„Jehova qiimmattaativit annerpaartarilissuk“

„[Jehova] qiimmattaatigiuk [qiimmattaativit annerpaartarilissuk, NV], taassuma tunisarumaarmatit uummativit kissaatigisaanik.“ — TUSSIAAT 37:4.

1, 2. Piviusumik pilluarnermut kina pilerfiua, kunngi Daavimillu tamanna qanoq erseqqissarneqarpa?

„PILLUARPUT anersaakkut piitsut, . . . pilluarput nallittuisut, . . . pilluarput eqqisseqatigiissitsisut.“ Oqaaseqaatit taakku allallu arfinillit aallaqqaasiutaapput nuanningaartut Jiisusip qaqqami oqaluusianut tusaamasaasumut iivangkiiliumik allattup Matthæusip allagaanut. (Matthæusi 5:3-11) Jiisusip oqaasiisa qularunnaarsippaatigut pilluartoqarsinnaasoq.

² Jehova piviusumik pilluarnermut pilerfiuvoq. Tamanna Israelip kunngiata Daavip tussiaasiami ilaanni uparuarpaa, ima allalluni: „[Jehova] qiimmattaatigiuk [qiimmattaativit annerpaartarilissuk, NV], taassuma tunisarumaarmatit uummativit kissaatigisaanik.“ (Tussiaat 37:4) Jehovamilli ilisarisimannerit pissusiinillu tamanik ilisimannerit qanoq ’qiimmattaativit annerpaartarilersinnaavaat’? Qanoq iliorsimaneranik qanorlu iliorumaarneranik eqqarsaatiginninneq ’uummativit kissaatigisaata’ pinissaanut qanoq iluaqutigisinnaaviuk? Tussiaat 37, versi 1-imiit 11-mut, misissoqqissaarlugu akissutissarsisinnaavutit.

„Sinngageqinagit“

3, 4. Tussiaat 37:1-imi Daavi qanoq siunnersuiva, aamma sooq malikkaanni pitsaassava?

³ ’Ullut atugarliungaarfiusut’ misigaavut, ajussuseqangaarporlu. Apustili Paulusip oqaasii uku eqquuttut takoreerpavut: „Inuit ajortut peqquserluttullu ajortumut nakkaakkiartuinnartussaapput, ilaminnik tammartitsillutik imminnullu tammartillutik.“ (2 Timotheusi 3:1, 13) Inuit ajortut ingerlalluarpasissut takullugit sunnerteriaannaavugut. Allamulli saasartikkutta anersaakkut ittunik takorluuerpiarsinnaajunnaassaagut. Malugiuk Tussiaat 37-mut aallaqqaasiummi ulorianarsinnaasumik tamatuminnga uparuunneqartugut: „Kamassaatigeqinagit pinerluttut, sinngageqinagit iluanngitsuliortut.“

⁴ Ullut tamaasa tusagassiuutini tusartarpavut naapertuilluanngitsuliornerpassuit. Niuertut unneqqaserluttut peqquserlunnitik anigorluartarpaat. Pinerlunniat sanngiitsut atornerluttarpaat. Toqutsisut tigusarineqanngitsoortarput, pillarneqanngitsoortarlutilluunniit. Inatsisit maleruarneqanngikkaangata kamalersinnaasarpugut eqqissisimajunnaarsinnaasarlutalu. Inuit ajortut iluatsitsilluarpasinnerisa immaqa aamma sinngalersissinnaavaatigut. Kamaleruttali pissutsit pitsaanerulissappat? Inuit ajortut iluatsitsilluarpasinnerannut sinnganitta qanoq ingerlajumaarnerat allanngortissinnaavaa? Minnerpaamilluunniit naamik! ’Kamassaatissaqanngilagut’. Sooq?

5. Sooq inuit ajortut ivikkanut assersuunneqarpat?

 ⁵ Tussiaasiortoq ima akivoq: ’Taakku ivikkatut toquliorasuartarput parngullutillu soorlu naanerit qorsuusut taamaalisartut.’ (Tussiaat 37:2) Ivikkat naarlaat qorsuusut kusanarput, toquliupallassappulli. Taamatulli issapput inuit ajortut. Ingerlalluarpasittuaannassanngillat. Toqugunik tillitatik iluaqutigiunnaassavaat. Tamarmik naggataatigut naapertuilluartumik pineqassapput. ’Ajortip akissarsiarititaa tassaavoq toqu,’ Paulusi allappoq. (Romamiut 6:23) Naggataatigut inuit ajortut naapertuilluanngitsuliortullu tamarmik ’akissarsiassartik’ pissavaat allamillu naamik. Paasinarsissaaq inuunerat siunertaqarsimanngitsoq. — Tussiaat 37:35, 36; 49:17, 18.

6. Tussiaat 37:1, 2 qanoq ilinniarfigisinnaavarput?

⁶ Inuit ajortut pisuussutaat peerutiasut eqqissisimajunnaarutigissavavut? Naagga, Tussiaat 37-mi versinit siullernit marlunnit una ilinniagassaraarput: Ingerlalluarnerat aqqutikkut toqqakkakkut ingerlanissannut, tassa Jehovap kiffartuunnissaanut, akornutigeqinagu. Tamanna akornutiginagu anersaakkut pilluaqqussutit anguniakkallu pingaartikkit. — Ussatit 23:17.

„Tatigiuk [Jehova] ajunngitsuliorlutillu“

7. Sooq Jehova tatigisariaqarparput?

⁷ Tussiaasiortoq ima kajumissaarivoq: „Tatigiuk [Jehova] ajunngitsuliorlutillu.“ (Tussiaat 37:3a) Isumakuluuteqaraangatta immaqalu allaat qulaleqqajaagaangatta pisariaqarluinnartarpoq Jehovap tatigilluinnarnissaa. Anersaakkut toqqissisimalluinnarneq neqeroorutigaa. Mosesi ima allappoq: „Qutsinnerussaartup toqqorsimaffiani issiasoq, ineqarpoq Ajugaqanngitsup alanngigaani.“ (Tussiaat 91:1) Silarsuarmi inatsisaatsuliortoqaraluttuinnarnera eqqissisimajunnaarutigigaangatsigu Jehovap annertoqqutiginissaa pisariaqartinnerungaalertarparput. Soorlu singernerput pillutsikkutsigu inummik ajaperfissaqarnerput nuannaarutigissagipput, taamatulli aalajaalluta inuuniarsarigaangatta Jehovap annertoqqutiginissaa pisariaqartittarparput. — Esaja 50:10.

8. Kristumiut oqaluussinerannut peqataaneq guutiitsut ingerlalluarnerannik eqqissisimajunnaarutiginninnginnissatsinnut qanoq iluaqutaasinnaava?

⁸ Assersuutaasumik savanik ujarlerneq Jehovallu siunertaanik eqqorluartumik ilisimasaqalernissaannik taakkuninnga ikiuiniarneq ulapputigigutsigik, inuit ajortut ingerlalluarnerat eqqissisimajunnaarutigissanngilarput. Ajussuseqariartuinnaraluartoq allanik ikiuineq aalluttariaqarparput. „Puiunngisaannarsigit ikiuisarneq tukkornerlu, pilliutit taama ittut Guutip iluarisarimmagit,“ apustili Paulusi allappoq. Pitsaanerpaamik ’ikiuisarsinnaavugut’ Guutip naalagaaffianik nutaarsiassaq nuannersoq alutornartorlu allanut oqaluttuaralugu. Tamanut oqaluussinerput ’pilliutaavoq qujaniut’ nuannersoq. — Hebræerit 13:15, 16; Galatiamiut 6:10.

9. Daavip ’nunami najugaqarnissamik’ kajumissaarutaa qanoq isumaqarnersoq nassuiaruk.

⁹ „Nunami najugaqarit aalajaagillu,“ Daavi nangippoq. (Tussiaat 37:3b, NV) Daavip nalaani ’nuna’ tassaavoq nuna Jehovap Israelikkunnut tunniussaa, nuna neriorsuutigisaq. Salomop naalakkersuinerata nalaani nuna avannaaniit Danimiit kujammut Beʹershebamut isorartutigaaq. Tassaavoq Israelikkut nunaat. (1 Kunngit 4:25) Ullumikkut nunarsuarmi sumiluunniit najugaqaraluarluta silarsuaq nutaassaq naapertuilluassuseqarfiusoq nunarsuup tamarmi paratiisinngorfissaa qilanaaraarput. Tikiutserlugu anersaakkut toqqissisimanartumi najugaqassaagut. — Esaja 65:13, 14.

10. ’Aalajaanneq’ sumik kinguneqartarpa?

 ¹⁰ ’Aalajaanneq’ sumik kinguneqassava? Ussat isumassarsiarititaasoq imaappoq: „Inuk tatiginartoq [suliamigut aalajaatsoq, NV] naammattunik pilluaqqusaassaaq.“ (Ussatit 28:20) Sumiluunniit najugaqaraluarluta naapitatsinnut tamanut nutaarsiassaq nuannersoq aalajaalluta oqaluussissutigiuarutsigu Jehovap pilluaqqussavaatigut. Assersuutigisinnaavavut Frank nulialu, Rose, ukiut 40-t matuma siorna pioneritut kiffartulersut illoqarfimmi Skotlandip avannaaniittumi. Amerlanngitsut sallusuissummik soqutiginnilersimasuugaluit soqutiginnikkunnaarsimapput. Aappariilli taakku pioneriusut nangaanngivillutik oqaluussilerput ajoqersuganngortitsiortulerlutillu. Maanna illoqarfimmi tassani ilageeqarpoq ingerlalluartumik. Ilumut aappariit taakkua aalajaannerat Jehovap pilluaqqusimavaa. Frank maniguulluni ima oqarpoq: „Uagutsinnut pilluaqqussutaanerpaaq tassaavoq suli sallusuissummiinnerput Jehovamillu atorneqarsinnaanerput.“ Aap, ’aalajaakkaangatta’ qujamasuutigisatsinnik pilluaqquneqangaartarpugut.

„Jehova qiimmattaativit annerpaartarilissuk“

11, 12. (a) Qanoq ililluta Jehova ’qiimmattaatitsinnit annerpaatissinnaavarput’? (b) Nammineq atuaqqissaarninnut atatillugu suna anguniagarisinnaaviuk, qanorlu kinguneqarnissaa ilimanarpa?

¹¹ Guutimut attaveqarnerput nakussatsissagutsigu taannalu tatigiuassagutsigu ’Jehova qiimmattaatitta annerpaartarisariaqarpaat’. (Tussiaat 37:4a, NV) Qanoq taamaaliortoqarsinnaava? Pissutsit nammineq atukkat kisiisa eqqarsaatigiinnarnagit Jehovamik pallorfiginninneq aallullugu, ilaannikkut ajornakusoorsinnaasaraluartoq. Taamaaliorsinnaavugut ilaatigut oqaasiata atuarnissaa piffissaqarfigalugu. (Tussiaat 1:1, 2) Biibilimik atuartarnerit nuannaraajuk? Nuannarissavat Jehova pillugu ilikkagaqarneruniarlutit Biibilimik atuartaruit. Soormi takinngitsoq atuariarlugu unittaruit imminullu ima aperalutit: ’Tassani Jehova pillugu sumik ilinniagaqarpunga?’ Qularnanngitsumik paasissavat Biibilimik atuaraangavit tigoriaannakkannik allattaaveqarneq pappiaraateqarnerluunniit isumatusaarnerussasoq. Unikkaangavit atuakkavit qanoq paasineqarnissaat eqqarsaatiginiarlugu, Guutip pissusiisa nuannersut ilaannik eqqaassutissannik oqaaseqatigiinnik allassinnaavutit. Tussiaasiamini allami Daavi ima allappoq: „Qanerma oqaasii uummatimalu eqqarsaatai ilinni iluarinarilit, [Jehova], qaarsora aniguisitsisigalu!“ (Tussiaat 19:15) Taamatut Guutip oqaasia eqqarsaatigeqqissaaraangatsigu Jehovamit iluarineqartassaaq uagutsinnullu nuannaarutaassalluni.

¹² Guutip oqaasianik atuaqqissaarneq eqqarsaatiginneqqissaarnerlu qanoq nuannaarutigisinnaavavut? Jehova aqqutigeqqusaalu pillugit sapinngisamik ilinniagaqarnerpaanissaq anguniagarisinnaavarput. Atuakkat soorlu Inuk inuit inuusimasut pingaarnerpaartaat aamma Kom nær til Jehova * qujamasulluta eqqarsaatigisinnaasarpassuatsinnik imaqarput. Daavip uppernarsaavigaatigut Jehovap akisilluni inuit eqqortuliorusuttut ’uummataasa kissaatigisaannik’ tuniumaarai. (Tussiaat 37:4b) Qularnanngitsumik apustili Johannesi taamatut tatiginnikkami ima allappoq: „Mannaavoq taassuma saavani nakimanngissutigisarput: Piumasaminut naapertuuttumik qinnuigigutsinni tusarumaaraatigut. Ilisimagatsigulu sumilluunniit qinugutta tusarumaaraatigut, taava aamma nalunngilarput taassumunnga qinnutigisavut pereersimallugit.“ — 1 Johannesi 5:14, 15.

13. Ukiuni kingullerni nunarpassuarni oqaluussineq qanoq annertusisimava?

 ¹³ Kristumiutut ilumoorfiginnittutut qilanaaraarput Jehovap kisimi oqartussaaneranik akerleriissutip naammassineqarnissaa. (Ussatit 27:11) Kisermaassilluni naalakkersuisoqarfiusimasumi qatanngutitta oqaluussinerujussuat tusaraangatsigu nuannaangaartannginnerpugut? Pissanngatigaarput pissutsit aaqqissuussaanerata maanna atuuttup naggatissaa sioqqullugu nunani allani aamma kiffaanngissuseqarnerulissanersoq. Nunani killerni Jehovap kiffarpassui oqaluussersuataarput ilinniarnertuunngornianut, qimaasunut nunanilu killerni najugaqarallarnertik pissutigalugu upperisarsiornikkut kiffaanngissuseqalersimasunut allanut. Qamuuna kissaatigaarput nunaminnut uterunik sallusuissutip qaamarnga qaamatittuassagaat, allaat taangaarami qaammarsarneqarsinnaanngitsutut ittumi. — Matthæusi 5:14-16.

„Aqqutigisassatit [Jehovamut] isumagitikkit“

14. Suup takutippaa Jehova tatigiuaannarsinnaagipput?

¹⁴ Oqiliallannarpoq nalunagu isumakuluutitta artornartutullu misigisatta anigornissaannut ikiorneqarsinnaalluta. Qanoq? „Aqqutigisassatit [Jehovamut] isumagitikkit, tatigiuk,“ Daavi oqarpoq imalu nangilluni: „Taava akuliukkumaarpoq.“ (Tussiaat 37:5) Ilagiitsinni tamani uppernarsaatissarpassuaqarpoq Jehovap annertoqqusersuisarnerata tatiginassusianik. (Tussiaat 55:23) Pioneritut, nakkutilliisutut angalasartutut, ajoqersuiartortitatut Beteliniluunniit nammineq kajumissutsiminnik sulisutut piffissaq tamaat kiffartortut tamarmik Jehovap isumaginninnerata tatiginassusia uppernarsarsinnaavaat. Soormi taakku ilaat ilisarisimasatit oqaloqatigigukkit, aperalugillu Jehovamit qanoq ikiorneqarsimanersut? Qularutissaanngilaq Jehovap assaata inuuttuunngisaannarneranik, aamma artornartorsiorfiusuni, misigisarpassuit tusassagitit. Inuuginnarnissamut pisariaqartut isumagiuassavai. — Tussiaat 37:25; Matthæusi 6:25-34.

15. Guutip innuttaasa naapertuilluartut qaamanerat qanoq paasisariaqarpa?

¹⁵ Jehova tunaarigutsigu tatigilluinnarutsigulu, tussiaasiortup nangilluni oqaasii misigisinnaavavut: „Pinngitsuussutsit saqqummiutissavaa qaamanertut, innarluissutsillu ullortut qaammarissutut.“ (Tussiaat 37:6) Jehovap Nalunaajaasui eqqunngitsumik oqaatigineqarajupput. Jehovalli eqqortuliorusuttut uisissavai paasitinniarlugit tamanut oqaluussinerput Jehovamut inoqatitsinnullu asanninnermik pissuteqartoq. Aammattaaq naapertuilluartuliornerput isertorneqarsinnaanngilaq piviusut inuppassuarnit killormut oqaatigineqaraluartut. Akerlilersorneqarnerit malersorneqarnerillu assigiinngitsut tamaasa naammagalugit atorsinnaaqqullugit Jehovap ikiussavaatigut. Taamaattumik Guutip innuttaasa naapertuilluartuunerat ulloqeqqata nalaani seqinnerneratut qaamatigaaq. — 1 Petrusi 2:12.

„Eqqissillutit . . . utaqqiuk“

16, 17. Tussiaat 37:7-imut naapertuuttumik qanoq iliortariaqarpugut, aamma sooq?

¹⁶ Tussiaasiortup oqaasiisa tullii imaapput: „Eqqissillutit [Jehova] utaqqiuk, kamassaatigeqinagu iluanaarajuttoq pilersaarutiminik iluatsitsisartoq.“ (Tussiaat 37:7) Uani Daavip erseqqissarpaa Jehovap akuliunnissaa erinitsajuilluta utaqqisariaqaripput. Pissutsit aaqqissuussaanerata matuma naggatissaa suli nalliutinngikkaluartoq maalaarutigisinnaanngilarput. Misigereerparput Jehova ilimagisatsinnit nallittuinerungaartoq kamagittarnerungaartorlu, ilaa? Aamma uagut takutissinnaavarput erinitsajuilluta utaqqisinnaalluta, naggatissaq nalliutsinnagu nutaarsiassap nuannersup oqaluussissutiginera ulapputigiitigalugu? (Markusi 13:10) Pingaaruteqarpoq nuannaarunnaarutigisinnaasatsinnik anersaakkullu toqqissisimajunnaarutigisinnaasatsinnik isumaalliorluta iliunnginnissarput. Aatsaat taama pisariaqartigaaq Saatanip silarsuaata ajortumik sunniineranut akiuunnissarput. Ileqqussatigut minguitsuujuartariaqarpugut Jehovamullu ajunngitsumik attaveqarnerput navianartorsiortinngisaannarlugu. Kanngunartunik eqqarsaateqarnaveersaartuarta, aamma angutaagutta arnaaguttaluunniit angutinut arnanullu assuarnartumik  pissusilersornaveersaartuarta. — Kolossemiut 3:5.

¹⁷ Daavi ima siunnersuivoq: „Kamannaveersaarniarit uumitsattarunnaarlutillu, narrutsannaveerit tamanna ajunaarutaaginnartussaammat. Pinerluttummi piiagaasussaapput, [Jehovamulli] neriuttut nuna kingornutissavaat.“ (Tussiaat 37:8, 9) Aap, isumalluarluta qilanaarisinnaavarput siunissami qanittumi Jehovap nunarsuarmi ileqqussatigut ajortunngorsimanernit tamanit taakkununngalu akisussaasunit aniguisitsinissaa.

„Erniinnaq“

18, 19. Tussiaat 37:10-p qiimmaallannartortaa suua?

¹⁸ „Iluanngitsoq erniinnaq peeruttussaavoq, inaani takuniaraluarukku peerutereersimassaaq.“ (Tussiaat 37:10) Oqaatsit taakku uagutsinnut qiimmaallannangaarput pissutsit aaqqissuussaanerata matuma naggatissaata ajunaarutaasumillu inuit Jehovamut attaviitsuuniarlutik sukaruttorfissaata maanna qanilliartorneranni. Naalakkersueriaaseq oqartussaanerluunniit inummit pilersitaq sunaluunniit iluatsinngitsoorluinnarpoq. Maanna qanilliartorpoq Guutip naalakkersuinerata — Jehovap naalagaaffiata Jiisusi Kristusimit siulersorneqarluni — atuutileqqinnissaa. Nunarsuarmut tunngasunik naalagaaffiginnilluinnalersussaq Guutillu naalagaaffianik akerlilersuisunik tamanik peersitsisussaq tassaassaaq teokratii piviusoq. — Danieli 2:44.

¹⁹ Silarsuarmi nutaassami Guutip naalagaaffiata ataani guutiitsumik nassaassaqassanngilaq, qanorluunniit sivisutigisumik ujarleraluaraanni. Taamanikkussamut Jehovamut pikitsitsisut tamarmik peerneqapallattassapput. Kisimi oqartussaaneranik akerliliisumik Guutilluunniit oqartussaatitaanut naalakkumanngitsumik nassaassaqassanngilaq. Inuit tamarmik Jehovap iluarisaatut iliorusussapput. Takorlooriaruk toqqissisimanassusissaa — parnaarsaateqassanngilaq, qajannaatsunik ungaloqassanngilaq, nuannaarnermik ajoqusiisoqassanngilaq tatigeqatigiilluinnarnermillu aseruisoqassanani. — Esaja 65:20; Mika 4:4; 2 Petrusi 3:13.

20, 21. (a) „Qanilaartut“ Tussiaat 37:11-mi eqqaaneqartut kikkuuppat, sumilu ’eqqissinangaartoq’ nanivaat? (b) Daavi anneq ilaarutsigu pilluaqqussutit suut misigissavavut?

²⁰ Taamanikkussamut „qanilaartut nuna kingornutissavaat“. (Tussiaat 37:11a) Kikkuuppalli „qanilaartut“? Oqaatsip ’qanilaartoq’-mik nutserneqartartup nagguia imaattunik isumaqarpoq: „Qunusiarinninneq, naalliutsitsineq, nikanarsaaneq“. „Qanilaartut“ tassaapput inuit maniguuttut naapertuilluanngitsuliorfigineqarnerminnik tamanik Jehovap aaqqiinissaanik utaqqisut. ’Eqqissinangaartoq nuannarissavaat.’ (Tussiaat 37:11b, 1900/1961) Maannangaaq eqqissineqangaarfiuvoq anersaakkut paratiisi, ilagiinnut kristumiunut ilumoortunut attuumassuteqartoq.

²¹ Naalliuutinit tamanit suli aniguisitaanngilagut, annertoqqusersoqatigiittarpugulli nikallungasullu tuppallersartarlugit. Tamatuma kingunerisaanik Jehovap kiffai piviusumik qamuuna nuannaarput. Qatanngutit angutit paarsisutut toqqakkat anersaakkut, ilaannikkullu aamma timikkut, pisariaqartitatsinnik asannillutik isumaginnipput, naapertuilluartuliorneq pissutigalugu annikilliuutivut naammagalugit atorsinnaaqqullugit. (1 Thessalonikamiut 2:7, 11; 1 Petrusi 5:2, 3) Eqqissineq tamanna erlinnangaarpoq. Aammattaaq paratiisimi eqqissinartumi maanna qanillisumi naassaanngitsumik inuunissaq neriuutigaarput. Taamaattumik ilaartigu Daavi anneq, Jiisusi Kristusi, naggatissaq tikillugu aalajaalluni kiffartornissaminut Jehovamik aallussilluarnerminik kajumississutiginnittoq. (1 Petrusi 2:21) Taamaaliorutta pilluartuarsinnaassaagut qiimmattaatittalu annerpaartaat, Guuterput Jehova, unnersiutigiuarsinnaassallutigu.

[Quppernerup ataani ilanngussaq]

Uteqqiinermi apeqqutit

• Tussiaat 37:1, 2 qanoq ilikkarfigaajuk?

• Qanoq Jehova ’qiimmattaatinnut annerpaataritissinnaaviuk’?

• Jehovamik tatiginnissinnaanitsinnut suut uppernarsaataappat?

[Atuaqqissaarnermi apeqqutit]

[Qupp. 8-mi assiliartaq]

Kristumiut eqqunngitsuliortut sinngaginngilaat

[Qupp. 9-mi assiliartaq]

„Tatigiuk [Jehova] ajunngitsuliorlutillu“

[Qupp. 10-mi assiliartaq]

Jehova qiimmattaativit annerpaartarilissuk taanna pillugu sapinngisat tamaat ilinniarlutit