Jehova tatigiuk
Jehova tatigiuk
„Illit neriuffigaakkit, [Jehova], inuusunninnilli qimarnguffigisarpakkit, [Jehova].“ — TUSSIAAT 71:5.
1. Unammillersoq kina savanik paarsisup Daavip unammiumavaa?
GOLIATI inorujussuuvoq 3 meteringajattut angitigisoq. Taamaattumik tupinnanngilaq Israelikkut sakkutuuisa tamarmik naapinnissaa qunugimmassuk! Sapaatip-akunnerini arlalinni ullaat unnuillu tamaasa filisterersuup Goliatip Israelikkut sakkutuui mitaatigisarpai, imminullu unammisussamik toqqaatinniarsaralugit. Naggataatigut unammillertoq unammiumaneqarpoq. Taamaaliortoq sakkutuujunngilaq, angutaavorli inuusuttunnguaq, tassa savanik paarsisoq Daavi. Akeqqaminut sanilliullugu inuaqqatut ippoq. Immaqa Goliatip eqqornaveeqqutaanit sakkuinillu oqimaannerunngilarluunniit! Taamaattoq inorujussuaq naapinniarpaa taamaalillunilu sapiissusermut assersuutaajualerluni. — 1 Samueli 17:1-51.
2, 3. (a) Sooq Daavip Goliati isumalluarluni naapigiarsinnaavaa? (b) Jehovamik tatiginnilerniarluta iliuuserisariaqakkavut marluk suut mississussavavut?
2 Daavip suna sapiillissutigaa? Tamanna erserpoq oqaasiini utoqqalilluni allassimagunagaani: „Illit neriuffigaakkit, [Jehova], inuusunninnilli qimarnguffigisarpakkit, [Jehova].“ (Tussiaat 71:5) Aap, Daavip inuusuttuunermini Jehova tatigilluinnarpaa. Goliati toqqaannartumik ima oqarfigaa: „Illit ornipparma panaqarlutit qalugiusaqarlutillu panaqarlutillu qatiingasumik. Uangali ornippakkit Katersaarsuit [Jehovaata] Israelip sakkutuuisa Guutiata mitallerfigisavit aqqani.“ (1 Samueli 17:45) Goliatip nukittoorsuunini sakkorsuanilu tatigigai Daavip Jehova tatigaa. Qilammi nunamilu kisimi oqartussaalluni Naalagaasoq iligalugu Daavi inunnik qunuginninnissaminut pissutissaqanngilaq, inuk qanorluunniit angitigisoq qanorluunniillu sakkugissaartigisoq akiugassarigaluaruniuk.
3 Daavimik oqaluttuap Jehovamik tatiginninnerulernissannik kissaateqalersippaatit? Qularnanngilaq ilarpassuavut taamaattut. Taamaattumik iliuuserineqarsinnaasut marluk misissoriartigik Jehovamik tatiginnilissutigisinnaasavut. Siullermik ajugaaffigisariaqarparput inuppassuit taamatut tatiginninnissaminnut akornutigisartagaat. Aappassaanik Jehovamik tatiginninneq qanorpiaq isumaqarnersoq paasiniartariaqarparput.
Jehovamik tatiginninnissamut akornutaagajuttoq
4, 5. Sooq inuppassuit Guuti tatigiuminaatsippaat?
4 Inuit Guutimik tatiginninnissaannut suna akornutaasarpa? Sooq ajortunik pisoqartarnera inuppassuit nalornissutigaat, inuppassuillu ilinniartinneqarput naalliuutinut Guuti akisussaasoq. Ajunaartoqaraangat immaqa palasit ilaat oqartarput Guutip toqusut ’qilammi imminukartikkai’. Aammattaaq upperisarsiornikkut siuttorpassuit oqaluussissutigisarpaat pisut tamaasa — aamma silarsuarmi ajunaarnerit ajortuliarineqartullu tamaasa — Guutip qangarsuarli siumut aalajangigarigai. Guuti taama misigittaatsigisoq tatigiuminaassaqaaq. Saatani, uppinngitsut eqqarsaataannik tappiillisitsisoq, ’anersaapiluit ajoqersuutaannik’ taamaattunik tamanik siuarsaaniarsuataarpoq. — 1 Timotheusi 4:1; 2 Korinthimiut 4:4.
5 Saatanip kissaatigaa inuit Jehova tatigiunnaassagaat. Guutip akeraata taassuma kissaatiginngilaa inuit naalliuutaannut pissutiviusoq ilisimassagipput. Aamma sooq naalliunnartoqarnera Biibilimi allassimasunit ilikkareersimagutsigu Saatanip puiortikkusuppaatigut. Taamaammat pitsaassaaq ilaannikkut eqqarsaatigisarutsigik silarsuarmi naalliunnartoqarneranut tunngaviusumik pissutaasut pingasut. Taamaaliortarutta uummatitsigut eqqississaagut paasillugulu Jehovap ajornartorsiutivut akisussaaffiginngikkai. — Filippimiut 1:9, 10.
6. Inuit naalliunnerannut pissutaasoq suna Petrusip allagaani siullerni 5:8-mi eqqaaneqarpa?
6 Inuit naalliuutaannut pissutaasut ilagaat Saatanip Jehovap kiffai aalajaatsut assuarnaatsuujunnaarsinniarmagit. Jobi assuarnaatsuujunnaarsinniaraluarpaa, taamanikkullu iluatsitsinngikkaluarluni taamaatiinnanngilaq. Silarsuarmut matumunnga naalagaasutut Jehovap kiffai aalajaatsut ’iiniarsarai’. (1 Petrusi 5:8) Taamaammat tamarluinnatta ulorianartorsiorpugut! Saatanip Jehovamut kiffartorunnaarsinniarsaraatigut. Taamaattumik akeqqatsinnit malersugaatittarpaatigut. Qanorluunniilli annernartigigaluarpat pinertusaarnissatsinnut pissutissaqarluarpugut. Taamaalilluta Saatanip sallutuujuneranik uppernarsaaqataagutta, Jehovap uummataa nuannaartissavarput. (Jobi 2:4; Ussatit 27:11) Jehovap malersorneqarnermi pinertusaarnissamut nukissaqalersikkaangaatigut tatiginerulersarparput. — Tussiaat 9:10, 11.
7. Naalliuutinut pissutaasoq suna Galatiamiut 6:7-imit paasisinnaavarput?
7 Naalliuutinut pissutaasoq alla najoqqutassiami matumani erserpoq: „Inuup siaruartikkani aamma katersorumaarpai.“ (Galatiamiut 6:7) Ilaannikkut inuit ilaat ajortumik siaruarterisarput kukkusumik aalajangiinermikkut tamatumalu kingunerisaanik anniaaterpassuaqalersarlutik. Immaqa aalajangerput mianersuaatsumik biilerniarlutik ajunaarnermik kinguneqartumik. Inuppassuit aalajangerput pujortartartuuniarlutik uummallunnermik puakkulluunniit kræfternermik kinguneqartumik. Kinguaassiuutitigullu inuunerlunniarlutik aalajangertut kingunerlutsitsisinnaapput ilaqutariinni avissaartuullutik, imminut ataqqiunnaarlutik, kinguaassiuutitigut tunillaattartunik nappaateqalerlutik kissaatiginngisamillu naartulerlutik. Immaqa ilaasa nalaataminnut Guuti pisuutittarpaat, aalajangiinerlunnermilli kingunerisaat katersuinnarpaat. — Ussatit 19:3.
8. Naalliuutinut pissutaasoq suna Oqaluussisartup oqaasii 9:11-mi eqqaaneqarpa?
8 Naalliunnartoqarneranut pissutaasut pingajuat Oqaluussisartup oqaasii 9:11-mi erserpoq: „Tulliutillugu seqernup ataani takuara arpannermi oqilasuut aalajangiisuunngitsut, sorsunnermi sapiitsut aalajangiisuunatik, inuussutissaqarnermi ilisimasut aalajangiisuunatik, pisuussutini silassorissut aalajangiisuunatik, nuannarineqarnermi paasisimasaqarluartut aalajangiisuunatik, atugariumaakkanit tamarmik eqqorneqarumaarmata [piffissarmi nalaatsornikkullu pisut taakkuninnga tamanik attuisarput, NV].“ Ilaannikkut imaaginnartarpoq sumiiffimmi piffissamilu kukkusumiittugut. Kinaagaluarutta, qanorluunniillu piginnaaneqaraluarutta, tassanngaannaq naalliuuteqalersinnaavugut toqusinnaallutalu. Assersuutigalugu Jiisusip nalaani Jerusalemimi inuit 18-it toqupput napasuliamit uppiffigitikkamik. Jiisusip siornatigut ajortuliaat pillugit Guutimit pillaatisiaannginnerarpaa. (Lukasi 13:4) Naagga, naalliuutinut taamaattunut Guuti pisuutinneqarsinnaanngilaq.
9. Naalliunnartoqarneranut tunngatillugu inuppassuit suna paasinngilaat?
9 Taakkua naalliunnartoqarneranut pissutaasut ilagaat, ilisimanissaallu pingaaruteqarpoq. Tamatumunngali tunngasoq suli alla inuppassuit paasiuminaatsippaat, tassa sooq naalliunnartoqarnera Guutip akuerineraa.
Sooq naalliunnartoqarnera Guutip akueraa?
10, 11. (a) Romamiut 8:19-22 naapertorlugu ’pinngortitat’ qanoq pineqarpat? (b) Pinngortitat piunngitsuussusermut kia naalatsigitinnerai qanoq paasineqarsinnaava?
10 Pingaarutilik taanna pillugu apustili Paulusip Romamiunut allagaani paasissutissaqarpoq. Paulusi ima allappoq: „Pinngortitammi erinisullutik Guutip qitornaasa saqqummersitaanissaat utaqqivaat. Pinngortitammi naalatsigititaapput piunngitsuussusermut namminneq piumasarinngisaminnik naalatsigititsisorli pissutaalluni, neriullutillu pinngortitattaaq namminneq aniguisitaajumaartut nungujassusermi inussiaataanermit kiffaanngissuseq Guutip qitornaasa naalannarsiffissami pisassaat pigilerlugu. Nalunngilarpummi pinngortitat tamarmik suli peqatigiillutik anersaarulullutillu nimaartut.“ — Romamiut 8:19-22.
11 Versit taakku paasissagutsigik apeqqutit pingaarutillit akineqaqqaartariaqarput. Ilaatigut uku: Kia pinngortitat piunngitsuussusermut naalatsigitippai? Inuit ilaasa Saataniunerarpaat; allat Adamiunerarpaat. Taakkuusinnaanngillalli. Sooq? Pinngortitanik piunngitsuussusermut naalatsigititsisoq neriuuteqartitsilluni taamaaliormat. Aap, inuit uppertut neriuuteqalersippai naggataatigut „aniguisitaajumaartut nungujassusermi inussiaataanermit“. Adami Saataniluunniit taamatut neriuuteqalersitsisinnaanngillat. Jehova kisimi taamaaliorsinnaavoq. Taamaattumik erseqqippoq taanna pinngortitanik piunngitsuussusermut naalatsigititsisuusoq.
12. „Pinngortitat“ kikkuunerannik kukkusumik qanoq paasinnittaaseqartoqarpa, apeqqullu qanoq akineqarsinnaava?
12 Kisiannimi „pinngortitat“ tassani eqqaaneqartut suuppat? Isumaqartoqarpoq tassaasut silarsuarmi pinngortitat tamarmik, uumasut naasullu ilanngullugit. Uumasulli naasullu „kiffaanngissuseq Guutip qitornaasa naalannarsiffissami pisassaat“ neriuutigilersinnaavaat? Naagga. (2 Petrusi 2:12) Taamaattumik oqaatsimi „pinngortitat“-imi inuit kisimik pineqarsinnaapput. Pinngortitanuku Edenimi pikitsitsisoqarmat ajortimit toqumillu eqqorneqartut neriuuteqarnissamillu pisariaqartitsingaartut. — Romamiut 5:12.
13. Edenimi pikitsitsineq inunnut qanoq kinguneqarpa?
13 Pikitsitsineq tamanna inuiannut qanorpiaq kinguneqarpa? Paulusip oqaaseq ataasiinnaq atorlugu allaatigaa: piunngitsuussuseq. ’Piunngitsuussuseq’ isumaqarpoq kinguneqanngitsoq imaluunniit iluaqutaanngitsoq. Ujarlerfissiaq naapertorlugu oqaaseq nassuiarneqarpoq sunaluunniit „iluaqutaanngitsoq soorlu atortoq siunertaasutut atorsinnaanngitsoq“. Inuit pinngortinneqarput naassaanngitsumik inuusussatut ilaqutariittullu naammalluinnartutut ataasiussuseqartutullu, nunarsuarmik paratiisiusumik isumaginnittussatut. Naalliunnartumilli nukillalaarnartumillu inuupput, inuunikillutillu. Jobip oqarneratut: „Inuk arnamit erniusoq inuunikittarpoq eqqissinaatsorsiortaqalunilu.“ (Jobi 14:1) Tamanna piunngitsuussutsimi inuunertut oqaatigineqartariaqarpoq!
14, 15. (a) Jehovap inuiannut eqqartuussutaa naapertuilluartuuneranut qanoq uppernarsaataava? (b) Sooq Paulusi allappa pinngortitat „namminneq piumasarinngisaminnik“ piunngitsuussusermut naalatsigititaasut?
14 Maanna apeqqut pingaarneq tikipparput: Sooq Jehovap, ’nunarsuarmik tamarmik eqqartuussisuusup’, inuiaat naalatsigitippai inuunermut naalliunnartumut nukillalaarnartumullu? (1 Mosesi 18:25) Taamaaliorami naapertuilluartuliorpa? Aap, eqqaamajummi angajoqqaavut siulliit qanoq iliortut. Guutimut pikitsitsinermikkut Saatanimut, Jehovap kisimi oqartussaaneranik apeqqusiisumut, ililiupput. Jehovamut attaveqarani aqunneqarnermik pinngortitamillu anersaajusumit pikitsitsiumatuumit siulersorneqarnermik inummut pitsaaneruneraaneq iliuutsimikkut tapersersorpaat. Jehovap pikitsitsisut eqqartuukkamigit piumassaannik tuniinnarpai. Saatanimit sunnerneqarlutik inuit nammineersinnaatippai. Pissutsit taamaatsillugit aalajangiineq suna naapertuilluartuliornerusinnaava inuit piunngitsuussusermut naalatsigitinnerannit, neriuutissiitigalugit?
15 Soorunami pinngortitat tamanna ’namminneq piumasarinngilaat’. Qinigassaqarnata ajortimut nungujassusermullu inussiaataalluta inunngorpugut. Jehovalli nallittuinermigut Adami Evalu inuutikkallarpai kinguaassiortillugillu. Taakkua kinguaavisut ajortip toqullu piunngitsuussusiannut naalatsigititaagaluarluta, Adamip Evallu iliuuserinngitsuugaannik iliuuseqarnissamut periarfissaqarpugut. Jehova tusaasinnaavarput namminerlu misigalugu kisimi oqartussaassutsiminik naapertuilluartumik naammalluinnartumillu atuinera, inuillu Jehovamik sumiginnaallutik aqutsinerat anniaataasumik, pakatsinermik piunngitsuussusermillu kinguneqaannartartoq. (Jeremia 10:23; Saqqummersitat 4:11) Saatanillu sunniinera suli ajornerulersitsivoq. Ilumoortut taakku inuit oqaluttuarisaanneranni uppernarsineqarluinnarput. — Oqaluussisartup oqaasii 8:9.
16. (a) Qanoq qularutiginngissinnaavarput ullumikkut silarsuarmi naalliunnartunut Jehova akisussaanngitsoq? (b) Jehovap asanninnermigut inuit uppertut aalajaatsullu qanoq neriuutissippai?
16 Tassa Jehovap inuiaat piunngitsuussusermut naalatsigitikkamigit naapertuilluartuliorluinnarpoq. Tamannali isumaqarpa Jehova piunngitsuussusermut naalliunnartunullu ullumikkut naalliuutigisatsinnut pisuusoq? Assersuuteqariarta. Eqqarsaatigiuk eqqartuussisoq pinerluttumik pineqaatissiisoq. Immaqa pillagaasoq pineqaatissinneqarsimatilluni naalliuuteqangaarpoq, eqqortumilli oqassava oqaruni annikilliuutiminut eqqartuussisoq pisuusoq? Naamerluinnaq! Aammattaaq Jehova ajussutsimut qanorluunniit ittumut pilerfiunngisaannarpoq. Jaaku 1:13-imi ima allassimavoq: „Guuti ajortumit usserneqarsinnaanngilaq, namminerlu kimilluunniit ussiisanngilaq.“ Aamma eqqaamasariaqarparput Jehova neriuuteqartitsilluni taamatut pineqaatissiisoq. Asannilluni isumagaa Adamip Evallu kinguaavisa uppertut aalajaatsullu piunngitsuussuseerunnissaa misigissagaat nuannaarutigisinnaassagaallu „kiffaanngissuseq Guutip qitornaasa naalannarsiffissami pisassaat“. Inuit aalajaatsut sioorassutigeqqinngisaannassavaat pinngortitat tamarmik piunngitsuussusermi naalliuleqqinnissaat. Jehovap pissutsinik naapertuilluartumik iliuuseqarfiginninnera naassaanngitsumut uppernarsaataassaaq taanna eqqortumik Naalagaasoq kisimi oqartussaasoq. — Esaja 25:8.
17. Naalliunnartoqarneranut pissutaasunik eqqarsaatiginnittarnerput uagutsinnut qanoq sunniuteqartussaava?
17 Inuit naalliuutaannut pissutaasut taakku eqqarsaatigigaangatsigik, ajussutsimut Jehovamik pisuutitsinissatsinnut tatiginnikkunnaarnissatsinnulluunniit sumilluunniit pissutissaqarnerpugut? Naamivik, taamatut atuaqqissaartarnerup Mosesitut oqarsinnaatissavaatigut: „Qaarsuuvoq [Jehova], naammalluinnartuupput suliai, innarluitsuupput aqqutigisai tamarmik. Guutiuvoq aalajaatsoq, salloqittaanngisaannartoq; naapertuilluartuuvoq peqqusersuitsuullunilu.“ (5 Mosesi 32:4) Eqqarsaatit tamakku ilaannikkut eqqaaqqittartigik isumaliutigeqqissaarlugit. Taava misilinneqaraangatta Saatanip uagutsinnik qulalersitsiniarnera akiorsinnaasassavarput. Aallaqqaataanimi pineqartut aappaat? Jehovamik tatiginninneq qanoq paasisariaqarpa?
Jehovamik tatiginninneq qanoq paasisariaqarpa?
18, 19. Oqaatsit suut atorlugit Biibilimi kajumissaarneqarpugut Jehovamik tatiginninnissatsinnut, tamatumunngali atatillugu kukkusumik qanoq paasinnittaaseqartoqarpa?
18 Guutip oqaasiani ima kajumissaarneqarpugut: „[Jehova] tatigiuk uummatikkut iluunngarlutit, namminerlu paasisimasaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.“ (Ussatit 3:5, 6) Oqaatsit nuannersuupput tuppallernartuullutillu. Qilammi nunamilu allamik Ataatatsitut qilammiusutut asannittutut taama tatiginartigisoqanngilaq. Taamaattoq oqaatsit taakku Ussatit-ni atuarnerat ulluinnarni malinnerinit ajornannginnerungaarpoq.
19 Jehovamik tatiginninnerup qanoq paasisariaqarneranik inuppassuit kukkusumik paasinnittaaseqarput. Isumaqartoqarpoq misigissusiinnaasoq uummammi imminit pilersartoq. Allallu isumaqarput Guutimut tatiginninneq isumaqartoq ilimagisinnaagipput ajornartorsiutinut annikilliuutinullu tamanut sernigissagaatigut ulluinnarnilu ajornartorsiutivut tamaasa aaqqissagai — ingerlaannavik! Paasinnittaatsilli taamaattut tunngavissaqanngillat. Tatiginninneq misigissusiinnaanngilaq, piviusorsiortuuvorlu. Inersimasunut tunngatillugu tatiginninneq ilaatigut isumaqarpoq eqqarsaatigilluakkanik aalajangiisarneq.
20, 21. Jehovamik tatiginninneq qanoq paasisariaqarpa? Assersuuteqarit.
20 Ussatit 3:5 eqqarsaatigeqqeriaruk. Tassani Jehovamik tatiginninneq nammineq paasinnissinnaassusermik tatiginninnerup akerliatut taaneqarpoq. Tassa ataatsikkut taamaaliortoqarsinnaanngilaq. Imaappa paasinnissinnaassuserput atorsinnaanngikkipput? Naagga, Jehovammi taamatut piginnaaneqartippaatigut, naatsorsuutigaalu imminut kiffartornitsinni atussagivut. (Romamiut 12:1, 1961) Aalajangiigaangattali suna tatigisarparput? Eqqarsartaaserput Jehovap eqqarsartaasianut naleqqutinngippat, ilisimassusia piuneratut akuerisinnaavarput — uagut eqqarsartaatsitsinnit qutsinnerungaartutut? (Esaja 55:8, 9) Jehovamik tatiginninneq ilaatigut isumaqarpoq eqqarsartaaserput taassuma eqqarsartaasianut naleqqussassagipput.
21 Assersuuteqarsinnaavugut imaattumik: Eqqarsaatigikkit ilaqutariit biilerlutik angalaartut. Erneeraat tunuani issiavoq, angajoqqaavilu saavani, ataataasoq aquttuuvoq. Angalaarnermi assigiinngitsunik ajornartorsiuteqaleraangat — immaqa aqqutissartik nalulertarpaat, imaluunniit sila aqquserngilluunniit pissutaallutik ajornartorsiuteqaleraangat — erneq naalattoq tatiginnittorlu qanoq qisuariartarpa? Tunuaniit angunni nilliaffigisarpaa biililu qanoq aqussaneraa oqaluttuullugu? Angajoqqaami aalajangigaannut akerliliisarpa, issiavimminilu uninngaqquneqaraangami narrattarpa? Naagga, pissusissamisoorluinnartumik meeqqap tatigaa angajoqqaami nalunngikkaat pissutsini taamaattuni suna pitsaanerpaanersoq, naammalluinnartuunngikkaluarlutik. Jehova Ataatagaarput naammalluinnartoq. Nangaanngivilluta tatigisariaqannginnerparput, ingammik pissutsini misilinneqarfiusuni? — Esaja 30:21.
22, 23. (a) Sooq ajornartorsiuteqaleraangatta Jehova tatigisariaqarparput, qanorlu taamaaliorsinnaavugut? (b) Allaaserisami tulliuttumi suna sammissavarput?
22 Ussatit 3:6-imili ersersinneqarpoq Jehova ’eqqarsaatigiuartassagipput sumiikkaluaraangattaluunniit’, ajornartorsiorfiinnarniunngitsoq. Ulluinnarni aalajangiisarnitsinni ersertariaqarpoq Jehova tatigigipput. Ajornartorsiuteqaleraangat sapilertassanngilagut, paatsiveeruttassanngilagut, Jehovalluunniit siunnersuutai, qanoq iliortoqarsinnaaneranik pitsaanerpaamik innersuussisut, sumiginnartassanngilavut. Misilinneqarnerit Jehovap kisimi oqartussaaneranik tapersersuinissamut, Saatanip sallutuujuneranik uppernarsaanissamut, naalannerullu pissutsillu allat Jehovamik nuannaartitsisut ineriartortinnissaannut periarfissiisutut isumaqarfigisariaqarpavut. — Hebræerit 5:7, 8.
23 Sumilluunniit akornuteqaraluarutta Jehova tatigalugu takutissinnaavarput. Taamaaliorsinnaavugut qinunikkut Jehovallu oqaasianut peqatigiiffianullu siunnersortissarsiorluta. Ajornartorsiuteqaraangattali Jehova qanoq tatigisinnaavarput? Allaaserisami tulliuttumi tamanna sammineqassaaq.
Qanoq akissavit?
• Daavip qanoq takutippaa Jehova tatigalugu?
• Ullumikkut inuit naalliuutaannut pissutaasut pingasut taakkit. Taakkuninnga ilaannikkut eqqarsaatiginnittarneq sooq iluaqutaava?
• Jehovap inuit qanoq eqqartuuppai, aamma sooq eqqartuussinerua naapertuilluartoq?
• Jehovamik tatiginninneq qanoq paasisariaqarpa?
[Atuaqqissaarnermi apeqqutit]
[Qupp. 9-mi assiliartaq]
Daavip Jehova tatigaa