Jehovap ilumoorfiginnilluni asanninnera angeqaaq

’[Jehova] ilumoorsusermik peqangaarpoq [ilumoorfiginnilluni tunniusimangaarpoq, NV].’ — TUSSIAAT 145:8.

1. Guuti qanoq asannitsigaa?

„GUUTI tassaavoq asanninneq.“ (1 Johannesi 4:8) Oqaatsit taakku qamuuna nuannaajallannartut takutippaat Jehovap naalakkersueriaasia asanninnermik tunngaveqartoq. Aap, allaat inuit tassunga naalanngitsut asannilluni seqinnertitsisarnera siallertitsisarneralu iluaqutigaat. (Matthæusi 5:44, 45) Guuti inuiaat silarsuaannik asannittuummat allaat akerai peqqissimisinnaapput allamillu isumataarlutik, tassunga saassinnaapput naassaanngitsumillu inuulersinnaallutik. (Johannesi 3:16) Erniinnarli Jehovap inuit ajortut peqqissimiumanngitsut piiassavai asasini silarsuarmi nutaami naapertuilluassuseqarfiusumi inuunermik naassaanngitsumik nuannaarutiginnissinnaaqqullugit. — Tussiaat 37:9-11, 29; 2 Petrusi 3:13.

2. Jehovap imminut tunniulluinnarsimasut asanninnermik qanoq ittumik ersersitsivigai?

² Jehovap pallorfiginnitsini ilumoortut asajuassavai. Asanninneq erlinnartoq taamaattoq oqaatigineqartarpoq hebræerit oqaasiat „ilumoorfiginnilluni tunniusimaneq“-mik, imaluunniit „ilumoorfiginnilluni asanninneq“-mik, nutserneqartartoq atorlugu. Daavip, itsaq Israelikkut kunngiata, Guutip ilumoorfiginnilluni tunniusimanera pingaartingaarpaa. Daavip nammineq misigisani Guutillu innuttaminik isumaginneriaasianik eqqarsaatiginnittarnini  tunngavigalugit, qularani ima oqarsinnaasimavoq: ’[Jehova] ilumoorsusermik peqangaarpoq [ilumoorfiginnilluni tunniusimangaarpoq, NV]’. — Tussiaat 145:8.

Guutip kiffaasa ilumoorfiginnittut ilisarnaataat

3, 4. (a) Jehovamut ilumoorfiginnittut qanoq ilisarnaateqarnerannik paasiniaanitsinni Tussiaat 145 qanoq iluaqutigaarput? (b) Ilumoorfiginnittut qanoq Jehovamik ’unnersiutiginnippat’?

³ Jehova Guuti pillugu pruffiiti Samuelip arnaa, Hanna, ima oqarpoq: „Imminut upperluartut [Ilumoorfiginnitsini, NV] ingerlaviini sernissorpai.“ (1 Samueli 2:9) ’Ilumoorfiginnittut’ taakku kikkuuppat? Kunngi Daavip kikkuunerinik paasitippaatigut. Jehovap pissusii nuanningaartut unnersiutigereerlugit ima nalunaarpoq: „Ilinnut upperluartut [ilumoorfiginnittut, NV] unnersiutigissavaatsit.“ (Tussiaat 145:10) Inuilli Guuti qanoq unnersiutigisinnaavaat? Pingaarnerpaamik taamaaliorsinnaapput ajunngitsumik oqaluuserineratigut.

⁴ Jehovamut ilumoorfiginnittut ilisarnaatigaat taassuminga ajunngitsumik oqaluuserinnittarnertik. Katerisimaaraangamik kristumiullu ataatsimiinnerini Jehovap naalagaaffianik eqqartuineq pissusissamisoortutut isigaat. Guutimut ilumoorfiginnittut Daavip oqarneratut iliortarput, Daavi ima erinarsorpoq: „Oqaluttuarissavaat [Jehova illit] kunngeqarfippit alutornassusia eqqartorlugulu pissaassutsit.“ — Tussiaat 145:11.

5. Jehovap kiffaminit ilumoorfiginnittunit ajunngitsumik oqaluuserineqaraangami malugisaraa qanoq nalunngilarput?

⁵ Kiffaminit ilumoorfiginnittunit unnersiutigineqaraangami Jehovap malugisarpaa? Aap, oqaasii malugisarpai. Siulittuummi ullumikkut pallorfiginninnermut ilumoortumut tunngasumi Malaki ima allappoq: „[Jehovamik] mianerinnittut taamani oqaloqatigiipput, [Jehovalu] naalaaqqissaarpoq. Mappersagarlu allanneqarpoq [Jehovamik] mianerinnittut aqqanillu ataqqinnittut taassumannga eqqaamaneqaqqullugit.“ (Malaki 3:16) Kiffaminit ilumoorfiginnittunit ajunngitsumik oqaluuserineqaraangami Jehovap nuannaarutigingaartarpaa, taakkulu eqqaamasarpai.

6. Guutip kiffaasa ilumoorfiginnittut suliaq suna ilisarnaatigaat?

⁶ Jehovap kiffaasa ilumoorfiginnittut aamma ilisarnaatigaat Guutimik ilumoortumik pallorfiginninngitsunik oqaloqateqarniarlutik sapiillutik siulliullutik iliuuseqartarnertik. Aap, Guutimut ilumoorfiginnittut allanut ’nalunaarutigisarpaat naammassisai asseqanngitsut’ oqaluussissutigisarlugulu „kunngeqarfiata alutornangaassusia“. (Tussiaat 145:12) Jehovap kunngeqarfiata allanut oqaluttuarinissaanut periarfissarsiortarpit? Guutip kunngeqarfia naassaanngitsumik atassaaq, akerlianilli nunami naalakersuisut peerutingajalerput. (1 Timotheusi 1:17) Taamaattumik pingaaruteqarluinnarpoq inuit Jehovap naalagaaffia naassaanngitsoq pillugu ilinniarnissaat aalajangiussinissaallu. „Kunngeqarfiit atassaaq naassaanngitsumik,“ Daavi erinarsorpoq, „naalagaassutsillu kinguaariikkuutaani“. — Tussiaat 145:13.

7, 8. 1914-imi susoqarpa, maannalu Guutip ernermi naalagaaffia aqqutigalugu naalakkersuineranut suna uppernarsaataava?

⁷ 1914-imiilli Jehovap kunngeqarfia pillugu eqqartuinissamut immikkut ittumik pissutissaqalersimavoq. Tassami ukiumi tamatumani Guutip qilammi naalagaaffik Missiarsikkoortoq Jiisusi Kristusimik, Daavip erneranik, kunngilik pilersippaa. Taamaallilluni Jehovap Daavip kunngeqarfianik naassaanngitsumut aalajaallisitsinissaminik neriorsuunni piviusunngortippaa. — 2 Samueli 7:12, 13; Lukasi 1:32, 33.

⁸ Maanna Jehova Jiisusi Kristusip naalagaaffia aqqutigalugu naalakkersuisoq paasineqarsinnaavoq  Jiisusip najuunnissaanut nalunaaqutit erseqqissiartuinnarnerannit. Nalunaaqutit malunnarnerpaartaraat Jiisusip siulittuutigisaatut Guutip kiffaasa ilumoorfiginnittut imatut suliaqarnerat: „Naalagaaffimmik iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.“ (Matthæusi 24:3-14) Guutip kiffai ilumoorfiginnittut aallussilluarlutik siulittuummik tamatuminnga eqquutitsimmata, angutit, arnat meeqqallu 6 millioninit amerlanerusut suliareqqinneqanngisaannartussaq suleqataaffigaat. Erniinnaq Jehovap naalagaaffianut akerliusut tamarmik naggatissaat nalliutissaaq. — Saqqummersitat 11:15, 18.

Jehovap uagutsinnut ajunngitsuliornerpassui

9, 10. Jehovap nunamilu naalakkersuisut suna assigiinngissutigaat?

⁹ Kristumiuugutta tunniulluinnarsimasut Jehovamut Naalakkamut kisimi oqartussaasumut attaveqarnitta pilluaqqusaatingaarpaatigut. (Tussiaat 71:5; 116:12) Assersuutigalugu qanittumik attaveqarfiginera nuannaarutigisinnaavarput. Inuit imminik mianerinnittut naapertuilluartuliortullu tamaasa iluarai. (Apustilit Suliaat 10:34, 35; Jaaku 4:8) Tamatumunnga akerliusumik nunami naalakkersuisut inuit nuimasut, soorlu sakkutuut naalagaat, niuertut pisuut timersornermiluunniit aliikkusersuinermilu tusaamasaasut, kisiisa ilagigajuppaat. Afrikami aviisimi Sowetan-imi politikkeri nuimasoq nunamini piitsoqarfiusut pillugit ima oqarsimaneragaavoq: „Paasisinnaalluarpara amerlanersavut taamaattunukarusuttanngimmata. Taamaattoqarnera puiorusunnerugatsigu. Ilerasulertarpugut peqqusiileqilertarlutalu [biilitsinnik] akisuunik biilerluta aggeraangatta.“

¹⁰ Soorunami nunami naalakkersuisoqarpoq innuttaasut ingerlalluarnissaannik ilumoorlutik soqutiginnittunik. Taakkuali ilaat iluasaarnerpaalluunniit innuttaminnik qanimut ilisarisimanninngillat. Taamaattumik ima aperisinnaavugut: Naalakkersuisoqarpa innuttaminut tamanut ima isumassuilluartigisumik ajornartorsiuteqartoqaleraangat ikiortarialinnik tamanik ikiuipallattartumik? Aap, taamaattoqarpoq, Daavimi ima allappoq: „[Jehovap] najummisarpai orlulersut tamaasa, massitsittarlugillu taaqqungasut tamaasa.“ — Tussiaat 145:14.

11. Guutip kiffai ilumoorfiginnittut qanoq misilinneqartarpat, qanorlu ikiorneqartarpat?

¹¹ Jehovamut ilumoorfiginnittut ajunaarnerpassuarnit eqqorneqartarput misilinneqartarlutillu naammalluinnannginnertik silarsuarmilu ’ajortup’ pissaaneqarfigisaani inuunertik pissutigalugu. (1 Johannesi 5:19; Tussiaat 34:20) Kristumiut ilaat malersugaasarput. Allat katsorsarneqarsinnaanngitsumik nappaateqarput toqusoqarneraluunniit pissutigalugu aliasullutik. Jehovap kiffai ilumoorfiginnittut aamma ilaannikkut ’taaqqungasinnaapput’ nammineq kukkussuteqarnertik pissutigalugu. Qanorluunniilli misilinneqaraluarpata Jehova piareersimajuarpoq tamarluinnaasa tuppallersarnissaannut anersaakkullu nakussatsinnissaannut. Kunngi Jiisusi Kristusip innuttani ilumoorfiginnittut aamma taamatut asannittumik isumassorpai. — Tussiaat 72:12-14.

 Piffissaq eqqorlugu qaarsillartitaaneq

12, 13. „Pinngortitat tamaasa“ Jehovap qanoq isumagilluartigai?

¹² Ilumoorfiginnilluni tunniusimangaarnermini Jehova kiffami tamarmik pisariaqartitaannik isumaginnittarpoq, ilaatigut nerisassanik peqqinnartunik qaarsillartillugit. Kunngi Daavi ima allappoq: „Tamarmik isaat ilinnut [Jehovamut] sammipput, nerisassaannik tunisarpatit piffissaq eqqorlugu. Assatit ammartarpatit pinngortitallu tamaasa kissaatigisaannik qaarsillartittarlugit.“ (Tussiaat 145:15, 16) Allaat annikilliornartorsiorfiusuni Jehovap pissutsit aqussinnaavai kiffani ilumoorfiginnittut ullormut nerisassaqartillugit. — Lukasi 11:3; 12:29, 30.

¹³ Daavip uparuarpaa ’pinngortitat tamarmik’ qaarsillartinneqartut, aamma uumasut. Nunarsuarmi nunami immamilu naammattorsuarnik naasoqanngikkaluarpat, aalisakkat, timmissat uumasullu nunamiut iltissaqassanngikkaluarput nerisassaqassanngikkaluarlutillu. (Tussiaat 104:14) Jehovalli qaarsillartittarpai pisariaqartitaallu tamaasa isumagisarlugit.

14, 15. Ullumikkut anersaakkut inuussutissat qanoq pilersinneqartarpat?

¹⁴ Uumasut pisariaqartinngisaannik inuit pisariaqartitaqarput, tassa anersaakkut pisariaqartitsineq. Jehovap ilumoorfiginnitsimi anersaakkut pisariaqartitaat tupinnarluinnartumik isumagisarpai. Jiisusi toqunissi sioqqullugu neriorsuivoq „kiffaq ilumoortoq silatoorlu“ ajoqersukkaminik anersaakkut ’nerisassanik piffissaq eqqorlugu’ pilersuiumaartoq. (Matthæusi 24:45) Ullumikkut inussiaqatigiit taakku tassaapput tanitat 144.000-t sinneri. Taakku aqqutigalugit Jehova anersaakkut inuussutissanik naammangaartunik pilersuisarpoq.

¹⁵ Assersuutigalugu ullumikkut Jehovap innuttaasa amerlanersaasa eqqortumik oqaatsillu ullumikkut atorneqartartut atorlugit namminneq oqaatsiminnut Biibilimik nutsigaq iluaqutigaat. Ny Verden-Oversættelsen af De Hellige Skrifter pilluaqqussutaangaarpoq. Aammattaaq atugassiat Biibilimik atuaqqissaarnermi atortakkat oqaatsini 300-nit amerlanerusuni saqqummersinneqartarput. Anersaakkut inuussutissat tamakku tamarmik nunarsuarmi tamarmi pallorfiginnittunut ilumoortunut pilluaqqussutaapput. Tamakku tamarmik Jehova Guutimut ataqqinaataapput. Ilumoorfiginnilluni tunniusimangaarluni inussiaqatigiit „piffissaq eqqorlugu“ inuussutissanik pilersuisinnaatippai.  Taamaattumik anersaakkut paratiisimiippugut ’pinngortitat tamarmik kissaatigisaminnik qaarsillarfigisagaanni’. Jehovallu kiffaasa nunarsuup qanittukkut paratiisinngortinneqarnissaanik neriuutertik nuannaarutigaat! — Lukasi 23:42, 43.

16, 17. (a) Piffissaq eqqorlugu anersaakkut inuussutissaqarnermik assersuuteqarit. (b) Saatanip akerleriissutaalersitaanut atatillugu Guutip kiffaasa ilumoorfiginnittut misigissusii Tussiaat 145-mi qanoq allaatigineqarpat?

¹⁶ Piffissaq eqqorlugu anersaakkut inuussutissaqartitsinermik assersuut maluginiarnartoq misissoriartigu. 1939-mi sorsunnersuup aappaa aallartippoq. Ukiumi tamatumani The Watchtower 1. novembarimoortumi allaaserisaqarpoq „Kalluunnaveersaarneq“-mik qulequtalimmik. Tassani erseqqissunik paasissutissinneqarnerup kingunerisaanik Jehovap Nalunaajaasuisa silarsuarmi sumi tamaaniittut paasivaat inuiaat sorsuunnerannut tunngasuni kalluunnaveersaaqqissaartariaqarlutik. Taamaattumik ukiuni arfinilinni sorsuffiusuni inuiaat akerleriit illuatungeriit tamarmik naalakkersuisuinit kamaanneqarput. Guutilli kiffai ilumoorfiginnittut malersorneqaraluarlutik suliartillu inerteqqutaagaluartoq, Guutip naalagaaffianik nutaarsiassaq nuannersoq oqaluussissutigiuarpaat. 1939-miit 1946-mut tupaallannartumik 157 procentimik amerleriarnertik pilluaqquneqaatigaat. Aammattaaq sorsunnersuup tamatuma nalaani assuarnaatsuunerannik oqaluttuat killitsinnartut suli paasinarsisitsisarput kikkut ilumoortumik upperisaqarnerannik. — Esaja 2:2-4.

¹⁷ Anersaakkut inuussutissat Jehovap pilersittagai piffissaalluartukkuinnanngitsoq pisarput — aammattaaq kissaatigisatsinnik qaarsillartittarpaatigut. Sorsunnersuup Aappaani inuiaat sorsuutileruttorfianni Jehovap innuttai namminneq annaanneqarnissaminnit pingaaruteqarnerungaartumik pingaarnerutitsinissaminnut ikiorneqarput. Jehovap kiffani paasitippai akerleriissutaasoq pingaarnerpaaq silarsuarmik tamarmik attuisoq akerleriissutaasorlu Jehovap eqqortumik kisimi oqartussaaneranut tunngasoq. Nalerisimaarnartorujussuuvoq nalunagu Jehovamut nalunaajaasut tamarluinnarmik Jehovap kisimi oqartussaaneranik qutsissisitsineq Diaavulullu sallutuujuneranik uppernarsaaneq peqataaffigilaaraat. (Ussatit 27:11) Saatani, Jehovamik mamarliisoq naalakkersueriaasianillu isornartorsiuisoq, assiginagu Jehovamut ilumoorfiginnittut kikkut tamarmik tutsaanni ima nalunaartuarput: „Iluartuuvoq [Jehova] ingerlavimmini tamani.“ — Tussiaat 145:17.

18. Piffissaalluartukkut kissaatigisatsinnillu qaarsillartitsisumik anersaakkut inuussutissaqarnermik nutaajunerusumik assersuuteqarit.

¹⁸ Piffissaalluartukkut kissaatigisatsinnik qaarsillartitsisumik anersaakkut inuussutissaqarnermut assersuut alla tassaavoq atuagaq Kom nær til Jehova. Taanna 2002/03-mi silarsuarmi sumi tamaani ataatsimeersuarnerni hundredelikkuutaani „Guutip naalagaaffianik oqaluussisartut ilungersortut“-mik qulequtalinni saqqummersinneqarpoq. Atuakkap tamatuma, ’kiffamit ilumoortumit silatuumillu’ pilersinneqartup Jehovap Nalunaajaasuinillu saqqummersinneqartup, pingaarnertut sammivai Jehova Guutip pissusii nuanningaartut, Tussiaat 145-mi eqqaaneqartut ilanngullugit. Qularnanngilluinnarpoq atuagaq nalissaqanngitsoq taanna Guutip kiffaasa ilumoorfiginnittut Jehovamut suli qaninnerusumik attaveqalernissaminnut iluaqutigissagaat.

 Jehovamut qaninnerusumik attaveqalernissamut piffissaavoq

19. Piffissaq ajornartorsiorfiusussaq suna qanilliartorpa, qanorlu anigorsinnaavarput?

¹⁹ Piffissaq ajornartorsiorfiusussaq, Jehovap eqqortumik kisimi oqartussaanerata apeqquserneqarnerata aalajangiiffigineqarfissaa, qanilliartorparput. Ezekieli 38:2-mi siulittuutigineqartutut Saatanip ’Gogitut nunami Magogimi nunaqartutut’ suliani qanittukkut naammassissavaa, ilaatigut silarsuaq tamakkerlugu Jehovap innuttaanik saassussilluni. Saatanip Guutip kiffai ilumoorfiginnikkunnaarsinniarlugit suna tamaat sakkugissavaa. Jehovamik pallorfiginnittut ilumoorlutik tassunga qinunikkut torlorfiginninnissartik, aap, ilungersorlutik ikioqqunissartik, aatsaat taama pisariaqartitsigissavaat. Guutimut mianerinninnerat asanninnerallu asuliinnaassava? Naamerluinnaq, Tussiaat 145-mimi ima allassimavoq: „[Jehova] qanippoq torlorfigisiminut tamanut, tamanut ilumoorlutik imminut torlorfiginnittunut. Mianerinnitsiminut kissaataannik iliortarpoq, annikilliornerminni nillianerat tusartarpaa annaattarlugillu. [Jehovap] sernigisarpai asasini tamaasa, iluaatsulli tamaasa nungutissavai.“ — Tussiaat 145:18-20.

20. Tussiaat 145:18-20-mi oqaatsit ilumoorneri qanittukkut qanoq paasinarsissappat?

²⁰ Jehovap guutiitsut tamaasa piuneerutitippagit taassuma qaninnerata annaassisinnaaneratalu misiginissaat pikkunassaqaaq! Piffissami pingaaruteqartumi tamatumani qanittuararsuanngortumi Jehovap ’ilumoorlutik imminut torlorfiginnittut’ kisiisa tusaassavai. Ilumoortuusaartut tusaassanngilai, Guutip oqaasianimi erseqqissarneqarpoq guutiitsut piffissaq kingulleq atorlugu aqqanik torlorfiginninninnerat iluaqutaaneq ajortoq. — Ussatit 1:28, 29; Mika 3:4; Lukasi 13:24, 25.

21. Jehovap kiffaasa ilumoorfiginnittut Guutip aqqanik atuinerminnik nuannaarutiginnillutik qanoq takutittarpaat?

²¹ Maanna aatsaat taama pingaaruteqartigaaq Jehovamik mianerinnittut ’ilumoorlutik tassunga torlorfiginninninnissaat’. Guutip kiffaasa ilumoorfiginnittut qinnutiminni ataatsimiinnernilu oqaaseqaraangamik aqqanik atuinertik nuannaarutigaat. Guutip aqqa atortarpaat oqaloqatigiinnerminni tamanullu sapiillutik Jehovap aqqanik oqaluussinerminni. — Romamiut 10:10, 13-15.

22. Sooq isummat kissaatillu silamiorpaluttut akiortuarnissaat pingaaruteqarpa?

²² Jehova Guutimut qanimut attaveqartuassagutta aamma pingaaruteqarpoq anersaakkut ajoqutigisinnaasatta akiornissaat, soorlu pigisalerituneq, aliikkusersuutit peqqinnanngitsut, isumakkeerfiginnikkumannginneq ikiortarialinnilluunniit soqutigisaqannginneq. (1 Johannesi 2:15-17; 3:15-17) Tassami taamatut inooriaaseqarutta taamatulluunniit pissuseqarutta sualuttumik ajortuliornermik Jehovamullu iluarisaajunnaarnermik kinguneqarsinnaavoq. (1 Johannesi 2:1, 2; 3:6) Silatusaassaagut eqqaamagutsigu aatsaat aalajaaffigiuarutsigu Jehovap ilumoorfiginnilluni tunniusimaffigiuassagaatigut, imaluunniit ilumoorfiginnilluni asajuassagaatigut. — 2 Samueli 22:26.

23. Guutip kiffai ilumoorfiginnittut tamarmik siunissaq nuanningaartoq suna qilanaarisinnaavaat?

²³ Taamaattumik Jehovap kiffaasa ilumoorfiginnittut tamarmik siunissaat nuanningaartoq eqqarsaatigiuartigu. Taava „ullut tamaasa“, aap, „naassaanngitsumik“ Jehovamik qutsissisitseqataanissamut unnersiutiginneqataanissamullu nuanningaartumik periarfissaqassaagut. (Tussiaat 145:1, 2) ’Guutip asanninneraniittuinnartariaqarpugut’ inuuneq naassaanngitsoq neriuutigalugu. (Judasi 20, 21) Ataatatta qilammiusup pissusii nalissaqanngitsut, ilaatigut asasiminut ilumoorfiginnilluni tunniusimanera, iluaqutigiuaatigalugit, Daavitut misigiuarta Tussiaat 145 naggaserlugu ima oqarneratut: „Qanerma nalunaajaatigissavaa [Jehovap] nersorneqaatissaa, pinngortitat tamarmik unnersiutigissavaat aqqa illernartoq naassaanngitsumik.“ (wE 1/15 04)

Qanoq akissavit?

• Guutip kiffaasa ilumoorfiginnittut qanoq ilisarnaateqarnerannik paasiniaanitsinni Tussiaat 145 qanoq iluaqutigaarput?

• Jehovap qanoq ’pinngortitat tamaasa kissaatigisaannik qaarsillartittarpai’?

• Sooq Jehovamut suli qaninnerusumik attaveqarnissarput pisariaqartipparput?

[Atuaqqissaarnermi apeqqutit]

[Qupp. 24-mi assiliartaq]

Guutimut ilumoorfiginnittut taassuma suliaanik angingaartunik eqqartuinertik nuannaarutigaat

[Qupp. 25-mi assiliartaq]

Jehovap kiffaasa taassuma kunngeqarfiata alutornangaassusia pillugu allat ilinniarneranni sapiillutik ikiortarpaat

[Qupp. 26-mi assiliartat]

Jehovap „pinngortitat tamaasa“ inuussutissaqartittarpai

[Suminngaanneernerat]

Uumasut: Parque de la Naturaleza de Cabárceno

[Qupp. 27-mi assiliartaq]

Jehovap kiffani ilumoorfiginnittut, ikioqqullutik qinusut, nakussatsittarpai siulersortarlugillu