Uppernermut pissutissaq eqqortoq

KOREAMIUP atuakkiaani „Inuusuttut oqaluffimmit qimaguttarnerannut pissutaasut 31-t“ allassimavoq amerlasuut naalagiartarunnaartartut apeqqutitik naammaginartumik akineqarneq ajormata. Assersuutigalugu aperisarput: ’Sooq inuit Guutimut uppertut allaat naalliuppat?’ aamma ’Sooq oqaluffimmi ajoqersuutit tamaasa upperissavavut, ajoqersuutit ilarpassui paasissaanngippata tunngavimminnullu akerliullutik?’

Palasit akissutaannut pakatsillutik amerlasuut isummersimapput Biibilimissaaq akissutissarsisinnaanaviarnatik. Palasi nammineq isummani maliinnarlugu oqaaseqaraangat inuit paatsuungalersarput immaqalu allaat Guuti Biibililu assortulerlugit.

Abelimut taamatut pisoqarpoq. Taanna Afrikap Kujataani lutherikkuusutut peroriartorpoq, oqaluttuarporlu: „Oqaluffimmi ajoqersuutigineqarpoq toqusoq Guutip ’tigusaraa’ angerlartillugu. Kisianni paasisinnaanngilara qanoq ililluni Guutip asannittup meeqqat angajoqqaavinik ’arsaarsinnaanerai’. Nunaannarmi peroriartorfigisanni kukkukuuaqqat allitinnagit kukkukooq arnaviaq toqunneq ajorparput. Paasigutsigu nersussuaq arnaviaq naartusoq, piarartaava milukkunnaareertinnagu nersussuaq toqunneq ajorparput. Paasisinnaanngilara sooq Guutip asannittup inunnut taamatut qajassuussinnginnera.“

Aram Canadamiu taamatulli pakatsitigaaq. „13-inik ukioqartunga ataataga toquvoq,“ oqaluttuarpoq. „Ilisaanerani oqaluutsimini palasi nuimasoq oqarpoq Guutip kissaatigigaa ataataga toqussasoq qilammi imminut qaninneruniassammat. ’Guutip inuit ajunngitsut tigusarpai,’ oqarpoq, ’naapertuilluartut asagamigit.’ Paasisinnaanngilara Guuti taamatut namminissarsiortigisinnaammat.“

 Kingusinnerusukkut Abeli Aramilu Jehovap Nalunaajaasuinut attaveqalerput, Biibilip atuaqqissaarnissaanut ikiorneqarput, kiisamilu nassuiaatissarsillutik. Guutimut asannilerput upperilluinnalerlugulu. Jehovamut tunniulluinnarput, maannalu pallorfigalugu uummatikkut iluunngarlutik.

Eqqorluartumik ilisimasaqarneq — Guutip upperinissaanut tunngavissaq

Paasisat taakku qanoq atorsinnaavavut? Takutippaat Guutimut upperneq Biibilimik eqqorluartumik ilisimasaqarnermik tunngaveqartussaasoq. Apustili Paulusi itsaq kristumiunut Filippimiunut oqarpoq: „Qinnutigaaralu asanninnissi alliartuinnarnissaa paasisimasaqarnermik silatusaallaqqinnermillu peqangaalerluni.“ (Filippimiut 1:9) Paulusip tassani Guutimut uppeqatinullu asanninneq atassuteqartippaa Guuti pillugu eqqorluartumik ilisimasaqarnermut piumasaanullu tunngatillugu immikkoortitsisinnaanermut.

Tamanna tunngaveqarluartumik eqqarsarneruvoq, tassami uppernissamut tatiginninnissamullu tunngavissaq siulleq tassaammat upperfigisap ilisarisimanissaa — sapinngisamik tamakkiisumik sukumiisumillu. Eqqorluartumik ilisimasaqarneq taamatulli pingaartigaaq Guutip upperinissaanut kajumissuseqassagaanni. „Upperneq tassaavoq neriugisamik tatiginnilluinnarneq, takunngisamik qularuteqannginneq,“ Paulusi oqarpoq. (Hebræerit 11:1) Guutimut upperneq Biibilimeersumik eqqorluartumik ilisimasaqarnermik ilaqanngitsoq nallukattanik illuliatut ippoq — supineqaallakkuni uppittussaq.

Apeqqut ’Sooq toqusarpugut?’, Abelip Aramillu eqqarsaatigiuarsimasaat, Biibili atorlugu akineqarsinnaavoq. Biibilimi nassuiarneqarpoq ’inukkut ataasiinnakkut ajorti silarsuarmut tikiuttoq ajortikkullu toqu tikiulluni, taamatut toqu inunnut tamanut annguttoq tamarmik ajortuliormata’. (Romamiut 5:12) Inuit utoqqalisaraat toqullutillu, imaanngitsoq Guutip imminut angerlartimmagit, kisianni Adamip ajortuliornera pissutigalugu. (1 Mosesi 2:16, 17; 3:6, 17-19) Biibilimilu takutinneqarpoq Jehova Guutip ilumoortumik neriuuteqalernissarput isumagisimagaa. Ernini Jiisusi Kristusi aqqutigalugu inuit silarsuarmiut ajortillit makinnissamik neriuutissippai. — Johannesi 5:28, 29; Apustilit Suliaat 24:15.

Makinnissap isumaa paasilluartarparput Jiisusip uummarteqqitai pillugit Biibilimi atuaraangatta. (Lukasi 7:11-17; 8:40-56; Johannesi 11:17-45) Oqaluttuarineqartunit paasinarluarpoq makititaasut ikinngutaasa ilaqutaasalu tamanna nuannaarutigalugulu qiimmattaatigigaat. Malugiuk tamatuma Guutimik unnersiutiginnilersissimagai Jiisusimillu upperinnilersillugit.

Guutimik siunertaanillu eqqorluartumik ilisimasaqarneq ullumikkut inunnut taamatulli sunniuteqarsinnaavoq. Inuppassuit paatsiveerusimaarlutilluunniit nanertuuteqarsimapput, allaallu ilaasa Guuti upperiunnaarsimavaat, tassa apeqqutit pingaaruteqartut naammaginartunik akissutissaqartinnginnamikkit. Kisianni Biibilip misissornissaanut ikiorneqaramik akissutissarsipput, tamannalu inuunerannut allannguutaalluinnarpoq.

Guutimut asanninneq — pissutissat pingaarnersaat

Tassa Guutip upperinissaanut eqqorluartumik ilisimasaqarneq pisariaqarpoq, kisianni naalallugulu kiffartuunnissaanut pissutissatut naammanngilaq. Jiisusi aperineqarami Guutip inatsisaani suna pingaarnersaanersoq akivoq: „[Jehova] Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit nukitillu tamakkerlugit.“ (Markusi 12:30) Jiisusip maani eqqaasaatut Guutimut asanninneq naalannissaanut kiffartuunnissaanullu iliuuseqartitsisut annersaraat. Ilinnut taamaappa?

Rachel ukiorpassuarni Koreami ajoqersuiartortitaasimasoq upperisami tunngavia pillugu oqarpoq: „Uanga nuannareqaakka Jehovap pinngortitaminut tukkussusia, naakkinnissusia iluaqutissatsinnillu ilinniartikkusulluta qamannga pisumik kissaateqarnera, taavalu aamma uatsinnit qanoq ilimasuffiginninnera. Tamatuma Guutimut asanningaartippaanga. Asanninnerullu tamatuma kajumissisippaanga kiffartuullugulu pallorfiginissaanut.“

Martha, uillarneq Tysklandimi najugalik, ukiuni 48-ni Jehovamut kiffartorsimavoq. Taanna oqarpoq: „Sooq Jehova kiffartuukkiga?  Asagakku. Unnuit tamaasa qinunikkut oqaluuttarpara uagutsinnut iliuuserisimasaanut tamanut qanoq qujamasuffigitigigiga, pingaartumik utertimmatigut.“

Aap, Guutimut uummammit pisumik asanninnerup taanna kiffartuullugulu pallorfigerusulersippaa. Kisianni suumuna asanninneq taanna pilersikkaa? Kajumilersitsisut sakkortunersaraat Guutip uatsinnut asanninneranut pingaartitsingaarneq. Biibilimi oqaatsit uku nuannaajummernaqisut malugikkit: „Asanninngitsup Guuti ilisarinngilaa, Guutimi tassaavoq asanninneq. Matumuuna Guutip asanninnera akornatsinni saqqummersinneqarsimavoq: Guutip ernituani silarsuarmut aallartimmagu taassumuuna inooqqulluta. Asanninneq tassaanngilaq uagut Guuti asagatsigu, tassaavorli Guutip asammatigut erninilu aallartimmagu ajortivut pillugit pilliutitut saammaannartitsissutitut.“ — 1 Johannesi 4:8-10.

Paasilluarpiuk asanninnermik ersersitsinerup tamatuma qanoq angitigissusia? Eqqarsaatigeriaruk kuummi qaputtuinnarmi ipingajattutit, angutillu inuunini navianartorsiortillugu annaakkaatit. Imaaliallaannaq puigussagunanngilat, kisianni qujamasuffigingaassavat. Aap, qularnanngitsumik tamanik iliuuseqarfigerusussavat. Asanninneq Guutip ernermi Jiisusi Kristusip pilliutitut utertitsissutitut tunniunneratigut ersersitaa asseqanngilluinnarpoq. (Johannesi 3:16; Romamiut 8:38, 39) Guutip asanninneranit uummatit killinneqarpat asalissavat, pissutissaqalissaatillu uummatikkut iluunngarlutit kiffartuunnissaanut.

Pilluaqqusaanerit maannakkut siunissamilu

Soorunami pingaarnerusumik Guutimut asanninnerput taannaasariaqarpoq piumasaanik iliuuseqalersitsisoq, taamaattorli nuannaajallannartarpoq nalunagu Guutip kiffani akilerumaarai. Apustili Paulusi oqarpoq: „Uppersuseqarnanili Guutimit iluarisaaneq ajornaqaaq, Guutimummi pisup upperisariaqarpaa taanna tassaareersoq ujarlersinilu akissarsisissagai.“ — Hebræerit 11:6.

Guutip imminut asannillutillu naalattut pilluaqqusarpai. Ilaasalu paasivaat Biibilimi najoqqutassiat  malikkaanni allaat tamanna peqqinnerulersitsisartoq. (Ussatit 23:20, 21; 2 Korinthimiut 7:1) Unneqqarissuunissamik eqiasuitsuunissamillu Biibilimi ilitsersuutinik malinnittut suleqatitut nuannarineqarajuttorujussuupput, taamaalillutillu aningaasarsiornikkut toqqissisimaneruneq misigisarlugu. (Kolossemiut 3:23) Jehovamik tatiginnittut eqqarsaatimikkut eqqissinermik pilluaqqusaasarput allaat erloqinarluinnartunik atugaqaraluarlutik. (Ussatit 28:25; Filippimiut 4:6, 7) Aammalu pingaaruteqaqaaq nunami paratiisinngortussami inuunermik naassaanngitsumik neriuutissaqarnerat. — Tussiaat 37:11, 29.

Pilluaqqussutaanik misigisaqartut misigissutsinik sunik ulikkaarpat? Canadami kristumiu arnaq Jacquelinemik atilik ima oqaaseqarpoq: „Nuannaarutissarpassuatsinnik tunisimavaatigut, minnerunngitsumik inuunermik naassaanngitsumik neriuut qularnaatsoq.“ Abelip, siusinnerusukkut taaneqartup, aamma qanoq misiginini oqaatigaa: „Uannut nutaajulluinnarpoq nunami paratiisiusumi naassaanngitsumik inuunermik neriuutissaqalerneq, eqqarsaatigalugulu nuanneqaaq. Kisianni allaat paratiisimik qilanaarutissaqanngikkaluarumaluunniit Guuti nuannaangaarlunga kiffartuukkumaannassavara, taassumunnga asanninninnera takutikkumallugu.“

Illittaaq uppertunngorsinnaavutit

„Katersaarsuit [Jehovaat], eqqartuussisuusutit naapertuilluartoq, uummammik tartunillu misiliisutit,“ Biibilimi allassimavoq. (Jeremia 11:20) Aap, Jehovap ilorpiatsinni sunik toqqortaqarnersugut misissortarpaa. Tamatta immikkut Guutip upperineranut pissutigisatta suunera misissortariaqarparput. Siornatigut Guuti pillugu eqqunngitsunik paasinnillutalu isumaqarsimasinnaavugut, taamaattumillu eqqunngitsunik iliorluta. Kisianni eqqorluartumik Biibilimik ilisimasaqarneq iluaqutigalugu Pinngortitsisumut, Jehova Guutimut, ajunngitsumik attaveqartoqalersinnaavoq. — 1 Timotheusi 2:3, 4.

Guuti pillugu eqqorluartumik ilisimasaqalernissamut iluaqutissatut Jehovap Nalunaajaasuisa Biibilimik ilinniartitsineq neqeroorutigaat. (Matthæusi 28:20) Neqeroorummut taamaattumut ilassinnissimasorpassuit Guutimut sakkortuumik uppissuseqalersimapput Guutilu asalersimallugu. Aamma „silatussutsimik isumatussutsimillu“ tunineqarsimapput „ingerlavimminni aarlerissutissaqaratik“ ulluni taakkunani navianartoqaqisuni qanoq ingerlanissartik nalunnginniassammassuk. (Ussatit 3:21-23) Minnerunngitsumillu pivaat siunissamut neriugisaq „kitsatut ittoq“. (Hebræerit 6:19) Illittaaq sakkortuumik uppissuseqalersinnaavutit nuannersortaalu misigalugit. (wE 12/1 03)

[Qupp. 6-mi ungalusaq]

Apeqqutit pinngitsooratik akisariaqartut

„Nakorsassatut ilinniartuutillunga napparsimmavimmi sulillunga takuakka inuit pisuussuteqanngitsut nappaatit ajunaarnerillu pissutigalugit naalliuttut. Imminut aperivunga: ’Guuteqaruni sooq taama pisoqarnera akueraa? Upperisarsiorneq isumakkuinnaq eqqissisitsisussaava?’“ — Koreami presbyterianeriusimasoq.

„Eqqarsaatigikulavara ataataga imerajuttuusoq qilammut anniarfimmulluunniit pisimanersoq. Toqu anniarfillu eqqarsaatigigaangakkit annilaangasaqaanga. Paasisinnaasimanngilara Guutip asannittup qanoq inuit innermut naassaanngitsumut pisussanngorlugit eqqartuussinnaagai.“ — Katuuliusimasoq Brasiliameersoq.

„Inuiaat nunarsuullu suna siunissaraat? Qanoq inuit naassaanngitsumik inuusinnaappat? Qanoq nunarsuarmi eqqissineqalersinnaava?“ — Katuuliusimasoq Tysklandimeersoq

„Ernioqqittarnermik ajoqersuut paasinngilara. Uumasut Guuti pallorfigisinnaanngilaat, tassa ajortit isumakkeerneqaatissaannik arlaannik pissuteqarluni uumasutut ernioqqissitaagaanni qanoq ililluni suut tamaasa iluarseqqinneqarsinnaappat tassanngaanniillu ingerlaqqilluni?“ — Afrikap Kujataani hindusiortuusimasoq.

„Konfutsesiortutut peroriartorpunga siuaasattalu eqqissinissaannik qulakkeerinninniarlutik ileqqulersortunut peqataasarlunga. Pilliutinik nerriviliortunut peqataagaangama seeqqumiarlungalu eqqarsaatigisarpara siuaasavut toqusimasut aggertarnersut nerisassallu nerillugit pallorfiginnitsillutalu isiginnaarluta.“ — Koreami konfutsesiortuusimasoq.

Taakkua tamarmik apeqqutaat akineqarput Jehovap Nalunaajaasui peqatigalugit Biibilimik misissuigamik.