissutsimit sakkortunerpaamit takorloorsinnaasatsinnit sakkortuneruvoq — anaanaasup naalungiarsuutiminut misigissuseqarneranit.
21, 22. Israelikkut Egyptenimi qanoq nalaataqarpat, ikioqqullutillu kappialanerat Jehovap qanoq qisuariarfigaa?
21 Jehova angajoqqaat asannittut misiginneqataanerattut qanoq misiginneqataava? Pissuseq taanna Israelikkunnut attaveqarnerani erseqqilluinnartarpoq. Ukiunik naatsorsuisalerfitta siorna 1500-kkut naalerneranni Israelikkut Egyptenimi inussiaataallutik naqisimaneqangaarput. (2 Mosesi 1:11, 14) Atugarliornerminni ikioqqullutik Jehovamut kappialapput. Guuti misiginneqataangaartoq qanoq qisuariarpa?
22 Qamuuna attortippoq. Ima oqarpoq: „Innuttama Egyptenimi naalliunnerat takusimavara, . . . nimaarlutik nillianerat tusarpara. Erloqissutaat nalunngilakka.“ (2 Mosesi 3:7) Jehovap inuit naalliuutaat takugaangamigit kappialanerallu tusaraangamiuk misiginneqatiginngitsoorsinnaanngilai. Jehova allat anniaataannik misiginnissinnaassuseqarpoq. Piginnaaneq taanna misiginneqataanermut attuumassuteqarluinnarpoq. Jehovalli innuttani misiginneqatigiinnanngilai; aammattaaq iliuuseqarpoq. Biibili 1961-imi naqitaq naapertorlugu Esaja 63:9-mi ima allassimavoq: ’Asagamigit nalligigamigillu utertippai taassuma.’ Israelikkut Egyptenimit ’assamminik pissaasumik’ aniguisippai. (5 Mosesi 4:34) Taava tupinnartuliornikkut inoqajuitsumi mannamik pilersorpai kingusinnerusukkullu namminneq nunaannut naggorissumut siulersorlugit.
23. (a) Jehovap inuttut ataasiakkaatut isumassungaaraatigut tussiaasiortup oqaasiisa qanoq uppernarsarpaat? (b) Jehovap qanoq ikiortarpaatigut?
23 Jehovap innuttani ataatsimut isigalugit misiginneqatigiinnanngilai. Inuttut ataasiakkaatut isumassungaarpaatigut. Naalliuuteqaraangatta, nalunngilluinnartaraa qularutigissanngilarput. Tussiaasiortoq ima allappoq: „[Jehovap] isaasa sammivigaat iluartut, ikioqqullutik nillianerat siutaasa tusartarpaat. [Jehovap] qanippai sequmissimasumik uummatillit, annaattarpai aserortersimasumik anersaallit.“ (Tussiaat 34:16, 19) Jehovap inuttut ataasiakkaatut qanoq ikiortarpaatigut? Immaqa naalliuutitsinnut pissutaasoq piinngilaa, ikioqqullutilli qinusut assigiinngitsorpassuartigut isumagisarpai. Oqaasiani atoriaannaasunik siunnersuuteqarpoq, taakkulu pingaaruteqangaartuupput. Jehovap ilagiit anersaakkut piukkunnaatilinnik nakkutilliisoqartippai uppeqatiminnik ikiuigaangamik misiginneqataaneranik ersersitsiniartartunik. (Jaaku 5:14, 15) ’Qinnutitsinnik tusartartutut’ Jehovap ’imminut qinusut anersaamik illernartumik tunisarpai’. (Tussiaat 65:3; Lukasi 11:13) Tamakku tamarmik Jehovap ’nallittuingaarneranut’ ersiutaapput. — Lukasi 1:78.
24. Guutip asanninnera akiniarlugu qanoq iliussavit?
24 Ataatatta qilammiusup uagutsinnut asannittuliornera eqqarsaatigeqqissaarlugu killinnangaarami, ilaa! Allaaserisap matuma siuliani eqqaasinneqarpugut Jehovap pissaanini, naapertuilluarnini ilisimassutsinilu iluaqutissatsinnik asannittumik atortarai. Allaaserisamilu uani takuarput Jehovap inuiannut tamanut — uagutsinnullu inuttut ataasiakkaanut — asanninnera maluginiarnartumik ersertartoq. Maanna tamatta immikkut imminut ima aperisariaqarpugut: ’Jehovap asanninnera akiniarlugu qanoq iliussaanga?’ Uummatikkut, tarnikkut, isumakkut iluunngarluta nukivullu tamakkerlugit asaneratigut akisigu. Qanortoq ulluinnarni inuunitsigut takutitsigu Jehovamut palligukkiartortuarnissarput ilumoorluta kissaatigalutigu. Taava Jehovap, asanninnerup Guutiata, qaninnerulissavaatigut, naassaanngitsumut! — Jaaku 4:8. (wE 7/1 03)
[Quppernerup ataani ilanngussaq]
^ imm. 16 Biibilimik misissueqqissaartartoq oqarpoq qalipaat aappallarissaatigineqartartoq allanngujaannerpaat errorsinermilu qarsujaannerpaat ilagigaat. Kanertaritikkaluaruni, sialuttaritikkaluaruni, errorneqaraluaruni sivisuumilluunniit atorneqaraluaruni allanngorneq ajorpoq.
Eqqaamavigit?
• Jehovap pissusiisa asanninneq malunnarnerpaartarigaat qanoq nalunngilarput?
• Sooq oqartoqarsinnaava Jehovap ernerminik uagut pilluta naalliuttussanngorlugu toqusussanngorlugu nunaliartitsinera asannittuliornerit annerpaartarigaat?
• Jehovap inuttut ataasiakkaatut asalluta qanoq uppernarsaavigaatigut?
• Jehovap isumakkeerfiginnittarnera Biibilimi takorlooruminartumik qanoq allaatigineqarpa?
[Atuaqqissaarnermi apeqqutit]
[Qupp. 15-mi assiliartaq]
’Guutip ernituani tunniuppaa’
[Qupp. 16,17-mi assiliartaq]
„Ilissi qupaloraarsuppassuarnit pingaarneruvusi“
[Suminngaanneernera]
© J. Heidecker/VIREO
[Qupp. 18-mi assiliartaq]
Anaanaasup qitornaminut mikisumut misigissuseqarnera Jehovap misiginneqataanera pillugu ilinniarfigisinnaavarput