Jehovap ullussaanut piareersimagit

„Piareersimassaasi Inuup Ernera tikiutissammat nalunaaquttap-akunnerani ilimasuffiginngisassinni.“ — MATTHÆUSI 24:44.

1. Sooq Jehovap ullussaata nalliunnissaa soqutigingaartariaqarparput?

JEHOVAP ullussaa ulluussaaq sorsuffiusoq kamaffiusorlu, ulloq siooraffiusoq annikilliorfiusorlu, taarmiuffiusoq piuneeruffiusorlu. Jehovap „ullussaa angeqisoq siooranangaaqisorlu“ pissutsit aaqqissuussaanerannut guutiitsumut nalliutingaassaaq, Noap nalaani silarsuarmut guutiitsumut Ulersuup nalliunneratut. Qimarratigineqarsinnaanngilaq. „Kinaluunniilli [Jehovap] aqqanik torlorfiginnittoq annaanneqassaaq.“ (Joeli 3:3-5; Amosi 5:18-20) Guutip akeqqani suujunnaarsissavai, innuttanili annaallugit. Pruffiiti Sefania piffissap nukinginnarneranik eqqumaffiginnilluarpoq, imatullu erseqqissarpaa: „Qanillivoq [Jehovap] ullussarsua; qanilliartulertoqaaq!“ (Sefania 1:14) Guutilli eqqartuussutini qaqugu naammassissavaa?

2, 3. Sooq Jehovap ullussaanut piareersarnissarput pingaaruteqarpa?

² „Ulloq taanna nalunaaquttap-akunneraluunniit kimilluunniit ilisimaneqanngillat, inngililluunniit qilanniittut Ernerulluunniit ilisimanngilaat, Ataatalli kisimi,“ Jiisusi oqarpoq. (Matthæusi  24:36) Qaqugorpiaassanersoq nalugatsigu inuunitsinnut pingaaruteqarpoq 2004-mi allassimaffiup ukiumoortup eqqumaffiginissaa: ’Eqqumagitsi, . . . piareersimagitsi.’ — Matthæusi 24:42, 44.

³ Piareersimasut isumannaatsumukaanneqariataassapput, allalli qimanneqassapput, Jiisusimi ima oqarpoq: „Angutit marluk narsaammiittut arlaat ilaliunneqassaaq aappaalu qimanneqassalluni. Arnat marluk aserorterivimmi ataatsimi aserorterisut arlaat ilaliunneqassaaq aappaalu qimanneqassalluni.“ (Matthæusi 24:40, 41) Taamanikkussamut piffissami pingaarutilimmi uagut inuttut qanoq ittuussaagut? Piareersimassaagut, imaluunniit ullormit pakasarneqassaagut? Maanna suut piareersaatiginerivut aalajangiisuungaassapput. Jehovap ullussaanut piareersimassagutta ullumikkut inuppassuit pisarnerattut imminut naammagisimaarnaveersaartariaqarpugut, anersaakkut puungalernaveersaartariaqarpugut inooriaaserlu aalajangersimasoq inooriaaserinaveersaartariaqarlugu.

Imminut naammagisimaalernaveersaarit

4. Noap nalaani inuit qanoq isiginnittaaseqarpat?

⁴ Noap nalaani pissutsit qanoq ittuunersut eqqarsaatigeriaruk. „Uppernikkut Noa ilimasaarneqarpoq suli takussaanngitsumik, Guutimillu mianerinnittuugami umiarsualiorpoq inoqutimi annaffissaannik,“ Biibilimi allassimavoq. (Hebræerit 11:7) Umiarsuaq immikkut ittuusussaavoq takulertornartuusussaallunilu. Aammattaaq Noa ’iluarnermik nalunaariartortitaavoq’. (2 Petrusi 2:5) Noalli umiarsualiornerata oqaluussinerataluunniit inuit taamani inuusut inooriaatsiminnik allannguisinngilai. Sooq? Tassami „nerillutik imerlutillu nuliartaarlutillu uinitsitsisarput“. Noap oqaluussiffigisaasa inuttut sammisartakkatik nuannaarniutillu tiguartisimaffigingaaramikkik „aatsaat paasisaqalerput ulersuaq nalliummat tamaasalu nungutillugit“. — Matthæusi 24:38, 39.

5. Lotip nalaani Sodomamiut qanoq isiginnittaaseqarpat?

⁵ Lotip nalaani inuit aamma taamaapput. Biibilimi ima allassimavoq: „Nerillutillu imerput, pisillutik tuniniaallutillu, naatitassanik ikkussuillutik illuliorlutillu; ullorli taanna Lotip Sodoma qimammagu innermik ikuallassaammillu qilammit siallerpoq tamaasalu nungutillugit.“ (Lukasi 17:28, 29) Lotip piuneerussinissamik inngilinit mianersoqquneqareerluni ningaassani tamatuminnga oqaluttuuppai. Taakkuali „quiasaaginnarsoraat“. — 1 Mosesi 19:14.

6. Qanoq pissuseqarnaveersaartariaqarpugut?

⁶ Noap Lotillu nalaannisulli „taamatuttaaq aamma Inuup Ernerata tikiuffissaani ikkumaarpoq“, Jiisusi oqarpoq. (Matthæusi 24:39; Lukasi 17:30) Ullumikkut inuppassuit imminut naammagisimaaqaat. Taamatut pissuseqarnermit sunnertinnginnissarput mianersuutigisariaqarparput. Nerisassat imigassallu mamartut ingasaatinngikkaanni nuannaarutigineri eqqunngitsuliornerunngilaq. Aammattaaq aappariinneq Guutip pilersippaa. Tamakkuli inuunitsinni sunit tamanit pingaarnerutilersimagutsigik soqutigisallu anersaakkut ittut sumiginnalersimagutsigik, taava ilumut Jehovap ullussaa siooranangaaqisoq piareersimaffigaarput?

7. Arlaannik aallartitaqartinnata apeqqut pingaarutilik suna apeqqutigisariaqarparput, aamma sooq?

⁷ „Piffissaq sivikilleqaaq,“ apustili Paulusi allappoq. „Matuma kingorna aappaqartut aappaqanngitsutut issapput.“ (1 Korinthimiut 7:29-31) Oqaluussinissap Guutip uagutsinnut suliassiissutaata naammassinissaanut piffissaq killeqarpoq. (Matthæusi 24:14) Allaat Paulusip aappallit oqaaqqissaarpai aapparminnik ima aallussitigissanngitsut Guutip naalagaaffiata soqutigisai inuunerminni kingulliutilerlugit. Isuma Paulusip uagutsinnut siunnersuutigisaa imminut naammagisimaalissutaassanngilaq. Jiisusi ima oqarpoq: „Guutip naalagaaffia iluarneralu ujaqqaarsigit.“ (Matthæusi 6:33) Arlaannik aalajangiitinnata arlaannilluunniit aallartitaqartinnata pingaaruteqarpoq immitsinnut ima aperinissaq: ’Guutip naalagaaffiata soqutigisaanik salliutitsiuarnissannut  qanoq sunniuteqassava?’

8. Ulluinnarni sammisassat inuunitsinni pingaarnerpaalersimappata qanoq iliortariaqarpugut?

⁸ Paasigutsigumi ulluinnarni sammisassat nalinginnaasut ima sammitigilersimagivut anersaakkut soqutigisat tunulliutilersimallugit? Inuit, Biibilimik ilisimasaqanngitsut oqaluussisartuunngitsullu, uagullu assigiinngissutivut immikkoortikkuminaappat? Taamaappat qinunikkut Jehovamut eqqaasariaqarparput, taassumami eqqortumik isiginnittaaseqalernissatsinnut ikiorsinnaavaatigut. (Romamiut 15:5; Filippimiut 3:15) Ikiorsinnaavaatigut Guutip naalagaaffiata soqutigisaanik salliutitsinissatsinnut, eqqortuliornissatsinnut tassungalu akisussaaffitsinnik eqqortitsinissatsinnut. — Romamiut 12:2; 2 Korinthimiut 13:7.

Anersaakkut puungalernaveersaarit

9. Saqqummersitat 16:14-16 naapertorlugu anersaakkut puungalernaveersaarnissaq sooq pingaaruteqarpa?

⁹ Harmagedonimi ’Guutip Ajugaqanngitsup ullussarsuani sorsunnissaq’ pillugu siulittuummi mianersoqquneqarpugut eqqumanngitsoortoqarsinnaaneranik. „Tillinniatut tikiukkumaarpunga,“ Naalagaq Jiisusi Kristusi oqarpoq. „Pilluarpoq taanna eqqumasoq atisaqarluni pigaartoq tamaqanngitsuujumanani, kinguaassiuutini takuneqaqqunagit.“ (Saqqummersitat 16:14-16) Atisat uani taaneqarneranni pineqarpoq Jehovamut kristumiutut nalunaajaasuunitsinnik ilisarnaatigisarput. Tamatumunnga ilaapput Guutip naalagaaffianik oqaluussisartutut suliarput kristumiutullu pissuseqarnerput. Sinittutut illuta unittooqqajaagutta kristumiutut ilisarnaaterput annaasinnaavarput. Taamaanneq kanngunarsaataassaaq navianartuussallunilu. Anersaakkut puungalinnginniassagatta aramalinnginniassagattalu iliuuseqartariaqarpugut. Suulli iliuuserisinnaavavut?

10. Sooq ullut tamaasa Biibilimik atuartarneq anersaakkut eqqumanissatsinnut iluaqutaava?

¹⁰ Biibilimi arlaleriarluni erseqqissarneqarpoq eqqumanissatta aalakuunnginnissattalu pisariaqarnerat. Assersuutigalugu iivangkiiliuni imaattunik eqqaasinneqarpugut: „Eqqumagitsi“ (Matthæusi 24:42; 25:13; Markusi 13:35, 37); ’piareersimagitsi’ (Matthæusi 24:44); „mianersoritsi! Eqqumagitsi“ (Markusi 13:33); „piareersimassaasi“ (Lukasi 12:40). Apustili Paulusi nalunaareerluni Jehovap ullussaa silarsuarmut ilimagineqanngitsumik nalliukkumaartoq, uppeqatini sakkortuumik ima kajumissaarpai: „Sineqinata inuit allat ileqquattut, eqqumaniartali aalakoornatalu.“  (1 Thessalonikamiut 5:6) Biibilip atuagartaani kingullermi Jiisusi Kristusip naalannartitaasup qanoq tassanngaannartigisumik tikiutissanerluni erseqqissarpaa ima oqarluni: „Erniinnaq [nukingiinnaq, NV] aggerumaarpunga.“ (Saqqummersitat 3:11; 22:7, 12, 20) Pruffiitit hebræerit ilarpassuisa aamma Jehovap ullussarsua eqqartuussiviusoq allaatigaat nalliunnissaanillu mianersoqqusillutik. (Esaja 2:12, 17; Jeremia 30:7; Joeli 2:11; Sefania 3:8) Anersaakkut eqqumanissatsinnut iluaqutigissavarput Guutip oqaasianik, Biibilimik, ullut tamaasa atuartarneq atuakkatsinnillu eqqarsaatiginninneq.

11. Anersaakkut eqqumassagaanni sooq nammineq Biibilimik atuaqqissaartarneq pingaaruteqangaarpa?

¹¹ Aap, anersaakkut eqqumanissamut iluaqutaalluarpoq Biibilimik eqiasuilluni atuaqqissaartarneq atuagassiat Biibililersaarutit ’kiffap ilumoortup silatuullu’ tunniuttagai atorlugit. (Matthæusi 24:45-47) Siumukartumilli aalajangersimalluinnartumillu nammineq atuaqqissaartarutta iluaqutiginerpaassavarput. (Hebræerit 5:14–6:3) Anersaakkut tamuasarissanik aalajangersimasumik nerisariaqarpugut, ullutsinni piffissaqarniarneq unamminiarnartuugaluartoq. (Efesosimiut 5:15, 16) Aatsaat nammineq iluarileraangatsigu atuartarutta atuaqqissaartaruttalu naammanngilaq. ’Uppernitsinni peqqissuujuassagutta’ eqqumassaguttalu aalajangersimasumik inuttut nammineq atuaqqissaartariaqarpugut. — Titusi 1:13.

12. Kristumiut ataatsimiinneri ataatsimeersuarnerilu anersaakkut puunganermik akiuinitsinni qanoq iluaqutigisinnaavavut?

¹² Kristumiut ataatsimiinneri ataatsimeersuarnerilu anersaakkut puunganermik akiuinitsinni aamma iluaqutigaavut. Katerisimaarnernimi taamaattuni ilinniartitaanikkut Jehovap ullussaata qaninneranik eqqaasinneqartarpugut. Sapaatip-akunnerilu tamaasa kristumiut ataatsimiinnerini aamma ’immitsinnut asaqatigiinnermut ajunngitsuliornermullu kajumissaaqatigiinnissamut’ periarfissaqartarpugut. Taamatut kajumissaaqatigiinneq anersaakkut eqqumanissatsinnut iluaqutigissavarput. Taamaattumik tupaallannanngilaq aalajangersimasumik katerisimaartaqquneqaratta ’nalunagu ullussaq qanillisoq’. — Hebræerit 10:24, 25.

13. Kristumiut oqaluussinerannut peqataanerput anersaakkut eqqumanissatsinnut qanoq iluaqutigaarput?

¹³ Aammattaaq anersaakkut eqqumanissatsinnut iluaqutigisarparput kristumiut oqaluussinerannut uummatikkut iluunngarluta peqataagaangatta. Nalunaaqutinik maanna pisunik taakkualu isumaannik eqqumaffiginninnissatsinnut allanik taakku pillugit oqaloqatiginninnermit pitsaanerusoqarpa? Suliap qanoq pingaaruteqartigineranik eqqumaffiginninnerulertarpugut Biibilimik atuaqqissaaqatigisartakkavut siumukartut ilikkakkaminnillu maleruaalersut takugaangatsigik. „Eqqumaniaritsi isummassigullu piareersimallusi qiterusersimallusi,“ apustili Petrusi allappoq. (1 Petrusi 1:13) Anersaakkut aramalernaveersaarutigisinnaalluagarput tassaavoq ’tamaviaarluni Naalakkamik kiffartuussineq’. — 1 Korinthimiut 15:58.

Anersaakkut ilinnik ajoqusiisinnaasumik inooriaaseqarnaveersaarit

14. Jiisusip inooriaatsimut qanoq ittumut Lukasi 21:34-36-mi mianersoqquaatigut?

¹⁴ Jiisusi najuunnissaminut nalunaaqutaasussat pillugit siulittuummini pingaartumi aamma allamik mianersoqqussuteqarpoq. Ima oqarpoq: „Mianersoritsi uummatisi malussarlersitaaqqunagit aalakoornermit [nerrersunermit, NV] imerajunnermillu inuunerullu matuma piinik isumakuluutinit, pakasarteqqunasi ullup taassuma tassanngaannaq tikiunneranit nigartuutitut illuni, inuiaammi nunarsuarmi tamarmi najugaqartut tamaasa tikissammagit. Eqqumajuarniaritsi, qinugitsilu nukissaqartitaaqqullusi pisussat suut tamaasa qimarratigisinnaaqqullugit Inuullu Ernerata saavani atasinnaaqqullusi.“ (Lukasi 21:34-36) Inooriaaseq nalinginnaasoq Jiisusip uani oqaatigilluarpaa. Nerisasserineq imigasserinerlu ingasaattarpaat, inooriaaseqarpullu isumakuluuteqangaartitsisumik.

15. Sooq nerrersuujunaveersaartariaqarpugut imerajuttuunaveersaartariaqarlutalu?

¹⁵ Nerrersuujuneq imerajuttuunerlu Biibilimi najoqqutassianut akerliupput taamaattumillu pinaveersaarneqartussaallutik. „Ilaginiaqinagit  viinnisorpallaartut, imaluunniit taakku ingasattumik neqitortut,“ Biibilimi allassimavoq. (Ussatit 23:20) Nerineq imernerlu taama ingasaatsigilinngikkaluarlugit anersaakkut pingaartitsinermik navianartorsiortitsisinnaapput. Suli ingasaatilinngerujussuarlugit puungalersitsisinnaapput eqiasulersitsillutillu. Biibilimi ima ussateqarpoq: „Eqiasuttoq piummartugaluaqaaq pissarsissananili.“ (Ussatit 13:4) Inuk taamaattoq piummartuvoq, imaluunniit arlaannik kissaateqarpoq. Immaqa Guutip piumasaatut iliorusuppoq, iliuuseqanngitsooramili iluatsinngilaq.

16. Ilaquttavut qanoq isumakuluutigivallaarnaveersaarsinnaavavut?

¹⁶ Isumakuluutit suut-uku Jiisusip mianersoqqussutigigai? Ilaatigut isumakuluutit namminerisamut tunngasut, soorlu ilaquttanik pilersuinermut tunngasut assigisaalu. Sianiilliornerussaaq taamaattunik isumakuluuteqangaarneq! „Kiammi arlassi isumakuluuteqarnermigut ullut inuuffigisassani ataasiinnarmilluunniit ilasinnaanerpai?“ Jiisusi aperivoq. Tusarnaartini ima oqaaqqissaarpai: „Isumakuluuteqassanngilasi ima aperalusi: Suna nerissavarput? Suna imissavarput imaluunniit suna atissavarput? Tamakku tamaasa Guutimik nalusut ujartarpaat, ataatassilu qilammiittup nalunngilaa tamakku tamaasa pisariaqartikkisi.“ Guutip naalagaaffiata soqutigisai salliutikkutsigik Jehovallu isumagiumaaraatigut tatigigutsigu, isumakuluuteqarpallaarnaveersaarsinnaassaagut, tamannalu eqqumanissatsinnut iluaqutaassaaq. — Matthæusi 6:25-34.

17. Pigisalerituneq qanoq isumakulutsitsisinnaava?

¹⁷ Aammattaaq isumakulunnermut pissutaasinnaavoq pigisalerituneq. Assersuutigalugu ilaasa inuunertik pisariusunngortittarpaat akissaqarnertik sinnerlugu atuinermikkut. Allat ’pisuunngupallanniutinit’ aningaasaliinernillu nalorninakujuttunit nakutitaasarput. Aamma allat aningaasatigut iluatsitsilluarniarlutik ilinniarnertik napitissutigisarpaat. Suliffittaassagaanni soorunami ilinniagaqarneq iluaqutaasinnaavoq. Ilumoortorli imaappoq: Ilaat qaffasinnerusumik piffissartornartumik ilinniagaqarniarnerminni imminut anersaakkut ajoqusersimapput.  Tamanna navianartorsiorneruvoq Jehovap ullussaa qanilliartortillugu! Biibilimi ima mianersoqquneqarpugut: „Inuit pisuunngorumasut usserneqarlutillu napitinneqartarput ueqqivigisarlugillu kajungerfigiligarpassuatik sianiitsuliornerusut ajoqutaasullu, inunnut aseruutaasut tammartitsisullu.“ — 1 Timotheusi 6:9.

18. Pigisalerituneq tiguartiffigissanngikkutsigu suna ineriartortittariaqarparput?

¹⁸ Pigisalerituneq tiguartiffigissanngikkaanni pingaaruteqarpoq aalajangigassaqartilluni eqqortumik eqqunngitsumillu immikkoortitsisinnaanermik sungiusaanissaq. Piginnaaneq taanna ineriartortinneqartarpoq ’inersimasunngorluarsimasut nerisassaannik tamuasarissanik’ aalajangersimasumik nerisarnikkut namminerlu paasinnissinnaassutsimik atuilluni sungiusaanikkut. (Hebræerit 5:13, 14) Aammattaaq „suna pingaartittariaqartoq“ qulakkeerutsigu inuunitsinni suup salliutinnissaanik aalajangiinissatsinnut iluaqutigissavarput. — Filippimiut 1:10.

19. Sammisassanut anersaakkut ittunut piffissakitsuararsuulluta paasigutsigu qanoq iliortariaqarpugut?

¹⁹ Pigisaleritugutta tappiillissutigisinnaavarput anersaakkullu ittunut piffissakitsuararsuanngorsinnaalluta piffissaarutivissinnaallutaluunniit. Imminut qanoq misissorsinnaavugut inooriaaserlu taamaattoq napitiffiginaveersaarlugu? Qinunikkut eqqarsaatigisariaqarparput qanoq inuunerput pisariillisarsinnaanerlugu qanorlu pisariillisartigisinnaanerlugu. Salomo, itsaq Israelikkut kunngiat, ima oqarpoq: „Sulisartoq sinilluartarpoq nerilluarsimagaangami nerisakilaarsimagaluaraangamiluunniit. Angulli pisooq pisuussutaasa sinitsaaliortarpaat.“ (Oqaluussisartup oqaasii 5:12) Pigisanut pisariaqanngitsunut piffissarujussuaq nukippassuillu atortarpavut? Pigisaqarnerujartortilluta aserfallatsaaliugassavut, sillimmasigassavut sissuigassavullu amerliartortarput. Iluaqutigisatsinnik inuunerput pisariillisarsinnaavarput pigisatta ilaat pigiunnaarlugit?

Piareersimagit!

20, 21. (a) Jehovap ullussaa pillugu apustili Petrusip qanoq neriorsoqqissaarpaatigut? (b) Qanoq iliortuartariaqarpugut Jehovap ullussaanut piareersimaatigaluta?

²⁰ Ullut ilaanni silarsuarmut Noap nalaani piusumut piffissaritinneqartoq tassunga killeqarpoq. Aamma pissutsit aaqqissuussaanerannut maanna atuuttumut taama pisoqassaaq. Apustili Petrusip ima neriorsoqqissaarpaatigut: „[Jehovap] ullussaa tillinniatut nalliutissaaq, taavalu qilaat perpaluttorsuullutik nungussapput pinngoqqaartullu ikuallakkumaarlutik, nunalu suullu inunnit suliarineqarsimasut tassaniittut pissuserisamissut illutik takussaajunnaarput.“ Assersuutaasumik qilaat — naalakkersueriaatsit guutsiitsut — assersuutaasumilluunniit nuna — inuit Guutimit nigorsimasut — Jehovap kamangaarneranit aniguissanngillat. Petrusip takutippaa ullormut tamatumunnga qanoq piareersimasinnaanersugut, ima allalluni: „Tamakku tamarmik suujunnaartussaammata taava inuttut qanoq ittuusariaqannginnerpisi iluartumik ileqqoqarnermut Guutimullu tunniusimanermut naapertuuttunik iliuuseqarlusi Jehovap ullussaata nalliuffissaa, . . . utaqqitillugu eqqarsaatigiuartillugulu!“ — 2 Petrusi 3:10-12, NV.

²¹ Aalajaalluta kristumiut ataatsimiinneri najuuffigigaangatsigik nutaarsiassamillu nuannersumik oqaluusseqataagaangatta, iliuuseqartarpugut iluartumik ileqqoqarnermut Guutimullu tunniusimanermut naapertuuttunik. Guutimut ilumoortumik asannikkatta taamaaliortarpugut Jehovap ullussarsua erinitsajuilluta utaqqiitigalugu. ’Ilungersuutiginiartigu taassumunnga minguitsuullutalu assuarnaatsuunissarput eqqissilluta.’ — 2 Petrusi 3:14.  (wE 15/12 03)

Eqqaamavigit?

• Sooq Jehovap ullussaanut piareersimasariaqarpugut?

• Ulluinnarni sammisassat nalinginnaasut inuunitsinni pingaarnerpaalersimappata qanoq iliortariaqarpugut?

• Anersaakkut puunganerup akiornerani suut iluaqutigissavavut?

• Inooriaaseq ajoqusiisinnaasoq suna pinaveersaartariaqarparput, aamma qanoq?

[Atuaqqissaarnermi apeqqutit]

[Qupp. 28, 29-mi assiliartaq]

Noap nalaani inuit eqqartuussinissaq qanillisoq eqqumaffiginngilaat — illimmi?

[Qupp. 31-mi assiliartaq]

Inuunerit pisariillisarsinnaaviuk anersaakkut ittunut piffissaqarnerulerlutit?