’Guutip oqaasianik eqqortumik atuisariaqarpugut’

„Noqqaassutiginiaruk sulisutut kanngusuutissaqanngitsutut oqaatsimik sallusuissutaasumik nassuiaasutut [eqqortumik atuisutut, NV] Guutip saavani misiligaaninni attassinissat.“ — 2 TIMOTHEUSI 2:15.

1, 2. (a) Sooq sulisoq naammassisaqassaguni sakkoqartariaqarpa? (b) Suliaq suna kristumiut suleqataaffigaat, qanorlu takutinneqartarpa Guutip Naalagaaffia salliutillugu?

SULISOQ sakkoqartariaqarpoq suliassani naammassiniarlugu. Sakkuli sunaluunniit atuinnarsinnaanngilaa. Eqqortumik sakkoqartariaqarpoq eqqortumillu atortariaqarlugu. Assersuutigalugu quiliortilluni sallilikkat kikiagunniaraanni kaataqarneq kikiaateqarnerlu naammanngilaq. Aamma nalunngittariaqarpoq kikiak najunngarnagu qanoq kikiaasoqarsinnaanersoq. Kaattap qanoq tigumminissaa nalullugu kikiaaniarneq nalunartorujussuussaaq nukillalaarnartorujussuussallunilu. Sakkorli eqqortumik atoraanni suliap naammassilluarnissaanut iluaqutaasinnaavoq.

² Kristumiutut suliassaqarpugut, suliamik tamanit pingaarnerpaamik. Jiisusi Kristusip ajoqersukkani kajumissaarpai ’Guutip naalagaaffia ujaqqaaqqullugu’. (Matthæusi 6:33) Qanoq taamaaliorsinnaavugut? Ilaatigut Guutip naalagaaffianik nutaarsiassamik nuannersumik aallussilluarluta oqaluussinikkut ajoqersuganngortitsiortornikkullu; oqaluussinitta Guutip oqaasianik tunngaveqarluartinneratigut pissuserissuunitsigullu. (Matthæusi 24:14; 28:19, 20; Apustilit Suliaat 8:25; 1 Petrusi 2:12) Kristumiutut suliassarput, ajunngitsumik nuannaarlutalu, naammassissagutsigu atortut eqqortut pisariaqartippavut, taakkualu qanoq atornissaat nalunngittariaqarpavut. Tamatumunnga atatillugu apustili Paulusi maligassaalluarpoq, uppeqatinilu kajumissaarpai ilaaqqulluni. (1 Korinthimiut 11:1; 15:10) Paulusip suleriaasia qanoq ilinniarfigisinnaavarput?

Paulusi — oqaluussisartoq aallussilluartoq

3. Sooq oqarsinnaavugut apustili Paulusi oqaluussisartuusoq aallussilluartoq?

³ Paulusi qanoq suleriaaseqarpa? Aallussilluartuunera qularutissaanngilaq, sapinngisanimi tamaat nutaarsiassaq nuannersoq Immap Akullersuup sineriaani nunarpassuarni siaruarterpaa. Apustilip qasusuitsup kajumingaarnerminut pissutaasoq ima oqaasertalerpaa: „Iivangkiiliumi tusarliukkakku taamaaliornera usorsisimaarutigisinnaanngilara,  pinngitsoornangami tusarliuttussaagakku, eqqanarlu uanga iivangkiiliu nalunaajaatiginngikkukku.“ (1 Korinthimiut 9:16) Paulusip nammineq annaanneqarnissani kisiat soqutigaa? Naagga, namminissarsiortuunngilaq. Kissaatigaa allat nutaarsiassaq nuannersoq iluaqutigissagaat, imami allappoq: „Kikkut tamaasa peqatiginiartarsimavakka ilaannaannilluunniit annaassaqarumagaluarlunga.“ — 1 Korinthimiut 9:22.

4. Kristumiut oqaluussinerminni atortuisa suna pingaarnersaraat?

⁴ Apustili Paulusi anneruniajuitsuuvoq, nalunngilaalu nammineq piginnaanini tatigiinnarsinnaanagit. Soorlu sanasoq kaataqartariaqartoq, taamatulli Paulusip atortoq eqqortoq pisariaqartippaa sallusuissut Guutimeersoq tusarnaartuminut puiguikkiutitissagaangamiuk. Atortuisa suna pingaarnersaraat? Tassaavoq Guutip oqaasia, Allakkat Illernartut. Uaguttaaq ajoqersuganngortitsiortornitsinni atortorput pingaarneq tassaavoq Biibili.

5. Oqaluussinitsinni Biibilimik issuaanitta saniatigut qanoq iliortariaqarpugut?

⁵ Paulusip nalunngilaa issuaanerinnakkut Guutip oqaasia eqqortumik atorneqarsinnaanngitsoq. ’Qularunnaarsitsiniartarporli’. (Apustilit Suliaat 28:23) Qanoq? Paulusi Guutip oqaasia allassimasoq atorlugu angusaqarluarpoq, inuppassuimmi Allakkat atorlugit tunngavilersuilluni eqqarsalersillugit sallusuissummik ilassinnitsillugit qularunnaarsippai. Qaammatini pingasuni Efesosimi synagogimi ’oqaluussisarpoq. Inuit oqaloqatigisarpai Guutillu naalagaaffianik qularunnaarsillugit’. ’Ilaat upperumanatik manngertipput’, allalli tusarnaarput. Paulusip Efesosimi oqaluussinerata kingunerisaanik „oqaaseq [Jehovap] pissaaneragut siammariartortuarpoq sunniuteqarnerujartuinnarlunilu“. — Apustilit Suliaat 19:8, 9, 20.

6, 7. Paulusip kiffartornini qanoq pingaartippaa, qanorlu uagut taamaaliorsinnaavugut?

⁶ Guutip naalagaaffianik oqaluussisartutut aallussilluartutut Paulusip kiffartornini pingaartippaa. (Romamiut 11:13) Imminut malugeqqusaanngilaq, aamma Guutip suleqataasa ilaattut ilisimaneqarnini kanngusuutiginngilaa. Naagga, kiffartornini inuup ataqqinaatigisinnaanerpaasaatut isigaa. Aammattaaq Paulusi kingunilimmik Guutip oqaasianik atuillaqqissuuvoq. Oqaluussinera inerititaqartarpoq, allallu kajumississutigisarpaat kiffartornerminnilu pikkorinnerulissutigisarlugu. Tamanna aamma kiffartorneranik ataqqinarsisitseqataavoq.

⁷ Paulusitut oqaatsimik kiffartortutut suliatsinnik pingaartitsisinnaavugut Guutip oqaasianik atorluaanitsigut. Oqaluusseriaatsini tamani anguniagarisariaqarparput sapinngisamik inunnut amerlanerpaanut Biibilimeersumik takutitaqartarnissaq. Qanoq taamaaliorsinnaavugut inuit qularunnaarsillugit? Pingaarutillit pingasut uku eqqarsaatigikkit: (1) Guutip oqaasianut innersuussigit Biibilimik ataqqinnilersitsisumik. (2) Periaaserillutit nassuiaruk Biibilimi allassimasut qanoq paasisariaqarnersut qanorlu atorneqassanersut. (3) Biibili tunngavigalugu qularunnaarsitsisumik eqqarsalersitsiniarsarigit.

8. Oqaluussinermi ullumikkut suut atorsinnaavavut, qanorlu atortarpigit?

⁸ Ullumikkut Guutip naalagaaffianik oqaluussisartut Paulusip atortorinngisaanik atortoqarput. Ilaatigut makkuupput: atuakkat, atuagassiat, atuagassiaaqqat, qaaqqusissutit, naqitaaqqat, kassettebåndit videobåndillu. Aammattaaq 1900-kkunni allagartat nalunaajaatit, oqaluttartut, biilit højtalerillit radiukkullu aallakaatitsinerit atorneqartarput. Soorunami atortutta Biibili pitsaanersaraat, pinngitsoorneqarsinnaanngitsorlu taanna eqqortumik atortariaqarparput.

Oqaluussinerput Guutip oqaasianik tunngaveqartariaqarpoq

9, 10. Paulusip Timotheusimut siunnersuutaa qanoq ilinniarfigisinnaavarput?

⁹ Guutip oqaasia pitsaanerpaamik qanoq atorsinnaavarput? Paulusip suleqatiminut Timotheusimut kajumissaarutaa una malillugu: „Noqqaassutiginiaruk sulisutut kanngusuutissaqanngitsutut oqaatsimik sallusuissutaasumik nassuiaasutut [eqqortumik atuisutut, NV] Guutip saavani  misiligaaninni attassinissat.“ (2 Timotheusi 2:15) ’Oqaatsimik sallusuissutaasumik eqqortumik atuineq’ sumik ilaqarpa?

¹⁰ Grækerit oqaasiat ’eqqortumik atuisoq’-mik nutserneqarsimasoq isumaqavippoq ’sikkigissumik kilitsisoq’ imaluunniit ’narlusuumik aqqutissiuisoq’. Oqariartaaseq taanna taamaallaat Kristumiut Allagaataat Grækerisuut-ni Paulusip Timotheusimut kajumissaarutaani atorneqarpoq. Oqaaseq taannarpiaq narsaammi narlusuumik assallatserinermut atorneqarsinnaavoq. Naasorissaasumut ilikkarnermut kanngunassaaq sangujoraartumik assallatserineq. Timotheusi ’sulisutut kanngusuutissaqanngitsooqqullugu’ Paulusip eqqaasippaa Guutip oqaasiani ajoqersuut ilumoortoq sanioqqutaassanngikkaa. Timotheusip ilinniartitsinini nammineq isiginnittaatsiminit sunnertissanngilaa. Oqaluussinini ilinniartitsininilu Biibiliinnarmik tunngaveqartissavaa. (2 Timotheusi 4:2-4) Ilumoorusuttut taamatut ilikkassavaat Jehovap isiginnittaasia, silamiut filosofiiannik isummiussiinnarnatik. (Kolossemiut 2:4, 8) Ullumikkut aamma taamaappoq.

Pissuserissuusariaqarpugut

11, 12. Pissusilersornerput aamma Guutip oqaasianik eqqortumik atuineq qanoq ataqatigiippat?

¹¹ Biibilili atorlugu sallusuissummik oqaluussinikkut Guutip oqaasiata eqqortumik atornera naammanngilaq. Aammattaaq pissuserput oqaluussinitsinnut naapertuuttariaqarpoq. Tassaagatta „Guutip suleqatai“, ilumoortuusaassanngilagut. (1 Korinthimiut 3:9) Guutip oqaasiani ima allassimavoq: „Illit allamik ajoqersuisuusutit imminut ajoqersunngitsoorpit? Oqaluussisartutit: ’Tillissanngilatit,’ nammineq tillittarpit? Oqartartutit: ’Allasiussanngilatit,’ nammineq allasiortarpit? Guutipilunnik maajuginnillutit oqartartutit naalaffiit piiaaffigisarpigit?“ (Romamiut 2:21, 22, NV) Ullumikkut Guutip oqaasianik eqqortumik  atuisinnaavugut ilaatigut Guutimut suleqataasutut kajumissaarut una malillugu: „[Jehova] tatigiuk uummatikkut iluunngarlutit, namminerlu paasisimasaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.“ — Ussatit 3:5, 6.

¹² Guutip oqaasianik eqqortumik atuigaangatta qanoq angusaqarnissarput ilimagisinnaavarput? Guutip oqaasia allassimasoq inuit ilumoorusuttut inuunerannut qanoq sunniuteqarsinnaanersoq misissoriartigu.

Guutip oqaasia inunnik allanngortitsisinnaavoq

13. Guutip oqaasianik maleruaaneq inummut qanoq kinguneqarsinnaava?

¹³ Guutip oqaasia aalajangiisussatut akuerineqaraangat inuit killissutigingaartarpaat inuunerminnilu maluginiarnartunik allannguinissaminnut iluaqutigisarlugu. Paulusip takusimavaa Guutip oqaasiata sulissutiginninnera malugisimallugulu itsaq Thessalonikami kristumiunngortunik ajunngitsumik killiinera. Taamaattumik ima allaffigai: „Aamma uagut Guuti qutsavigiuartarparput; Guutimmi oqaasia uatsinnit tusagarsi ilassigassiuk inuit oqaasiattut ilassinngilarsi, kisianni pissusiviatut, tassa Guutip oqaasiatut, taannalu ilissinni uppertuni sunniisarpoq.“ (1 Thessalonikamiut 2:13) Kristumiut taakkua, aap, Jiisusi Kristusip ajoqersugaasa tamarmik, ilisimassuseq Guutimeersoq inuit ilisimassusiannit annerungaartutut isigaat. (Esaja 55:9) Thessalonikamiut ’annikilliungaaraluarlutik oqaaseq ilassivaat nuannaarlutik Anersaami Illernartumi’ taamaalillutillu uppertunut allanut maligassanngorlutik. — 1 Thessalonikamiut 1:5-7.

14, 15. Guutip oqaasia qanoq kimittutigiva, aamma sooq?

¹⁴ Guutip oqaasia pilerfimmisut, Jehovatut, ’Guuti uumasutut’, killiisinnaassuseqangaarpoq. Jehovap oqaasiagut „pinngortitaavoq qilak“, taassumalu ’naammasseqqusaanik naammassinnittuaannassalluni’. (Hebræerit 3:12; Tussiaat 33:6; Esaja 55:11) Biibilimik misissueqqissaartartoq ima oqaaseqarpoq: „Guuti oqaatsiminit immikkuunngilaq. Oqaatsini oqaaserisimanngisaannarlugulusooq miserratiginngisaannarpaa. . . . Taamaattumik toqunganngisaannarpoq, qanoq pisoqarneranit sunnerneqanngisaannarsinnaalluni, Guutimummi uumasumut attuumassuteqarluinnarpoq.“

¹⁵ Tusarliussaq Guutip oqaasianeersoq qanoq killiisinnaatigiva? Kimittoqaaq. Taamaattumik Paulusi naleqqulluartumik ima allappoq: „Guutip oqaasia uumavoq sunniisinnaassuseqarlunilu panamillu illuttut kiinalimmit ipinnerulluni. Magguttarpoq avissaartillugu tarneq anersaamit taamatullu aamma pateq saanermit, uummatip eqqarsaatai isumaalu eqqartuuttarlugit.“ — Hebræerit 4:12.

16. Guutip oqaasia inummik qanoq allannguisitsisinnaatigiva?

¹⁶ Guutip oqaasiani allassimasumi tusarliussaq ’panamit illuttut kiinalimmit ipinneruvoq’. Taamaattumik killiisinnaangaarpoq inuit atortuliarisinnaasaannit tamanit akimuisumik. Guutip oqaasia inuup ilorpiaanik attuisarpoq qamanngaaniillu allanngortissinnaallugu, eqqarsaatai nuannarisaalu sunniuteqarfigisinnaallugit, Guutimit iluarisaasutut sulisunngortillugu. Atortup killiisinnaassusia!

17. Nassuiaruk Guutip oqaasiata inuit qanoq allanngortissinnaagai.

¹⁷ Guutip oqaasiata qulaartarpaa inuup ilorlikkut pissusivia, imminut qanoq ittuusorineranit, imaluunniit qanoq ittuusaarneranit, allaalluinnartoq. (1 Samueli 16:7) Inuup guutiitsup kinaassusivini asannittuusaarluni Guutimilluunniit mianerinnittuusaarluni paasitinnaveersaarsinnaavaa. Inuit ajortut ajortumik angusaqarniarlutik pissuserinngisaminnik pissuseqartuusaarsinnaapput. Inuit makitasuut peqqusersiorlutik maniguuttuusaarsinnaapput inunnut nersoqqusaarlutik. Guutip oqaasiata uummammi isertukkat qulaarsinnaavai, inullu maniguuttoq ima killissinnaatigaa pissusitoqaa iperartillugu ’atitillugulu inuk nutaaq Guuti assilillugu pinngortitaq’ ilumoortumik naapertuilluarnikkut ilumoorfiginninnikkullu. (Efesosimiut 4:22-24) Guutip oqaasiani ajoqersuutip aamma inuk qunutooq allanngortissinnaavaa Jehovamut nalunaajaasunngortillugu nakimaatsoq oqaluussisartunngortillugulu aallussilluartoq. — Jeremia 1:6-9.

18, 19. Misigisaq immikkoortumi allassimasoq oqaluttuariuk, oqaluussinermiluunniit nammineq misigisannik oqaluttuarit ersersitsisumik sallusuissutip Biibilimeersup inuit isiginnittaasiannik allannguisitsisinnaaneranik.

 ¹⁸ Guutip oqaasiata inuit nunarsuarmi sumi tamaaniittut allanngortissinnaavai. Oqaluussisartut Cambodjami Phnom Penhimeersut nunap immikkoortuani Kompong Chamimi qaammammut marloriarlutik oqaluussisarput. Tamaani palasip palasit allat Jehovap Nalunaajaasuinik oqaluuserinerluisut tusaareerlugit Nalunaajaasut tullianik tikiummata naapinniarpai. Nalliuttorsuit nalliussineqartarnerat pillugu apersorsuataarpai Biibilimiillu tunngavilersuillutik oqaloqatigimmanni tusarnaaqqissaarluni. Naggataatigut ima oqarpoq: „Maanna nalujunnaarpara palasit allat pillusi oqaasii eqqunngitsuusut. Oqarput Biibili atorneq ajorissi, ullaap tungaali tamaat allamik atugaqanngilasi.“

¹⁹ Arnap taassuma soraarsitaanissamik sioorasaarneqarnini Jehovap Nalunaajaasuinik oqaloqateqartarnerminut akornutaatinngilaa. Biibili tunngavigalugu oqaloqatigiittarnitik ikinngumminut eqqaavai, taassumalu aamma oqaluussisartut Biibilimik misissueqatigisalerpai. Ilikkakkanilu nuannaringaaramigit naalagianut allanut ima oqarpoq: „Qaa, aamma ilissi Jehovap Nalunaajaasuilu Biibilimik atuaqqissaartalerniaritsi!“ Kinguninngua palasikoq allallu Jehovap Nalunaajaasuinit Biibilimik atuaqatigineqartalerput.

20. Arnamik Ghanamiumik oqaluttuap Guutip oqaasiata kimittussusia qanoq ersersippaa?

²⁰ Aamma Paulinamik, arnamik Ghanamiumik, oqaluttuap Guutip oqaasiata kimittussusia ersersippaa. Piffissaq tamaat atorlugu oqaluussisartup atuagaq Ilisarsineq inuunermut naassaanngitsumut sammisoq atorlugu Biibilimik ilinniartippaa. * Paulina arlalinnik nulialimmik ueqarpoq, paasivaalu allannguisariaqarluni, uiali eqqarliilu akerliungaarput. Aataavata, eqqartuussiviit qullersaanni eqqartuussisuusup oqaluffimminilu utoqqaanertaasup, Matthæusi 19:4-6 eqqunngitsumik atorlugu nangartaraluarpaa. Eqqartuussisoq aalajangersimalluinnarpasippoq, Paulinalli paasilertorpaa pissutsit taamani Saatanip Allakkanik mumisitsilluni Jiisusimik ussiineranut assingusut. (Matthæusi 4:5-7) Aammattaaq Jiisusip aappariinneq pillugu paatsuugassaanngitsumik oqaasii eqqaamavai, oqarmat Guutip inuit angutitut arnatullu, imaanngitsoq angutitut ataatsitut arnatullu qassiitut, pinngortikkai, taakkulu marluujunnaarlutik, imaanngitsoq pingasuujunnaarlutik, uiniussasut ataaseq. Aalajangiussani aalajangiusimaannarpaa, naggataatigullu arlalinnik nulialimmik inooqateqaraanni avissinnaatitaanertut avinnissaminut akuerineqarpoq. Tamatuma kinguninngua kuisippoq, ullumikkullu oqaluussisartuuvoq nuannaartoq.

Guutip oqaasianik eqqortumik atuiuarit

21, 22. (a) Oqaluussisartutut suna aalajangiusimasariaqarparput? (b) Allaaserisami tullermi suna eqqartussavarput?

²¹ Ilumut Guutip oqaasia allassimasoq kimittoqaaq allat Jehovamut palligunniarlutik inuunerminnik allannguinissaminnut ikiorneqassagaangata. (Jaaku 4:8) Sullerissutut naammassisaqarluarniarlutik atortuminnik atuisutut, aalajangersinnaavugut ilungersorniarluta Guutip oqaasianik, Biibilimik, atuillaqqissineruniarluta, Jehovap oqaluussisartutut suliassiissutaanik naammassinnissinnaalerluta.

²² Ajoqersuganngortitsiortornitsinni Biibili qanoq atorluarnerusinnaavarput? Ilaatigut allat sallusuissummik qularunnaarsitsillaqqinnerulernikkut. Allaaserisami tullermi allat qanoq ilinniartinneqarsinnaanerannik Guutillu naalagaaffianik tusarliussamik ilassinneqqullugit qanoq ikiorneqarsinnaanerannik siunnersuutit malugikkit.

[Quppernerup ataani ilanngussaq]

Uteqqiinermi apeqqutit

• Oqaluussigaangatta suut atortorisinnaavavut?

• Paulusi oqaluussisartutut qanoq maligassaalluarpa?

• Guutip oqaasianik eqqortumik atuineq sumik ilaqarpa?

• Jehovap oqaasia allassimasoq atortutut qanoq kimittutigiva?

[Atuaqqissaarnermi apeqqutit]

[Qupp. 18-mi assiliartat]

Kristumiut Guutip naalagaaffianik nutaarsiassamik nuannersumik oqaluussigaangamik atortuisa ilaat