Sooq inuit allat atorfissaqartikkivut

„Marluugaanni ataasiinnaanermit pitsaaneruvoq . . . Arlaat orluppat aappaata nikuitittarpaa.“ — Kunngi Salomo

QANGA kunngiusimasoq Salomo oqarsimavoq: „Marluugaanni ataasiinnaanermit pitsaaneruvoq, suleruloornerminni akissarsilluassapput. Arlaat orluppat aappaata nikuitittarpaa. Eqqanarli kisimiittoq! Orluguni nikuititsisussaqanngilaq.“ (Oqaluussisartup oqaasii 4:9, 10) Inuit pissusilersuutaannik alaatsinaattup silatuup taamatut oqaaseqarluni ilagiittarnissamik pisariaqartitsinerput kisimiinniartuunnginnissallu pingaaruteqarnera nassuiarpaa. Tamanna inuup isummerneriinnarinngilaa. Salomop isumassarsiai ilisimassusialu Guutimeersuupput.

Kisimiinniarneq silatusaarnerunngilaq. Immitsinnut pisariaqartippugut. Kikkulluunniit allanit nukittorsarneqarnissartik ikiorneqarnissartillu pisariaqartippaat. „Inuk inoqatiminit immikkoorniartuusoq nammineq piumasani malillugu iliortarpoq, saqitsaassisarpoq allat eqqortuusorisaat soqutiginagit,“ ussammi Biibilimeersumi oqaatigineqarpoq. (Ussatit 18:1, 1990) Taamaattumik sociologit innuttaaqataanissamut inuillu inoqatiminnut soqutiginninnissaannut asuliinnaq kajumissaarisanngillat.

Professori Robert Putnamip kaammattuutigaa inooqatigiinneq soqutigineqalerseqqinniarlugu „Guutimut upperneq sunniuteqarnerulersinneqassasoq“. Jehovap Nalunaajaasuisa ilaqutariissuartut nunarsuaq tamakkerlugu ilagiinni isumassorneqarnertik pissutigalugu taakkua imminnut atanerat immikkut malugisimavaat. Apustili Petrusip oqaasii malilluinnarlugit ’qatanngutitik asavaat’, tamarmillu ’Guuti mianeraat’. (1 Petrusi 2:17) Nalunaajaasut immikkoorniartannginnamik immikkoorniarnerup kingunipilui ingalassimasarpaat. Sammisarpassuisa iluaqutaasut pallorfiginninnerannut attuumassuteqartut suliaqartittarpaat inoqatitik Guutip oqaasiata sallusuissutaasup Biibilimiittup paasinissaanut ikiortarlugit. — 2 Timotheusi 2:15.

Asanninneq peqatigiinnerlu inuunerminnik allannguissutigaat

Jehovap Nalunaajaasui ataasioqatigiillutik tamarmik immikkut pingaarutilimmik inissisimaffeqarput. Assersuutigalugu Miguel, Froylán aamma Alma Ruth, tamarmik ilaqutariinnit Latinamerikamiunit ataatsinit pisut, eqqaaneqarsinnaapput. Inunnguuseralugu saanermikkut nappaateqaramik alliartorpiarsinnaanngillat, tamarmillu qamutinik kaassuartakkanik ingerlateqartariaqarput. Jehovap Nalunaajaasuinik ilisarisimasaqalernerat inuunerannut qanoq sunniuppa?

Miguel oqarpoq: „Inuuninni ajornartorsiuteqartarsimaqaanga, Jehovalli Nalunaajaasui atassuteqarfigisalerakkit  inuunera allanngorluinnarpoq. Kisimiinniarneq navianaateqarluinnarpoq. Kristumiut ataatsimiinnerini uppeqatinik sapaatip-akunneri tamarluinnaasa peqateqartarnera ullumikkut nuannaarnernut nalerisimaarnernullu pissutaaqataalluinnarpoq.“

Alma Ruth oqarpoq: „Ilaannikkut isumatsassimallungalu aliasuttarpunga. Jehovali ilisarigakku paasivara qanittumik attaveqarfigilersinnaallugu, taassuma ikinngutiginissaa uannut pingaarnerpaanngorpoq. Ilaquttatta tapersersoqaatigut, taamaattumillu immitsinnut qaninnerulerpugut.“

Miguelip angutaata ernini atuarnermik allannermillu ilinniartippaa. Tamatuma kingorna Miguelip Froylán aamma Alma Ruth atuarnissaannik ilinniartissinnaalerpai, anersaakkut inuunerannut pingaaruteqaqisumik. „Pissarsiffiulluaqaaq, Biibilimimmi Biibililersaarutinillu atuarnitsigut anersaakkut pisariaqartitsinerput matussusersinnaalerparput,“ Alma Ruth oqarpoq.

Miguel maanna ilagiinni kristumiuni utoqqaanertaavoq. Froylánip Biibili qulingiluariarlugu naasimavaa. Alma Ruthip 1996-imiilli pionerinngorluni (piffissaq tamaat oqaluussisartutut) Jehovamut kiffartornini annertusissimavaa. Oqaluttuarpoq: „Jehovap pilluaqqusineratigut anguniakkakka anguakka. Uppeqatima asanartut tapersersorsimaqaannga, oqaluussinermiinnaanngitsoq aammali aqqanilinnik Biibilimik atuaqqissaaqateqartalerninni.“

Assersuutissaalluartoq alla tassaavoq Emelia. Taanna ajutoorsimavoq niuni qimerlunilu ajoquserlugit, qamutini kaassuartakkani issiaannartariaqalerluni. Mexicomi Jehovap Nalunaajaasuinit Biibilimik atuaqqissaaqatigineqartalerpoq, 1996-imilu kuisippoq. Emelia oqarpoq: „Sallusuissut ilikkanngikkallarakku inoorusukkunnaarlunga imminornissara eqqarsaatigisarpara. Inuunera imaqanngitsutut misigigakku ulloq unnuarlu qiasarpunga. Jehovalli Nalunaajaasui attaveqarfigisalerakkit qatanngutit asanninnerat malugisinnaalerpara. Uannut soqutiginninnerat qiimmaallaatigeqaara. Ingammik utoqqaanertat ilaat uannut qatanngutitut imaluunniit ataatatut issimavoq. Taassuma ilagiinnilu kiffartortut ilaasa ataatsimiigialeraangama aasarpaannga, kaassuarlungalu kiffartornermut ilagisarlunga.“

José 1992-imi Jehovap Nalunaajaasuisa ilaattut kuisippoq. 70-inik ukioqarpoq, 1990-imi utoqqalinersiaqalersimavoq kisimiittuullunilu. José siullermik nikallungakulasaqaaq, Jehovap Nalunaajaasuisali ilaata oqaluussiffigimmani ingerlaannaq kristumiut ataatsimiinnerinut peqataasalerpoq. Ataatsimiinnerni tusakkani takusanilu nuannarai, soorlu qatanngutit ataqatigiinnerat  Josémullu inuttut soqutiginninnerat. José maanna utoqqaanertanit ilagiinnilu kiffartortunit isumassorneqartarpoq. (Filippimiut 1:1; 1 Petrusi 5:2) Uppeqatit taamaattut Josémut ’tuppalliutaapput’. (Kolossemiut 4:11) Nakorsiaattarpaat, pulaartarlugu aamma sisamariarluni pilattartimmat annertoqqusersorpaat. „Isumassorpaannga. Ilaqutavittut ipput. Ilagilerakkit nuannaarpunga,“ oqarpoq.

Tunisineq ilumut pilluarnartuuvoq

Kunngi Salomo oqarami „marluugaanni ataasiinnaanermit pitsaanerusoq“, pisuussutinik pissarsiniarnermut suleruloornerup piunngissusia eqqartoqqammerpaa. (Oqaluussisartup oqaasii 4:7-9) Inuppassuit ullumikkut tamannarpiaq ilungersuutigaat, allaat allanik attaveqarluarnissartik sumiginnartarpaat, ilaquttaminnik ilaqutarinngisaminnillu.

Taamatut piumatunerup namminissarsiornerullu inuppassuit kisimiinniartunngortittarpaat. Taamaaliornerat pilluarnerulersitsinaniluunniit naammagisimaarinninnerulersitsisanngilaq, taamaattoqarneralu aningaaserituut ilarpassuisa neriuutaarussimanerannit pakatsisimanerannillu nalinginnaaqisumit takuneqarsinnaavoq. Akerlianik oqaluttuat siusinnerusukkut eqqaaneqartut takutippaat Jehovamik pallorfiginnittunik tassungalu tulliminnullu asanninnermik kajumissisinneqartunik ilaqartarneq qanoq iluaqutaatigisoq. Inuit eqqaaneqartut kisimiinniarnerup kinguneranik misigissutsinik pilersartunik qaangiiniarnerminni kristumiutut ataatsimiinnerni peqatigiittarnerit, tapersersoqatigiittarnerit isumassoqatigiinnerillu aammalu kiffartornermi ilungersoqataasarnerit iluaqutigisimavaat. — Ussatit 17:17; Hebræerit 10:24, 25.

Immitsinnut pisariaqartikkatta tupinnanngilaq allanik ikiuisarneq ilorrisimaalersitsisarmat. Allat iluaqutissaannik annertuumik suliaqarsimasoq Albert Einstein oqarsimavoq: „Inuup naleqassusia . . . sumik tunisinera naapertorlugu, qanorlu tigusisinnaanera pinnagu, isiginiarneqartariaqaraluarpoq.“ Tamanna Jiisusi Kristusip oqaasiinut naleqqulluinnarpoq: „Tunisineq tigusinermit pilluarnarneruvoq.“ (Apustilit Suliaat 20:35) Asaneqarluni iluaqaaq, aammali asanninnermik nittaanissaq peqqinnartuuvoq.

Nakkutilliisup ukiorpassuarni ilagiinnik assigiinngitsunik anersaakkut ikiuisarsimasup kristumiullu pissakitsut ataatsimiittarfissaannik sanaartornerni ikiuuttarsimasup misigissutsini imatut oqaatigai: „Qatanngutinnik kiffartuussineq nuannarigakku taakkulu nuannaartut qujamasuttullu takugakkit ikiuinissamut periarfissarsiortuarnissannut kajumissivunga. Paasivara allanut inuttut soqutiginninnermik takutitsineq pilluarnermut matuersaataasoq. Nalunngilaralu uagut utoqqaanertatut ’anorersuarmut oqquiffittut, inoqajuitsumi kuunnguatut kuuttutut, nunami imissaaleqisumi qaarsorsuup alanngortaatut’ ittussaalluta.“ — Esaja 32:2.

’Iluallaraasoq nuanneqisorlu peqatigiillutik ineqaraangata’

Allanik ikiuineq Jehovamillu pallorfiginnittunut qanittumik attaveqarneq ilumut nuannaarutissiillunilu pilluaatissiisarpoq. ’Ata’, tussiaasiortoq nillerpoq, ‘iluallaraasoq nuanneqisorlu, qatanngutigiit peqatigiillutik ineqaraangata.’ (Tussiaat 133:1, 1961) Ilaqutariinni tapersersoqatigiissagaanni ataasiussuseqarnissaq pisariaqarpoq, soorlu tamanna Miguelimut, Froylánimut Alma  Ruthimullu atatillugu paasigipput. Aamma pallorfiginninnermi ilumoortumi ataasiussuseqarneq annertuumik pilluaqqussutaavoq. Aappariit kristumiut siunnersoreerlugit apustili Petrusi allappoq: „Kiisalu tamassi isumaqatigiillusi inooqatigiigitsi misiginneqataasarlusi, qatanngutigiittut asaqatigiillusi, nallittuisarlusi qanilaarlusilu.“ — 1 Petrusi 3:8.

Ikinngutigiilluarneq misigissutsitigut anersaakkullu iluaqutaaqaaq. Paulusip uppeqatini ima kajumissaarpai: „Tuppallersarsigit ernumasut, isumaginiarsigit sanngiitsut, tamaasa nikallujuisaarfigisigit. . . . Noqqaassutiginiarsiuk akornassinni tamanullu ajunngitsuliornissaq.“ — 1 Thessalonikamiut 5:14, 15.

Taamaattumik allanut iliuuseqarnissamut periarfissarsiortarit. „Tamanut ajunngitsuliorniarta, pingaartumik uppeqatitsinnut,“ taamaaliornermi siunertaqarluartumik ilorrisimaarnartumillu inuuneqalersitsisarpoq. (Galatiamiut 6:9, 10) Jiisusip ajoqersugaa Jaaku allappoq: „Qatanngummik angummik arnamilluunniit atisassaqanngitsoqarpat nerisassaqanngitsoqarlunilu arlassilu oqarfigippagit: ’Eqqissillusi aallarniaritsi, aamma oqortunik atisiniarisi naammatsillusilu nerillusi,’ uffalu timikkut pisariaqagaannik tuninagit — taava tamanna sumut iluaqutaassava?“ (Jaaku 2:15, 16) Akissut paasinarsereerpoq. Tamatta ’immikkut nammineq iluaqutissarput pinnagu inoqatittattaaq iluaqutissaa isumaginiartigu’. — Filippimiut 2:4.

Immikkut pisariaqartitsisoqaleraangat, soorlu pinngortitarsuarmi ajunaarnersuaqaraangat, Jehovap Nalunaajaasui timip pisariaqartitaanik ikiorsiiginnartanngillat. Inoqatiminnut pingaarutilerujussuarmik aamma aallussilluartarput — tassalu Guutip naalagaaffia pillugu nutaarsiassamik nuannersumik oqaluussissutiginninnermik. (Matthæusi 24:14) Oqariartuummik taassuminnga tuppallersaasumik neriuuteqalersitsisumillu Jehovap Nalunaajaasui 6 millioninit amerlanerusut siammartereqataapput, taamaalillutillu allanut piviusumik asannittumillu soqutiginninnertik takutittarpaat. Biibilimik ilinniartitsinertik aqqutigalugu inoqatimik pisariaqartitaat alla matussuserniarlugu aamma ikiuisarput. Suna?

Pisariaqartitatta pingaarnissaat matussuserneqartariaqarpoq

Piviusumik pilluassagaanni Guutimut ajunngitsumik attaveqartoqartariaqarpoq. Ima oqartoqarsimavoq: „Inuup, sumiluunniit qaqugukkulluunniit, pinngortitaaqqaanerminiit ullumimut imminik pissaaneqarnerusumik qutsinnerusumillu torlorfiginninnissaminik pisariaqartitsinerata takutippaa upperisarsiornissaq inuup inunnguuserigaa, tamannalu ilisimatuussutsikkut akuerineqartariaqarpoq. . . . Qutsinnerusumik inuup ujarlernera upperinninneralu takugaangatsigu mianerinninnermik ataqqinningaarnermillu ulikkaartariaqarpugut.“ — Man Does Not Stand Alone A. Cressy Morrisonimit.

Jiisusi Kristusi inerniliivoq: ’Pilluarput anersaakkut pisariaqartitsinerminnik miserratiginninngitsut’. (Matthæusi 5:3, NV) Inuit inoqatiminniit sivisuumik avinngarusimagaangamik ingerlalluartanngillat. Pinngortitsisumiilli avinngarusimanissaq suli ajorneruvoq. (Saqqummersitat 4:11) „Guuti pillugu ilisimassummik“ ujarlernissaq malinnissaalu pingaartittariaqarparput. (Ussatit 2:1-5) Anersaakkut pisariaqartitatta matussuserneqarnissaat aalajangiusimalluinnartariaqarparput, kisimiilluta pisinnaannginnatta Guutimillu pisariaqartitsilluinnaratta. Pilluarluta iluarinartumillu inuuneqassagutta Jehovamut, ’nunarsuarmi tamani Qutsinnerussaartumut’, pitsaasumik attaveqartariaqarpugut. — Tussiaat 83:19.  (wE 7/15 03)

[Qupp. 5-mi assiliartaq]

Miguel: „Inuuninni ajornartorsiuteqartarsimaqaanga, Jehovalli Nalunaajaasui atassuteqarfigisalerakkit inuunera allanngorluinnarpoq“

[Qupp. 5-mi assiliartaq]

Alma Ruth: „Jehova ilisarigakku paasivara qanittumik attaveqarfigilersinnaallugu“

[Qupp. 6-mi assiliartaq]

Emelia: „Sallusuissut ilinnianngikkallarakku inuunera imaqanngitsutut misigaara“

[Qupp. 7-mi assiliartaq]

Anersaakkut pisariaqartitat matussuserniarlugit Guutimik pallorfiginnittut peqatigineqartariaqarput