Guutip naalagaaffianik oqaluussissutiginninnermit nutaarsiassat

Kipisuitsumik erinitsajuinneq angusaqarluarfiuvoq

JESUSI KRISTUSI siulittuivoq ulluni kingullerni asanninneq ’amerlanerni nillertunngorumaartoq’. Tamatuma kinguneranik inuit amerlasuut silarsuup ilarujussuani Naalagaaffik pillugu iivangkiiliu soqutiginngilaat. Allaat ilaasa upperisaq mitaatigiinnarpaat. — Matthæusi 24:12, 14.

Kisianni taamaakkaluartoq Naalagaaffiup nalunaajaasuisa unamminiarnartoq upperlutik naammagittarlutillu tiguaat, tamanna Tjekkiemilu misigisimasap takutippaa.

Jehovap Nalunaajaasuisa marluusut arnaq matup matoqqasup silataanniit oqaluuppaat. Piffissaq ingerlalaareersoq arnap matu ikersilaarpaa, assanilu silammut isaallugu Napasuliaq Alapernaarsuiffik aamma Iteritsi!, oqaluussisartut neqeroorutaat, tigupallappai. Nipi qujalluni oqarpoq matulu parnaarneqarluni. „Pulaaqqissavarput?“ oqaluussisartut imminnut aperipput. Aappaa pioneriuvoq, imaluunniit piffissaq tamaat oqaluussisartuuvoq, aalajangerporlu pulaaqqinniarlugu. Kisianni taamatut pisoqaqqippoq taamatullu ukioq ataaseq naallugu ingerlavoq.

Pioneri aalajangerpoq periaatsini allanngortinniarlugu Jehovamullu qinuvoq ikioqqulluni. Arnaq atuagassianik pajoqqikkamiuk inussiarnersumik aperaa: „Qanoq ippit? Atuagassiat atuarlugit qanoq isumaqarfigaagit?“ Arnaq apeqqutinut aallaqqaammut qisuarianngilaq, kisianni marloriarluni pulaarneqarnermi kingorna ilasseraarnerulerpoq. Ullut ilaanni matu ammavippaa, kisianni oqaloqatigiinneq sivikitsuinnaavoq.

Arnap matumi oqaloqateqarusunnginnera eqqarsaatigalugu pioneri aalajangerpoq arnaq allaffiginiarlugu nassuiaanniarlugu sooq aggertuarnerluni, aamma Biibilimik atuaqqissaaqatiginissaanik neqeroorfiginiarlugu. Kiisami, ukiup aappaa affaq ingerlareersoq nikallujuilluni ilungersoreerluni, arnap Biibilimik atuaqqissaaqatigilernissaanut pioneri iluatsitsivoq. Pionerip nuannaarutigisaanik tupaallaatigisaanillu kingusinnerusukkut arnap oqaluttuaraa ’pionerip siullerpaamik atuagassianik tunimmanili Guuti upperilersimallugu’.

Aap, oqaluussilluni sulinermi ajoqersuganngortitsinermilu erinitsajuilluni nikallujuinnerup kingunerisinnaavai angusat qiimmaallannartut. — Matthæusi 28:19, 20.  (wE 8/1 03)