„Guuti qaninniarsiuk, taava taanna ilissinnut qanillissaaq“

Angut taanna Biibilip qanoq allanngortikkaa

ROLF-MICHAEL-ip Tyskland-imeersup nipilersortarnini pingaartissimagaluaqaa. Aammattaaq ikiaroornartut pinngitsoorsinnaanngikkaluarpai. Inuusuttuugallarami imigassamik atuisorujussuuvoq lsd-millu akissaqaraangami pisarluni, saniatigullu kokain, hash ikiaroornartullu allat.

Ilaanni Rolf-Michael Afrikami nunamut ikiaroornartunik eqqusseriaraluarpoq, kisianni parnaarussaavoq qaammatillu 13-it parnaarussivimmiilluni. Parnaarussivimmiinnerata inuunerup siunertaata eqqarsaatiginissaanut piffissaqalersissimavaa.

Rolf-Michaelip nuliatalu Ursulap, neriuutaarulluinnarlutik inuunerup siunertaa ujarpaat sallusuissullu nanerusullugu. Naak ilagiinni kristumiuunerartuni misilittakkatik pitsaasuusimanngikkaluartut, Guutip ilisarisimalernissaa kissaatigisorujussuuaat. Kisianni upperisarsiortunut assigiinngitsunut apeqqutaat naammaginartumik akineqanngillat. Taakkuttaaq arlaannaasaluunniit inuusuttut taakkua inuunerannik allannguinissaannut pimoorullugu kajumissaarniarsimanngilaat.

Naggataatigut Jehovap Nalunaajaasui attavigilerpaat Biibililu misissulerlugu. Rolf-Michaelip killitsissutigingaagaa tassaavoq Jaaku 4:8-mi eqqaasitsissut, imaattoq: „Guuti qaninniarsiuk, taava taanna ilissinnut qanillissaaq.“ Aalajangersimavoq ’inutoqaq manna tikillugu inuuserisaminiittoq iperarniarlugu, atiniarlugu inuk nutaaq Guuti assilillugu pinngortitaq iluarsuseqarlunilu sallusuissutsip piinik.’ — Efesosimiut 4:22-24.

Rolf-Michael qanoq iliorpa inuk nutaaq atiniarlugu? Biibilimit ilikkarpaa„ilisarsinikkut“ inuup kinaassusia „nutarterneqartoq pinngortitsisini assigilerlugu“, tassa Jehova Guuti. — Kolossemiut 3:9-11.

Rolf-Michael ilisimasaqaleriartortilluni Guutip oqaasiini najoqqutassat tunngaviusut naapertorlugit inuunini iluarsiniarpaa. (Johannesi 17:3) Ikiaroornartup asoorunniarnera artornartippaa, kisianni nakussatsinniarluni qinunikkut Guutip qanillinerata naleqassusia paasivaa. (1 Johannesi 5:14, 15) Aammattaaq Jehovap Nalunaajaasuinut ilaareersunut, aamma nammineq Guutip piumasaanik iliorniarlutik ilungersortunut, qanittumik attaveqarnermigut ikiorneqarpoq.

Aamma nakussatsissutigaa ’silarsuaq nunguttussaasoq’ Guutillu peqqusaanik iliortut ’naassaanngitsumik atasussaasut’ paasigamiuk. Tamatuma qinersisinnaalersippaa silarsuarmut asanninneq sivikitsuinnarmik atasussaq pinnagu, kisianni pilluaqqussutit naassaanngitsut Jehova Guutimut asannittumut qanimut attaveqarnerup kinguneri. (1 Johannesi 2:15-17) Aamma Ussatit 27:11 Rolf-Michaelip killitsissutigisorujussuuaa. Tassani allaqqavoq: „Ernera, ilisimasuuniarit taamalu uummatiga nuannaartillugu, mitallersikka akisinnaaniassavakka.“ Qujamasulluni oqarpoq: „Versip taassuma Jehovap asanninnerata itissusia  takutippaa. Guutimmi inuit tamaasa periarfissippai uummatiminik nuannaartitsinissaannut.“

Rolf-Michaelitut, nuliaatut meeraatullu pingasuusut inuppassuit allat hundredetusindillit Biibilimi najoqqutassiat iluaqutigilluarpaat. Inuit taamaattut silarsuaq tamakkerlugu Jehovap Nalunaajaasuisa ilagiissaanni nassaassaapput. Ajoraluartumik nunat ilaanni Jehovap Nalunaajaasui immikkut upperisarsiortutut ilaqutariinnik avissaartitsisutut eqqunngitsumik pisuutinneqartarput. Kisianni Rolf-Michael assersuutigalugu akerlianik pisoqarneranut uppernarsaataavoq. — Hebræerit 4:12.

Rolf-Michael oqarpoq imminut ilaquttaminullu Matthæusi 6:33 anersaakkut ittut salliutinnissaannut kajumissaarutaasoq, „soorlu sumiissusersiut eqqortumut tikkuussisoq“. Rolf-Michaelip ilaqutaasalu Jehova qujamasuffigeqaat kristumiutut ilaqutariittut pilluarlutik inuunerminnut. Tussiaasiortutut imatut erinarsortutut misigisimapput: „Qanoq ilillunga akilissavara [Jehova] uannut ajunngitsuliornerpassui pillugit?“ — Tussiaat 116:12.  (wE 9/15 03)

[Qupp. 21-mi issuagaq]

Guutip inuit tamaasa periarfissippai uummatiminik nuannaartitsinissaannut

[Qupp. 21-mi ungalusaq]

Biibilimi najoqqutassiat atorsinnaapput

Biibilip najoqqutassiaasa akornanniipput amerlasuunik ikiaroortarunnaarsitsisartut makkuupput:

„Ilissi [Jehovamik] asannittusi ajortoq uumigissavarsi.“ (Tussiaat 97:10) Nalujunnaaraanni ileqqoq toqussutaasartoq ajortumit pisoq, ilumoorlunilu uumigilerlugu, Guutip nuannarisaanik iliorneq ajornannginnerusarpoq.

„Ilisimasunik peqateqartoq ilisimassuseqalersarpoq, sianiitsunilli ikinnguteqartoq ajortumeertussaasarpoq.“ (Ussatit 13:20) Ikiaroornartut allallu aalakoornartut itigartissinnaajumallugit ilumoortunik ikinngutissarsiortariaqarpoq. Aap, kristumiunik aalajangernermik tapersersuerusuttunik ikinnguteqarneq iluaqutaangaassaaq.

„Sumilluunniit isumakuluuteqarnaveeritsi, kissaatigisasili qanoq ittukkulluunniit Guutimut saqqummiuttarsigit qinullusi torlulallusilu qujallusilu. Taava eqqissinerup Guutimit pisup siuneqassusernit tamanit annerungaartup uummatisi eqqarsaatisilu sernigissavai Kristusi-Jiisusimi.“ (Filippimiut 4:6, 7) Uummatikkut eqqarsaatikkullu eqqissineq taamaattoq piviusuunngitsutigut anguneqarneq ajorpoq, soorlu ikiaroornikkut. Kisianni qulanngilluinnarluni Guutimut qinuneq inuunermi ajornartorsiutit anigornissaannut ikiuisarpoq.