Jehova, sallusuissutip Guutia

„Iperagaatissavarma illit [Jehova], Guuti unneqqarissoq [sallusuissutip Guutia, NV].“ — TUSSIAAT 31:6.

1. Sallu piunngikkallarmat qilammi nunarsuarmilu pissutsit qanoq ittuuppat?

TAAMANI sallu piunngikkallarmat qilanni takusaanngitsuni pinngortitaqarpoq anersaanik naammalluinnartunik Pinngortitsisiminnik, ’sallusuissutip Guutianik’, kiffartorfiginnittunik. (Tussiaat 31:6) Ilumuunngitsoqanngilaq salloqittaasoqarnanilu. Jehovap ernini anersaajusut tamatigut ilumoortumik oqaloqatigisarpai, asavaami ingerlalluarnissaallu soqutigilluinnarlugu. Nunarsuarmi aamma taamaappoq. Jehovap angut arnarlu siulliit pinngortippai, tusarliisussatullu toqqakkani aqqutigalugu oqaluukkaangamigit tamatigut paasiuminartumik unneqqarissumillu sallusuissut oqaatigisarpaa. Nuanningaarsimassaaq.

2. Kia sallu pilersippaa, aamma sooq?

² Piffissalli ingerlanerani Guutip ernerisa anersaajusut ilaata Jehova assortulerpaa imminullu unammillertunngortilluni. Pinngortitap anersaajusup taassuma, Saatani Diaavulutut ilisimaneqalersup, kissaatigaa allat guutisiorfigissagaanni. Anguniakkani anguniarlugu allallu pissaaneqarfiginiarlugit sallu pilersippaa. Taamaalilluni ’sallutuunngorlunilu sallumut ataatanngorpoq’. — Johannesi 8:44.

3. Adamip Evallu Saatanip salloqittaatai qanoq qisuariarfigaat, qanorlu kinguneqarpa?

³ Pulateriaarsuk aqqutigalugu Saatanip arnaq siulleq, Eva, oqarfigaa toqunavianngitsoq Guutip inassutaa soqutiginngikkuniuk paarnamillu nereqqusaanngitsumik neriguni. Tamanna salloqittaaneruvoq. Aammattaaq oqarfigaa Guutisut ilerumaartoq aamma ajunngitsoq ajortorlu nalujunnaassagai paarnamik neriguni. Tamanna aamma salloqittaaneruvoq. Naak siornatigut salloqittarneqanngisaannaraluarluni nalusimassanngilaa pulateriaarsuup oqaasii Guutip uiminut, Adamimut, oqaasiinut naapertuutinngitsut. Taamaattoq aalajangerpoq Saatani upperiniarlugu, Jehova pinnagu. Salloqittarneqangaarluni paarnaq tiguaa neriffigalugulu. Tamatuma kingorna Adami aamma nerivoq. (1 Mosesi 3:1-6) Adamili aamma sallusumik tusarsimanngisaannaraluartoq oqartoqarsinnaanngilaq salloqittagaasoq. (1 Timotheusi 2:14) Iliuutsimigulli takutippaa Pinngortitsisini ajattorlugu, tamannalu inunnut ajorluinnartumik kinguneqarpoq. Adamip naalannginnera pissutigalugu kinguaavisa tamarmik ajorti toqulu aamma ajortunngorsimaneq naalliuuterpassuillu atortariaqalerpaat. — Romamiut 5:12.

4. (a) Edenimi salluliuutinut atatillugu suup paasinissaa pingaaruteqarpa? (b) Saatanimit tammartitaajumanata qanoq iliortariaqarpugut?

⁴ Aammattaaq sallu sualutsikkiartorpoq. Pingaaruteqarpoq paasissallugu naatsiivimmi Edenimi salloqittaatit Jehovap sallusuissusianut saassussinerusut. Saatanip Guuti peqqusersiornikkut aappariinnut siullernut ajunngitsumik erliguussinerarpaa. Soorunami taamaanngilaq. Adamip Evallu naalannginnertik iluaqutiginngilaat. Jehovap  oqarneratorluinnaq toqupput. Taamaattoq Saatani Jehovamik mamarliiuarpoq, taamaaliorneralu ima ingasatsigimmat ukiut hundredelikkuutaat qaangiummata apustili Johannesi isumassarsisitaalluni allappoq Saatani „silarsuarmik tamarmik tammartitsiniartoq“. (Saqqummersitat 12:9) Saatani Diaavulumit tammartitaajumanata Jehovap oqaasiatalu sallusuitsuunerannik tatiginnilluinnartariaqarpugut. Qanoq ilillutit Jehovamut tatiginninnerit nakussatsissinnaaviuk taassumunngalu akerlilersuisup peqquserlunneranut salloqittaataanullu imminut illersorsinnaallutit?

Jehovap sallusuissut nalunngilaa

5, 6. (a) Jehova sumik ilisimasaqarpa? (b) Jehovap ilisimasaqarneranut naleqqiullugu inuit qanoq ilisimasaqartigaat?

⁵ Biibilimi Jehova ’suut tamarmik pinngortitsisaattut’ allaatigineqarpoq. (Efesosimiut 3:9) Taanna ’qilammik nunamillu immamillu taakkunaniittunillu tamanik pinngortitsisuuvoq’. (Apustilit Suliaat 4:24) Pinngortitsisuugami Jehova suut tamaasa pillugit sallusuissut nalunngilaa. Tamanna ima assersuusiarineqarsinnaavoq: Takorlooruk angut illussaminik titartaariarluni illuliortoq. Nammineq paakkarutit tamaasa inissippai kikiaallu tamaasa kikiattuullugit. Illumini sumininnguit tamaasa nalunngilai, illulu taanna pillugu inunnit allanit tamanit ilisimasaqarnerungaarpoq. Inuimmi namminneq ilusilersukkatik sanaatillu ilisimalluarpaat. Taamatullu Pinngortitsisup pinngortitani pillugit ilisimaneqarsinnaasut tamaviisa ilisimavai.

⁶ Jehovap ilisimasaqangaarnera pruffiiti Esajap kusanartumik ima oqaatigaa: „Kia imeq uuttorpaa itummaminik, qilak ussersarlugu inussami isannerinik? Kia uuttorpaa nunap pujoralaa nappartamik uuttortaammik, oqimaalutarlugit qaqqat, qattornilluunniit oqimaalutaavinnik? Kia ajoqersorsinnaavaa [Jehovap] anersaava, kia siunnersortigisinnaavaa ajoqersuussisigalugulu?  Kina siunersiortarpaa paasisimasaqalerumalluni, ingerlavissaminillu eqqortumik ajoqersuuneqarumalluni? Kia ilisimasassanik ilinniartippaa, takutillugulu paasisimasaqarnissamut aqqutaasumik?“ (Esaja 40:12-14) Jehova ilumut ’Guutiuvoq nalusaqanngitsoq’, aap, „ilisimasaqarluartuuvoq“. (1 Samueli 2:3; Jobi 36:4; 37:16) Tamatumunnga naleqqiullugu ilisimasavut killeqartorujussuupput. Inuit ilisimasaqangaaraluarlutik pinngortitarsuup ’ilaminiinnaanik’ paasinnipput. Paasinninnerput ’kallerujussuarneranut’ naleqqiullugu ’isussunnerinnartut’ ippoq. — Jobi 26:14.

7. Jehovap ilisimasaqarnera pillugu Daavip suna paasivaa, uaguttaaq suna paasisariaqarparput?

⁷ Jehovap pinngortikkamisigut soorunami nalunngilluarpaatigut. Kunngi Daavip tamanna nassuerutigaa, ima allakkami: „[Jehova], illit misissuiffigisimavarma, nalunangalu. Nalunngilarma issiagaluaruma nikorfagaluarumaluunniit, ungasissumit allaat paasereertarpat qanoq eqqarsartunga. Nalunngilat pisukkuma nalagumaluunniit, aqqutikkalu tamaasa nalunngilluinnarpatit. Oqaaseq uanga oqqanni pinngorianngitsoq illit [Jehova], ilisimareeraraat naammattumik.“ (Tussiaat 139:1-4) Daavip soorunami paasivaa inuit piumasamittut iliorsinnaatitaasut. Guutimut naalakkusunnerluta naalanngikkusunnerlutaluunniit aalajangernissatsinnut taassuma periarfissippaatigut. (5 Mosesi 30:19, 20; Josva 24:15) Taamaattorli imminut nalunnginnitsinnit Jehovap nalunnginnerungaarpaatigut. Pitsaanerpaamik kissaappaatigut, aamma inuunitsinni siulersorsinnaavaatigut. (Jeremia 10:23) Alllamik ilinniartitsisoqanngilaq, immikkut ilisimasaleqanngilaq, aamma siunnersuisoqanngilaq uagutsinnik sallusuissummik ilinniartitsilluarnerusinnaasumik, ilisimassuteqalersitsilluarnerusinnaasumik pilluartitsilluarnerusinnaasumillu.

Jehova sallusuitsuuvoq

8. Qanoq nalunngissinnaavarput Jehova sallusuitsuusoq?

⁸ Ilumoortoq ilisimaneqarsinnaavoq, allaanerulluinnarporli ilumoortumik oqaluttuaannarneq, sallusuitsuuneq. Assersuutigalugu Diaavulu aalajangerpoq ’sallusuissut aalajangiunniarnagu’. (Johannesi 8:44, 1961) Jehovali ’sallusuissummik peqangaarpoq’. (2 Mosesi 34:6) Biibilimi tamarmi Jehovap sallusuissusia erseqqissarneqarpoq. Apustili Paulusi allappoq Guuti ’sallusanngitsoq’ aamma ’sallusuitsuusoq’. (Hebræerit 6:18; Titusi 1:2) Guutip sallusuissusia pissusiisa pingaarutillit ilagaat. Taamaattuminguna Jehova tunaarisinnaagipput tatigalugulu. Kiffani ilumoorfiginnittut salloqittanngisaannarpai.

9. Jehovap aqqa sallusuissummut qanoq attuumassuteqarpa?

⁹ Jehovap aqqa sallusuissusianut ersiutaavoq. Guutip aqqa isumaqarpoq: „-nngortippoq (imaluunniit: -tippaa)“. Tamanna isumaqarpoq Jehova neriorsuutiminik tamanik imminnut ataavartumik piviusunngortitsisunngortittoq. Kinaluunniit alla taamaaliorsinnaanngilaq. Jehova Qutsinnerussaartuuvoq, taamaammallu siunertaminik piviusunngortitsinermini sumilluunniit akornuserneqarsinnaanngilaq. Jehova sallusuitsuuinnarani, aammattaaq oqaatsimi tamavimmik piviusunngortinissaannut kisimi pissaaneqarpoq ilisimassuseqarlunilu.

10. (a) Jehovap sallusuissusia Josvap qanoq misigaa? (b) Jehovap neriorsuutaanik eqquuttunik sunik takusaqarnikuuit?

¹⁰ Pisimasunik maluginiarnartunik Jehovap sallusuitsuuneranik ersersitsisunik takunnittorpassuit Josva ilagaat. Egyptenimi Josvap misiginikuuaa Jehova qulinik perlussiortitsisoq siulittuisimanermisut. Josvap aamma misiginikuuaa Jehovap Israelikkut Egyptenimit aniguisikkumaarlugit, nunamut neriorsuutigisamut siulersorumaarlugit  aamma Kana’anikkut sakkutuuisa pissaanilissuit akiuuttut naalatsigitinneranni Israelikkut ikiorumaarlugit neriorsuutiminik piviusunngortitsinnera. Toqungajalerluni Josvap Israelimi utoqqaanertat ima oqarfigai: „Tamassi uummatissigut tarnissigullu ilisimassavarsi ajunngitsut [Jehovap] Guutissi ilissinnut oqaatigisaasa ilaat ataasinnguarluunniit qammuinnarsimanngitsoq. Tamarmik piviusunngorsimapput, oqaaseq ataasiinnarluunniit maangaannarsimanngilaq.“ (Josva 23:14) Tupinnartulianik Josvap misigisaasut ittunik misigisaqarnikuunngikkaluarlutit Jehovap neriorsuutaasa ilaasa eqquunnerat misigaajuk?

Jehovap sallusuissut ilisimatitsissutigaa

11. Suup takutippaa Jehovap kissaatigigaa inuit sallusuissut ilinniassagaat?

¹¹ Angajoqqaat ilaat ilisimasaqangaarput, qaqutiguinnarli meeqqatik oqaloqatigisarlugit. Qujamasuutigaarput Jehovap allaalluinnarnera. Asannilluni inuit assigiinngitsorpassuarnik nalunaarfigiuartarpai. Biibilimi ’Ajoqersuisorsuarmik’ taaneqarpoq. (Esaja 30:20, NV) Imminut tusaajumanngitsut allaat saaffigisarmagit asanningaarnera takuneqarsinnaavoq. Assersuutigalugu Jehovap Ezekieli oqaluusseqquaa nalunngereeraluarlugu oqaluussiffigisassai tusarliussamik ilassinnikkumassanngitsut. Jehova oqarpoq: „Illit inuk, Israelikkut uanga oqaaseriumasannik oqaluffigiartukkit!“ Aamma Ezekieli ima oqarfigaa: „Israelikkulli naalakkumassanngilaatsit uanga naalakkumannginnaminnga, Israelikkut tamarmik manngertunik qaaqaramik manngertunillu uummateqarlutik.“ Suliassaavoq imaannaanngitsoq, Ezekielilli aalajaalluni naammassivaa, taamaalillunilu Jehovap misiginneqataanera ersersippaa. Oqaluussiffigiuminaatsumiikkuit Guutilu tatigigukku, qularutigissanngilat taassuma pisariaqartitannik nukissaqartikkumaaraatit, soorlu pruffiiti Ezekieli nakussatsikkaa. — Ezekieli 3:4, 7-9.

12, 13. Guutip qanoq ililluni inuit nalunaarfigisimavai?

¹² Jehovap kissaatigaa „inuit tamarmik annaanneqassasut sallusuissummillu ilisarsissallutik“. (1 Timotheusi 2:4) Pruffiititigut, inngilitigut, aap, allaat ernermigut asasamigut, Jiisusi Kristusikkut, inuit oqaluffigai. (Hebræerit 1:1, 2; 2:2) Jiisusi Pilatusimut ima oqarpoq: „Taamaattumik inunngorpunga, taamaattumillu silarsuarmut pivunga sallusuissut nalunaajaassutigissallugu. Sallusuissummit pisup kialluunniit nipiga tusartarpaa.“ Pilatusi Jehovap annaassissutissatut aaqqissuussaa pillugu sallusuissummik  Guutip erneragut ilinniarnissaminut asseqanngitsumik periarfissaqarpoq. Pilatusilli sallusuissut tapersersunngilaa, Jiisusimillu ilinniartinneqarusunngilaq. Misigittaallunili ima aperivoq: „Sunaana sallusuissut?“ (Johannesi 18:37, 38) Alianassusia! Allarpassuilli sallusuissummut Jiisusip oqaluussissutigisaanut tusarnaarput. Ajoqersukkaminut ima oqarpoq: „Ilissi isisi pilluarput takunnittaramik siutisilu tusaasaramik.“ — Matthæusi 13:16.

¹³ Biibili atorlugu Jehovap sallusuissut tammatsaalivaa, isumagaalu sallusuissutip tamatuma sumi tamani inunnit pissarsiarineqarsinnaanera. Biibilimi pissusiviusut saqqummersinneqarput. Guutip inassutai, pissusii sunalu siunertarigaa tassani allaatigineqarput. Aamma nassuiarneqarpoq pissutsit inuit atugaat qanoq ittuunersut. Jiisusi qinunermini Jehovamut ima oqarpoq: „Oqaatsitit sallusuissutaapput.“ (Johannesi 17:17) Taamaammat Biibili asseqanngilluinnartuuvoq. Atuagatuaavoq Guutimit ajugaqanngitsumit nalusaqanngitsumillu isumassarsisinneqarnikkut allanneqartoq. (2 Timotheusi 3:16) Inuiannut tunissutaavoq erlinnartoq, Guutillu kiffaasa erligeqaat. Silatusaarnerussaaq ullut tamaasa atuartarutsigu.

Sallusuissut aalajangiusimaguk

14. Jehova qanoq neriorsuiva, aamma sooq taassuma upperinissaanut pissutissaqarpugut?

¹⁴ Jehovap oqaatsimini uagutsinnut oqaluttuarisai ilumooruttariaqarpavut. Imminut oqaatigisarnermisut ippoq, oqaatsinilu malillugit iliorumaarpoq. Taassuminnga tatiginninnissatsinnut pissutissaqarluarpugut. Assersuutigalugu Jehova tatigisinnaavarput oqarmat „pillaatissaq Guutimik ilisimasaqanngitsunut Naalakkamillu Jiisusimik iivangkiiliumut naalakkumanngitsunut“ aggiukkumaarlugu. (2 Thessalonikamiut 1:8) Jehova aamma upperisariaqarparput oqarmat naapertuilluartuliortut asallugit, oqarmat uppertut tamaasa inuunermik naassaanngitsumik tuniumaarlugit, aamma oqarmat nilliasuerutsikkumaarlugu anniartuerutsikkumaarlugulu, aap, allaat toqu atorunnaarsikkumaarlugu. Neriorsuutip kingulliup tatigisassaanera Jehovap erseqqissarpaa apustili Johannesi ima peqqullugu: „Allagit, oqaatsit tamakku uppernarlutillu ilumoormata.“ — Saqqummersitat 21:4, 5; Ussatit 15:9; Johannesi 3:36.

15. Salloqittaatit suut Saatanip siuarsarpai?

 ¹⁵ Saatanip Jehova akerlerluinnaraa. Inuit qaammarsarnagit salloqittarpai. Pallorfiginninnermik minguitsumik tunussitinniarsarai salloqittaaterpassuit siuarsarneratigut. Assersuutigalugu Saatanip isumaqalersinniarsaraatigut Guutip misigeqatiginngikkaatigut nunarsuarmilu naalliuutit soqutiginngikkai. Biibilimili ersersinneqarpoq Jehovap pinngortitani soqutigilluinnarai, ajussuserlu naalliuutillu aliasuutigigai. (Apustilit Suliaat 17:24-30) Saatanip aamma inuit isumaqalersinniarsarai sammisassat anersaakkut ittut piffissaajaataaginnartut. Biibilimili neriorsoqqissaarneqarpugut ’Guutip iluaatsuunnginnami puiorsimanngikkai suliavut asanninnerpullu aqqanut takutissimasarput’ aamma „ujarlersini akissarsisissagai“. — Hebræerit 6:10; 11:6.

16. Sooq kristumiut mianersortariaqarpat sallusuissullu aalajangiusimasariaqarlugu?

¹⁶ Saatani pillugu apustili Paulusi ima allappoq: „Silarsuup matuma guutiata [uppinngitsut] eqqarsaataat tappiillisippai qaamaneq iivangkiiliumit Kristusip Guutip assingata naalannassusianik nalunaaruteqartumit pisoq taakkununnga takoqqunagu.“ (2 Korinthimiut 4:4) Evatut ilaat Saatani Diaavulumit salloqittarneqangaarput. Allat salloqittarneqanngillat, Adamitulli aalajangerput piaaralutik naalanniarnatik. (Judasi 5, 11) Taamaammat kristumiut mianersortuaannarnissaat sallusuissummillu aalajangiusimanninnissaat pingaaruteqarpoq.

Jehovap ’piviusumik uppernissaq’ piumasaraa

17. Jehovamut ajunngitsumik attaveqarumalluta qanoq iliortariaqarpugut?

¹⁷ Jehova iliuutsimini tamani sallusuitsuugami naatsorsuutigaa pallorfiginnitsini aamma taamaassasut. Tussiaasiortoq ima allappoq: „[Jehova], kinaava tupinni tikeraajusinnaasoq, qaqqanni illernartumi inissarsisinnaasoq? Tassaavoq taanna assuarnaalluni inuusoq, innarluitsumik iliortoq ilumoortumillu uummammit pisumik oqalulluni.“ (Tussiaat 15:1, 2) Jehovap qaqqaata illernartup eqqaaneqarnera juutinut taama erinarsortunut qularnanngitsumik qaqqamik Zionimik eqqaasitsivoq. Qaqqamimi tassani tupermi kunngi Daavip angerutsip illerfia inissippaa. (2 Samueli 6:12, 17) Qaqqaq tuperlu eqqaasitsipput Jehovap assersuutaasumik inigisaanik, taannalu tassavoq inuit Guutimut iluarisaanissartik qinnutiginiarlugu tassumunnga palliguffigisinnaasaat.

18. Guutimut ikinngutaassagaanni suna piumasarineqarpa?

¹⁸ Jehovamut ikinngutaajumasut tamarmik ilumoortumik oqalunnermik saniatigut aamma ’ilumoortumik uummammit pisumik oqaluttariaqarput’. Guutip ikinngutai ilumoortut uummatimikkut unneqqarissuusariaqarput, takutittariaqarpaallu ’piviusumik upperissaqarlutik’, sallusuissusermi uummammit pilerfeqarpoq. (1 Timotheusi 1:5; Matthæusi 12:34, 35) Guutimut ikinngutaasoq peqqusersiortuunngilaq allallu salloqittartarnagit ’Jehovap peqqusersiortut maajugimmagit’. (Tussiaat 5:7) Silarsuarmi tamarmi Jehovap Nalunaajaasuisa Guutip sallusuitsuunera ilaarniarsaraat. (wE 8/1 03)

Uteqqiinermi apeqqutit

• Sooq Jehovap suut tamaasa pillugit sallusuissut nalunngilaa?

• Suup takutippaa Jehova sallusuitsuusoq?

• Jehovap sallusuissut qanoq ilisimatitsissutigaa?

• Guutip kiffai sumik piumaffigineqarpat?

[Atuaqqissaarnermi apeqqutit]

[Qupp. 10-mi assiliartat]

Sallusuissutip Guutiata pinngortitani pillugit suut tamaviisa ilisimavai

[Qupp. 13,14-mi assiliartat]

Jehovap neriorsuutai eqquutissapput