„Qujaniartaritsi“

„Kristusip eqqissisitsinera uummatissinni aalajangiisuuli . . . Qujaniartaritsilu.“ — KOLOSSEMIUT 3:15.

1. Kristumiut ilagiivi silarsuarlu Saatanip naalagaaffigisaa qanoq assigiinngissuteqarpat?

JEHOVAP NALUNAAJAASUISA silarsuaq tamakkerlugu ilagiivini 94.600-usuni qujamasuttoqangaarpoq. Ataatsimiinnerit tamarmik aallarnerneqartarput naggaserneqartarlutillu qinnummik, ilaatigut Jehovamut qujalluni. Aammattaaq tusartarpavut inuusuttut utoqqaallu, nutaat ukiorpassuarnilu Jehovamut nalunaajaasuusimasut, katerisimaaraangamik, soorlu ataatsimiinnerminni, qujasut allatigulluunniit qujamasunnerminnik ersersitsisut. (Tussiaat 133:1) ’Guutimik ilisimasaqanngitsut iivangkiiliumullu naalakkumanngitsut’ ilarpassuisa namminissarsiortuunerannit allaanerulluinnarpoq. (2 Thessalonikamiut 1:8) Silarsuaq qujasuitsuuffiusoq inuuffigaarput. Tamanna tupinnanngilaq eqqarsaatigalugu silarsuup matuma kina guutigineraa — tassa Saatani Diaavulu, tamanit namminissarsiornerpaaq. Taassuma makitasuujunerata pikitsitsiumatuujuneratalu innuttaaqatigiit tamaasa sunneqqavai. — Johannesi 8:44; 2 Korinthimiut 4:4; 1 Johannesi 5:19.

2. Mianersoqqussut suna malugisariaqarparput, apeqqutillu suut samminerussavavut?

² Saatanip silarsuaa avatangiiserigatsigu isiginnittaasianit ajortunngortinneqannginnissarput mianersuutigisariaqarparput. Ukiuni hundredelinni siullerni apustili Paulusip Efesosimi kristumiut ima eqqaasippai: ’Siornatigut inuuffigisassinni tamaani inuunersi aalajangerneqartittarparsi silarsuup matuma pissuserisaanit silaannarsuullu naalagaaffiani naalagaasumit, naalasseriitsut qitornaannut sunniuteqartuartumit. Siornatigummi tamatta taamaassimavugut. Uinitta pilerissusiatigut iliortarpugut uinitta eqqarsaatittalu piumasaat malillugu, inunnguuseralugulu kamannermut qitornaavugut allat assigalugit.’ (Efesosimiut 2:2, 3) Ullumikkut inuppassuit pillugit aamma taama oqartoqarsinnaavoq. Qanormi iliorsinnaavugut qujamasuttuujuaannarniarluta? Tamatumunnga atatillugu Jehovap qanoq ikiorpaatigut? Ilumut qujamasuttuunerput iliuuseqarnitsigut qanoq ersersissinnaavarput?

Qujamasuutigisassat

3. Suut Jehovamut qujamasuutigaavut?

³ Jehova Guuti, Pinngortitsisorput inuunermillu Tunisisorput, qutsavigisussaavarput, ingammik tukkungaarluni uagutsinnut tunissutai tamaasa eqqarsaatigigaangatsigik. (Jaaku 1:17) Ullut tamaasa Jehova qujaffigisarparput inuugatta. (Tussiaat 36:10) Jehovap pinngortitsisinnaassusianik avatangiisitsinni uppernarsaatissarpassuaqarpoq, ilaatigut seqineq, qaammat ullorissallu. Nunarsuatta mineralinik inuunermi pisariaqartunik peqqumaasivissuata, silaannarmi silaannaat assigiinngitsut inuunermi pisariaqartut akoorluagaanerisa, pinngortitamilu kaaviiartut paasiuminaatsut, tamarmik takutippaat Ataatatsinnut qilammiusumut asannittumut akiitsoqartugut. Kunngi Daavi ima erinarsorpoq: „Angingaarput naammassisatit; [Jehova] Guutiga, iluaqutigaavut suliatit pilersaarutitillu tupinnangaartut, ilinnut naleqqiunneqartoqarsinnaanngilaq! Oqaluttuaralugillu tusartikkusukkaluarpakka, amerlavallaaramilli taagorneqarsinnaanngillat.“ — Tussiaat 40:6.

4. Ilagiitsinni tamani katerisimaarnermik nuannersumik nuannaarutiginnissinnaanerput sooq Jehovamut qujassutigisariaqarparput?

⁴ Jehovap kiffai Paratiisimiinngilluaasarput, anersaakkulli paratiisimiinnertik nuannaarutigaat. Naalagaaffilersaarfimmi ataatsimeersuarnitsinnilu Guutip anersaavata inerititaata uppeqatitsinnut sunniuteqarnera misigisarparput. Jehovap Nalunaajaasuisa oqaluussiffigisatik upperisarsiornikkut killilimmik tunuliaqutaqaraangata tunuliaqutaqanngivikkaangataluunniit ilaannikkut Paulusip Galatiamiunut allagaani allassimasut pulaakkaminnut takutittarpaat. Siullermik malugeqqusarpaat „uinngup suliai“ pillugit allassimasoq oqaloqatigisartillu aperalugu tassunga tunngatillugu suna malugineraat. (Galatiamiut 5:19-23) Amerlanerit isumaqatigissagunarpaatigut ullumikkut innuttaaqatigiinni taamatorpiaq pissuseqartoqartoq. Taava Guutip anersaavata inerititaata allaaserineqarnera taakkununnga  takutikkaangatsigu naalagaaffilersaarfimmullu qaaqqugaangatsigik, tassani nammineerlutik takusinnaagamikku Guutip anersaava qanoq sulissutiginnissinnaasoq amerlasuut ima isummipallattarput: „Ilumut Guuti akornassinniippoq.“ (1 Korinthimiut 14:25) Naalagaaffilersaarfimmi maaniinnanngitsoq. Sumulluunniit angalagaluaraanni nunarsuarmi tamarmi Jehovap Nalunaajaasui 6 millioninit amerlanerusut taamatut nuannaartuupput. Katerisimaarnerup ineriartornartup taamaattup Jehovamut, anersaamigut tamatuminnga ajornarunnaarsitsisumut, qujamasuutissarpassuaqalersittarpaatigut. — Sefania 3:9; Efesosimiut 3:20, 21.

5, 6. Guutip tunissutaa pingaarnerpaaq, utertitsissut, qujamasuutigalugu qanoq takutissinnaavarput?

⁵ Jehovap uagutsinnut tunissutaa pingaarnerpaaq naammalluinnarnerpaarlu tassaavoq ernera, Jiisusi, taannalu aqqutigalugu pilliut utertitsissutaasoq pilersinneqarpoq. „Guutip taama asammatigut uaguttaaq asaqatigiittariaqarpugut,“ apustili Johannesi allappoq. (1 Johannesi 4:11) Utertitsissut qujamasuutigalugu takutissinnaavarput Jehova qutsavigalugu, asagipput ersersillugu, inooriaatsitsigullu takutillugu allat asallugit. — Matthæusi 22:37-39.

⁶ Qujamasunnitta qanoq ersersinnissaa pillugu ilikkagaqarnerusinnaavugut, Jehovap itsaq Israelikkunnut isumaginneriaasia misissorlugu. Inatsisitigut Mosesi aqqutigalugu inuiannut tunniussamigut Jehovap innuttani assigiinngitsorpassuarnik ilinniartippai. ’Ilisimassutsip sallusuissutsillu ersiutaat inatsisini pigigatsigu’, uagut iluaqutissatsinnik ilinniarfigingaarsinnaavavut Paulusip kajumissaarutaata uuma maleruarnissaanut: „Qujaniartaritsi.“ — Romamiut 2:20; Kolossemiut 3:15.

Mosesip inatsisaaneersut ilinniutigisinnaasavut pingasut

7. Pissarsiat qulingi pillugit aaqqissuussinikkut Israelikkut Jehovamut qujamasunnerminnik ersersitsinissaminnut qanoq periarfissinneqarpat?

⁷ Mosesip inatsisai aqqutigalugit Jehovap Israelikkut periarfissippai ajunngissusianik ilumoorlutik pingaartitsinerminnik assigiinngitsutigut pingasutigut takutitsinissaannut. Siullermik, pissarsiat qulingi pillugit aaqqissuussaqarpoq. Nunami naatitat qulingi aamma ’ussigit savallu qulingi tamarmik Jehovamut pigisassanngortitaallutik illernartitaasussaapput’. (3 Mosesi 27:30-32) Israelikkut Jehovamut naalakkaangata pilluaqqungaartarpai. „’Pissarsiat qulingi ilanngarnagit aattarniarsigik peqqumaasivimmut, uanga illunni nerisassamaateqaqqullugu. Taamaalillusi misilinniarsinga qilaap igalaavi ammassanerikka ilissinnut pilluaatissanillu killeqanngitsunik kueraaffigalusi,’ oqarpoq Katersaarsuit [Jehovaat].“ — Malaki 3:10.

8. Nammineq kajumissutsimit pilliutit aamma pissarsiat qulingi qanoq assigiinngissuteqarpat?

⁸ Aappassaanik, Jehova aaqqissuussivoq Israelikkut namminneq kajumissutsiminnit tapersiillutik tunissuteqartarnissaannik. Mosesi Israelikkunnut ima oqartippaa: „Nuna ornitsinniagara iserfigigussiuk nunallu inerititaanik nerigussi, taava [Jehovamut] akiliummik [tapersiilluni tunissummik, NV] aggiussissaasi.“ Kinguaariikkuutaani inereqqaatinit qajuusaliamik ilaanik nigaliusatut kaagiliamik ’Jehova akiliutitut [tapersiissutitut, NV] tunissuteqarfigisassavaat’. Malugiuk inereqqaatit tunniussassaasa qanoq amerlatiginissaat allassimanngitsoq. (4 Mosesi 15:18-21) Israelikkulli qujamasunnermit tapersiillutik tunissuteqaraangata Jehovap pilluaqqujumaaraatik neriorsoqqissaarneqartarput. Assingusumik aaqqissuussineq Ezekielip takorruugaani naalaffimmut atatillugu allaatigineqarpoq. Ima allassimavoq: „Inereqqaatit tamarmik [Jehovamullu] akiliutit [tapersiilluni tunissutit, NV] tamarmik, tassa akiliutissi [tapersiillusi tunissutissi, NV] tamarmik pitsaanersaat palasit pisassarissavaat, aamma naqittakkassi siullersaat palasinut tunniuttassavasi pilluaqqussut ilissinniiginnarteqqullugu.“ — Ezekieli 44:30.

9. Naatitanik katersuineq pillugu aaqqissuussinikkut Jehovap innuttani sumik ilinniartippai?

⁹ Pingajussaanik, naatitanik katersuineq pillugu aaqqissuussineq Jehovap pilersippaa. Ima peqqusivoq: „Nunassinni naatitanik katersuigaangassi karrit narsaatip avammut killinga tikivillugu killortassanngilasi, karrertallu katersuinermi qaangiinnarsimasasi ilaginnaannassavasi. Viinnequteqarfinni katersuigussi viinnissat qaangiinnarsimasasi ilaginnaannassavasi isumaminnilluunniit nakkarsimasut katersornagit. Tamakku piitsunut takornartanullu pisassanngortissavasi. Uanga tassaavunga [Jehova] Guutersi!“ (3 Mosesi 19:9, 10) Tassunga tunngatillugu qanoq angitigissanersoq aamma aalajangerneqanngilaq. Israelikkut ataasiakkaat namminneq aalajangertussaavaat pissaaleqisut  qanoq qimatsivigitigissanerlugit. Kunngi Salomo silatooq torrallaalluni ima oqarpoq: „Piitsumik ikiuisoq [Jehovamut] taarsigassarsisitsisuuvoq, [Jehovallu] taarsiiffigissavaa ajunngitsuliornerata taamaaqataanik.“ (Ussatit 19:17) Taamatut Jehovap innuttani ilinniartippai atugarliortunik misiginneqataasarnissaannik eqqarsaatiginnittarnissaannillu.

10. Israelikkut qujamasukkunnaaraangamik qanoq kingunerlutsitsisarpat?

¹⁰ Israelikkut naalallutik pissarsiamik qulinginik tunissuteqaraangata, namminneq kajumissutsiminnit tapersiillutik tunissuteqaraangata piitsunillu isumassuigaangata Jehovap pilluaqqusarpai. Qujamasunngikkaangamik Jehovamit iluarisaajunnaartarput. Ajunaarutigingaartarpaat, naggataatigullu aallarussaapput. (2 Nalunaarsuutit 36:17-21) Tamanna sumik ilinniarfigisinnaavarput?

Qujamasunnerput qanoq takutissinnaagipput

11. Jehovamut qujamasunnerput pingaarnerpaamik qanoq takutissinnaavarput?

¹¹ Pingaartumik ’pilliuteqarnikkut’ uaguttaaq Jehova unnersiutigisinnaavarput qujamasunnerpullu takutissinnaallugu. Ilumoorpoq kristumiutut Mosesip inatsisaanik maleruaasussaanngitsugut uumasunillu naatitanilluunniit pilliuteqartussaanata. (Kolossemiut 2:14) Taamaakkaluartorli apustili Paulusip hebræerit kristumiut ima kajumissaarpai: „Guuti taassumuuna pilliivigiuartigu qujaniutinik, tassa qarlut aqqanik nassuerutiginnittut inerititaannik.“ (Hebræerit 13:15) Tamanut oqaluussinermi kristumioqativulluunniit „katersorsimasuni“ ilagigaangatsigik piffissarput, piginnaanivut pigisavullu atorlugit Jehovamut qujaniutinik pilliuteqarnikkut, Ataatatsinnut qilammiusumut asannittumut, Jehova Guutimut, qujamasungaarnerput takutissinnaavarput. (Tussiaat 26:12) Tamatumunnga atatillugu Israelikkut Jehovamut qujamasunnerminnik takutitsisinnaaneri assigiinngitsut sumik ilinniarfigisinnaavavut?

12. Kristumiutut akisussaaffeqarnitsinnut atatillugu pissarsiat qulingi pillugit aaqqissuussineq sumik ilinniarfigisinnaavarput?

¹² Soorlu takoreeripput Israelikkut namminneq aalajangertussaanngikkaat pissarsiamik qulinginik tunissuteqassanerlutik tunissuteqassannginnerlutilluunniit; tamarmik pisussaaffigaat. Kristumiutut aamma tamatta akisussaaffeqarpugut, tassa oqaluussinermi peqataanissarput kristumiullu ataatsimiinnerini najuunnissarput. Qinigassaanngillat. Naggatissap nalaa pillugu siulittuummini pingaartumi Jiisusi erseqqissumik ima oqarpoq: „Naalagaaffimmik iivangkiiliu taanna silarsuarmi  tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.“ (Matthæusi 24:14; 28:19, 20) Kristumiut ataatsimiinneri pillugit apustili Paulusi isumassarsisinneqarluni ima allappoq: „Immitsinnut isumageqatigiinniarta asaqatigiinnermut ajunngitsuliornermullu kajumissaaqatigiittarluta, ilagiittut katisimasarnivut tamatigut peqataanngitsoorfigisarnatigit, soorlu ilaat taama ileqqoqartut, oqaaqqissaaqatigiittarniartali taamaaliornissaq suli pisariaqarnerulermat nalunnginnassiuk ullussaq qanillisoq.“ (Hebræerit 10:24, 25) Jehovamut qujamasunnerput takutissinnaavarput oqaluussinissamut ilinniartitsinissamullu akisussaaffeqarnerput nuannaarluta akueralugu aalajaallutalu qatanngutivut ilagiit ataatsimiinnerini katerisimaaqatigisarlugit, taakku marluk immikkut pisinnaatitaaffittut ataqqinaatitullu isigalugit.

13. Nammineq kajumissutsimit tapersiilluni tunissuteqartarnermik naatitanillu katersuisarnermik aaqqissuussinerit sumik ilinniarfigisinnaavavut?

¹³ Aammattaaq iluaqutaassaaq misissornerugutsigu Israelikkut qujamasunnerminnik ersersitseriaasii allat marluk — nammineq kajumissutsimit tapersiilluni tunissuteqartarneq naatitanillu katersuisarneq pillugu aaqqissuussineq. Pissarsiat qulingi pillugit aaqqissuussinerup, qanoq angitigisumik tunissuteqarnissap pisussaaffiunerata erseqqissumik malittarisassaqartup, akerlianik ataasiakkaat namminneq aalajangertussaavaat qanoq tapersiillutik tunissuteqartigissanerlutik naatitanilluunniit katersuinermi qanoq qimataqartigissanerlutik. Aaqqissuussinerit taakku iluaqutigalugit Jehovap kiffai tukkortuunermikkut qanoq qujamasutsiginerminnik takutitsinissaminnut periarfissaqarput. Kristumiut oqaluussinerannut ataatsimiinnerinilu najuunnermut, Jehovap kiffaanut tamanut piumasaqaataagaluartunut, assersuukkutsigu, immitsinnut ima aperisinnaavugut: Taakku uummatikkut iluunngarluta kajumillutalu peqataaffigisarpavut? Jehovap uagutsinnut iliuuserisimasaanik tamanik qujamasuutiginningaarnitta takutinnissaanut periarfissatut isigaavut? Taakku peqataaffigilluartarpavut, pissutsit atukkavut naapertorlugit? Pisussaaffiinnartulluunniit isigaavut? Soorunami apeqqutaapput tamatta immikkut eqqarsaatigisariaqakkavut. Apustili Paulusip ima oqaatigaa: „Kialuunniit nammineq suliani misilissavaa, sulianilu namminiinnaq usorsisimaarutigissavai allanut naleqqiunnagit.“ — Galatiamiut 6:4.

14. Imminut kiffartornitsinni Jehovap sumik piumaffigaatigut?

¹⁴ Jehova Guutip pissutsit atukkavut pisinnaasattalu killeqarneri nalunngilluinnarpai. Kiffami kajumillutik pilliutaat, angisuut mikisulluunniit, pingaartippai. Naatsorsuutiginngilaa tamatta assigiimmik pilliuteqassasugut, aammami taamaaliorsinnaanngilagut. Aningaasanik tapersiilluni tunissuteqarnermut atatillugu apustili Paulusi Korinthimi kristumiunut ima allappoq: „Kajumissuseqaraangammi ajunngitsumik taanna qujarunneqartarpoq pisinnaasanut misiliuullugu pisinnaanngisanut pinnagu.“ (2 Korinthimiut 8:12) Najoqqutassiaq taanna aamma Guutimut kiffartornitsinnut atorneqarsinnaavoq. Kiffartornerup Guutimut iluarinartuunera, tassaanngilaq qanoq angusaqartiginerput, qanorli kiffartornersugut — uummatikkut iluunngarluta nuannaarlutalu. — Tussiaat 100:1-5; Kolossemiut 3:23.

 Pioneritut anersaaqarneq ineriartortiguk pigiliugullu

15, 16. (a) Pioneritut kiffartorneq qujamasunnerlu imminnut qanoq attuumassuteqarpat? (b) Pioneriusinnaanngitsut pioneritut anersaaqarlutik qanoq takutissinnaavaat?

¹⁵ Jehovamut qujamasunnermik ersersitsineq nalerisimaarnangaartoq tassaavoq piffissaq tamaat kiffartortunngorneq. Kristumiorpassuit aallussilluartut, Jehovamut asanninnermit ajunngissusianullu pisassarinngisaraluatsinnut qujamasunnermit, kiffartorfigineruniarlugu inuunerminnik allannguingaarsimapput. Ilaat pioneriusinnaapput nalinginnaasut nutaarsiassamillu nuannersumik oqaluussinermi sallusuissummillu inunnik ilinniartitsinermi agguaqatigiissillugu qaammammut nalunaaquttap-akunneri 70-it atorsinnaallugit. Allat, pissutsinit atukkaminnit assigiinngitsutigut killilerneqartut, ilaannikkut ikiortipioneriusinnaapput oqaluussinermilu qaammammut nalunaaquttap-akunneri 50-it atorsinnaallugit.

¹⁶ Jehovap Nalunaajaasorpassuimi pioneriusinnaanngitsut ikiortipioneriusinnaanngitsulluunniit? Pioneritut anersaaqarnermik ineriartortitsinikkut pigiliussinikkullu qujamasunnertik takutissinnaavaat. Qanoq? Pioneriusunik qiimmassaanermikkut, qitornaminnik piffissaq tamaat kiffartorusulersitsinermikkut namminerlu atukkatik naapertorlugit eqiasuillutik oqaluusseqataanermikkut. Qanoq oqaluusseqataatiginersugut Jehovap uagutsinnut iliuuserisimasaanik, suli iliuuserisartagaanik siunissamilu iliuuseriumaagaanik qanoq pingaartitsitiginersugut aalajangiisooqataangaarpoq.

Pisuussutivut atorlugit qujamasunnerput qanoq takutissinnaagipput

17, 18. (a) Qujamasunnerput takutinniarlugu pisuussutivut qanoq atorsinnaavavut? (b) Jiisusip uillarnerup tunissutaa qanoq nalilerpaa, aamma sooq?

¹⁷ „[Jehova] ataqqinaaseruk pisuussutigisannik, naatitavit tamarmik inereqqaataannik,“ Ussatit 3:9-mi allassimavoq. Jehovap kiffai pissarsiamik qulinginik tunissuteqartariaarupput. Paulusi Korinthimi ilagiinnut ima allappoq: „Kinaluunniit tunisissaaq uummammigut aalajangiisimanermisut, pinaasernani pinngitsaalineqarnaniluunniit; kajumittumimmi tunisisoq Guutimit nuannarineqartuuvoq!“ (2 Korinthimiut 9:7) Qujamasunnerput aamma takutissinnaavarput silarsuaq tamakkerlugu oqaluussinermut nammineq kajumissutsimit tapersiilluta tunissuteqarluta. Pingaartitsingaarnitsinnit killinneqarluta aalajangersimasumik tapersiilluta tunissuteqartarpugut, immaqa sapaatip-akunneri tamaasa immikkoortitsilluta, ukiuni hundredelinni siullerni kristumiut iliortarnerattut. — 1 Korinthimiut 16:1, 2.

¹⁸ Jehovamut qujamasunnitsinnik ersersitsisoq tassaanngilaq tapersiissutitta qanoq angitiginera, apeqqutaaneruvorli tunissuteqaratta qanoq isumaqarnersugut. Tamanna Jiisusip malugaa inuit naalaffiup aningaasanik nakkaatitsivianut ikisisut isiginnaaramigit. Uillarneq piitsoq „aningaasannguanik marlunnik ikisisoq“ takugamiuk, ima oqarpoq: „Ilumut oqarfigaassi: Uillarneq una piitsoq tamanit annerusumik tunisivoq. Allammi tamarmik sinnerussaminnik ikisipput, uumali piitsuulluni pigisani inuuniutissaraluani tamaasa ikivai.“ — Lukasi 21:1-4.

19. Sooq pitsaassava eqqarsaatigissallugu qujamasunnitsinnik qanoq takutitsinersugut?

¹⁹ Qujamasunnitsinnik qanoq takutitsisinnaanersugut misissuinermi matumani periarfissaqarpugut nammineq qujamasunnitta qanoq ersersinnerata eqqarsaatiginissaanut. Immaqa Jehovamut qujaniutinik pilliuteqarnerusinnaavugut, silarsuarlu tamakkerlugu suliamut aningaasanik tapersiinerusinnaavugut? Taamaaliorutta qularutigissanngilarput iliuuserisavut Ataatatta qilammiusup, Jehovap, nuannaarutigiumaarai. Qujamasunnitsinnut ersersitsinertut isigissavaa. (wE 1/12 03)

Uteqqiinermi apeqqutit

• Jehovamut suut qujamasuutigisassaraavut?

• Pissarsiat qulingi, nammineq kajumissutsimit tapersiilluni tunissuteqarneq naatitanillu katersuineq pillugit aaqqissuussinerit sumik ilinniarfigaavut?

• Pioneritut anersaaqarneq qanoq ineriartortissinnaavarput?

• Pisuussutivut atorlugit Jehova qanoq qujaffigisinnaavarput?

[Atuaqqissaarnermi apeqqutit]

[Qupp. 15-mi assiliartaq]

„Tunissutit ajunngitsut naammalluinnartuusullu tamarmik pavannga . . . pisarput“

[Qupp. 16-mi assiliartaq]

Aaqqissuussinerit Mosesip inatsisaaneersut pingasut suut uani ersersinneqarpat?