Atuartartut apeqqutaat

Silarsuarmi nunani amerlasuuni katittunut tunisineq nalinginnaavoq. Tunissutinik taamaattunik tunisigaanni tunissutisiassarsigaanniluunniit Biibilimi najoqqutassiat suut sianigineqassappat?

Biibili naapertorlugu ajunngitsumik pissuteqarluni ajunngitsorlu pillugu tunisineq ajunngilaq. Biibilimi kristumiut ilumoortut kajumissaarneqarput Jehova tunisiumatooq ilaaqqullugu. (Jaaku 1:17) Aamma apustili Paulusip kristumioqatini kajumissaarpai: „Puiunngisaannarsigittaaq ikiuinissaq tukkornerlu, pilliutut taama ittut Guutip iluarisarimmagit.“ Tassa kristumiut tukkusuujoqqullugit kajumissaarneqarput. — Hebræerit 13:16; Lukasi 6:38.

Nunat ilaanni, soorlu USA-mi Tuluit nunaannilu aammalu Qallunaat Nunaanni katittussat atortussaarniarfimmut iserlutik „kissaatigisat allattorsimaffiannik“ pilersitsisarput. Aaqqissuussineq taanna tassaavoq katittussat atortussaarniarfimmi nioqqutissat akornanni tunissutisiassatut kissaatigisinnaasaminnik toqqaaneq, taava kissaatigisatut allattorneqartarput. Allattukkat taakkua kingornagut pisiniarfimmiitinneqartarput imaluunniit allaat internettimi saqqummiunneqarlutik, katittussallu ikinngutitik ilaquttatillu nalunaarfigisinnaavaat pisiniarfimmi pineqartumi allattorsimaffimmik taamaattumik peqartoq. Tunissutissat pisiarineqariaraangata allattorsimaffimmit peerneqartarput. Aaqqissuussineq atoriaannaasinnaavoq tunisisussap tunissutissamik ujarlernermi piffissamik sipaarutigisinnaasaa, tunisittullu tunissutisiaminnik assigiinnik, nuannarinngisaminnilluunniit taarsiiniarnissaq pisarissersuutigisariaqassanngilaat.

Aappariilertussat allattuiffik taamaattoq atussanerlugu soorunami namminneq aalajangissavaat. Kisianni mianersuutigissavaat kristumiut tamatigut najoqqutassaannik unioqqutitsinnginnissartik. Assersuutigalugu imaassinnaavoq pissiariit akisoorujussuaannarnik allattuisut. Taava akissakilliortut immaqa tunissuteqarsinnaassanngillat, immaqalu isumaqarput qaaqqussummut qujaannartariaqarlutik annikitsuinnarmik tunissuteqarluni aggerneq nuanninngitsoq pinngitsoortinniarlugu. Arnaq kristumiu allappoq: „Taamatut tunisineq ingasappallaangajalerpoq. Tukkusuujuniarsimavunga, kisianni ulluni makkunani tunisisarnera qangatulli tunisillunga nuannaarutigiunnaarsimavara.“ Katinneq nuannaarnermut pissutaasussaagaluartoq tamanna kingunerippagu alianassusia!

Katittunut tuniserusuttut soorumani misigisimassanngillat tunissutissaq pisiniarfimmi aalajangersimasumi pisiaassassoq imaluunniit aalajangersimasumik akeqassasoq tunisittut nuannaarutigissappassuk. Tamaasa eqqarsaatigalugit Jiisusi oqarpoq, Guutimi pingaaruteqartoq tassaasoq, tunisisup uummataata qanoq issusia tunissutip nalinga pinnani. (Lukasi 21:1-4) Apustili Paulusi ikiortarialinnut naakkinnissutit pillugit assinganik allappoq: „Kinaluunniimmi tunisissaaq uummammigut aalajangersimanermisut, pinaasernani pinngitsaalineqarnaniluunniit; kajumittumimmi tunisisoq Guutimit nuannarineqartuuvoq!“ — 2 Korinthimiut 9:7.

Soorlu kiminngaaneerneranik ersersitsisumik tunissutissap allagartalernera Biibilimik unioqqutitsinerunngilaq. Kisiannili nunat ilaanni ileqquuvoq najuuttunut tamanut saqqumisumik tunisisup kinaassusiata nalunarutigineqarnera, tamannalu ajornartorsiutinik nassataqarsinnaavoq. Immaqa tunisisup kinaanini paasitikkusunngilaa Matthæusi 6:3-mi tunngaviusumik najoqqutassaq malikkusukkamiuk, tassani Jiisusi oqarpoq:„Piitsunut tunissutinik tunissuteqartaraangavit talerpivit qanoq-iliornera saamippit arajutsigiliuk.“ (Matthæusi 6:3) Allat immaqa isumaqarput tunisineq tunissuteqartup tunisittullu kisimik susassarigaat. Pingajussaanillu allarluinnaq tunissutisiat puuiarneranni tunisisut atiinik atuaaneq kikkut tunisinerunerannik sanilliussininngorsinnaavoq. (Galatiamiut 5:26) Kristumiup kialuunniit kissaatiginavianngilaa tunisisut atiisa atuarnerisigut kinaluunniit nuanniitsumik misigisaqartissallugu. — 1 Petrusi 3:8.

Aap, Guutip oqaasiini tunngaviusumik najoqqutassiat malikkutsigit, tunisineq suli tassaasinnaavoq nuannaarutissiisoq. — Apustilit suliaat 20:35.  (wE 9/1 03)