Jiisusip ilaqutai sumik ilinniarfigisinnaavavut

JIISUSIP qaniginerusai 30-nik ukioqarluni kuisinnissami tungaanut najugaqatigisimasai qanoq ilisimasaqarfigaavut? Taakkua iivangkiiliuni qanoq oqaluttuarineqarpat? Aamma ilaqutariit pillugit paasisavut qanoq atorsinnaavavut? Iluaqutigisinnaasatsinnik ilinniarfigisinnaavavut.

Jiisusi pisuujoreerluni inunngorpa? Naamik, angutisiaa Josefi sanasuuvoq. Suliaq nukersornartuuvoq, aamma imaassinnaavoq orpinnik killuisariaqartarsimassasoq. Jiisusip inunngorneranit ullut 40-t qaangiuttut angajoqqaavi Inatsit malillugu Jerusalemimut pilliiartorput. Peqqussutigineqartutut savaaqqamik tuillu piaraanik imaluunniit tuimik pilliippat? Naamik. Tamakkuninnga pilliuteqarnissaminnut akissaqannginnguatsiarput. Piitsulli Inatsimmi nallittorneqarput. Tamanna naapertorlugu Josefi Marialu „tuinik quluartartunik marlunnik imaluunniit tuinik piaqqanik marlunnik“ pilliuteqarput. Annikitsumik pilliuteqarneq tamanna ilaqutariit piitsuunerannik takutitsivoq. — Lukasi 2:22-24; 3 Mosesi12:6, 8.

Jiisusi Kristusi, inuiaat tamarmik naalagassaat, piitsut inuussutissaqarniarlutik suleruloortartut akornanni inuuvoq. Peroriartorami Josefitut sanasunngorpoq. (Matthæusi 13:55; Markusi 6:3) Jiisusi qilammi pissarsuulluni anersaajugallarami  „pisuujusimagaluarluni“ uagut pilluta „piitsunngorpoq“. Inuttut pingaannginnerusutut atorfeqarumavoq, ilaqutariillu sulisartutut allatulli ittut peroriartorfigalugit. (2 Korinthimiut 8:9; Filippimiut 2:5-9; Hebræerit 2:9) Jiisusip ilaqutariinnit pisuuneersuunnginnera pissutigalugu taassumunnga assersuussinnaanerulerpugut. Pingaarnerusumit allamut saasaasinnaasumik taaguuteqaranilu atorfeqanngilaq. Tassami ilinniartitsinera, pissusii kajungernartut tupinnangaartuliaalu pillugit inuit akuerisussaavaat. (Matthæusi 7:28, 29; 9:19-33; 11:28, 29) Jiisusip ilaqutariinni nalinginnaasuni inunngornera Jehova Guutip ilisimassusianut ersiutaavoq.

Maanna Jiisusip ilaqutaasa ilai qanoq ilinniarfigisinnaanerlugit misissueriarta.

Josefi — angut naapertuilluartoq

Josefip pissianilu „inooqatigiilersinnatik” naartulersimasoq paasigamiuk misigissutsimigut Mariamut asanninnini kinguaassiuutitigullu kanngunartuliortoqasimasinnaaneranik eqqarsaateqalersimanerminik maajuginninnini aalaterneqaatigisimassaqai. Imaassimasinnaagunarpoq uissatut pisinnaatitaaffia narrunarsarneqartoq. Taamanikkut pissiariinneq aappariinnertulli isigineqarpoq. Pissutsit eqqarsaatigereerlugit Josefi aalajangerpoq Maria isertorluni avinniarlugu, allasiorsimasutut ujaqqanik milloorneqannginniassammat. — Matthæusi 1:18; 5 Mosesi 22:23, 24.

Taava inngilip Josefi sinnattukkut saqqummerfigaa oqarlunilu: „Mariap nulissiunnissaa nangaassutigissanngilat naartua Anersaakkut Illernartukkut ilumiugineqalermat. Ernertaarumaarpoq, taannalu Jiisusimik atsissavat, innuttani annaatissammagit ajortaannit.“ Josefi Guutimit ilitsersorneqareerami, inngilip oqarneratut iliorpoq, Marialu inatsisit naapertorlugit nuliartaaralugu angerlaappaa. — Matthæusi 1:20-24.

Taamatut aalajangernermigut Josefi naapertuilluartoq aalajaatsorlu Jehovap Esaja aqqutigalugu oqaaserisimasaanik eqquutsitseqataavoq: „Takuat, arnaq inuusuttoq naartulissaaq ernertaassallunilu, taannalu atsissavaa Immanuelimik.“ (Esaja 7:14) Josefi anersaakkut ittunik ilumut pingaartitsisuuvoq, Missiarsimullu angutisianngornissaminik pisinnaatitaaffini pingaartillugu. Mariap angajulliliaa nammineq qitornarinagu kajumilluni akueraa.

Maria ernertaareertinnagu Josefip innaatinngilaa. (Matthæusi 1:25) Aappariilerlaanut pinaveersaarnissaq imaannaasimassagunanngilaq, meeqqalli kina Ataatagineraa qularineqassasoq kissaatigisimannginnguatsiarpaat. Taamaaliornermikkut imminut naalakkersinnaanermik maligassiuilluarput. Josefip anersaakkut pingaarutillit nammineq kissaatiminiit pingaarnerutippai.

Nukappiaqqap peroriartornerani qanoq iliussanerminik Josefi sisamariarluni inngili aqqutigalugu ilitsersorneqarpoq. Ernissani sumi najugaqatigissanerlugu pingasoriarluni ilitsersorneqarpoq. Meeraq inuuinnassappat ingerlaannaq iliuuseqartariaqarpoq. Taamaattoqarneri tamaasa Josefip meeraq ingerlaannaq aallaruttarpaa, siullermik Egyptenimut tamatumalu kingorna Israelimut oqquppaa. Herodesip nukappiaqqat marlunniit ammut ukiullit toqorartimmagit Jiisusip inuunera annaanneqarpoq. Josefip naalannera Missiarsimik siulittuutit eqquunnerannik kinguneqarpoq. — Matthæusi 2:13-23.

Jiisusi imminut pilersorsinnaaniassammat Josefip assassoriaatsimik ilinniartippaa. Tamanna pissutigalugu Jiisusi „sanasup erneranik“ taaneqaannarani aamma „sanasumik“ taaneqartarpoq. (Matthæusi 13:55; Markusi 6:3) Apustili Paulusip allakkamini Jiisusi „tamatigut uagutsitut usserneqarsimas“ uunerarmagu, Jiisusip ilaquttaminik pilersueqataaniarluni suleruloorsimanera pisimassavaa. — Hebræerit 4:15.

Josefip pallorfiginninnermik ilumoortumik nuannarisaqarnerata qanoq annertutiginera minnerunngitsumik erserpoq, Jerusalemimut  poorskisioriarluni angalanerannut atatillugu Testamentitaami allaaserineqarnerani kingullermik tusarfigigatsigu. Inatsisini angutit kisimik poorskisioriarnissaannut inanneqarput, Josefilli ilaquttani „ukiut tamaasa“ Jerusalemimut ilagisarlugit sungiusimavaa. Ilaquttat tamaasa ilaginissaat imaannaanngitsuuvoq, Nazaretimiimmi Jerusalemiliarneq kilometerit 100-t sinnerlugit pisuinnarluni ingerlasariaqarpoq. Angalanerup Biibilimi atuakkatta nalaani Jiisusi angalaqatigiinnit qimaguppoq. Naalaffimmi Inatsimmik ilinniartitsisunik tusarnaarlunilu apeqquteqartartoq nassaarineqarpoq. Ersarippoq Jiisusip aqqaneq-marluinnarnik ukiullip Guutip oqaasii nalunngilluarlugillu ilisimassummik angingaartumik pigisaqartoq. Pisimasumit tassannga takusinnaavarput Jiisusip angajoqqaavisa ilinniartilluarsimassagaat, anersaakkullu pingaartitsisuunissaanut ikiorsimagaat. (Lukasi 2:41-50) Josefi tamatuma kingorna toqusimagunarpoq, tassami Biibilimi eqqaaqqinneqanngilaq.

Aap, Josefi angutaavoq naapertuilluartoq, ilaquttaminik anersaakkut timikkullu isumassuilluartoq. Ullumikkut Guutip uatsinnut sumik ilimasuffigigaatigut takusinnaagaangakku Josefitut anersaakkut soqutigisat salliutittarpigit? (1 Timotheusi 2:3, 4) Guutip nipaa oqaasiani Biibilimi ersertoq kajumillutit naalattarpiuk, Josefitut takutillugu piumasaa naalallugu? Meeqqatit anersaakkut ittunik imaqarluartunik allanut oqaloqateqarsinnaanngorlugit ilinniartittarpigit?

Maria — Guutimut kiffaq namminissarsiunngitsoq

Jiisusip arnaa, Maria, arnaavoq Guutimut tunniusimasoq. Inngilip Gabrielip ernertaarniarnerarmani tupaallaatigaa. Niviarsiaagami „angummik ilaqarsimanngilaq“. Tusaramiuk anersaap illernartup sunniineratigut naartulerumaarluni, maniguulluni akuersivoq oqarlunilu: „Jehovap kiffaraanga. Oqaatsisit malillugit pineqarlanga.“ (Lukasi 1:30-38) Tamanna immikkut pisinnaatitaafferujussuartut isigigamiuk aalajangernermi kingunerisinnaasaanik naalliuuteqassalluni piareersimavoq.

Mariap suliassaq inuunerminik allanngortitsisoq suliariumavaa. Minguersarnissaminut atatillugu Jerusalemiliarmat Simmiuup angutip utoqqaap Guutimik mianerinnittup oqarfigaa: „Ilami illittaaq nammineq tarnit panap kapissavaa.“ (Lukasi 2:25-35) Jiisusip inuppassuarnit ajattorneqarnera, naggataatigullu qisummut nappakkamut paagunneqarnera takullugu Mariap anniarnissaa Simmiuup pinnguatsiarpaa.

 Jiisusip peroriartornerani pisut Mariap maluginiarpai, „uummamminullu toqqorpai“. (Lukasi 2:19, 51) Josefitulli anersaakkut ittunik pingaartitsisuuvoq, pisullu oqaatigineqartullu siulittuutinik eqquutsitsisut tamaasa eqqaamattuinnarlugit. Qularnanngitsumik inngilip Gabrielip oqaasii puigunngisaannarpai: „Pingaartorsuanngussaaq Qutsinnerussaartullu erneranik taaneqassalluni, Guutillu [Jehovap] tunissavaa ataataata Daavip issiavissaarsuanik; Jaakukkunnut kunngiussaaq naassaanngitsumik, naalagaassusialu atajuaannassaaq.“ (Lukasi 1:32, 33) Aap, Missiarsimut anaanaanini ataqqinaataasoq ilumoorulluinnarpaa.

Mariap anersaakkut ittunik pingaartitsinera erserportaaq ilaquttaminik Elisabethimik naapitsimmat, taanna aamma tupinnartuliornikkut naartulersimavoq. Imminnut takugamik Mariap Jehova unnersiutigilerpaa, Guutip oqaasianik annertuumik asanninneranik oqaatsit takutitsisut atorlugit. Hannap qinnutaa Samuelimik allakkat siulliit kapitali 2-mi atuarneqarsinnaasoq issuaaffigaa, tassungalu ilannguppai eqqarsaatit Testamentitoqqap atuagartaasa ilaaneersut. Allakkanik Illernartunik ilisimasaqarluarnerata taamaattup takutippaa anaananngorumaartoq asannittoq Guutimillu mianerinnittoq. Josefi suleqatigalugu ernini ajunngitsumik anersaakkut ilinniartissavaa. — 1 Mosesi 30:13; 1 Samueli 2:1-10; Malaki 3:12; Lukasi 1:46-55.

Ernermi Missiarsiuneranut Maria uppernermik sakkortuumik takutitsivoq, toqunerata kingorna allaat sakkukillinngitsumik. Makinnerata kinguninngua ajoqersukkanut apustilinik qinoqatiginninniarlutik naapittunut ilaavoq. (Apustilit Suliaat 1:13, 14) Naak ernini qisummi nappakkami toqusoq takullugu naalliuutigisariaqaraluarlugu aalajaattuarpoq.

Mariap inuuneranik paasisaqarneq qanoq iluaqutigisinnaaviuk? Qanorluunniit pilliuteqassagaluaruit Guutimik kiffartuussinissaq immikkut pisinnaatitaaffittut isigaajuk? Taamatut immikkut pisinnaatitaaffeqarnerup ilungersunarnera takuiuk? Jiisusip siulittuutai maluginiartarpigit, ’uummatikkullu isummerlutit’ ullumikkut pisunut atassusertarpigit? (Matthæusi, kapitali 24 aamma 25; Markusi, kapitali 13; Lukasi, kapitali 21) Mariatut Guutip oqaasianik ilisimasaqarluarpit aamma allat oqaloqatigigaangakkit issuaaffigisinnaavigit? Jiisusimut uppertuarnissaq piareersimaffigaajuk, qanorluunniit Jiisusimut ajoqersugaaneq siooranartoqartigalunilu alianartoqartigigaluarpat?

Jiisusip qatanngutai — allanngorneq ajornanngilaq

Jiisusip nukaasa Jiisusi toqoreermat aatsaat upperfigilersimannguatsiarpaat. Taamaammat tamanna pissutigigunarlugu Jiisusi qisummi nappakkami toqummat, anaananilu apustili  Johannesimut paarisassanngortittariaqarmagu, najuutinngillat. Jiisusi kinaanersoq ilaqutaasa ilumut paasisimanngilaat, allaallu ilaanni ’paatsiveerutivissimasutut’ taallugu. (Markusi 3:21) Uppinngitsunik ilaqutalinnut tuppallersaataasinnaavoq nalunagu Jiisusi uppinngitsunik ilaqutaqarsimasoq, taamaattumillu upperneq pillugu mitagaaneq qanoq ittuunersoq paasisinnaagaa.

Jiisusilli makinnerata kingorna nukaasa upperilersimannguatsiarpaat. Ukiumi 33-mi piinsip ullua tikitsinnagu Jerusalemimi naapittut apustilillu ilagalugit qasusuillutik qinusut ilaattut eqqaaneqarput. (Apustilit Suliaat 1:14) Qularnanngitsumik qatanngutissamik makinnera pissutigalugu isumaat allanngorpoq, tassungalu ajoqersuganngorlutik. Ilaquttat uppinngitsut allamik isumataarumaartut neriuutigiunnaanngisaannassavarput.

Biibilimi takuneqarsinnaavoq Jiisusip qatanngutissaa Jaaku, taanna Jiisusip saqqummerfigisaa, ilagiinni kristumiuni nuimasumik inissisimaffeqarsimasoq. Jaaku Guutimit isumassarsitinneqarluni uppeqatiminut kristumiunut allappoq, uppernertik attatiinnaqqullugu kajumissaarlugit. (Apustilit Suliaat 15:6-29; 1 Korinthimiut 15:7; Galatiamiut 1:18, 19; 2:9; Jaaku 1:1) Judasi, Jiisusip qatanngutissaa alla, isumassarsisitaalluni kristumiunut allagaqarpoq, kajumissaarlugit uppernertik ilungersuutigissagaat. (Judasi 1) Maluginiarneqassaaq Jaakup Judasilluunniit allakkaminni Jiisusimik timikkut ilaqutaqarnertik innersuussutiginngimmassuk. Arlaannaataluunniit tamanna atorlugu kristumioqatitik sunnerniarsarinngilaat. Tamatumuuna anneruniajuissusermik maligassiuilluarput.

Sunimmiuna Jiisusip ilaqutai ilinniarfigisinnaagivut? Tunniussimaneq pillugu kimittuunik maligassiuilluarnerat takuarput, makkuninnga ilinniarfigisinnaasatsinnik: (1) Aalajaalluta Guutip piumasaa naalassavarput, misiligaanerillu kingunerisinnaasai atorlugit. (2) Anersaakkut soqutigisat salliutissavavut, pilliuteqartariaqaraluaruttaluunniit. (3) Meeqqatta Allakkanik ilisimasaqarluarnissaat isumagissavarput. (4) Neriuttuassaagut ilaquttat uppinngitsut allamik isumataarumaartut. (5) Ilagiinni kristumiuni nuimasumik suliaqartartumik qanittumik attaveqarneq pingaakujunniutigissanngilarput. Aap, Jiisusip ilaqutaasa nunamiut ilisimanerisigut tassunga qaninnerulersippaatigut, Jehovallu Jiisusi ilaqutariinni nalinginnaasuni peroriartortissallugu qinersimammagu pingaartitsinissatsinnut pissutissaqarpugut. (wE 12/15 03)

[Qupp. 4, 5-mi assiliartat]

Mariap katinneratigut Josefi Missiarsimik siulittuutinik eqquutsitseqataavoq

[Qupp. 6-mi assiliartat]

Josefi Marialu meeqqaminnut anersaakkut nalilinnik tunniussipput inuussutissarsiorlutillu sulinissaannik ilinniartippaat

[Qupp. 7-mi assiliartat]

Jiisusi toqoreersoq aatsaat nukaasa upperfigilerpaat, naak anersaakkut ajoqersorluarneqarsimagaluarlutik

[Qupp. 8-mi assiliartat]

Jiisusip qatanngutissaasa Jaakup Judasillu uppeqatitik kajumissaarpaat