Mianersorit — salloqittarteqinak

„Mianersoritsi napitinneqaqqunasi . . . salloqittaatinik piunngitsunik.“ — KOLOSSEMIUT 2:8.

1-3. (a) Assersuutit suut takutippaat ulluinnarni inuunermut tunngasut tamangajaasa peqquserlunnernit attoqillanneqartartut? (b) Sooq tupaallaatigissanngilarput silarsuarmi avatangiisitsinni peqquserluttoqarnera?

UKIUALUIT matuma siorna inatsisit pillugit professori misissuivoq inatsisilerituunik ima apersuilluni: „Ilasi qassit sullitaminnit salluliorfigitinngisaannarpat?“ Qanoq akippat? Ima oqaluttuarpoq: „Inatsisilerituunit 1000-init ataasiinnaq sullitaminit salluliorfigitinngisaannarsimavoq. Inatsisileritooq sulifferujussuarmi aatsaat sulilerami suli sullitaqalersimannginnera pissutaaginnarpoq.“ Misigisap tamatuma ilumoortoq alianartoq erseqqissarpaa — ullutsinni silarsuarmi salluliorneq peqquserlunnerlu nalinginnaapput.

² Assigiinngitsorpassuarnik peqquserloriaaseqarpoq, ullumikkullu inuunerput tamangajammi taakkunannga sunnerneqarsimavoq. Tusagassiuutini assersuutissarpassuaqarpoq — politikerit iliuutsitik pillugit salluliortarput, revisorit eqqartuussissuserisullu suliffiit iluanaarutaannik ingasaassisarput, ussassaarusiortartut atuisunik uukapaatitsisarput, inuit sillimmasiisarfiit eqqartuussisulersuuttarpaat peqqusersusaarfigisarlugillu, ikittuinnaat eqqaassagaanni. Aamma upperisarsiornikkut uukapaatitsisoqartarpoq. Palasit inuppassuarnik tammartitsisarput eqqunngitsumik ajoqersuinermikkut, soorlu anniarfimmik ajoqersuummik, ataasiullunilu pingasuussusermik ajoqersuummik tarnillu toqusuitsuuneranik ajoqersuummik. — 2 Timotheusi 4:3, 4.

 ³ Taama peqquserluttoqartiginera tupaallaatigissavarput? Naagga, Biibilimimi ’ullut kingulliit’ pillugit ima mianersoqqussuteqarpoq: „Inuit ajortut peqquserluttullu ajortumut nakkaakkiartuinnartussaapput, ilaminnik tammartitsillutik imminnullu tammartillutik.“ (2 Timotheusi 3:1, 13) Kristumiutut eqqumaffigisariaqarpavut eqqarsaatit salloqittaasut sallusuissumit uagutsinnik nigortitsisinnaasut. Tamatumunnga tunngatillugu pissusissamisoortumik aperisoqarsinnaavoq ima: Sooq ullumikkut taama peqquserluttoqartigaa, peqquserluffigitikkumanatalu qanoq iliorsinnaavugut?

Sooq ullumikkut taama peqquserluttoqartigaa?

4. Ullumikkut silarsuarmi sooq taama peqquserluttoqartiginera Biibilimi qanoq nassuiarneqarpa?

⁴ Biibilimi erseqqissumik nassuiarneqarpoq ullutsinni silarsuarmi sooq taama peqquserluttoqartigisoq. Apustili Johannesi allappoq „silarsuaq tamarmi Ajortumut naalatsigitittoq“. (1 Johannesi 5:19) ’Ajortoq’ uani pineqartoq tassaavoq Saatani Diaavulu, taannalu pillugu Jiisusi ima oqarpoq: „Sallusuissummiinngilaq, taassuminnga ilumiugisaqannginnami. Sallugaangami imminerminit oqaluttarpoq, sallutuujugami sallumullu ataataagami.“ Taamaattumik tupigusuutigineqarsinnaanngilaq anersaaq, eriagisassat peqquserlunnerlu silarsuup naalagaata ilisarnaatigisai silarsuup ersersimmagit. — Johannesi 8:44; 14:30; Efesosimiut 2:1-3.

5. Naggatissap nalaani matumani Saatani inunnik salloqittaaniarsarinermini qanoq ingasatsikkaluttuinnarpa, ingammillu kikkut saassuttarpai?

⁵ Naggatissap nalaani matumani Saatani ilungersorneruleraluttuinnarpoq. Nunamut igitaasimavoq, nalunnginnamiullu piffissakilluni ’kamattorsuuvoq’. Aalajangiusimavaa sapinngisamik inuit amerlanerpaat suujunaarsitaaqatiginissaat, taamaattumillu ’silarsuarmik tamarmik tammartitsiniarpoq’. (Saqqummersitat 12:9, 12) Saatani ilaannikkuinnaq peqquserluffiginninniartanngilaq. Naagga, inuiannik tammartitsiniarsarinermini tamaviaarpoq. * Uppinngitsut eqqarsaataat tappiillisinniarlugit Guutimullu qanillisinnaveersaartinniarlugit peqquserloriaatsit tamaasa sakkugisinnaasani atortarpai — ilaatigut salluliorneq killuussinerlu. (2 Korinthimiut 4:4) Salloqittaallammassuup taassuma ingammik Guutimik „anersaakkut ilumoornikkullu“ pallorfiginnittut iinissaat aalajangiusimavaa. (Johannesi 4:24; 1 Petrusi 5:8) Puiunngisaannartigu Saatanip kikkut tamaasa Guutimut tunussitissinnaanerarai. (Jobi 1:9-12) Misissoriartigik Saatanip ’qoqasseriaasii’ assigiinngitsut, paasiniarlugulu taakkununnga qanoq illersorsinnaanersugut. — Efesosimiut 6:11.

Tunussisut salluliuutaat mianersorfigikkit

6, 7. (a) Tunussisorpassuit imminnut qanoq oqaatigisarpat? (b) Tunussisut anguniagaat Biibilimi erseqqissumik qanoq allaatiginneqarpa?

⁶ Saatanip Guutip kiffaanik tammartitsiniarluni tunussisut sivisoorujussuarmik atorsimavai. (Matthæusi 13:36-39) Tunussisut Jehovamut pallorfiginnittuunerarsinnaapput Biibililu upperinerarsinnaallugu, peqatigiissortaatali takussaasortaa akueriumanngilaat. Allaat ilaat ’Babylonersuarmi’, eqqunngitsumik upperisarsiornerup silarsuarmi tamarmi naalagaaffissuani, ajoqersuutigineqartunut Guutimik kanngunarsaataasunut utersimapput. (Saqqummersitat 17:5; 2 Petrusi 2:19-22) Guutip Biibilimik allattut isumassarsisippai tunussisut pissutigisaannik periaasiinillu ersersitsinissamut oqaatsinik sakkortuuliortillugit.

⁷ Tunussisut sunaana anguniaraat? Amerlanersaasa upperisamik immaqa ilumoortutut isigisimasaraluaminnik qimatsinissartik naammaginngilaat. Allat imminnut malinnaatikkusuttarpaat. Nammineq ajoqersuganngortitsiortornatik tunussisorpassuit ’ajoqersukkanik [tassa Jiisusip ajoqersugaanik] imminnut malinnaatitsiniarsaripput’. (Apustilit Suliaat 20:29, 30) Apustili Paulusi eqqunngitsumik ilinniartitsisut pillugit ilungersortumik ima mianersoqqusivoq: „Mianersoritsi napitinneqaqqunasi.“ (Kolossemiut 2:8) Taamatorpiaq tunussisut iliorniarsarinnginnerpat? Soorlu aallarussisoq uppiasumik ilaqutaanit aallarussiniaraangami ussassaariniartartoq, tunissisut ilagiinniittut tatiginnittut tiguarniarsarisarpaat savaatinillu qimagutitinniarsarisarlugit.

8. Tunussisut anguniagartik anguniarlugu qanoq periaaseqartarpat?

 ⁸ Tunussisut anguniagartik anguniarlugu qanoq periaaseqartarpat? Eqqortut killormoortunngortittarpaat ilumoortortalinnillu salluliuutinilluunniit oqaluttarlutik. Jiisusip nalunngilaa ajoqersukkani ’ajortunik oqaatigineqartarumaartut salluliuutigalugit’. (Matthæusi 5:11) Akerlilersuisut uumiginnittut taamaattut salluliortarput allat salloqittarniarlugit. Apustili Petrusi mianersoqqusivoq tunussisut anguniagartik anguniarlugu ’salluliuutinik oqalussasut’, ’peqquserluutinik’ siaruarterissasut ’allakkallu piumasaannarminnik isumalersortassallugit’. (2 Petrusi 2:3, 13; 3:16) Ajoraluartumik ’amerlasuut uppernerat aseroriartortissimavaat’. — 2 Timotheusi 2:18.

9, 10. (a) Tunussisunit salloqittartikkumanata qanoq iliorsinnaavugut? (b) Guutip siunertaa pillugu paasisavut allanngortinneqartariaqaraangata sooq eqqissiunnaarutigisanngilavut?

⁹ Tunussisunit salloqittartikkumanata qanoq iliorsinnaavugut? Guutip oqaasiani ima allassimavoq: „[Sianigisigik] ajoqersuummut ilassisimasassinnut akerliullutik avissaartortitsiniartut allanillu tammartitsisut. Taakku nigorsimaniarsigit!“ (Romamiut 16:17) ’Nigorsimasinnaavavut’ taakkua — nammineerlutik, naqitanngorlugit internettikkulluunniit — saqqummiuttagaat malinnaaffiginaveersaarlugit. Sooq taamaaliussaagut? Siullermik Guutip oqaasiani siunnersuut taamaammat, tatigigatsigulu Jehovap tamatigut uagutsinnut pitsaanerpaaq kissaatigigaa. — Esaja 48:17, 18.

¹⁰ Aappassaanik ilagiit kristumiut, sallusuissutinik naleqangaartunik Babylonersuarmit immikkooruteqarnissatsinnik uagutsinnik ilinniartitsisimasut, asagatsigik. Aammattaaq nassuerutigaarput Guutip siunertaa ilisimalluinnarsimanatigu; ukiut ingerlaneranni paasisavut naqqinneqartarput. Kristumiut ilumoorfiginnittut utaqqerusuppaat allanngortitsisoqartariaqassappat Jehovap tamanna isumagiumaarmagu. (Ussatit 4:18) Taamaalinnginnerani ilagiit Guutip atorusutai qimassanngilavut, taakkuninngami pilluaqqusineranut erseqqissunik uppernarsaatissaqarpoq. — Apustilit Suliaat 6:7; 1 Korinthimiut 3:6.

Imminut salloqittarnissat mianersorfigiuk

11. Sooq inuit naammalluinnanngitsut imminut salloqittaqqajaasarpat?

¹¹ Inuit naammalluinnanngitsut iliuuseqaqqajaasarput Saatanip atorniapallattagaanik — imminut salloqittaqqajaasarpugut. „Tamanit annerusumik uummat tatigisassaanngitsuuvoq.“ Jeremia 17:9-mi allassimavoq. Jaakulu ima allappoq: „Kinaluunniit usserneqartarpoq nammineq pilerissutsiminit nassataritilluni kajumitsatsitaallunilu.“ (Jaaku 1:14) Uummat tammartinneqarsimaguni, neqeroorutit ajortuliortitsisinnaasut narajatut atorsinnaavai ajortuliornerlu kajungernartutut ajoqutaanngitsutullu  isikkoqalersillugu. Salloqittagaaneruvorli, ajortulioruttami naggataatigut ajunaarutigissavarput. — Romamiut 8:6.

12. Imminut qanoq salloqittarsinnaavugut?

¹² Imminut salloqittarluta pisariteriaannaasinnaavugut. Uummatitta tatigisassaanngitsup immaqa ajortuliaq sualuttoq utoqqatsissutissarsiussavaa sanngiissulluunniit suunngitsutut nassuiaatissarsiussallugu. (1 Samueli 15:13-15, 20, 21) Uummatitta tatigisassaanngitsup ileqqoq ajorsorinarsinnaasoq, assersuutigalugu aliikkusersornermut atatillugu, aamma naapertuilluartuutinniarsarisinnaavaa. Aliikkusersoriaatsit ilaat ineriartornarlutillu inuummarissinarput. Silarsuarmili neqeroorutigineqartartorpassuit — filmini TV-milu aamma internettimi — paquminartuullutillu ileqqorluttuupput. Aliikkutassiat taqassinartut ajoqutiginagit takusinnaallugit imminut salloqittartoqariaannaavoq. Allaat ima tunngavilersuisoqartarpoq: „Ilerasuutiginngilara, suna ajorami?“ Taamaalillutilli ’imminnut salloqittartarput’. — Jaaku 1:22.

13, 14. (a) Biibilimi assersuutip suup takutippaa nalunngeqatiginnissuserput siunnersortitut tatiginartuujuaannanngitsoq? (b) Imminut salloqittarumanata qanoq iliorsinnaavugut?

¹³ Imminut salloqittarniarnata qanoq iliorsinnaavugut? Pingaarnerpaamik eqqaamasariaqarparput  nalunngeqatiginnissuserput tatigiuaannarsinnaanagu. Apustili Paulusi assersuutigeriartigu. Kristumiunngunngikkallarami Jiisusip ajoqersugai malersorpai. (Apustilit Suliaat 9:1, 2) Immaqa taamanikkut tamanna ilerasuutiginngilaa. Erseqqipporli nalunngeqatiginnissusia tammartitaasimasoq. ’Uppinngissutsinni sianiginagu taamaaliorpunga,’ Paulusi allappoq. (1 Timotheusi 1:13) Tassa nalunngeqatiginnissutsitta aliikkusersuutinut aalajangersimasunut qisuariannginnera immini qulakkeerutaanngilaq eqqortumik ingerlanitsinnut. Nalunngeqatiginnissuseq peqqissoq Guutip oqaasianit ilinniartitaalluartoq kisimi siunnersortigineqarsinnaavoq qularnaatsoq.

¹⁴ Imminut salloqittassanngikkaanni siunnersuuteqarpoq malinneqarunik iluaqutaasussanik. Qinunikkut imminut misissorit. (Tussiaat 26:2; 2 Korinthimiut 13:5) Imminut ilumoorluta misissoreerluta immaqa paasissavarput isiginnittaatsitsigut periaatsitsigulluunniit allanngortitsisariaqarluta. Allat tusarnaartakkit. (Jaaku 1:19) Imminut misissoraangatta nammineq isumarput salliuteqqajaasaratsigu, uppeqatit inersimalluartut isumaasa piviusorsiortut tusarnaarnissaat silatusaarnerussaaq. Paasigukku uppeqatitit misilittagallit siuneqassuseqarluartut iliuuserisannik arlaannilluunniit qinersinernik eqqissisimajunnaaruteqartut, imminut ima aperisinnaavutit: ’Imaassinnaava nalunngeqatiginnissusera eqqortumik ilinniartinneqarsimanngitsoq, imaluunniit uummatima salloqittarpaanga?’ Aalajangersimasumik Biibilimik atuagassianillu Biibililersaarutinik atuartarit. (Tussiaat 1:2) Taamaalioruit iluaqutigissavat isiginnittaatsinnik, eqqarsartaatsinnik misigissutsinnillu Guutip oqaasiani najoqqutassianut naapertuuttunngortitsinissannut.

Saatanip salluliuutai mianersorfigikkit

15, 16. (a) Saatanip salloqittarniarluta suut salluliuutigisarpai? (b) Salluliuutinit taakkunannga qanoq salloqittartinnaveersaarsinnaavugut?

¹⁵ Saatanip salloqittarniarluta assigiinngitsorpassuarnik sallulioriaaseqarpoq. Isumaqalersinniarsaraatigut pigisat nuannaalersissinnaagaatigut nalerisimaalersissinnaagaatigullu, paarlattorluinnaanik pisoqartaraluartoq. (Oqaluussisartup oqaasii 5:10-12) Isumaqartikkusuppaatigut silarsuaq guutiitsoq manna naassaanngitsumut atassasoq, naak ’ulluni kingullerni’ inuunitsinnut erseqqissunik uppernarsaatissaqaraluartoq. (2 Timotheusi 3:1-5) Saatanip isuma manna siuarsarpaa inuunerlukkaanni susoqarnavianngitsoq, naak inuit inuulluarumatuut inooriaatsimik kingunipilui anniaatigisaraluaraat. (Galatiamiut 6:7) Salluliuutinit taamaattunit qanoq salloqittartinnaveersaarsinnaavugut?

¹⁶ Biibilip nalaani pisimasut ilinniutigikkit. Biibilimi maligassiuinerluttut Saatanip salluliuutaanit salloqittartissimasut mianersoqqussutitut allaatigineqarput. Pigisanik nuannarinnittuupput, piffissap inuuffigisamik ilungersunarnera puiorpaat, inuunerlulerlutilluunniit — tamakkulu tamarmik alianartunik kinguneqartarput. (Matthæusi 19:16-22; 24:36-42; Lukasi 16:14; 1 Korinthimiut 10:8-11) Nalitsinni pisimasut ilinniutigikkit. Ajoraluartumik ilaannikkut kristumiut ilaasa piffissap ilungersunartuunera malugisimajunnaartarpaat isumaqalertarlutillu Guutimut kiffartornermikkut annaasaqarlutik. Immaqa sallusuissut qimattarpaat „inuunerlu nuannaarutigisinnaalertarlugu“ oqartarnermittut. ’Quasartumiittutulli’ ittarput, qaqugukkulluunniimmi guutiitsuliornermik kinguneri atulerumaarpaat. (Tussiaat 73:18, 19) Allat kukkussutaat ilinniutigigutsigik silatusaassaagut. — Ussatit 22:3.

17. Guutip isaani pingaaruteqannginnitsinnik taassumanngalu asaneqannginnitsinnik salluliuut Saatanip sooq siuarsarpaa?

¹⁷ Iluatsittumik Saatanip salluliuutigisartagaa alla tassaavoq uagutsinnik isumaqalersitsinniartarnera Jehovap isaani pingaaruteqanngitsugut taassumalu asanngikkaatigut. Saatanip inuit naammalluinnanngitsut ukiuni tusindilikkuutaani alapernaarsorsimavai. Nalunngilluinnarpaa nikallunganitta sanngiillisissinnaagaatigut. (Ussatit 24:10) Taamaattumik kissaatigaa Guutip isaani pingaaruteqannginnitsinnik salluliuut upperissagipput. ’Orlutitaalissagaluarutta’ qularunnaarsinneqalissagaluaruttalu Jehovap soqutiginngikkaatigut tunniutiinnaqqajaasinnaavugut. (2 Korinthimiut 4:9) Tamannarpiarlu salloqittaasup annerup kissaatigaa! Salluliuummit Saatanimeersumit tamatumannga qanoq salloqittartinnaveersaarsinnaavugut?

18. Jehovap asagaatigut Biibilimi qanoq neriorsoqqissaarneqarpugut?

 ¹⁸ Guutip uagutsinnut asanninnera pillugu Biibilimi allassimasut eqqarsaatigikkit. Jehovap malugisaraatigut inuttullu asagaatigut qularunnaarsinniarluta Guutip oqaasiani qamuuna nuannaajallannartunik assersuuteqarpoq. Qullitit ’imiisivimmini amiusumi’ toqqortarai, ima paasillugu aalajaattuarniarlutit akiuunninni qullilinitit takuai eqqaamallugillu. (Tussiaat 56:9) Qanoq innikkut ’sequmissimasumik uummateqarnersutit’ nalunngilaa, pissutsinilu taamaattuni qanittarpaatit. (Tussiaat 34:19) Illit pillutit sumininnguit tamaasa, ilaatigut nutsatit qassiunersut, nalunngilai. (Matthæusi 10:29-31) Pingaarnerpaamik Guutip ’ernituani’ uagut pilluta tunniussimavaa. (Johannesi 3:16; Galatiamiut 2:20) Immaqa ilaannikkut allassimaffiit taakkua ilinnut atuunnerat upperiuminaatsissinnaavat. Jehovalli oqaasia upperisariaqarparput. Kissaatigaa upperilluinnassagipput asagaatigut, eqimattatuinnaanngitsoq, aammattaarli inuttut ataasiakkaatut.

19, 20. (a) Jehovamit asanneqannginnitsinnik salluliuutip ilisarinissaa itigartinissaalu sooq pingaaruteqarpa? (b) Nakkutilliisoq angalasartoq nikallungasunik qanoq ikiuisarsimava?

¹⁹ Salluliuut ilisariuk itigartillugulu. Nalunngikkukku sallusoqartoq salloqittartikkumanak imminut illersorsinnaavutit. Salluliuummik Jehovamit asaneqanngitsugut upperinninnissarput Saatanip kissaatigigaa ilisimaannarlugu iluaqutaangaarsinnaavoq. Napasuliaq Alapernaarsuiffik-mi allaaserisami Saatanip periaasiinut assigiinngitsunut mianersoqqussut qisuariarfigalugu kristumiu ima oqarpoq: „Paasisimanngilara misigissutsikka atorlugit Saatanip nikallortinniaraanga. Paasissutissaq tamanna misigissutsinnik taakkuninnga akiuinissannut kajumississutigaara.“

²⁰ Amerikami kujallermi nakkutilliisoq angalasartoq oqaluttuarpoq paarsisutut pulaaraangami uppeqatiminik nikallungasunik qanoq qiimmassaasarsimanerluni. Ima aperigajuppai: ’Ataasiullunilu pingasuussuseq upperaajuk?’ Nikallungasoq soorunami naameertarpoq, nalunnginnamiuk Saatanip salluliuutaasa ilagigaat. Taava nakkutilliisoq angalasartoq ima aperisarpoq: ’Anniarfik innerinnaasoq upperaajuk?’ Soorunami naameeqqittarpoq. Taava nakkutilliisup pulaakkani oqaluttuuttarpaa Saatanip aamma salluliuutigisartagaa alla amerlasuunit paasiuminaatsinneqartarsimasoq. Atuakkami Kom nær til Jehova-mi, * qupperneq 249-mi immikkoortumut 21-mut innersuussisarpoq, tassani nassuiarneqarmat inuttut ataasiakkaarluta Jehovamit asaneqannginnitsinnik oqartarneq salluliuutaasoq. Nakkutilliisoq angalasartoq oqaluttuarpoq taama periaaseqarluni nikalungasunik salluliuutip Saatanimeersup tamatuma ilisarinissaanut itigartinissaanullu ikiuinermini angusaqarluartarluni.

Salloqittartinnissat mianersorfigiuk

21, 22. Sooq Saatanip sallulioriaasii paasisinnaanngorsimavavut, sunalu aalajangiusimasariaqarparput?

²¹ Maanna ullut kingulliit naalerneranni naatsorsuutigiinnarsinnaavarput Saatanip inuit salloqittartuassagai salluliuutissarsiortuassasorlu. Taamaattumik qujamasuppugut Saatanip sallulioriaasii pillugit Jehovap paasitissimammatigut. Biibilimi atuagassianilu Biibililersaarutini ’kiffap ilumoortup silatuullu’ pilersittagaani Diaavulup periaasii ajortut erseqqissumik qulaarneqartarput. (Matthæusi 24:45) Nukittunerussaagut navianartoq piareersimaffigigutsigu. — 2 Korinthimiut 2:11.

²² Taamaattumik tunussisut eqqarsariaasii mianersorfigisigik. Imminut salloqittarnermit nakutitaanaveersaarnissarput aalajangiusimaniartigu. Saatanillu salluliuutai tamaasa ilisarisarniartigik itigartittarniartigillu. Taamaalilluta ’Guuti unneqqarissumut’, peqquserlunnermik uumiginnittumut, attaveqarnerput illersussavarput. — Tussiaat 31:6; Ussatit 3:32.  (wE 2/15 04)

[Quppernerup ataani ilanngussaq]

Uteqqiinermi apeqqutit

• Sooq ullumikkut silarsuarmi taama peqquserluttoqartigaa?

• Tunussisunit salloqittartinniarnata qanoq imminut illersorsinnaavugut?

• Imminut salloqittaqajaanivut tamaasa qanoq nakkutigisinnaavavut?

• Saatanip salluliuutaanit qanoq salloqittartinnaveersaarsinnaavugut?

[Atuaqqissaarnermi apeqqutit]

[Qupp. 27-mi assiliartaq]

Aliikkusersornermut atatillugu imminut salloqittarnaveersaarit

[Qupp. 28-mi assiliartat]

Imminut salloqittarnaveersaarsinnaavutit qinunikkut imminut misissorlutit, allat tusarnaarlugit aalajangersimasumillu Guutip oqaasia atuartarlugu