Isiginnittaatsikkut takuneqarsinnaava Jehova utaqqigit?
Isiginnittaatsikkut takuneqarsinnaava Jehova utaqqigit?
„Inuttut qanoq ittuusariaqannginnerpisi iluartumik ileqqoqarnermut Guutimullu tunniusimanermut naapertuuttunik iliuuseqarlusi Jehovap ullussaata nalliuffissaa . . . utaqqitillugu eqqarsaatigiuartillugulu!“ — 2 PETRUSI 3:11, 12, NV.
1, 2. Jehovap ullussaata nalliunnissaata utaqqinera sumut assersuunneqarsinnaava?
TAKORLOORIARUK ilaqutariit neriartoqqusatik utaqqigaat. Pulaat isiliivipput. Ningiuusoq ulapippoq piariigassat kingulliit piareerniarlugit, tamaasalu naammassiniarlugit uia meeqqallu ikiuutaapput. Tamarmik pissangaqaat. Aap, ilaqutariit tamarmik pulaartussamik takkunnissaat utaqqivaat pissamaaqalutik, mamartunillu nerinissaminnut unnussiuaarnissaminnullu qilanaarput.
2 Kristumiutut pingaarnerungaartoq, „Jehovap ullussaata nalliuffissaa“, utaqqivarput! Nalliunnissaata tungaanut pruffiititut Mikatut iliortariaqarpugut, taanna ima oqarmat: „Uanga [Jehova] alaatsinaassavara, Guuti annatsitsisiga neriuffigissavara.“ (Mika 7:7) Tamanna ima paasisariaqarpa iliuuseqarnata utaqqiinnassasugut? Naamik. Suliassaqangaarpoq.
3. Petrusip allagaasa aappaat 3:11, 12 naapertorlugu kristumiut qanoq isiginnittaaseqartariaqarpat?
3 Utaqqinitsinni eqqortumik isiginnittaaseqarnissatsinnik apustili Petrusip ikiorpaatigut. Ima allappoq: „Inuttut qanoq ittuusariaqannginnerpisi iluartumik ileqqoqarnermut Guutimullu tunniusimanermut naapertuuttunik iliuuseqarlusi Jehovap ullussaata nalliuffissaa, qilaat ikumasut suujunnaarumaarfissaat pinngoqqaartullu kissassimaqisut aakkumaarfissaat, utaqqitillugu eqqarsaatigiuartillugulu!“ (2 Petrusi 3:11, 12, NV) Malugiuk Petrusip oqaatsini apeqqusernagit torluusermagit. Isumassarsisitaalluni allakkamini marlunni allaatigaa kristumiut inuttut qanoq ittuusariaqarnersut. Aamma oqaaqqissaarpai ’iliuutsinik iluartumik ileqqoqarnermut Guutimullu tunniusimanermut naapertuuttunik’ aallusseqqullugit. Naak Jiisusi Kristusip ’pissutsit aaqqissuussaanerata naggatissaanut nalunaaqqutinik’ eqqartuineranit ukiut 30-t missaat qaangiussimagaluartut, kristumiut suli eqqumasariaqarput. (Matthæusi 24:3, NV) ’Jehovap ullussaata nalliuffissaa utaqqissavaat eqqarsaatigiuassallugulu.’
4. ’Jehovap ullussaata nalliuffissaanik eqqarsaatiginnittuarneq’ qanoq paasisariaqarpa?
4 Grækerit oqaasiat allassimaffimmi „eqqarsaatigiuartillugu“-mik nutserneqartoq toqqaannartumik nutserlugu isumaqarpoq ’siuarsartuarpaa’. Soorunami Jehovap ullussaa eqqortumik oqaatigalugu ’siuarsarsinnaanngilarput’. Jiisusi Kristusimmi Ataatami akerai eqqartuunniarlugit tikiunnissaanut allaat ’ulloq nalunaaquttap-akunneraluunniit’ naluarput. (Matthæusi 24:36; 25:13) Qinerlerfissiami nassuiarneqarpoq oqaatsimut ’siuarsarpaa’-mut oqaluutip nagguia uani isumaqartoq „’tuaviortitsineq’, taamaattumillu ’ilungersornermut, iliuuseqarnermut soqutiginninnermullu’ attuumassuteqartoq“. Petrusip uppeqatini kajumissaarpai Jehovap ullussaata nalliunnissaanik tamatigut erinisungaaqqullugit. Taamaaliorsinnaapput eqqarsaatigiuarlugu. (2 Petrusi 3:12, NV) Ullumikkut „[Jehovap] ullussaa angeqisoq siooranangaaqisorlu“ taama qanitsigimmat, uaguttaaq taama isiginnittaaseqartariaqarpugut. — Joeli 3:4.
’Iliuutsit iluartumik ileqqoqarnermut naapertuuttut’
5. Qanoq takutissinnaavarput Jehovap ullussaa erinigingaartuinnaripput?
5 Jehovap ullussaani aniguinissarput erinigingaarutsigu, tamanna ’iliuutsitsigut iluartumik ileqqoqarnermut Guutimullu tunniusimanermut naapertuuttutigut’ takutissavarput. ’Iliuutsit iluartumik ileqqoqarnermut naapertuuttut’ eqqaaneqarmata Petrusip oqaaqqissaarutaa una immaqa eqqaavarput: „Meeqqatut naalattutut nalusuugallarassi kajungerisasi ileqquliunniaqinasigit, soorlu qaaqqusisersi illernartuusoq ilississaaq inuunissigut tamatigut illernartuussaasi, allassimavormi: ’Illernartuussaasi uanga illernartuugama.’“ — 1 Petrusi 1:14-16.
6. Illernartuujumalluta qanoq iliortariaqarpugut?
6 Illernartuussagutta timikkut, eqqarsaatikkut, ileqqussatigut anersaakkullu minguitsuusariaqarpugut. ’Jehovap ullussaanut’ piareersarpugut Jehovap aqqanik taaguuteqartutut illernartuujuarnitsigut? Ullumikkut taamatut minguitsuujuarnissaq imaannaanngilaq, silarsuarmi avatangiisitsinni ileqqussatigut najoqqutassiat ajorsigaluttuinnarmata. (1 Korinthimiut 7:31; 2 Timotheusi 3:13) Uagut nammineq ileqqussatigut najoqqutavut silarsuarmilu ileqqussatigut najoqqutarineqartut imminnut avissaaraluttuinnarpat? Taamaanngippat isumakulunnartoqarpoq. Naak silarsuarmi najoqqutarineqartunit qutsinnerusunik najoqqutaqaraluarluta, imaassinnaanerpa inuttut najoqqutarisavut ajorsiartuaartut? Taamaappat Guutimut iluarisaajumalluta aalajangiussilluta allannguisariaqarpugut.
7, 8. (a) ’Iliuutsinik iluartumik ileqqoqarnermut naapertuuttunik’ aallussinissap pingaaruteqarnera qanoq puigortoorsinnaavarput? (b) Sutigut allannguinissaq pisariaqalersinnaava?
7 Maanna tiingasulersaarutit internettimi pissarsiarineqarsinnaammata, angerlarsimaannarlunilu sammineqarsinnaammata, inuit siornatigut tamakkuninnga pissarsisinnaasimanngitsut, ’imaaliallaannaq tiingasulersaarutinik kinguaassiuutitigullu atoqateqarnikkut periarfissanik killeqanngitsunik neqeroorfigineqartarput,’ nakorsaq taama oqarsimavoq. Internettimi tamakkuninnga ujaasissagaluarutta Biibilimi peqqussut manna unioqqutissagaluarparput: „Mingunnartumik attueqinasi.“ (Esaja 52:11) Taamaaliussagaluarutta oqartoqarsinnaava ’Jehovap ullussaata nalliuffissaa eqqarsaatigiuaripput’? Imaluunniit eqqarsaatitsigut ullussaq taanna kinguartitertarnerparput isumaqarluta kinguaassiuutitigut kanngunartuliornertalinnik isumarput mingutsikkutsigu minguiarnissamut suli piffissaqarluta? Tamanna ajornartorsiutigigutsigu Jehovap ima qinnuiginissaa pingaaruteqarluinnarpoq: „Isikka alartikkit sallunermit, inuuginnartinnga illit aqqutigeqqusanni!“ — Tussiaat 119:37.
8 Jehovap Nalunaajaasuisa amerlanerpaartaasa, inuusuttut inersimasullu, Guutip ileqqussatigut najoqqutassiai qutsissut aalajangiuttarpaat silarsuarmilu maani kinguaassiuutitigut ileqqorlunnissamut pilerisaarutit pinaveersaartarlugit. ’Iluartumik ileqqoqarnermut naapertuuttunik’ iliuuseqartuarput paasigamikku ullut inuuffigisavut ilungersunartuusut, Petrusillu mianersoqqussutaa eqqaamavaat, taanna oqarmat: „[Jehovap] ullussaa tillinniatut nalliutissaaq.“ (2 Petrusi 3:10) Inooriaasiannit takuneqarsinnaavoq ’Jehovap ullussaata nalliuffissaa utaqqigaat eqqarsaatigiuaraallu’. *
’Iliuutsit Guutimut tunniusimanermut naapertuuttut’
9. Guutimut tunniusimanerput qanoq iliuuseqalissutigisariaqarparput?
9 Jehovap ullussaa eqqarsaatigiuassagutsigu ’Guutimut tunniusimanermut naapertuuttunik’ iliuuseqartarnissarput pingaaruteqarluinnarportaaq. ’Guutimut tunniusimaneq’ ilaatigut isumaqarpoq Jehovamik mianerinninnermik, mianerinninnittalu iluarisaanik iliortittarpaatigut. Jehovamut ilumoorfiginnilluni asanninneq Guutimut tunniusimanermut naapertuuttunik iliuuseqartitsisarpoq. Guutip piumasaraa „inuit tamarmik annaanneqassasut sallusuissummillu ilisarsissallutik“. (1 Timotheusi 2:4) ’Kimilluunniit tammaqqusinngilaq, tamaasalu allamik isumataarnissamut periarfissikkumavai.’ (2 Petrusi 3:9) Taamaammat Guutimut tunniusimanerput inuit Jehovamik pissusiinillu ilinniarnissaannik taassuminngalu malinninnissaannik ikiorniarlugit iliuuseqarnerulissutigissavarput, ilaa? — Efesosimiut 5:1.
10. Sooq ’pisuussutit nakutitsisarneri’ mianersorfigisariaqarpavut?
10 Guutip naalagaaffia salliutittuarutsigu inuunitsinni Guutimut tunniusimanermut naapertuuttunik iliuusissarpassuaqarpugut. (Matthæusi 6:33) Tamatumunnga ilaavoq nunap piinik oqimaaqatigiissumik isiginnittaaseqarneq. Jiisusi ima mianersoqqusivoq: „Sissueritsi mianersorlusilu piumatussusermut sumulluunniit, inuummi inuuneranut aalajangiisuunngilaq sumik pigisaqarnera naammattorsuarnilluunniit pigisaqaraluaruni.“ (Lukasi 12:15) Naak takorlooruminaassinnaagaluartoq uagut nammineq aningaasanik asanninnermit tappiillisinneqarnissarput, tamatta eqqaamasariaqarparput „silarsuarmi matumani isumakuluutit pisuussutillu nakutitsisarnerisa“ ’Guutip oqaasia ipitissinnaagaat’. (Matthæusi 13:22) Immaqa ullormut pissaqarumalluni aningaasarsiorniarneq imaannaanngilaq. Taamaammat nunarsuup ilaani inuppassuit isummertarput pitsaanerusumik inuulerumallutik nunamut pigissaarfiunerusumut nuuttariaqarlutik immaqalu ukiuni arlalinni ilaquttatik qimassimasariaqarlugit. Allaat Guutip innuttaasa ilaat taama isummertarput. Nunamut allamut nuunnermikkut immaqa ilaquttaminnik atortorissaarutinik pilersuisinnaanngussapput. Ilaqutariilli anersaakkut qanoq ingerlassappat? Ilaqutariit Jehovap ullussaani aniguissagunik eqqortumik siulersorneqarnatik anersaakkut pisariaqartumik nukissaqassanerpat?
11. Angutip Filippinerimiup qanoq takutippaa iliuutsit Guutimut tunniusimanermut naapertuuttut pisuussutinit pingaaruteqarnerusut?
11 Filippinerimiu suliffissarsiorluni Japaniliarsimavoq, tassanilu Jehovap Nalunaajaasui aqqutigalugit Biibilimi tusarliunneqartoq ilinnialerpaa. Uiusup ilaqutariinni siuttuusutut akisussaanissaanik Biibilimi allassimasut ilikkaramigit, paasivaa ilaquttani Jehovamut kiffartulernissaannik ikiortariaqarlugit. (1 Korinthimiut 11:3) Nuliali Filippineriniittoq upperisartaavanut akerliuvoq, aningaasanillu nassiussisarnissaa ilaqutariit Biibilimik ilinniartinniarlugit angerlarnissaaninngarnit kissaatigineruaa. Taamaakkaluartorli angerlarpoq piffissap ilungersunassusia paasigamiuk ilaquttanilu isumagiumagamigit. Naammagittarluni asannillunilu ilaquttaminik isumaginninnera akilerneqarpoq. Piffissap ingerlanerani tamarmik pallorfiginninnermi ilumoortumi ataasiussuseqalerput, nulialu piffissaq tamaat kiffartulerpoq.
12. Sooq anersaakkut ittut inuunermi salliutittariaqarpavut?
12 Pissutsit atukkavut ikuallattumiinnermut assersuunneqarsinnaapput. Illup ikuallattup nakkaatinnginnerani pigisat annaanniarlugit illumi paatsiveerulluni arpaqattaarneq silatusaarnerussava? Inunnik — imminik, ilaquttanik allanillu — illumit ikuallattumit annaassinissaq silatusaarnerungaassannginnerpa? Pissutsit aaqqissuussaanerata ajortup matuma nakkaattoornissaa qanilligaluttuinnarpoq, inuillu inuunerat navianartorsiortinneqarpoq. Tamanna nalunnginnatsigu anersaakkut ittunik salliutitsilertariaqarpugut oqaluussinerlu inuunermik annaassiniarnerusoq aallunnerusariaqarlutigu. — 1 Timotheusi 4:16.
’Minguitsuusariaqarpugut’
13. Jehovap ullussaa nalliuppat qanoq ittuunissarput kissaatigisariaqarparput?
13 Apustili Petrusip erseqqissarpaa utaqqinitsinni eqqortumik isiginnittaaseqarnissaq qanoq pingaaruteqartigisoq. Ima oqarpoq: „Asasakka, taama ittunik ilimagisaqarassi ilungersuutiginiarsiuk [Guutimut] minguitsuullusilu assuarnaatsuunissarsi eqqissillusi.“ (2 Petrusi 3:14) Petrusip iluartumik ileqqoqarnermut Guutimullu tunniusimanermut naapertuuttunik iliuuseqarnissatsinnik kajumissaareeramisigut, Jiisusip aavanik naleqangaartumik eqqiartissimalluta ’Guutimut minguitsuunissatta’ pingaaruteqarnera erseqqissarpaa. (Saqqummersitat 7:9, 14) Taamaassagutta Jiisusip pilliutaa upperisariaqarparput Jehovamullu kiffartortunngortariaqarluta tunniulluinnarsimasut kuisimasullu.
14. ’Minguitsuuneq’ qanoq isumaqarpa?
14 Petrusip kajumissaarpaatigut ’minguitsuujuarnissarput’ ilungersuutigeqqullugu. Kristumiutut ’atisavut’ — kristumiutut ileqqulersuutsivut inuttullu pissuserput — silarsuarmit mingutsinneqatsaalivavut? Atisarput simerneqartoq paasigaangatsigu ingerlaannaq simerniiartarparput. Atisarpullu kusanarnerpaaq simerneqalersimappat peqqissaarluta simerniiartarparput. Inuttut pissuserput ileqqulersuutivulluunniit kukkunernik sanngiissutinillu ’simerneqaleraangata’ aamma taamaattarpugut?
15. (a) Sooq Israelikkut nivingatalioqquneqarpat qallersaatimik isuiniittussanik? (b) Jehovap kiffai ullumikkut qanoq allaaneruppat?
15 Israelikkut peqquneqarput „nivingatalioqqullugit qallersaatimik isuiniittussanik“ aamma „nivingatani tamani ivertitseqqullugit allunaasamik tungutsorimmik qalipaatilimmik“. Sooq? Jehovap inatsisai eqqaamasinnaaqqullugit, naalassinnaaqqullugit Guutiminnullu illernartuusinnaaqqullutik. (4 Mosesi 15:38-40) Ullumikkut Jehovamut kiffaasutut silarsuarmiunit allaaneruvugut Guutip inatsisaanik najoqqutassiaanillu naalannitsigut. Assersuutigalugu ileqqussatigut minguitsuujuarniarpugut, aap illernassusia ataqqivarput guutipilussioriaatsillu tamaasa iliuuserinaveersaarlugit. (Apustilit Suliaat 15:28, 29) Mingutsinneqannginnissarput aalajangiusimalluinnaratsigu inuppassuit ataqqisarpaatigut. — Jaaku 1:27.
’Assuarnaatsuusariaqarpugut’
16. ’Assuarnaatsuuneq’ qanoq isumaqarpa?
16 Petrusi aamma allappoq ’assuarnaatsuusariaqartugut’. Qanoq taamaattoqarsinnaava? Apustili Paulusip kristumiut Filippimiittut ima oqaaqqissaarpai: „Suliassasi suliariniarsigit naammagittaalliornasi pinaasernasilu, assuarnaatsooqqullusi peqqusersuitsooqqullusilu, tassaaqqullusilu Guutip qitornai innarluitsut eqqarleriit kukkuluttortut tammarsimasullu akornanni, qilaap qaammaqqutaasut silarsuarmi qinngorfigisassinni.“ (Filippimiut 2:14, 15) Siunnersuut tamanna maleruarutsigu naammagittaalliornaveersaassaagut pinaasernaveersaassallutalu, Guutilu minguitsumik pissuteqarluta kiffartorfigissavarput. Jehovamut inoqatitsinnullu asanninneq kajumississutigalugu ’Guutip naalagaaffianik nutaarsiassaq nuannersoq’ oqaluussissutigissavarput. (Matthæusi 22:35-40; 24:14, NV) Nammineq kajumissutsitsinnit allat Guutimik oqaasianillu, Biibilimik, ilinniartinniarlugit piffissarput sooq atortarneripput inuit paasisinnaanngikkaluaraat, nutaarsiassaq nuannersoq oqaluussissutigiuassavarput.
17. Ilagiinni kristumiuni akisussaaffeqarusuttut suna killissutigisariaqarpaat?
17 ’Assuarnaatsoorusukkatta’ iliuutsitsinnut tamanut pissutigisavut misissortariaqarpavut. Silarsuarmi namminissarsiorluni ingerlaneq, ilaatigut pisuussutinik sunniuteqarnissamillu noqqaassutiginninneq, malikkunnaarparput. Ilagiinni kristumiuni akisussaaffeqarusukkutta, minguitsumik pissutigisatsinnit aamma Jehovamut allanullu asanninnitsinnit tamatigut killinneqartariaqarpugut. Qiimmaallannarpoq takullugit angutit anersaakkut ittunik pingaartitsisut, maniguullutik Jehova kiffartorfigiumagamikku uppeqatitillu ikiorusukkamikkik, nuannaarlutik ’nakkutilliisuujumasut’. (1 Timotheusi 3:1; 2 Korinthimiut 1:24) Aap, utoqqaanertatut kiffartornissamut piukkunnaatillit ’Guutip savaataanik paarsisuupput . . . pinngitsaalisaasutut pinnatik namminerli kajumissutsiminnit, . . . iluanaarniapilunneq siunertarinagu nuannaarlutilli kajumillutillu; akisussaaffigisaminnut naalagaaniassanngillat, savaatinulli maligassaallutik.’ — 1 Petrusi 5:1-4.
Eqqisseqatigiiginnartariaqarpugut
18. Pissusitik suut Jehovap Nalunaajaasuisa tusaamaneqaatigaat?
18 Naggataatigut Petrusi allassimavoq ’eqqisseqatigiinnerput’ pingaaruteqartoq. Piumasaqaat tamanna naammassissagutsigu Jehova tullerpullu eqqisseqatigisariaqarpavut. Petrusip erseqqissarpaa qamannga pisumik asaqatigiinnissaq uppeqatinillu kristumiunik eqqisseqateqaannarnissaq qanoq pingaaruteqartigisoq. (1 Petrusi 2:17; 3:10, 11; 4:8; 2 Petrusi 1:5-7) Eqqisseqatigiiginnarniarluta asaqatigiinnikkut immitsinnut kamageqatigiittariaqarpugut. (Johannesi 13:34, 35; Efesosimiut 4:1, 2) Ingammik ataatsimeersuarnitsinni nunanit tamalaanit peqataaffigineqartuni inuppassuit asaqatigiinnerput malugisarpaat. 1999-imi Costa Ricami ataatsimeersuartoqarmat mittarfimmi pisiniarfiutillip Jehovap Nalunaajaasuisa ilaasa ataatsimeersuarianik tikilluaqqusiniarlutik pisiniarfini assertoormassuk kamaatigaa. Aqaguanili Jehovap Nalunaajaasuisa tassanimiut ataatsimeersuarianik ilisarisimanninngikkaluarlutik tikilluaqqusineranni asanninneq eqqisseqatigiinnerlu malugai. Ullormi tikilluaqqusiffimmi kingullermi pisiniarfiutilik tikilluaqqusisunut ilannguppoq Biibilimillu atuaqqissaaqatigineqalerumalluni.
19. Uppeqatitta eqqisseqatiginiartarnissaat sooq pingaaruteqarpa?
19 Anersaakkut qatanngutivut ilumoorluta eqqisseqatiginianngikkutsigik, tamanna Jehovap ullussaanik silarsuarmillu nutaamik neriorsuutigisaanik uummatikkut iluunngarluta qilanaarinninnginnitsinnut takussutissaasinnaavoq. (Tussiaat 37:11; 2 Petrusi 3:13) Immaqa uppeqatitsinnik aalajangersimasumik eqqisseqateqarnissaq ajornakusoortipparput. Paratiisissami taassuma eqqisseqatigalugu sanilerinissaa takorloorsinnaavarput? Qatanngummik uagutsinnik iluarinninngitsoqarpat ingerlaannaq ’saammaakkiartortariaqarparput’. (Matthæusi 5:23, 24) Tamanna pisariaqarpoq Jehova eqqisseqatigissagutsigu. — Tussiaat 35:27; 1 Johannesi 4:20.
20. Jehovap ullussaata nalliuffissaa utaqqillugu qanoq takutittarparput?
20 Jehovap ullussaata nalliunnissaa utaqqivarput, aamma eqqarsaatigiuarparput? Ajussutsip tamarmi peerunnissaanik kissaateqangaarnerput erseqqissumik takuneqarsinnaavoq silarsuarmi kinguaassiuutitigut kanngunartuliorfiusumi minguitsuujuarnitsigut illernartuujuarnitsigullu. Jehovap ullussaata nalliunnissaa naalagaaffiatalu naalakkersuinerani inuulernissarput qamannga pisumik qilanaaraavut. Iliuutsinit Guutimut tunniusimanermit pisunit tamanna ersersinneqartarpoq. Silarsuassami nutaami eqqissineqarfiusumi inuulernissatsinnik ilimagisaqarnitsinnut aamma ersiutaasarpoq maannangaaq uppeqatitsinnik eqqisseqateqarniartarnerput. Taamaalilluta takutittarparput ’Jehovap ullussaata nalliuffissaa eqqarsaatigiuaripput’.
[Quppernerup ataani ilanngussaq]
^ imm. 8 Vagttårnet 1. januaari 2000-imoortumi, qupperneq 16-imi aamma Jehovas Vidners Årbog 1997-imi, quppernerit 51-52-ini tamatuminnga assersuutit takukkit.
Makku eqqaamavigit?
• ’Jehovap ullussaata nalliuffissaanik eqqarsaatiginnittuarnissaq’ qanoq paasisariaqarpa?
• Inooriaatsitsinni qanoq takuneqarsinnaava Jehovap ullussaa utaqqigipput?
• Sooq ’iliuutsit Guutimut tunniusimanermut naapertuuttut’ pingaaruteqarpat?
• ’Jehovamut minguitsuulluta assuarnaatsuullutalu eqqississagutta’ qanoq iliortariaqarpugut?
[Atuaqqissaarnermi apeqqutit]
[Qupp. 21-mi assiliartaq]
Eqqortumik isiginnittaaseqarluta Jehovap ullussaa utaqqigutsigu ’iluartumik ileqqoqarnermut naapertuuttunik iliuuseqartassaagut’
[Qupp. 22-mi assiliartaq]
Guutip naalagaaffianik oqaluussissutiginninneq inunnik annaassiniarneruvoq
[Qupp. 24-mi assiliartaq]
Jehovap ullussaata nalliuffissaa utaqqitillugu allat eqqisseqatiginiartartigik