Qanoq eqqaamaneqartut

UKIUT 3000-it matuma siorna Daavi Israelip kunngianit Saulimit qimaavoq. Daavip savaatilik pisooq Nabali qinnuigaa taquassaminik imermillu tuneqqulluni. Savaatinilumi sernissorsimammatigit Nabalip Daavi angutitaalu akiitsugaqarfigai. Nabalili inoroorsaanngilluinnarpoq, Daavillu aallartitaa allaat oqalorujuffigaa. Nabali sianiitsuliorpoq, Daavimi naammagittaannartanngilaq. — 1 Samueli 25:5, 8, 10, 11, 14.

Takornartat inoroorsaarfigineqarnissaannik Kangiani Qiterlermi ileqquusartut akerliannik Nabali pissusilersorpoq. Nabalip iliuutsini qanoq tusaamaneqaatigilerpaa? Biibilimi oqaluttuarineqarpoq Nabali „peqqarniitsuusoq inupiluullunilu“. Aqqa isumaqarpoq „sianiitsoq“, atimilu isumaa eqquutsilluinnarpaa. (1 Samueli 25:3, 17, 25) Taamatut eqqaamaneqarusussagaluarpit? Allanut sukannersuullutillu naakkittaatsuuit, ajornartorsiortut allaat nalunngikkaluarlugu? Imaluunniit inussiarnersuuit, inoroorsaartuullutit qajassuussisuullutillu?

Abigajili — arnaq siuneqarluartoq

Nabalip qiningasuunerata ajornartorsiulersippaa. Daavi angutillu 400-t panatik qitermiuliuteriarlugit Nabali anusinngorsariartorlugu aallarput. Susoqarsimasoq Nabalip nuliata Abigajilip paasivaa. Nalunngilaa tamanna aporaannermik kinguneqartussaasoq. Qanoq iliorsinnaava? Karrinik nerisassanillu allanik naammattunik katersipallariarluni Daavi angutitaalu unitsikkiartorlugit aallarpoq. Naapikkamigit Daavi qinnuigingaarpaa pissuteqaratik aammik kuiseqqunagit. Ilungersorneranit Daavi saammartinneqarpoq. Pisimasup tamatuma kingunitsianngua Nabali toquvoq. Taava Daavip, Abigajilip pissusiinik pitsaasunik pingaartitsisup, taanna nulissiuppaa. — 1 Samueli 25:14-42.

Abigajili imminut qanoq tusaamaneqalersippa? „Silassorissuuvoq” imaluunniit nutsigaq alla naapertorlugu ‘arnaavoq silatooq’. Iliuusaanit ersippoq isumatuujusoq pikkorissuusorlu, nalunngikkaalu qanoq qaqugulu iliuuseqassanerluni. Uimi isumaatsup inoqutaasalu ajutoornissaraluat ilumoorluni pinngitsoortinniarsaraa. Piffissaq nalliummat Abigajili aamma toquvoq, arnatulli nalinginnaanngitsumik silatuutut imminut tusaamaneqalersippoq. — 1 Samueli 25:3.

 Petrusip suut eqqaamaneqaatigai?

Ukiunut hundredelinnut siullernut nuulaariarta, Jiisusillu apustilii aqqaneq-marluk qimerloorlugit. Apustiliisa ilagaat Petrusi, Galilæami aalisartuusimasoq, qularnanngitsumillu taanna puffajanerpaat tassanngaannariartartullu ilagaat. Nalunanngilaq eqiingasuullunilu misigissutsiminik ersersitsinissaminut nangaaneq ajortoq. Taamani Jiisusip ajoqersukkat isigaat asammagit Petrusillu isigai asannialermagit qanoq qisuariartoq eqqarsaatigeriassagit.

Petrusi Jiisusimut oqarpoq: „Naalagaq, illit uanga isikkakka asanniarpigit?“ Akillugu Jiisusip oqarfigaa: „Uanga qanoq iliornera maanna illit nalugallarpat, kingornali paasilerumaarpat.“ Taava Petrusip oqarfigaa: „Isikkakka asassanngilluinnarpatit.“ Petrusip periataarnera malugeriaruk. Jiisusi qanoq akiva?

„Asanngikkukkit pissarseqatigissanngilarma,“ Jiisusi oqarpoq. Siimuut Petrusip oqarfigaa: „Naalagaq, taavami isikkakka piinnarnagit assakka niaqoralu ilanngutikkit!“ Maanna Petrusi paarlattorluinnaanik pilerpoq. Petrusili inuk nalorninartuunngilaq. Naamik, ilumoortuusaartuunngilaq qassiiliortuunanilu. — Johannesi 13:6-9.

Petrusi inuttut sanngeeriallaqqinnini pillugit eqqaamaneqarportaaq. Assersuutigalugu Jiisusi eqqartuunneqareermat tassunga ajoqersugaanerarneqarami pingasoriarluni misiarpoq. Petrusip kukkussutini paasileramiuk qiangaarpoq. Nikallornini peqqissimininilu takutissallugit qununngilaq. Maluginiarnarportaaq oqaluttuaq tamanna iivangkiiliunut ilanngunneqarsimasoq — qularnanngitsumik Petrusip nammineerluni oqaluttuarisimammagu. Maniguukkami kukkussutini  nassuerutigisinnaasimavai. Illit pillutit taamatut oqartoqarsinnaava? — Matthæusi 26:69-75; Markusi 14:66-72; Lukasi 22:54-62; Johannesi 18:15-18, 25-27.

Jiisusilli miserratigineraniit sapaatip-akunnialunngui qaangiutiinnartut Petrusip juuterpassuit piinsip ulluani sapiilluni anersaamillu illernartumik ilumioqangaarluni oqaluussiffigai. Jiisusip toqusunit makissimasup tatiginninneranut tamanna nassuitsumik ersiutaavoq. — Apustilit Suliaat 2:14-21.

Ukiualuit qaangiuttut Petrusi kukkuluttoqqippoq. Apustili Paulusi oqaluttuarpoq juutit kristumiut Antiochiamut tikinngikkallarmata Petrusip kristumiut juutiunngitsut ilagisarsimagai. Tikimmatali avissaarpai „kipineqartut ersigigamigit”, taakku Jerusalemimiit tikeqqammersut. Petrusip marloqiusamik pissusilersornera Paulusip isertuarani qulaarpaa. — Galatiamiut 2:11-14.

Ajoqersugarpassuilli Jiisusi qimannialermassuk apustilit arlaat kina oqaaseqartuua? Taamanikkut inuit tusarsimanngisaannik timimi nerineqarnissaata aammilu imerneqarnissaata pingaarutaanik Jiisusi saqqummiussaqarpoq. Oqarpoq: „Inuup Ernerata uinnga nerinngikkussiuk aavalu iminngikkussiuk ilissinni inuuneqassanngilasi.“ Jiisusip tusarnaartaasa juutiusut amerlanersaat mamiatsapput oqarlutillu: „Oqaasii sakkortoqaat; kikkut taamaattut tusarnaarumasinnaavaat?“ Taava susoqarpa? „Tamatuma kingorna ajoqersugaasa ilarpassuisa qimappaat angalaqatigiunnaarlugulu.“ — Johannesi 6:50- 66.

Taamatut nalorninartorsiuleramik Jiisusip aqqaneq-marluk taakku saappai toqqaannartumillu aperalugit: „Aamma ilissi qimanniarpisinga?“ Petrusip akivaa: „Naalagaq, kina ornissagatsigu? Illit oqaatsinik naassaanngitsumik inuussutaasunik pigisaqarputit, upperpugullu nalunagulu illit tassaasutit Guutip illernartua.“ — Johannesi 6:67-69.

Petrusi taamaalilluni imminut qanoq eqqaamaneqalersippa? Taanna pillugu oqaluttuaq atuaraanni peqqusersuinnera ammasuuneralu, ilumoorfiginninnera kukkussutiminillu nassuerutiginneriaannaasarnera tupigusuutiginngitsuugassaanngilaq. Aap, aqqi ajunngitsumik tusaamaneqalersippaa.

Inuit Jiisusi qanoq eqqaamavaat?

Jiisusi ukiut sisamaata affaaniinnaq nunami kiffartorpoq. Ajoqersugaasa qanoq igaat? Naammalluinnartuugami ajorteqannginnamilu ilassiortuunanilu qanilliuminaatsuua? Guutimut erniulluni nalunnginnamiuk naalagaaniartarpa? Ajoqersukkani naalatsinniarlugit annilaangalersinniartarpai imaluunniit pinngitsaaliniartarpai? Imminut ima pingaartitsigigami quiasaarsinnaanngivippa? Ima ulapitsigigami sanngiitsut, napparsimasut meeqqallu piffissaqarfiginngilai? Taamanikkut angutit assigalugit inuit allamik nagguillit arnallu nikagai? Oqaluttuani suna ersersinneqarpa?

Jiisusip inoqatini soqutigai. Kiffartornera misissoraanni erserpoq iloqiaat napparsimasullu amerlasuutigut ajorunnaarsittarai. Naalliuttut ikiorniarlugit nammineq pisariaqartitani tunulliuttarpai. Meeqqanik inuusuttunillu soqutiginninnera ajoqersukkaminut ilitsersuutaanit ersersinneqartarpoq: „Meerannguit uannut qaaginnarlit, akornuseqinasigillu.“ Nangilluni oqaatigineqarpoq Jiisusip meeqqat „pakkullugillu assamminik patikkai pilluaqqullugillu.“ Meeqqat piffissaqarfigisarpigit, imaluunniit ima ulapitsigigavit malugineq ajorpigit? — Markusi 10:13-16; Matthæusi 19:13-15.

Jiisusip nalaani juutit Inatsimmi piumasarineqartut sinnerujussuarlugit malittarisassanik peqqussutinillu artorsartinneqarput. Upperisarsiornikkut aqutsisut inuit oqimaatsunik ersukkersortarpaat, namminnerli tamakku attorumanngilluinnartarlugit. (Matthæusi 23:4; Lukasi 11:46) Akerlianik Jiisusi oqarpoq: „Ornissinga tamassi suleruluttusi nanertugaasusilu, qasuertissavassi.“ — Matthæusi 11:28-30.

Inuit Jiisusi ilagigaangamikku nukissaqaleqqittarput. Ajoqersukkat Jiisusi isummaminnik oqarfigissallugu qunugineq ajorpaat. Allaat Jiisusip aperigajuppai paasiniarlugu qanoq isumaqarnersut. (Markusi 8:27-29) Nakkutilliisut kristumiut silatusaarlutik imminnut ima aperisariaqarput: ’Kristumioqatima qanoq  isigisarpaannga? Utoqqaanertaqatima qanoq isumaqarnerminnik oqaluttuuttarpaannga, imaluunniit isummamminnik anitsivigissallunga nangaasarpat?’ Inussiarnersunik, tusarnaarsinnaasunik pissutsinullu naleqqussarsinnaasunik nakkutilliisoqarneq qiimmaallaataasaqaaq. Ingasattajaanngitsuuneq ammasumik oqaloqatigiilersitseqataasarpoq.

Naak Guutip ernerigaluaraani Jiisusip pissaanini oqartussaassuseqarninilu atornerlunngisannarpai. Naamik, tusarnaartini eqqarsalersinniartarpai. Taama pisoqarpoq farisiiarit napitinniaraluarmassuk, ima aperalutik: „Kaasarimut akileraartarneq atortuusussaava atortuusussaanngilaluunniit?“ Jiisusip qinnuigai aningaasamik nittaavigeqqulluni, aperaalu: „Kiaana assinga atialu?“ Akivaat: „Kaasarip.“ Taava oqarfigai: „Taavami kaasari tunisiuk kaasarip piinik Guutilu Guutip piinik.“ (Matthæusi 22:15-21) Paasiuminartumik taamatut tunngavilersuuteqarneq siunertarineqartutut sunniuteqarpoq.

Jiisusi quiasaarsinnaassuseqarpa? Qatigattuup meqqutip isaatigut putoqqunnissaa pisuup Guutip Naalagaaffianut isernissaanit ajornannginnerusoq Jiisusip oqaatigimmagu quiasaarsinnaanera atuartut ilaasa malugaat. (Matthæusi 19:23, 24) Qatigattuumik meqqutip isaatigut putoqqunniarsarisumik eqqarsaat eqqumiilluinnarpoq. Paakkarut nammineq isiminiittoq pinnagu qatanngutip issiutaanik isiginninniartarneq eqqartoramiuk Jiisusip ilallattaaraluni assersuusioriaaseq atorpaa. (Lukasi 6:41, 42) Naamik, Jiisusi ittoornartuunanilu killilersuisuunngilaq. Kissalaartuuvoq inussiarnersuullunilu. Ullumikkuttaaq kristumiut pissutsit ilungersunartut quiasaalaarnikkut atoruminarnerulersissinnaavaat.

Jiisusip arnanik misiginneqataanera

Arnat Jiisusi najorlugu qanoq igaat? Ajoqersugaasa aalajaatsut ilarpassui arnaapput, aamma Jiisusip arnaa, Maria. (Lukasi 8:1-3; 23:55, 56; 24:9, 10) Arnat Jiisusi saaffigissallugu tunuarsimaartanngillat. Taamaannera erseqqissorujussuuvoq arnap „inuunerluttuusutut“ ilisimaneqartup qulliminik Jiisusip isigai asammagit, uuliamillu tipigissumik tanillugit. (Lukasi 7:37, 38) Arnap allap ukiorpassuarni aaqartuarsimasup inuppassuit akulloqquallugit orneriarlugu qallersaataatigut attorpaa, ajorunnaarporlu. Uppissusiatigut Jiisusip nersorpaa. (Matthæusi 9:20-22) Aap, Jiisusi arnanut ilassiortuuvoq.

Piffissami allami Jiisusip arnaq Samariamioq puilasup eqqaani aamma oqaluuppaa. Tupaallaqaluni pilerpoq: „Illit juutiullutit qanoq uannut arnamut Samariamiuusumut immiseqqusinnaavit?“ Taamanikkut Samariamiut juutit attaveqarfigerusunngilluinnarpaat. Jiisusip akilluni ‘imermik inuussutaasumik’  sallusuissut pingaarutilik pillugu oqaluttuuppaa. Arnat oqaloqatigiumasarpai, inissisimaffimminillu navianartorsiortitsisutut isigineq ajorpai. — Johannesi 4:7-15.

Jiisusi allanut pilliutigeriaannaanermigut aamma eqqaamaneqarpoq. Asanninnermut ilumoortumut immini ilisarnaataavoq. Jiisusi ajoqersuganngorusuttunut tamanut maligassaalluarpoq. Maligassiaa qanoq malilluartigaajuk? — 1 Korinthimiut 13:4-8; 1 Petrusi 2:21.

Ullutsinni kristumiut qanoq eqqaamaneqarpat?

Kristumiorpassuit ukiuni kingulliunerusuni eqqaamaneqaatissaminnik nersortarialimmik takutitsisimapput, ilaat sivikitsumik inuusimagaluarlutik. Ilaat tamanut asannittuunertik pillugu eqqaamaneqarput, soorlu Crystal utoqqarsuanngorluni toqusimasoq assersuutigineqarsinnaasoq. Allat, soorlu Dirk, 40-t missaannik ukioqarluni toqusoq, nuannaartuaannarnertik piumassuseqarnertillu pillugu eqqaamaneqarput.

Maligassiuilluarsimasoq alla tassaavoq José, Spaniami najugaqarsimasoq. 1960-ikkunni Jehovap Nalunaajaasuisa inerteqqutigineqarnerisa nalaanni José Barcelonami aalajangersimasumik suliffeqarpoq, nuliani Carmela panitillu pingasut pilersugaralugit. Spanialli kujasinnerusortaani kristumiunik inersimalluartunik utoqqaanertanik pisariaqartitsisoqalermat, José suliffimminit soraarluni nulii meeqqanilu Malagamut nooqatigai. Ilaqutariit aningaasatigut ajornartorsiortarput, suliffissaaruttarlutik.

José aalajaalluni oqaluussinermigut niviarsiaraatiminillu isumassuilluarnermigut maligassiuilluarpoq. Najugaqarfigisaminni ataatsimeersuartoqassagaangat José ikiuukkumatusaqaaq. 55-it missiliorlugit ukioqarluni napparsimarujussualerami toquvoq. Utoqqaanertatut tatigisassaalluartutut eqiasuitsutullu aammalu uitut ataatatullu asannittutut eqqaamaneqarluni qimaguppoq.

Illit qanoq eqqaamaneqarusuppit? Ullumikkorpiaq eqqaaniarneqassagaluaruit qanormita oqaasertaqassagaluarpa? Apeqqut tamanna iliuuserisartakkatta eqqarsaatigilluarnissaannut kajumissaataassaaq.

Ajunngitsumik tusaamaneqalerniarluta qanoq iliuuseqarsinnaavugut? Anersaap inerititaanik ersersitsilluarnissamut ineriartorsinnaavugut — soorlu asanninneq kamajasuunnginneq, inussiarnisaarneq, qanilaarneq imminullu naalakkersinnaaneq eqqarsaatigalugit. (Galatiamiut 5:22, 23) Aap, oqartariaqarpugut „ajunngitsumik tusaamaneqarneq pitsaanerusoq tarnummit uuliamit akisuumit, aamma ulloq toquffik pitsaanerusoq ullormit inunngorfimmit.“ — Oqaluussisartup oqaasii 7:1; Matthæusi 7:12.  (wE 8/15 03)

[Qupp. 5-mi assiliartaq]

Abigajili arnatut siuneqarluartutut eqqaamaneqarpoq

[Qupp. 7-mi assiliartaq]

Petrusi tassanngaannariartartutut unneqqarissutullu eqqaamaneqarpoq

[Qupp. 8-mi assiliartaq]

Jiisusip meeqqat piffissaqarfigai