Oqaluussigit ajoqersuganngortitsiniarlutit

„Priskillap Akvilallu [Apollosi] tusarnaaramikku ilaliuppaat Guutillu aqqutigeqqusaanik sukumiinerusumik nassuiaallugu.“ — APUSTILIT SULIAAT 18:26.

1. ’Anersaakkut ilungersortuugaluarluni’ Apollosip suna amigaatigaa?

PRISKILLAP Akvilallu, ukiuni hundredelinni siullerni aappariit kristumiut, Apollosi synagogimi illoqarfimmi Efesosimiittumi oqalugiartoq tusarnaarpaat. Oqallorissorsuulluni qularunnaarsitsillaqqillunilu Apollosip tusarnaartuni soqutiginnilersippai. ’Anersaakkut ilungersortuuvoq Jiisusilu pillugu sukumiisumik ajoqersuilluni’. Erseqqipporli ’Johannesip kuisissutaa kisiat nalunngikkaa’. Apollosip Kristusi pillugu oqaluussissutigisaa ilumooraluarpoq, ilisimasakinnerali ajornartorsiutaavoq. Apollosi Jehovap siunertaani Jiisusi Kristusip inissisimaneranik ilisarsinerusariaqarpoq. — Apustilit Suliaat 18:24-26.

2. Priskilla Akvilalu sumik imminnut suliassippat?

² Priskillap Akvilallu nangaanatik Apollosi ilisarsinerusinnaaqqullugu ikiorumavaat  Jiisusip peqqussutai ’tamaasa maleruarsinnaaqqullugit’. (Matthæusi 28:19, 20) Oqaluttuami allassimavoq Apollosi ’ilaliukkaat Guutillu aqqutigeqqusaanik sukumiinerusumik nassuiaallugu’. Kristumiulli ilaasa Apollosimik ilinniartitsinissartik nangaanartortaqartissinnaavaat. Suna nangaassutigalugu? Priskillap Akvilallu Apollosimik Allakkat pillugit oqaloqatiginninniarnerat sumik ilinniarfigisinnaavarput? Oqaluttuap piviusup taassuma misissornera Biibilimik atuaqqissaaqateqalernissap eqqarsaatiginerunissaanut qanoq iluaqutigisinnaavarput?

Inuit pisariaqartitaat pingaarnerutikkit

3. Sooq Priskillap Akvilallu Apollosip tunuliaqutaa nalunngikkaluarlugu ilinniartinngitsoorumanngilaat?

³ Apollosi juutinik naggueqarpoq Alexandriamilu peroriartorsimagunarluni. Taamanikkut Alexandria Egyptenimi illoqarfiit pingaarnersaraat, qaffasissumillu ilinniarfippassuaqarpoq atuagaateqarfissuanilu tusaamasaassutigalugu. Illoqarfimmi juuterpassuit, ilaatigut ilinniagartoorpassuit, najugaqarput. Taamaattumik Allakkat Hebræerisuut grækerisuunngortinnerat, nutsigaq Septuaginta-mik taaneqartartoq, tassani suliarineqarpoq. Tassa tupinnanngilaq Apollosip ’Allakkat ilisimalluarmagit’. Apollosip oqallorissorsuunerata Akvila Priskillalu, tupiliortuusut, ajukkuttutut misigitippai? Naagga. Apollosi asagamikku taassuma pisariaqartitai qanorlu ikiorsinnaanerlugu pingaarnerutippaat.

4. Sumi qanorlu Apollosi pisariaqartitaminik ikiorneqarpa?

⁴ Apollosi qanorluunniit oqalloritsigigaluaruni ilinniartinneqarnissaminik pisariaqartitsivoq. Pisariaqartitani universitetimi sumiluunniit pisinnaanngilaa, uppeqatiminiinnarli ilagiinni kristumiuni pisinnaavaa. Apollosi Guutip annaassissutissatut aaqqissuussaanik paasinnilluarnerujartorpoq. Priskillap Akvilallu „ilaliuppaat Guutillu aqqutigeqqusaanik sukumiinerusumik nassuiaallugu“.

5. Priskillap Akvilallu anersaakkut ittunik pingaartitsinerat qanoq oqaatigineqarsinnaava?

⁵ Priskilla Akvilalu anersaakkut nukittuujupput tunngaveqarluartumillu upperisaqarlutik. Qularnanngitsumik ’piareersimajuarput neriuutigisaq imminniittoq pillugu isumartik illersorsinnaaqqullugu nassuiaaqqusisumut kimulluunniit’, pineqartoq pisuujugaluarpat, piitsuugaluarpat, ilinniagartuujugaluarpat inussiaagaluarpalluunniit. (1 Petrusi 3:15) Akvila nulialu ’oqaatsimik sallusuissutaasumik eqqortumik atuisinnaapput’. (2 Timotheusi 2:15, NV) Qularutissaanngilaq Allakkat peqqissaarlutik atuaqqissaartaraat. Ilinniartitsissutaat Apollosip killissutigingaarpaa Guutip oqaasianik ’uumasumik sunniisinnaassuseqartumillu’ uummatinillu killiisinnaasumik tunngaveqarmat. — Hebræerit 4:12.

6. Apollosip ikiorneqarnini qujamasuutigigaa qanoq nalunngilarput?

⁶ Apollosip ilinniartinneqarnini qujamasuutigaa, tamannalu ajoqersuganngortitsiortornermini suli pikkorinnerulissutigaa. Ilisimasaqarnini atorluartarpaa iivangkiiliu oqaluussissutigigaangamiuk, pingaartumik innuttaasunut juutinut. Apollosip ingammik pikkoriffigaa Jiisusip Missiarsiuneranik juutinik qularunnaarsitsineq. ’Allakkat ilisimalluaramigit’ takutissinnaavaa itsaq pruffiitit tamarmik Missiarsip tikiunnissaa qilanaarigaat. (Apustilit Suliaat 18:24) Oqaluttuarineqarpoq kingusinnerusukkut Apollosi Akajamukartoq tassanilu ’uppertunut Guutip saammaanneragut iluaqutaangaalerluni. Tamaasami tusaatillugit juutit oqaasissaarutitilluinnarpai Allakkallu tunngavigalugit uppernarsarlugu Jiisusi Kristusiusoq’. — Apustilit Suliaat 18:27, 28.

Allat ilinniartitseriaasiat ilinniarfigiuk

7. Akvila Priskillalu qanoq ilinniartitsillaqqissippat?

⁷ Akvila Priskillalu Guutip oqaasianik ilinniartitsinermut qanoq ilillutik taama pikkoritsigilerpat? Nammineq eqiasuillutik atuaqqissaartarnermik ataatsimiinnernullu najuuttarnermik saniatigut apustili Paulusimik suleqatiginnilluarnertik iluaqutigingaarsimassavaat. Qaammatini 18-ini Paulusi Korinthimi Akvilakkunni najugaqarpoq, tassanilu tupiliortutut suleqatigiipput.  (Apustilit Suliaat 18:2, 3) Takorlooriaruk tamatuma kingunerisaanik anersaakkut ittunik itisuunik oqaloqatigiittarsimanissaat. Aap, taamatut Paulusimik peqateqartarnertik anersaakkut nukittorsaatigisimassaqaat. „Ilisimasunik peqateqartoq ilisimassuseqalersarpoq,“ Ussatit 13:20-mi allassimavoq. Paulusimik peqateqarluarnerat anersaakkut inuunerannut iluaqutaavoq. — 1 Korinthimiut 15:33.

8. Priskilla Akvilalu Paulusip oqaluussineranik malinnaanermikkut sumik ilikkagaqarpat?

⁸ Priskillap Akvilallu Paulusi oqaluussisoq malittarigaangamikku paasisarpaat ilinniartitsisoq pikkorissoq qanoq ilinniartitsisarnersoq. Apustilit Suliaat-ni oqaluttuarineqarpoq Paulusi ’sabbatit tamarluinnaasa [Korinthimi] synagogimi oqaloqatiginnittartoq juutit grækerillu qularunnaarsinniarlugit’. Kingusinnerusukkut Silasip Timotheusillu ilaliummanni „Paulusip oqaaseq tamaviaarutigaa juutinullu nalunaajaatigalugu Jiisusi tassaasoq Kristusi“. Priskillap Akvilallu malugaat synagogimi ilaasortaasut soqutiginnilluanngimmata Paulusi oqaluussilluarfiginerusinnaasaminukartoq, tassa illumut synagogip sanianiittumut. Tassani synagogimi pisortaasoq Krispusi ajoqersuganngortissinnaasimavaa. Qularnanngitsumik Priskillap Akvilallu misigaat angutip taassumarpiaap kristumiunngornerata oqaluussiffigisartakkami iluaqutaanera. Oqaluttuami ima allassimavoq: „Krispusi taassumalu inoqutai tamarmik Naalakkamut uppertunngorput. Korinthimiuttaaq amerlasuut tusarnaarput uppertunngoramillu kuisillutik.“ — Apustilit Suliaat 18:4-8.

9. Priskillap Akvilallu Paulusip maligassiaa qanoq malippaat?

⁹ Kristumiut arlallit, ilaatigut Priskilla Akvilalu, Paulusip oqaluussisartutut maligassiaanik malinnipput. Apustili ima kajumissaarivoq: „Assiginiarsinga soorlu uanga Kristusi assiginiariga.“ (1 Korinthimiut 11:1) Priskilla Akvilalu kajumissaarummik malinnipput ilaatigut Apollosi kristumiut ajoqersuutaannik eqqornerusumik paasinnilersillugu. Apollosillu aamma allat ikiorpai. Qularnanngitsumik Priskilla Akvilalu Romami, Korinthimi Efesosimilu ajoqersuganngortitsiortoqataapput. — Apustilit Suliaat 18:1, 2, 18, 19; Romamiut 16:3-5.

10. Apustilit Suliaat kapitali 18 ajoqersuganngortitsinissannut iluaqutigisinnaasannik sumik ilinniarfigaajuk?

¹⁰ Apustilit Suliaat kapitali 18-imik misissuineq tamanna qanoq ilinniarfigisinnaavarput? Akvilap Priskillallu Paulusimit ilinniarfiginninnerattulli, uagut oqaluussisartut pikkorissut maligassiaannik malinninnikkut ajoqersuganngortitsiortornitsinni pikkorinnerulersinnaavugut. Peqatigisarsinnaavavut ’oqaatsimik tamaviaarutiginnittut’ allanullu sukumiisumik ’nalunaajaatiginnittut’. (Apustilit Suliaat 18:5) Maluginiarsinnaavarput qanoq ilillutik inuit uummataannik killiisartut qularunnarsitsisumik ilinniartitsinikkut. Taamaaliorneq ilikkarutsigu ajoqersuganngortitsinissamut iluaqutigissavarput.  Biibilimik ilinniartitaqaraangatta siunnersorsinnaavarput ilaquttaminik ikinngutiminilluunniit atuaqqissaaqatigiinnermut qaaqqusinissaa. Aperisinnaavarpulluunniit Biibilimik atuaqqissaarnermik neqeroorfigisinnaasatsinnik ilisarisimasaqarnersoq. — Apustilit Suliaat 18:6-8.

Ajoqersuganngortitsinissamut periarfissarsiorit

11. Ajoqersuganngortussat qanoq nanineqarsinnaappat?

¹¹ Paulusi uppeqataalu kristumiut ajoqersuganngortitsiniarlutik illumiit illumut, niueriartortarfinni angalagaangamillu — aap, sumi tamaani — oqaluussisarput. Aallussilluarlutit ajoqersuganngortitsiortorninni oqaluusseriaatsitit amerlanerulersissinnaavigit? Periarfissaasinnaasut atorlugit qinngaqqunnanngitsunik ujaasisinnaavit, oqaluussiffigalugillu? Oqaluussisartut ilaat ajoqersuganngortitsiortornermi qanoq angusaqarluarsimappat? Sammeqqaariartigu telefonikkut oqaluussineq.

12-14. Telefonikkut oqaluussinerup pingaaruteqarnera ersersinniarlugu nammineq misigisannik oqaluttuarit, immikkoortuniittorluunniit oqaluttuariuk.

¹² Arnaq kristumiu Mariamik taasinnaasarput Brasiliami illumiit illumut oqaluussivoq arnamullu inuusuttumut inissiarsuarmiit anilersumut naqitaaraq tunniullugu. Mariap naqitaaqqap qulequtaa aallarniutigaa imalu aperaluni: „Biibili pillugu paasisaqarnerorusuppit?“ Arnaq ima akivoq: „Aap, paasisaqarnerorusoqaanga. Ajornartorsiutigaarali ilinniartitsisuunera piffissaralu tamaat ilinniartitsisarnera.“ Mariap arnaq oqarfigaa telefonikkut Biibilersaarutinik oqaloqatigiittarsinnaallutik. Arnap telefonimi normua Mariamut tunniuppaa, unnullu taanna atuagassiaaraq Guutip sumik piumaffigaatigut? atorlugu telefonikkut Biibilimik atuaqqissaartalerput. *

¹³ Etiopiami piffissaq tamaat oqaluussisartup telefonikkut angut oqaluussiffigitillugu tunuatungaani nipiliorpalussuaq paasinngilaa. Angutip oqaluussisartoq kingusinnerusukkut sianeqqeqquaa. Sianeqqimmat angutip oqaloqatigiinnertik maangaannaq kipitikkamiuk utoqqatserpoq oqarlunilu nulianilu oqqaterujussuarlutik. Oqaluussisartup arnap taamatut paasitinneqarnini atorluarpaa ilaqutariinni ajornartorsiutit qanoq aaqqinneqarsinnaanerannik Biibilimi silatuumik siunnersuuteqarneranik uparuaanissaminut. Oqaluttuarpoq ilaqutariippassuit iluaqutigisimagaat atuagaq Ilaqutariittut pilluarneq isertugaateqarpoq, Jehovap Nalunaajaasuinit saqqummersinneqartoq. Angutip atuakkamik pinerata kingorna ullualuit qaangiuttut oqaluussisartoq sianeqqippoq. Angut ima oqarpoq: „Atuakkap tunniussavit aappariinnerput annaappaa!“ Ilaquttani katersorsimavai oqaluttuunniarlugit siunnersuutinik pitsaasunik atuakkami atuakkaminik. Biibilimik atuaqqissaaqatigineqalerpoq, sivitsunngitsorlu angut kristumiut ataatsiminnerinut najuuttuaannalerpoq.

¹⁴ Danmarkimi oqaluussisartoq telefonikkut Biibilimik atuaqqissaaqateqalersimasoq ima oqarpoq: „Kiffartornermik nakkutilliisup  kajumissaarpaanga telefonikkut oqaluussinermi peqataasaqqullunga. Aallaqqaammut tunuarsimaarpunga oqarlungalu: ’Uangaanngitsoq.’ Ullulli ilaanni sapiiserlunga siulleq sianerfigaara. Sonjap telefoni tiguaa, sivikitsumillu oqaloqatigeereerluta atuagassianik Biibililersaarutinik neqeroorfigiganni piumavoq. Unnuit ilaanni ’pinngortitaaneq’ eqqartorparput, atuagarlu Livet — hvordan er det kommet her? Ved en udvikling eller en skabelse? atuarumavaa. * Oqarpunga nuannissagaluartoq naapissinnaagutta tamannalu oqaloqatigiissutigalugu. Akuersivoq. Naapikkatta Sonja atuaqqissaaqatigineqalernissaminut piareersimavoq, tamatumalu kingorna sapaatip-akunneri tamarluinnaasa atuaqqissaaqatigiittarpugut. Oqaluussisartoq arnaq ima naggasiivoq: „Ukiorpassuarni Biibilimik atuaqqissaaqateqalernissara qinnutigisarpara, ilimaginngikkaluarpara telefonikkut oqaluussinikkut tamanna angussallugu.“

15, 16. Biibilimik atuaqqissaaqateqalernissamut periarfissat eqqumaffiginissaata iluaqutaaneranik ersersitsisumik misigisamik oqaluttuassaqarpit?

¹⁵ Amerlasuut inuit sumiiffiini oqaluussinissamik siunnersuutinik malinnillutik angusaqarluartarput. USA-mi arnap kristumiup biilini biilip allap sanianut unitsippaa. Biilip aappaaniittup qiviarmani oqaluussisartup Biibilimik ilinniartitsinitsinnik oqaluttuutilerpaa. Arnaq tusarnaarpoq, biiliminit niuvoq oqaluussisartullu biilianukarluni. Ima oqarpoq: „Oqaluunniarlunga uninnerit nuannaarutigeqaara. Atuagassiaatisi Biibililersaarutit qangarsuarli pivakka. Aammattaarmi Biibilimik atuaqqissaaleqqikkusuppunga. Atuaqqissaaqatigerusuppinga?“ Tassa qatannguterput nutaarsiassap nuannersup oqaluussissutiginissaanut periarfissarsiorami iluatsitsivoq.

¹⁶ USA-mi oqaluussisartoq arnaq plejehjemmimut pulaarami ima misigisaqarpoq. Sammisassaqartitsisartumut saaffiginnippoq, oqarfigalugulu ineqartut anersaakkut pisariaqartitaat matussutissinniarlugit nammineq piumassutsiminik ikiuukkumalluni. Nangillunilu oqarpoq piumasut tamaasa akeqanngitsumik Biibilimik kursusertikkumallugit. Ineqartunut arlalinnut pulaarnissaminut akuerineqarpoq, sivitsunngitsorlu sapaatip-akunneranut pingasoriarluni ineqartut 26-t Biibilimik atuaqqissaaqatigisalerpai, taakkualu ilaat ataatsimiinnitsinnut aalajangersimasumik najuussinnaasarpoq.

17. Biibilimik atuaqqissaaqatitaarniaraanni periaaseq suna angusaqarluarnartarpa?

¹⁷ Oqaluussisartut ilaat angusaqarluartarput toqqaannartumik Biibilimik atuaqqissaarnermik neqeroorlutik. Ullut ilaanni ullaap tungaa ilagiinni 105-inik oqaluussisartoqartumi aalajangerput naapitaminnut tamanut Biibilimik atuaqqissaarnermik neqeroorniarlutik. Oqaluussisartut 86-it angalaarput, nalunaaquttap-akunnerilu marluk oqaluussereerlutik ikinnerpaamik 15-inik Biibilimik atuaqqissaaqatitaarsimapput.

Qinngaqqunnanngitsunik ujarlertuarit

18, 19. Jiisusip siunnersuutaa pingaarutilik suna eqqaamajuartariaqarparput, taamaattumillu qanoq iliornissarput aalajangiusimasariaqarparput?

¹⁸ Allaaserisami matumani siunnersuutit immaqa nammineq oqaluussininni misilikkusuppatit. Qanoq oqaluussissanerluni aalajangerniaraanni soorunami silatusaarnerussaaq nunagisami ileqquusut eqqarsaatigigaanni. Pingaarnerpaamilli eqqaamasariaqarparput Jiisusip qinngaqqunnanngitsunik ujaasinissamik  taakkuninngalu ajoqersuganngortitsinissamik siunnersuutaa. — Matthæusi 10:11; 28:19.

¹⁹ Taamaattumik ’oqaatsimik sallusuissutaasumik eqqortumik atuisariaqarpugut’ tunngavilersuutit qularunnaarsitsisut Biibilimik tunngaveqarluartut atortarlugit. Tamanna iluaqutigissavarput tusaarusuttut uummataannik killiinissatsinnut iliuuseqarnissamullu kajumissisinnissaannut. Qinunikkut Jehova tunaarigutsigu allat Jiisusi Kristusimut ajoqersuganngortissinnaavavut. Suliaavorlu nalerisimaarnangaartoq. Taamaattumik ’sapinngisatsinnik iliorniarta iluarisaasutut Guutimut sassarniarluta’, Jehova tamatigut ataqqillugu Guutip naalagaaffianik oqaluussisartutut aallussilluartutut ajoqersuganngortitsiniarlunilu oqaluussisartutut. — 2 Timotheusi 2:15, NV. (wE 11/15 03)

[Quppernerup ataani ilanngussat]

Eqqaamavigit?

• Sooq Apollosi Guutip aqqutigeqqusaanik sukumiinerusumik nassuiaanneqartariaqarpa?

• Priskillap Akvilallu apustili Paulusimit suna ilikkarpaat?

• Ajoqersuganngortitsiortorneq pillugu Apustilit Suliaat kapitali 18 sumik ilinniarfigaajuk?

• Ajoqersuganngortitsinissamut qanoq periarfissarsiortoqarsinnaava?

[Atuaqqissaarnermi apeqqutit]

[Qupp. 26-mi assiliartaq]

Priskillap Akvilallu Apollosi ’Guutip aqqutigeqqusaanik sukumiinerusumik nassuiaappaat’

[Qupp. 28-mi assiliartaq]

Apollosi ajoqersuganngortitsiortornermut pikkorissivoq

[Qupp. 29-mi assiliartaq]

Paulusi sumi tamaani oqaluussisarpoq

[Qupp. 31-mi assiliartat]

Oqaluussinissamut periarfissarsiorit