Tamatta Jehovap naalannassusia oqaluussissutigisigu

„[Jehova] ataqqinartillugulu naalannartissiuk! [Jehovap] aqqa ataqqinartissiuk.“ — TUSSIAAT 96:7, 8.

1, 2. Jehova qanoq unnersiutigineqarpa, unnersiutiginninnermullu tamatumunnga kikkut ilannguteqquneqarpat?

DAAVI, Isajip ernera, Betlehemip eqqaani angummi savaataanik paarsisuulluni alliartorpoq. Ulloriarpassuit tupinnangaartut unnuakkut kisimiilluni nipaatsumiillunilu isiginnaartarsimassagunarpai. Qularnanngitsumik taamanikkut misigisaminik eqqaasinneqaqqippoq Guutip anersaavanit illernartumit isumassarsisinneqarluni oqaatsit nuannersut Tussiaat 19-imiittut taalliarigamigit erinarsoramigillu: „Qilaap oqaluttuaraa Guutip naalannassusia, qilaanngusaasap nalunaarutigaa assaasa piliaat. Nipaat nunarsuarmut tamarmut annguppoq, oqaasii silarsuup isuanut.“ — Tussiaat 19:2, 5.

² Ullut tamaasa unnuallu tamaasa Jehovap qilaata tupinnangaartup oqaaseqarani oqaasertaqanngitsumik nipaqanngitsumillu nalunaajaatigaa taassuma naalannassusia. Pinngortitarsuup Guutip naalannassusia nalunaajaatigiunnaanngisaannassavaa, nalunaajaatillu tamatuma ’nunarsuarmut tamarmut anngunnera’ eqqarsaatigalugu mikisuararsuartut misiginarpoq. Pinngortitarsuulli nalunaajaanera nipaqanngitsoq naammanngilaq. Inuit uppertut kajumissaarneqarput nalunaajaanermut tamatumunnga nipiminnik ilannguteqqullugit. Tussiaasiortup aqqatigut taaneqanngitsup upperlutik Guutimut pallorfiginnittut saaffigai oqaatsinik isumassarsiarititaasunik ukuninnga: „[Jehova] ataqqinartillugulu naalannartissiuk! [Jehovap] aqqa ataqqinartissiuk.“ (Tussiaat 96:7, 8) Jehovamut qanittumik attaveqartut kajumissaarut taanna qiimmattaatigalugu malippaat. Guutimilli ataqqinninneq, imaluunniit naalannarsisitsineq, sumik ilaqarpa?

3. Sooq inuit Guuti naalannartippaat?

³ Oqaasiinnakkut taamaaliortoqarneq ajorpoq. Esajap nalaani Israelikkut Guuti qarluminnik ataqqivaat, amerlanersaalli guutisiornerminni ilumoortuunngillat. Esaja aqqutigalugu Jehova ima oqarpoq: „Inuiaat uku qaniinnarminnik guutisiorfigaannga qarluinnarminnillu ataqqillunga, uummataalli uannit ungaseqaat.“ (Esaja  29:13) Oqaasiinnakkut unnersiutiginninneq isumaqanngilaq. Isumaqassaguni uummammit Jehovamut asanningaartumit naalannassusianillu nalissaqanngitsumik ilumoorluni nassuerutiginnittumit aallaaveqartariaqarpoq. Jehova kisimi Pinngortitsisuuvoq. Ajugaqanngitsuuvoq, qilammi nunamilu naapertuilluartuunerpaalluni asannilluinnartuullunilu. Annaanneqarnissatsinnut pilerfiuvoq eqqortumillu kisimi Oqartussaasuulluni, qilammi nunamilu kikkut tamarmik naalatsigitiffigisariaqagaat. (Saqqummersitat 4:11; 19:1) Tamanna upperivikkutsigu taava uummatikkut iluunngarluta unnersiutigisigu ataqqillugulu.

4. Guutimik ataqqinninnissatsinnut atatillugu Jiisusip qanoq siunnersorpaatigut, qanorlu malissinnaavarput?

⁴ Jiisusi Kristusip ilinniartippaatigut Guuti qanoq ataqqissaneripput, imaluunniit naalannarsisissaneripput, imami oqarpoq: „Inerititaqarluarnissigut uannullu ajoqersuganngornissigut Ataataga naalannarsissaaq.“ (Johannesi 15:8) Qanoq ililluta inerititaqarluarpugut? Siullermik uummatikkut iluunngarluta „naalagaaffimmik iivangkiiliu“ pillugu oqaluusseqataanitsigut taamaalillutalu pinngortitarsuarmut Guutip ’takussaanngitsuuneranik’, pissusii takussaanngitsut pillugit, ’oqaluttuartumut’ ilanngulluta. (Matthæusi 24:14; Romamiut 1:20) Taamaalilluta tamatta toqqaannartumik toqqaannanngitsumilluunniit ajoqersuganngortitsiortornermi peqataavugut Jehova Guutimik unnersiutiginnittunut ilannguttut suli amerlanerulersillugit. Aappassaanik anersaaq illernartup uagutsinni inerititaa ineriartortipparput Jehova Guutillu pissusii nuannersut ilaarniarsaralugit. (Galatiamiut 5:22, 23; Efesosimiut 5:1; Kolossemiut 3:10) Taamaalilluta pissusilersornitsigut Guuti ataqqivarput.

„Nunarsuarmut tamarmut anngussimavoq“

5. Paulusip qanoq erseqqissarpaa kristumiut upperisaminnik allanut oqaluttuarnikkut Guutip naalannarsisinnissaa akisussaaffigigaat?

⁵ Paulusip Romamiunut allakkamini erseqqissarpaa kristumiut upperisaminnik allanut oqaluttuarnikkut Guutip naalannarsisinnissaa akisussaaffigigaat. Romamiunut allakkani pingaarnersat ilagaat Jiisusi Kristusimut uppertuinnaat annaanneqarsinnaasut. Allakkani taakkunani kapitali 10-mi Paulusip ersersippaa nalimini juutit naapertuilluartuutitaaniarsarisut Mosesip inatsisaanik maleruaanikkut, naak ’Kristusi inatsisit naggatigigaluaraat’. Taamaattumik Paulusi ima allappoq: „Qaninnik nassuerutigigukku Jiisusi Naalagaasoq, uummatikkullu upperuit Guutip toqusunit makitikkaa, taava annaanneqassaatit.“ Taamanikkumiilli „juutit grækerillu assigiinngissuteqanngillat. Tamarmimmi taanna naalagarimmassuk torlorfiginnitsiminut tamanut pisoorsuusoq, ’kinaluunniimmi [Jehovap] aqqanik torlorfiginnittoq annaanneqassaaq.’“ — Romamiut 10:4, 9-13.

6. Paulusip Tussiaat 19:5 qanoq atorpaa?

⁶ Taava Paulusi ima apeqquteqarpoq: „Qanorli ilillutik upperfigilersimanngisartik torlorfigissavaat? Qanoq ilillutik tusarsimanngisartik upperfigissavaat? Qanoq ilillutik tusassappat oqaluussisoqanngippat?“ (Romamiut 10:14) Nanginnerani Paulusip Israelikkut pillugit ima allappoq: „Ilaannaasa nalunaarut naalappaat.“ Sooq Israelikkut naalanngillat? Periarfissinneqannginnerat pissutaanngilaq. Uppinngitsuunerat pissutaavoq. Tamanna erserpoq Paulusip Tussiaat 19:5-imik issuaaneranit, oqaatsit pinngortitap nipaqanngitsumik nalunaajaaneranut atornagit kristumiut oqaluussinerannut atoramigit. Ima allappoq: „Nipaat nunarsuarmut tamarmut anngussimavoq, oqaasiilu silarsuup isuanut.“ (Romamiut 10:16, 18) Aap, pinngortitarsuup uumassuseqanngitsup Jehovamik naalannarsisitsineratulli, ukiuni hundredelinni siullerni kristumiut annaanneqarnissaq pillugu nutaarsiassaq nuannersoq sumi tamaani oqaluussissutigaat, taamaalillutillu Guuti ’nunarsuarmi tamarmi’ unnersiutigaat. Aamma Paulusip Kolossemiunut allakkamini nutaarsiassap nuannersup qanoq siaruartigisimanera allaatigaa,  allappormi „qilaap ataani pinngortitanut tamanut“ oqaluussissutigineqarsimasoq. — Kolossemiut 1:23.

Nalunaajaasut aallussilluartut

7. Jiisusi naapertorlugu kristumiut sumik akisussaaffeqarpat?

⁷ Qularnanngitsumik Paulusip Kolossemiunut allakkani allappai Jiisusip toqunerata kingorna ukiut 27-t missaat qaangiuttut. Oqaluussineq qanoq ililluni taama sivisugisassaanngitsigisumik Kolosse tikivillugu siaruarsimava? Ukiuni hundredelinni siullerni kristumiut aallussilluartuupput, Jehovallu aallussilluartuunerat pilluaqquaa. Jiisusip siulittuutigaa ajoqersukkani oqaluusseqataasassasut ima oqarami: „Siullermik iivangkiiliu oqaluussissutigineqassaaq inuiaqatigiinnut tamanut.“ (Markusi 13:10) Aammattaaq Jiisusi peqqussuteqarpoq Matthæusip iivangkiiliuani versini kingullerni atuarsinnaasatsitut: „Taamaattumik aallarlusi inuiaqatigiit tamaasa uannut ajoqersuganngortissigik kuillugit Ataatap Ernerullu Anersaallu Illernartup aqqani ajoqersorlugillu ilissinnut peqqussutikka tamaasa maleruaqqullugit.“ (Matthæusi 28:19, 20) Jiisusip qilaliarnerata kinguninngua ajoqersugai peqqussut taanna malillugu iliuuseqalerput.

8, 9. Apustilit Suliaat naapertorlugit kristumiut Jiisusip peqqussutaa qanoq periaaseqarfigaat?

⁸ Piinsip ulluani ukiumi 33-mi anersaaq illernartup kuineqarnerata kingorna Jiisusip ajoqersugaasa aalajaatsut iliuusereqqaagaat tassaavoq „Guutip tupinnangaartuliai“ pillugit inunnut Jerusalemimiittunut oqaluussineq oqaluttuarnerlu. Oqaluussinerat sunniuteqangaarpoq, „inuillu 3.000-ingajaat“ kuisipput. Ajoqersukkat aallussilluarlutik tamanut Guuti unnersiutigiuarpaat, tamannalu kinguneqarluarpoq. — Apustilit Suliaat 2:4, 11, 41, 46, 47.

⁹ Kristumiut taakkua suliniuteqarnerat upperisarsiornikkut siuttuusunit malugineqapallappoq. Petrusip Johannesillu nakimaannerat eqqissisimajunnaarutigalugu oqaluussiunnaaqqullugit peqqusipput. Apustilit ima akipput: „Uagut eqqartunngitsoorsinnaanngilavut takusimasavut tusarsimasavullu.“ Petrusi Johannesilu sioorasaarneqareerlutik iperagaagamik qatanngutiminnut uterput, sapiillutillu qinoqatigiinnermi Jehovamut ima qinupput: „Sioorasaarutaat arajutsinaveersaakkit, kiffatillu pisinnaatikkit oqaatsit siooranngivillutik oqaatigeqqullugu.“ — Apustilit Suliaat 4:13, 20, 29.

10. Kristumiut ilumoortut qanoq akerlilersorneqarpat, qanorlu periaaseqarpat?

¹⁰ Sivitsunngitsoq paasinarsivoq qinnut taanna Jehovap piumasaanut naapertuulluinnartoq. Apustilit parnaarussaapput taavalu tupinnartuliornikkut inngilimit aniguisinneqarlutik. Inngilip ima oqarfigai: „Naalaffiup silarlianukarlusi sassaritsi, inuunerullu matuma oqaasertai tamaasa inunnut nalunaajaatigisigik!“ (Apustilit Suliaat 5:18-20) Apustilit naalapput, taamaattumillu Jehovap pilluaqqujuarpai. Aammattaaq „naalaffimmi  illuminnilu ullut tamaasa ajoqersuinertik ingerlatiinnarpaat nalunaajaatigalugulu Jiisusi tassaasoq Tanitaq“. (Apustilit Suliaat 5:42) Erseqqippoq Jiisusip ajoqersugaasa allaat akerlilersorneqangaarneq Guutimik naalannarsisitsinissaminnut akornutaatinngilluaasaraat.

11. Ukiuni hundredelinni siullerni kristumiut oqaluussineq qanoq isumaqarfigaat?

¹¹ Sivitsunngitsoq Stefanusi tigusarineqarpoq ujaqqanillu milloorneqarluni toqutaalluni. Toqutsineq tamanna pissutigalugu Jerusalemimi malersuisoqangaalerpoq, ajoqersukkallu tamarmik apustilit kisimik pinnatik qimaasariaqalerput. Malersorneqarneq tamanna nikalluutigaat? Naamerluinnaq, imami allassimavoq: „Siammartitaasimasut angalaartalerput oqaaserlu nalunaajaatigisalerlugu.“ (Apustilit Suliaat 8:1, 4) Guutip naalannassusianik oqaluusserusungaarneq tamanna malunnarseqqittuaannarpoq. Apustilit Suliaat kapitali 9-mi allassimavoq farisiiari Saulusi Tarsusimeersoq, Damaskusiliartilluni tassani Jiisusip ajoqersugaasa malersugaanissaat aallartitinniarlugu, Jiisusimit takorruuisinneqartoq tappiillisinneqartorlu. Damaskusimi Ananiap Saulusi tupinnartuliornikkut isigisinnaalerseqqippaa. Tamatuma kingorna Saulusip — kingusinnerusukkut apustili Paulusitut ilisarisimaneqalersup — suliaq suna pingaartinneruaa? Oqaluttuami ima allassimavoq: „Erniinnaq synagogini oqaluussissutigilerpaa Jiisusi Guutip ernerigaa.“ — Apustilit Suliaat 9:20.

Tamarmik oqaluusseqataapput

12, 13. (a) Oqaluttuarisaanermik ilisimatuut naapertorlugit ukiuni hundredelinni siullerni kristumiut ilagiivinut atatillugu suna maluginiarnartuua? (b) Apustilit Suliaat oqaluttuarisaanermik ilisimatuut oqaasiinut qanoq naapertuuppat?

¹² Amerlanernit ilisimaneqarpoq ukiuni hundredelinni siullerni kristumiut ilagiiviniittut tamarmik oqaluusseqataasarnerat. Philip Schaffip taamanikkut kristumiut pillugit ima allappoq: „Ilagiit tamarmik ajoqersuiartortitaqatigiiupput, kristumiullu uppertut tamarmik ajoqersuiartortitaapput.“ (History of the Christian Church) W.S. Williams ima oqarpoq: „Amerlanerit isumaqatigiissutigaat itsaq ilagiinni kristumiuniittut tamarmik, ingammik tupinnartuliorsinnaatitaasut [anersaap tunissutaanik pigisallit], iivangkiiliu oqaluussissutigisaraat.“ (The Glorious Ministry of the Laity) Imalu nangippoq: „Jiisusi Kristusi isumaqanngisaannarpoq inuit aalajangersimasuinnaat kisimik oqaluussisassasut.“ Allaat Celsus, itsaq kristumiussutsimik akerlilersuisut ilaat, ima allappoq: „Nuersagassiortut, kamippaliortut ammerisullu, inuit perorsarsimarpalunnginnerpaat, iivangkiiliumik oqaluussisartuupput aallussilluartut.“

¹³ Oqaaseqaatit taakkua ilumoortuunerat Apustilit Suliaat-ni oqaluttuami piviusumi erserpoq. Piinsip ulluani ukiumi 33-mi ajoqersukkat tamarmik, angutit arnallu, „Guutip tupinnangaartuliai“ pillugit tamanut oqaluussipput. Stefanusip toqutaanerata kingorna malersugaaneq kinguneqarpoq kristumiut siammarsimasut nutaarsiassamik nuannersumik sumi tamaani oqaluussinerannik. Ukiut 28-t missaat qaangiuttut Paulusi hebræerinut kristumiunut tamanut, palasinut ikittuinnarnuunngitsoq, ima allappoq: „Guuti taassumuuna pilliivigiuartigu qujaniutinik, tassa qarlut aqqanik nassuerutiginnittut inerititaannik.“ (Hebræerit 13:15) Paulusip oqaluussinermut isiginnittaatsini ima allaatigaa: „Iivangkiiliumi tusarliukkakku taamaaliornera usorsisimaarutigisinnaanngilara, pinngitsoornangami tusarliuttussaagakku, eqqanarlu uanga iivangkiiliu nalunaajaatiginngikkukku.“ (1 Korinthimiut 9:16) Erseqqippoq ukiuni hundredelinni siullerni kristumiut aalajaatsut tamarmik taamatut isiginnittaaseqartut.

14. Upperneq oqaluussinerlu imminnut qanoq attuumassuteqarpat?

¹⁴ Kristumiut ilumoortut tamarmik oqaluusseqataasariaqarput, oqaluussinermi uppernermut attuumassuteqarluinnarpoq. Paulusi ima allappoq: „Uummatikkut upperneq iluartuutitaassutissaavoq, qanermillu nassuerneq annaanneqaatissaalluni.“ (Romamiut 10:10) Ilagiinni inuit ikittuinnaat — soorlu palasit — kisimik uppertuuppat taamaattumillu oqaluussisussaallutik? Soorunami naamik. Kristumiut ilumoortut tamarmik Naalakkamut Jiisusi Kristusimut upperluartuuneq ineriartortippaat allanullu tamanut upperisaminnik nassuerutiginninnissaminnut kajumissisinneqartarlutik. Taamaanngippat uppernerat toqungavoq. (Jaaku 2:26) Ukiuni hundredelinni  siullerni kristumiut ilumoorfiginnittut tamarmik uppernerminnik taamatut ersersitsimmata, Jehovap aqqata unnersiutigineqangaarnera tusarsaavoq.

15, 16. Ajornartorsiuteqaraluartoq oqaluussinerup siaruariartorneranik assersuuteqarit.

¹⁵ Ukiuni hundredelinni siullerni ilagiinni avataanilu ajornartorsiuteqaraluartoq Jehovap innuttani amerliartornermik pilluaqquai. Assersuutigalugu Apustilit Suliaat kapitali 6-imi eqqaaneqarpoq kristumiut hebræerisut oqaasillit grækerisullu oqaasillit isumaqatigiinngissuteqartut. Ajornartorsiut apustilinit aaqqinneqarpoq, qanorlu kinguneqarnersoq ima allassimavoq: „Guutip oqaasia siammariartorpoq, ajoqersukkallu Jerusalemimiittut amerliartuinnarput; aammattaarlu palasit amerlaqisut uppernermut naalattunngorput.“ — Apustilit Suliaat 6:7.

¹⁶ Kingusinnerusukkut Judæap kunngiata Herodesi Agrippap aamma Tyrusimi Sidonimilu innuttaasut akornanni politikkikkut najummassimanartorsiortoqalerpoq. Illoqarfinnili taakkunani innuttaasut Herodesi qujanarniarfiginiarlugu eqqisseqatigiumanialerpaat. Tamatuma kingunerisaanik Herodesi tamanut oqalugiarpoq, taavalu inuppassuit katersorsimasut ima suaartalerput: „Oqaluttoq guutiuvoq, inuunngilaq!“ Taamaalisorlu Jehovap inngiliata Herodesi Agrippa qullugianitsippaa, toquvorlu ’Guuti ataqqinaatissinnginnamiuk’. (Apustilit Suliaat 12:20-23) Naalakkersuisunik nunamiusunik tatiginnittunut tupannarsimassaqaaq! (Tussiaat 146:3, 4) Kristumiulli Jehovamik ataqqinnittuarput, tamatumalu kingunerisaanik politikkikkut allanngorartoqaraluartoq „Guutip oqaasia ajugaajartorpoq siammarlunilu“. — Apustilit Suliaat 12:24.

Taamanikkut ullumikkullu

17. Ukiuni hundredelinni siullerni inuit amerliartuinnartut sumut ilaalerpat?

¹⁷ Aap, ukiuni hundredelinni siullerni silarsuaq tamakkerlugu ilagiit kristumiut oqaluussisartuupput aallussilluartut Jehova Guutimik iliuuseqarlutik unnersiutiginnittut. Kristumiut ilumoorfiginnittut tamarmik nutaarsiassamik nuannersumik siaruartereqataapput. Naapitaasa ilaat ajunngitsumik qisuariarput, Jiisusillu peqqusineratut kristumiut taakkuninnga ilinniartitsipput peqqussutaanik tamanik maleruaanissaannik. (Matthæusi 28:19, 20) Tamatuma kingunerisaanik ilagiit amerliartorput, amerliartuinnartullu Jehovamik unnersiutiginninnermut ilaalerput. Itsaq kunngi Daavitut oqarsinnaapput: „Qutsavigaakkit [Jehova] Guutiga uummatikkut iluunngarlunga. Ataqqissavara aqqit naassaanngitsumik, ajunngissutsinnik angingaartumik misigitikkamma.“ — Tussiaat 86:12, 13.

18. (a) Ukiuni hundredelinni siullerni ilagiit kristumiut ullumikkullu kristumiuuneratut qanoq assigiinngissuteqarpat? (b) Allaaserisami tulliuttumi suna misissussavarput?

¹⁸ Taamaammat teologiimi professori Allison A. Tritesip oqaasii eqqarsarnartorujussuupput. Taassuma ullumikkut kristumiuunerartut ukiunilu hundredelinni siullerni kristumiussutsimut naleqqiussimavai, imalu oqarpoq: „Ullumikkut ilagiit ingammik meeqqiortoqarneratigut amerliartorput (ilaqutariit illoqarfimminni ilagiinnut ilaasortaasut meeraat namminneerlutik upperisamik nassuerutiginnikkaangata) imaluunniit ilagiinnut allanut nuuttoqartarneratigut (allamut nuuttoqarneratigut ilaagiit allat orninneqartaleraangata). Apustilit Suliaat-nili pineqartut tassaapput inuit saassimasut, ilagiimmi suliartik aatsaat aallartippaat.“ Tamanna isumaqarpa kristumiut ilumoortut ilagiivi Jiisusip oqarneratut amerliartornissaraluamissut amerliartorunnaartut? Taamaanngivippoq. Ullumikkut kristumiut ilumoortut ukiuni hundredelinni siullerni kristumiutulli aallussilluartigipput tamanut Guutimik unnersiutiginninnermut tunngatillugu. Tamanna allaaserisami tulliuttumi ersersinneqassaaq.

Uteqqiinermi apeqqutit

• Guuti qanoq ataqqivarput?

• Paulusip Tussiaat 19:5 qanoq atorpaa?

• Upperneq oqaluussinerlu imminnut qanoq attuumassuteqarpat?

• Ukiuni hundredelinni siullerni kristumiut ilagiivinut atatillugu suna maluginiarnartuua?

[Atuaqqissaarnermi apeqqutit]

[Qupp. 8, 9-mi assiliartaq]

Qilaat Jehovap naalannassusia nalunaajaatigiuarpaat

[Suminngaanneernera]

Anglo-Australian Observatoryp akuersineratigut, assiliisoq: David Malin

[Qupp. 10-mi assiliartat]

Oqaluussineq qinunerlu imminut attuumassuteqarluinnarput