Eqiinganissaq aatsaat taama pingaaruteqartigaaq
Eqiinganissaq aatsaat taama pingaaruteqartigaaq
„Taamaattumik eqqumagitsi, naluarsimi ulloq Naalakkassi tikiuffissaa.“ — MATTHÆUSI 24:42.
1, 2. Suup takutippaa pissutsit aaqqissuussaanerata maanna atuuttup naggatissaani inuusugut?
„UKIUT 1900-kkut malunnaatiginerpaavaat sorsunneq,“ atuakkiortoq Bill Emmott oqarpoq. Nassuerutigaa inuit oqaluttuarisaaneranni piffissani assigiinngitsuni tamani sorsunnerup nakuusernerullu naalliunnartui erloqinartut atorneqartariaqarsimasut, imali nangippoq: „Ukiut 1900-kkut sorsunnerit nakuusernerillu eqqarsaatigalugit ukiunit hundredelikkuutaanit siuliinit allaanerunngillat. Nakuusertarnerilli sakkortuseriarujussuarput. Ukiuni hundredelinni taakkunani aatsaat silarsuaq tamakkivillugu akerleriittoqalerpoq . . . Pissutsillu ilungersunarnerat erseqqissarneqarpoq taamatut akerleriittoqarnera ataasiaannarluni misigineqanngimmat, marloriarlunili misigineqarmat.“
2 Jiisusi Kristusip siulittuutigaa sorsuttoqarumaartoq ’inuiaat pikitsitsiumaarmata inuiannut, naalagaaffillu naalagaaffimmut’. Jiisusilli ’tikiunnissaanut silarsuullu naggatissaanut’ nalunaaqutit sorsunnerit ilaannaraat. Jiisusip siulittuummini pingaartumi kaannersuit, nappaassuit nunallu sajunneri aamma eqqaavai. (Matthæusi 24:3, 7, 8; Lukasi 21:6, 7, 10, 11) Ajunaarnersuit taamaattut assigiinngitsorpassuartigut annertunerulersimapput sakkortunerulersimallutillu. Inuit ajorsigaluttuinnarput, soorlu Guutimut tullerminnullu isiginnittaasiannit takuneqarsinnaasoq. Ileqqussatigut najoqqutaarunneq pinerlunnerillu nakuusernerillu amerliartuinnarnerat erseqqippoq. Inuit aningaasat Guutiminngarnit asaneruaat nuannaarniutinillu tiguartissimalluinnarajullutik. Tamakku tamarmik ’ulluni atugarliungaarfiusuni’ inuunitsinnut uppernarsaataapput. — 2 Timotheusi 3:1-5.
3. ’Nalunaaqutinik maanna pisunik’ takunnittuunerput qanoq sunnertissutigisariaqarparput?
3 Silarsuarmi pissutsit ajorsiartuinnartut takugaangakkit qanoq eqqarsartarpit? Inuppassuit pisut alianartut soqutiginngilaat, immaqalu misigissutsikkut attortippiaratik. Silarsuarmi sunniisinnaassusillit silassorissullu ’nalunaaqutinik maanna pisunik’ paasinninngillat, upperisarsiornikkullu siuttuusut nalunaaqutit taakku qanoq isumaqarnerannik eqqortumik nassuiaassisinnaanngillat. (Matthæusi 16:1-3) Jiisusilli ajoqersukkani ima peqquai: „Taamaattumik eqqumagitsi, naluarsimi ulloq Naalakkassi tikiuffissaa.“ (Matthæusi 24:42) Uani Jiisusip kajumissaarpaatigut ’eqqumaqqulluta’. Taamaaliussagutta mianersortuartariaqarpugut eqiingajuartariaqarlutalu. Ulluni kingullerni inuunitsinnik upperinninnerinnaq piffissallu erloqinarnerannik nassuerutiginninnerinnaq naammanngilaq. Qularutiginngilluinnartariaqarparput suut ’tamarmik naggatissaat qanillisoq’. (1 Petrusi 4:7) Aatsaat taamaakkutta piffissap nukinginnartuunera eqqumaffigiuarsinnaavarput. Taamaattumik apeqqut eqqarsaatigisariaqagarput unaavoq: ’Naggatissap qanillineranik qularutiginninnginnitsinnut suna nakussatsissutigisinnaavarput?’
4, 5. (a) Silarsuarmik aaqqissuussinerup ajortup maanna atuuttup naggatissaata qanilliartorneranik qularutiginninnginnitsinnut suna nakussatsissutigisinnaavarput, aamma sooq? (b) Noap ulluisa aamma Inuup Ernerata najuuffissaa qanoq assigiissuteqarpat?
4 Noap nalaani, nunarsuarmi ulersuaqanngikkallarmat, pissutsit qanoq issimasut eqqarsaatigeriakkit. Inuit ajungaarmata Jehova „aliasulerpoq“. Ima nalunaarpoq: „Inuit pinngortitakka nunap qaavanit piiassavakka.“ (1 Mosesi 6:6, 7) Taamatorluinnarlu iliorpoq. Jiisusip Noap nalaa nalitsinnut naleqqiuppaa ima oqarami: „Soorlu Noap ulluini ittoq, taamatuttaaq Inuup Ernerata tikiuffissaa ikkumaarpoq.“ — Matthæusi 24:37.
5 Ilimanarluinnarpoq Jehovap silarsuarmik aaqqissuussineq maanna atuuttoq aamma silarsuaq Ulersuaq sioqqullugu piusoq assigiimmik misigissuseqarfigigai. Noap nalaani silarsuaq guutiitsoq piuneerukkamiuk, aamma ullutsinni silarsuaq ajortoq piuneerutingaassavaa. Noap nalaata nalittalu assigiissutaat paasilluarsimagutsigik, silarsuup matuma naggatissaata qanillineranik qularutiginninnginnitsinnut nakussatsissutigisinnaavarput. Suulli assigiissutaagamik? Assigiissutit minnerpaamik tallimaapput, siullerlu tassaavoq piuneerussaanissamik paatsuugassaanngitsumik mianersoqqusineq.
’Suli takussaanngitsoq’ pillugu mianersoqquneqarneq
6. Noap nalaani Jehova qanoq iliorniarluni aalajangerpa?
6 Noap nalaani Jehova ima nalunaarpoq: „Anersaartornera uumassutaasoq inunniittuaannassanngilaq pinngortitaannaammata toqusussat, ukiut inuuffigisassaat 120-innaassapput.“ (1 Mosesi 6:3) Ukiumi 2490-imi u.n.s. Guuti taamatut nalunaarmat taamanikkut silarsuup guutiitsup naggatissaata aallartinneranut nalunaaqutaavoq. Taamanikkut inuusunut qanoq isumaqarnersoq eqqarsaatigeriaruk! Ukiut 120-innaat qaangiuppata Jehova ’nunarsuarmi ulersuartitsissaaq anersaartornermik uumassutaasumik peqartut qilaap ataaniittut tamaasa nungutillugit’. — 1 Mosesi 6:17.
7. (a) Ulersuaqarnissaanik mianersoqquneqarnini Noap qanoq periaaseqarfigaa? (b) Pissutsit aaqqissuussaanerata matuma naggatissaanik mianersoqqusinerit qanoq periaaseqarfigisariaqarpavut?
7 Ajunaarnersuaqarnissaa ukiunik qulikkuutaanik arlalinnik sioqqullugu Noa mianersoqquneqarpoq, annaanneqarnissamullu piareersarnermigut piffissaq silatusaarluni atorpaa. Apustili Paulusi ima allappoq: „Noa ilimasaarneqarpoq suli takussaanngitsumik, Guutimillu mianerinnittuugami umiarsualiorpoq inoqutimi annaffissaannik“. (Hebræerit 11:7) Uagummi? 1914-imi pissutsit aaqqissuussaanerata matuma ullui kingulliit aallartimmatali ukiut 90-ingajaat qaangiutereerput. Qularutissaanngilluinnarpoq „naggatissap“ nalaaniittugut. (Danieli 12:4) Mianersoqquneqarnivut qanoq periaaseqarfigisariaqarpavut? „Guutip piumasaanik iliortoq naassaanngitsumik atassaaq,“ Biibilimi allassimavoq. (1 Johannesi 2:17) Taamaattumik piffissaavoq Jehovap piumasaatut iliornissamut piffissallu killeqarneranik suliallu nukinginnartuuneranik paasinnilluinnarnissamut.
8, 9. Nalitsinni suut mianersoqqussutaappat, qanorlu oqaluussissutigineqarpat?
8 Ukiuni kingulliunerusuni inuit eqqortuliorusuttut allakkanik isumassarsiarititaasunik, Biibilimiittunik, atuaqqissaarsimasut paasisimavaat pissutsit aaqqissuussaanerata matuma piuneerunneqartussatut eqqartuunneqarsimanera. Tamanna ilumut upperilluinnarparput? Jiisusip oqaasii paatsuugassaanngitsut uku malugikkit: „Taamaannerani naalliunnartoqangaassaaq silarsuup pileqqaarneraniit maannamut asseqanngitsumik nalliuteqqinngisaannassasumillu.“ (Matthæusi 24:21) Aammattaaq Jiisusi oqarpoq eqqartuussisutut Guutip toqqagaatut tikiutissalluni inuillu immikkoortissallugit, soorlu savanik paarsisup savat savaasanit immikkoortittarai. Iluarisaanngitsutut eqqartuunneqartut „aallarumaarput naassaanngitsumik pillarneqassallutik iluartulli naassaanngitsumik inuuneqassallutik“. — Matthæusi 25:31-33, 46.
9 Mianersoqqussutit taakku Jehovap innuttaminut malugeqquai ’kiffap ilumoortup silatuullu’ piffissaalluartukkut anersaakkut inuussutissat pilersitai aqqutigalugit. (Matthæusi 24:45-47) Aammattaaq inuiaqatigiit naggueqatigiillu, immikkullu oqaasillit inuiaallu tamarmik kajumissaarneqarput ’Guutimik mianerinneqqullugit naalannartitseqqullugillu, eqqartuussinissaa nalliummat’. (Saqqummersitat 14:6, 7) Guutip naalagaaffia pillugu tusarliussap, Jehovap Nalunaajaasuinit nunarsuaq tamakkerlugu oqaluussissutigineqartup, pingaartortaata ilaa tassaavoq Guutip naalagaaffiata inuit naalakkersuinerannik erniinnaq atorunnaarsitsinissaanik mianersoqqusineq. (Danieli 2:44) Mianersoqqussut tamanna soqutaanngitsutut isigisariaqanngilarput. Guutip ajugaqanngitsup oqaatsini eqqortittuaannarpai. (Esaja 55:10, 11) Noap nalaani taamaaliorpoq, nalitsinni aamma taamaaliussaaq. — 2 Petrusi 3:3-7.
Kinguaassiuutitigut ileqqorlukkaluttuinnarneq
10. Noap nalaani kinguaassiuutitigut ileqqorlunneq qanoq oqaatigineqarsinnaava?
10 Aamma allatigut nalerput Noap nalaanut assinguvoq. Jehovap angut arnarlu siullit peqquai kinguaassiorsinnaatitaanertik Guutimeersoq aappaariinnerup iluani ataqqinartumik atorlugu „nunarsuaq tamakkerlugu“ inunnik kinguaassiussasut. (1 Mosesi 1:28) Noalli nalaani inngilit naalasseriitsut kinguuaassiuutitigut iliuutsinik pissusissamisuunngitsunik inuiaat mingutsippaat. Nunaliarput inuttullu timeqalerlutik arnallu pinnersut inooqatigalugit. Kinguaaqalerpullu affarmik inummik affarmillu anersaapilummik — inorujussuarnik, nefiliminik taaneqartunik. (1 Mosesi 6:2, 4) Inngilit pileritsannertuut ajortuliaat Sodomami Gomorramilu iliuutsinut maajunnartunut assersuunneqarput. (Judasi 6, 7) Erseqqippoq taamanikkut kinguaassiuutitigut ileqqorluttoqangaartoq.
11. Nalitsinni ileqqussatigut pissutsit Noap nalaani pissutsinut qanoq assinguppat?
11 Ullumikkut ileqqussatigut pissutsit qanoq ippat? Inuppassuit kinguaassiuutinut tunngasut kisiisa eqqarsaatigisarpaat. Paulusip inuit taamaattut ileqqussatigut ’sianigisaaruttutut’ eqqorluartumik allaatigai; inuppassuit ’kanngunartuliornermut tunniupput nalinginnarnik piumatuunerminni mingunnartuliorumallutik’. (Efesosimiut 4:19, 1900/1961) Tiingasulersaarutit, katissimanngitsut atoqatigiittarnerat, meeqqanik kinguaassiuutitigut atornerluineq, anguteqatinoortarneq arnaqatinoortarnerlu nalinginnaapput. Ilaasa ’akissaa naammattoq imminni pigilereerpaat’ kinguaassiuutitigut tunillaattartunik nappaateqalernermikkut, ilaqutariittut isasoornermikkut atugarisamikkullu allanik ajornartorsiuteqalernermikkut. — Romamiut 1:26, 27, 1900/1961.
12. Sooq ajortunik sunilluunniit tamanik uumissuineq ineriartortittariaqarparput?
12 Noap nalaani Jehovap taamanikkut silarsuaq tiinngartooq ulersuarujussuarmi piuneerutippaa. Puiunngisaannartariaqarparput piffissaq inuuffigisarput Noap nalaanut assingulluinnarmat. ’Naalliunnartoqangaarfissami’ nunamit piiarneqassapput ’kinguaassiuutitigut inuunerluttut, allasiortut anguteqatiminnoortartullu’. (Matthæusi 24:21; 1 Korinthimiut 6:9, 10; Saqqummersitat 21:8) Taamaattumik pingaaruteqarluinnarpoq ajortunik sunilluunniit tamanik uumissuinermik ineriartortitsinissarput pissutsinillu kinguaassiuutitigut inuunerlunnermik kinguneqarsinnaasunit nigorsimanissarput! — Tussiaat 97:10; 1 Korinthimiut 6:18.
Nuna ’nakuusernernik ulikkaarpoq’
13. Sooq Noap nalaani nuna ’nakuusernermik ulikkaarpa’?
13 Noap nalaanut ilisarnaataasoq suli alla aamma Biibilimi uparuarneqarpoq, ima allassimavoq: „Nunarsuarmi aserorsimaneqarpoq Guutip takkuani nakuusernernik ulikkaarluni.“ (1 Mosesi 6:11) Aatsaat nakuusertoqalinngilaq. Assersuutigalugu Adamip ernerata Kainip nukki naapertuilluartoq toquppaa. (1 Mosesi 4:8) Lemekillu nalaani nakuuserumatunerujussuaq erserpoq Lemekip angummik inuusuttumik toqutsereerluni, imminut illersorunarluni, taalliani oqarissaarutigimmagu. (1 Mosesi 4:23, 24) Noap nalaani allaassutaasoq tassaavoq nakuusertoqangaarnera. Guutip erneri naalasseriitsut nunami arnanik aappartaarmata kinguaaqalerlutillu — inorujussuarnik, nefiliminik — aatsaat taama nakuusertoqartigilerpoq. Inorujussuit nakuuserajuttut taakku taaneqartarput „killuisut“ — „allanik uppititsisartut“. (1 Mosesi 6:4, NV-mi quppernerup ataani ilanngussaq) Taakku pisuullutik ’nunarsuaq nakuusernermik ulikkaarpoq’. (1 Mosesi 6:13) Takorluukkit taamaattunik avatangiiseqarluni qitornaminik perorsaagami Noap ajornartorsiutigisarsimagunagai! Paasinarsivorli Jehovamut ’Noa eqqarleriit taakkua akornanni iluartuusoq’. — 1 Mosesi 7:1.
14. Ullumikkut silarsuaq qanoq ’nakuusernermik ulikkaarpa’?
14 Inuiaat oqaluttuarisaaneranni nakuusertoqartuaannarpoq. Noalli nalaanisut ullumikkut aatsaat taama nakuusertoqartigineranut isiginnittuuvugut. Angerlarsimaffimmi nakuusertoqartarnera, peqqarniisaartoqartarnera, inuiannik toqoraasoqartarnera isumaqanngitsumillu toqoraasoqartarnera tusakulavavut. Ilanngunneqarsinnaapput sorsuttoqarnerani aammik kuisinerit. ’Nunarsuaq nakuusernermik ulikkaaqqippoq’. Sooq? Nakuusernerusoqartalerneranut suna pissutaaqataava? Akissutaani nassaarisinnaavarput Noap nalaanut assingussoq suli alla.
15. (a) Ulluni kingullerni nakuusertoqarnerulerneranut suna pissutaaqataava? (b) Qanoq kinguneqassava?
15 Guutip naalagaaffia Missiarsikkoortoq 1914-imi pilersinneqarmat, kunnginngortitaq, Jiisusi Kristusi, oqaluttuarisaanermi pingaarutilimmik iliuuseqarpoq. Saatani Diaavulu inngilipiluilu qilammit, nunarsuup eqqaanut, igitaapput. (Saqqummersitat 12:9-12) Ulersuaq sioqqullugu inngilit naalasseriitsut namminneq kajumissutsiminnit qilak qimappaat; nalitsinnili pinngitsaalineqarlutik qilammit igitaapput. Aammattaaq nunami inuttut timeqalersinnaajunnaarput inunnik pissusissamisuunngitsumik kinguaassiuutitigut atoqateqarniarlutik. Taamaattumik isumatsassimaaramik kamakkamillu eqqartuunneqarnissartillu siooragigamikku Noap nalaaninngarnit inunnik aaqqissuussinernillu naakkittaatsumik pinerluttuliortitsinerusarput nakuusertitsinerusarlutillu. Inngilit naalasseriitsut kinguaavilu silarsuarmi ajussuseqangaarneranut pisuummata Jehovap silarsuaq Ulersuaq sioqqullugu piusoq piuneeruppaa. Qularutiginngilluinnarsinnaavarput ullumikkut taamatut iliorumaartoq! (Tussiaat 37:10) Eqqumasulli nalunngilaat aniguisitaanissartik qanillisoq.
Tusarliussaq oqaluussissutigineqarpoq
16, 17. Noap nalaata nalittalu assigiissutaasa sisamaat suua?
16 Nalitta silarsuullu Ulersuaq sioqqullugu piusup assigiissutaasa sisamaat Noamut suliassiissutaasumut tunngavoq. Noa umiarsuarujussualiorpoq, aammattaarlu ’nalunaariartortitaavoq’. (2 Petrusi 2:5) Tusarliussaq suna Noap oqaluussissutigaa? Inuit allamik isumataaqqullugit kajumissaarpai piuneerussaanissarlu pillugu mianersoqqusilluni. Jiisusili oqarpoq Noap nalaani inuit ’aatsaat paasisaqalersut ulersuaq nalliummat tamaasalu nungutillugit’. — Matthæusi 24:38, 39.
17 Jehovap Nalunaajaasui aamma eqiasuillutik oqaluussisarput, taamatullu Guutip naalagaaffia pillugu tusarliussaq silarsuarmi tamarmi tusarliunneqarpoq. Nunarsuarmi sumiiffinni tamangajanni inuit Guutip naalagaaffia pillugu tusarliussaq namminneq oqaatsiminni tusarsinnaavaat atuarsinnaallugulu. Atuagassiaq Napasuliaq Alapernaarsuiffik, Jehovap naalagaafianik tusarliussisoq, oqaatsini 140-nit amerlanerusuni 25.000.000-inngorlugulu naqinneqartarpoq. Aap, ilumut Guutip naalagaaffia pillugu nutaarsiassaq nuannersoq ’silarsuarmi tamarmi oqaluussissutigineqarpoq inuiannut tamanut nalujunnaarsillugu’. Suliaq Guutip iluarisaanik naammassineqarpat naggatissaq nalliukkumaarpoq. — Matthæusi 24:14.
18. Inuit Noap nalaani oqaluussinermut qanoq periaaseqarpat, ullumikkullu qanoq periaaseqarpat?
18 Ulersuaq sioqqullugu anersaakkut ileqqussatigullu najoqqutaqannginneq eqqarsaatigigaanni takorlooruminarpoq Noap ilaqutaasalu inunnit uppinngitsunit mitaatigineqartarsimanissaat illaruaatigineqartarsimanissaallu. Naggatissarli nalliuppoq. Aammattaaq ulluni kingullerni inuppassuit ’mitallertarput’. „[Jehovalli] ullussaa tillinniatut nalliutissaaq,“ Biibilimi allassimavoq. (2 Petrusi 3:3, 4, 10) Piffissarititami nalliutissaaq, kingusinaarnavianngilarlu. (Habakkuki 2:3) Taamaattumik silatusaassaagut eqqumagutta!
Ikittuinnaat annaanneqassapput
19, 20. Ulersuaq aamma pissutsit aaqqissuussaanerat maanna atuuttoq qanoq naleqqiussinnaavavut?
19 Noap nalaata nalittalu assingussutaat inuit ajussusiannut piuneerussaanerannullu tunngaannanngilaq. Soorlu Ulersuarmit aniguisoqartoq, taamatulli pissutsit aaqqissuussaanerata maanna atuuttup naggatissaani annattoqassaaq. Ulersuarmit aniguisut inuupput maniguuttut inuttut allatut inooriaaseqanngitsut. Guutip mianersoqqussutaa naalappaat taamanikkullu silarsuarmit ajortumit avissaarsimallutik. Biibilimi allassimavoq ’Noa Jehovap isaanut saammaannarsisoq’ aamma ’angutaasoq iluartoq naligisami akornanni assuarnaatsumik inuuseqartoq’. (1 Mosesi 6:8, 9) Inuiannit tamanit ilaqutariit ataatsit, „inuit qassinnguit, tassa arfineq-pingasut, umiarsuarmiillutik annatsitaapput imikkut“. (1 Petrusi 3:20) Jehova Guutillu aniguisut ima peqquai: „Kinguaassiorlusi amerliartoritsi nunarsuaq tamakkerlugu.“ — 1 Mosesi 9:1.
20 Guutip oqaasiani neriorsoqqissaarneqarpugut ’amerlangaartut’ ’annikilliortitaangaarnissamit aniguiumaartut’. (Saqqummersitat 7:9, 14) ’Amerlangaartut’ taakku qassiussappat? Jiisusi ima oqarpoq: „Nerukeqaaq inuussummut isaaffik tassungalu aqqutaa ameqaluni; ikittuinnaappullu taassuminnga nanisisut!“ (Matthæusi 7:13, 14) Ullumikkut nunarsuarmi inuusunut milliardilinnut sanilliullugit ikittuinnaat ’annikilliortitaangaarnissamit’ aniguissapput. Imaalluarsinnaavorli Ulersuarmit aniguisut immikkut pisinnaatitaaffeqarnerattut immikkut pisinnaatitaaffeqalissasut. Immaqa piffissami aalajangersimasumi meeqqiorsinnaatitaassapput, nunarsuarmi innuttaaqatigiit nutaat ilagiligassaannik. — Esaja 65:23.
’Eqqumagitsi’
21, 22. (a) Ulersuaq pillugu oqaluttuamik misissuineq manna qanoq iluaqutigaajuk? (b) Suna 2004-mi ukiumoortumik allassimaffiua, aamma sooq tassani kajumissaarut maleruartariaqarparput?
21 Uagutsinnut ullumikkut inuusunut immaqa Ulersuaq itsarsuaq pisimasutut iinnarpoq, mianersoqqussutaavorli sumiginnagassarinngisarput. (Romamiut 15:4) Noap nalaata nalittalu assigiissuteqarneri eqqumassutigisariaqarpavut pisullu isumaannik soqutiginninnerulissutigisariaqarlugit, nalunagu Jiisusi tillinniatut tikiutissasoq guutiitsut eqqartuukkiartorlugit.
22 Ullumikkut Jiisusi Kristusip anersaakkut sanaartornerujussuaq siulersorpaa. Anersaakkut paratiiseqarpoq umiarsuartut ittumik, Guutip ilumoortumik pallorfiginnittaasa isumannaatsumiiffigisinnaasaannik annaffigisinnaasaannillu. (2 Korinthimiut 12:3, 4) ’Annikilliortitaangaarnissamit’ aniguissagutta paratiisimi tassanniiginnassaagut. Anersaakkut paratiisip avatangiiseraa Saatanip silarsuaa, anersaakkut puungalersunik tamanik iisinissamut piareeqqasoq. Pisariaqarluinnarpoq ’eqqumanissarput’ Jehovallu ullussaanut piareersimanitta ersersinnissaa. — Matthæusi 24:42, 44.
Eqqaamavigit?
• Tikiuffissaminut atatillugu Jiisusip qanoq kajumissaarpaatigut?
• Jiisusip najuunnissami nalaa sumut assersuuppaa?
• Nalerput Noallu nalaa qanoq assingiissuteqarpat?
• Noap naalata nalittalu assigiissutaannik eqqarsaatiginninnerput qanoq sunnertissutigisariaqarparput?
[Atuaqqissaarnermi apeqqutit]
[Qupp. 26-mi issuagaq]
2004-mi ukiumoortumik allassimaffik imaappoq: ’Eqqumagitsi, . . . piareersimagitsi.’ — Matthæusi 24:42, 44.
[Qupp. 23-mi assiliartaq]
Guutip mianersoqqussutaanut Noa naalappoq. Aamma uagut taamaaliorpugut?
[Qupp. 24, 25-mi assiliartaq]
„Soorlu Noap ulluini ittoq, taamatuttaaq Inuup Ernerata tikiuffissaa ikkumaarpoq“