Oqaloqatigiittarneq anersaakkut ineriartornartoq pingaartiguk

„Oqaatsinik mikiarsimasunik qanissinnit aniatitaqarniaqinasi, oqaatsinilli ajunngitsuinnarnik aniatitaqaritsi ineriartornissamut pisariaqartunik, tamakku tusartunut pilluaatissaaqqullugit.“ — EFESOSIMIUT 4:29.

1, 2. (a) Inuup oqalussinnaanera qanoq pingaaruteqartigaa? (b) Jehovap kiffaasa piginnaaneq tamanna qanoq atorusuppaat?

„INUUP oqalussinnaanera paasiuminaatsuuvoq; Guutimit tunissutaavoq, tupinnartuliaavoq.“ Oqaasilerisoq Ludwig Koehler taama oqarsimavoq. Tunissut Guutimeersoq erlinnartoq taanna taamaattussaannartut immaqa isigaarput. (Jaaku 1:17) Eqqarsaatigeriarulli aappat aanaartoorluni oqalussinnaajunnaaraluarpat qanoq annaasaqaataatigissanersoq! „Oqaloqatigiilluartaqaagut nuannersumillu oqaloqatigiittarluta,“ Joan oqaluttuarpoq, taassuma uia qanittukkut qaratsamigut aanaartoorsimavoq. „Taamatut oqaloqatigiittarnerput maqaaseqaara!“

² Oqaloqatigiittarneq ikinngutigiinnermut nakussatsissutaasinnaavoq, paatsooqatigiinnernik aaqqiiffiusinnaavoq, nikallungasunik qiimmassaaffiusinnaavoq, uppernermik nakussatsitsiffiusinnaallunilu pissarsiffiulluarsinnaavoq — tamakkuli isumaminik pisanngillat. Kunngi silatooq Salomo ima maluginiagaqarpoq: „Eqqarsariaqqaarnani oqaaserisat panatut kapisisarput, ilisimasulli oqaa katsorsaataasarpoq.“ (Ussatit 12:18) Jehovap kiffaasut katsorsaataasunik ineriartuutaasunillu oqaaseqartarnissarput kissaatigaarput, ajuallannartuniunngitsoq aamma nikallornartuniunngitsoq. Oqalunnitsigullu Jehova unnersiutigerusupparput, oqaluussinitsigut oqaloqatigiittarnitsigullu. Soorlu tussiaammi allassimasoqartoq: „Guuti ulloq tamaat unnersiutigissavarput, aqqit qujassutigissavarput naassaanngitsumik.“ — Tussiaat 44:9.

3, 4. (a) Oqaatsitsinnut tunngatillugu suna tamatta ajornartorsiutigaarput? (b) Oqaaserisartakkavut sooq soqutaanngitsutut oqaatigineqarsinnaanngillat?

³ Ajoqersugaq Jaaku mianersoqqusilluni allappoq: „Inoqanngilaq oqqamik naalatsitsisinnaasumik.“ Eqqaasitsivortaaq: „Tamatta amerlasuunik kukkussuteqartarpugut. Oqalunnermigut kukkussuteqartanngitsoq naammalluinnartuuvoq timiminillu tamarmiusumik naalatsitsisinnaasuulluni.“ (Jaaku 3:2, 8) Tassa naammalluinnartuunngilagut. Taamaattumik ajunngitsumik siunertaqaraluarluta oqaatsivut ineriartornartuujuaannanngillat Pinngortitsisitsinnillu unnersiutiginnissutaajuaannarnatik. Taamaattumik oqaatsitta mianersuutiginissaat ilinniartariaqarparput, Jiisusimi oqarsimavoq: „Ullormi eqqartuussiffissami inuit oqaaserisimasatik piunngitsut tamaasa akisussaaffigissagaat. Oqaatsivit pinngitsuutissavaatsit oqaatsivillu pillagassaatissavaatsit“. (Matthæusi 12:36, 37) Aap, Guutip ilumoortup oqaatsitsinnut akisussaatikkumaarpaatigut.

⁴ Nikallornartut oqaluuserinaveersaarniaraanni pitsaanerpaat ilagaat oqaloqatigiinnermik anersaakkut ineriartornartuutitsiniarnissaq. Allaaserisami uani takutinneqassaaq qanoq taamaaliorsinnaanersugut, suut eqqartorsinnaanerivut, ineriartornartunillu oqaloqatigiissuteqartarnerput qanoq iluaqutigisinnaaneripput.

 Sunik uummammioqarnerit eqqumaffiginiaruk

5. Eqqartukkavut eqqarsaatigalugit uummat qanoq pingaaruteqarami?

⁵ Ineriartornartumik oqaloqatigiinneq ileqquliutissagaanni paasineqaqqaartariaqarpoq oqaaserisat sunik uummammioqarnermik ersersitsisarnerat. Jiisusi oqarpoq: „Uummatip ulikkaarutaanik qaneq utsersortarpoq.“ (Matthæusi 12:34) Allatut oqaatigalugu: Pingaartitatsinnik eqqartuinissarput nuannarisarparput. Taamattumik imminut ima aperisariaqarpugut: ’Allat oqaloqatigigaangakkit qanoq uummammioqartunga paasinarsisarpa? Ilaquttakka uppeqatikkaluunniit ilagigaangakkit anersaakkut ittut oqaloqatigiissutigineqartarpat, imaluunniit timersorneq, atisat, filmit, nerisassat, pisiakka kingulliit allalluunniit soqutaanngivissut oqaloqatigiissutigineqarnerusarpat?’ Maluginngisatsinnik immaqa inuunitsinni eqqarsaatitsigullu pingaaruteqannginnerusut pingaartinnerulersimavavut. Anersaakkut ittut salliutikkutsigit tamanna oqaloqatigiittarnitsinnik inuunitsinnillu pitsaanerulersitsissaaq. — Filippimiut 1:10.

6. Anersaakkut ittunik eqqarsaatiginnittarnerput oqaloqatigiittarnitsinnut qanoq pingaaruteqarpa?

⁶ Aalajangersimasunik itinerusumik eqqarsaatiginnittarneq oqaloqatigiinnermik pitsaanerulersitsisinnaavoq. Anersaakkut ittut eqqarsaatiginiartarutsigik anersaakkut ineriartornartumik oqaloqatigiittarneq pissusissamisuuinnalissaaq. Kunngi Daavip eqqarsaatit oqaatsillu ataqatigiinnerat paasisimavaa. Tussiaammi allassimavoq: „Qanerma oqaasii uummatimalu eqqarsaatai ilinni iluarinarilit, [Jehova].“ (Tussiaat 19:15) Aamma tussiaasiortoq Asafi ima allappoq: „Isumaliutigaara piliarsuit tamaat, eqqarsaatigaakkalu suliatit tamaasa.“ (Tussiaat 77:13) Uummat isumalu sallusuissummik Guutip oqaasianeersumik pingaartitsisut oqaatsinik nersornartunik utsersortutut issapput. Pruffiitip Jeremiap Jehovamit ilinniarsimasani nipangiussimasinnaasimanngilai. (Jeremia 20:9) Anersaamut tunngasut eqqarsaatigeqqissaartarutsigik uaguttaaq taamaassinnaavugut. — 1 Timotheusi 4:15.

7, 8. Oqaloqatigiinnermi sammisat suut ineriartornartuusinnaappat?

⁷ Anersaakkut ingerlalluarutta ineriartornartunik oqaloqatigiissutissarpassuaqassaagut. (Filippimiut 3:16) Ataatsimeersuaararnerit, ataatsimeersuarnerit, atuagassiat kingulliit, ullormut eqqarsaatigisassat oqaaseqaatitaasalu anersaakkut peqqumaateqarlualersissavaatigut, allanik oqaloqateqarnitsinni atorsinnaasatsinnik. (Matthæusi 13:52) Kristumiutut oqaluussinitsinni misigisavut aamma allanut qiimmassaataasinnaapput.

⁸ Kunngi Salomop orpiit, uumasut nunamiut, timmissat aalisakkallu Israelimiittut assigiinngitsorpassuunerat alutorsaatigeqaa. (1 Kunngit 4:33) Guutip pinngortitarsua eqqartussallugu nuannarisarpaa. Uaguttaaq taamaaliorsinnaavugut. Jehovap kiffaasa sorpassuit eqqartorsinnaavaat, anersaakkulli ittut inunnut anersaakkut ittunik pingaartitsisunut immikkut qiimmassaataasarput. — 1 Korinthimiut 2:13.

’Tamakku eqqarsaatiginiarsigik’

9. Paulusip Filippimiut qanoq oqaaqqissaarpai?

⁹ Suulluunniit eqqartoraluarutsigik oqaloqatigiittarnivut ineriartornartuujuassapput apustili Paulusip Filippimi ilagiinnut oqaaqqissaarutaasut ikkunik: ’Ilumoortut suulluunniit assuarnaatsut suulluunniit, iluartut suulluunniit, minguitsut suulluunniit, asanartut suulluunniit, nersornartut suulluunniit, suut ileqquulluartuunersut, suut ataqqinartuunersut, tamakku eqqarsaatiginiarsigik.’ (Filippimiut 4:8, 1961) Taagukkani ima pingaaruteqartigimmata Paulusi oqarpoq: ’Tamakku eqqarsaatiginiarsigik.’ Tamakku isummatsinniitilertariaqarpavut uummatitsinniitilerlugillu. Taamaattumik arfineq-pingasut taakku Paulusip eqqaasai ineriartornartumik oqaloqatigiinnissatsinnut qanoq iluaqutigisinnaanerlutigik misissoriartigu.

10. ’Ilumoortunik sunilluunniit’ eqqartuinissaq qanoq paasisariaqarpa?

¹⁰ Ilumoortut suulluunniit paasissutissaannaanngillat eqqortut, kukkusuunngitsut. Tassaapput assuarnaatsut tutsuiginartullu suulluunniit, soorlu sallusuissutit Guutip oqaasianeersut. Ilumoortut ilagaat sallusuissutit Biibilimeersut killissutigisimasavut, oqalugiaatit qiimmaallaatigisimasavut imaluunniit siunnersuutit Biibilimeersut iluaqutigisimasavut. ’Ilisimasaqarnerli eqqunngitsumik taama taaneqartartoq’ qalliinnakkut eqqorpasissoq tunuartissavarput.  (1 Timotheusi 6:20) Aamma oqaatissuaanerit imaluunniit oqaluussinermi misigisat uissuumminartut uppernarsarneqarsinnaanngitsut ingerlateqqinnaveersaassavavut.

11. ’Assuarnaatsut’, imaluunniit pingaaruteqavissut, eqqartorsinnaavavut suuppat?

¹¹ Assuarnaatsut, imaluunniit pingaaruteqavissut, tassaapput nersornartut pingaarutillillu, kanngunartuunngitsut soqutaanngitsuunatillu. Taakkua ilagaat kristumiutut kiffartornerput, ullut ernumanartorsiorfiit maanna misigisavut, qanorlu ileqqorissaartuaannarsinnaanersugut. Taama ilungersunartigisunik eqqartugaqaraangatta anersaakkut eqqumajuarnissamik, assuarnaatsuujuarnissamik nutaarsiassamillu nuannersumik oqaluussiuarnissamik aalajangersimanerput nakussatseqqinneqartarpoq. Kiffartornermi misigisat soqutiginartut, pisimasullu ulluni kingullerni inuunitsinnik eqqaasitsisut ineriartornartumik oqaloqatigiissutigineqalersinnaapput. — Apustilit Suliaat 14:27; 2 Timotheusi 3:1-5.

12. Iluartunik minguitsunillu eqqarsaatiginnittariaqarneq pillugu Paulusip siunnersuutaa eqqarsaatigalugu suut eqqartornaveersaartariaqarpavut?

¹² Oqaaseq iluartoq Biibilimi atorneqaraangami ilaatigut isumaqartinneqartarpoq Guutip isaani  arlaat eqqortuusoq — najoqqutassiaanut naapertuuttuusoq. Oqaaseq minguitsoq eqqarsaatini pissusilersornermilu minguissutsimut tunngassuteqarpoq. Ingutsineq, kanngunangajattunik quiasaaruteqarneq imaluunniit atoqatigiinnermut tunngasunik tusangiasaarineq oqaloqatigiinnitsinni tulluanngillat. (Efesosimiut 5:3; Kolossemiut 3:8) Suliffimmi atuarfimmiluunniit tamakku oqaloqatigiissutigineqaleraangata kristumiut qimaguttarunik silatusaassapput.

13. Oqaloqatigiinnernik asanartunik nersornartunillu pingaartitsiffiusunik assersuuteqarit.

¹³ Paulusip kajumissaarutigigamiuk asanartut suulluunniit eqqarsaatigissagivut, ajunngitsut iluarinartullu aamma uatsinnik ajunngitsunik misigissuseqalersitsisartut eqqarsaatigai, qinngarsuilersitsisartut, narrutsatsitsisartut akerleriilersitsisartullu eqqarsaatiginagit. Nersornartut suulluunniit tassaapput ajunngitsumik tusaamaneqartut oqaatigineqartartullu suulluunniit. Taakkununnga ilaapput qatanngutit aalajaatsut inuunerminni misigisimasaminnik oqaluttuaat, ilaannikkut Napasuliaq Alapernaarsuiffik-mi Iteritsi!-milu saqqummersinneqartartut. Taamaattumik allaaserisat uppernikkut nakussatsinnartut taakku qanoq killississutigisimanerlugit soormi allanut eqqartorukkit? Allat misigisaat tusarlugit kajumissinartarpoq. Oqaloqatigiittarnerit taamaattut ilagiinni asaqatigiinnermut ataasiussuseqarnermullu siuarsaataassapput.

14. (a) ’Suut ileqquulluartuunersut’ eqqarsaatigissagutsigik suna pisariaqarpa? (b) Qanoq ’ataqqinartut’ oqaloqatigiissutigisinnaanerivut oqaluttuariuk.

¹⁴ Paulusip aamma ’suut ileqquulluartuunersut’ eqqaavai, tassa ileqqussatigut assuarnaatsut suulluunniit. Oqalunnitsinni najoqqutassanit Biibilimeersunit siulersortittariaqarpugut ileqqussatigullu minguitsut assuarnaatsullu nigornagit. Ataqqinartut pineqaraangata isumaqartarpoq nersornartut. Nuannersumik oqalugiartoqaraangat imaluunniit ilagiinni suliniarluartoqaraangat oqalugiartumut suliniuteqarluarsimasumullu aamma allanut eqqartortakkit. Apustilip kristumioqatimi pissusii ajunngitsut nersualaartarpai. (Romamiut 16:12; Filippimiut 2:19-22; Fiilimuut 4-7) Soorunami aamma Guutip pinngortitarsua qujamasuutigiuartariaqarparput. Tassaniipput oqaloqatigiissutissarpassuit ineriartornartut. — Ussatit 6:6-8; 20:12; 26:2.

Ineriartornartumik oqaloqatigiittaritsi

15. Angajoqqaat meeqqaminnik imaqarluartumik oqaloqatiginnittarnissaminnut Biibilimi qanoq pisussaaffilerneqarpat?

¹⁵ Mosesimik allakkat tallimaanni 6:6, 7-imi ima allassimavoq: „Oqaatsit taakku peqqussutillu ullumi ilinnut tunniussakka aalajangiutissavatit. Erninnut nangeqqittuartassavatit eqqartortarlugillu angerlarsimatillutit issiasaraangavit, angalaartaraangavit, innartaraangavit makittaraangavillu.“ Tassa imaappoq angajoqqaat meeqqatik anersaakkut ittut pillugit imaqarluartumik oqaloqatigisariaqarpaat.

16, 17. Jehovap Aaperaallu maligassiaat angajoqqaat kristumiut qanoq ilinniarfigisinnaavaat?

¹⁶ Takorloorsinnaavarput Jiisusi Ataatanilu qilammiusoq sivisuumik oqaloqatigiittarsimassasut, Jiisusip nunami suliassai eqqartoraangamikkik. „Ataatama uannik aallartitsisup nammineq inassutigaa qanoq oqassasunga qanorlu oqalussasunga,“ Jiisusi ajoqersukkanut oqarpoq. (Johannesi 12:49; 5 Mosesi 18:18) Ataataanerpaap Aaperaap ernini Iisaaq akunnerpassuarni ilagisarsimassavaa oqaluttuullugu Jehovap siuaasatillu  qanoq pilluaqqusimagaatik. Oqaloqatigiittarnerit taama ittut Jiisusip Iisaallu Guutip peqqusaanut maniguullutik naalatsigitsinnissaminnut iluaqutigisimassaqaat. — 1 Mosesi 22:7-9; Matthæusi 26:39.

¹⁷ Meeqqattattaaq ineriartornartumik oqaloqatigineqartarnissartik pisariaqartippaat. Angajoqqaat ulluinnarni ulapiffiusuni meeqqamik oqaloqatiginissaannut piffissaqarniartariaqarput. Immaqa ilaqutariinni ullormut minnerpaamik ataasiarluni nereqatigiittoqarsinnaavoq. Nereqatigiinnermi nereqatigeereernermilu ilaqutariit ineriartornartumik oqaloqatigiittarnissaannut periarfissaqarpoq, taakkulu anersaakkut peqqisuunnissaannut iluaqutaassapput.

18. Misigisami qanoq takutinneqarpa angajoqqaat meeqqallu attaveqatigiilluarnerat iluaqutaasartoq?

¹⁸ Qatanngutip pionerip 20-t sinnilaarlugit ukiullip, Alejandrop, 14-inik ukioqarluni qulalertarsimanini eqqaamavaa. Oqaluttuarpoq: „Atuaqatima ilinniartitsisumalu sunniineri pissutigalugit Guuteqarnera Biibilillu tatigineqarsinnaanera qularaakka. Angajoqqaama naammagittarlutik akunnerpassuarni oqaloqatigisarpaannga eqqarsalersinniarlunga. Tamanna piffissami erloqinartumi tassani qularnerma qaangernissaanut iluaqutigiinnanngilara, aammali inuuninni silatuumik aalajangiisarnissannut iluaqutigaara.“ Maanna qanoq ingerlava? Alejandro nangippoq: „Suli angajoqqaanni najugaqarpunga, kisianni ataatagalu ulapittuugatta oqaloqatigiinnissatsinnut piffissaaleqisaqaagut. Taamaattumik sapaatip akunneranut ataasiarluta suliffiani nereqatigiittassalluta aalajangerpugut. Oqaloqatigiittarnerput assut pingaartippara.“

19. Oqaloqatigiittarneq anersaakkut ineriartornartoq sooq tamatta pisariaqartipparput?

¹⁹ Uppeqatitta ineriartornartumik oqaloqatigisarnerat aamma pingaartingaarparput, ilaa? Ataatsimiikkaangatta, katerisimaaraangatta, oqaluusseqatigiikkaangatta, angalaqatigiikkaangattaluunniit taamatut oqaloqatigiittarnissamut periarfissaqartarpugut. Paulusip Romami kristumiut oqaloqatiginissaat qilanaaraa. Allappoq: „Takorusukkaluaqaassimi, . . . ilissi uangalu upperisaqaqatigiinnitsigut ilissinni kajumissaaqatigiissinnaaqqulluta.“ (Romamiut 1:11, 12) „Uppeqatit anersaakkut ineriartornartumik oqaloqatigisarnerat pisariaqartingaakkanik matussusiisarpoq,“ utoqqaanertaq kristumiu Johannes oqarpoq. „Qamuuna nuannaajallannartarpoq ulluinnarnilu nanertuutaasunut oqiliallaattaasarluni. Utoqqaat ilaat qinnuigisarpakka inuunerminnik aalajaattuaannarniarlutillu qanoq iliortarsimanerminnik oqaluttuuteqqullunga. Ukiut ingerlanerini amerlasuut oqaloqatigisarpakka, tamarmillu silatuunik oqaaseqartarput imaluunniit inuuninni iluaqutigisinnaasannik allanik oqaluttuuttarlunga.“

20. Ittoortoq oqaloqatigerusukkaanni qanoq iliortoqarsinnaava?

²⁰ Taavami anersaamut tunngassutillit eqqartukkatit soqutigineqarpasinngippata? Nikallussanngilatit. Immaqa piffissami allami periarfissarsilluarnerussaatit. Salomo oqarpoq: „Puugutaasat sølviusut iipiliusartaattut kuultiusut ipput oqaatsit oqaaserineqarfissamikkut oqaaserisat.“ (Ussatit 25:11, 1961) Ittoortunik paasinnittuugit. „Siunnersuutit ajunngitsut angutip uummataaniittut tassaapput imeq itisooq; silassorissoq taassumannga qalooraasinnaasarpoq.“ * (Ussatit 20:5) Uummammiuit eqqartornissaannut allat pissusilersornerat akornutaatinnaveersaaruk.

Oqaloqatigiinnerit anersaakkut ineriartornartut iluaqutaasarput

21, 22. Anersaakkut ineriartornartumik oqaloqatigiinnitsigut suna angussavarput?

²¹ „Oqaatsinik mikiarsimasunik qanissinnit  aniatitaqarniaqinasi,“ Paulusi siunnersuivoq, „oqaatsinilli ajunngitsuinnarnik aniatitaqaritsi ineriartornissamut pisariaqartunik, tamakku tusartunut pilluaatissaaqqullugit.“ (Efesosimiut 4:29; Romamiut 10:10) Oqaloqatigiinneq ilorraap tungaanut sangutinniarlugu iliuuseqartariaqarpoq, iluaqutaasarporli. Anersaakkut ineriartornartumik oqaloqatigiittarneq iluaqutigalugu allat upperisatsinnik avitseqatigisinnaavavut, qatanngutigiissuserpullu nukittorsarlugu.

²² Taamaammat allanut iluaqutaasumik Guutimullu unnersiutiginnissutaasumik oqaloqatigiittarniarta. Tamanna uatsinnik nalerisimaalersitsissaaq allanullu qiimmassaataassalluni. Tamanilli pingaarnerusumik Jehovap uummataanik nuannaartitsissaaq, sunimmi oqaluuserisaqarnersugut malugisarpaa nuannaarutigisarlugulu oqarput eqqortumik atoraangatsigu. (Tussiaat 139:4; Ussatit 27:11) Anersaakkut ittunik oqaloqatigiissuteqartarutta qularissanngilarput Jehovap puigornavianngikkaatigut. Naggatissap nalaani Jehovamut kiffartortut pillugit ima allassimasoqarpoq: „[Jehovamik] mianerinnittut taamani oqaloqatigiipput, [Jehovalu] naalaaqqissaarpoq. Mappersagarlu allanneqarpoq [Jehovamik] mianerinnittut aqqanillu ataqqinnittut taassumannga eqqaamaneqaqqullugit.“ (Malaki 3:16, 23) Taamaattumik oqaloqatigiittarnitta anersaakkut ineriartornartuunerat inuuinnarnissatsinnut aalajangiisuusussaavoq!

[Quppernerup ataani ilanngussaq]

Qanoq akissavit?

• Oqaloqatigiissutivut uagut pilluta sumik takutitsisarpat?

• Ineriartornartut suut eqqartorsinnaavavut?

• Ilaqutariinni ilagiinnilu kristumiuni oqaloqatigiittarneq qanoq pingaaruteqarpa?

• Ineriartornartumik oqaloqatigiinnikkut suna anguneqartarpa?

[Atuaqqissaarnermi apeqqutit]

[Qupp. 22-mi assiliartat]

Oqaloqatigiissutigineqarsinnaasut ineriartornartut makkuupput . . .

’ilumoortut suulluunniit’

’assuarnaatsut suulluunniit’

’suut ileqquulluartuunersut’

’nersornartut suulluunniit’

[Suminngaanneernera]

Stalin Videop puuani assiliartaasoq: U.S. Army photo; ’Skaberbogen’-ip ungaluani Ørnetågen: J. Hester and P. Scowen (AZ State Univ.), NASA

[Qupp. 23-mi assiliartaq]

Nereqatigiinneq ineriartornartumik oqaloqatigiiffissaalluarpoq