Misilinneqarnerni pinertusaarneq Jehovamut ataqqinaataavoq
Misilinneqarnerni pinertusaarneq Jehovamut ataqqinaataavoq
„Ajunngitsuliornissinni erloqisitaatillusi naammagittarussi tamanna Guutimut qujassutissaavoq [Guutimit iluarisaassaaq, NV].“ — 1 PETRUSI 2:20.
1. Kristumiut ilumoortut tunniulluinnarsimanertik eqqortikkusummassuk suna apeqqutaalerpa?
KRISTUMIUT Jehovamut tunniulluinnarsimapput piumasaatullu iliorusullutik. Tunniulluinnarsimanertik eqqortinniarlugu sapinngisartik tamaat Jiisusi Kristusip tumai atuarniarpaat maligassamillu iliorneratut sallusuissut oqaluussissutiginiarlugu. (Matthæusi 16:24; Johannesi 18:37; 1 Petrusi 2:21) Jiisusi aalajaatsullu allat uppernertik pillugu inuunertik pilliutigaat martyritullu toqullutik. Imaappa kristumiut tamarmik uppernertik pillugu toqunissartik naatsorsuutigisariaqaraat?
2. Kristumiut misilinneqarnerit naalliuutillu qanoq isumaqarfigaat?
2 Kristumiutut kajumissaarneqarpugut toqumut aalajaaqqulluta, tassaasariaqanngilarli uppernerput pillugu toquqqulluta kajumissaarneqarneq. (2 Timotheusi 4:7; Saqqummersitat 2:10) Tassa naalliunnissarput pisariaqarpallu uppernerput pillugu toqunissarput piareersimaffigigaluarlugu, nuannarinngilarput. Naalliuutit nuannarinngilavut, anniartinneqarnissarpullu nikanarsagaanissarpullu kissaatiginngilavut. Malersugaanerli misilinneqarnerillu naatsorsuutigisariaqaratsigik, taamaattoqaraangat qanoq periaaseqassanerluta eqqarsaatigeqqissaartariaqarparput.
Misilinneqarnerni aalajaatsut
3. Malersugaasimasut ilaasa qanoq periaaseqartarnerannik Biibilimi oqaluttuanik eqqaasaqarit. (Quppernerup tulliani ungalusaq takuuk: „Malersugaasimasut ilaat qanoq periaaseqarsimasut“.)
3 Biibilimi oqaluttuarpassuaqarpoq itsaq Guutip kiffaasa inuunertik navianartorsiortinneqaraangat assigiinngitsorujussuarmik periaaseqartarnerannik. Ullumikkut kristumiut assingusunik nalaataqassagunik taakku najoqqutarisinnaavaat. Ungalusami „Malersugaasimasut ilaat qanoq periaaseqarsimasut“-mi assersuutit takukkit, qanorlu ilinniarfigisinnaanerlugit eqqarsaatigiuk.
4. Jiisusip Guutillu kiffaasa aalajaatsut malersorneqaraangamik periaaserisartagaat qanoq oqaatigineqarsinnaappat?
4 Jiisusi Guutillu kiffai aalajaatsut allat malersugaanerminnut assigiinngitsumik, pissutsit atukkatik naapertorlugit, periaaseqaraluartut, erseqqippoq inuunertik pisariaqanngitsumik navianartorsiortinngikkaat. Navianartorsioraangamik sapiitsuusarput, mianersorlutilli. (Matthæusi 10:16, 23) Anguniagaraat oqaluussinerup siuarsarneqarnissaa Jehovamullu assuarnaatsuujuarnissartik. Pissutsini assigiinngitsuni taakkua periaasiat kristumiunit ullumikkut annikilliortitaasunit malersugaasunillu malinneqarsinnaavoq.
5. 1960-ikkunni Malawimi qanoq malersuisoqarpa, Jehovap Nalunaajaasuilu qanoq periaaseqarpat?
5 Nalitsinni Jehovap kiffai sualuttumik annikilliortitaakulasarput, sorsunnerillu, inerteqquteqarneq toqqaannartumilluunniit malersugaaneq pissutigalugu pissakilliortarlutik. Assersuutigalugu 1960-ikkunni Malawimi Jehovap Nalunaajaasui sualuttumik malersugaapput. Naalagaaffilersaarfii, illui, naatitaat niuertarfiilu — pigisaat tamangajammik — aserorterneqarput. Unatarneqartarput allatullu amiilaarnartumik peqqarniitsuliorfigineqartarlutik. Qatanngutit qanoq periaaseqarpat? Tusindilikkuutaat illoqarfeeqqaminnit qimaasariaqarput. Ilarpassui najugaqarfiunngitsumut qimaapput, allalli nunami sanilerisaminni Mocambiquemi nunasigallarput. Qatanngutit aalajaatsorpassuit toqupput, allalli navianartorsiorfiusumit
qimaanissartik aalajangiuppaat, taamaaliornerlu pissutsini taamaattuni silatusaarnerugunarpoq. Tamatumuuna Jiisusip Paulusillu iliornerattut iliorput.6. Malawimi oqaluussisartut malersugaangaaraluarlutik qanoq iliunngitsuunngillat?
6 Malawimi qatanngutit qimaasariaqaraluarlutik isertortariaqaraluarlutilluunniit teokratiimit siulersorneqarnissartik ujartorpaat malillugulu sapinngisartillu naapertorlugu kristumiutut sammisassatik isertortumik sammisarlugit. Qanoq kinguneqartumik? 1967-imi inerteqqutaalinngitsiarnerminni oqaluussisartut amerlanerpaagamik 18.519-iupput. Suli inerteqqutaagaluartoq Mocambiquemullu qimaasorpassuugaluartut 1972-imi nalunaarutigineqarpoq oqaluussisartut amerleriarsimasut 23.398-inngorlutik, taakkulu agguaqatigiissillugu qaammammut nalunaaquttap-akunnerini 16-ini oqaluussisartut. Qularutissaanngilaq qatanngutit aalajaatsut taakkua iliuusii Jehovamut ataqqinaataasumik, atugarliungaarfiannilu Jehovap pilluaqqugai. *
7, 8. Sooq akerlilersuineq ajornartorsiortitsigaluartoq ilaat qimaanngillat?
7 Nunani allani suliatsinnik aamma akerlilersuiffiusuni immaqa qatanngutit ilaasa allamut nuunnginnissartik aalajangiuppaat, naak nunamit qimaasinnaagaluarlutik. Immaqa nuunnikkut ajornartorsiutit ilaat qaangerneqarsinnaapput, qularnanngitsumilli aamma unamminiarnartortaqassaaq. Assersuutigalugu kristumiut qatanngutigiissuit attavigiuaannarsinnaassavaat, anersaakkullu peqatigiinnernut attaveerunneq pinngitsoortissinnaavaat? Anersaakkut sammisartakkatik sammiuarsinnaassavaat, inooriaatsimik sungiussiniarsariitigalutik, immaqa nunami pigissaarfiunerusumi pigisaqarnerunissamut periarfissaqarnerusumi? —8 Ilaat aalajangertarput nuunniarnatik qatanngutimik anersaakkut ingerlalluarnissaat soqutigigamikku. Aalajangertarput pissutsit naammagalugit atorniarlugit nunaminni oqaluussiinnarsinnaajumallutik uppeqatiminnullu qiimmassaataaniarlutik. (Filippimiut 1:14) Aamma taamatut aalajangertut ilaat nunaminni inatsisitigut ajugaatitseqataapput. *
9. Malersugaaneq pissutigalugu nuussanerluni nuussannginnerluniluunniit aalajangerniarlugu suut eqqarsaatigineqartariaqarpat?
9 Pissutsini taamaattuni nuussanerluni nuussannginnerluniluunniit soorunami inuttut nammineq aalajangigassaavoq. Aatsaalli Jehovap siulersuinera qinnutigeqqaarlugu aalajangiisoqartariaqarpoq. Qanorluunniilli aalajangeraluarutta apustili Paulusip oqaasii uku eqqaamasariaqarpavut: „Tassa tamatta immikkut Guutimut nassuertussaavugut.“ (Romamiut 14:12) Eqqaaneqareersutut Jehovap piumasaraa kiffani tamarmik pissutsini tamani aalajaattuassasut. Kiffaasa ilaat maannakkorpiaq misilinneqarput malersugaallutillu; allat immaqa kingusinnerusukkut taamatut atugaqassapput. Tamarmik arlaatigut misilinneqassapput, kialuunniillu misilinneqanngitsoornissani naatsorsuutigissanngilaa. (Johannesi ) Jehovap kiffaasut tunniulluinnarsimasutut Jehovap aqqata illernartinneqarnissaa kisimilu oqartussaanerata qutsissisitaanissaa pillugu qilammi nunamilu akerleriissut kalluunnaveersaarfiginngitsoorsinnaanngilavut. — 15:19, 20Ezekieli 38:23; Matthæusi 6:9, 10.
„Ajortoq akileqinasiuk ajortoqataanik“
10. Jiisusip apustilillu akerlilersorneqarnerminni tatineqarnerminnilu periaasiat qanoq ilinniarfigisinnaavarput?
10 Jiisusip apustilillu tatineqaraangamik periaaserisartagaannit ilinniarfigisinnaasarput pingaarutilik alla tassaavoq akiniaanngisaannarnissaq. Biibilimi sumiluunniit allassimasoqanngilaq Jiisusip ajoqersugaasaluunniit akiuiniaqatigiinnut ilanngunnerannik nakuuserlutilluunniit malersortiminnik akiuinerannik. Apustili Paulusilli kristumiut ima siunnersorpai: „Ajortoq akileqinasiuk ajortoqataanik.“ „Nammineerlusi akiniaaqinasi, asasakka, Guutilli kamaassinera periarfississiuk — allassimasoqarmat: ’Akiniut pigaara, uanga akiliiumaarpunga,’ oqarpoq [Jehova].“ Aammattaaq ima allappoq: „Ajortumut ajugaaffigitinnaveerit, ajortorli ajugaaffiginiaruk ajunngitsoq atorlugu.“ — Romamiut 12:17-21; Tussiaat 37:1-4; Ussatit 20:22.
11. Oqaluttuarisaanermik ilisimatuup kristumiut siulliit naalagaaffimmut isiginnittaasiat qanoq allaatigaa?
11 Kristumiut siulliit siunnersuutit taakku malippaat. Oqaluttuarisaanermik ilisimatuup Cecil J. Cadouxip atuakkiamini The Early Church and the World-imi allaatigaa ukiup 30-p ukiullu 70-ip akornanni kristumiut naalagaaffimmut isiginnittaasiat. Ima allappoq: „Toqqaannartumik uppernarsaatissaqanngilagut piffissami tamatumani kristumiut malersugaanerminni pissaaneq atorlugu iliuuseqarnerannik. Sakkortuuliornerpaagaangamik naalakkersuisut sakkortuumik avoqqaarlerfigisarpaat qimaanermikkulluunniit pilersaarutaannik asuliinnartitsisarlutik. Oqartussaasulli piumasaqaraangata Kristusimut naalannissaannut ajoqutaasumik, kristumiut amerlanerit malersugaanerminnut iliuuserisatuarisarpaat imminut aqussinnaalluni aalajangersimalluinnarlunili taakkununnga naalakkumannginneq.“
12. Sooq pitsaanerua malersorneqarnermi pinertusaarnissaq akiniaanerminngarnit?
12 Taamatulli ilatsiinnarpasinneq ilumut silatusaarnerua? Taamatut periaaseqartut suujunnaarsitsiniartunit pisariteriaannaannginnerpat? Imminut illersorneq silatusaarnerussannginnerpa? Immaqami taamaappoq inuit isiginnittaasiat malillugu. Jehovamulli kiffaasutut qularutiginngilarput Jehovap siunnersuutai iliuutsitsinni tamani malikkutsigik pitsaanerpaasoq. Petrusip oqaasii uku eqqaamavavut: „Ajunngitsuliornissinni erloqisitaatillusi naammagittarussi tamanna Guutimut qujassutissaavoq [Guutimit iluarisaassaaq, NV].“ (1 Petrusi 2:20) Nalunngilarput Jehovap pissutsit nalunngilluinnarai taamaattuaannarnissaallu akuerinavianngikkaa. Sooq tamanna qularinngissinnaavarput? Jehova innuttaminut Babylonimut aallarussaaqqasunut ima oqarmat: „Ilissinnik attuisut isima tappiutaat attorpaat.“ (Zakaria 2:12) Qanoq sivisutigisumik iserput attuuatissinnaavarput? Piffissaq eqqorlugu Jehovap isumagissavaa iluaallannissaq, imaluunniit aniguisitaanissaq. Tamanna qularutissaanngivippoq. — 2 Thessalonikamiut 1:5-8.
13. Sooq Jiisusi akeqqaminut tigusaritippa?
13 Tamatumani Jiisusip maligassiaa aamma malissinnaavarput. Naatsiivimmi Getsemanemi tigusaritikkami imaanngilaq imminut illersorsinnaanngitsoq. Ajoqersukkaminummi ima oqarpoq: „Isumaqarpit Ataataga qinnuigisinnaanngikkiga maannakkorpiaq ikiortisseqqullunga inngilinik legioninit aqqaneq-marlunnit amerlanerusunik? Qanorli ilillutik taava Allakkat taama pisoqarumaarneranik imallit eqquutissappat?“ (Matthæusi 26:53, 54) Jehovap piumasaata naammassineqarnissaa Jiisusimut pingaarnerpaavoq, allaat naalliuttariaqarnerminik kinguneqaraluartoq. Daavip siulittuutitut tussiaasiaani oqaatsit tatigilluinnarpai: „Toqusut inaannut iginnianngilarma, ilinnut upperluartumut iliveq takutinnianngilat.“ (Tussiaat 16:10) Ukiut arlallit tamatuma kingorna apustili Paulusi Jiisusi pillugu ima oqarpoq: „Taassuma nuannaarnissaq siunerminiittoq pillugu sanningasulik [nappagaq naalliutsitaaffik, NV] naammagalugu atorpaa kanngunarsaataanera soqutiginagu, maannalu Guutip issiavissaarsuata talerpiata tungaani issialluni.“ — Hebræerit 12:2.
Jehovap aqqanik illernartitsinermik nuannaarutiginninneq
14. Nuannaarneq suna Jiisusip misilinneqarnermini tamani pisariaqartumik nakussatsissutigaa?
14 Nuannaarneq suna iluaqutigalugu Jiisusi misilinneqarnermini ajornerpaami pinertusaarpa? Saatanip Jehovap kiffaanik saassussinermini Guutip ernera asasaa Jiisusi saassunnerpaava. Taamaattumik Jiisusi misilinneqarnermini assuarnaattuaruni Saatanip unnerluussinera inaarutaasumik akissutissarsissavaa. (Ussatit 27:11) Jiisusi toqusunit makititaagami nuannaarnera nalerisimaarneralu takorloorsinnaavigit? Pilluangaarsimassaaq inuttut naammalluinnartutut naammassisassani naammassisimallugu paasigamiuk! Jehovap kisimi oqartussaanera qutsissisippaa aqqalu illernarsisillugu! Maanna Jiisusip „Guutip issiavissaarsuata talerpiata tungaani“ inississimalernini ataqqinaatigingaarpaa qularnanngitsumillu nuannaarutigisinnaasaanit annerpaajulluni. — Tussiaat 110:1, 2; 1 Timotheusi 6:15, 16.
15, 16. Jehovap Nalunaajaasui Sachsenhausenimi ajungaartumik qanoq malersugaappat, qanorlu pisariaqartumik nakussatsinneqarpat?
15 Aammattaaq kristumiunut nuannaarutaavoq, Jiisusitulli misilinneqarnerni malersugaanermilu pinertusaarnikkut, Jehovap aqqanik illernarsisitseqataaneq. Tamatumunnga assersuutissaapput Jehovap Nalunaajaasui tigusanut inissiarsuarmi Sachsenhausenimi tusaamanerlugaasumi annikilliortitaallutik sorsunnersuullu aappaata naanerani amiilaarnartumik toqumut angalanermi aniguisut. Tigusat tusindilikkuutaat qiupput, perlerput nappaammilluunniit toqquteqarlutik aqqusernulluunniit sinaani paarsisunit SS-init peqqarniitsumik toqutaallutik. Jehovap Nalunaajaasuili 230-usut tamarmik aniguipput ataatsimooramik toqussagaluarunilluunniillu ikioqatigiittaramik.
16 Ajungaartumik malersugaanermi tamatumani qatanngutit pinertusaarnissaminnut suna nakussatsissutigaat? Isumannaatsumut piniariarlutik nuannaarnertik Jehovamullu qujamasunnertik ersersippaat aalajangersakkami imaattumi: „Jehovap nalunaajaasuinit 230-nit inuiannit arfinilinneersunit, Mecklenburgimi, Schwerinip eqqaani orpippassuarni katersuussimasunit aalajangersagaq. . . . Sivisuumik peqqarniitsumillu misilinneqarfiusoq anigorparput, aniguisullu, aatsitsivimmiit annaanneqartutullusooq ittut, qilussunninngillalluunniit. (Takuuk Danieli 3:27) Jehovamilli nakussatsinneqangaarput nukissaqartinneqangaarlutillu, Kunngillu Teokratiip soqutigisaanik siuarsaaqqusinissaa qilanaarlutik utaqqivaat.“ *
17. Guutip innuttaasa ilaat maannakkut qanoq misilinneqartarpat?
17 Imaassinnaavoq aamma uagut kristumiutut aalajaatsutut 230-usutut uppernerput misilinneqartartoq, naak ’suli ima assoroortigisimanngikkaluarluta aammik akeqartittariaqarlugu’. (Hebræerit 12:4) Misilinneqarnerilli assigiinngitsorujussuusinnaapput. Atuarfimmi illaruaatigineqarnerusinnaavoq, inuunerlunnissamulluunniit allatulluunniit eqqunngitsuliornissamut avatangiisinit tatineqarnerusinnaavoq. Aammattaaq tatineqangaarsinnaavugut misilinneqarlutalu aalersortinnginnissaq aattalitunnginnissarlu Naalakkamiinnarlu katinnissaq aalajangiusimagatsigu. Inoqutigiinnilu assigiimmik upperisaqarfiunngitsumi qitornanik upperisamik perorsaaneq aamma misilinneqaataasinnaavoq. — Apustilit Suliaat 15:29; 1 Korinthimiut 7:39; Efesosimiut 6:4; 1 Petrusi 3:1, 2.
18. Sooq allaat misilinneqarnermi artornarnerpaami qularnata pinertusaarsinnaavugut?
18 Qanorluunniit misilinneqaraluarutta nalunngilarput Jehova naalagaaffialu salliutikkatsigik misilinneqartugut, taamaattumillu tamanna immikkut pisinnaatitaaffittut nuannaarutaasutullu isigaarput. Petrusip oqaasii tuppallernartut sapiillissutigaavut: „Pilluarpusi Kristusip aqqa pissutigalugu mitaatigineqarussi naalannassutsip anersaavata, tassa Guutip Anersaavata, najormasi.“ (1 Petrusi 4:14) Jehovap anersaavata nakussatsittarpaatigut allaat misilinneqarnerni artornarnerpaani pinertusaarnissatsinnut, tamannalu Jehovamut unnersiutiginnissutaavoq ataqqinaataallunilu. — 2 Korinthimiut 4:7; Efesosimiut 3:16; Filippimiut 4:13. (wE 1/10 03)
[Quppernerup ataani ilanngussat]
^ imm. 6 1960-ikkunni pisut Malawimi Jehovap Nalunaajaasuisa ukiuni 30-ni ajunaarutaangaartumik malersugaanerannut aallaqqaataannaapput. Tamanna pillugu sukumiisumik oqaluttuaqarpoq Jehovas Vidners Årbog 1999-imi, qup. 171-212.
^ imm. 8 Takuuk Vagttårnet 1. apriili 2003-moortumi, qup. 11-14-imi allaaserisaq „Højesteret afsiger kendelse til fordel for den sande tilbedelse i ’landet Ararat’“.
^ imm. 16 Aalajangersakkap tamakkerlugu oqaasertai Vågn op!-imi 8. januaari 1975-imoortumi, qup. 17-imi allassimapput. Qatanngutip angutip toqumut angalanermik aniguisimasup nammineq misigisani Vagttårnet-imi 1. januaari 1998-imoortumi, qup. 25-29-mi oqaluttuarai.
Uteqqiinermi apeqqutit
• Kristumiut misilinneqarnerit naalliuutillu qanoq isumaqarfigaat?
• Jiisusip kristumiullu misilinneqaraangamik periaasiat qanoq ilinniarfigisinnaavarput?
• Malersorneqaraangatta akiniaasannginneq sooq silatusaarnerua?
• Nuannaarneq suna iluaqutigalugu Jiisusi misilinneqarnermini pinertusaarpa, tamannalu qanoq ilinniarfigisinnaavarput?
[Atuaqqissaarnermi apeqqutit]
[Qupp. 15-mi ungalusaq]
Malersugaasimasut ilaat qanoq periaaseqarsimasut
• Inngilimit siulersorneqarlutik Josefip Mariallu naalungiarsuk Jiisusi Egyptenimut qimarnguppaat, Herodesip sakkutuui nukappiaqqanik marlunnik ukiulinnik nukarliunerusunillu toqoraajartortut Betlehemimut tikiutsinnagit. — Matthæusi 2:13-16.
• Jiisusi kiffartornerata nalaani akeraasa arlaleriarlutik toqunniaraluarpaat kimittuumik oqaluussimmat. Tamatigulli Jiisusi aniguisarpoq. — Matthæusi 21:45, 46; Lukasi 4:28-30; Johannesi 8:57-59.
• Sakkutuut nakkutilliisuutitallu Naatsiivimmut Getsemanemut tigusariartormanni Jiisusi marloriarluni taakkununnga ilisaritippoq erseqqissumillu oqarluni: „Uangaavunga.“ Aammattaaq ajoqersukkani akersuunniartut unitsippai inuppassuarnillu aallarunneqartilluni. — Johannesi 18:3-12.
• Jerusalemimi Petrusi allallu parnaarussaapput, iperartorneqarlutillu Jiisusilu pillugu oqaluussiunnaaqquneqarlutik. Iperagaagamilli qimagupput „nuannaarlutik Jiisusip aqqa pillugu narrunarsagaanissamut qinngaqqunnartitaannginnamik. Naalaffimmi illuminnilu ullut tamaasa ajoqersuinertik ingerlatiinnarpaat nalunaajaatigalugulu Jiisusi tassaasoq Tanitaq.“ — Apustilit Suliaat 5:40-42.
• Saulusip, kingusinnerusukkut apustilinngortup Paulusip, juutit Damaskusimiittut toqunniaraanni tusaramiuk, koorersuarmut ikilluni qarmarsuup ammaneragut qatanngutinit ningitippoq aniguillunilu. — Apustilit Suliaat 9:22-25.
• Ukiut arlallit qaangiuttut Paulusi aalajangerpoq kaasarimut suliassanngortinniarluni, nunamut naalagaatitaq Festusi kunngilu Agrippa isummeraluartut ’toqumik pillarneqaataasinnaasumik parnaarunneqaataasinnaasumilluunniit iliorsimanngitsoq’. — Apustilit Suliaat 25:10-12, 24-27; 26:30-32.
[Qupp. 16, 17-mi assiliartaq]
Malawimi Jehovap Nalunaajaasui aalajaatsut tusindilikkuutaat sualuttumik malersorneqarneq pissutigalugu qimaasariaqaraluarlutik, nuannaarlutik kiffartortuarput
[Qupp. 17-mi assiliartat]
Jehovap aqqanik illernartitsinermik nuannaarutiginninnertik nazistit nalaanni qatanngutit aalajaatsut uku tigusanut inissiarsuarni toqumullu angalanermi pinertusaassutigaat
[Suminngaanneernera]
Toqumut angalaneq: KZ-Gedenkstätte Dachau, USHMM Photo Archives-imit akuerineqarluni
[Qupp. 18-mi assiliartaq]
Misilinneqarnerit tatineqarnerillu assigiinngitsorujussuu- sinnaapput