Sooq qinuttuinnassaagut?

„Qinuttuinnaritsi, qanorluunniit atugaqaraluarussi qujasaritsi.“ — 1 Thessalonikamiut 5:17, 18.

1, 2. Danielip qanoq takutippaa qinunerup immikkut pisinnaatitaaffiunera pingaartillugu, tamannalu Guutimut attaveqarneranut qanoq sunniuteqarpa?

PRUFFIITI Danielip ullormut pingasoriarluni Guutimut qinusarluni ileqqoraa. Inimi qullermi igalaat Jerusalemip tungaanut sammisut ammarlugit seeqqummerluni Guutimut qinusarpoq. (1 Kunngit 8:46-49; Danieli 6:11) Kunngip peqqusineratigut Mederit kunngiannut Dariusimuinnaq qinoqqusisoqaleraluarmalluunniit Danieli nangaarianngilaq. Inuunini navianartorsioraluartoq ileqqumisut Guutimut qinujuarpoq.

² Guutip Danieli qanoq isigaa? Danielip qinnutaasa ilaannut akissutitut inngili Gabrieli saqqummerami Danieli ’nuannarineqangaartutut’ imaluunniit ’asaneqangaartutut’ taavaa. (Danieli 9:20-23; da. aut.) Ezekielip siulittuutaani Jehovap Danieli angutitut iluartutut taavaa. (Ezekieli 14:14, 20) Danielip qinnutai ukiut ingerlanerini Jehovamut qanittumik attaveqalerneranut pissutaaqataasimannguatsiarput, tamannalumi allaat Dariusip akueraa. — Danieli 6:17.

3. Ajoqersuiartortitap maligassiuisimaneratut assuarnaatsuujuarniarluta qinuneq qanoq iluaqutigisinnaavarput?

³ Misilinneqangaaraangatta aalajangersimasumik qinusarneq aamma iluaqutigisinnaavarput. Assersuutigalugu Kinami ajoqersuiartortitaasimasoq ukiunilu tallimani ineeqqami ataasiuttarissami parnaarusimaneqartussanngorlugu eqqartuussaasimasoq oqaluttuarpoq: „Inunnit allanit avinngarutsinneqaraluarpunga, suulluunniilli  Guutimit avissaartissinnaanngilaanga. . . . Danielitut saneqquttunut tamanut isertuarnanga ullormut pingasoriarlunga seeqqummerlunga nipituumik qinusarpunga. . . . Taamaalioraangama misigisarpunga Guutip anersaavata iluaqutaanerusunik eqqarsaateqalersittaraanga eqqissisittaraangalu. Qinunikkut tuppallersarneqarlungalu anersaakkut nakussatsinneqartarpunga.“

4. Qinuneq pillugu apeqqutit suut allaaserisami uani misissussavavut?

⁴ Biibilimi allassimavoq: „Qinuttuinnaritsi, qanorluunniit atugaqaraluarussi qujasaritsi.“ (1 Thessalonikamiut 5:17, 18) Kajumissaarut taanna eqqarsaatigalugu apeqqutit uku sammeriartigik: Sooq qinnutivut eqqarsaatigilluartariaqarpavut? Jehovamut qinunikkut sassartarnitsinnut sunik pissuteqarpugut? Qanorlu iliussaagut kukkunivut pissutigalugit Guutimut qinunissatsinnut ajukkukkutta?

Qinunikkut Guutimik ikinnguteqarnerit ineriartortiguk

5. Qinuneq iluaqutigalugu nalissaqanngitsumik qanoq attaveqalissaagut?

⁵ Kissaatigaajuk Jehovap ikinngutimisut issigissagaatit? Ataataanerpaaq Aaperaat ikinngutimisut eqqaasarpaa. (Esaja 41:8; Jaaku 2:23) Kissaatigaa taamatut attaveqarfigilissagitsinni. Aap, allaat palliguteqqulluta kajumissaarpaatigut. (Jaaku 4:8) Kajumissaarutip tamatuma qinunikkut taassumunnga palligussinnaanerup immikkut pisinnaatitaaffiuneranik eqqarsaatiginnilersittariaqarpaatigut, ilaa? Eqqarsaatigeriassagit naalakkersuisunut ilaasortaq akimasoq qanoq naapikkuminaattartigisoq, ikinngutigilernissaalu eqqaaneqartariaqanngitsorluunniit! Sunilli tamanik Pinngortitsisup kajumissaarpaatigut qinunikkut palliguteqqulluta qaqugukkulluunniit piumallerutta pisariaqartitsileruttalu. (Tussiaat 37:5) Qinujuarnerput iluaqutigalugu Jehovamut qanittumik attaveqalissaagut.

6. ’Qinujuarnissamut’ tunngatillugu Jiisusip maligassiaanit suna ilinniarparput?

⁶ Ilali qinunngitsoornissaq ajornanngeqaaq! Ulluinnarni suliarisariaqakkat isumaginerinnaat ima allamut saasaatigisinnaatigaavut allaat Guutimik oqaloqateqarnissarput puigorlugu. Jiisusip ajoqersukkani oqarfigai ’qinujuassasut’, namminerlu taamaaliortarpoq. (Matthæusi 26:41) Naak ullaamiit unnussuarmut suliassaqartuaannaraluarluni, Ataataminik qilammiusumik oqaloqateqarnissani piffissaqarfigisarpaa. Ilaannikkut qinuniarluni ’ullaaralaannguaq suli taartoq makittarpoq’. (Markusi 1:35) Allatigut ulloq naagaangat Jehovamut qinujartorluni inoqanngitsumukartarpoq. (Matthæusi 14:23) Jiisusip qinunissani piffissaqarfigisarpaa, uaguttaaq taamaaliortariaqarpugut. — 1 Petrusi 2:21.

7. Sooq Ataatarput qilammiusoq ullut tamaasa oqaloqatigisariaqarparput?

 ⁷ Ullup ingerlanerani nammineq qinunissatsinnut periarfissarpassuaqarpugut, assersuutigalugu ajornartorsiuteqaraangatta, ussernartorsioraangatta imaluunniit aalajangigassaqaraangatta. (Efesosimiut 6:18) Inuunitsinni tamatigut Jehova siulersuisittarutsigu, taassumunnga suli qaninnerusumik attaveqalissaagut. Ikinngutigiit marluullutik ajornartorsiut qaangerniaraangamikku ataqatigiilluarnerulertannginnerpat? (Ussatit 17:17) Jehovamut attaveqarnerput aamma taamaappoq, annertoqqutigalugu ikiuinera misigigaangatsigu. — 2 Nalunaarsuutit 14:10.

8. Nammineq qinnutitta takissusia eqqarsaatigalugu Nehemiap, Jiisusip Hannallu qinnutaat qanoq ilinniarfigaavut?

⁸ Nuannaarutigisinnaavarput Jehova qanoq sivisutigisumik akulikitsigisumillu qinusarnissatsinnik aalajangiisimanngimmat. Nehemia Perserit kunngiannut qinnuteqaateqartinnani nipaqanngitsumik qinupallappoq. (Nehemia 2:4, 5) Aamma Lazarusip makitinneqarnissaanut pissaanermik tuneqqulluni Jiisusip Jehova naatsumik qinnuigaa. (Johannesi 11:41, 42) Hannali uummammiuminik Jehovamut aniatitsigami sivisuumik qinuvoq. (1 Samueli 1:12, 15, 16) Nammineq qinnutivut naatsuusinnaallutilluunniit takisuujusinnaapput, pisariaqartinneqartut pissutsillu apeqqutaatillugit.

9. Sooq qinnutivut Jehovamut unnersiutiginnissutaasariaqarpat uagutsinnullu iliuuserisimasai tamaasa pillugit qujaniutaasariaqarlutik?

⁹ Biibilimi qinnuterpassuarni Jehovap kisimi oqartussaaneranik suliaanillu tupinnangaartunik pingaartitsingaarneq ersersinneqarpoq. (2 Mosesi 15:1-19; 1 Nalunaarsuutit 16:7-36; Tussiaat 145) Apustili Johannesip takorruuilluni utoqqaanertat 24-t takuai — kristumiut tanitat tamarmiusut qilammi atorfimminniittut — tusaavaalu Jehova ima unnersiutigigaat: „Illit, [Jehova Guuterput], qinngaqqunnanngillat pigissallugit naalannaat ataqqinaallu pissaanerlu; illimmi suut tamaasa pinngortippatit, illit piumasakkut piulerput pinngortitaallutillu.“ (Saqqummersitat 4:10, 11) Uaguttaaq Pinngortitsisitta unnersiutiginissaanut pissutissaqarpugut. Angajoqqaat iliuuserisimasatik pillugit meeqqamik uummammit pisumik qutsavigigaangatik nuannaarutigisarpaat. Jehovap ajunngingaarnera tukkortuuneralu pillugit uummatitsinnit qutsavigisarutsigu qinnutivut pitsaanerulersissinnaavavut.

„Qinuttuinnaritsi“ — sooq?

10. Qinusarneq uppernitsinnut qanoq pingaaruteqarpa?

¹⁰ Aalajangersimasumik qinusarnissaq uppernitsinnut pingaaruteqarpoq. Jiisusip assersuusiorluni  ajoqersukkat ’qasusuilluni qinuttuinnariaqarnerup’ qanoq pingaaruteqartigineranik paasitereerlugit ima aperivoq: „Inuup Ernera tikiukkuni uppernermik nunarsuarmi nassaarumaarnerpa?“ (Lukasi 18:1-8) Ilumoorluni qinnutit uumammit pisut uppernermut ineriartuutaasarput. Ataataanerpaaq Aaperaat suli meerartaarani utoqqalilerami, Guuti tamanna pillugu oqaloqatigaa. Siullermik Jehovap qilammut qiviaqquaa, ullorissallu kisissinnaappagit kiseqquai. Tamatuma kingorna Aaperaat neriorsoqqissaarpaa: „Taama amerlatigilissapput kinguaassatit.“ Tamanna qanoq kinguneqarpa? Aaperaap Jehova ’upperaa’, tamannalu Jehovap „taassumunnga iluartuutitaassutigitippaa“. (1 Mosesi 15:5, 6) Uummaterput Jehovamut qinunikkut ammarutsigu, Biibilimi neriorsueqqissaarutai pigiliukkutsigit naalakkutsigulu, taava taassuma uppernerput nakussatsissavaa.

11. Ajornartorsiuteqaraangatta qinuneq qanoq iluaqutigisinnaavarput?

¹¹ Ajornartorsiuteqaraangatta qinuneq aamma iluaqutigisinnaavarput. Inuunitsinni artorsaateqarutta artornartunillu atugaqarutta, Biibilimi ima siunnersorneqarpugut: „Nanertuutigisat [Jehovamut] tunniuguk, taava isumagiumaarpaatit. Iluartoq patajatinngisaannassavaa.“ (Tussiaat 55:23) Pingaarutilinnik aalajangigassaqaleraangatta Jiisusip maligassiaa malissinnaavarput. Apustilini aqqaneq-marluk toqqartinnagit unnuaq naallugu qinuvoq. (Lukasi 6:12-16) Toqunissaminut aqaguttoq qinunermini ima ilungersortigaaq „kiagunneri soorlu aap kuserneri nunamut nakkaasut“. (Lukasi 22:44) Tamanna qanoq kinguneqarpa? „Qinnutaa tusarneqarpoq Guutimik mianerinnittuummat.“ (Hebræerit 5:7) Pissutsini misilineqarnernilu ilungersunartuni qamannga pisumik qinujuarneq uaguttaaq iluaqutigissavarput.

12. Guutimut qinunikkut palligussinnaanitta qanoq takutippaa inuttut soqutigigaatigut?

¹² Guutimut qinunikkut palligunnissatsinnut pissutaasoq alla tassaavoq taassuma akisilluni uatsinnut palligunnissaa. (Jaaku 4:8) Qinunikkut uummaterput Jehovamut ammaraangaatigu malugisarparput soqutigigaatigut asannittumillu isumassoraatigut. Tamatta immikkut malugisarparput Jehovap asagaatigut. Kiffami qinnutaannik tamanik imminut Ataatatut qilammiusutut saaffiginnissutaasunik tusarnaarnissaq allanut isumagisassanngortissimanngilaa. (Tussiaat 66:19, 20; Lukasi 11:2) Kajumissaarpaatiguttaaq ’isumakuluutivut tamaasa imminut piseqqullugit isumassoramisigut’. — 1 Petrusi 5:6, 7.

13, 14. Suut pissutigalugit ’qinuttuinnassaagut’?

¹³ Inuit soqutigisaqannginnerata akerlilersuinerataluunniit  nikallortissinnaagaluaraangatigut qinuneq oqaluussinermi aallussinerulissutigisinnaavarput nakussatsissutigisinnaallugulu. (Apustilit Suliaat 4:23-31) Aamma ’Diaavulup qoqassiniaraangatigut’ qinuneq illersuutigisinnaavarput. (Efesosimiut 6:11, 17, 18) Ullormut misilinneqarnerit tamaviaarluta anigorniaraangatsigik nakussatsineqarnissatsinnik Guuti qinnuigiuarsinnaavarput. Qinnummut Jiisusip ajoqersukkaminut ilinniartitsissutaanut ilaavoq Jehovap ’ajortumit’, Saatani Diaavulumit, ’annaasinissaanik’ qinnut. — Matthæusi 6:13.

¹⁴ Ajortulioqqajaasarnivut nunusinnaajumallugit qinujuartarutta, misigissaagut Jehovap ikioraatigut. Neriorsoqqissaarneqarpugut: „Guuti unneqqarippoq; akuersaarumanngilaa artukkassinnik usserneqarnissarsi, kisianni usserneqarnermut ilagitillugu aniguiffissaq pilersissavaa artorsartitaaqqunasi.“ (1 Korinthimiut 10:13) Apustili Paulusip nammineq misigisimavaa, Jehovap pissutsini assigiinngitsorpassuarni imminik isumassuinera nakussatsitsineralu. „Tamaasa pissatsitsisikkut atussallugit sapinngilakka,“ oqarpoq. — Filippimiut 4:13; 2 Korinthimiut 11:23-29.

Kukkusaraluarlutit qasusuillutit qinusarit

15. Pissusilersuutivut iliuutsivullu Guutip najoqqutassiaanut naapertuutinngippata qanoq pisoqarsinnaava?

¹⁵ Qinnutivut Guutip tusassappagit siunnersuutit taassuma oqaasianiittut eqqumaffigisariaqarpavut. „Sumik qinnutigisaqarutta tunissavaatigut inassutai maleruaratsigit iluarisaanillu iliorluta,“ apustili Johannesi allappoq. (1 Johannesi 3:22) Taavami pissusilersuutivut iliuutsivullu Guutip najoqqutassiaanut naapertuutinngippata? Adami Evalu ajortulioreeramik naatsivimmut toqqorput. Uaguttaaq immaqa ’Jehovamut takoqqunata isertoqqajaasarpugut’ qinusarunnaarnitsigut. (1 Mosesi 3:8) „Maluginiarsimavara Jehovamit peqatigiissortaanillu qimagukkiartuaartoqaleraangami qinusarunnaarneq kukkussutigeqqaartaraat,“ nakkutilliisoq angalasartoq misilittagaqarluartoq Klaus oqarpoq. (Hebræerit 2:1) Tamanna José Ángelip ilumoornerarpaa, oqarpormi: „Ukiuni arfineq-pingasungajanni Jehovamut qaqutigut qinusarpunga. Oqaloqatiginissaanut imminut ajukkuttarpunga, naak Ataatattut qilammiusutut suli isigigaluarlugu.“

16, 17. Aalajangersimasumik qinusarneq anersaakkut sanngiillisimaneq ajugaaffiginiarlugu qanoq iluaqutaasinnaanersoq assersuuteqarit.

¹⁶ Ilaat anersaakkut sanngiitsuunertik imaluunniit qimagukkiartulernertik pissutigalugu qinunissamut ajukkussinnaasarput. Pissutsilliuku taamaatillugit tunissut taanna, tassa qinuneq, iluaqutigilluartariaqaripput. Jona suliassinneqarami qimaariaraluarpoq. ’Annikilliornerminili Jehovamut torlulammat akivaa, Jonap toqusut inaata itineranit ikioqqulluni torlorfigaa, Jehovallu tusarpaa.’ (Jona 2:3) Jona qinuvoq, qinnutaa Jehovap tusarpaa, Jonalu anersaakkut peqqisseqqippoq.

¹⁷ José Ángel aamma ikioqqulluni qamannga pisumik qinuvoq. Oqaluttuarpoq: „Uummatiga ammarlugu Guuti qinnuigaara isumakkeerfigeqqullunga. Ilumullumi ikiorpaanga. Qinuneq iluaqutiginagu sallusuissummut utersinnaasorinngilanga. Maanna ullut tamaasa aalajangersimasumik qinusarpunga, taamaaliornissaralu qilanaarisarpara.“ Guutimut sassarnissarput unioqqutitsinitsinnillu nassuerutiginninnissarput, maniguullutalu isumakkeerfigeqqulluta qinunissarput nangaassutiginngisaannartariaqarparput. Kunngi Daavi taamaaliorpoq, Jehovallu isumakkeerfigaa. (Tussiaat 32:3-5) Assuarinianngilaatigut, ikiorumalluta piareersimavoq. (1 Johannesi 3:19, 20) Ilagiinnilu utoqqaanertat qinnutaat anersaakkut iluaqutigisinnaavavut,  qinnutimmi taamaattut ’kimittoqaat’. — Jaaku 5:13-16.

18. Guutip kiffaasa qanorluunniit qimagussimanikuutigigaluarlutik suna qularissanngilaat?

¹⁸ Ataataasup kia ernini qimagussimareerluni maniguulluni ikiorneqarusulluni siunnersorneqarusullunilu imminut aggersoq itigartissavaa? Ernermik tammaraluartumik assersuusiami takutinneqarpoq qanorluunniit qimagussimanikuutigigaluarluta imminut saakkutta Ataatarput qilammiusoq nuannaartartoq. (Lukasi 15:21, 22, 32) Jehovap qimagussimasut tamaasa kajumissaarpai ikioqqullutik imminut qinoqqullugit, ’isumakkeerfiginnittuartarami’. (Esaja 55:6, 7) Naak Daavi arlaleriarluni sualuttumik ajortuliortaraluarluni Jehovamut ima torlulavoq: „Tusaaniaruk qinnutiga, Guuti, isertoqinak ilungersorlunga qinnuigigakkit.“ Nangipporlu: „Unnukkut ullaakkullu ulloqeqqanilu kappialallungalu nimaassaanga, tusarumaarpaangalu.“ (Tussiaat 55:2, 18) Ila oqaatsit tuppallernassusii!

19. Qinnutit akineqarpasinngitsutut ittut Guutimit iluarineqannginnitsinnut ersiutaanerarlugit sooq isummertariaqanngilagut?

¹⁹ Taavami qinnutivut ingerlaannaq akineqanngippata? Taamaappat qulakkeertariaqarparput Jehovap piumasaanut naapertuuttumik aamma Jiisusip aqqani qinusarnerluta. (Johannesi 16:23; 1 Johannesi 5:14) Ajoqersukkap Jaakup eqqaavai kristumiut ilaat kukkusumik siunertaqarlutik qinugamik akineqanngitsut. (Jaaku 4:3) Isummerniapallattariaqanngilagulli qinnutit akineqarpasinngitsutut ittut Guutimit iluarineqannginnitsinnut ersiutaanerarlugit. Ilaannikkut Jehovap kiffami aalajaatsut qinnutaat aalajangersimasoq erseqqissumik akitinnagu sivisujaamik qinnutigisaqattaarteqqaartarpaa. „Qinujuaritsi, tunineqassaasi taava,“ Jiisusi oqarpoq. (Matthæusi 7:7, NV) Taamaattumik ’qinunitsinni qasusuittariaqarpugut’. — Romamiut 12:12.

Aalajangersimasumik qinusarit

20, 21. (a) Sooq ’ulluni kingullerni’ makkunani qinujuartariaqarpugut? (b) Jehovap saammaannerata issiavissaarsua ullut tamaasa sassarfigisarutsigu suna angussavarput?

²⁰ ’Ulluni kingullerni’ makkunani ’atugarliungaarfiusuni’ artornartorsiutit ajornartorsiutillu akiugassat amerligaluttuinnarput. (2 Timotheusi 3:1) Aamma artornartorsiornerit ajornartorsiutillu eqqarsaatigeqqajaalersinnaavavut. Aalajangersimasumilli qinujuartarnerput anersaakkut eqqortumik toraagaqartuarnissatsinnut iluaqutigissavarput, naak ajornartorsiuteqartuaraluarluta, ussernartorsiortuartaraluarluta atugarliuuteqartuartaraluarlutalu. Ullut tamaasa Jehovamut qinusarnitsigut pingaarutilimmik pisariaqartitatsinnik tapersersorneqartarpugut.

²¹ Jehova, ’qinnutitsinnik tusartartoq’, tusarnaassalluta ulapippallaanngisaannarpoq. (Tussiaat 65:3) Uaguttaaq oqaloqatiginissaanut ulapippallaanngisaannarta. Guutimik ikinnguteqarnerput pigisatsinnit erlinnarnerpaavoq. Qanortoq ikinngutigiinneq taanna taamaattussaannaasutut isiginngisaannarisigu! „Taamaattumik nakimanata sassarniarta saammaannerup issiavissaarsuanut, nallittorneqaqqulluta saammaanneqaqqullutalu piffissaq eqqorlugu ikiorneqaatissatsinnik.“ — Hebræerit 4:16. (wE 9/15 03)

Qanoq akissavit?

• Qinunerup naleqassusia eqqarsaatigalugu pruffiiti Danieli qanoq ilinniarfigaarput?

• Jehovamut attaveqarnerput qanoq nakussatsissinnaavarput?

• Sooq qinujuartariaqarpugut?

• Ajukkunnerput Jehovamut qinunissatsinnut sooq akornutigisariaqanngilarput?

[Atuaqqissaarnermi apeqqutit]

[Qupp. 26-mi assiliartaq]

Kunngi oqaluutsinnagu Nehemia naatsumik nipaqanngitsumik qinuvoq

[Qupp. 27-mi assiliartaq]

Hanna Jehovap saavani sivisuumik qinuvoq

[Qupp. 28-mi assiliartat]

Apustilini aqqaneq-marluk toqqartinnagit Jiisusi unnuaq naallugu qinuvoq

[Qupp. 30-mi assiliartat]

Ullup ingerlanerani qinunissamut periarfissarpassuaqarpoq