Guutip akuliunnissaa ilimagisinnaavarput?

UKIUNI 700-kkunni u.n.s. Judami kunngip 39-nik ukiullip Hizkijap paasivaa toqussutaasinnaasumik nappaateqarluni. Isumatsangaarluni Guuti ajorunnaarumalluni kimigiiserfigaa. Pruffiitini aqqutigalugu Guutip akivaa: „Qinnutit tusarpara qullitillu takullugit. Taamaattumik suli ukiuni 15-ini inuutissavagit.“ — Esaja 38:1-5.

Sooq Guuti pisumi tassani akuliuppa? Ukiut hundredellit tamatuma siorna kunngimut naapertuilluartumut Daavimut neriorsuutini una pissutigalugu: „Kinguaassatit kunngeqarfiillu atajuassapput kiinnama saani,  issiavissaarsuillu soraajuitsumik aalajaassaaq.“ Guuti paasititsisimavortaaq Missiarsi Daavip kinguaarissagaa. (2 Samueli 7:16; Tussiaat 89:21, 27-30; Esaja 11:1) Hizkija napparsimalerami suli ernertaarsimanngilaq, taamaattumillu Daavip kinguaavi nungoriataarsinnaapput. Guutip Hizkijamut tunngatillugu akuliunnera siunertavianut, kinguaariit Missiarsi tikillugu ataannarnissaannut, iluaqutaavoq.

Aamma Jehovap neriorsuutini eqquutitinniarlugit kristumiuussuseq sioqqullugu pisuni arlalippassuariarluni innuttami iluaqutissaannik akuliuttarpoq. Israelikkut Egyptenimi inussiatut aniguisitaanissaannut atatillugu Mosesi nalunaarpoq: „[Jehovamuna] asagamisi siuaasassinnullu uppernarsaanini aalajangiukkumagamiuk assamminik pissaasumik anisikkaasi.“ — 5 Mosesi 7:8.

Aamma ukiuni hundredelinni siullerni Guuti akuliunnermigut siunertani siuarsarpai. Assersuutigalugu juuteq Saulusi Damaskusimukartilluni Jiisusimit takorruuisitaavoq, taassuma kajumissaarpaa kristumiut qinugiunnaaqqullugit. Saulusi isumataarpoq apustilitullu Paulusitut ilisimaneqalerluni, inuiaqatigiillu akornanni tusagassap nuannersup siaruarterneranut annertuumik peqataavoq. — Apustilit Suliaat 9:1-16; Romamiut 11:13.

Guutip akuliuttarnera nalinginnaava?

Guutip akuliuttarnera nalinginnaava imaluunniit qaqutigoorluinnartuua? Biibilimi erseqqissumik takutinneqarpoq nalinginnaanngilluinnartuusoq. Guutip hebræerit inuusuttut pingasut aatsitsivimmi aamaanaasumi toqunissaannit annaakkaluarpai, pruffiitilu Danieli itersaliamit løvit inaannit annaallugu, allanilli pruffiiteqarpoq toqumit annaatinngisaanik. (2 Nalunaarsuutit 24:20, 21;  Danieli 3:21-27; 6:16-22; Hebræerit 11:37) Petrusi kunngimit Herodes Agrippa I-mit parnaarussaatinneqarluni tupinnartuliornikkut aniguisitaavoq. Kunngilli taassuma apustili Jaaku toqutaatippaa. Guuti akuliutinngilaq pinerluttuliorneq taanna pinngitsoortinniarlugu. (Apustilit Suliaat 12:1-11) Guutip apustilit pissaanermik tunivai napparsimasunik ajorunnaarsitsisinnaalersillugit allaallu toqusunik makititsisinnaalersillugit, apustililli Paulusip „kapinartumik timiminut kapputtumik“, immaqa nappaammik, peerseqqusinera akuerinngilaa. — 2 Korinthimiut 12:7-9; Apustilit Suliaat 9:32-41; 1 Korinthimiut 12:28.

Aammattaaq kaasari Nerop Kristusip ajoqersugaanik qinuginningaarluni navianartorsiortitsinera Guutip unitsinngilaa. Kristumiut anniartitaapput, uumatillugit ikuallanneqarlutik uumasunullu qaasuttunut iginneqarlutik. Kristumiulli akerlilersugaanertik tupigusuutiginngilaat, Guuteqarneranillu uppernerat millisinneqanngilaq. Aammami Jiisusip ajoqersukkani paasitippai eqqartuussisunut tunniunneqartassasut, ilisimatereerpaalu naalliutsitaasinnaasut, allaallu upperisartik pillugu toqutaasinnaasut. — Matthæusi 10:17-22.

Ullumikkuttaaq qularnanngilluinnarpoq Guutip kiffani pisunit navianartunit aniguisissinnaagai. Sernissorneqarlutik misigisimasut isornartorsiussallugit pissutissaqanngilaq. Aalajangivilluguli oqaatiginissaa ajornarpoq Guuti ilumut pisimasuni taakkunani akuliussimanersoq akuliussimannginnersorluunniit. Jehovap kiffai aalajaatsut arlallit Toulousemi qaartoornermi aqqunarput, kristumiullu aalajaatsut tusindillit ajunaarput nazistit kommunistillu tigusanut inissiarsuini imaluunniit pisimasuni allani alianartuni — Guutimit akuliuffigineqaratik. Sooq Guuti akuliuttuaannanngila iluarisanilu tamaasa illersorlugit? — Danieli 3:17, 18.

’Piffissaq nalaatsornikkullu pisut’

Inuk kinaluunniit ajunaarnermik eqqorneqarsinnaavoq, Guutimullu aalajaatsuunersut apeqqutaanngilaq. Alain Lilianelu Toulousemi qaartoornermit ajornatik aniguipput, pisuussuteqanngitsulli 30-t ajunaarput, pinngitsuusullu hundredellit arlallit ajoquserlutik. Annertunerusoq eqqarsaatigalugu titusindillit pinerluttuliornerni, sukkavallaartumik biilernermi ajunaarput, Guutili akisussaatinneqarsinnaanngilaq. Soorlu Biibilimi malugeqquneqartoq ’piffissaq nalaatsornikkullu pisut tamatsinnik attuisarput’. — Oqaluussisartup oqaasii 9:11, NV.

Aammattaaq inuusugut nappaatip, utoqqalisarnerup toqullu ataaniippugut. Aamma inuit isumaqartut Guutip tupinnartuliornikkut inuunertik annaassimagaa ajorunnaarsissimagaatilluunniit toqumit anguneqarumaarput. Guutip inuit nappaammit toqumillu aniguisissavai „qulliillu tamaasa isaannit allarterumaarlugit“; tamakkuli suli siunissamiipput. — Saqqummersitat 21:1-4.

Tamanna aatsaat piviusunngorsinnaavoq Guuti ilaannakuusunik iliuuseqarnani annerusumilli tamakkiisumik iliuuseqarpat. Pisussaq Biibilimi „Jehovap ullussarsuanik“ taaneqarpoq. (Sefania 1:14) Tassaavoq Guutip minitaqanngivilluni ajussutsimut tamarmut akuliunnissaa. Inuit pissutsini naammalluinnartuni naassaanngitsumik inuuneq siunissarilissavaat. „Pereersut eqqaamaneerutissapput eqqaaqqinneqarnatillu.“ (Esaja 65:17) Allaat toqusut uummaqqissapput, taamaalillunilu pisimasut alianartut annersaata sunniutai iluarsineqassapput. (Johannesi 5:28, 29) Taamanikkussamut Guutip asannissutsimigut ajunngissutsimigullu killeqanngitsukkut inuit ajornartorsiutaat ataasiarluni tamaasa aaqqissimassavai.

Guuti ullumikkut qanoq akuliuttartoq

Imaanngilarli Guuti iliuuseqarani inuit naalliuutaannik ulloq manna tikillugu isiginnaaginnartoq. Guutip sumiuussuseq inuttullu tunuliaqutit apeqqutaatinnagit inuit tamaasa imminik ilisarisaqalernissaannik aamma qanittumik aamma tatiginnittumik imminut attaveqalernissaannik  periarfissippai. (1 Timotheusi 2:3, 4) Guutimut qanilliartorneq taamaattoq pillugu Jiisusip oqaatsinik ukunannga nassuiarpaa: „Kinaluunniit uannut ornigussinnaanngilaq Ataatap uannik aallartitsisup kajungilersinngippani.“ (Johannesi 6:44) Guutip Naalagaaffik pillugu tusarliussaq kiffami silarsuarmi tamarmi oqaluussissutigisaat iluaqutigalugu peqqusersuitsut imminut kajungilersittarpai.

Aammattaaq Guuti toqqaannartumik akuliuttarpoq inuit ilai imminit siulersorneqarumagaangata. Anersaani illernartoq ikiortigalugu ’Guutip uummataat ammartarpai’ piumasani paaseqqullugu akuereqqusanilu maleruaqqullugit. (Apustilit Suliaat 16:14) Aap, Guutip asannilluni soqutiginninnini tamatsinnut takutittarpaa, ilisarisimalernissaminut periarfissilluta ilisimasaqalersillutalu oqaatsiminik siunertaminillu. — Johannesi 17:3.

Aammattaaq Guutip kiffani ullumikkut ikiortarpai, tupinnartuliornikkut aniguisinnagit, kisianni anersaaminik illernartumik tunillugit aamma „pissaanermik asseqanngitsumik“ pissutsit atukkatik nikalloratik atorsinnaaqqullugit. (2 Korinthimiut 4:7) Apustili Paulusi allappoq: „Tamaasa pissatsitsisikkut [Jehova Guutikkut] atussallugit sapinngilakka.“ — Filippimiut 4:13.

Taamaattumik pissutissaqarluarpugut inuunerput neriugisarpullu aamma silarsuarmi naalliuuteqarfiunngilluinnartumi naassaanngitsumik inuuneq tunniussaa pillugit Guuti ullut tamaasa qutsaviginissallugu. „Qanoq ilillunga akissavara [Jehova] uannut ajunngitsuliornerpassui pillugit?“ tussiaasiortoq aperivoq. „Kivissavara ermuseq annassummut nalunaaqutaasoq, torlorfigissavara [Jehovap] aqqa.“ (Tussiaat 116:12, 13) Atuagassiaq una akuttunngitsumik atuartarukku maannangaaq pilluarsinnaaqqullutit tunngaveqarluartumillu neriuuteqaqqullutit Guuti qanoq iliuuseqarsimasoq, qanoq iliortoq qanorlu iliussasoq paasilissavat. — 1 Timotheusi 4:8.  (wE 10/1 03)

[Qupp. 6-mi issuagaq]

„Pereersut eqqaamaneerutissapput eqqaaqqinneqarnatillu.“ — Esaja 65:17

[Qupp. 5-mi assiliartaq]

Biibilip nalaani Jehovap Zekarjap ujaqqanik milloorneqarnera akornusinngilaa . . .

imaluunniit Herodesip nukappiaqqanik naalungiarsunnik toqoraasitsinera

[Qupp. 7-mi assiliartaq]

Erniinnaq anniaatit atorunnaarsitaasimassapput allaallu toqusut uummaqqissapput