Kikkulluunniit asanninneq pisariaqartippaat

KIKKULLUUNNIIT asanninneq tunngaviusumik pisariaqartippaat, qassinik ukioqarneq, piorsarsimassuseq, qanoq oqaaseqarneq ammilluunniit qalipaataa apeqqutaatinnagu. Pisariaqartitaq taanna pitinnagu pillualertoqarsinnaanngilaq. Nakorsaariaatsip tungaatigut ilisimatooq allappoq: „Asanninneq attaveqaqatigiinnerlu aalajangiisuulluinnarpoq napparsimagutta peqqikkuttaluunniit, nikallungagutta nuannaaruttaluunniit, anniaateqarutta inuummarissisimaguttaluunniit. Taamatut sunniutilimmik iisartagaqaraluarpat qularnanngitsumik nakorsat tamarmik taanna nakorsiartunut nakorsaasiuttassagaluarpaat. Ilami allaat taamaaliunngitsoorneq akisussaassuseqanngitsuliornerussagaluarpoq.“

Inuiaqatigiinni muteerniusuni tusagassiuutinit sunniuteqartunillu allanit pisuussuseq, pissaaneqarneq, tusaamasaaneq atoqatigiinnerlu inuit pisariaqartitaannit, allanut qanittumik asannittumillu attaveqarnermit, pingaartinneqarnerupput. Ilinniartitsisorpassuit atuartuutitik suliffimminni qaffakkiartornissaannik kajumissaartarpaat, iluatsitsinerlu anguneqartut aallaaviginerullugit nassuiartarpaat. Ilinniagaqarnissaq piginnaasanillu ineriartortitsinissaq soorunami pingaaruteqarpoq, imali pingaartinneqartigissava allaat ilaquttat ikinngutillu piffissaqarfiginagit? Ukiut 2000-it matuma siornatigut allaaserinnittartup ilinniarsimalluartup inuup pissusia alaatsinaallugulu misissoqqissaaramiuk inuk poqersoq asanninngitsoq ’sianissiamut qoqernartumut sianinnguamullu aviluarpaluttumut’ assersuuppaa. (1 Korinthimiut 13:1) Inuit taamaattut immaqa pisoorsuanngorlutilluunniit tusaamasanngortarput, kisiannili pillualivinneq ajorput.

Jiisusi Kristusip inuit pissusiinik ilisimasalerujussuup taakkununngalu tunniusimalluartup ajoqersuutimini Guutimut tullermullu asanninneq pingaartillugu ersersippaa. Oqarpoq: „[Jehova] Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit. . . . Tullit ilittut asassavat.“ (Matthæusi 22:37-39) Oqaatsinik taakkuninnga malinnittut kisimik ajoqersugaanik ilumoortunik taaneqarsinnaapput. Taamaattumik oqarpoq: „Asaqatigiikkussi tamatumuuna tamarmik paasissavaat ajoqersugarigissi.“ — Johannesi 13:35.

Ullutsinni asanninneq qanoq ineriartortinneqarsinnaava? Angajoqqaallu meeqqatik qanoq asanninnermik takutitsinissaannik ilinniartissinnaavaat? Allaaserisami tulliuttumi tamanna sammineqarnerussaaq.

[Qupp. 3-mi assiliartat]

Silarsuarmi piumatussutsimit aqunneqartumi asanninnermik ineriartortitsinissaq unamminiarnartuuvoq