Atuartartut apeqqutaat

Ujaqqamik iluanaarnartumik atuineq kristumiut qanoq isigissavaat?

Ujaqqamik pinnersaatilimmik assammioqassanerluni kristumiup nammineq aalajangissavaa. (Galatiamiut 6:5) Kisianni ujarak iluanaarniutaanerarneqarpat eqqarsaatigisassaqarpoq.

„Ujarak iluanaarnartoq“ qallunaat oqaatsinut ujarlerfissiaat malillugu tassaavoq „ujarak erlinnartoq iluanaarnartoq“, aamma Encyclopaedia Britannica paasisutissiivoq tassaasoq „ujarak erlinnartoq inuup inuuianut atassuteqartoq, nalinginnaasumillu atuisuminik iluanaartitsisartoq peqqisuutitsisartorlu“. Ilanngunneqarporlu: „Ullorissat najoqqutaralugit siulittuisartut qangali ujaqqat erlinnartut ilaat tupinnartunik nukeqarnerartarpaat.“

Pingaartumik qangaanerusoq amerlasuut isumaqarput ujaqqat erlinnartut taamaattut atuisortik iluanaartittaraat. Kristumiup ilumoortup tamanna upperaa? Naamik, kristumiummi nalunngilluinnarpaa Jehova tunussisiminik „iluanaarnerullu guutianik“ tatiginnittunik assuarinnittoq. — Esaja 65:11.

Ukiuni akullerni siulittuisartut ukiup qaammataanut tamanut ujaqqamik erlinnartumik toqqaasarput. Inuit kajumissaartarpaat ujarak erlinnartoq qaammammut inunngorfigisaminnut naleqquttoq atoqqullugu, taavalu atuisoq ajortunut tamanut illersussagaa. Kisianni Biibili naapertorlugu siulittuisartut tusarnaarnissaat eqqunngitsuuvoq. Siulittuisarneq Biibilimi assuarineqarpoq. — 5 Mosesi 18:9-12.

Aammattaaq kristumiumut eqqortuussanngilaq assammioq iluanaarnartumik ujarattalik immikkut pingaaruteqartissallugu. Ujarak iluanaarnartoq qaammammut inuunngorfimmut atassuteqarpoq, Jehovap Nalunaajaasuisalu inuuitik nalliuttorsiutigineq ajorpaat, ilaatigut taamaattoqartillugu inuuissiortoq pingaartinneqarpallaartarmat, aamma ilaatigut inuuissiornerit Biibilimi eqqaaneqartutuaasut Guutimik nalusunit nalliussineqarmata. — 1 Mosesi 40:20; Matthæusi 14:6-10.

Ilaat isumaqarput assammioq iluanaarnartumik ujarattalik atuisup kinaassusianut ajunngitsumik sunniuteqartartoq. Kisiannili kristumiut ilumoortut tamanna upperinngilaat, nalunngilaammi „inuk nutaaq“ Guutip anersaavata illernartup sunniineratigut Biibilimilu najoqqutassiat tunngaviusut malinnerisigut pilertartoq. — Efesosimiut 4:22-24.

Iluanaarnartumik ujarattalimmik assammioqassanerluni aalajangerniaraanni eqqarsaatigisariaqartoq pingaartorujussuaq tassaavoq taamaaliornissamut pissutigisaq. Kristumiu imminut aperisariaqarpoq: ’Assammioq taanna atorusuppara ujarattaa kusagigakku, naak ilaasa ujaraaneraraluaraat iluanaarnartoq? Imaluunniit ilaatigut upperisapalaamik ilaasa ujaqqanut taakkununnga atassuteqartitaannit sunnerneqarsimavunga?’

Guutimut tunniulluinnarsimasup uummatini misilittariaqarpaa paasiniarlugu assammiumik taamaattumik atuinermut suna pissutaanersoq. „Paarisassanit tamanit annermik uummatit paariuk inuuneq tassannga aallaaveqarmat,“ Biibilimi allassimavoq. (Ussatit 4:23) Silatusaarnerussaaq assammiumik taamaattumik atuinerminut pissutigisani aamma imminut allanullu sunniutigisinnaasai eqqarsaatigissallugit. — Romamiut 14:13.  (wE 11/15 03)