„Taannaavoq Guuterput“
„Taannaavoq Guuterput“
Atuaqqissaaqatigiissutissani ukunani marlunni atuagaq Kom nær til Jehova (kalaallisuunngortitaanngitsoq), 2002/03-mi nunarsuaq tamakkerlugu ataatsimeersuarnerni saqqummersoq, tunngavigineqarpoq.
„Taannaavoq Guuterput, neriuffigigatsinni annaappaatigut. Taannaavoq [Jehova].“ — ESAJA 25:9.
1, 2. (a) Jehovap ataataanerpaaq Aaperaat qanoq taavaa, tamatumalu qanoq eqqarsalersissinnaavaatigut? (b) Jehovamut ikinngutinnaatut qanittumik attaveqalersinnaaneq pillugu Biibilimi qanoq neriorsoqqissaarneqarpugut?
’IKINNGUTIGA.’ Jehovap, qilammik nunamillu Pinngortitsisup, ataataanerpaaq Aaperaat taama taavaa. (Esaja 41:8) Takorloorsinnaaviuk? Inuup nalinginnaalluinnartup qilammi nunamilu kisimi Oqartussaasoq ikinngutigilersimavaa! Immaqa ima eqqarsarputit: ’Uanga Guuti taama qanitsigisumik attaveqarfigilersinnaanerpara?’
2 Biibilimi neriorsoqqissaarneqarpugut Guuti qanimut attaveqarfigineqarsinnaasoq. Aaperaat taama attaveqarsinnaavoq ’Guuti upperigamiuk’. (Jaaku 2:23) Ullumikkuttaaq ’peqqusersuitsut [Jehovami] peqataapput’. (Ussatit 3:32) Biibilimi Jaaku 4:8-mi ima kajumissaarneqarpugut: „Guuti qaninniarsiuk, taava taanna ilissinnut qanillissaaq.“ Erseqqippoq Jehovamut palligunniarluta iliuuseqarutta ’parsiassagaatigut’. Aap, pallissavaatigut. Oqaatsilli isumassarsiarititaasut taakku isumaqarpat uagut inuit ajortiliusugut naammalluinnanngitsuusugullu siulliulluta iliuuseqassasugut? Naamerluinnaq. Guutitsinnut asannittumut, Jehovamut, ikinngutinnaatut qanittumik attaveqartoqarsinnaavoq, pingaarutilinnik marlunnik iliuuseqarmat. — Tussiaat 25:14.
3. Imminut ikinngutaalersinnaaqqulluta Jehova sunik marlunnik iliuuseqarpa?
3 Siullermik Jehovap isumagaa Jiisusip ’inuunini akissatut tunniutissagaa amerlasuut utertinneqaatissaattut’. (Matthæusi 20:28) Utertitsissutitut pilliutip tamatuma Guutimut qanimut attaveqarsinnaaneq uagutsinnut ajornarunnaarsippaa. Biibilimi ima allassimavoq: „Uagut asannippugut taassuma asaqqaarmatigut.“ (1 Johannesi 4:19) Aap, Guutip ’asaqqaarpaatigut’, taamaattumillu imminut ikinngutaalersinnaanitsinnut taanna tunngaviliisuuvoq. Aappassaanik Jehova imminut saqqummiuppoq. Qanimut ikinngutigiinnerit tamarmik ilisarisimalluaqatigiinnermik pissutsiminnillu periaatsiminnillu pingaartitseqatigiinnermik tunngaveqarput. Tamanna qanoq isumaqarnersoq eqqarsaatigeriaruk. Jehova Guutiusuuppat pallitassaanngitsoq ilisarisimaneqalersinnaanngitsorlu, qanimut ikinngutigilersinnaassanngikkaluarparput. Uagutsinnulli isertunngilaq; akerlianik kissaatigaa ilisarisimalissagitsinni. (Esaja 45:19) Oqaatsimini, Biibilimi, paasisinnaasatsinnik imminut eqqartorpoq. Taamaalilluni asalluta takutiinnanngilaa, aammattaarli takutippaa kissaatigigini Ataatatsitut qilammiusutut ilisarisimalissagitsinni asalissagitsinnilu.
4. Jehovap pissusii ilinniarnerugaangatsigik qanoq misigisarpugut?
4 Takunikuuiuk meerannguaq nuannaangaarluni tulluusimaangaarlunilu ataatani tikkuarlugu kammalaatiminut ima oqartoq: „Ataataga“? Jehovamik pallorfiginnittut Ataataminnik qilammiittumik taamatut tulluusimaarutiginnitsiginissaminnut pissutissaqangaarput. Biibilimi siulittuutigineqarpoq inuit aalajaatsut siunissami ima oqarumaartut: „Taannaavoq Guuterput.“ (Esaja 25:8, 9) Jehovap pissusii ilikkariartornerutillugit misiginerujartussaagut Ataataalluarnerpaamik Ikinngutaalluarnerpaamillu ataataqarluta ikinnguteqarlutalu. Jehovap pissusii nuannersut eqqarsaatiginerugutsigik tassunga palligunnerunissatsinnut pissutissarpassuaqarluta paasilissavarput. Taamaattumik Jehovap pissusii pingaarnerit — pissaaneq, naapertuilluarneq, ilisimassuseq asanninnerlu — Biibilimi qanoq allaatigineqarnersut sammeriartigik. Allaaserisami uani pissusiisa taakkua ilaat pingasut misissornerussavavut.
„Pissarsuuvoq“
5. Sooq naleqquppa Jehovap kisimi ’Ajugaqanngitsumik’ taaneqarnera, pissaaninilu tupinnangaartoq sumut atortarpaa?
5 Jehova „pissarsuuvoq“. (Jobi 37:23) Jeremiap allagaani 10:6-imi ima allassimavoq: „Ilittut ittoqanngilaq, [Jehova], angingaarputit, aqqillu angingaarpoq pissaallunilu.“ Pinngortitamisut innani Jehova killeqanngitsumik pissaaneqarpoq. Tamanna pissutigalugu taanna kisimi ’Ajugaqanngitsumik’ taaneqartarpoq. (Saqqummersitat 15:3) Jehovap pissaanini tupinnangaartoq pinngortitsinermut, aseruinermut, sernissuinermut pilersitseqqinnermullu atortarpaa. Pissaaneqarfigisai marluk uani sammissavavut: pinngortitsisinnaanera aamma sernissuisinnaanera.
6, 7. Seqernup nukinga qanoq atsigaa, ilumoortumullu pingaarutilimmut sumut uppernarsaataava?
6 Seqinnarissumi silamiikkaanni Seqernup kissarnera malugineqarsinnaavoq. Tassa Jehovap pinngortitsinissamut pissaanerata kingunera. Seqernup nukinga qanoq atsigaa? Ilua 15.000.000 gradit missaannik kissassuseqarpoq. Seqernup iluaniittumininnguaq kakassattut atsigisoq Nunarsuarmukaassinnaasuugutsigu, kissartuliortumininnguamit taassumannga minnerpaamik 140 kilometerisut ungasitsigisumiittariaqarpoq! Sekundit tamaasa Seqineq nukiliortarpoq atomip nukinganik qaartartuliat hundredemillionillit arlallit qaarnerattut sakkortutigisumik. Taamaattoq Nunarsuup eqqoqqissaartumik ungasissuseqarluni ikualanersuaq termonukleariusoq tupinnangaartoq taanna kaavippaa. Seqinermut qanippallaaleruni Nunarsuarmi imaq aalanngussaaq; ungasippallaalerunilu imaq serminngussaaq. Qanippallaaruni ungasippallaarunilu Nunarsuaq uumassuseerutissaaq.
7 Seqineq inuunitsinnut aalajangiisuugaluartoq, inuppassuit taamaattussaannartut isigaat. Taamaalillutik Seqinermit ilinniarsinnaasarput arajutsivaat. Tussiaat 74:16-imi Jehova pillugu ima allassimavoq: „Seqineq qaammallu inissippatit.“ Seqernup Jehova, ’qilammik nunamillu pinngortitsisoq’, ataqqinarsisippaa. (Tussiaat 146:6) Taannalu pinngortitarsuup, Jehovap pissaanerujussuanik ilinniarfigisinnaasatta, ilaminiinnaraa. Pinngortitsisinnaanera ilikkariartornerutillugu ataqqinninnerujartuinnassaagut.
8, 9. (a) Jehovap kiffaminik sernissuerusunneranut illersuerusunneranullu suna assersuutissatsialaava? (b) Biibilip nalaani savanik paarsisut savaatitik qanoq sernissortarpaat, Paarsisorsuarpullu pillugu tamanna qanoq ilinniarfigaarput?
8 Aammattaaq Jehovap pissaanersuani kiffaminik sernissuinermut isumassuinermullu atortarpaa. Isumassuinera illersuutaasoq takorlooruminartumik Biibilimi allaaserineqarpoq. Assersuutitut takuuk Esaja 40:11-mi allassimasoq. Tassani Jehova imminut savanut paarsisumut assersuuppoq innuttanilu savanut assersuullugit. Ima allassimavoq: „Savaatini paarsisutut paarai, talerminik katersorpai; savaaqqat pakkuppai, savallu miluttunik piarallit siulersorlugit.“ Takorloorsinnaaviuk?
9 Uumasut savatut nujuitsutut susinnaanngitsigisut amerlanngillat. Biibilip nalaani savanik paarsisoq savaatini amaqqunut, allarsuarnut løvinullu illersorniarlugit sapiitsuusariaqarpoq. (1 Samueli 17:34-36; Johannesi 10:10-13) Ilaannikkullu savat sernissorniarlugit qajassuussisariaqarpoq. Assersuutigalugu sava savanut ungalusaq ungasillugu piaqqigaangat, paarsisup savaaraq inoorlaaq imminut illersorsinnaanngitsoq qanoq paarissavaa? Tigullugu pakkumissiutissavaa, tassa qallersaatimi qullunneranut ilillugu — immaqa ullorpassuarni. Savaaraq paarsisumut qanoq pakkumissiutsissinnaava? Imaassinnaavoq savaaraq paarsisuminukartoq immaqalu allaat niuatigut sakallugu. Paarsisorli savaaqqamik tigusisariaqarpoq pakkullugulu qajassuullugu isumannaatsumukaallugu. Paarsisorsuatta uagutsinnik sernissuerusunneranut illersuerusunneranullu assersuutissatsialaavoq!
10. Ullumikkut Jehovap qanoq ittumik sernissorneqartippaatigut, sernissuinerlu taama ittoq sooq immikkut pingaartuua?
10 Jehova kiffaminik sernissuiniarluni neriorsuiinnanngilaq. Aammattaaq Biibilip nalaani takutippaa tupinnartuliornikkut ’mianerinnitsiminik ussernartunit aniguisitsineq sapernani’. (2 Petrusi 2:9) Ullumikkummi? Nalunngilarput maannakkut ajunaarnernut tamanut sernissunngikkaatigut. Sernissueriaatsimilli pingaarnerungaartumik — tassa anersaakkut sernissuinermik — sernissorpaatigut. Imminut attaveqarnerput erlinnangaartoq sernissorsinnaaqqullugu ikiorpaatigut misilinneqarnerni aalajaannissatsinnut pisariaqartitatsinnik tamanik pilersorluta. Assersuutigalugu Lukasip allagaani 11:13-imi ima allassimavoq: „Ilissi ajortuususi qitornasi tunissutinik ajunngitsunik tunisinnaagassigit, taava qularnannginnerungaarpoq Ataatap qilammiittup imminut qinusut Anersaamik Illernartumik tuniumaarai.“ Pissaanersuup tamatuma qanorluunniit misilinneqaraluarutta qanorluunniillu ajornartorsiuteqaraluarutta aniguilluartissinnaavaatigut. (2 Korinthimiut 4:7) Taamaalilluni Jehovap periarfissippaatigut inuuginnarnissamut, ukiualuinnarniunngitsoq, naassaanngitsumulli. Neriuutit taamaattut eqqarsaatigalugit silarsuarmi matumani naalliuutit tamaasa ’sivikitsutut artornanngitsutullu’ isigisinnaavavut. (2 Korinthimiut 4:17, 1961) Guutimut pissaanerminik uagutsinnut iluaqutaasussamik taama asannitsigaluni atuisumut kajunginnginnerpugut?
„[Jehovap] eqqortoq iluaraa“
11, 12. (a) Sooq Jehovap naapertuilluartuuneranut kajungerpugut? (b) Jehovap naapertuilluartuuneranut atatillugu Daavi qanoq isummerpa, oqaatsillu isumassarsiarititaasut taakku qanoq tuppallersaatigisinnaavavut?
11 Jehova naapertuilluartumik eqqortumillu iliortarpoq, taamaattuaannarporlu, kinaassusersiortuunani. Jehovap naapertuilluartuunera misigittaatsuunngilaq. Pissusiunngilaq maajunnartoq, pissusiuvorli qamuuna nuannaalersitsisartoq tassungalu kajungilersitsisartoq. Biibilimi erseqqippoq Jehovap naapertuilluartuunera misiginneqataasuusoq. Jehovap naapertuilluartuunerata pingasutigut ersertarnera sammeriartigu.
12 Siullermik Jehova naapertuilluartuugami kiffaminut aalajaatsuuvoq ilumoorfiginnittuullunilu. Tussiaasiortup Daavip Jehovap naapertuilluartuliornerisa ilaat tamanna ilikkarpaa pingaartilerlugulu. Nammineq misigisani Guutillu suliai allat tunngavigalugit qanoq isummerpa? Ima nalunaarpoq: „[Jehovap] eqqortoq iluaraa imminullu ilumoortut imminiiginnarnagit. Taakku sernissorneqartuartarput.“ (Tussiaat 37:28) Oqaatsit taakku tuppallernarlutillu eqqissiallannannginnerpat? Guutitta ilumoorfiginnitsini isumakkiinngisaannassavai. Taamaattumik qanissagaatigut isumagissagaatigullu naatsorsuutigisinnaavarput. Tamatumunnga naapertuilluartuunera qulakkeerutaavoq! — Ussatit 2:7, 8.
13. Innuttaaqatigiinni pissakilliortunik Jehovap isumassuinera Israelikkunnut inatsisiliaani qanoq erserluarpa?
13 Aappassaanik Jehovap naapertuilluassusiata atugarliortut pisariaqartitaannik eqqumaffiginnitsippai. Innuttaaqatigiinni pissakilliortunik isumassuinera Israelikkunnut inatsisiliaani erserpoq. Assersuutigalugu iliarsuit uillarnerillu isumagineqarnissaat qulakkeerpaa. (5 Mosesi 24:17-21) Nalunngilaa ilaqutariinnut taamaattunut qanoq artornartigisinnaasoq, taamaattumillu taakkununnga ataatarpalaartumik Eqqartuussisunngorpoq Sernissuisunngorlunilu. (5 Mosesi 10:17, 18) Israelikkut mianersoqquai arnat meeqqallu illersortissaqanngitsut naqisimaneqarpata kappialanerat tusassallugu. „Kamangaalissaanga,“ Mosesimik allakkat aappaat 22:21-23 naapertorlugu taama oqarpoq. Kamassinnaaneq Jehovap pissusiisa malunnarnersaasa ilaginngilaat, saqqumisumilli naapertuilluanngitsuliortoqarpat, ingammik susinnaanngitsut pissakilliortullu eqqugaappata, naapertuilluartumik kamattarpoq. — Tussiaat 103:6.
14. Jehovap kinaassusersiortuunnginnera qanoq erserluarpa?
14 Pingajussaanik Biibilimi Mosesimik allakkat tallimaanni 10:17-imi neriorsoqqissaarneqarpugut Jehova „nakerisarsiortuunngitsoq akilersillunilu peqquserluttuliortanngitsoq“. Inuppassuarnit pissaaneqartunit oqaasissaqartunillu allaanerulluni Jehova pisuussutinit tusaamasaanermillu sunnertinneq ajorpoq. Kinaassusersiortuunngilluinnarpoq paqumisunngilluinnarlunilu. Assersuutigalugu imaanngilaq inuit aalajangersimasut ikittuinnaat kiffartorfigilernissaanut pallorfigilernissaanullu inuunermillu naassaanngitsumik neriugisaqalernissamut kisimik periarfissinneqartut. Akerlianik Apustilit Suliaat 10:34, 35-mi allassimavoq „Guuti kinaassusersiortuunngitsoq, tassaasorli inuiaqatigiinni kikkuusuniluunniit imminik mianerinnittumik iluartuliortumillu ilassinnittartoq“. Periarfissaq tamanna innuttaaqatigiinni qanorluunniit inissisimagaluartunut, qanorluunniit ammikkut qalipaateqaraluartunut sumiuugaluartunulluunniillu tamanut ammavoq. Oqartoqarsinnaannginnerpa naapertuilluartuliornerpaarpaajusoq? Qularutissaanngilaq Jehovap naapertuilluartuuneranut tunngasunik tamanik paasinninnerugutta tassunga kajungilissasugut!
’Ilami Guutip ilisimassusiata itissusia’
15. Ilisimassuseq suua, Jehovallu ilisimassutsi qanoq atortarpaa?
15 Apustili Paulusi Romamiunut allakkamini 11:33-mi atuarsinnaasatsitut allakkusussimavoq: „Ilami Guutip . . . ilisimassusiata siuneqassusiatalu itissusiat!“ Jehovap ilisimassusersuata immikkoortortai assigiinngitsut misissoraangatsigit ataqqinninngitsoorsinnaajunnaartarpugut. Pissuserli taanna qanoq isumasiorlugu nassuiarsinnaavarput? Ilisimassuseq tassaavoq ilisarsinermik, siuneqassusermik silaqassusermillu ataatsikkut piginnaaneqarneq ilikkakkanillu timitaliisinnaaneq. Jehova ilisimasaqangaarnini paasinnissinnaalluarninilu tunngavigalugit pitsaanerpaamik aalajangiiuaannarpoq piumasanilu pitsaanerpaamik piviusunngortittuaannarlugu.
16, 17. Jehovap ilisimassusersua pinngortitarsuarmi qanoq uppernarsarneqarpa? Assersuuteqarit.
16 Jehovap ilisimassusersuanut suut uppernarsaataappat? Tussiaat 104:24-mi ima allassimavoq: „Amerlangaarput pinngortitatit, [Jehova]! Pinngortippatit tamaasa ilisimasuullutit. Nunarsuaq pinngortitannik ulikkaarpoq.“ Jehovap pinngortitai pillugit ilikkagaqarnerujartortilluta ilisimassusia pillugu ataqqinerujartussavarput. Pinngortitarsuarmi ilisimassutsip tamatuma ersernera ilisimatuut iluaqutigingaarpaat. Allaat ilutsit aaqqissuussinerillu pinngortitarsuarmiittut ilaarneqarsinnaanersut paasiniarlugit misissueqqissaartoqarpoq.
17 Immaqa aasiaap qassutai qimerloorsimavatit alutoringaarlugillu. Torrallataalluinnartuupput. Qassutissiat amitsunnguit taakku, qajannarpasissut, sisattut silitsigilersikkaanni sisammit aatsullu aqerlumit pitarneqarsinnaanngitsup sananeqaataanit ninngunerulissapput. Tamanna qanorpiaq isumaqarpa? Takorlooruk aasiaap qassutai aalisakkanut qassutitut aalisariumminngaaniit atorneqartartutut atsigilersinneqartut. Aasiaap qassutai taama atsigisut timmisartumik timmisumik unitsitsisinnaassagaluarput! Aap, pinngortitarsuarmiittut tamaasa Jehovap ’ilisimasuulluni’ pinngortippai.
18. Jehovap oqaatsiminik, Biibilimik, inunnik allatsitsinera sooq ilisimassusermut ersiutaava?
18 Jehovap ilisimassusianut uppernarsaat annerpaaq oqaasianiippoq, Biibilimi. Siunnersuutit tassaniittut inooriaatsimut pitsaanerpaamut innersuussipput. (Esaja 48:17) Aammattaarli Biibilip allanneqarnerani Jehovap ilisimassusia asseqanngitsoq paasineqarsinnaavoq. Qanoq? Ilisimassutsimini Jehovap oqaatsiminik inuit allattussatut toqqarpai. Jehovap inngilit Biibilimik allatsissimasuuppagit Biibili uagutsinnut taama kajumissinartigissagaluarpa? Soorunami inngilit qutsissisitaasumiillutik Jehova allaatigisinnaagaluarpaat tassungalu asanninnertik ersersissinnaagaluarlugu. Pinngortitat anersaajusut naammalluinnartut taakku uagutsinnit ilisimasaqarnerungaartut, misilittagaqarnerungaartut nakuussuseqarnerungaartullu misigisimanerattut misigisimassagaluarnerpugut? — Hebræerit 2:6, 7.
19. Biibili inunnit allataanera pissutigalugu uagutsinnut kajumissinarluinnartuuneranik assersuuteqarit.
19 Biibili inunnit allataagami uagutsinnut kajumissinarluinnartuuvoq. Biibilimik allattut inuupput uagutsitut misigissuseqartut. Aamma taakku naammalluinnanngitsutut, misilinneqartarput tatineqartarlutillu. Ilaannikkut namminneq misigissutsitik akiukkatillu allaatigisarpaat. (2 Korinthimiut 12:7-10) Tassa inngilit allaatigisinnaanngisaat allappaat. Assersuutitut eqqarsaatigeriakkit Tussiaat 51-imi Daavip allagai. Tussiaatip qulequtaani allassimavoq Daavip sualuttumik ajortuliornermi kingorna allakkaa. Uummammiuni aniatippai, aliasungaarnini oqaatigalugu isumakkeerfigeqqullunilu Guuti qinnuigalugu. Versi 4-mi 5-imilu ima allassimavoq: „Salinnga pinerluutaarulluinnarlunga, minguersannga ajortaajarlunga! Massami unioqqutitsinikka ilisimavakka, ajortuliaralu sianigiuarpara.“ Tuss 51 Versi 7 malugiuk: „Erniuninniilli pisooreerpunga, ajortimiillunga anaanama ilumiugilermangali.“ Tuss 51 Versi 19-imi ima nangippoq: „Pilliutiga, Guuti, tassa anersaaq peqqissimisoq, uummat peqqissimisoq artorsaateqangaartorlu itigartittarinngilat, Guuti.“ Daavip anniaateqarnera malugineqarsinnaavoq. Inuup naammalluinnanngitsup saniatigut kia allap misigissutsit taamaattut allaatigisinnaavai?
20, 21. (a) Sooq oqartoqarsinnaava Biibili inunnit allataagaluarluni Jehovap ilisimassusianik imaqartoq? (b) Allaaserisami tullermi suna sammineqassava?
20 Inuit naammalluinnanngitsut allattuutinnerisigut Jehovap pilersippaa pisariaqartitarluinnarput — atuagaq ’Guutimit anersaarfigineqartoq’, inuppalaarunnaarsimanngitsorlu. (2 Timotheusi 3:16) Aap, allattut anersaaq illernartumit siulersorneqarput. Taamaattumik namminneq ilisimassusertik oqaatiginagu, Jehovap ilisimassusia oqaatigaat. Jehovallu ilisimassusia tatiginarluinnartuuvoq. Uagut ilisimassutsitsinnit qutsinnerungaartuummat Guutip asannittumik ima kajumissaarpaatigut: „[Jehova] tatigiuk uummatikkut iluunngarlutit, namminerlu paasisimasaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.“ (Ussatit 3:5, 6) Silatuumik siunnersuutip tamatuma maleruarneratigut Guutitsinnut, qilammi nunamilu tamarmi ilisimassuseqarnerpaamut, qaninnerusumik attaveqalersinnaavugut.
21 Jehovap pissusiisa kusanarnersaat nuannernersaallu tassaavoq asanninneq. Allaaserisami tullermi Jehovap asanninnini qanoq ersersittaraa sammissavarput.
Eqqaamavigit?
• Jehova imminut qanimut attaveqalersinnaaqqulluta qanoq iliuuseqarsimava?
• Jehovap pinngortitsisinnaanermut sernissuisinnaanermullu pissaaneranik assersuuteqarit.
• Jehovap naapertuilluartuunini qanoq atortarpaa?
• Jehovap ilisimassusia pinngortitarsuarmi Biibilimilu qanoq erserpa?
[Atuaqqissaarnermi apeqqutit]
[Qupp. 10-mi assiliartaq]
Savanik paarsisutut savaaqqamik pakkumiartutut Jehovap savaatini qajassuussisumik isumagai
[Qupp. 13-mi assiliartaq]
Jehovap ilisimassusia Biibilip allanneqarnerani paasineqarsinnaavoq