’Ilerasuuteqarnaveersaartuaritsi’

„Nalunngeqatiginnissutsit malittariinnassavat.“ Aalajangigassaqartillugu taamatut siunnersuisoqarajuttarpoq. Nalunngeqatiginnissuserpulli tatigisinnaassagutsigu sungiusarneqarsimasariaqarpoq suup eqqortuunera suullu eqqunngitsuunera immikkoortissinnaaqqullugit, tassanngalu siulersortilluta.

Zakæusi, ilanngaaserisuuneq pisooq Jerikomi najugalik, pillugu Biibilimi oqaluttuarineqartoq tamatumunnga assersuutissaavoq. Taassuma miserratiginngilaa pisuussutini peqquserlunnikkut aningaasanik akilersuisitsinermigut pissarsiarisarsimagini — iliuuseq allanik ajoqusiisoq. Zakæusip iliuutsini kukkusut ilerasuutiginerpai? Taamaappat nalunngeqatiginnissutsi soqutiginngitsuusaasimassagunarpaa. — Lukasi 19:1-7.

Zakæusilli inuunerminik allannguissutigisaanik pisoqarpoq. Jiisusi Jerikomut tikiuppoq. Zakæusillu, mikisunnguusup, Jiisusip takullatsiarnissaa kissaatigaa, inuppassuarnilli takusinnaanagu. Taamaattumik arpalluni siuarpoq orpimmullu qaqilluni takulluarnerusinnaajumallugu. Jiisusip Zakæusip soqutiginninnerujussua tupigusuutigaa, taamaattumillu oqarfigaa angerlarsimaffianut pulaarumallugu. Zakæusip pulaartini pingaaruteqartoq inoroorsaarfigilluarpaa.

Zakæusip Jiisusi ilagitillugu takusakkani tusakkanilu, uummammigut attorneqaatigai isumaliortaatsiminillu allannguissutigalugit. Nalunaarpoq: „Naalagaq, pigisama affaat piitsunut tunniutissavakka, pinngitsaaliinikkullu aningaasanik pissarsisimaguma sisamariaammik taarsiissaanga.“ — Lukasi 19:8.

Maanna Zakæusip nalunngeqatiginnissusia qaammarsaaffigineqarpoq, tusaavaa malillugulu. Kinguneqarluarporlu. Takorlooriaruk Zakæusi qanoq misigisimassanersoq Jiisusip ima oqarfigimmani: „Ullumi inoqutigiit uku annassutissarsipput.“ — Lukasi 19:9.

Maligassiap kajumissinassusia! Tamatuma takutippaa qanorluunniit inuuneqarsimagaluarutta, toraagarput allanngortissinnaagipput. Zakæusitut Jiisusip oqaasii Biibilimi allassimassut misissortariaqarpavut, suna eqqortuunersoq sunalu eqqunngitsuunersoq immikkoortilluarsinnaaleqqullugit. Taamaalilluta, apustili Petrusip kajumissaarineratut, ’ilerasuuteqarnaveersaartuarsinnaavugut’. — 1 Petrusi 3:16, 1900/1961.  (wE 5/1 03)